All posts by News Editor

ٹوکیو اولمپکس میں شاندار کارکردگی دکھانے پر جاپان میں تعینات پاکستان کے سفیر امتیاز احمد نے ایتھلیٹ ارشد ندیم کو تعریفی سند پیش کی۔

ارشد ندیم نے ٹوکیو اولمپکس میں جیولین تھرو مقابلے میں شاندار کارکردگی دکھائی اور فائنل میں پانچویں پوزیشن حاصل کی تھی۔

ارشد ندیم کوئی میڈل تو حاصل نہیں کرسکے البتہ انہوں نے پوری دنیا میں پاکستانیوں کے دل ضرور جیتے ہیں۔

اولمپکس میں شاندار کارکردگی پر ٹوکیو میں پاکستان کے سفیر امتیاز احمد نے ارشد ندیم کو تعریفی سند پیش کی۔

کشمیر پریمیئر لیگ کی ٹیم کوٹلی لائنز کے فاسٹ بولر عمران خان سینئر نوجوان فاسٹ بولرز کے ساتھ مقابلے سے نہیں گھبراتے اور کہتے ہیں جب کھیلنا ہے تو مقابلہ تو کرنا پڑتا ہے چاہے وہ سینئر ہو یا جونئیر، ٹیم کے لیے پرفارم کریں گے تو کھیلیں گے۔

کوٹلی لائنز کے فاسٹ بولر عمران خان نے جیو نیوز سے گفتگو میں کہا کہ پاکستان سپر لیگ میں اچھی بولنگ ہوئی، اب یہاں کشمیر پریمیئر لیگ میں بھی اچھی بولنگ کی کوشش کر رہا ہوں، میں نے یارکرز پر بہت محنت کی ہے اور سلو ڈلیوریز پر کام کیا ہے کیونکہ آج کی کرکٹ میں ورائٹی کا ہونا بہت ضروری ہے، اسی محنت کی وجہ سے میں اچھا پرفارم کرنے میں کامیاب ہو رہا ہوں۔

فاسٹ بولر نے کہا کہ لیگ کرکٹ سے اچھا ٹیلنٹ سامنے آ رہا ہے، شاہنواز دھانی اچھا بولر ہے، فاسٹ بولرز کے علاوہ اسپنرز اور نوجوان بیٹسمین بھی سامنے آ رہے ہیں جو خوش آئند بات ہے۔

عمرا ن خان سینئر نے کہا کہ کے پی ایل کشمیر کے نوجوانوں کے لیے زبردست موقع ہے، سینئر کھلاڑیوں کے ساتھ ڈریسنگ روم شیئر کر کے انہیں سیکھنے کا موقع ملے گا، کشمیری ٹیلنٹ سامنے آتا ہے تو اس سے پاکستان کو فائدہ ہو گا۔

انہوں نے کہا کہ کشمیر میں کرکٹ کا ماحول بہت اچھا ہے، خوبصورت گراؤنڈ اور موسم بہت شاندار ہے جسے بہت انجوائے کر رہا ہوں۔

بین الاقوامی اولمپک کمیٹی (آئی او سی) نے اپنے اختیارات میں وسیع کرتے ہوئے اولمپک پروگرام سے چند کھیلوں کو ہٹا دیا۔

رپورٹ کے مطابق آئی او سی نے ویٹ لفٹنگ اور باکسنگ کی قیادت کے ساتھ طویل تنازعات کے باعث نئے اختیارات کے لیے ووٹنگ کی، 2024 کے پیرس اولمپکس میں دونوں کھیلوں کے لیے ایتھلیٹس کا کوٹہ پہلے ہی کم کردیا گیا تھا اور اب ویٹ لفٹنگ کو مکمل طور پر ختم کیا جاسکتا ہے۔

اولمپک منشور میں کی گئی ترمیم کے مطابق اگر گورننگ باڈی، آئی او سی کے ایگزیکٹو بورڈ کے فیصلے کی تعمیل نہیں کرتی یا اس کے عمل سے اولمپک کی ساکھ کو کوئی نقصان پہنچتا ہے تو آئی او سی اس کھیل کو اولمپک سے ہٹا سکتی ہے۔

آئی او سی نے ایک شق ‘لیکن اس تک محدود نہیں ہے’ کا اضافہ کر کے اپنے اختیارات کو وسیع کرلیا ہے جس کے بعد کسی کھیل کو ہٹانے کی وجہ بتانا ضروری نہیں ہوگا۔

