All posts by News Editor

لاہور: محمد رضوان کیلنڈر ایئر میں سب سے زیادہ ٹی ٹوئنٹی انٹرنیشنل رنز بنانے والے بیٹسمین بن گئے۔

ویسٹ انڈیز کیخلاف گیانا میں دوسرے ٹی ٹوئنٹی میچ کے دوران محمد رضوان نے 46 رنز کی اننگز کھیل کر اپنے رنز کی تعداد 752تک پہنچا دی، انھوں نے یہ کارنامہ 14اننگز میں سر انجام دیا۔

اس سے قبل یہ ریکارڈ آئرلینڈ کے پال اسٹرلنگ کے پاس تھا،جنھوں نے 2019 کی20 اننگز میں 748 رنز بنائے تھے۔

محکمہ پرائمری اینڈ سیکنڈری ہیلتھ کیئر کی ڈور ٹو ڈور سوشل موبلائزیشن ویکسی نیشن مہم میں تیزی ، لاہور میں گزشتہ چوبیس گھنٹوں کے دوران 56,877 شہریوں کو ویکسین لگائی گئی۔

محکمہ پرائمری اینڈ سیکنڈری ہیلتھ کیئر کے جاری کردہ اعدادوشمار کے مطابق لاہور سمیت پنجاب بھرمیں ویکسی نیشن کا ایک نیا ریکارڈ بننے لگا ہے،گزشتہ چوبیس گھنٹوں کے دوران لاہور سمیت صوبہ بھر میں مجموعی طور پر 549,675 افراد کو ویکسین لگائی گئی ،یہ صوبے میں کسی بھی ایک دن میں کی گئی ویکسینیشن کا اب تک کا سب سے بڑا ریکارڈ ہے۔

لاہور میں گزشتہ چوبیس گھنٹوں کے دوران 56,877 شہریوں کو ویکسین لگائی گئی,لاہور میں اب تک مجموعی طور پر 2,671,582 افراد کو ویکسین لگائی جا چکی ہے۔

واضح رہے کہ گزشتہ روز عالمی ادارہ صحت کے جاری بیان کے مطابق کورونا کی بھارتی قسم نے اس عالمی وبا کے خلاف جنگ میں حاصل فائدے خطرے میں ڈال دیے ہیں،ڈبلیو ایچ او کا کہنا تھا کہ ڈیلٹا ویریئنٹ نہ صرف بچوں بلکہ ایس او پیز کی خلاف ورزی کرنے والے تمام افراد کو تیزی سے نشانہ بناتا ہے،عالمی ادارہ صحت کے مطابق چار ہفتوں کے دوران کورونا کیسز میں 80 فیصد اضافہ ہوا ہے جبکہ ڈیلٹا ویریئنٹ 132 ممالک میں پھیل چکا ہے۔

کورونا وائرس کی بھارتی قسم دنیا کے 132 ممالک میں پھیل گئی،عالمی ادارہ صحت نے زور دیا ہے کہ دنیا بھارتی کورونا کو کنٹرول کرنے کیلئے مؤثر اقدامات کرے، اس سے پہلے کہ مزید خطرناک اقسام سامنے آ جائیں، بھارتی کورونا ایشیا سے لے کر افریقہ تک 132 ممالک میں پھیل گیا۔

انار کلی کے علاقے میں نامعلوم اسلحہ بردار ملزمان کا شہری کے گھر پر دھاوا، ملزم گھر میں توڑ پھوڑ کر کے قبضہ کرنے کی کوشش کرتے رہے، دکانداروں نے پولیس کو اطلاع کی تو ملزمان موقع سے فرار ہو گئے۔

متاثرین کا کہنا تھا کہ نامعلوم ملزمان نے گھر پر قبضے کوشش کی، گھر میں موجود خواتین کے کپڑے پھاڑ دیے اور انھیں اسلحہ کے زور پر یرغمال بنا لیا۔ گھر پر کوئی مرد موجود نہ تھا، ملزمان نے خواتین اور مفلوج بزرگ کو گھر سے باہر نکال دیا۔

دکانداروں نے بیچ بچاؤ کروایا اور پولیس کو اطلاع کی، پولیس کے پہنچنے پر ملزمان موقع سے فرار ہوگئے۔ متاثرین نے ملزمان کے خلاف نیو انارکلی تھانے میں درخواست جمع کروا دی ہے، مگر تاحال پولیس کی جانب سے ملزموں کے خلاف کوئی کارروائی عمل میں نہیں لائی گئی۔

