All posts by News Editor

پاکستان اور سعودی عرب نے تمام شعبوں میں دوطرفہ تعاون بڑھانے اور مل کر کام کرنے پر اتفاق جبکہ دیرینہ تعلقات کو مزید مستحکم بنانے کے عزم کا اعادہ کیا ہے۔

وزیر اعظم کے میڈیا آفس سے جاری بیان کے مطابق وزیر اعظم عمران خان کو سعودی ولی عہد، نائب وزیر اعظم اور وزیر دفاع محمد بن سلمان نے ٹیلی فون کیا۔

شہزادہ محمد بن سلمان نے وزیر اعظم سے ان کی صحت کے بارے میں دریافت کیا اور ان کی جلد صحتیابی کی دعا کی۔

وزیر اعظم عمران خان نے ولی عہد کی خیریت کے بارے میں بھی دریافت کیا جنہوں نے حال ہی میں ایک سرجری کروائی تھی۔

عمران خان نے شہزادہ محمد بن سلمان کے اعلان کردہ ‘گرین سعودی اقدام’ اور ‘گرین مشرق وسطی کے اقدام’ کی تعریف کی۔

انہوں نے پاکستان کے ’10 بلین ٹری سونامی’ اقدام پر بھی روشنی ڈالی جو پورے ملک میں جاری ہے۔

وزیر اعظم نے ماحولیاتی نظام کی بحالی اور موسمیاتی تبدیلیوں سے نمٹنے کے لیے اس منصوبے کے ممکنہ فائدہ، دونوں ممالک کے ماحولیاتی اقدامات کے درمیان مشابہت کو اجاگر کرتے ہوئے اس شعبے میں دوطرفہ تعاون اضافے کی توقع ظاہر کی۔

انہوں نے سعودی فرمانروا شاہ سلمان بن عبد العزیز کے لیے نیک خواہشات کا اظہار بھی کیا۔

عمران خان نے پاکستان کے سعودی عرب کے ساتھ قابل بھروسہ اور برادرانہ تعلقات کو مزید مستحکم کرنے کی خواہش اور سعودی عرب کی خود مختاری اور علاقائی سالمیت کے تحفظ کے لیے پاکستان کی حمایت کا اعادہ کیا۔

ٹیلی فونک گفتگو میں دونوں رہنماؤں نے تمام شعبوں میں دوطرفہ تعلقات کو مزید فروغ دینے کے لیے مل کر کام کرنے پر اتفاق کیا۔

سعودی ولی عہد نے وزیر اعظم کو مستقبل قریب میں سعودی عرب کا دورہ کرنے کی دعوت دی جسے انہوں نے قبول کرلیا۔

دونوں رہنماؤں نے پاک ۔ سعودی عرب برادرانہ تعلقات کو مضبوط، دیرینہ اور مستحکم بنانے کے عزم کا اعادہ کیا۔

قبل ازیں وزیر اعظم عمران خان نے سماجی رابطے کی ویب سائٹ ٹوئٹر پر سعودی عرب کے ولی عہد محمد بن سلمان کو لکھا گیا خط بھی جاری کیا اور لکھا کہ ‘برادرِ عزیز عزت مآب ولی عہد محمد بن سلمان کے سبز سعودی عرب اور سبز مشرقِ وسطیٰ منصوبوں کے بارے میں جان کر میں مسرور ہوں’۔

انہوں نے کہا کہ ‘ہم معاونت کی پیش کش کر چکے ہیں کیونکہ ان سے سرسبز و شفاف پاکستان اور دس ارب درختوں کے ہمارے منصوبوں کو جلا ملتی ہے’۔

سعودی ولی عہد کے نام خط میں وزیراعظم نے کہا کہ ‘میں آپ کے منصوبے کے بارے میں جان کر خوش ہوں کہ سبز سعودی عرب اور سبز مشرق وسطیٰ منصوبہ دونوں کا مقصد ماحول کا تحفظ ہے’۔

انہوں نے کہا کہ ‘دونوں منصوبوں میں 10ارب درخت سعودی عرب اور خطے میں 50 ارب درخت کا منصوبہ شامل ہے، جس میں 30 فیصد سے زیادہ علاقہ محفوظ ہوگا، میرین اور ساحلی ماحولیات کے تحفظ اور 2030 تک سعودی عرب کی قابل تجدید 50 فیصد توانائی پیدا ہوگی، جو انتہائی قابل تعریف ہے’۔

