All posts by News Editor

اسلام آباد: ملک بھر میں کورونا وائرس سے ایک دن میں مزید 57 افراد جاں بحق ہوگئے جب کہ مثبت کیسز میں روز بروز تشویشناک حد تک اضافہ ہورہا ہے آج بھی کورونا کے ایک دن میں 4 ہزار767 مثبت کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 45 ہزار 656 کورونا ٹیسٹ کئے گئے، جس کے بعد مجموعی کووڈ 19 ٹیسٹس کی تعداد ایک کروڑ 066 ہزار 72 ہوگئی ہے۔

کورونا کے مصدقہ مریضوں کی تعداد
گزشتہ 24 گھنٹوں کے دوران ملک بھر میں مزید 4 ہزار 767 مثبت کیسز رپورٹ ہوئے ہیں۔ گزشتہ برس جون میں پاکستان میں کورونا کی صورتحال سب سے زیادہ تشویشناک تھی اور اُس دوران کورونا کے کیسز میں تشویشناک حد تک اضافہ ہورہا تھا اور سب سے زیادہ مثبت کیسز رپورٹ ہورہے تھے۔

اس سے قبل 6 جون 2020 کو ایک دن میں سب سے زیادہ 4 ہزار 734 مثبت کیسز رپورٹ ہوئے تھے۔ اس طرح پاکستان میں کورونا کے مصدقہ مریضوں کی تعداد 6 لاکھ 54 ہزار 591 ہوگئی ہے۔

سرکاری اعداد و شمار کے مطابق اب تک سندھ میں 2 لاکھ64 ہزار 607 ، پنجاب میں 2 لاکھ 12 ہزار 918، خیبر پختونخوا میں 84 ہزار 609، اسلام آباد میں 55 ہزار 594، بلوچستان میں 19 ہزار 497، آزاد کشمیر میں 12 ہزار 367 اور گلگت بلتستان میں 4 ہزار 999 افراد میں کورونا وائرس کی تشخیص ہوئی ہے۔

کورونا کے فعال مریضوں کی تعداد

سرکاری اعداد و شمار کے مطابق اس وقت ملک بھر میں کورونا کے فعال مریضوں کی تعداد 44 ہزار 447 ہے۔ جب کہ 3 ہزار سے زائد مریضوں کی حالت تشویشناک ہے۔

کورونا سے جاں بحق ہونیوالے افراد کی تعداد

گزشتہ 24 گھنٹوں کے دوران ملک بھر میں کورونا سے مزید 57 افراد جاں بحق ہوگئے ہیں جس کے بعد اب اس وبا سے جاں بحق ہونے والے افراد کی تعداد مجموعی طور پر 14 ہزار 215 ہوگئی ہے۔

صحت یاب مریضوں کی تعداد

این سی او سی کے مطابق کورونا سے ایک دن میں 2 ہزار 647 مریض صحت یاب ہوئے جس کے بعد صحت یاب ہونے والے مریضوں کی تعداد 5 لاکھ 95 ہزار929 ہوگئی ہے۔

کورونا وائرس اوراحتیاطی تدابیر

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

اسلام آباد: سی پیک عام طور پر ایک گیم چینجر کے نام سے جانا جاتا ہے اور لوگوں نے پہلے ہی اس کے ثمرات سے استفادہ حاصل کرنا شروع کر دیا ہے۔

سرمایہ کاری بورڈ حکام کے مطابق سی پیک کے تحت 9مکمل شدہ منصوبے اور 13 جاری منصوبوں نے 70 ہزار سے زیادہ براہ راست ملازمتیں پیدا کیں، آئندہ 4 سے 5 سال میں مزید ساڑھے 4 لاکھ براہ راست ملازمتیں پیدا کی جاسکتی ہیں۔ سی پیک کا مستقبل اب خصوصی اقتصادی زون اور گوادر فری ٹریڈ زون کے آغاز پر ہے۔