کولڈ ڈرنکس اور سگریٹ کا اُدھار نہ کرنے پر تین لوگوں کا دکاندار پر تشدد، فائرنگ، واقعہ کی سی سی ٹی وی فوٹیج نے شہر میں عدم برداشت کی صورتحال کو بے نقاب کردیا۔

تفصیلات کے مطابق سگریٹ اور کولڈ ڈرنکس کا ادھار نہ کرنے پر دکاندار پہ تشدد اور فائرنگ کا واقعہ نواب ٹاؤن کے علاقے میں پیش آیا، ، متاثرہ دکاندار جاوید کے مطابق ملزم نادر خان، عقیل خان اور احتشام خان کیخلاف تھانہ نواب ٹائون میں مقدمہ درج ہو چکا ہے، پولیس کے مطابق فائرنگ کا واقعہ چند روز قبل پیش آیا تھا۔

لیسکو چوہنگ سٹور سے کروڑوں روپے کے میٹریل کی چوری کے سکینڈل میں اہم پیش رفت سامنے آ گئی، چوری شدہ میٹریل مختلف غیر قانونی ہاؤسنگ اسکیمز سے برآمد ہونے لگا۔

تفصیلات کے مطابق ایف آئی اے اور لیسکو نے چوہنگ کے مختلف علاقوں میں آپریشن کیا، آپریشن کے دوران چوری ہونیوالے ٹرانسفارمرز، پولز اور بجلی کی تاریں برآمد ہونے لگی ہیں۔ کمپنی کے لائن سپرنٹنڈنٹس نے چوری کا میٹریل خرید کر غیر قانونی ہاؤسنگ سوسائٹیز کو فروخت کیا۔ ذرائع نے بتایا کہ ہاؤسنگ سوسائٹیز کے مالکان نے سستے داموں میٹریل کی خریداری کر کے بجلی کی سپلائی لی، آپریشن کے دوران میٹریل چوری اور دستاویزات جعلی ہونے کے ثبوت بھی منظر عام پر آ گئے ہیں۔

واضح رہے کہ لیسکو چوہنگ سٹور سے چھ کروڑ چالیس لاکھ روپے کا میٹریل چوری ہوا تھا، ایف آئی اے مقدمہ درج کر کے سٹور ملازمین کو گرفتار کیا، ان گرفتار ملازمین کے بیانات کی روشنی میں مختلف علاقوں میں آپریشن ہونے لگے ہیں۔

دوسری جانب مون سون سیزن لاہور الیکٹرک سپلائی کمپنی کے ملازمین کے لئے وبال جان بنتا جا رہا ہے، کوٹ خواجہ سعید سب ڈویژن کے اسسٹنٹ لائن مین قوانین کے برعکس مرمتی کام کر رہا تھا کہ اس دوران اس کا ہاتھ الیون کے وی کی پنکچر تار سے چھو گیا، جس کی وجہ سے کرنٹ لگا اور وہ شدید زخمی ہو گیا۔

اس دوران بکٹ کرین ڈرائیور نے ظفر خان کو بچانے کی کوشش کی لیکن وہ بھی حادثے کا شکار ہو گیا۔ دونوں زخمیوں کو طبی امداد کے لئے واپڈا ہسپتال منتقل کر دیا گیا ہے۔ واضح رہے کہ رواں سال جولائی سے لیکر اب تک سات حادثات ہو چکے ہیں جن میں سے تین جاں بحق جبکہ چار زخمی ہوئے ہیں۔

پلازہ بناؤ، مال کماؤ اور رفو چکر ہوجاؤ، شاہ عالم مارکیٹ میں لاکھوں انسانی زندگیوں سے کھلواڑ کا سلسلہ جاری، شاہ عالم مارکیٹ کے134 پلازوں میں فائر سیفٹی آلات اور ایمرجنسی ایگزٹ نہ ہونے کا انکشاف، سول ڈیفنس کے سروے نے پلازہ مالکان اور مارکیٹس یونینز کی غفلت اور نااہلی کو بے نقاب کردیا۔

شاہ عالم مارکیٹ کے 23 ہزار ہول سیل یونٹس ہیں جہاں کاروبارکرنے والے دو لاکھ سے زائد افراد کی زندگیاں خطرے میں ڈال دی گئیں، ڈسٹرکٹ سول ڈیفنس آفیسر عرفان علی کہتے ہیں کہ پلازہ مالکان تعمیر کے بعد دکانیں اور فلورز فروخت کرکے رفو چکر ہوجاتے ہیں، صرف شاہ عالم مارکیٹ میں 152 پلازوں کا سروے کیا گیا تو 134 میں فائر سیفٹی کے آلات ہی موجود نہیں، شاہ عالم مارکیٹ کے صرف 18 پلازوں میں فائر سیفٹی پروٹوکول کو مد نظر رکھاگیا۔