سعودی عرب کے منصوبے کی تعریف کرتے ہوئے ان کا کہنا تھا کہ یہ منصوبے ماحولیاتی تبدیلی کے اثرات کا مقابلہ کرنے کے منصوبوں سے جڑے ہوئے ہیں، جس کے تحت 2014 سے 2018 تک کامیابی کے ساتھ ایک ارب درخت اگائے گئے اور 10 ارب ٹری سونامی کا منصوبہ پورے ملک میں زیرتکمیل ہے۔

وزیراعظم نے کہا کہ ہم اپنے منصوبے کو 2023 تک 15 فیصد زمینی اور 10 فیصد میرین پر مشتمل علاقے کو محفوظ بنانے کے لیے وسعت دیں گے، ان منصوبوں سے نہ صرف ماحولیات کا تحفظ ہوگا بلکہ اس سے سیاحت اور نوجوانوں کے ساتھ ساتھ مقامی برادریوں کو روزگار کے مواقع پیدا ہوں گے۔

انہوں نے کہا کہ سعودی عرب کے وژن کی طرح ہم نے ہدف بنایا ہوا ہے کہ اپنی 60 فیصد توانائی 2030 تک ملک میں شفاف توانائی ہو جو شمسی، ونڈ اور پن بجلی کی پیدا کرنے کی صلاحیت شامل ہے۔

عمران خان نے سعودی عرب کو سبز منصوبے میں پاکستان کےمکمل تعاون کی پیش کش کی اورکہا کہ ہمیں ماحولیات کے حوالے اپنے اقدامات اور وژن سے ایک دوسرے کو آگاہ کرکے خوشی ہوگی۔

انہوں نے کہا کہ ماحولیاتی تبدیلی کے چیلنج سے نمٹنے کے لیے دنیا کے پاس سبز راستے کے سوا کوئی حل نہیں ہے اور سعودی عرب کے اس منصوبے کو تہہ دل سے سراہتا ہوں۔

ملک بھر میں شب برات نہایت عقیدت واحترام اور مذہبی جوش وجذبے کے ساتھ منائی گئی ۔

مساجد میں نماز مغرب کے بعد خصوصی نوافل ادا کئے گئے ۔ بعد نمازعشا عبادات الٰہی،توبہ واستغفا ر، شب بیداری کا اہتمام ہوا جبکہ علما کرام نے شب برات کے فضائل بیان کئے ۔

اللہ تعالیٰ کے حضور گناہوں سے توبہ، بخشش ومغفرت ،ایمان و سلامتی، رزق کی کشادگی، آفات وبلیات، مصیبت، محتاجی، تنگ دستی، طبی وبا سے صحت وعافیت، عالم اسلام، مظلوم مسلمانوں اور پاکستان کی ترقی و استحکام کیلئے خصوصی دعائیں کی گئیں‌۔

صلوٰة التسبیح، محافل ذکر ونعت، درود شریف اور خصوصی دعاؤں کا اہتمام بھی کیا گیا ۔

پنجاب کےکوروناکیسزکی زیادہ شرح والےشہروں میں لاہور سمیت 5 شہر شامل ہیں جہاں ایس اوپیز پر سختی سے عملدرآمد کرانے کے احکامات جاری کیے گئے ہیں۔

محکمہ صحت پنجاب کے مطابق صوبے میں کورونا کیسز کی سب سے زیادہ شرح صوبائی دارالحکومت لاہور میں 23 فیصد ہے جب کہ فیصل آباد اور گوجرانوالہ میں مثبت کورونا کیسز کی شرح 18 فیصد ہے۔

اس کے علاوہ راولپنڈی میں 13 فیصد جب کہ ملتان میں یہ شرح 12 فیصد ہے۔

پنجاب حکومت نے زیادہ کیسز والے شہروں میں انتظامیہ کو ایس او پیز پر سختی سے عملدرآمد کرانے کی ہدایت کی ہے
سلام آباد میں کورونا مریضوں کے لیے مختص تین اسپتالوں میں آکسیجن بیڈز مکمل بھر گئے۔

