All posts by News Editor

صوبہ پنجاب کے دارالحکومت لاہور کے کمشنر محمد عثمان نے کورونا ضابطہ کار (ایس او پیز) کی خلاف ورزی کرنے والوں کیلئے سزائیں سخت کرنے کا حکم دے دیا۔

کمشنر لاہور کے مطابق کورونا ایس او پیز کی خلاف ورزی کرنے والوں کا کاروبار 11 اپریل تک بند کر دیا جائے گا۔

ان کا کہنا ہے کہ ایس او پیز کی خلاف ورزی پر بند ہونے والے کو لاک ڈاؤن ختم ہونے تک ہرگز ڈی سیل نہیں کیا جائے گا۔

محمد عثمان کا کہنا تھاکہ وائرس تیزی سے پھیل رہا ہے، اسپتالوں میں رش بڑھ رہا ہے، ایس او پیز پر سنجیدگی سے عمل نہ ہوا تو حالات بدترین رخ اختیار کر سکتے ہیں۔

خیال رہے کہ ملک میں کورونا کی تیسری لہر کی شدت جاری ہے اور لاہور میں بھی کورونا کیسز میں تیزی سے اضافہ ہورہا ہے۔

لاہور سمیت ملک بھر میں مسیحی برادری آج ایسٹر کا تہوار مذہبی جوش و خروش سے منارہی ہے، اسی سلسلے میں لاہور کے گرجا گھروں میں عبادات کا اہتمام کیا گیا۔

ایمراکی جانب سے مسیحی برادری کو ایسٹرکی ڈھیروں خوشیاں مبارک ہوں، لاہورمیں مسیحی برادری آج ایسٹر منا رہی ہے، ایسٹر روزوں کے ایام کے بعدمنایا جانے والا مسیحی تہوار ہے، جس کو عید پاشکا یا عید قیامت المسیح بھی کہا جاتا ہے، اس دن کی مناسبت سے لاہور کے ایم ایم عالم روڈ پر سینٹ میری چرچ، کیتھڈرل چرچ سمیت دیگر گرجاگھروں میں خصوصی دعائیہ تقاریب کا انعقاد کیا جارہا ہے جس میں ملکی سلامتی اور خوشحالی کیلئے خصوصی دعائیں کی جارہی ہیں، ایسٹر کے موقع پر ملک بھر میں سکیورٹی کے سخت انتظامات کیے گئے ہیں۔

اسلام آباد: پاکستان بیورو آف شماریات (پی بی ایس) کے مطابق ضلعی انتظامیہ کی جانب سے اشیائے خوردونوش کے مقرر کردہ نرخ اور اصل قیمتوں کے درمیان فرق کے لحاظ سے سندھ اور بلوچستان ملک کے دو ‘مہنگے’ ترین صوبے ہیں۔

رپورٹ کے مطابق پی بی ایس نے اشیائے خوردونوش کی اصل قیمتوں اور ضلعی انتظامیہ کی جانب سے مقرر کردہ قیمتوں کے درمیان فرق کے لحاظ سے صوبوں کو درجہ دیا ہے، اس مشق کا مقصد قیمتوں پر قابو پانے کے حوالے سے انتظامیہ کو پیش آنے والے مسائل کو اجاگر کرنا ہے۔

یہ درجہ بندی واضح طور پر مختلف چیف سیکریٹریوں کی کارکردگی کی عکاسی کرتی ہے جو صوبوں میں انتظامی سربراہان کے طور پر کام کرتے ہیں۔

ضروری اشیائے خوردونوش کی مارکیٹ کی قیمتوں اور ضلعی انتظامیہ کی جانب سے مقرر کردہ نرخوں کے درمیان اوسطاً 14.41 فیصد فرق کے ساتھ پنجاب کو درجہ بندی میں سرفہرست رکھا گیا ہے، اس کے بعد خیبر پختونخوا میں 18.7 فیصد اور اسلام آباد میں 21.03فیصد ہے۔

-اس کے برعکس سندھ میں قیمت میں اوسطاً فرق 40.32فیصد ہے اور اس کے بعد 32.53فیصد کے ساتھ صوبہ بلوچستان میں صورتحال قدرے بہتر ہے۔

افراط زر کے حوالے سے فیصلہ سازی کے حمایتی نظام (ڈی ایس ایس آئی) کی مدد سے قیمتوں میں پائے جانے والے فرق کا پتہ چلایا گیا، جو مختلف ضلعی انتظامیہ کی جانب سے سرکاری قیمتوں کو نافذ کرنے میں ناکامی کی عکاسی کرتا ہے۔