آئی او سی کے صدر تھومس بیچ سربراہی میں ایگزیکٹو بورڈ کو یہ اختیار بھی حاصل ہو گیا ہے کہ اگر کسی کھیل کی گورننگ باڈی فیصلے کی تعمیل نہیں کرتی تو اس کھیل کو اولمپکس سے معطل کیا جاسکتا ہے۔

نئے قواعد کی ضرورت آئی او سی کے نائب صدر جان کوٹس نے ظاہر کی جو اولمپک باڈی کے قانونی کمیشن کی قیادت کرنے کے ساتھ تھومس بیچ کے قریبی ساتھی بھی ہیں۔

کھیلوں سے متعلق اجلاس کے آخر میں جان کوٹس نے کہا کہ ‘ماضی قریب میں آئی او سی کو چند بین الاقوامی فیڈریشنز کی گورننس کے حوالے سے ایسی صورتحال کا سامنا کرنا پڑا جس نے سنگین خدشات کو جنم دیا۔

طویل عرصے سے ڈوپ کیسز اور گورننس کے مسائل بشمول مالی کرپشن کے باعث پیرس اولمپکس سے ویٹ لفٹنگ کے کھیل کو ختم کیے جانے کا قوی امکان ہے۔

ٹوکیو گیمز میں باکسنگ کا کنٹرول دو سال قبل بین الاقوامی باکسنگ ایسوسی ایشن سے واپس لے لیا گیا تھا اور اس کی وجہ 2016 کے ریو ڈی جنیرو اولمپکس میں باکسنگ کے مقابلوں کی ایمانداری پر شکوک اور ایسوسی ایشن کے صدارتی انتخاب پر آئی او سی کے خدشات تھے۔

آئی او سی اب ٹوکیو اولمپکس میں باکسنگ کی پرفارمنس اور صدر عمر کریملے کے تحت اے آئی بی اے کی جاری اصلاحات کو دیکھے گی اور اس کے بعد کھیل کو باضابطہ طور پر تسلیم کرنے یا نہ کرنے کا فیصلہ کرے گی۔

باکسنگ اور ویٹ لفٹنگ سمیت 28 کھیل اولمپک پروگرام میں شامل ہیں جبکہ میزبان شہر مقامی مارکیٹ کے من پسند کھیل شامل کرنے کی درخواست بھی کر سکتے ہیں۔

اس سال کے مقابلوں میں ٹوکیو نے بیس بال، سافٹ بال اور کراٹے شامل کیے جبکہ اسکیٹ بورڈنگ، اسپورٹ کلائمبنگ اور سرفنگ کو بھی متعارف کرایا، جو آئی او سی کی نوجوان ناظرین کی توجہ حاصل کرنے کی کوششوں کے مطابق ہے۔

بریک ڈانسنگ کا آغاز پیرس سے کیا جائے گا جبکہ اسکیٹ بورڈنگ، کلائمبنگ اور سرفنگ کو برقرار رکھا جائے گا۔

لاہور: پاکستانی اداکارہ میرا نے ایتھلیٹ ارشد ندیم کوکرکٹربنادیا۔

اداکارہ میرا اپنی گلابی انگلش اورخود ہی تعریفوں کے پل باندھنے کے باعث مشہور تو ہیں ہی لیکن اب ان کی ایک وڈیونے انہیں تنقید کا نشانہ بنا دیا ہے۔

اداکارہ نے اولمپکس میں جیولین تھرو مقابلے میں شاندارپرفارمنس دینے والے پاکستانی ایتھلیٹ ارشد ندیم کوکرکٹرہی بنادیا۔ اداکارہ نے کہا کہ ارشد ندیم نے بہترین کرکٹ کھیلی، یہ ہمارے ہیروز ہیں، جو پاکستان کے لیے کھیلتے ہیں حکومت کو ان کی حوصلہ افزائی کرنی چاہیے۔ چاہے وہ اداکار ہوں یا پھراتھلیٹ۔

ارشد ندیم نے بہترین پرفارمنس سے پاکستان کا نام روشن کیا، ان کی فارمنس میں بہت محنت اورایمانداری نظر آرہی تھی جو بہترین تھی۔

واضح رہے کہ ٹوکیواولمپکس میں پاکستانی ایتھلیٹ ارشد ندیم جیولین تھرو مقابلے کے آخری راؤنڈ تک پہنچے تھے اورپانچویں پوزیشن حاصل کی تھی۔