ڈسٹرکٹ ہیلتھ آفیسر اسلام آباد کے مطابق وفاقی دارالحکومت میں کورونا مریضوں کے لیے مختص اسپتالوں میں وینٹی لیٹرز بھرگئے اور مزید گنجائش نہیں ہے جب کہ کورونا مریضوں کے علاج کے لیے 15 سرکاری اور نجی اسپتال مختص کردیے گئے ہیں۔

ڈی ایچ او کا کہناہےکہ پمز میں 163 آکسیجن بیڈز میں 120 کورونا مریضوں سے بھر گئے جب کہ متعدی بیماریوں کے لیے قائم آئی ایچ آئی ٹی سی اسپتال میں 70 آکسیجن بیڈز میں سے 50 پر کورونا مریض ہیں، اسی طرح پولی کلینک اسپتال میں 27 آکسیجن بیڈز میں سے 24، سی ڈی اے اسپتال میں سے 43 آکسیجن بیڈز میں سے 32 پر کورونا مریض ہیں۔

ڈی ایچ او کا بتانا ہےکہ شہر میں کورونا مریضوں کی تعداد میں تیزی سے اضافہ ہو رہا ہے اور گزشتہ روز بھی 856 کورونا کے مثبت کیس رپورٹ کیے گئے جو ریکارڈ کیسز ہیں۔

دوسری جانب اسلام آباد میں کورونا مریضوں کے لیے مختص تین اسپتالوں میں آکسیجن بیڈز مکمل بھر گئے۔

ڈسٹرکٹ ہیلتھ آفیسر اسلام آباد کے مطابق وفاقی دارالحکومت میں کورونا مریضوں کے لیے مختص اسپتالوں میں وینٹی لیٹرز بھرگئے اور مزید گنجائش نہیں ہے جب کہ کورونا مریضوں کے علاج کے لیے 15 سرکاری اور نجی اسپتال مختص کردیے گئے ہیں۔

ڈی ایچ او کا کہناہےکہ پمز میں 163 آکسیجن بیڈز میں 120 کورونا مریضوں سے بھر گئے جب کہ متعدی بیماریوں کے لیے قائم آئی ایچ آئی ٹی سی اسپتال میں 70 آکسیجن بیڈز میں سے 50 پر کورونا مریض ہیں، اسی طرح پولی کلینک اسپتال میں 27 آکسیجن بیڈز میں سے 24، سی ڈی اے اسپتال میں سے 43 آکسیجن بیڈز میں سے 32 پر کورونا مریض ہیں۔

ڈی ایچ او کا بتانا ہےکہ شہر میں کورونا مریضوں کی تعداد میں تیزی سے اضافہ ہو رہا ہے اور گزشتہ روز بھی 856 کورونا کے مثبت کیس رپورٹ کیے گئے جو ریکارڈ کیسز ہیں۔

ملک میں کورونا سے مزید 41 افراد انتقال کر گئے اور 4525 سے زائد کیسز بھی رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 40369 ٹیسٹ کیے گئے جن میں سے 4525 افراد میں کورونا وائرس کی تصدیق ہوئی جب کہ وائرس سے 41 ہلاکتیں ہوئیں۔

این سی او سی کے اعداد و شمار کے مطابق پاکستان میں مسلسل تیسرے روز 4 ہزار سے زائد کورونا کیسز رپورٹ ہوئے ہیں۔

سرکاری پورٹل کے مطابق ملک گزشتہ 24 گھنٹوں کے دوران کورونا کے مثبت کیسز کی شرح 11 اعشاریہ 2 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 14256 ہوگئی اور مجموعی کیسز 6 لاکھ 59211 تک جاپہنچے ہیں جب کہ فعال کیسز کی تعداد 46663 ہے۔

اس کے علاوہ 24 گھنٹوں کے دوران ملک بھر میں 2268 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 5 لاکھ 98197 ہو گئی ہے۔

صوبوں کی صورتحال
سرکاری پورٹل کے مطابق سندھ میں کورونا کے مریضوں کی مجموعی تعداد 264889 ہوگئی ہے جب کہ 4491 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 215227 ہے اور 6246 افراد وائرس میں مبتلا ہوکر جان سے جاچکے ہیں جب کہ بلوچستان میں مریضوں کی کل تعداد 19525 اور ہلاکتیں 206 ہو چکی ہیں۔