مزید براں سی پیک کا ادارہ جاتی میکانزم ابھی بھی برقرار ہے اور عالمی وبائی امور کی پریشانیوں اوردنیا کو اپنی لپیٹ میں لے جانے کے باوجود جے سی سی کے اجلاس مستقل بنیادوں پر ہوتے رہے ہیں۔
علاوہ ازیں سی پیک علاقائی ترقی اور خوشحالی میں مزید فعال کردار ادا کرے گی۔سی پیک اتھارٹی حکام کے مطابق چین علاقائی تعاون کے مزید فروغ میں مصنوعات کی تجارت کے حوالے سے گوادر بندرگاہ کی حمایت کرتا ہے۔

گوادر بندرگاہ پرمچھلی کے سامان کی چین سے پہنچنے کے ساتھ پہلے ہی شروع ہوگئی ہیں۔ آنے والے دنوں میں، ایل پی جی، اسٹیل پائپ، ڈی اے پی کھاد سمیت افغانستان جانے والے بین الاقوامی سامان پر مشتمل مزید جہازوں کا گوادر پورٹ پہنچنا طے ہے۔

گوادر میں ایک ڈائریکٹوریٹ آف ٹرانزٹ ٹریڈ بھی قائم کیا گیا ہے جو اسٹیک ہولڈرز کے ساتھ مل کر کام کررہا ہے تاکہ بندرگاہ کو ایک اہم ٹرانزٹ ٹریڈ حب میں تبدیل کیا جاسکے۔

اسلام آباد: وزیراعظم کی ٹیکس ایمنسٹی اسکیم کے تحت ایک ہزار سے زائد تعمیراتی پروجیکٹس رجسٹرڈ ہوئے ہیں جن کی مالیت 355 ارب روپے ہے، تاہم یہ تعداد ہدف سے کم ہے۔

سرکاری اعدادوشمار کے مطابق وزیراعطم کی دوسری ایمنسٹی اسکیم کے تحت اب تک 355 ارب روپے مالیت کے 1016 تعمیراتی منصوبے رجسٹرڈ کرائے گئے ہیں تاہم یہ تعداد حکومتی ہدف سے کم ہے۔

واضح رہے کہ ایمنسٹی اسکیم کے تحت حکومت ریئل اسٹیٹ سیکٹر کے سرمایہ کاروں کو انکم ٹیکس سے تین سال کی چھوٹ بھی فراہم کررہی ہے۔
اعدادوشمار کے مطابق 1016 میں سے 274 منصوبے ایمنسٹی اسکیم کے اعلان سے پہلے ہی زیرتکمیل تھے۔ دسمبر میں 782 منصوبے رجسٹرڈ کرائے گئے۔ اس کے بعد سب سے زیادہ 121 منصوبے اکتوبر میں رجسٹرڈ کرائے گئے۔

حکومت کو توقع تھی کہ دسمبر میں 10کھرب روپے سے زائد کے منصوبے رجسٹرڈ کرائے جائیں گے، تاہم ہدف پورا نہ ہونے پر ایمنسٹی اسکیم میں مزید 6 ماہ کی توسیع کردی گئی تھی۔ اسکیم میں ان منصوبوں کو بھی شامل ہونے کی اجازت دی گئی تھی جو اسکیم کے اعلان سے پہلے ہی زیرتعمیر تھے۔

آئی ایم ایف کی شرط کے تحت حکومت نے 140 ارب روپے مالیت کی 75 قسم کی انکم ٹیکس چھوٹ ختم کردی تھی مگر حکومت ریئل اسٹیٹ سیکٹر کے لیے 2024ء تک ٹیکس چھوٹ حاصل کرنے میں کام یاب ہوگئی۔

حکومت کے مطابق رجسٹرڈ شدہ 1016 منصوبوںؓ کے علاوہ 78 ارب روپے مالیت کی 285 اسکیمیں رجسٹریشن کے مرحلے میں ہیں۔ ان میں سے 43 ارب روپے کی 143 اسکیمیں پنجاب، 18 ارب روپے کی 76 اسکیمیں سندھ، 17 ارب روپے کی 57 اسکیمیں اسلام آباد اور 9اسکیمیں خیبرپختونخوا کی ہیں۔

