All posts by News Editor

داکار عثمان مختار اپنی دوست زنیرہ انعام خان کے ساتھ رشتہ ازدواج میں منسلک ہوگئے۔

گزشتہ روز سوشل میڈیا سائٹ انسٹاگرام پر عثمان مختار نےاپنی اور اہلیہ کی تصویر شیئر کرتے ہوئے مداحوں کو اپنی شادی کی اطلاع دی۔

عثمان مختار نے اپنی پوسٹ میں لکھا کہ زنیرہ انعام خان تمہارا شکریہ، کہ تم نے مجھے زمین کا سب سے خوش قسمت شخص بنادیا مجھے ایک طویل عرصے کے دوران ایسی خوشی محسوس نہیں ہوئی، تم برے وقت میں میرے ساتھ کھڑی رہیں اورخوشی کے لمحوں کو بڑھایا۔

اداکار نے لکھا کہ تم میرے لیے چٹان اور سہارا بنی رہیں، میں ایک خوش قسمت انسان ہوں۔

عثمان مختار نے اپنی پوسٹ میں دنیا بھر کو مخاطب کرتے ہوئے مزید لکھا کہ ڈیئر ورلڈ، میں نے آج چھوٹی سی تقریب میں سماجی فاصلوں کو برقرار رکھتے ہوئے شادی کی، ہماری شادی کی تقریب کا انعقاد 2 اپریل کو کیا گیا تھا لیکن یکم اپریل سے لگائے جانے والے لاک ڈاؤن کے باعث ہمیں شادی کی تقریب کا انعقاد پہلے ہی کرنا پڑا۔

اداکار نے اپنی پوسٹ میں مزید لکھا کہ ہم سب سے ٹیسٹ کروالیا تھا اور تمام احتیاطی تدابیر کو فولو کیا، ہمیں آپ کی دعاؤں اور نیک تمناؤں کی ضرورت ہے۔

دوسری جانب جہاں مداحوں کی جانب سے عثمان مختار کی پوسٹ پر شادی کی مبارکباد کے ساتھ ساتھ نیک خواہشات کا اظہار کیا جارہا ہے وہیں اداکار کی اہلیہ کو اداکارہ کبریٰ کا ہمشکل تسلیم کیا جارہا ہے۔

خیال رہے کہ کورونا وبا کی آمد کے بعد سے شوبز کی متعدد شخصیات خاموشی سے رشتہ ازدواج میں منسلک ہوگئی ہیں۔

تین سال قبل اکتوبر 2017 میں شوبز کو خیرباد کہہ کر اسلامی تعلیمات کے مطابق زندگی گزارنے کا اعلان کرنے والی سابق اداکارہ نور بخاری نے پہلی نعت ریلیز کردی۔

نور بخاری نے گلوکار ولی حامد سے طلاق کے بعد شوبز کو خیرباد کہا تھا اور وہ گزشتہ کافی عرصے سے حجاب کے ساتھ تصاویر و ویڈیوز شیئر کرتی دکھائی دیں۔

دو ماہ قبل فروری میں نور بخاری کو فیشن ایبل حجاب پہنے پر تنقید کا نشانہ بھی بنایا گیا تھا، تاہم انہوں نے مداحوں کی تنقید کو خاطر میں نہ لاتے ہوئے کہا تھاکہ وہ خدا کے سامنے اپنا حساب دیں گی اور لوگ اپنی فکر کریں۔

لوگوں کی تنقید سے کبھی نہ گھبرانے والی سابق اداکارہ نے اب اپنی پہلی نعت کی ویڈیو جاری کردی۔

نور بخاری نے انسٹاگرام پوسٹ میں اپنی نعت کا اسکرین شاٹ شیئر کرتے ہوئے بتایا کہ انہوں نے پہلی بار اپنی لکھی ہوئی نعت کو اپنی آواز میں جاری کردیا۔

نور بخاری نے یوٹیوب پر 31 مارچ کو ’میرے کملی والے کی شان‘ کے عنوان سے نعت جاری کی، جس میں انہیں سفید رنگ کے حجاب کے ساتھ انتہائی عقیدت میں نعت پیش کرتے ہوئے دیکھا جا سکتا ہے۔

نور بخاری کی نعت کو کافی لوگوں نے سراہا اور سابق اداکارہ کی تعریف کرتے ہوئے ان سے مزید نعت جاری کرنے کی فرمائش بھی کی۔