رواں برس مئی میں شادی کے بندھن میں بندھنے والی اداکارہ غنا علی نے اپنے شوہر کے دولت مند ہونے کی افواہوں پر پہلی بار وضاحت کردی۔

غنا علی نے 16 مئی کو سوشل میڈیا پوسٹس کے ذریعے مداحوں کو بتایا تھا کہ وہ رشتہ ازدواج میں بندھ گئیں۔

تاہم شادی کے اعلان کے فوری بعد ہی اداکارہ پر الزام لگایا گیا کہ انہوں نے خود سے زائد العمر اور پہلے سے ہی شادی شدہ اور ایک بچے کے باپ سے پیسوں کی وجہ سے شادی کی۔

شادی کے بعد امیر شخص سے شادی کے مسلسل طعنے ملنے پر اگرچہ وہ پہلے بھی جوابات دے چکی ہیں لیکن اب انہوں نے اس حوالے سے مزید وضاحت کردی کہ ان کے شوہر کے پاس کتنی دولت ہے۔

حال ہی میں غنا علی نے شوہر عمیر کے ہمراہ انسٹاگرام پر رومانوی تصاویر شیئر کی تو شوبز شخصیات سمیت ان کے مداحوں نے بھی کمنٹس کیے اور بعض افراد نے حسب معمول منفی کمنٹس کیے۔

ایسے ہی افراد میں سے ایک شخص نے کمنٹ کرتے ہوئے منفی کمنٹ والوں کو ڈانٹا مگر خود بھی غلط بات کہہ ڈالی۔

آر خان نامی شخص نے دوسروں کو ہدایت کی کہ وہ ایک جواب حاصل کرنے کے لیے اداکارہ کی پوسٹ پر غلط غلط کمنٹس کر رہے ہیں مگر ایسے لوگ یہ نہیں دیکھ رہے کہ اداکارہ نے آٹومیٹڈ ٹیلر مشین (اے ٹی ایم) سے شادی کی ہے؟

ساتھ ہی مذکورہ شخص نے لکھا کہ اگرچہ شادی کرنا اداکارہ کا ذاتی معاملہ ہے مگر اپنے فیصلے کو درست ثابت کرنا بھی ان کی ذمہ داری ہے۔

آر خان نامی شخص کے کمنٹ پر غنا علی نے بھی جواب دیا اور واضح کیا کہ ان کے شوہر کتنے امیر ہیں؟

اداکارہ نے لکھا کہ اگرچہ ان کے پاس بہت زیادہ دولت نہیں ہے اور نہ ہی انہیں اتنے پیسوں کی ضرورت ہے مگر وہ اپنی زندگی میں بہت خوش ہیں۔

غنا علی نے لکھا کہ وہ یہاں کسی کو وضاحت دینے کے لیے نہیں بیٹھیں اور ہر کسی کو اپنے کام سے کام سے رکھنا چاہیے، دوسروں کی زندگی میں خام خواہ کی دخل اندازی نہیں کرنی چاہیے۔

اداکارہ نے بتایا کہ ان کے شوہر اچھی ملازمت کرتے ہیں اور دونوں اپنی زندگی میں بہت خوش ہیں مگر لوگوں کی جانب سے کیے گئے منفی کمنٹس کی وجہ سے ان کی ذہنی صحت پر اثر پڑ رہا ہے۔

غنا علی نے واضح کیا کہ ان کے شوہر نہ تو اے ٹی ایم ہیں اور نہ ہی ان کے پاس بہت زیادہ دولت ہے۔

اگرچہ اداکارہ نے بتایا کہ ان کے شوہر کے پاس بہت زیادہ دولت نہیں لیکن انہوں نے واضح نہیں کیا کہ ان کے شوہر کیا کام کرتے ہیں اور ان کے اثاثے کتنے ہیں؟

غنا علی نے چند سال قبل ہی اداکاری کا آغاز کیا تھا، اشتہارات میں نظر آنے کے بعد غنا علی نے 2015 سے ڈراموں میں اداکاری سے آغاز کیا اور انہوں نے کیریئر کے آغاز میں ہی کامیاب ڈرامے دیے۔

’عشقاوے، سنگ دل، سایہ دیوار بھی نہیں، بے شرم، احساس، بے انتہا اور بے دردی سیاں‘ جیسے ڈراموں میں اداکاری کے جوہر دکھانے والی غنا علی نے 2017 میں ’رنگریزا‘ سے فلمی کیریئر کا آغاز کیا تھا۔