پی بی ایس نے قومی قیمت مانیٹری کمیٹی (این پی ایم سی)، وفاقی وزارتوں، صوبائی حکومتوں اور ضلعی انتظامیہ کو اشیائے ضروریہ کی قیمتوں کے بارے میں معلومات فراہم کرنے کے لیے ڈی ایس ایس آئی تیار کیا ہے۔

فنانس ڈویژن کے ذرائع نے ہفتہ کے روز ڈان کو بتایا کہ این پی ایم سی نے بیورو آف شماریات کو ہدایت کی ہے کہ وہ اپنے صوبوں میں ‘ناقابل قبول’ حد تک قیمتوں کے فرق پر سندھ اور بلوچستان کے وزرائے اعلیٰ سے ملاقاتیں کریں۔

ذرائع کا کہنا ہے کہ اس سلسلے میں ایک سرکاری وفد پہلے ہی سندھ پلاننگ اینڈ ڈیولپمنٹ بورڈ کے چیئرمین سے ملاقات کرچکا ہے، یہ اجلاس وزیر اعلیٰ سندھ کی ہدایت پر ہوا۔

ذرائع کے مطابق چیف سیکریٹری بلوچستان پہلے ہی ڈپٹی کمشنرز کے ساتھ پی بی ایس حکام کی ایک میٹنگ کا اہتمام کر چکے ہیں تاکہ انہیں نظام سے آگاہ کرنے کے ساتھ ساتھ یہ بتایا جا سکے کہ صوبے میں قیمتوں کی نگرانی کیسے کی جا سکتی ہے۔

ذرائع نے بتایا کہ خیبر پختونخوا کے وزیر اعلیٰ کو بھی نظام کے حوالے سے اجلاس کے لیے درخواست بھجوا دی گئی تھی تاہم صوبے سے فوری طور پر کوئی جواب موصول نہیں ہوا۔

پنجاب میں قیمتوں میں کم فرق ایک وجہ نگرانی کے موثر طریقہ کار کی موجودگی ہے، صوبے میں ڈپٹی کمشنر خصوصی شاخوں کے ذریعے قیمتوں سے متعلق ڈیٹا اکٹھا کرتے ہیں اور پنجاب اربن یونٹ بھی متعلقہ معلومات فراہم کرتا ہے۔

ذرائع کا کہنا ہے کہ پی بی ایس سمیت متعدد ذرائع سے معلومات اکٹھا کرنے سے پنجاب میں ضلعی حکومتوں کو قیمتوں کی مؤثر انداز میں نگرانی میں مدد ملی۔

شہر کے لحاظ سے درجہ بندی کی جائے گذشتہ ہفتے کے مقابلہ میں نو شہروں نے اپنی پوزیشن برقرار رکھی، تین شہروں کی کارکردگی میں بہتری آئی ہے جبکہ پانچ شہروں کی کارکردگی میں تنزلی آئی ہے۔

اس ہفتے میں سب سے پہلے اور آخری شہر کے درمیان فرق 75.23 پوائنٹس تھا جبکہ گزشتہ ہفتے تک یہ فرق 79.09 پوائنٹس رہا جس کے نتیجے میں مجموعی طور پر کمی واقع ہوئی ہے۔

سندھ میں کراچی نے رواں ہفتے صارفین کی قیمتوں اور ڈی سی نرخوں کے مابین 4.28 فیصد کمی دیکھی گئی جو گزشتہ ہفتے 89.1 فیصد سے کم ہو کر 84.82 پر آ گئی ہے، اس کے بعد خضدار میں 7.02 پوائنٹس کے فرق کے ساتھ 4013فیصد سے فرق 33.39فیصد پر آ گیا ہے جبکہ حیدرآباد 1.82 پوائنٹس کی کمی کے ساتھ 29.29فیصد سے 27.47فیصد کا فرق رہ گیا ہے۔

سکھر میں قیمتوں کے فرق میں 17.21 پوائنٹس کی کمی ریکارڈ کی گئی جو 39.21 فیصد سے کم ہو کر 21.8 فیصد ہوگئی، اس سے ظاہر ہوتا ہے کہ شہر میں قیمتیں گذشتہ ہفتے میں گر گئیں۔

پنجاب میں قیمت کا فرق بہت کم رہا کیوں کہ بہاولپور نے 9.59فیصد اور پچھلے ہفتے کے مقابلے میں 0.42 پوائنٹس کی معمولی کمی کے ساتھ اپنی پوزیشن کم ترین درجے پر برقرار رکھی ہے۔