پہلی نعت جاری کرنے سے قبل نور بخاری نے یوٹیوب پر شب برات کے موقع پر اور اس سے قبل بھی اسلامی تعلیمات سے متعلق ویڈیوز ریلیز کی تھیں۔

ساتھ ہی نور بخاری انسٹاگرام پر بھی حجاب کے ساتھ تصاویر شیئر کرنے سمیت مذہبی پوسٹس بھی کرتی دکھائی دیتی ہیں۔

خیال رہے کہ ماضی میں نور بخاری نہ صرف ٹی وی ڈراموں بلکہ فلموں میں کام کرتی رہیں ہیں اور ساتھ ہی انہوں نے ٹی وی پر میزبانی کے فرائض بھی سر انجام دیے تھے۔

نور بخاری کو اپنی ناکام ازدواجی زندگی کی وجہ سے بھی ماضی میں تنقید کا نشانہ بنایا جاتا رہا ہے، انہوں نے 2018 میں اپنے سابق شوہر سے پانچویں بار شادی کی تھی۔

نور بخاری نے 2018 میں اپنے سابق شوہرعون چوہدری سے شادی کی تھی، اس سے قبل 2017 میں انہوں نے گلوکار ولی حامد سے طلاق لی تھی۔

ولی حامد سے نور بخاری نے 2015 میں شادی کی تھی جو محض دو سال ہی چل سکی۔

نور بخاری نے پہلی شادی دبئی کے صنعت کار وکرم سے 2008 میں کی تھی، تاہم 2010 میں دونوں کے درمیان طلاق ہوگئی تھی۔

بعد ازاں نور 2010 میں ہی ہدایت کار فاروق مینگل کے ساتھ رشتہ ازدواج میں منسلک ہوئیں، تاہم ان کی دوسری شادی بھی صرف 4 ماہ برقرار رہنے کے بعد طلاق پر ختم ہوئی۔

نور بخاری نے تیسری شادی 2012 میں عون چوہدری سے کی تھی مگر کچھ ماہ بعد نور کی ان سے بھی علیحدگی ہوگئی، جس کے بعد اداکارہ نے 2015 میں گلوکار ولی حامد سے رشتہ ازدواج میں بندھیں تھیں۔

تاہم ولی حامد سے بھی 2017 میں انہوں نے خلع لے لی تھی، جس کے بعد 2018 میں نور بخاری نے سابق شوہر عون چوہدری سے دوسری بار شادی کی، جن سے انہیں 2019 میں بیٹی بھی ہوئی۔

معروف فوک گلوکار شوکت علی کی طبیعت بدستور خراب ہے اور ان کے جگر نے کام کرنا بھی چھوڑ دیا ہے۔

شوکت علی کے بیٹے عمران شوکت کے مطابق ان کے والد کا جگر کام نہیں کر رہا ہےاور ڈاکٹرز تقریباً جواب دے چکے ہیں۔

انہوں نے اپنے والد کے چاہنے والوں سے اپیل کی ہے کہ وہ شوکت علی کے لیے دعا کریں۔

یادرہے کہ شوکت علی کو گزشتہ دنوں طبیعت بگڑنے پر اسپتال منتقل کیا گیا تھا۔

ذرائع کے مطابق گلوکار شوکت علی جگر کے عارضے کے باعث سی ایم ایچ لاہور میں زیر علاج ہیں اور ان کی حالت تشویشناک ہے۔

برطانیہ کے میوزک ایوارڈز برِٹ 2021 کی نامزدگیوں کا اعلان کردیاگیا۔

نامزدگیوں میں گلوکارہ کیلیسٹ ، دعا لیپا اور آرلو پارکس 3 ،3کیٹگریز میں نامزدگی کے ساتھ سرفہرست ہیں۔

سرفہرست تینوں برطانوی فنکاروں نے فیمیل سولو آرٹسٹ اور البم کیٹگریز میں نامزدگیاں حاصل کیں۔

ٹیلر سوئفٹ اور بی ٹی ایس سمیت کئی غیرملکی فنکار اور میوزک بینڈز کو انٹرنیشنل کیٹگری میں شامل کیا گیا ہے۔

برِٹ ایوارڈز کی تقریب کا انعقاد 11مئی کو لندن میں کیا جائے گا۔

پاکستانی اداکارہ و ماڈل میرا سیٹھی نے اداکار نعمان اعجاز سے اختلاف کا انکشاف کیا ہے۔

