All posts by News Editor

لاہور: شاداب خان نے کہا ہے کہ شرجیل اپنی سزا پوری کرکے ڈومیسٹک میں پرفارم کرکے واپس آیا ہے اور وہ کیمپ میں سخت محنت کررہا ہے جوکہ اچھی بات ہے، یقین ہے کہ شرجیل کی واپسی سے ٹیم کا کمبی نیشن مزید مضبوط ہوگا اور شرجیل جیت میں اہم کردار ادا کرے گا۔

ورچوئل پریس کانفرنس کرتے ہوئے انہوں نے کہا کہ ٹی ٹوئنٹی فارمیٹ میں پاور ہٹر کا بہت رول ہے، عثمان قادر، زاہد محمود، محمد نواز اور میرے درمیان سخت مقابلہ ہے ہر کسی کو ٹیم میں اپنی جگہ برقرار رکھنے کے لیے کارکردگی دکھانا ہوگی، قرنطینہ میں رہ کر کرکٹ کھیلنا خاصا ٹف ہے مگر اب ہم اس کے عادی ہوچکے ہیں۔
شاداب خان کے مطابق چیمپئنز ٹرافی میں عمدہ کارکردگی کے علاوہ باقی جگہ بھی کارکردگی دکھائی ہے، اس وقت ہماری ٹیم میں ہر جگہ پر بیک اپ تیار ہو گیا ہے جو کہ ٹیم کے لیے اچھی چیز ہے۔
قومی ون ڈے اور ٹی ٹونٹی ٹیم کے نائب کپتان شاداب خان نے دورہ جنوبی افریقا کو چیلنج قرار دیا اور کہا کہ جنوبی افریقہ کی کنڈیشنر میں پرفارم کرنا کبھی آسان نہیں رہا، دورہ جنوبی افریقا کے لیے اچھی تیاری جاری ہے، جنوبی افریقا کے خلاف سیریز میں کامیابی حاصل کرنے کی کوشش کریں گے، ٹی ٹونٹی کرکٹ میں کم وقت ہوتا ہے اس فارمیٹ میں کوئی ٹیم آسان نہیں ہوتی۔

شاداب خان کے مطابق انجریز کی وجہ سے کارکردگی میں کچھ مسائل ضرور آئے مگر اب مکمل فٹ ہوں۔ شاداب نے موقف اختیار کیا کہ وہ بطور بالر ٹیم میں آئے، بیٹنگ ان کی اضافی خوبی ہے جسے بہتر بنانے پر بھی توجہ دے رہے ہیں۔

قومی کرکٹ اسکواڈکے تمام 34 ارکان کی تیسری کورونا ٹیسٹنگ بھی منفی آگئی۔

پاکستان کرکٹ بورڈ کے مطابق جنوبی افریقا روانگی سے قبل کرکٹ اسکواڈ کی چوتھی کورونا ٹیسٹنگ 24 مارچ کو ہوگی۔

پی سی بی کا کہنا ہےکہ اسکواڈ کے ایک رکن کا کورونا ٹیسٹ مثبت آیا تھا البتہ اب اس کے 2 ٹیسٹ منفی آچکے، اسکواڈ کا یہ رکن 23 مارچ کو بائیو سکیور ببل کا حصہ بن جائے گا جب کہ متاثرہ رکن کے مزید 2 کورونا ٹیسٹ 24 مارچ کو ہوں گے۔

واضح رہے کہ قومی کرکٹ ٹیم 26 مارچ کو دورہ جنوبی افریقا کے لیے روانہ ہوگی جہاں ٹیم کے 4 ٹی ٹوئنٹی اور 3 ون ڈے میچز کھیلے گی۔

پاکستان کرکٹ ٹیم کے سابق کپتان اظہر علی کی والدہ انتقال کر گئیں۔

اظہر علی نے سوشل میڈیا اکاؤنٹ کے ذریعے اپنے مداحوں کو والدہ کے انتقال کی خبر دی اور کہا کہ وہ جلد نماز جنازہ کی تفصیلات سے آگاہ کریں گے۔