بہاولپور کے بعد سب سے کم خلا سیالکوٹ میں 11.62فیصد سے 0.95 پوائنٹس کی کمی کے ساتھ 10.67فیصد ریکارڈ کیا گیا، اس کے بعد لاہور میں 0.28 پوائنٹس کی کمی سے 11.03فیصد سے 10.75فیصد، 0.55 پوائنٹس اضافے سے سرگودھا 13.43فیصد سے 12.48فیصد پر پہنچ گیا، فیصل آباد میں 0.77 پوائنٹس اضافے کے بعد 16.62فیصد کا فرق ریکارڈ کیا گیا، گوجرانوالہ میں 0.11فیصد اضافے سے 19.76فیصد اور ملتان میں 0.06 پوائنٹس اضافے سے 20.47فیصد اضافہ ریکارڈ کیا گیا۔

تاہم راولپنڈی میں 0.87 پوائنٹس کے ساتھ 13.68فیصد کی کمی ریکارڈ کی گئی اور وفاقی دارالحکومت میں 0.29 پوائنٹس کے ساتھ 21.03فیصد کا اضافہ ہوا۔

خیبر پختونخوا میں یہ فرق پشاور میں 0.45 پوائنٹس کی کمی سے 17.99فیصد اور بنوں میں 0.31 پوائنٹس کی کمی سے 19.41فیصد پر آگیا ہے۔

بلوچستان میں یہ فرق کوئٹہ میں 31.68فیصد اور خضدار میں 33.39فیصد ریکارڈ کیا گیا، کوئٹہ میں 1.6 پوائنٹس کا معمولی اضافہ ریکارڈ کیا گیا جبکہ خضدار میں قیمت کے فرق میں 7.02 پوائنٹس کی زبردست کمی ریکارڈ کی گئی۔

ڈی ایس ایس آئی اضلاع کے لیے ایک درجہ بندی کا طریقہ کار مہیا کرتا ہے جس کے ذریعے صوبائی اور وفاقی سطح پر انتظامیہ ملک کے 17 بڑے شہروں میں ہفتہ وار اور ماہانہ بنیادوں پر قیمتوں میں ہونے والی تغیرات کی نگرانی کر سکتی ہے۔

پچھلے ہفتے اضلاع کی درجہ بندی میں اسی طرح کا رجحان دکھایا گیا تھا جس کے ساتھ کراچی بلند ترین سطح پر تھا، اس سے ظاہر ہوا کہ شہر میں ضلعی انتظامیہ نے ابھی تک ڈپٹی کمشنر کے نرخوں کو نافذ نہیں کیا ہے۔

صوبوں کو اختیارات کی منتقلی کے بعد قیمتوں کا کنٹرول چاروں صوبوں کے دائرہ اختیار میں آتا ہے۔

ملائیشین کمپنی پروٹون کی نئی سیڈان گاڑی جلد پاکستان میں فروخت کے لیے پیش کی جارہی ہے۔

پروٹون اس سے پہلے 2020 کے آخر میں ایک ایس یو وی ایکس 70 پاکستان میں فروخت کے لیے پیش کرچکی ہے۔

پاک وہیلز کی رپورٹ کے مطابق پروٹون کی جانب سے ساگا نامی سیڈان 4 اپریل کو پاکستان میں متعارف کرائی جارہی ہے جو ٹویوٹا یاریز، ہونڈا سٹی اور چین گن السوین کو ٹکر دے گی۔

رپورٹ میں بتایا گیا کہ نئی گاڑی کے کم از کم 4 ورژن متعارف کرائے جائیں گے جن میں سے 3 میں 1299 سی سی جبکہ ایک میں 1332 سی سی انجن موجود ہوگا۔

آٹومیٹک ورژن میں 4 اسپیڈ ٹرانسمیشن کا فیچر ہوگا جبکہ 1299 سی سی انجن 95 ہارس پاور اور 120 این ایم ٹورکیو پاور فراہم کرے گا۔

اس گاڑی میں 15 انچ ایلوئے رمز، سگنل کے ساتھ سائیڈ مررز ، رئیر اسپائلرز، فوگ لیمپس ، ایڈجسٹ ایبل اسٹیئرنگ اور ریموٹ کنٹرول ٹرنک جیسے فیچرز موجود ہوں گے۔

گاڑی کی دیگر خصوصیات میں 7 انچ کی ٹچ اسکرین، اینٹی لاک بریکنگ سسٹم اور ڈوئل فرنٹ ایئربیگز قابل ذکر ہیں۔