کاروباری افراد کا کہنا ہے کہ حکومت بھی فائر سیفٹی آلات کی عدم دستیابی پر پلازہ مالکان کے خلاف کارروائی کرے، متعدد پلازوں میں مالکان نے پارکنگ کو بھی فروخت کیا، فائر سیفٹی کے آلات کی عدم دستیابی پر نوٹس صرف کرنا چاہیں تو کوئی پلازہ کو اون ہی نہیں کرتا، فائر سیفٹی پروٹوکول پر پورا نہ اترنے والے پلازوں کے نوٹس بذریہ یونین صرف کرنا پڑتے ہیں، پلازہ میں ایمرجنسی ایگزٹ، فائر سیفٹی پروٹوکول کے تحت فائر ہائیڈرنٹس اور آلات ہونا لازمی ہیں، جو شاہ عالم مارکیٹ میں نہیں ہیں،انسانی جانوں کو بچانے کیلئے فائر سیفٹی پروٹوکولز کی خلاف کرنے والے پلازہ مالکان کے خلاف ناصرف قانونی کارروائی ناگزیر ہے بلکہ قانونی شکنی کرنے والے تمام عمارتوں کو سیل بھی کرنا ہوگا تاکہ آتشزدگی کے واقعات سے بچا جاسکے۔

کراچی: کراچی تاجر ایکشن کمیٹی نے مسلسل لاک ڈاؤن کے باعث بجلی کے بلز، وفاق وصوبائی ٹیکسوں کی عدم ادائیگی جبکہ لاک ڈاؤن کی مدت میں مزید توسیع پر ازخود تجارتی مراکز کھولنے کا اعلان کردیا ہے۔

کراچی تاجر ایکشن کمیٹی کے کنوینر محمد رضوان نے ہفتے کو مقامی لان میں رؤف ابراہیم، رانا رائیس،شرجیل گوپلانی، جمیل پراچہ ودیگر تاجر نمائندوں کے ہمراہ پریس کانفرنس سے خطاب کے دوران لاک ڈاؤن کی مدت میں مزید توسیع پر ازخود تجارتی مراکز کھولنے کا اعلان کردیا۔

محمد رضوان نے کہاکہ جب تک لاک ڈاؤن ہوگا کراچی کے تاجر نہ بجلی کا بل دیں گے اور نہ ہی صوبائی اور وفاق کے ٹیکسز دیں گے،کورونا کے پھیلاؤ کی ذمے دار پیپلز پارٹی خودہے، وزیراعلی سندھ نے اپنے گاوں کا دورہ کرکے اجتماعی بنیادوں پر لوگوں سے ملاقاتیں کیں لیکن کورونا پھیلانے کی زمہ داری تاجروں پر رائد کر دی گئی ہے، ہمارا مقصد تاجروں کا کاروبار کھلے، بے روزگاروں روزگار ملے۔

انہوں نے کہاکہ کراچی تاجر ایکشن کمیٹی نے سندھ حکومت کی درخواست پر لاک ڈاؤن کے خلاف احتجاج موخر کیا،سندھ حکومت نے وعدے کے باوجود تاجروں کے ساتھ دھوکا کیا،لاک ڈاون میں حکومت ہر ٹیکس دھندہ تاجروں کے اکاؤنٹ میں تین لاکھ روپے جمع کرائے،کورونا ختم ہونے والا نہیں لہٰذا کورونا اور کاروبار ساتھ چلے گا، کراچی میں اگر وبا زیادہ ہے تو کراچی و آفت زدہ قرار دیکرتاجروں کے بجلی کے بلوں اور ٹیکس معاف کیا جائے۔

کراچی ہول سیل گروسرز ایسوسی ایشن کے چئیرمین رؤف ابراہیم نے کہاکہ بڑھتے ہوئے نہ ختم ہونے والے مسائل کے بعد تاجر برادری کو اب قومی سیاست میں آنا پر مجبور کررہی ہے لہذا آئندہ انتخابات میں کراچی کی تاجر برادری بھی انتخابات میں حصہ لے گی۔

شادی ہالز ایسوسی ایشن کے صدر رانا رئیس نے کہاکہ حکومت نے مشاورت کے بغیر سندھ میں یکطرفہ طور پر لاک ڈاؤن کا اعلان کردیاہے جو غیر منصفانہ اقدام ہے،حکومت مارکیٹوں میں رینڈملی کورونا ٹیسٹ کرکے ویکسینیش کے عمل میں تیزی لائے۔