انہوں نے مداحوں سے دعا مغفرت کرنے اور نماز جنازہ میں شرکت کے لیے آنے والے افراد سے کورونا کے حوالے سے حکومتی ضابطہ اخلاق پر عملدرآمد کی درخواست بھی کی۔

اس خبر کے بعد دنیا بھر سے کرکٹرز، کمنٹیٹرز اور صحافیوں کی جانب سے اظہر علی سے اظہار افسوس کیا جا رہا ہے۔

لاہور: موٹروے زیادتی کیس کے دونوں مجرموں کو ڈیتھ سیل میں منتقل کردیا گیا۔

ذرائع کے مطابق موٹروے زیادتی کیس کے مرکزی مجرم عابد ملہی اور شفقت کو کوٹ لکھپت جیل کے ڈیتھ سیل میں منتقل کیا گیا ہے جہاں دونوں کو دی جانے والی سزاؤں پر عملدرآمد ہوگا۔

ذرائع کا بتانا ہےکہ موٹروے زیادتی کیس کے دونوں مجرم کیمپ جیل فیروزپور روڈ میں بند تھے۔

واضح رہے کہ انسداد دہشتگردی کی عدالت نے ہفتے کو موٹروے زیادتی کیس کا فیصلہ سنایا تھا جس میں دونوں مجرموں کو موت اور عمر قید کی سزاسنائی گئی تھی

نیشنل کمانڈ آپریشن سینٹر (این سی او سی) نے ملک میں کورونا کی تیسری لہر کے پیش نظر رات 8 بجے تک تمام کاروباری سرگرمیاں بند کرنے کا فیصلہ کرلیا۔

اسلام آباد میں وفاقی وزیر منصوبہ بندی اسد عمر کی زیر صدارت این سی او سی کا اجلاس ہوا جہاں تمام صوبوں کے چیف سیکریٹریز نے ویڈیو لنک کے ذریعے شرکت کی اور کورونا سے متعلق متعدد فیصلے کیے گئے۔

این سی او سی کی جانب سے جاری بیان کے مطابق ‘اجلاس میں کووڈ سے متعلق حالات پر گہری تشویش کا اظہار کیا گیا اور اس حوالے سے 8 فیصد سے زیادہ کیسز کی شرح کے حامل علاقوں میں 3 روز کی بنیاد پر مزید بندشوں پر اتفاق کیا گیا۔
یان میں کہا گیا کہ ‘8 فیصد سے کم شرح کے حامل علاقوں میں پہلے ہی بندشیں عائد ہیں جو رسک کی بنیاد پر بدستور جاری رہیں گی۔

این سی او سی کی جانب سے درج ذیل فیصلے کیے گئے:

1- جائزے کی بنیاد پر پرٹوکولز کے سخت نفاذ کے ساتھ لاک ڈاؤن پر عمل درآمد اور بغیر کسی ایمرجنسی کے نقل و حرکت کی اجازت نہیں ہوگی۔

2- ہر قسم کے بند مقامات پر کھانے کی سہولت بند جبکہ رات 10 بجے تک کھلے مقامات پر کھانے اور کھانا ساتھ لے جانے کی اجازت ہوگی۔

3- رات 8 بجے تک تمام کاروباری سرگرمیاں بند کردی جائیں گی۔

4- ہفتے میں دو دن تحفظ کے طور پر رکھے جائیں گے اور دنوں کا انتخاب وفاقی اکائیوں کی مرضی پر ہوگا۔

5- تقریبات میں زیادہ سے زیادہ 300 افراد کو کووڈ ایس او پیز پر سخت پابندی کے ساتھ اجازت ہوگی تاہم بند جگہوں پر ثقافتی، موسیقی، مذہبی یا دیگر تقریبات پر پابندی ہوگی۔