اسی طرح مخصوص ورژن میں ڈی آر ایل ایس، اسٹیبلیٹی کنٹرول، ٹریکشن کنٹرول، فرنٹ پارکنگ سنسرز اور ریورس کیمرا جیسے فیچرز بھی موجود ہوں گے۔

پاکستان میں اس گاڑی کے مختلف ورژنز کی قیمت 20 سے 25 لاکھ روپے کے درمیان ہونے کا امکان ہے اور اس طرح دیگر سیڈان گاڑیوں کو زبردست ٹکر دے گی۔

درحقیقت 20 لاکھ روپے قیمت کے لحاظ سے یہ پاکستان میں دستیاب سستی ترین سیڈان ہوگی کیونکہ اس قیمت میں سوزوکی کلٹس کا مہنگا ترین ورژن دستیاب ہے جو سیڈان نہیں بلکہ ہیچ بیک گاڑی ہے۔

خیال رہے کہ پروٹون نے پاکستان میں گاڑیوں کو متعارف کرانے کے لیے الحاج گروپ کے ساتھ اشتراک کیا ہے۔

ابھی یہ واضح نہیں کہ اس گاڑی کو پاکستان میں اسمبل کیا جائے گا یا درآمد کی جائے گی، تاہم ایکس 70 کو پاکستان میں درآمد کیا جارہا ہے اور 2021 کی پہلی ششماہی کے دوران مقامی طور پر اسمبل ماڈلز دستیاب ہوں گے۔

کراچی: پاکستان کاٹن گنرز ایسوسی ایشن (پی سی جی اے) نے بھارت سے کپاس کی درآمدات کی شدید مخالفت کرتے ہوئے کہا ہے کہ اس اقدام سے مقامی کاشتکاروں کی اس فصل کو کاشت کرنے کے حوالے سے حوصلہ شکنی ہو گی۔

رپورٹ کے مطابق کاشت کار، گنرز، اسپنرز اور سوتی بروکرز اقتصادی رابطہ کمیٹی کی منظوری کے باوجود حکومت کی جانب سے بھارت سے کپاس کی درآمدات کی اجازت نہ دینے کے فیصلے کی بھرپور حمایت کر رہے ہیں۔

پی سی جی اے کے چیئرمین ڈاکٹر جیسو مَل نے کہا کہ اگر ہندوستانی کپاس کی درآمدات کی اجازت دی گئی تو کاشتکار اس سیزن میں کپاس کی کاشت نہیں کریں گے، کپاس کی کاشت سندھ میں شروع ہوچکی ہے اور جلد ہی پنجاب میں شروع ہونے والی ہے۔

کپاس کے بیج، ناقص کیڑے مار ادویات اور کھادوں کی زیادہ لاگت کے بارے میں کوئی تحقیق نہیں کرنے کی وجہ سے سیزن کے دوران کپاس کی پیداوار 9 من فی ایکڑ کے ساتھ صرف 55 لاکھ گانٹھوں کی ہوئی ہے جو گزشتہ سالوں کے مقابلے میں ایک تہائی ہے جب ایک کروڑ 48 لاکھ گانٹھوں کی پیداوار کی گئی تھی۔

جیسو مَل نے کہا کہ حالیہ پیداوار میں فی ایکڑ لگ بھگ 16 من کی کمی ہوئی ہے اور اس میں مزید تیزی سے کمی ہورہی ہے کیونکہ حکومت نے اس انتہائی اہم فصل کو بڑی حد تک نظرانداز کیا ہے جس نے برآمدات کی 60 فیصد سے زیادہ رقم کمانے میں مدد کی تھی۔

کپاس کی پیداواری لاگت پر تبصرہ کرتے ہوئے انہوں نے کہا کہ ہندوستان میں یہ 20 ہزار فی ایکڑ (پاکستانی روپے میں) ہے جبکہ پاکستان میں فی ایکڑ لاگت 50 ہزار روپے ہے، مزید برآں اگر کپاس کی قیمت کم ترین مقررہ قیمت سے بھی نیچے آ جائے تو ہندوستانی حکومت کپاس خرید لیتی ہے۔

جیسو مل نے کپاس کے لیے گندم اور گنے کی خطوط پر کم سے کم قیمت مقرر کرنے کا مطالبہ کرتے ہوئے کہا کہ ہندوستانی حکومت اپنے اسٹاک سے کپاس کی پیش کش کررہی ہے، یہ کاشتکاروں یا گنرز کے ہاتھ میں نہیں ہے۔

انہوں نے کہا کہ ہمیں حکومت کی حمایت حاصل نہیں ہے کیونکہ 85 فیصد کسانوں کے پاس صرف 12 ایکڑ اراضی ہے، اسلام آباد میں چھوٹے کاشتکاروں کے پاس تحفظ حاصل کرنے کی کوئی لابی نہیں ہے۔

