All posts by News Editor

کورونا وائرس کے تیزی سے پھیلاؤ کے بعد صوبہ پنجاب کے دارالحکومت لاہور میں ماسک نہ پہننے والوں کے خلاف سخت کارروائی کا فیصلہ کرلیا گیا۔

لاہور پولیس چیف اور کمشنر لاہورکی زیرصدارت اجلاس ہوا جس میں کورونا صورتحال پر تبادلہ خیال کیا گیا اور اہم فیصلے کیے گئے۔

کمشنرلاہور نے ماسک پہننے کے حکم پرسختی سے عمل درآمد کا حکم دے دیا۔ کمشنر لاہور محمد عثمان کے مطابق ماسک نہ پہننے والوں کو پکڑ کرتھانے میں بند کر دیا جائے گا، ماسک نہ پہننے والوں کو چھ ماہ کی قید ہوسکتی ہے۔

انہوں نے کہا کہ ماسک نہ پہننے پرمقدمہ درج کیا جائے گا اور آج ہی لاہور میں اس حکم پر عمل درآمد شروع ہوجائے گا۔

کمشنر لاہور نے ہدایت کہ ضلعی انتظامیہ اور پولیس سڑکوں پر مامور ہوگی، پولیس اور ضلعی انتظامیہ کورونا کی خلاف ورزی پرکارروائیاں کرے۔

کیپیٹل سٹی پولیس آفیسر (سی سی پی او) لاہور غلام محمود ڈوگر کنے حکم دیا کہ حکومتی گائیڈ لائنز پر من وعن عمل درآمد کروایا جائے، شادی ہال،پبلک مقامات پرکورونا ایس اوپیز پرعملدرآمد کروایا جائے۔

لاہور میں پارکنگ کے نام پر بھتہ خوری کرنے والے عناصر کیخلاف پلان آف ایکشن تیار کر لیا گیا، کمشنر لاہور نے غیر قانونی پارکنگ، سرکاری ریٹ سے زائد فیس وصول کرنے والوں کے خلاف کریک ڈاؤن کا حکم دیدیا۔

کمشنرلاہور وایڈمنسٹریٹر میٹروپولیٹن کارپوریشن کیپٹن( ر) محمد عثمان نے پارکنگ اوور چارجنگ کی شکایت پر جائزہ اجلاس میں واضح کیا، پلازہ، پلاٹ، پارک، ہسپتال سمیت کسی بھی جگہ سرکاری ریٹ سے زائد فیس وصول نہ کی جائے، پرائیوٹ پلازوں کے اندر بنی پارکنگ میں بھی سرکاری ریٹ سے زائد فیس وصول نہیں کی جا سکتی، تمام اضلاع کے ڈپٹی کمشنر سرکاری ریٹ پر عمل درآمد یقینی بنائیں، شہر بھر میں پارکنگ فیس صرف سرکاری ریٹ کے مطابق ہی وصول کی جائے۔

عوام سے گزارش ہے کہ کسی بھی جگہ اوور چارجنگ کی شکایت کمشنر آفس کو کریں، شکایت کمشنر آفس کے ٹویٹر یا فیس بک اکاؤنٹ کے ذریعے درج کرائی جا سکتی ہے۔

کمشنر لاہور نے مزید کہا کہ غیر قانونی سلاٹر ہاؤسز کے خلاف کارروائیوں کا پلان بھی مرتب کیا جائے گا، غیر قانونی منڈیوں کو کسی صورت چلانے کی اجازت نہیں دی جائے گی، لاہور میں ایک لٹریچر کلب بنایا جائے گا، جہاں لوگ آکر لٹریچر پر کام کریں گے، ایم سی ایل لٹریچر پر پورا ایک میگزین شائع کیا جائے گا۔

لاہور سمیت پنجاب بھر کے ہزاروں اساتذہ کیلئے بُری خبر، محکمہ خزانہ نے سکول ایجوکیشن کو مستقبل کے معماروں سے ٹائم سکیل اور مراعات واپس لینے کا حکم جاری کردیا۔

لاہور سمیت پنجاب بھر کے ہزاروں اساتذہ کو ٹائم سکیل کی بندر بانٹ سے محکمہ خزانہ پر کروڑوں روپے کی ادائیگی کا بوجھ بڑھ گیا، جس پر محکمہ خزانہ نے دوسال کے دوران ٹائم سکیل حاصل کرنیوالے اساتذہ سے مراعات اور عہدہ واپس لینے کا حکم دے دیا، اس سے حوالے سے نوٹیفکیشن بھی جاری کردیا گیا۔