لاہور: وفاقی وزیر سائنس اینڈ ٹیکنالوجی فواد چوہدری کی جانب سے 50 ایکڑ زمین پر آئی ٹی اور جدید ٹیکنالوجی سے وابستہ صنعتوں کیلئے اسپیشل اکنامک زون بنانے کی تجویز کو منظور کر لیا گیا۔

وفاقی وزیر فواد چوہدری اور صوبائی وزیر لیبر انصر مجید خان کی زیرصدارت پنجاب ورکرز ویلفیئر بورڈ اور کامسٹس یونیورسٹی کے مابین معاہدے کو حتمی شکل دینے کیلئے پی سی ایس آئی آر لیب کے کمیٹی روم میں اجلاس ہوا جس میں سیکرہٹری لیبر سمیت دیگر افسران اور یونیورسٹی انتظامیہ نے شرکت کی۔

فواد چوہدری کی جانب سے 50 ایکڑ زمین پر آئی ٹی اور جدید ٹیکنالوجی سے وابستہ صنعتوں کیلئے سپیشل اکنامک زون بنانے کی تجویز کو منظور کر لیا گیا۔ وفاقی وزیر نے کہا کہ سپیشل اکنامک زون سے حاصل ہونے والی آمدنی یونیورسٹی کی ڈویلپمنٹ اور طلباء پر خرچ کی جائے گی، اکنامک زون نہ صرف صنعتی ترقی میں معاون ہو گا بلکہ روزگار کے مواقع پیدا ہوں گے جس کیلئے اکنامک کونسل آف پاکستان اور محکمہ صنعت و تجارت پنجاب سے بات کریں گے۔
انصر مجید نے کامسٹس یونیورسٹی میں مزدوروں کے بچوں کیلئے کوٹہ بڑھانے کی تجویز دی جس پر مزید بات چیت کے بعد معاملات طے کرنے پر اتفاق ہوا۔ انہوں نے کہا کہ ورکرز ویلفیئر بورڈ مزدوروں کے بچوں کو بہترین اداروں میں تعلیم فراہم کر رہا ہے۔کامسٹس یونیورسٹی میں ورکرز کوٹہ پر تعلیم حاصل کرنے والے طلبا کو سالانہ 32کروڑ سے زائد کی سبسڈی دی جا رہی ہے۔

انہوں نے کہا کہ ورکرز کے کوٹہ اور اسکالرشپس کی تعداد سے متعلق کامسٹس یونیورسٹی انتظامیہ اور محکمہ لیبر معاملات طے کریں گے۔ ٹیلنٹ سکالرشپ میں شفافیت کیلئے تمام پراسیس کمپیوٹرائزڈ کیا جا رہا ہے۔ عمران خان کے ویژن کے مطابق مزدوروں کی زندگیوں میں آسانیاں پیدا کرنے کیلئے کوشاں ہیں۔ تحریک انصاف دو نہیں ایک پاکستان کے خواب کو حقیقت بنانے کیلئے پر عزم ہے۔

اسلام آباد: وزارت خزانہ نے کہا ہے کہ ملک کی اقتصادی بحالی کاسفر جاری ہے جب کہ صنعتی بڑھوتری سے کاروباری اعتماد میں اضافہ کی عکاسی ہو رہی ہے۔

وزارت خزانہ کی طرف سے مارچ 2021 کے لیے جاری کردہ اقتصادی اپ ڈیٹ کے مطابق جولائی سے لیکرفروری 2021 تک کی مدت میں سمندرپارکام کرنے والے پاکستانی محنت کشوں کی ترسیلات زرمیں مجموعی طورپر24.1 فیصداضافہ ہواہے، اس عرصہ میں پاکستانی کارکنوں نے 18.7 ارب ڈالرکازرمبادلہ ملک ارسال کیا۔