خیبرپختونخوا میں کورونا کے مریضوں کی تعداد 85531 اور 2301 ہلاکتیں ہوچکی ہیں جب کہ آزاد کشمیر میں 12484 افراد وائرس میں مبتلا ہوچکے ہیں اور 348 افراد انتقال کرگئے۔

اس کے علاوہ گلگت بلتستان میں اب تک کورونا کے مریضوں کی تعداد 5010 اور 103 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 56450 ہے اور اب تک 561 مریض انتقال کرچکے ہیں۔

ٹی وی اسکرین اور حقیقی زندگی کی مقبول ترین شوبز جوڑی کا اعزاز رکھنے والے احد رضا میر اور سجل علی نے 14 مارچ کو شادی کی پہلی سالگرہ منائی تھی۔

سجل علی اور احد رضا میر نے گزشتہ برس ابوظبی میں مختصر پیمانے پر منعقد کی گئی تقریب میں شادی کی تھی جس میں ان کے چند قریبی رشتہ داروں اور دوستوں نے شرکت کی تھی۔

حال ہی میں احد رضا میر نے سوشل میڈیا پر اہلیہ سجل علی کے ساتھ تصویر شیئر کرتے ہوئے شادی کی پہلی سالگرہ کی مبارکباد اور ان کے لیے نیک خواہشات کے اظہار پر شکریہ ادا کیا۔

احد رضا میر نے انسٹاگرام پر شیئر کی گئی پوسٹ میں لکھا کہ ‘میں جانتا ہوں کہ یہ پوسٹ کچھ دیر سے کی جارہی ہے لیکن آپ سب کا بالخصوص ہمارے مداحوں کا بہت شکریہ جنہوں نے ہماری شادی کی پہلی سالگرہ کو بہت خاص بنایا’۔

انہوں نے لکھا کہ ‘ہمیں ایسا محسوس ہوا جیسے آپ نے ہمارے ساتھ یہ خوشی منائی ہے’۔

احد رضا میر نے اپنی پوسٹ میں مزید لکھا کہ ‘وہ لوگ جنہوں نے ہماری شادی کی سالگرہ کے موقع پر ہمارے ماحول کے لیے کچھ اچھا کام کیا، ان کی طرف سے یہ بہترین تحفہ تھا’۔

انہوں نے مداحوں کا شکریہ ادا کیا اور کہا کہ ہم آپ سب سے محبت کرتے ہیں۔

یوں تو سجل علی اور احد رضا میر اپنی زیادہ تر مصروفیات کے حوالے سے سوشل میڈیا پر پوسٹ نہیں کرتے ہیں لیکن حال ہی میں مہندی کی ایک تقریب میں دونوں کی تصاویر اور ویڈیوز سوشل میڈیا پر وائرل ہوئی تھیں جس میں دیگر اداکار بھی شریک تھے۔

اس موقع پر سجل علی نے ٹینا درانی کا لباس زیب تن کیا تھا جبکہ احد رضا میر آئیوری کرتا اور چوڑی دار اور میچنگ کے ویسٹ کوٹ میں نظر آئے تھے۔

سجل علی اور احد رضا میر ڈرامے ‘یقین کا سفر ‘میں ایک ساتھ نظر آئے تھے جس کے بعد انہوں نے ‘آنگن’،’یہ دل میرا ‘ میں بھی ساتھ کام کیا تھا۔

اور اب دونوں مقبوضہ کشمیر میں بھارتی مظالم اور وہاں 2019 میں ہونے والے پلوامہ حملے کے تناظر میں بنائی جانے والی ایک ویب سیریز ‘دھوپ کی دیوار’ میں دکھائی دیں گے۔

’دھوپ کی دیوار‘ کی کہانی معروف ڈراما اور ناول عمیرہ احمد نے تحریر کی ہے جبکہ اس کی ہدایات حسیب حسن دے رہے ہیں۔

گزشتہ دنوں میوزک بینڈ وائٹل سائنز کے روحیل حیات نے ایک مرتبہ پھر میوزک پلیٹ فارم سے علیحدگی اختیار کرنے کی تصدیق کی تھی۔

سماجی رابطے کی ویب سائٹ ٹوئٹر پر مداحوں کے سوالوں کے جواب دیتے ہوئے روحیل حیات نے کوک اسٹوڈیو سے علیحدہ ہونے سے متعلق بتایا تھا۔