نوٹیفکیشن کے مطابق افسران کی ملی بھگت سے حاصل کیے جانیوالے تمام ٹائم سکیل واپس لیے جائیں گے، گریڈ سولہ، سترہ، اٹھارہ اور انیس کے اساتذہ سے ٹائم سکیل واپس لیا جائے گا، دو ہزار انیس تا دو ہزار اکیس تک ہزاروں اساتذہ نے ملی بھگت سے ٹائم سکیل حاصل کیا، اساتذہ کو ٹائم سکیل کی مد میں حاصل کی جانی والی مراعات بھی واپس کرنا ہوں گی، مراعات کی مد میں محکمہ خزانہ کو 20 کروڑ روپے سے زائد کی ریکوری ہوگی۔

دوسری جانب محکمہ سکول ایجوکیشن نے تمام اضلاع کو تیسرے کوارٹر کا نان سیلری بجٹ جاری کر دیا، نان سیلری بجٹ کی مد میں تین ارب 38 کروڑ 62 لاکھ کے فنڈز جاری کئے گئے۔

لاہور کے لیے 14 کروڑ 28 لاکھ 55 ہزار کا بجٹ جاری کیا گیا ہے، نان سیلری بجٹ تمام اضلاع کے سی ای اوز کے ایس ڈی اے اکاؤنٹس میں منتقل کیا گیا، نان سیلری بجٹ سکولوں کے انتظامی معاملات چلانے، یوٹیلیٹی بلز کی ادائیگی سمیت دیگر اخراجات کیلئے استعمال کیا جائے گا۔

وکلا کی یونیفارم کوئی اور کیوں پہنے ؟ پنجاب بار کونسل نے چیف سیکریٹری کو خط لکھ دیا۔

تفصیلات کے مطابق پنجاب بار کونسل کی جانب سے چیف سیکریٹری کے نام لکھے جانے والےخط میں کہا گیا ہے کہ شادی ہالز ، ہوٹل اور ریسٹورنٹ میں میں وکلا کی یونیفارم پہنے پر پابندی عائد کی جائے۔ خط میں استدعا کی گئی کہ چیف سیکریٹری پنجاب تمام اضلاع کو سرکلر جاری کرکے اس پر پابندی عائد کریں۔

خط کے متن میں لکھا گیا ہے کہ ہوٹلز ،ریسٹورینٹ اور شادی ہالز میں ویٹر وکیل کی وردی پہنتے ہیں، عام شہری بلیک پینٹ کوٹ کے ساتھ سفید شرٹ پہن سکتا ہے، ہوٹلز اور شادی ہالز میں بلیک پینٹ کوٹ اور سفید شرٹ کا استعمال روکا جائے۔

خط میں یہ بھی لکھا گیا ہے کہ وکیل بھی اس وقت بلیک پینٹ کوٹ پہنتا جب وہ انٹری ٹیسٹ اور ٹریننگ مکمل کرلے۔ چیف سیکرٹری پنجاب نوٹس لیں اور اس پر عملدرآمد کرائیں۔

اہل لاہور کیلئے بڑی خبر، شہر کے تین میگا پراجیکٹس کے فنڈز جاری کرنے کا حکم دے دیا گیا۔

ذرائع کے مطابق پی اینڈ ڈی بورڈ نے شاہکام فلائی اوور، شیرانوالہ فلائی اوور اور گلاب دیوی انڈر پاس کیلئے 8 ارب 81 کروڑ 54 لاکھ کے فنڈز جاری کرنے کے احکامات دے دیئے, شاہکام فلائی اوور کیلئے 3ارب 86 کروڑ 40لاکھ ، شیرانوالہ فلائی اوور کیلئے 4ارب اور گلاب دیوی انڈر پاس منصوبے کیلئے 95 کروڑ کے فنڈز جاری کردیئے گئے۔

ایل ڈی اے کو مجموعی طور پر 10 ارب 85 کروڑ کے عوض 8 ارب 81 کروڑ کے فنڈز جاری ہوئے، میگا پراجیکٹس کیلئے جاری ہونیوالے فنڈز اورنج لائن کے ڈیپازٹ ورکس کے فنڈز تھے۔ کچھ عرصہ قبل ایل ڈی اے نے میگا پراجیکٹس کیلئے فنڈز کو سرنڈر کر دیا تھا، 12 مارچ کو ایل ڈی اے نے محکمہ ہاؤسنگ سے فنڈز ریلیز کرنے کی استدعا کی تھی۔

محکمہ پی اینڈ ڈی نے فائل ملتے ہی دو روز میں فنڈز جاری کرنے کے احکامات دیئے، چیف انجینئر ایل ڈی اے عبدالرزاق چوہان کے مطابق فنڈز وصول ہوتے ہی میگا پراجیکٹس پر کام شروع کر دیا جائے گا۔ چیف انجینئر ایل ڈی اے کے مطابق میگا پراجیکٹس کے ٹینڈرز کا پراسیس شروع کیا جاچکا ہے۔