گزشتہ مالی سال کی اسی مدت میں یہ حجم 15.1 ارب ڈالررہاتھا، جاری مالی سال کے پہلے 8 ماہ میں برآمدات میں گزشتہ مالی سال کی اسی مدت کے مقابلہ میں 2.3 فیصدکی کمی ہوئی جبکہ اس کے برعکس درآمدات میں 8.6 فیصداضافہ ہوا۔
حسابات جاریہ کے کھاتوں کے توازن میں 0.9 ارب ڈالرکااضافہ ہوا، جی ڈی پی کی مناسبت سے حسابات جاریہ کے کھاتوں میں 0.5 فیصدکااضافہ ریکارڈکیاگیاہے، براہ راست غیرملکی سرمایہ کاری میں جاری مالی سال کے پہلے 8 ماہ میں گزشتہ مالی سال کے اسی عرصہ کے مقابلہ میں 29.9 فیصدکی کمی ریکارڈکی گئی ہے۔

جاری مالی سال میں براہ راست غیرملکی سرمایہ کاری کاحجم 1.300ارب ڈالر ریکارڈ کیاگیا، پورٹ فولیوسرمایہ کاری کا حجم منفی 132.2 ملین ڈالررہا۔

وزارت خزانہ کے مطابق 18 مارچ 2021 کوزرمبادلہ کے ذخائر کاحجم 20.313 ارب ڈالرکی سطح پرہے، 18 مارچ کوایکسچینج ریٹ 155.45روپے تھا، پاکستانی کرنسی کی قدرمیں اضافہ ہواہے۔

لاہور: اسٹیٹ بینک آف پاکستان (ایس بی پی) حکومت کی جانب سے کیے جانے والے نیم مالی منصوبوں یا مالیاتی اقدامات کو بند کردے گا تاہم سبسڈائز کریڈٹ (معیشت کے مختلف شعبوں) تک رسائی کی حمایت کرنے کے لیے استعمال ہونے والی سہولیات کو ‘ری فنانسنگ 1956’ کے موجودہ اسٹیٹ بینک ایکٹ میں ترمیم کی پارلیمنٹ سے منظوری کے بعد بھی جاری رکھے گا۔

رپورٹ کے مطابق مرکزی بینک کے عہدیدار نے 1956 کے اسٹیٹ بینک قوانین میں مجوزہ ترامیم، جو اپنے بنیادی مقاصد کی تشکیل نو، بینک اور اس کے گورنر کو بے مثال اختیارات دینے، مانیٹری پالیسی اور تبادلے میں سیاسی اثر و رسوخ کو روکنے کے حوالے سے ہیں، پر بریفنگ دیتے ہوئے کہا کہ ‘مرکزی بینک کے پاس مقداری ٹولز ہونے چاہئیں، اگر ہمارے پاس یہ ٹولز نہ ہوں تو ہم عارضی معاشی ری فنانس سہولت (ٹی ای آر ایف) کے تحت سود کی شرح میں کمی کے ذریعے کووڈ 19 کے بحران کے دوران معیشت اور کاروبار کی حمایت نہیں کرسکتے’۔

جب سے کابینہ کی جانب سے 6 ارب ڈالر کے آئی ایم ایف قرض کی بحالی کے لیے اسٹیٹ بینک ترمیمی بل 2021 کا مسودہ منظور ہوا ہے تب سے ہی مارکیٹ ان خبروں سے نالاں ہے کہ اسٹیٹ بینک چھوٹے، ہاؤسنگ سیکٹر کو فروغ دینے کے لیے سبسڈی والے قرضوں اور درمیانے درجے کی صنعتوں، زراعت، برآمد کنندگان، وغیرہ کو بند کرسکتا ہے۔