6- سنیما اور مزار مکمل طور پر بند ہوں گے۔

7- کھیلوں، میلوں، ثقافتی اور دیگر ایونٹس پر مکمل پابندی ہوگی۔

8- کھلے مقامات پر شادی کی تقریبات میں رات 10 بجے تک زیادہ سے زیادہ 300 مہمانوں کو سخت کووڈ ایس او پیز کے ساتھ صرف دو گھنٹوں تک شرکت کی اجازت ہوگی جبکہ کسی قسم کی انڈور تقریب کی اجازت نہیں ہوگی۔

9- پارکس بھی مکمل طور پر بند رہیں گے تاہم واکنگ یا جوگنگ ٹریکس سخت ایس او پیز کے ساتھ بدستور کھلی ہوں گی۔

10- تمام سرکاری اور نجی دفاتر اور عدالتوں میں 50 فیصد عملے کی گھروں سے کام کرنے کی پالیسی جاری رہے گی۔

11- انٹرسٹی ٹرانسپورٹ 50 فیصد تعداد کے ساتھ چلانے کی اجازت ہوگی۔

12- ریل سروس 70 فیصد تعداد کے ساتھ چلائی جائے گی۔

13- تمام وفاقی اکائیاں ماسک پہننے کو یقینی بنائیں گی جبکہ عمل درآمد کے لیے اقدامات میں جدت لائی جائے گی۔

14- عدالتوں (سٹی، ڈسٹرکٹ، ہائی کورٹ اور سپریم کورٹ) میں لوگوں کی تعداد کم ہونی چاہیے۔

15- گلگت بلتستان، خیبر پختونخوا، آزاد جموں و کشمیر اور دیگر سیاحتی مقامات میں قواعد پر سختی سے عمل درآمد یقینی بنایا جائے گا اور داخلی مقامات پر ٹیسٹ کی سہولت قائم کی جائے گی۔

16- میڈیا قابل سزا سرگرمیاں نمایاں کرے۔

اس کے علاوہ این سی او سی کے اجلاس میں فیصلہ کیا گیا کہ ان پابندیوں پر مکمل عمل درآمد کیا جائے گا اور 11 اپریل 2021 تک یہ نافذ رہیں گی تاہم 7 اپریل کو جائزہ لیا جائے گا۔

تعلیمی سرگرمیوں سے متعلق کہا گیا کہ این سی او سی کی جانب سے 10 مارچ سے جاری بندشوں کا 24 مارچ کو جائزہ لیا جائے گا۔

قبل ازیں وفاقی وزیر منصوبہ بندی اور این سی او سی کے چیئرمین اسد عمر نے سماجی روابط کی ویب سائٹ ٹوئٹر پر آج ہونے والے این سی او سی کے اجلاس سے متعلق مختصر ٹوئٹ میں کہا تھا کہ اجلاس میں ہم نے کورونا سے متعلق پابندیوں میں اضافے کا فیصلہ کیا ہے۔

انہوں نے مذکورہ فیصلے کے حوالے سے کہا تھا کہ ’ملک میں کورونا وائرس کے مثبت کیسز میں تیزی سے اضافہ ہوا ہے‘۔

اسلام آباد: وفاقی وزیر تعلیم شفقت محمود نے تعلیمی ادارے کھلے رہنے کی خواہش کا اظہار کیا ہے۔

لاہور میں وفاقی وزیر تعلیم شفقت محمود نے میڈیا سے گفتگو کرتے ہوئے کہا کہ کورونا کی صورتحال میں متعدد اقدامات کیے، کورونا وبا کی بڑھتی شرح کے پیش نظر مختلف شہروں میں 2 ہفتوں کے لئے تعلیمی ادارے بند کیے، جو مشکل فیصلہ تھا، وزارت تعلیم کی خواہش ہے تعلیمی ادارے کھلے رہیں، آن لائن تعلیم سے بچے خوش نہیں ہیں، اس میں وہ بات نہیں جیسے کلاسز میں ہوتا ہے، 24 مارچ کو دوبارہ اجلاس ہوگا جس میں جائزہ لیا جائے گا کہ تعلیمی ادارےکھولنےہیں یانہیں۔
شفقت محمود نے کہا کہ ملکی تعلیمی اداروں میں نصاب کے حوالے سے قوم تقسیم ہے، جسے ختم کرنے کے لیے حکومت نے یکساں تعلیمی نظام بنایا ہے جسے لاگو کرنے جارہے ہیں، پنجاب ،خیبرپختونخوااور دیگر صوبوں میں یکساں نظام تعلیم لایا جائیگا، یکساں نصاب پر سندھ کے تحفظات دور کررہے ہیں