دریں اثنا ڈان سے گفتگو کرتے ہوئے کپاس کے بروکرز نے کہا کہ بھارت کم قیمت پر لنٹ پیش نہیں کررہا اور اس کے بجائے 80 سے 81 سینٹ فی پاؤنڈ کی رقم لگا رہا ہے جو بین الاقوامی قیمت کے برابر ہے، بروکرز نے بتایا کہ فی الحال اعلیٰ معیار کی امریکی کپاس 84 سے 85 سینٹ فی پاؤنڈ میں دستیاب ہے۔

کراچی کاٹن بروکرز فورم کے چیئرمین نسیم عثمان نے کہا کہ حکومت کی جانب سے بھارت سے کپاس کی درآمد نہ کرنے کے فیصلے سے ملک میں کپاس کی مروجہ قیمت میں کوئی تبدیلی واقع نہیں ہوئی، اگر کپاس کی درآمدات کی اجازت دی گئی تو قیمتوں میں کوئی تبدیلی نہیں آئے گی۔

نسیم عثمان نے تفصیلات بتاتے ہوئے کہا کہ اس وقت جب سندھ اور پنجاب میں کاشت شروع ہو رہی ہے تو ایسے وقت میں ہندوستانی کپاس کی درآمد سے مقامی کاشتکار مایوسی کا شکار ہوسکتے ہیں اور اس میں ایک بڑی تبدیلی آسکتی ہے، انہوں نے بتایا کہ کاشتکار کپاس چھوڑ دیں گے اور گنے، مکئی اور دیگر فصلوں کی کاشت کا انتخاب کریں گے کیونکہ پچھلے سال کاشتکاروں کو بے وقت بارش، کیڑوں کے حملے اور ناقص پیداوار کی وجہ سے نقصان اٹھانا پڑا تھا۔

دوسری جانب اسپنرز پہلے ہی ہندوستان سے کپاس اور روئی کے سوت کی درآمدات کے خلاف ہیں۔

ایک حالیہ بیان میں چیئرمین آل پاکستان ٹیکسٹائل ملز ایسوسی ایشن سندھ اینڈ بلوچستان زون آصف انعام نے موجودہ تنازعات کے حل تک بھارت سے کسی بھی قسم کی درآمدات کی مخالفت کی، انہوں نے ہندوستان سے کپاس کے سوت کی درآمدات کے خیال کی سختی سے مخالفت کی کیونکہ اس سے مقامی اسپننگ کی صنعت بری طرح متاثر ہو سکتی ہے۔

دریں اثنا، ویلیو ایڈڈ سیکٹر نے فیصلے پر مایوسی کا اظہار کرتے ہوئے دعویٰ کیا کہ برآمد کنندگان بین الاقوامی آرڈر پورے نہیں کرسکیں گے، علاوہ ازیں یہ بھی خبردار کیا گیا کہ روئی کے سوت کی قلت کے سبب برآمدات میں اہداف حاصل نہیں کیے جا سکیں گے البتہ مقامی سطح پر سوت کی پیداوار کرنے والوں نے ملک میں اس خام مال کی کمی کی تردید کی ہے۔

بھارت کی وسطی ریاست چھتیس گڑھ میں ماؤ باغیوں اور سیکیورٹی فورسز کے درمیان فائرنگ کے تبادلے میں بھارتی پولیس اور پیرا ملیٹری کے 22 اہلکار ہلاک اور 30 زخمی ہوگئے۔

خبرایجنسی اے ایف پی کی رپورٹ کے مطابق پولیس کا کہنا تھا کہ چھتیس گڑھ کے ضلع بیجاپور میں سیکیورٹی فورسز کے 2 ہزار اہلکار ماؤ باغیوں کے سربراہ کی تلاش میں کارروائی کر رہے تھے اور اسی دوران فائرنگ کا تبادلہ ہوا۔

چھتیس گڑھ پولیس کے ایڈیشنل ڈائریکٹر جنرل اشوک جنیجا کا کہنا تھا کہ اب تک 22 اہلکاروں کی ہلاکت کی تصدیق ہوچکی ہے اور ماؤ باغیوں کے زیر تسلط علاقے میں تقریباً 3 گھنٹوں تک لڑائی جاری رہی۔

ان کا کہنا تھا کہ سرچ آپریشن جاری ہے اور ہلاکتوں کے بارے میں حتمی طور پر کچھ نہیں کہاجاسکتا جبکہ زخمیوں کو بیجاپور اور چھتیس گڑے کے دارالحکومت رائے پور کے سرکاری ہسپتالوں میں منتقل کردیا گیا ہے۔