نام ظاہر نہ کرنے کی شرط پر بینک کے ایک عہدیدار نے کہا کہ ‘ترمیم شدہ اسٹیٹ بینک قانون ہمیں مرکزی بینک کے پاس ری فنانس سہولیات رکھنے اور قیمت اور مالی استحکام کے اس طے شدہ مینڈیٹ کے حصول میں ان کا استعمال کرنے کی اجازت دیتا ہے، اس کا مطلب یہ نہیں ہے کہ ہم اس پر بھاری یا مستقل انحصار کریں گے، اس کا مطلب صرف یہ ہے کہ جب ہمیں (اس کی) ضرورت ہو تو مرکزی بینک کو لیکویڈیٹی (معیشت میں) دینے کے لیے ہمارے ٹول کٹ کافی مضبوط ہوں’۔

ان کا کہنا تھا کہ ‘تاہم جب معیشت بہتر ہو، پیداوار کا فرق مثبت ہو، سرمایہ کاری بہت تیزی سے بڑھ رہی ہو اور طلب کی وجہ سے افراط زر بہت زیادہ ہو تو ہم ایسا کرنے کے قابل نہیں ہوں گے، اس طرح کی صورتحال میں زیادہ سے زیادہ رعایت قیمت اور مالیات کے استحکام کو نقصان پہنچائے گی’۔

سرکاری قرض
قانون میں مجوزہ تبدیلیوں سے مرکزی بینک کو اپنے خسارے کی مالی اعانت کے لیے براہ راست حکومت کو قرض دینے سے روک دیا گیا ہے۔

بینکر نے وضاحت کی کہ ‘یہ پالیسی فیصلہ ہے جو مالی نظم و ضبط کو یقینی بنانے کے لیے اٹھایا جاتا ہے، پھر بھی یہ اسٹیٹ بینک کو سیکنڈری مارکیٹ سے قرض خرید کر حکومت کو قرض دینے سے نہیں روکتا، اس طرح کی مداخلت حکومت کو قیمتیں معلوم کرنے میں معاون ثابت ہوتی ہیں۔

یہاں تک کہ ابھی بھی اوپن مارکیٹ آپریشنز مارکیٹ میں لیکوئڈیٹی فراہم کرنے کے لیے استعمال کیا جاتا ہے تاکہ کمرشل بینک حکومتی قرضے خرید سکیں۔

اگرچہ حکومت آئی ایم ایف پروگرام کی شرائط کے ایک حصے کے طور پر اسٹیٹ بینک سے کوئی قرض نہیں لے رہی ہے تاہم اس ترمیم شدہ قانون کی پارلیمنٹ کی منظوری کے بعد حکومت کو اسٹیٹ بینک پر اپنے بجٹ خسارے کی مالی معاونت کے لیے نئے کرنسی نوٹ پرنٹ کرنے کے لیے زبردستی کرنے پر قانونی طور پر پابندی کا سامنا ہوگا۔

خودمختاری
مرکزی بینک کی موجودہ انتظامیہ کے نقطہ نظر سے اسٹیٹ بینک ایکٹ میں مجوزہ تبدیلیاں مقاصد کو واضح کریں گی، ان کے حصول کے لیے عملی اور خودمختاری کو فروغ دیں گی اور اپنے مقاصد کے حصول میں اس کے احتساب کو مستحکم کریں گی۔

وزارت خزانہ کی جانب سے پیش کیے گئے بل میں کہا گیا کہ ‘اگر مقاصد واضح نہیں ہیں تو احتساب واضح نہیں ہوگا، مقاصد کو حاصل کرنے اور کارروائیوں میں شفافیت کو یقینی بنانے کے لیے ضروری وسائل، جن میں بین الاقوامی وسائل اور مالی اور انتظامی خود مختاری شامل ہیں، کو کسی بھی بیرونی اثر و رسوخ کے بغیر اسٹیٹ بینک کے لیے دستیاب بنانا ہوگا’۔