ملک بھر میں اشیائےخوردونوش کی قیمتو ں میں ہوش ربا اضافہ ہوگیا ہے اور رمضان سے قبل ہی مہنگائی کے طوفان نے عوام کا جینا محال کردیا ہے۔

کراچی میں ایک کلو چینی 105روپے اور مرغی کا گوشت 450 روپے کلو ہوگیا ہے جب کہ پکانے کا تیل 280 روپے لیٹر پر دستیاب ہے، دالوں کی قیمتوں میں بھی اضافہ دیکھنے میں آیا ہے۔

وفاقی دارالحکومت اسلام آباد میں بھی چینی ، مرغی، پھل اور سبزی کی بڑھتی قیمتو ں سے شہری پریشان ہیں۔

وفاقی ادارہ شماریات کی رپورٹ کے مطابق مہنگائی کی شرح 15.35 فیصد تک پہنچ چکی ہے، اوپن مارکیٹ میں چینی کی فی کلو قیمت میں 6 روپے اضافہ ہوا جب کہ فی کلو ٹماٹر کی قیمت بھی 35 روپے سے بڑھ کر 70 روپے ہوگئی، مرغی کے گوشت کی قیمت 380 روپے سے 410 روپے فی کلو تک پہنچ گئی۔

گوجرانوالا میں بکرے کا گوشت 900 کے بجائے 1200 روپے کلو ہوگیا اور مرغی کے گوشت کی قیمت میں فی کلو 25 روپے کا اضافہ ہوا ہے۔

پشاورمیں پھل، سبزی اور دالوں کی قیمتوں میں10 سے 15 روپے فی کلو اضافہ ہوا ہے۔

کوئٹہ میں سوروپے کے اضافےکے بعد بکرے کا گوشت 1200روپے کلو اور مرغی کا گوشت 420 روپے کلو ہوگیا۔

ملتان میں ایک ہفتہ کےدوران چینی ، گھی ، پھلوں اورگوشت کی قیمتوں میں اضافہ ہوگیا،لاک ڈاؤن میں روزگار کے حصول کےلیے پریشان شہری کھانے پینے کی اشیاء کی قیمتوں پر اضافہ ہونے پر بھی پریشان ہیں۔

آٹا ، چینی ، پھل ، سبزی سمیت تمام اشیاء ضرورت قوت خرید سے باہر ہیں، شہری کہتے ہیں خریداری کرتے ہوئے دس بار سوچنا پڑتا ہےکہ کیا خریدیں کیا چھوڑ دیں جب کہ دکانداروں کا کہنا ہےکہ مہنگائی کی وجہ سپلائی میں کمی ہے۔

اسلام آباد: ٹریڈنگ کارپوریشن آف پاکستان نے 9 شوگرملوں کو بلیک لسٹ کردیا۔

ٹریڈنگ کارپوریشن آف پاکستان نے 9 شوگرملوں کو بلیک لسٹ کردیا، بلیک لسٹ کی جانے والی کمپنیوں پر ٹی سی پی کے 10 ارب سے زائد کے واجبات ہیں۔

بلیک لسٹ کی جانے والی کمپنیوں میں عبداللہ شگر ملز دیپالپور، عبداللہ شوگر ملز، حسیب وقاص شوگرملز، سیری شوگرملز، ٹی ایم کے شوگرملز، ٹانڈیا والا شوگر ملز، عبداللہ شاہ غازی شوگرملز، حق باہو شوگر ملز اورمکہ شوگر ملز شامل ہیں۔

ٹریڈنگ کارپوریشن پاکستان (ٹی سی پی ) کے مطابق یہ شوگر ملز مقرر کیے گئے کوٹے کے مطابق چینی فراہم کرنے میں ناکام رہیں، اب یہ کمپنیاں ٹی سی پی کے کسی بھی ٹینڈرمیں حصہ نہیں لے سکیں گی۔

اسلا م آباد: سال 2019 کے 9 ماہ میں پی آئی اے کی آمدنی 42 فیصد اضافے سے ایک کھرب 7 ارب 33 کروڑ 90 لاکھ روپے رہی۔

پی آئی اے نے سال 2019 کی تیسری سہ ماہی کی مالیاتی رپورٹ اسٹاک ایکسچینج میں جمع کرادی جس کے مطابق سال 2019 کے 9 ماہ میں پی آئی اے کی آمدنی 42 فیصد اضافے سے ایک کھرب 7 ارب 33 کروڑ 90 لاکھ روپے رہی جب کہ 2018 کے اسی عرصے میں پی آئی اے کو 75 ارب 56 کروڑ 10 لاکھ روپے کی آمدن ہوئی تھی۔