روحیل حیات جو کبھی بھی ٹوئٹر پر زیادہ فعال نہیں رہے تھے، ان دنوں صارفین کو کافی ایکٹو دکھائی دیے تھے جس پر ایک مداح نے ان سے سوال کیا تھا کہ کیا وہ کوک اسٹوڈیو سے بریک لینے کے بعد سوشل میڈیا پر ایکٹو ہوئے ہیں۔

جس پر روحیل حیات نے جواب دیا تھا کہ ‘مجھے یقین ہے کہ کوک اسٹوڈیو کی منصوبہ بندی کی جارہی ہے لیکن میں نہیں کررہا’۔

انہوں نے کہا تھا کہ ‘سوشل میڈیا یہ معلوم کرنے کے لیے بہترین جگہ ہے کوئی، کس طریقے سے غیر جانبدار یا متعصب ہے’۔

روحیل حیات نے ٹوئٹ میں مزید لکھا تھا کہ میں اسے (سوشل میڈیا کو) اپنے عدم توازن کی پیمائش کے لیے آلے کے طور پر استعمال کررہا ہوں۔

اس حوالے سے مختلف خیالات کا اظہار کیا جارہا ہے کہ روحیل حیات کے بعد کوک اسٹوڈیو کا اگلا سیزن کون پروڈیوس کرے گا جن میں علی حمزہ اور ذوالفقار جبار (زلفی) کے نام شامل ہیں۔

تاہم اب اسٹرنگز کی جانب سے 33 سال بعد میوزک بینڈ کا سفر اختتام کو پہنچنے کے بعد مداح یہ سوچ رہے ہیں کہ آخر اب کوک اسٹوڈیو کو آگے کون بڑھائے گا۔

حال ہی میں ٹوئٹر پر سعامر نذیر نامی مداح نے روحیل حیات سے پوچھا کہ ‘روحیل حیات آپ کوک اسٹوڈیو چھوڑ چکے ہیں، اسٹرنگز نے بھی بینڈ ختم کردیا ہے، اب کوک اسٹوڈیو کون پروڈیوس کرے گا؟’

انہوں نے مزید پوچھا کہ ‘مجھے اس حوالے سے بہت تشویش ہے لیکن میں آپ کا بہت بڑا مداح ہوں’۔

عامر نذیر کی اس ٹوئٹ کے جواب میں روحیل حیات نے ان کا شکریہ ادا کیا۔

روحیل حیات نے کہا کہ بلال مقصود نے ویلو پر اکیلے کام کیا تھا اور وہ دوبارہ بھی ایسا کرسکتے ہیں۔

انہوں نے کہا کہ کوک اسٹوڈیو کے لیے کئی امیدوار ہیں، امید ہے کہ کوک کسی ایسے شخص کو تلاش کرے گا جو اسے پروڈیوس کرنے کے لیے پُرجوش ہو۔

روحیل حیات نے کہا کہ ‘میرے خیال میں زلفی (ذوالفقار جبار) اس کے لیے بہترین آپشن ہیں’۔

خیال رہے کہ روحیل حیات نے سال 2008 میں کوک اسٹوڈیو کو لانچ کیا تھا تاہم 6 سیزنز بعد انہوں نے 2013 میں کوک اسٹوڈیو سے علیحدگی اختیار کی تھی۔

ان کے بعد سیزن 7 سے 10 تک اسٹرنگز بینڈ نے کوک اسٹوڈیو کو سنبھالا اور 2017 میں اسے خیرباد کہہ دیا جس کے بعد علی حمزہ او زوہیب قاضی نے سیزن 11 پروڈیوس کیا تھا۔

بعدازاں روحیل حیات 2019 میں کوک اسٹوڈیو کے سیزن 12 میں واپس آئے اور سیزن 2020 بھی انہوں نے پروڈیوس کیا تھا۔

اس حوالے سے زلفی نے ایکسپریس ٹریبیون کو بتایا تھا کہ ممکنہ طور پر ایسا ہوسکتا ہے۔

رپورٹ کے مطابق زلفی نے کہا تھا کہ ہرسال اس بات کا قوی امکان ہوتا ہے کہ کوئی قابل شخص بطور پروڈیوسر آئے، لہذا اس مرتبہ ممکن ہے کہ ایسا ہو اور وہ پروڈیوس کریں۔