بینک کے عہدیدار نے وضاحت کی کہ ‘موجودہ اسٹیٹ بینک قانون میں مجوزہ تبدیلیاں اسے قیمت اور مالی استحکام کو نشانہ بنانے اور کرنسی کے انتظام کو آزادانہ مالیاتی اور ایکسچینج ریٹ پالیسیوں کے تحت کرنے کے لیے بہتر پوزیشن میں ڈال دے گی’۔

ڈھاکا: بھارتی وزیراعظم نریندر مودی کی بنگلادیش آمد پر شروع ہونے والے مظاہروں کے دوسرے روز بھی مزید 5 افراد ہلاک اور 12 زخمی ہوگئے۔

عالمی خبر رساں ادارے کے مطابق بنگلادیش میں جمعے کے روز بھارتی وزیراعظم کی آمد پر شروع ہونے والا ملک گیر احتجاج تاحال جاری ہے، دوسرے روز بھی مبینہ پولیس فائرنگ سے مزید 5 مظاہرین ہلاک ہوگئے۔ دو روز میں پولیس فائرنگ سے ہلاک ہونے والوں کی تعداد 9 ہوگئی۔

چٹاگانگ کے ضلع برہمن باریہ کے اسپتال کے ایم ایس نے میڈیا کو بتایا کہ گولیاں لگنے سے زخمی 17 افراد کو اسپتال لایا گیا جن میں سے 3 مردہ حالت میں لائے گئے تھے 2 نے اسپتال میں دم توڑ دیا جب کہ 12 زخمی ہیں جن میں سے ایک کی حالت نازک بتائی جا رہی ہے۔

برہمن باریہ کے ایک صحافی نے بتایا کہ حفاظت اسلام کے 3 ہزار سے زائد مظاہرین نے ضلع میں سرکاری دفاتر اور عمارتوں کو آگ لگادی تاہم یہ واضح نہیں کہ یہ ہلاکتیں پولیس فائرنگ سے ہوئیں یا کوئی اور معاملہ ہے۔

مودی کی آمد پر شروع ہونے والے مظاہروں کے بعد سے ملک کے مختلف حصوں میں پیرا ملٹری فورس کو تعینات کردیا گیا ہے۔ سیکڑوں افراد کو حراست میں لے لیا گیا ہے۔ مظاہرین گجرات میں مسلم کش فسادات پر مودی کیخلاف نعرے بازی کر رہے تھے۔

واضح رہے کہ مودی بنگلادیش کی آزادی کی گولڈن جوبلی کی تقریب میں شرکت کے لیے دو روزہ دورے پر جمعے کے روز ڈھاکا پہنچے تھے اور تب سے ملک بھر مین احتجاج کا سلسلہ جاری ہے۔

واشنگٹن: امریکی صدر جو بائیڈن نے چین اور مغربی طاقتوں کے درمیان بڑھتی ہوئی کشیدگی کے پیش نظر چین کے کھربوں ڈالر بیلٹ اینڈ روڈ انفرا اسٹرکچر کا مقابلہ کرنے کے لیے ‘جمہوری’ ممالک کے ساتھ مل کر اسی طرح کے اقدام کی بنیاد رکھنے کی تجویز پیش کی ہے۔

خبر رساں ایجنسی اے ایف پی کی رپورٹ کے مطابق بائیڈن نے جمعہ کے روز کہا تھا کہ انہوں نے چین کے شمال مغربی خطے سنکیانگ میں ایغور کی اقلیتی برادری کو نشانہ بناتے ہوئے لگائی گئی پابندیوں کے سلسلے میں برطانوی وزیر اعظم بورس جانسن کو ٹیلی فون کال میں یہ تجویز پیش کی۔

بائیڈن نے بیلٹ اینڈ روڈ کا حوالہ دیتے ہوئے صحافیوں کو بتایا کہ میں نے تجویز کیا کہ ہمیں لازمی طور پر ایسا ہی اقدام جمہوری ریاستوں کی طرف سے اٹھانا چاہیے جس سے دنیا بھر میں ان لوگوں کی مدد کی جائے جنہیں حقیقتاً مدد کی ضرورت ہے۔