اسلام آباد: سپریم کورٹ کے جج جسٹس قاضی فائز عیسی کی اہلیہ سرینا عیسی نے وفاقی وزیر فواد چوہدری کیخلاف توہین عدالت کی درخواست دائر کردی۔

فواد چوہدری نے دو روز قبل جسٹس قاضی فائز عیسی کے حوالےسے ٹوئٹ کیا تھا جس پر ان کیخلاف توہین عدالت کی درخواست جسٹس قاضی فائز کی اہلیہ نے دائر کی۔

گزشتہ دنوں وفاقی وزیر سائنس اینڈ ٹیکنالوجی فواد چوہدری نے سپریم کورٹ کے جج جسٹس قاضی فائز عیسیٰ کو تنقید کا نشانہ بنایا تھا۔ انہوں نے ٹویٹ کرتے ہوئے کہا تھا کہ ‏ایک ہفتے سے سپریم کورٹ کے ایک انڈر ٹرائل جج کی تقریریں سن رہے ہیں، اگر جواب دیا تو ’دکھ ہوا سے توہین ہوگئی‘ کے بھاشن آجائیں گے۔

کراچی: پاکستان سٹاک مارکیٹ میں آج ایک مرتبہ پھر زبردست تیزی ریکارڈ کی گئی۔ 100انڈیکس 5سو پوائنٹس تک بڑھ گیا۔

سیاسی منظر نامے میں تبدیلی اور پاک بھارت تعلقات میں بہتری کی امید کے باعث پاکستان اسٹاک ایکسچینج میں تیزی دیکھی گئی۔ 100انڈیکس 506پوائنٹس اضافے سے 45ہزار 407پوائنٹس پر بند ہوا۔

تجزیہ کاروں کا کہنا ہےکہ گزشتہ دنوں کی مندی کے باعث اسٹاک مارکیٹ کے انڈیکس میں اضافے کی گنجائش موجود ہے جس کا سرمایہ کار فائدہ اٹھا رہے ہیں ۔

لاہور: آئل اینڈ گیس ریگولیٹری اتھارٹی (اوگرا) کی جانب سے تعمیراتی لائسنس کے اجرا میں تاخیر اور سرکاری سوئی گیس کمپنیوں کی جانب سے گیس ٹرانسپورٹیشن ایگریمنٹ (جی ٹی اے) کو روکے جانے کی وجہ سے 2 نئے مائع قدرتی گیس (ایل این جی) ٹرمینلز کی تعمیر پر پیش رفت رک گئی۔

رپورٹ کے مطابق اوگرا نے انرجاز اور تعبیر کو ایل این جی مارکیٹنگ کا لائسنس جاری کیا تھا تاہم کمپنیوں کا دعویٰ ہے کہ ریگولیٹر تعمیراتی لائسنس کے اجرا میں تاخیر کررہا ہے جو ان کے متعلقہ منصوبوں میں حتمی سرمایہ کاری کا فیصلہ لینے میں رکاوٹ بن رہا ہے۔