زلفی نے کہا تھا کہ ‘ابھی میں صرف یہ کہہ سکتا ہوں کہ اس وقت اس حوالے سے کچھ بھی مصدقہ نہیں ہے لیکن ہم کبھی نہیں جانتے، ایسا ہو بھی سکتا ہے، دیکھیں مستقبل میں کیا ہوتا ہے’۔

یہاں یہ بات مدنظر رہے کہ زلفی نے ماضی میں کوک اسٹوڈیو کے بینر تلے ‘ہم ایک ہیں’ پروڈیوس کیا تھا۔

بالی وڈ کی متنازع شخصیت اور اداکارہ کنگنا رناوت کا کہنا ہے کہ میں فلم انڈسٹری میں ’ان چاہی لڑکی‘ تھی لیکن انڈسٹری کومیری بہت ضرورت تھی۔

سماجی رابطے کی ویب سائٹ ٹوئٹر پر اداکارہ کنگنا کی صلاحیتوں کو بالی وڈ فلم ساز وویک رانجن اگنی ہوتری کی جانب سے سراہاگیا تھا۔

فلم ساز کے ٹوئٹ کا جواب دیتے ہوئے کنگنا نے اپنی ٹوئٹ میں لکھا کہ ’میں ایک ان چاہی لڑکی تھی، لیکن آج میں بہترین فلم بینوں، فنکاروں اور ماہرین کے ساتھ کام کرتی ہوں، میں اپنےکام سے پیار کرتی ہوں، لیکن پیسے اور شہرت کے لیے نہیں، لوگ مجھے دنیا کی بہترین شخصیت سمجھ کر کہتے ہیں کہ تم ہی صرف یہ کرسکتی ہو، مجھے معلوم ہے کہ میں ناپسندیدہ تھی لیکن آج میری بہت ضرورت ہے۔

خیال رہے کہ کنگنا اس سے قبل بھی اپنی سالگرہ پر کی گئی پوسٹ میں انکشاف کرچکی ہیں کہ نانی دادی سے یہ کہانیاں سنتی آئی ہوں کہ ایک بیٹی کی موجودگی میں دوسری بیٹی کی پیدائش نے ہر ایک کو مایوس کیا لیکن انھیں اس بات سے کوئی فرق نہیں پڑتا تھا کہ میں بہت خوبصورت تھی اور میری شادی کرنا کوئی بڑا بوجھ نہیں ہو گا۔

کنگنا نے اپنی پوسٹ میں مزید لکھا کہ سب اس قصے پر ہنستے تھے اور اس واقعے نے ہر بار میرے دل کو توڑا۔

پاکستان کرکٹ ٹیم کے دورہ زمبابوے کا شیڈول جاری کردیا گیا ہے۔

کورونا وائرس کی عالمی وبا کے دنوں میں پاکستان دنیا کی وہ پہلی مینز کرکٹ ٹیم ہوگی جو زمبابوےکا دورہ کرے گی۔

دونوں ٹیموں کے مابین 3 ٹی ٹوئنٹی انٹرنیشنل اور 2 ٹیسٹ میچز پر مشتمل سیریز کا آغاز 21 اپریل سے ہوگا۔

23،21 اور 25 اپریل کو 3 ٹی ٹونٹی انٹرنیشنل میچز کھیلنے کے بعددونوں ٹیمیں 29 اپریل سے شروع ہونے والے پہلے ٹیسٹ میچ میں مدمقابل آئیں گی، یہ پہلا موقع ہوگا کہ جب دونوں ٹیمیں 2013 کے بعد زمبابوے میں طویل طرز کی کرکٹ میں مدمقابل آئیں گی، سیریز کا دوسرا ٹیسٹ میچ 7 سے 11 مئی تک کھیلا جائےگا۔

دونوں ممالک کے مابین شیڈول اس سیریز کے تمام میچز ہرارے اسپورٹس کلب میں کھیلے جائیں گے۔

سیریز میں شامل تینوں ٹی ٹوئنٹی میچز پاکستانی وقت کے مطابق دوپہر 2 بجے جب کہ ٹیسٹ میچز دوپہر 12:30 بجے شروع ہوں گے۔