اداکار عدنان صدیقی حال ہی میں اداکارہ میرا سیٹھی کے ویب شو میں جلوہ گر ہوئے اور دوران شو اداکار ہ نے عدنان صدیقی سے ان کے پسندیدہ اداکار سے متعلق سوال کیا۔

عدنان صدیقی نے مشہور اداکار نعمان اعجاز کو اپنا پسندیدہ اداکار قرار دیا اور ان کا کہناتھا کہ ہمارے پاس بہت سے اچھے اداکار موجود ہیں جن میں سے ایک نعمان اعجاز ہیں۔

عدنان کے جواب میں میرا سیٹھی نے لمحے بھر کے لیے خود کو روکا اور پھر کہا مجھےنعمان اعجاز کی گفتگو سے بہت اختلاف ہے اور مجھے ان کی اداکاری اچھی لگتی تھی لیکن جب انہوں نے می ٹو ، ہی ٹو اور شی ٹو کہا تو بس مجھے یہ بہت عجیب لگا۔

میرا سیٹھی نے عدنان صدیقی سے سوال کیا کہ کیا جب مرد ساتھ بیٹھتے ہیں تو وہ واقعی می ٹو تحریک کا مذاق اڑاتے ہیں؟

عدنان صدیقی نے جواب دیتے ہوئے کہا کہ تحریک کا مذاق اڑانا دوسری چیز ہے لیکن میری نظر میں آگاہی ہونا ضروری ہے اور ہم تو اس تحریک سے ڈر گئے ہیں۔

خیال رہے کہ گزشتہ برس نعمان اعجاز کا ایک انٹرویو کلپ خاصا وائرل ہوا تھا جس میں انہوں نے می ٹو تحریک کے لیے ان الفاظ کا انتخاب کیا تھا۔

بھارتی اداکار انوپم کھیر کی اہلیہ اداکارہ کرن کھیر بلڈ کینسر کے مرض میں مبتلا ہوگئیں اور وہ بھارتی شہر ممبئی میں زیرعلاج ہیں۔

کرن کھیر اداکاری کے ساتھ ساتھ سیاست میں بھی پیش پیش ہیں اور بھارت کی حکمران جماعت بھارتیہ جنتا پارٹی کی چندی گڑھ رکن پارلیمنٹ ہیں۔

انوپم کھیر نے ٹوئٹر پر اپنی اہلیہ اداکارہ کرن کھیر کے بلڈ کینسر میں مبتلا ہونے کی تصدیق کی ہے اور کہا ہے کہ کرن کھیرکا علاج جاری ہے ۔

بی جے پی کے ریاستی صدر ارون سوڈ کے مطابق 11 نومبر کے دن کرن کھیر کے بائیں ہاتھ میں فریکچر ہوا تھا جس کے علاج کے دوران ہی انہیں اس بیماری کے بارے میں معلوم ہوا۔

ارون سوڈ کے مطابق ابتدائی مرحلے میں بیماری کا پتہ لگنے کے بعد ، کرن کھیر اپنے علاج کے لیے 4 دسمبر کو ممبئی گئی تھی۔

انہوں نے اس کے بارے میں مزید بتایا کہ کرن کھیر کی صحت یابی میں تین سے چار ماہ لگیں گے۔

کرن کھیر اب تک کئی کامیاب فلموں میں کام کر چکی ہیں جن میں منگل پانڈے ، رنگ دے بسنتی ، ویر زارا ، دیوداس ، میں ہوں نا ، دوستانہ ، کبھی الویدہ نا کہنا، فنا اور ٹوٹل سیاپا جیسی متعدد فلمیں شامل ہیں ۔

اس کے علاوہ انہوں نے کئی ٹیلی ویژن شوز میں بھی کام کیا۔

بھارتی پنجاب میں پیدا ہونے والی کرن کھیر نے 2009 میں بی جے پی میں شمولیت اختیار کی تھی اور الیکشن میں پارٹی کے لئے انتخابی مہم چلائی تھی۔ اس کے بعد ، 2014 کے لوک سبھا انتخابات میں ، بی جے پی نے انہیں چندی گڑھ سیٹ سے امیدوار بنایا اور وہ پہلی بار پارلیمنٹ پہنچیں۔

سرکاری ادارے نے سرکار کے ہی احکامات مسترد کر دیئے، پنجاب ایجوکیشن فاؤنڈیشن نے ملازمین کو ہفتے اور اتوار کے روز بھی حاضر ہونے کا حکم جاری کر دیا.