انرجاز کچھ کمپنیوں کے کنسورشیم کی تشکیل دی گئی کمپنی ہے جس میں لکی سیمنٹ، سفائر اور ہالمور پاور شامل ہیں جبکہ تعبیر میں مٹسوبشی کمپنی معاونت کررہی ہے
دونوں کمپنیوں کا نجی سیکٹر میں اپنے صارفین کے لیے ‘وصول کرو اور ادا کرو’ کی بنیاد پر گیس درآمد کرنے کا منصوبہ ہے لیکن انہیں گزشتہ 5 سے 6 برسوں سے ریگولیٹری اور دیگر منظوریاں لینے میں مشکلات کا سامنا ہے۔

ایک سینئر ایگزیکٹو نے نام نہ ظاہر کرنے کی شرط پر بتایا کہ ‘اوگرا نے لائسنس جاری کرنے سے قبل ہمیں سوئی سدرن گیس کمپنی اور سوئی نادرن گیس پائپ لائنز لمیٹڈ کے ساتھ جی ٹی اے پر دستخط کرنے کا کہا تھا’۔

انہوں نے الزام عائد کیا کہ سرکاری گیس کمپنیاں جی ٹی اے میں تاخیر کے لیے مختلف بہانے استعمال کررہی ہیں جس کے بغیر دونوں کمپنیوں میں سے کوئی بھی ٹرمینل بنانے کے لیے اپنا حتمی سرمایہ کاری کا فیصلہ نہیں سکتی۔

ان کا مزید کہنا تھا کہ جب تک ہمارے پاس تعمیراتی لائسنس اور گیس کمپنیوں کی جانب سے جی ٹی اے نہیں ہوگا ہم اپنے صارفین کی مصدقہ طلب کے باوجود گیس درآمد اور فروخت نہیں کرسکتے۔
ان کا یہ بھی کہنا تھا کہ ایس این جی پی ایل اور ایس ایس جی سی کی انتظامیہ فیصلے لینے سے خوفزدہ ہیں کیوں کہ نجی کمپنیاں مارکیٹ میں ان کی اجارہ داری ختم کرسکتی ہیں ساتھ ہی وہ قومی احتساب بیورو (نیب) سے بھی ڈری ہوئی ہیں۔

انہوں نے دعویٰ کیا کہ نجی سیکٹر سرکاری شعبے کے مقابلے میں شعبہ توانائی کو 10 فیصد سستے دام میں ایل این جی فراہم کرسکتا ہے۔

دوسری جانب دونوں کمپنیاں حکومت کے ساتھ موجودہ فالتو ٹرمینلز اور پائپ لائنز کی خریداری کے لیے بھی بات چیت کررہی ہیں تا کہ صنعتی اور توانائی صارفین کے لیے ایل این جی کارگوز درآمد کرسکیں۔

روپے کے مقابلے میں گزشتہ چند روز کے دوران امریکی ڈالر مسلسل سستا ہو رہا ہے۔ فروری سے لیکر اب تک ڈالر ساڑھے 5 روپے سستا ہو چکا ہے۔ امکان ہے کہ روپے کے مقابلے میں امریکی ڈالر کی قیمت 150 روپے تک جا سکتی ہے۔

تفصیلات کے مطابق ڈالر کی موجودہ قیمت کا جائزہ لیا جائے تو یہ اکتوبر 2019 تک کی سطح تک گر چکی ہے جبکہ اکتوبر 2020ء میں اس کی قیمت 168 روپے سے بھی اوپر چلی گئی تھی۔

روپے کے مقابلے میں ڈالر کی قیمت میں گذشتہ سال ہونے والے بے تحاشا اضافے نے ملکی درآمدات کو مہنگا کیا تو دوسری جانب اس کی وجہ سے ملک میں مہنگائی کی شرح میں بھی اضافہ دیکھنے میں آیا۔

فاریکس ایسوسی ایشن آف پاکستان کے چیئرمین ملک بوستان نے کہا کہ فروری کے مہینے میں ڈالر 161 روپے پر ٹریڈ ہو رہا تھا جو اب گر کر 155.70 تک آن پہنچا ہے۔ کی قیمت حالیہ دنوں میں 154 تک بھی گر گئی لیکن اس کی خریداری کی وجہ سے یہ ایک بار پھر 155 تک چلی گئی ہے۔