پاکستان کرکٹ بورڈ کا کہنا ہے کہ وہ ان غیرمعمولی اور مشکل حالات کے باوجود عالمی کرکٹ مقابلوں کو جاری رکھنے کی پالیسی اختیار کیے ہوئے ہے اور کورونا وائرس کی عالمی وبا سے اب تک پاکستان انگلینڈ اور نیوزی لینڈ کا دورہ کرنے کے ساتھ ساتھ زمبابوے اور جنوبی افریقا کی ٹیموں کی میزبانی کرچکا ہے۔

زمبابوے نے اس سے قبل اپنی سرزمین پر جس آخری سیریز کی میزبانی کی تھی وہ جنوری 2020 میں سری لنکا کے خلاف کھیلی گئی تھی۔

قومی کرکٹ ٹیم اس وقت تین ون ڈے اور تین ٹی ٹوئنٹی میچز پر مشتمل سیریز کھیلنے کی غرض سے جنوبی افریقا میں موجود ہے، جہاں سےوہ 17 اپریل کو زمبابوے روانہ ہوجائے گی۔

پاکستان اور زمبابوے کے درمیان اب تک کھیلے گئے تمام 14 ٹی ٹونٹی انٹرنیشنل میچز پاکستان نے جیتے جب کہ 17 ٹیسٹ میچز میں سے 10 پاکستان نے جیتے، 4 ڈرا ہوئے جب کہ 3 زمبابوے نے جیتے۔

لاہور: کورونا سے پاک پاکستانی کرکٹرزصلاحیتیں نکھارنے کیلیے پْرجوش ہیں جب کہ اسکواڈ میں شامل تمام34ارکان کے ٹیسٹ کی رپورٹس منفی آگئیں۔

دورہ جنوبی افریقہ اور زمبابوے کیلیے پاکستان کا وائٹ بال اسکواڈ جمعے کی صبح لاہور سے جوہانسبرگ روانہ ہوا تھا، 21 کرکٹرز اور 13معاون اسٹاف ارکان قومی ایئر لائنز کی چارٹرڈ پرواز سے جنوبی افریقہ پہنچے جہاں پر کورونا ٹیسٹ کیے گئے، خوش آئند بات یہ ہے کہ مہمان اسکواڈ میں شامل تمام 34 ارکان کی رپورٹ منفی آگئی ہیں۔

کرکٹرز آج سے سپر اسپورٹس پارک سینچورین میں ٹریننگ کا آغازکریں گے، پہلا ٹریننگ سیشن دوپہر ڈھائی بجے شروع ہوگا،ٹیم ذرائع کے مطابق پاکستانی اسکواڈ میں شامل تمام ارکان لاہور میں بنائے گئے بائیوببل میں تھے، سفر بھی خصوصی طیارے میں کیا، جنوبی افریقہ پہنچ کر پہلا کورونا ٹیسٹ منفی آگیا، لہٰذا اب ٹریننگ شروع کرنے میں کوئی امر مانع نہیں۔
جنوبی افریقی ٹیم پاکستان آئی تب بھی کورونا ٹیسٹ کی رپورٹس منفی آنے پر مہمان کرکٹرز کو بائیو ببل میں رہتے ہوئے پریکٹس سیشنزکی اجازت تھی، پاکستان ٹیم کیلیے بھی جنوبی افریقہ میں یہی پالیسی اپنائی گئی ہے۔

کھلاڑی میزبان بورڈ کے تحت کام کرنے والے میڈیکل پینل کی ہدایات پر پوری طرح عمل درآمد کرتے ہوئے سپر اسپورٹس پارک سینچورین میں پریکٹس کریں گے،وہاں پہلا میچ 2اپریل کو کھیلا جائے گا، پریکٹس سیشن میں مہمان کرکٹرز بیٹنگ، بولنگ اور فیلڈنگ میں صلاحیتیں نکھارنے کے ساتھ جسمانی استعداد بہتر بنانے کیلیے فٹنس ڈرلز کا بھی سلسلہ جاری رکھیں گے۔