گزشتہ ماہ جولائی میں انسٹاگرام پر مداحوں کے سوالوں کے جوابات دیتے ہوئے اداکارہ نے یہ انکشاف بھی کیا تھا کہ وہ حافظ قرآن بھی ہیں۔

بالی وڈ بیبو کرینہ کپور کا کہنا ہے کہ وہ اپنی پہلی کتاب کو تیسری اولاد سے کم تصور نہیں کرتیں۔

کرینہ کپور اور اداکار سیف علی خان کے دوبیٹے ہیں تاہم اب کرینہ نے اپنی پہلی کتاب ’کرینہ کپور پریگننسی بائبل‘ کو اپنی تیسری اولاد قرار دیا ہے جس کی لانچنگ آج کی جائے گی۔

انسٹاگرام پر کرینہ کپور کی جانب سے گزشتہ روز اپنی ڈیبیو بک ’کرینہ کپور خان پریگننسی بائبل‘ کی تصویر شیئر کرتے ہوئے مداحوں کو کتاب کی لانچنگ سے متعلق اطلاع دی گئی۔

ویڈیو پوسٹ کےساتھ شیئر کیے گئے کیپشن میں کرینہ نے بتایا کہ وہ ہدایتکار کرن جوہر کے ساتھ ہونے والے لائیو سیشن میں کتاب کی لانچنگ کا اعلان کریں گی۔

اداکارہ نے مداحوں سے آج 5 بجے کرن جوہر کے ساتھ ہونے والے لائیو سیشن میں جوائن کرنے کی اپیل بھی کی جہاں وہ اپنی تیسری اولاد کو دنیا کے سامنے منظر عام پر لانے کے لیے بے چین ہیں۔

اداکارہ نے ایک اور پوسٹ میں مزید لکھا کہ مجھے اپنے زچگی کے تجربات آپ سب سے شیئر کرنے تک انتظار نہیں ہورہا۔

ممبئی: اداکاررنبیراوراداکارہ عالیہ بھٹ کی شادی کی خبریں ایک بار پھرعروج پرہیں۔

بھارتی میڈیا رپورٹس کے مطابق بالی ووڈ اداکارہ لارا دتہ سے ایک انٹرویوکے دوران پوچھا گیا کہ بالی ووڈ میں کون سا جوڑا شادی جلد کرنے جارہا ہے؟ جس پر اداکارہ نے کہا کہ وہ زیادہ کسی بھی جوڑے کے بارے میں اتنا نہیں جانتیں کیونکہ وہ آج کی جنریشن سے نہیں بلکہ پچھلی جنریشن سے ہیں۔

اداکارہ نے کہا کہ انہیں نہیں معلوم کہ کون سا اداکاریا اداکارہ کی کس سے زیادہ دوستی ہے لیکن رنبیر اورعالیہ کے بارے میں کہہ سکتی ہوں کہ وہ اس سال شادی کرلیں گے۔
اس سے قبل اداکا رنبیر کپورنے بھی کہا تھا اس بارے میں زیادہ تونہیں کہوں گا لیکن شادی جلد ہوگی۔

واضح رہے کہ دونوں اداکار2017 سے ایک دوسرے کے گہرے دوست ہیں جب کہ اس سے قبل بھی کافی بار دونوں کی شادی کی تاریخ کی خبریں وائرل ہوچکی ہیں۔

ممبئی: فلم اورٹی وی میں اداکاری کے جوہردکھانے والے معروف بھارتی اداکارانوپم شیام چل بسے۔

بھارتی میڈیا رپورٹس کے مطابق فلم اورٹی وی میں اداکاری کے جوہردکھانے والے معروف بھارتی اداکارانوپم شیام 63 سال کی عمر میں چل بسے۔

اداکارگزشتہ 4 روزسے ممبئی کے اسپتال میں زیرعلاج تھے۔ بھارتی میڈیا رپورٹس کے مطابق اداکارکوشوگرسمیت ہائی بلڈ پریشرتھا۔

اداکار نے فلم لگان، دل سے، ہزاروں خواہشیں ایسی، سمیت متعدد فلموں میں کام کیا ہے تاہم ان کے ڈرامے ’من کی آواز پرتگیا‘ میں ادا کیا جانے والے ٹھاکر سجن کا کردار نے انہیں خوب شہرت دی تھی۔

پاکستان تحریک انصاف(پی ٹی آئی) کی رہنما ڈاکٹر فردوس عاشق اعوان نے رکن صوبائی اسمبلی احسن سلیم بریار کی تقریب حلف برداری کے سلسلے میں پنجاب اسمبلی میں داخلے سے روکے جانے کی اطلاعات کی تردید کی ہے۔