انہوں نے کہا کہ اب تک درجن سے زائد اہلکار لاپتا ہیں جبکہ ماؤ باغیوں کی ایک بڑی تعداد بھی ماری جاچکی ہے۔

پولیس افسر نے کہا کہ باغیوں نے ہلاک سیکیورٹی فورسز سے اسلحہ، بارود، یونیفارم اور جوتے بھی قبضے میں لے لیے ہیں۔

ضلع بیجاپور میں تعینات ایک اورسینئر پولیس افسر کا کہنا تھا کہ ہلاکتوں کی تعداد مزید بڑھ سکتی ہے۔

بھارتی وزیراعظم نریندر مودی نے سماجی رابطے کی ویب سائٹ ٹوئٹر پر اپنے پیغام میں کہا کہ بہادر جوانوں کی قربانی کو کبھی فراموش نہیں کیا جائے گا۔

وزیرداخلہ امیت شاہ نے کہا کہ بھارت امن کے اور ترقی کے دشمنوں کے خلاف اپنی جنگ جاری رکھے گا۔

چھتیس گڑھ کے وزیراعلیٰ بھوپیش بیگھل نے فیس بک پر اپنے بیان میں کہا کہ دہشت گردوں کے خلاف کارروائی کے لیے امیت شاہ نے مرکزی حکومت کی جانب سے ہرقسم کے تعاون کی یقین دہانی کروا دی ہے۔

بھارت کے بائیں بازو کے سخت گیر جنگجوؤں کے ساتھ لڑائی میں 2017 کے بعد سب سے زیادہ اہلکار ہلاک ہوئے ہیں، اس وقت ایک حملے میں 25 پولیس کمانڈوز ہلاک ہوگئے تھے۔

گزشتہ برس مارچ میں چھتیس گڑھ میں پولیس کمانڈوز کی گشت کے دوران ہونے والی لڑائی میں 17 اہلکار ہلاک ہوئے تھے جبکہ باغیوں کے 300 مسلح جنگجو بھی مارے گئے تھے۔

قبل ازیں 2019 میں مغربی ریاست مہاراشٹر میں انتخابات کے دوران بم حملے میں 16 کمانڈوز مارے گئے تھے، جس کی ذمہ داری ماؤ باغیوں پر عائد کی گئی تھی۔

اسلام آباد: ایک ویبنار کے دوران ماہرین نے چین اور ایران کے 25 سالہ طویل تعاون کے فریم ورک کو خطے اور مشرق وسطیٰ میں چین کے اثر و رسوخ کو مزید تقویت دینے کے لیے تاریخی سنگ میل قرار دیا۔

رپورٹ کے مطابق ماہرین کا کہنا تھا کہ اس سے نہ صرف تجارت اور معاشی نمو کے لیے چین کی مارکیٹ کو توسیع حاصل ہوگی بلکہ مشرق وسطیٰ اور شمالی افریقہ کے خطے میں قوت کے توازن میں بھی بگاڑ کا خدشہ ہے، مالی تعاون ایران کو اپنی تنہائی کو کم کرنے اور چین اور مشرق وسطیٰ کے ممالک کے ساتھ تجارتی تعلقات کو بڑھانے میں مدد فراہم کرے گا۔

انہوں نے کہا کہ ایسے وقت میں جب ایران پابندیوں اور کووڈ 19 کے تباہ کن اثرات سے نبرد آزما ہے، یہ پیشرفت خوش آئند امداد ہے۔

مقررین نے یہ بھی سوال اٹھایا کہ کیا اس معاہدے میں سب کی جیت ہے، بیجنگ نے نہ صرف ہائیڈرو کاربن تک متبادل رسائی حاصل کی ہے بلکہ بحر ہند میں اپنے اثر و رسوخ کو مزید تقویت بخشی ہے۔

ایران میں بھارتی سرمایہ کاری کے پیش نظر یہ معاہدہ بہت سے لوگوں کے لیے حیرت کا باعث بھی ہوسکتا ہے۔

چین، ایران کے ساتھ دوستانہ تعلقات کو پروان چڑھارہا ہے اور اس نے تہران کے ساتھ 18 سے 20 ارب ڈالر کے 17 معاہدوں پر دستخط کیے ہیں اور اگلے 10 سالوں میں دونوں ممالک کے درمیان تجارتی تعلقات کو بڑھانے کا وعدہ بھی کیا ہے۔