ذرائع کے مطابق پہلے ایک روزہ میچ سے قبل حسن علی کی فارم اور فٹنس کا بغور جائزہ لیا جائے گا،وائٹ بال اسکواڈ میں شامل کرکٹرز کی لاہور میں قائم بائیو ببل میں منتقلی سے قبل پیسر کا کورونا ٹیسٹ مثبت آگیا تھا،انھیں گھر میں ہی رہنے کی ہدایت دی گئی تھی، کلیئر ہونے پر وہ لاہور پہنچے تو ہوٹل میں بھی رپورٹس منفی آنے پر اسکواڈ کے ہمراہ روانہ کرنے کا فیصلہ کیا گیا تھا، اس دوران دیگر کرکٹرز قذافی اسٹیڈیم میں پریکٹس میچزکھیلنے کے ساتھ ٹریننگ بھی کرتے رہے۔

حسن علی کو ایک دن بھی میدان میں اترنے کا موقع نہیں ملا،لہٰذا انھیں پہلا ون ڈے کھلانے سے قبل فٹنس کا باریک بینی سے جائزہ لیا جائے گا۔

یاد رہے کہ پاکستان اور جنوبی افریقہ کے مابین اب تک 79ون ڈے میچز کھیلے گئے ہیں،ان میں سے گرین شرٹس نے صرف 28جیتے، ناکامیوں کی ففٹی مکمل ہوچکی،ایک میچ بے نتیجہ رہا،پاکستان کا زیادہ سے زیادہ اسکور 351، کم سے کم 89رہا، جنوبی افریقہ میں دونوں ٹیمیں 34بار مقابل ہوئی ہیں،گرین شرٹس نے12میں فتح پائی،21میں شکست ہوئی،ایک میچ بے نتیجہ رہا، پاکستان کا زیادہ سے زیادہ اسکور351، کم سے کم 107رہا۔

گرین شرٹس نے جنوبی افریقہ میں آخری سیریز نومبر 2013میں 1-2سے اپنے نام کی تھی، جنوری 2019 میں گذشتہ ٹور کے دوران5ون ڈے میچز کھیلے گئے تھے،پہلا میچ گرین شرٹس نے 5وکٹ سے جیتا، دوسرے میں پروٹیز نے اسی مارجن سے کامیابی حاصل کی،تیسرے مقابلے میں میزبان ٹیم 13رنز سے سرخرو ہوئی،چوتھے میں پاکستان کی 8وکٹ سے فتح کے بعد فیصلہ کن میچ ہوا، اس میں جنوبی افریقہ نے 7وکٹ سے کامیابی حاصل کر کے سیریز بھی 2-3سے اپنے نام کرلی۔

ان میچز میں امام الحق 271 رنز کے ساتھ مہمان ٹیم کے ٹاپ اسکورر تھے،بابر اعظم 195، فخرزمان167اور محمد حفیظ149رنز بنانے میں کامیاب ہوئے۔

بولرز میں شاہین شاہ آفریدی 6وکٹوں کے ساتھ سب سے کامیاب پاکستانی بولر ثابت ہوئے،عثمان شنواری اور شاداب خان نے 5،5شکار کیے،محمد عامر اور حسن علی کی کارکردگی غیر متاثر کن رہی، دونوں تجربہ کار بولرز 2،2وکٹیں ہی حاصل کرپائے تھے۔

ذہین پاکستانی طالبہ ایما عالم نے ‘ورلڈ میموری چیمپیئن’ کی حیثیت سے بھارت اور سوئیڈن کو مات دے دی۔

ایما عالم نے کم ترین وقت میں سب سے زیادہ الفاظ، نام اور چہرے یاد رکھنے کا عالمی ریکارڈ قائم کرلیا۔

ایما عالم نے طاقتور حافظہ رکھنے کی کیٹیگری میں دو عالمی ریکارڈ قائم کیے اور بھارت اور سوئیڈن کا ریکارڈ توڑ دیا۔

سوشل میڈیا پر جاری ایک ویڈیو میں ایما عالم نے عالمی اعزاز حاصل کرنے اورگنیز بک میں نام درج ہونے کی خوشخبری پاکستانیوں کے ساتھ شیئر کی۔

خیال رہےکہ ورلڈ میموری چیمپیئن شپ دماغی کھیلوں کا ٹورنامنٹ ہوتا ہے، جہاں جسمانی کھیلوں کے مقابلہ میں دانشورانہ صلاحیتوں کی مہارت کی پیمائش کی جاتی ہے۔