اس اقدام کے تحت قرضوں اور منصوبوں کے ذریعے حالیہ برسوں میں بیجنگ کا اثر و رسوخ بڑھ گیا ہے جس پر علاقائی طاقتوں اور مغربی ممالک میں تشویش پائی جاتی ہے۔

صدر ژی جن پنگ نے بیلٹ اینڈ روڈ کے تحت کھلے، سبز اور صاف ستھرے تعاون کو آگے بڑھانے کا وعدہ کیا ہے لیکن اس کے باوجود چینی بینکوں نے کوئلے کے منصوبوں کی مالی اعانت جاری رکھی ہے تاکہ وہ اس اقدام کے سہارے بیرون ملک کوئلے کی تجارت پر اثرورسوخ برقرار رکھ سکے۔

چین کی عالمی توانائی کی مالی اعانت کے حوالے سے بوسٹن یونیورسٹی کے ڈیٹا بیس کے مطابق 2000 سے 2018 کے درمیان بیرون ملک توانائی کے منصوبوں پر چین کے دو سب سے بڑے پالیسی بینکوں کے ذریعے لگائے گئے 251 ارب میں سے 23.1 فیصد رقم کوئلہ منصوبوں پر خرچ کی گئی۔

برطانیہ نے اس حوالے سے جاری اعلامیے میں بائیڈن اور جانسن کے مابین گفتگو میں امریکی صدر کی جانب سے بیلٹ اینڈ روڈ منصوبے کی تجویز کا تذکرہ نہیں کیا لیکن انہوں نے نوٹ کیا کہ دونوں رہنماؤں نے سنکیانگ میں ‘انسانی حقوق کی پامالیاں کرنے والوں’ پر پابندیاں عائد کرنے کے لیے ‘اہم کارروائی’ پر تبادلہ خیال کیا۔

یورپی یونین، برطانیہ، کینیڈا اور امریکا نے انسانی حقوق کی پامالیوں کے الزامات کی روشنی میں مشترکہ کارروائی کرتے ہوئے اس ہفتے سنکیانگ کی متعدد سیاسی اور معاشی شخصیات پر پابندیاں عائد کردی تھیں جس پر یورپی یونین اور برطانیہ کے افراد کے خلاف بیجنگ نے انتقامی کارروائی کی تھی۔

سنکیانگ کو اپنا اندرونی معاملہ قرار دینے والے چین نے نو برطانوی افراد اور چار اداروں کے خلاف جمعہ کے روز پابندیوں کا اعلان کرتے ہوئے کہا کہ انہوں نے ایغور کے ساتھ روا رکھے گئے سلوک کے معاملے پر ‘بدنیتی پر مبنی جھوٹ بولا اور غلط فہمی پھیلائی’۔

انسانی حقوق کے گروپوں کے مطابق سنکیانگ میں کم سے کم 10 لاکھ ایغور اور دوسرے مسلمان گروپس کے افراد کو کیمپوں میں رکھا گیا ہے جہاں پر حکام پر خواتین کی زبردستی نس بندی کرنے کے ساتھ ساتھ ان سے جبری مشقت لینے کا الزام بھی عائد ہے۔

امریکا میں ایشیائی باشندوں پر تشدد، نسل پرستانہ حملوں اور نفرت آمیز مہم کے خلاف سان فرانسسکو ، لاس اینجلس اور شکاگو سمیت 60 شہروں میں سیکڑوں افراد نے مظاہرے کیے۔

یاد رہے کہ تقریباً دو ہفتے قبل امریکی ریاست جارجیا کے شہر اٹلانٹا میں 3 مساج پارلرز میں فائرنگ سے بیشتر ایشیائی نژاد خواتین سمیت 8 افراد ہلاک ہوگئے۔

خبر رساں ایجنسی اے ایف پی کے مطابق مظاہرین نے نیویارک، واشنگٹن سمیت اہم شہروں میں مظاہرے کیے گئے کیونکہ امریکا میں ایشیائی باشندوں کے خلاف حملوں میں نمایاں اضافہ دیکھا گیا ہے۔