تفصیلات کےمطابق پنجاب ایجوکیشن فاؤنڈیشن میں 50 فیصد حاضری پالیسی کی خلاف ورزی کا انکشاف ہوا ہے۔ آفیسر آئی ٹی 30 سالہ ارسلان علی کورونا میں مبتلا ہونے کے بعد جاں بحق ہو گئے ہیں ۔تین ڈپٹی ڈائیریکٹرز کی کورونا رپورٹس مثبت آ گئیں۔ ڈپٹی ڈائریکٹر ایڈمن شہزاد جاوید، ڈپٹی ڈائریکٹر ایچ آر عائشہ شاہد اور ڈپٹی ڈائریکٹر آئی ٹی سلمان انور کورونا میں مبتلا ہو گئے ہیں۔ پیف حکام نے پارٹنر سکولوں کے طلبہ کے ب فارم کی تصدیق کے لئےتمام سٹاف کو حاضر ہونے کا حکم دے رکھا ہے، ب فارم کی تصدیق کرنے والے سٹاف کوہفتہ کے 8 روز روزانہ حاضر ہونا ہوگا۔ پیف کے ترجمان کا موقف ہے کہ ملازمین کو صبح اور شام کی شفٹ میں بلایا جا رہا ہے ، کورونا ایس او پیز پر عمل درآمد کیا جا رہا ہے۔

لاہور میں کورونا کے بڑھتے کیسز کے باوجود ڈولفن فورس کو نیا ٹاسک مل گیا، اہلکاروں کو روزانہ 200 سے زائد شہریوں کی چیکنگ اور کوائف مرتب کرنے کی ہدایت، اہلکار کورونا سے بچنے کیلئے جعلی کوائف مرتب کر کے جمع کرانے لگے۔

ایس پی ڈولفن نے چند روز قبل تمام ٹیموں کو ڈیوٹی کے دوران کم سے کم 200 افراد کو چیک کرنے اور انکےکوائف مرتب کرنے کا حکم دیا تھا، ڈولفن فورس کے اہلکار روانہ 200 سے زائد افراد کی چیکنگ اور کوائف مرتب کرنے کے ٹاسک سے پریشان ہوگئے۔ کورونا کی وجہ سے بیشتر اہلکاروں نے فرضی افراد کے کوائف کیساتھ ریکارڈ مرتب کرکے جمع کروادیا۔

اہلکاروں کا کہنا ہے لوگوں کو سماجی فاصلے کی تلقین کر رہے ہیں اور خود لوگوں کے قریب جا رہے ہیں، ڈولفن اہلکاروں کا موقف ہے کہ کورونا کی صورتحال میں صرف مشکوک افراد کی ہی چیکنگ ہونی چاہیے، ڈولفن اہلکار روزانہ اتنے لوگوں کو ملنے اور جسمانی تلاشی پر اضطراب کا شکار ہیں۔

واضح رہےکہ صوبائی دارالحکومت لاہور میں کورونا کی تیسری لہر قہر ڈھانے لگی، گزشتہ 24 گھنٹوں میں کورونا مزید 30 قیمتی زندگیاں نگل گیا جبکہ 1708 افراد میں وائرس کی تصدیق ہوئی، 18 بچوں سمیت 697 مریض لاہور کے سرکاری و پرائیوٹ ہسپتالوں میں داخل ہیں جن میں سے 172 مریضوں کی حالت تشویشناک ہے۔

حکومت کی جانب سے کورنا کے پھیلاؤ روکنے کیلئےلاہور سمیت ملک بھر میں سمارٹ لاک ڈاؤن نافذ کیا گیا، تعلیمی ادارے، پبلک ٹرانسپورٹ بند ہے، کورونا ایس او پیز کی خلاف ورزی پر چالان اور مقدمات درج کیے جارہے ہیں، اب تک ماسک نہ پہننے پر 407 مقدمات جبکہ کورونا ایس او پیز کی خلاف ورزی پر 438 مقدمات درج کیے گئے۔