کراچی ٹمبر ایسوسی ایشن کے صدر شرجیل گوپلانی نے کہاکہ لاک ڈاؤن کی وجہ سے درآمدی کنٹینرز کو بھی مارکیٹوں میں ترسیل کو روکا جارہاہے،وفاق اگر لاک ڈاون کے حق میں نہیں تو وہ سندھ میں غیرمنصفانہ لاک ڈاون روکنے میں آئینی مداخلت کیوں نہیں کررہا،دیوالیہ پن کے شکار پچاس سے زائد تاجروں نے خود کشیاں کی ہیں۔

جمیل پراچہ نے کہاکہ سیاسی جلسے جلوسوں سے کیا کورونا کیسز نہیں بڑھ رہے ہیں۔آئے دن کے لاک ڈاؤن سے تاجروں کے مسائل بڑھ گئے ہیں، لاک ڈاؤن فی الفور ختم کیا جائے،چیف جسٹس غیرمنصفانہ لاک ڈاون کے خلاف سوموٹو ایکشن لیں۔

اسلام آباد: فیڈرل بورڈ آف ریونیو (ایف بی آر) کے جاری کردہ اعداد و شمار کے مطابق جولائی میں ریونیو کلیکشن بڑھ کر 4 کھرب 13 ارب روپے رہا جو گزشتہ برس کے مقابلے 36 فیصد زیادہ ہے۔

رپورٹ کے مطابق کلیکشن میں 71 ارب روپے کا اضافہ ہوا جو اس ماہ کے لیے مقررہ ہدف سے 71 فیصد زیادہ تھا۔

اس کامیابی پر وزیراعظم عمران خان نے ٹیکس حکام کی کوششوں کو سراہا۔

مائیکرو بلاگنگ ویب سائٹ ٹوئٹر پر ایک ٹوئٹ میں انہوں نے کہا کہ ‘ماہِ جولائی میں ریکارڈ ریونیو اکٹھا کرنے پر میں ایف بی آر کو سراہتا ہوں، یہ وصولیاں مستقل معاشی احیا و افزائش کے حوالے سے حکومتی پالیسیوں کی مظہر ہیں’۔

ان کا مزید کہنا تھا کہ اب تک 4 کھرب 10 ارب روپے اکٹھے کیے جاچکے ہیں جو تاریخی اعتبار سے ماہِ جولائی میں جمع کی جانے والی سب سے بڑی رقم اور اس مہینے کے ہدف سے تقریباً 22 فیصد زیادہ ہے۔

رواں مالی سال کے پہلے ماہ میں ملک کی معاشی سرگرمیوں میں تیزی آئی جس کی وجہ سے سیلز ٹیکس اور کسٹم ڈیوٹی کی کلیکشن زیادہ رہی۔

حکومت نے رواں مالی سال کا بجٹ تیار کرتے ہوئے عالمی مالیاتی فنڈ (آئی ایم ایف) کو یقین دہانی کروائی تھی کہ ٹیکس کلیکشن کو بڑھا کر 58 کھرب 29 ارب روپے تک پہنچایا جائے گا جو مالی سال 2021 میں 47 کھرب 21 ارب روپے رہا۔

وزیر خزانہ شوکت ترین نے آئی ایم ایف کو یقین دہانی کروائی تھی کہ بغیر اضافی ٹیکس اقدامات کے موجودہ پالیسیز کے ذریعے ہی ریونیو میں اضافہ کیا جائے گا۔

31 جولائی تک ریونیو کلیکشن 4 کھرب 13 ارب روپے رہا جبکہ ہدف 3 کھرب 42 ارب روپے تھا۔

مالی سال 2020 میں جولائی کے مہینے میں 3 کھرب 3 ارب روپے اکٹھے ہوئے تھے جس میں 36 فیصد کا اضافہ ہوا۔

اسی طرح جولائی 2021 میں ری فنڈ کی جانے والی رقم 20 ارب روپے رہی جو گزشتہ برس 16 ارب روپے تھی اور اس میں 28 فیصد اضافہ ہوا۔

جولائی میں انکم ٹیکس کلیکشن گزشتہ برس کے اسی ماہ کے ایک کھرب 7 ارب روپے سے 27 فیصد بڑھ کر ایک کھرب 35 ارب روپے تک جا پہنچی جبکہ گزشتہ مالی سال میں متعدد ریونیو اقدامات کے باوجود انکم ٹیکس کلیکشن ہدف سے کم رہا تھا۔

راولپنڈی: فیٹیف کی شرائط کے مطابق پاکستان پوسٹ کا تمام فنانشل سسٹم ڈیجیٹلائزڈ کرنے کا فیصلہ کیا گیا ہے۔