اس سے خطے میں امریکی مفادات کو نقصان پہنچے گا۔

ویبنار کا اہتمام ڈیولپمنٹ کمیونیکیشن نیٹ ورک نے ‘چین، ایران تعاون کے نئے فریم ورک – علاقائی سلامتی اور معاشی نمو کے امکانات’ کے موضوع پر کیا تھا۔

ماہرین کے پینل میں آئی ایس آئی کے سابق سربراہ اور اسٹریٹجک تجزیہ کار لیفٹیننٹ (ر) جنرل اسد درانی، چینگدو انسٹی ٹیوٹ آف ورلڈ افیئر کے سینئر ریسرچ فیلو ڈاکٹر ڈین جی، سی پیک کے ماہر حسن داؤد بٹ، تہران انٹرنیشنل اسٹڈیز اینڈ ریسرچ انسٹی ٹیوٹ کے ریسرچ فیلو ڈاکٹر احسان سدیغی، ایسٹ ویسٹ انسٹی ٹیوٹ (لندن) میں ریسرچ فیلو ڈاکٹر نجم عباس اور ڈیو کام کے ایگزیکٹو ڈائریکٹر منیر احمد شامل تھے۔

پروگرام میں اظہار خیال کرتے ہوئے جنرل درانی نے کہا کہ یہ معاہدہ عالمی بساط پر ایک عمدہ اقدام ہے، جس ماحول میں ایرانی جوہری معاہدے پر دوبارہ غور کیا جارہا ہے امریکا، چین کو روکنے کی مہم پر زور دے رہا ہے اور وہ افغانستان سے نکلنے کے بھی قریب ہے۔

ان کا کہنا تھا کہ ‘جوہری معاہدے پر براہ راست بات چیت بھی پائپ لائن میں موجود ہے، جو بائیڈن افغانستان سے اپنی افواج کے انخلا کو تیز کرسکتے ہیں یہاں تک کہ بھارت کو بھی اپنی علاقائی حیثیت کا جائزہ لینا چاہیے، پاکستان کو اس سے بڑا فائدہ ہوگا’۔

انہوں نے کہا کہ یہ خطے میں امریکا، بھارت کے مشترکہ مفادات کو گہری چوٹ پہنچائے گا اور امریکا کو جوہری معاہدے میں واپس لانے میں اس سے ایران کو مدد مل سکتی ہے۔

واشنگٹن: امریکی سیکریٹری خارجہ انٹونی جے بلنکین نے مقتول امریکی صحافی ڈینیئل پرل کے اہل خانہ سے بات کرکے انہیں یقین دہانی کرائی ہے کہ جوبائیڈن انتظامیہ مقتول کے لیے انصاف کی کوششیں کرتی رہے گی۔

رپورٹ کے مطابق محکمہ خارجہ کے ترجمان نیڈ پرائس نے بتایا کہ سیکریٹری خارجہ انٹونی جے بلنکین نے جمعے کو ڈینیئل پرل کے اہل خانہ اور ان کے نمائندوں سے بات کی۔

انٹونی جے بلنکین نے بتایا کہ ملاقات میں انہیں یقین دلایا گیا کہ امریکی حکومت ڈینیئل پرل کے اغوا اور قتل میں ملوث افراد کے لیے انصاف اور احتساب کے لیے پرعزم ہے۔

ڈینیئل پرل وال اسٹریٹ جرنل کے ساؤتھ ایشیا بیورو میں کام کرتے تھے اور 2002 میں القاعدہ سے متعلق ایک کہانی کی تحقیقات کے دوران انہیں کراچی میں اغوا کیا گیا اور پھر قتل کردیا گیا تھا۔

اس کے بعد سے امریکی انتظامیہ ڈینیئل پرل کے لیے انصاف کے حصول کے لیے پرعزم ہے۔

جوبائیڈن انتظامیہ نے بھی ڈینیئل پرل کیس کے متعدد ملزمان کو رہا کرنے کے حالیہ عدالتی احکامات پر تشویش کا اظہار کیا ہے۔

30 جنوری کو وزیر خارجہ نے اپنے پاکستانی ہم منصب شاہ محمود قریشی کو ٹیلی فون کیا اور ان پر زور دیا کہ وہ ان مشتبہ افراد کا احتساب یقینی بنائیں جو پہلے ہی اس معاملے میں نامزد کیے جا چکے ہیں۔