رپورٹ میں بتایا گیا کہ 2018 کے مقابلے 2019 میں پی آئی اے کے آپریشنل اخراجات میں 78 فیصد کمی ہوئی ہے، سال 2019 میں پی آئی اے کی کارگو اور پسنجر آمدنی میں بھی 41 فیصد اضافہ ہوا جب کہ پروازوں میں نشستوں کی فروخت سال 2019 میں 5 فیصد اضافے کے بعد 81 فیصد رہی۔

رپورٹ کے مطابق پی آئی اے اخراجات کا کل 24 فیصد حصہ فیول کی مد میں خرچ ہوا جب کہ رپورٹ میں بتایا گیا ہےکہ عالمی وبا کورونا کی صورتحال پی آئی اے کے لیے چیلنجنگ ہے۔

اسلام آباد: وفاقی بورڈ آف ریونیو (ایف بی آر) نے ٹیکس دہندگان کے پروفائلز جمع کروانے کی آخری تاریخ کو 30 جون تک توسیع دیتے ہوئے عمل نہ کرنے والے افراد کو خبردار کیا ہے کہ ان کے نام ایکٹو ٹیکس پیئر لسٹ (اے ٹی ایل) سے نکال دیے جائیں گے اور دوبارہ شامل کیے جانے پر سرچارج ادا کرنا پڑے گا۔

رپورٹ کے مطابق انکم ٹیکس آرڈیننس 2001 کی دفعہ 114 اے کے تحت ٹیکس دہندگان کے پروفائلز جمع کروانے اور انہیں اپڈیٹ کرنے کی ڈیڈلائن 31 دسمبر 2020 تھی۔

تاہم ایف بی آر نے اس ڈیڈ لائن کو 31 مارچ 2021 تک 3 ماہ کے لیے توسیع دے دی تھی اور اب تفصیلات جمع کروانے کے لیے مزید 3 ماہ کی توسیع دے دی گئی۔

خیال رہے کہ حکومت نے ٹیکس سال 2020 میں تاخیر سے ٹیکس ریٹرن فائل کرنے والے 5 لاکھ 9 ہزار 39 کو سزا کے طور پر ایکٹو ٹیکس پیئرز لسٹ سے خارج کردیا تھا۔

پروفائل ٹیکس دہندہ سے متعلق بنیادی معلومات کا مجموعہ ہوتا ہے اور اکثر افراد جب اپنا رہائشی پتا یا بینک اکاؤنٹ تبدیل کرتے ہیں تو اپنے پروفائل کو اپڈیٹ نہیں کرتے۔

موجودہ حکومت نے گزشتہ برس تمام ٹیکس دہندگان کے لیے لازمی قرار دے دیا تھا کہ وہ اپنے پروفائل کو اپگریڈ کریں۔

اے ٹی ایل فہرست میں موجود ٹیکس دہندگان لوئر ٹیکس ریٹ سے فائدہ اٹھا سکتے ہیں۔

ایف بی آر کے ترجمان ندیم رضوی نے ڈان سے بات کرتے ہوئے کہا کہ ریفنڈ کی رقم براہِ راست ٹیکس دہندہ کے اکاؤنٹ میں جمع کروانے کے لیے اپڈیٹ پروفائل اہم ہے اور اس کے لیے آئی بی اے این درکار ہوتا ہے۔

ساتھ ہی انہوں نے یہ بھی کہا کہ ٹیکس دہندگان کی اے ٹی ایل میں دوبارہ شمولیت جرمانے کی ادائیگی سے مشروط ہے۔

انہوں نے بتایا کہ ٹیکس دہندہ کو موبائل نمبر، ای میل ایڈریس، بزنس ایڈریس، یوٹیلیٹی کے استعمال کی تفصیلات، آئی بی این سی والے بینک اکاؤنٹس کی تفصیلات دینی ہوں گی، یہ معیشت کو دستاویزی بنانے کا ایک اقدام ہے۔

ملک میں سونے کی قیمت میں اضافہ ہوگیا۔

سندھ صرافہ بازار جیولرز ایسوسی ایشن کے مطابق سونے کی فی تولہ قیمت 400 روپے بڑھی ہے جس کے بعد ایک تولہ سونے کی قدر ایک لاکھ 6 ہزار 700 روپے ہے۔

10 گرام سونے کی قدر 343 روپے اضافے سے 91478 روپے ہوگئی جبکہ عالمی صرافہ میں سونے کی قدر 9 ڈالر اضافے سے 1733 ڈالر فی اونس ہے۔