برطانوی میڈیا کے مطابق معاشی ماہرین کا کہنا ہے کہ ماہرِ معیشت خرم شہزاد کے تجزیے کے مطابق اپنی بلند ترین سطح کے مقابلے میں آج ڈالر کی قدر 7.5 فیصد کے لگ بھگ گر چکی ہے۔

ڈالر کے مقابلے میں روپے کی قدر میں اضافے پر بات کرتے ہوئے ملک بوستان نے کہا کہ حالیہ ہفتوں میں مقامی کرنسی کی قدر میں ہونے والے اضافے کی کئی وجوہات ہیں جن میں درآمدات میں کمی، ترسیلات زر اور برآمدات میں اضافہ، روشن ڈیجیٹل اکاؤنٹ کے ذریعے بیرون ملک مقیم پاکستانیوں کی جانب سے ملک میں آنے والی سرمایہ کاری اور غیر ملکی قرضوں کی ادائیگی کا مؤخر ہونا شامل ہے۔ درآمدات میں مسلسل کمی نے مقامی کرنسی کو بہت زیادہ سہارا دیا جس کی وجہ سے بیرون ملک ڈالر کی منتقلی میں کمی دیکھنے میں آئی۔ برآمدات میں ہونے والے اضافے نے بھی روپے کو سہارا دیا تو دوسری جانب بیرونِ ملک پاکستانیوں کی جانب سے بھیجی جانے والی رقوم بھی روپے کی قدر میں اضافے کا باعث بنیں جس کی وجہ سے مجموعی طور پر کرنٹ اکاؤنٹ یعنی ’جاری کھاتے‘ سرپلس ہوئے۔

انہوں نے کہا کہ بیرون ملک پاکستانیوں کی جانب سے ملک بھیجی جانے والی رقوم دو ارب ڈالر ماہانہ سے زائد ہیں۔ پاکستان ہندوستان، چین اور فلپائن کے بعد دنیا میں ترسیلات زر وصول کرنے والا چوتھا بڑا ملک بن چکا ہے جو ملک کے زرِ مبادلہ کے ذخائر کے لیے ایک مثبت پیش رفت ہے۔ آئی ایم ایف کی طرف سے قرض پروگرام کی بحالی بھی ایک اہم وجوہات میں سے ایک ہیں۔ ڈالر کی قیمت 154 روپے سے نیچے 150 روپے تک جا سکتی ہے۔

برطانوی میڈیا کے مطابق موجودہ مالی سال کے پہلے آٹھ مہینوں میں ترسیلات زر کی مجموعی مالیت 18 ڈالر سے زائد ہے اور مالی سال کے اختتام تک ان کا 28 ارب ڈالر سے اوپر رہنے کا امکان ہے۔

ملک بوستان نے کہا کہ ڈالر کی قیمت زیادہ نیچے جا سکتی تھی تاہم ملک کو گندم اور چینی کی درآمد کی وجہ سے اس مالی سال میں اب تک چھ ارب ڈالر خرچ کرنے پڑے جس نے ڈالر کی طلب کو بڑھا دیا تھا۔ ملک کے زرمبادلہ ذخائر اس وقت 20 ارب ڈالر ہیں اگر چینی اور گندم کے ساتھ دوسری چیزوں کی امپورٹ نہ کی جاتی تو ملک کے زرمبادلہ ذخائر 30 ارب ڈالر تک جا سکتے تھے۔

اُنھوں نے ڈالر کی قیمت نیچے آنے کی وجہ سے ملک کے برآمدی شعبے کو نقصان کا تاثر مسترد کیا۔ اُنھوں نے کہا کہ برآمدی شعبے کے لیے ڈالر کی معقول قیمت 145سے 154 روپے کے درمیان ہے اور اس سطح پر برآمدی شعبہ بہتر طریقے سے اپنا کاروبار جاری رکھ سکتا ہے۔