بعدازاں سپریم کورٹ کی جانب سے ان ملزمان کو بری کرنے کا فیصلہ سنایا گیا تھا۔

مزید پڑھیں: ڈینیئل پرل کیس: سپریم کورٹ کا مرکزی ملزم عمر شیخ کی رہائی کا حکم

ٹیلی فونک گفتگو کے ایک روز قبل جاری کردہ بیان میں امریکی سیکریٹری خارجہ انٹونی جے بلنکین نے مرکزی ملزم احمد عمر شیخ کو امریکا میں منتقل کرنے کی پیش کش کی تھی۔

انہوں نے کہا تھا کہ ڈینیئل پرل کے اغوا اور قتل میں ملوث افراد اور ان کی رہائی کے لیے کسی مجوزہ کارروائی میں ملوث افراد کو بری کرنے کے پاکستانی سپریم کورٹ کے فیصلے سے امریکا کو سخت تشویش ہے۔

امریکی سیکریٹری خارجہ کا کہنا تھا کہ ہم امریکی شہری کے خلاف بھیانک جرائم کے بعد بھی امریکا میں احمد عمر شیخ کے خلاف قانونی کارروائی کرنے کے لیے تیار ہیں۔

پاکستان پیپلز پارٹی کے چیئرمین بلاول بھٹو زرداری کا کہنا ہےکہ جن جماعتوں نے گیلانی کو نا اہل کروایا، انہی کے ووٹوں سے ہم گیلانی کو پارلیمنٹ میں لے آئے۔

نوڈیرو میں سابق وزیراعظم اور بانی پیپلز پارٹی ذوالفقار علی بھٹو کی برسی کی تقریب سے خطاب کرتے ہوئے بلاول کا کہنا تھا کہ 3 سال میں ملکی معیشت کو جتنا نقصان پہنچا ، ملکی تاریخ میں نہیں پہنچا ، ایسی مہنگائی آپ کے بزرگوں نے بھی نہيں دیکھی۔

بلاول بھٹو کا کہنا تھا کہ آج ہمیں ہر پاکستانی کو مہنگائی ، غربت اور بے روزگاری سے آزادی دلوانی ہے۔

چیئرمین پیپلز پارٹی کا کہنا تھا کہ ہم نے ان لوگوں کے ساتھ کام کیا جن لوگوں نے آصف زرداری پر تشدد کیا،11 سال جیل میں رکھا، بڑے مقصد کے لیے ہمارے ساتھ جو ہوا وہ بھولنے کے لیے تیار ہیں،جن جماعتوں نےگیلانی کو نااہل کروایا، انہی کے ووٹوں سے ہم گیلانی کو پارلیمنٹ میں لےآئے۔

ان کا کہنا تھا کہ پیپلزپارٹی چاہتی ہے اپوزیشن کی سیاسی جماعتیں مل کربرابری اور عزت کے ساتھ کام کریں، پیپلزپارٹی اپوزیشن کے ساتھ مل کریا اکیلے اپوزیشن کے لیے تیار ہے ، افسوس ہےجب لانگ مارچ کے موقع پرسب تیاری تھی تو اپوزیشن نے اپوزیشن کے ساتھ اپوزیشن شروع کی۔

وزیر خارجہ شاہ محمود قریشی نے دنیا پر زور دیا ہے کہ وہ بھارت کے غیرقانونی زیرقبضہ جموں و کشمیر میں بھارتی مظالم کا نوٹس لے۔

انہوں نے آج ملتان میں ایک پریس کانفرنس سے خطاب کرتے ہوئے کہا کہ بھارتی قابض افواج کی جانب سے مقبوضہ کشمیر میں انسانی حقوق کی سنگین خلاف ورزیوں کے باعث مقبوضہ وادی کی صورتحال انتہائی خراب ہو گئی ہے۔

وزیر خارجہ نے کہا کہ مقبوضہ کشمیر کا خصوصی درجہ ختم کرنے کے بھارت کے غیرقانونی اقدام کے باعث خطے کی صورتحال پیچیدہ اور غیریقینی ہو گئی ہے۔

انہوں نے کہا کہ پاکستان نے مسئلہ کشمیر کو ہربین الاقوامی فورم پر اٹھایا ہے اور وہ اس تنازعے کو مذاکرات کے ذریعے حل کرنا چاہتا ہے۔

وزیر خارجہ نے کہا کہ فریقین کے پاس خطے میں امن و استحکام کے قیام کا واحد راستہ مذاکرات ہیں کیونکہ دونوں ملک ایٹمی قوت ہیں اور وہ جنگ کے متحمل نہیں ہو سکتے۔

انہوں نے کہا کہ اگر بھارت پاکستان کے ساتھ تعلقات معمول پر لانا چاہتا ہے تو اسے اس کیلئے سازگار ماحول قائم کرنا ہوگا۔