کورونا وائرس کی وبا کے دوران ایشیائی نژاد امریکیوں پر حملوں میں اضافہ ہوا جہاں صرف آن لائن ہراساں کیے جانے کے واقعات میں 6فیصد اضافہ دیکھا گیا ہے۔

ہفتے کو احتجاج کرنے والے مظاہرین میں سے ایک لنگ لیو نے کہا کہ ہم امریکی ہیں، ہم ماں ہیں، ہم دوست ہے، ہم یہاں رہتے ہیں، ہم اپنی قوم سے محبت کرتے ہیں، یہ ہم سب پر اثرانداز ہوتا ہے اور ہم سکی کے بھی خلاف تشدد نہیں چاہتے۔

احتجاج میں شریک ایک اور خاتون جوڈی چینگ نے کہا کہ ہمیں وبا کو جھیلتے ہوئے ایک سال ہو چکا ہے اور اسدوران ایشیائی باشندوں کے خلاف تشدد میں اضافہ ہوا ہے۔

احتجاج کے منتظمین نے ایشیائی باشندوں کے خلاف احتجاج کی وجہ امریکا اور چین کے مابین جاری کشیدگی کو قرار دیا جس میں ہر گزرتے دن کے ساتھ اضافہ ہوتا جا رہا ہے۔

جوڈی چینگ نے کہا کہ ہم امریکا میں جتنے بھی ایشیائی باشندوں کو جانتے ہیں وہ تشدد اور ہراساں کیے جانے کا سامنا کر چکے ہیں۔

16 مارچ کو امریکا میں چھ ایشیائی خواتین 8 افراد کے قتل پر ملک بھر میں تشویش کا اظہار کیا گیا تھا اور خدشہ ظاہر کیا جا رہا تھا کہ وبا کے دنوں میں نفرت آمیز واقعات میں اضافہ ہو سکتا ہے۔

واضح رہے کہ جب 2020 کے اوائل میں امریکا نے وائرس کو اپنی لپیٹ میں لینا شروع کیا تو امریکی صدر ڈونلڈ ٹرمپ سمیت متعدد امریکی سیاستدانوں نے کورونا وائرس کو چینی وائرس یا ووہان وائرس قرار دیا تھا۔

جکارتا: انڈونیشیا میں گرجا گھر کے باہر ہونے والے 2 مبینہ خودکش حملوں کے نتیجے میں 2 افراد ہلاک اور 14 زخمی ہوگئے۔

غیر ملکی خبر رساں ادارے کے مطابق انڈونیشیا کے شہر ماکاسر میں گرجا گھر میں ایسٹر کی مناسبت سے دعائیہ تقریب کا سلسلہ جاری تھا کہ اسی دوران گرجا گھر کے باہر زور دار دھماکا ہوا جس کے نتیجے میں 2 افراد ہلاک اور 14 زخمی ہوگئے، واقعہ کے بعد امدادی اہلکاروں نے زخمیوں کو اسپتال منتقل کیا جب کہ سیکیورٹی فورسز نے علاقے کو گھیرے میں لے لیا۔

پولیس کے مطابق دعائیہ تقریب ختم ہونے پر 2 افراد نے گرجا گھر میں داخل ہونے کی کوشش کی تاہم سیکیورٹی گارڈز کے روکنے پر دونوں نے خود کو دھماکے سے اڑالیا، پولیس کا کہنا ہے گرجا گھر کے باہر سے 2 افراد کی لاشیں ملی ہیں جو مبینہ طور پر خودکش حملہ آوروں کی ہیں تاہم واقعہ سے متعلق مزید تحقیقات جاری ہیں۔

واضح رہے کہ 2018 میں انڈونیشیا کے شہر سورابایا کے 3 گرجا گھروں میں خودکش حملوں میں 9 افراد ہلاک اور40 سے زائد زخمی ہوگئے تھے۔