فیٹیف شرائط کے مطابق پاکستان پوسٹ کا تمام فنانشل سسٹم ڈیجیٹلائزڈ کرنے کا فیصلہ کرلیا گیا جب کہ پاکستان پوسٹ اور حبیب بینک میں باقاعدہ معاہدہ طے پا گیا ہے، اس معاہدہ کے تحت حبیب بینک پاکستان پوسٹ کے افسران کو باقاعدہ تربیت دے گا، اس تربیت سے پاکستان پوسٹ کے ملک بھر میں78 جی پی اوز کا فنانشل سسٹم مکمل ڈیجیٹلائزڈ ہوجائے گا۔

دوسرے مرحلہ میں بڑے شہروں کے بڑے ڈاک خانوں کا نظام ڈیجیٹیلائزڈ ہوگا،اس تربیت کے لیے3 اگست تک پاکستان پوسٹ کے اکاو’نٹ شعبہ سے منسلک اسکیل14 کے افسران کی فہرست بھی مانگ لی گئی ہے یہ افسران ماسٹر ٹرینیرز بنیں گے، ان کی تربیت بھی اگست کے پہلے ہفتہ میں شروع ہوجائے گی۔

اسلام آباد: سی پیک کی راہ میں حائل مسائل کو حل کرنے کیلیے پاک چین اسٹیئرنگ کمیٹی تشکیل دیدی گئی۔

سی پیک پر عمل درآمد کی راہ میں حائل آپریشنل مسائل کو حل کرنے اور چین کے ساتھ اقتصادی سفارتکاری کی نگرانی کیلئے پاک چین اسٹیئرنگ کمیٹی تشکیل دیدی گئی ہے۔ اسٹیئرنگ کمیٹی پاک چین تعلقات کے مثبت بیانیے کی تعمیر کے لیے بھی کام کرے گی اور اربوں ڈالر کے سی پیک منصوبے پر ازسرنو توجہ مرکوز کرے گی جو تین سال تک نظر انداز رہا۔

عہدیداروں نے بتایا کہ ابتدائی طور پر مذکورہ کمیٹی سی پیک کو چلانے کے لیے قائم کی گئی ہے تاہم یہ ان علاقوں میں بھی کام کرے گی جو روایتی طور پر سی پیک کے فریم ورک کے تحت نہیں آتے،دو جولائی کو ہونے والے کمیٹی کے پہلے اجلاس میں باہمی دلچسپی کے شعبوں میں پاک چین اقتصادی تعاون کی نگرانی اور رہنمائی کرنے پر اتفاق کیا گیا،مزید یہ کہ کمیٹی پاک چین اقتصادی سفارتکاری کی حمایت اور نگرانی کے لیے بھی کام کرے گی۔

ذرائع نے بتایا کہ کمیٹی کے ارکان میں اس بات پر اتفاق پایا گیا کہ چین کے ساتھ اقتصادی سفارتکاری کا ہدف خصوصی اقتصادی زونز کے ذریعے حاصل کیا جا سکتا ہے۔دو جولائی کو ہونے والے اجلاس میں وزیر منصوبہ بندی اسد عمر نے کمیٹی سربراہ ہونے کی حیثیت سے وزارت خزانہ کی جانب سے اس کا دائرہ کار سماجی اور ثقافتی شعبوں میں بڑھانے کی تجویز کو مسترد کرتے ہوئے کہا کہ کمیٹی کی بنیادی توجہ معاشی تعلقات رہے گی۔

ذرائع کے مطابق گزشتہ دور حکومت میں شروع کیے گئے سی پیک کے متعدد منصوبے التوا کا شکار ہیں،جن میں توانائی کے پانچ منصوبے بھی شامل ہیں،کمیٹی میں سویلین ، ملٹری ، نیوی اور انٹیلی جنس ایجنسیوں کو نمائندگی حاصل ہے تاہم اس کے پہلے اجلاس میں رکنیت بڑھانے کا فیصلہ کیا گیا تھا۔

وزارت منصوبہ بندی کے ایک سینئر عہدیدار نے بتایا کہ اسد عمر نے سیکریٹری اطلاعات، سیکرٹری بورڈ آف انویسٹمنٹ اور چاروں صوبوں، گلگت بلتستان اور آزاد جموں و کشمیر کے چیف سیکریٹریوں کو اس میںشامل کرنے کی سمری کی منظوری دے دی ہے،توقع ہے کہ یہ سمری توثیق کیلئے اگلے ہفتے وزیراعظم عمران خان کو بھیج دی جائے گی۔