سوشل میڈیا پر زیر گردش ویڈیوز میں دیکھا جا سکتا ہے کہ فردوس عاشق اعوان کو سیکیورٹی اہلکاروں نے صوبائی اسمبلی کے دروازے پر روکا، منتظمین نے انہیں مہمانوں کی فہرست دکھائی جنہیں احسن سلیم بریار کی تقریب حلف برداری میں طلب کیا گیا ہے جہاں فہرست سے ان کا نام ہٹا دیا گیا تھا جس کے بعد وہ وہاں سے چلی گئیں۔

صوبائی اسمبلی کے باہر میڈیا سے گفتگو کرتے ہوئے انہوں نے کہا کہ میں حلف برداری کی تقریب میں تاخیر سے آئیں اور اسمبلی سیشن پہلے ہی ختم ہو چکا ہے، اس لیے مجھے وہاں جانے کی ضرورت نہیں تھی اور میں نے اسمبلی میں نہ جانا مناسب سمجھا، ایسا کچھ نہیں ہے کہ کسی نے مجھے نشانہ بنایا اور مجھے اندر جانے سے روک دیا۔

انہوں نے کہا کہ مسلم لیگ(ق)، پی ٹی آئی کی اتحادی ہے اور اسمبلی میں کسی کو داخلے کی اجازت دینا یا نہ دینا اسپیکر اسمبلی چوہدری پرویز الٰہی کا صوابدیدی اختیار ہے، ہمارے گھر کے جو بھی مسائل ہیں، ہم ان کو آپس میں حل کریں گے۔

وزیراعلیٰ پنجاب عثمان بزدار کے معاون خصوصی کے طور پر اپنے سابقہ ​​کردار کا حوالہ دیتے ہوئے انہوں نے کہا کہ میرے بیانات ذاتی نوعیت کے نہیں بلکہ حکومت کا مؤقف اور پالیسی ہے لہٰذا اگر کسی کو تحفظات ہیں تو میں اسپیکر کے ساتھ مل کر ان کو حل کروں گی۔

جب ان سے سوال کیا گیا کہ کیا اسپیکر پنجاب اسمبلی ان سے ناراض ہیں تو انہوں نے کہا کہ وہ پی ٹی آئی-مسلم لیگ (ق) اتحاد کی مضبوط بنانے میں سب سے نمایاں آواز رہی ہیں، آج ہم یہ بھی سوچتے ہیں کہ ہمیں مل کر آگے بڑھنا ہے اور اگر کوئی تحفظات ہیں تو انہیں حل کرنا ہے۔

جب ان سے پوچھا گیا کہ انہیں کوئی وزیر یا عہدیدار لینے کیوں نہیں آیا تو انہوں نے وضاحت کی کہ انہوں نے اپنے دورے کے بارے میں کسی کو مطلع نہیں کیا تھا، اس دورے کا مقصد حلف برداری کی تقریب میں شرکت تھی اور وہ تقریب پہلے ہی ختم ہوچکی تھی اور سیشن ملتوی کردیا گیا تاکہ ہم باہر بھی کچھ باتیں کرسکیں۔

جب ان سے سوال کیا گیا کہ کیا پی ٹی آئی اور مسلم لیگ ق کے سیاسی تعلقات کی وجہ سے انہیں ذاتی طور پر نشانہ بنایا گیا تھا تو فردوس عاشق اعوان نے جواب دیا یہ سب سیاست کے اتار چڑھاؤ ہیں، مجھے لگتا ہے کہ آپ جس موقف کی طرف اشارہ کر رہے ہیں اگر ایسا ہے تو یہ معمولی مؤقف ہے اور بڑے لوگ بڑی سوچ رکھتے ہیں، وہ ایسی چیزوں میں کا حصہ نہیں بنتے اور مجھے نہیں لگتا کہ یہ بات اسپیکر کے علم میں ہوگی۔

وزیراعظم عمران خان نے لاہور میں بنائے گئے میاواکی جنگل کو دنیا کا سب سے بڑا ایسا جنگل قرار دیتے ہوئے کہا ہے کہ یہ تو شروعات ہیں ہمارا ہدف 10 ارب درخت لگانے کا ہے۔

لاہور میں میاواکی اربن فارسٹ کا افتتاح کرنے کے موقع پر اظہار خیال کرتے ہوئے عمران خان نے کہا کہ ‘میں حکومت پنجاب، وزیراعلیٰ اور ان کی ٹیم سب کو آج خراج تحسین پیش کرتا ہوں کہ میاواکی جنگل اگایا ہے’۔