حکومت کے زیر انتظام سی کلاس ٹرانسپورٹرز اور اڈوں پر کورونا ایس او پیز کی خلاف ورزی اور ایک سیٹ چھوڑنے کی پالیسی نظر انداز، جبکہ ڈی کلاس پرائیویٹ ٹرانسپورٹرز نے کارروائیوں کے پیش نظر 50 فیصد مسافر بٹھانا شروع کر دیے ۔

تفصیلات کے مطابق کورونا کی تیسری لہرمیں تیزی کے پیش نظر انٹر سٹی ٹرانسپورٹ میں 50 فیصد مسافروں کو بٹھانے کے احکامات مگر حکومت کے زیر انتظام چلنے والے لاری اڈے، سٹی ٹرمینل پر ایس او پیز کی اور 50 فیصد مسافروں کو بٹھانے کی پالیسی کی کھلم کھلا خلاف ورزیاں جاری ہیں۔لاری اڈا سمیت سی کلاس ٹرانسپورٹرز اور بس اڈوں پر بسیں بھرنے اورر اوور لوڈنگ کر کے دیگر شہروں کو روانہ کرنے کا سلسلہ جاری ہے ، جسے روکنے کے لئےکوئی عملی اقدامات نہیں کیے جا سکے ، مسافر بغیر ماسک اور سماجی فاصلے کے بسوں میں سوار ہونے لگے۔

دوسری جانب کارروائیوں اور جرمانوں کے پیش نظر ڈی کلاس و پرائیویٹ ٹرانسپورٹرز نے اپنے بس اڈوں پر کورونا ایس او پیز پر عملدرآمد کروانا شروع کر دیا اور 50 فیصد مسافروں کےساتھ دیگر شہروں کو بسیں بھیجا شروع کر دیں۔ڈی کلاس و پرائیویٹ ٹرانسپورٹرز بس اڈؤں سکائیویز ، فیصل موورز ، رہبر ٹرانسپورٹ سمیت دیگر کی جانب سے ڈس انفیکشن ٹنل نصب ، ماسک ، سینٹائزر ، ٹمپریچر گن اور 50 فیصد مسافر بٹھانے کی پالیسی پر عملدرآمد کیاجارہا ہے۔

ڈی کلاس ٹرانسپورٹرز کا کہنا ہے کہ ہم نے تو حکومتی ایس او پیز عملدرآمد شروع کر دیا حکومت کو چاہیے کہ وہ اپنے زیر انتظام اڈوں پر بھی عملدرآمد کروائے ۔شہریوں کا کہنا ہے کہ ایس او پیز پر عملدرآمد یقینی بنانا چاہیے تاکہ اس مہلک وبا سے بچا جا سکے۔لاری اڈا ، سٹی ٹرمینل اور جناح ٹرمینل پر 50 فیصد مسافر بٹھانے کی پالیسی اور ایس او پیز کی خلاف ورزیوں پر کارروائیاں نہ ہونا سوالیہ نشان ہے

کمشنر لاہور کیپٹن ریٹائرڈ محمد عثمان کورونا ویکسین لگوانے کی ترویج کے لئے متحرک ہوگئے، کمشنر لاہور نے سماجی رابطوں کی ویب سائٹ ٹویٹر پر سورہ المائدہ کی آیت کا ترجمہ شئیر کیا، “جس نے ایک انسان کی جان بچائی تو گویا اس نے پوری انسانیت کی جان بچائی”۔

کمشنر لاہور کیپٹن ریٹائرڈ محمد عثمان نے شہریوں سے کورونا ویکسین کے پراپیگنڈے پر کان نہ دھرنے کی اپیل کرتے ہوئے بتایا کہ حکومت کی جانب سے کورونا ٹیسٹ مکمل طور پر فری کیے جارہے ہیں، کہیں بھی فیس وصول نہیں کی جارہی ہے۔ شہری کورونا کا فری ٹیسٹ کروانے کیلئے ہیلپ لائن 1033 پر رابطہ کریں، انہیں ایریا کے لحاظ سے ٹیسٹ سینٹر بارے آگاہ کردیا جائے گا۔

کمشنر لاہور نے ایس او پیز پر عملدرآمد نہ کرنے پر لاک ڈاؤن بڑھانے کا عندیہ دیدیا، کہتےہیں شہری سنجیدگی کا مظاہرہ کریں اور گھروں میں محدود رہیں تاکہ خود کو اور اپنے پیاروں کو موذی وائرس سے محفوظ رکھ سکیں۔