انہوں نے کہا کہ ‘یہ وہ لاہور شہر ہے جہاں ہم بڑھے ہوئے جہاں باغات، درخت اور صاف آب و ہوا تھی لیکن دیکھتے ہی دیکھتے لاہور پاکستان کا آلودہ ترین شہر بن گیا ہے’۔

ان کا کہنا تھا کہ ‘یہ جو آپ نے آج کیا ہے یہ شروعات ہیں، مجھے بڑی خوشی ہے کہ یہ دنیا کا سب سے بڑا میاواکی جنگل اگایا گیا ہے’۔

جنگل کو اس کے بانی جاپان کے آنجہانی پروفیسر میاواکی سے منسوب کرتے ہیں، جن کی پچھلے مہینے ہی وفات ہوئی ہے۔

انہوں نے کہا کہ آج ایک رپورٹ چھپی ہے کہ دنیا کے سرفہرست سائنس دانوں نے بڑی دیر کے بعد کچھ نتائج اخذ کیے ہیں کہ انسان نے اللہ کی نعمتوں پر ظلم کیا ہے جیسے کہ کئی چیزیں کی ہیں مثلاً گرم موسم کی وجہ سے سمندر اوپر گیا ہے، کاربن کی وجہ سے دنیا بھر میں موسم گرم ہو رہا ہے۔

ان کا کہنا تھا کہ انسان نے اتنا نقصان پہنچایا ہے کہ یہ چیز اب واپس ہی نہیں آسکتی اور اس میں بتایا گیا کہ دنیا میں جتنے بھی افراد ہیں وہ سب مل کر کوشش کریں تو اس کے مزید نقصانات سے بچ سکتے ہیں۔

وزیراعظم نے کہا کہ مجھے بڑا فخر ہے کہ پاکستان وہ ملک ہے، جس نے گلوبل وارمنگ روکنے کے لیے اپنی حیثیت سے بڑھ کر کردار ادا کیا ہے۔

انہوں نے کہا کہ میاواکی جنگل کاربن کو سب سے زیادہ جذب کرتا ہے، جس کی وجہ سے ہم اپنے ماحول کو کم نقصان پہنچاتے ہیں اور یہ آلودگی کے حوالے سے بھی بہت اچھا ہے۔

ان کا کہنا تھا کہ ہماری آنے والی نسلیں کم ازکم یہ تو دیکھیں گی کہ ہم ایک بہتر ملک چھوڑ کر گئے ہیں، جو ہمیں ملا تھا، پاکستان کی 60 سالہ تاریخ میں 2013 تک صرف 64 کروڑ درخت اگائے گئے تھے جبکہ 2013 سے 2018 تک ہم نے صرف خیبرپختونخوا میں ایک ارب درخت اگائے اور اب ہمارا ہدف 10 ارب درخت اگانے کا ہے۔

وزیراعظم نے کہا کہ آج میں سارے پاکستانیوں سے کہوں گا کہ اگر آپ کو اپنے بچوں کی اور ان کے مستقبل کی فکر ہے تو کم از کم ایک درخت لگانا چاہیے اور اس کی دیکھ بحال کرنی چاہیے۔

انہوں نے کہا کہ درخت لگانا آسان ہے لیکن اس کی دیکھ بھال کرنی ہے اور کم از کم ایک درخت لگائیں، میرے نوجوان اور طلبہ سب کو اس ملک کے مستقبل کے لیے پوری کوشش کرنی چاہیے۔

خیال رہے کہ لاہور میں مزید 53 میاواکی جنگلات مختلف علاقوں میں اگائے جارہے ہیں تاکہ لاہور کی آلودگی کو کم کیا جاسکے۔

لاہور میں یہ جنگلات بلین ٹری سونامی منصوبے کے تحت اگائے جارہے ہیں جو 100 کینال سے زائد اراضی پر بنائے گئے ہیں اور اس میں ایک لاکھ 65 ہزار درخت لگائے جائیں گے۔

میاواکی ٹیکنیک کے ساتھ یہ درخت عام جنگلات کے مقابلے میں 10 گنا تیزی سے نشو ونما پاتے ہیں، اس کو خصوصی زمین کے ساتھ ساتھ نایاب قسم کے درخت اگانے کے لیے استعمال کیا جائے گا تاکہ تیزی اربن فارسٹ کو پھیلایا جائے۔