All posts by News Editor

پاکستان میں کرشنگ سیزن شروع ہونے کے بعد چینی کی قیمت میں کمی آئی ہے لیکن بیرون ملک سے امپورٹ کی گئی چینی شہریوں کی جیب پر بھاری پڑ رہی ہے اور انتظامیہ سستی کی بجائے مہنگی چینی خریدنے کے لئے ڈیلرز پر دباو ڈال رہی ہے۔

کرشنگ سیزن کے آغاز کے بعد فیصل آباد میں چینی کے ایکس مل ریٹ میں 25 روپے فی کلو تک کمی واقع ہو چکی، دکانداروں کو 100 روپے کلو میں ملنے والی چینی اب 75 روپے کلو میں دستیاب ہے لیکن اوپن مارکیٹ میں چینی ابھی بھی 90 روپے کلو تک فروخت ہو رہی ہے۔

فیصل آباد میں انتظامیہ خود شہریوں کو سستی چینی سے محروم کرنے کی وجہ بنی ہوئی ہے۔ دکاندار اور ڈیلرز کہتے ہیں ضلعی انتطامیہ انہی ملوں سے 75روپے کلو چینی خریدنے کی بجائے بیرون ملک سے امپورٹ کی گئی 80 روپے کلو والی چینی خریدنے پر دباو ڈال رہی ہے۔

شہری کہتے ہیں کہ شتر بےمہار مہنگائی نے پہلے ہی کمر توڑ رکھی ہے جبکہ یہاں حکومتی ناقص حکمت عملی کی وجہ سے دکاندار چینی کے من مانے ریٹ وصول کررہے ہیں۔

دکاندار کہتے ہیں درآمد شدہ چینی معیار کے لحاظ سے بھی پاکستانی چینی سے انتہائی ناقص ہے، خریدار موٹی چینی کا مطالبہ کرتے ہیں جبکہ انتظامیہ انہیں انتہائی باریک چینی وہ بھی مہنگے داموں فروخت کر رہی ہے جس کو مارکیٹ میں فروخت کرنا انتہائی مشکل ہے۔

لاہور ڈویلپمنٹ اتھارٹی کے ڈائریکٹر جنرل احمد عزیز تارڑ کی ہدایت پر ٹاؤن پلاننگ زون ٹو کے عملے نے سبزہ زار سکیم میں غیر قانونی تعمیرات کے خلاف آپریشن کر کے دو تعمیرات مسمار کر دیں۔
پلاٹ نمبر 22 بلاک پی سبزہ زار پر قائم غیرقانونی عمارت اور پلاٹ نمبر 74 بلاک سی سبزہ زار پر قائم غیر قانونی عمارت مکمل طور پر مسمار کر دی گئیں

امریکی قانون سازوں نے 900 ارب ڈالر کے کورونا امدادی پیکیج پر اتفاق کر لیا، رواں ماہ کوویڈ 19 کے ضمن میں دیئے جانے والے امدادی پروگرام ختم ہو رہے تھے۔

سینیٹ کے اکثریتی لیڈر مچ مک کونل کا کہنا ہے کہ ڈیموکریٹس اور ری پبلکنز نے سمجھوتہ کر لیا ہے۔ پیکیج میں کاروبار اور بے روزگاری کے پروگراموں کے لیے بھی رقم شامل ہے۔ بے روزگاروں کو گیارہ ہفتوں تک تین سو ڈالر فی ہفتہ دیا جائے گا۔

امریکی ایوان نمائندگان اور سینیٹ کی منظوری کے بعد اسے قانونی شکل دینے کے لیے صدر ٹرمپ کے دستخط کی ضرورت ہو گی۔

شاہ محمود قریشی نے کہا ہے کہ یو اے ای ویزوں کی بندش عارضی ہے، جلد ختم ہو جائے گی، ابوظہبی، شارجہ، دبئی میں پاکستانیوں کی مشکلات پر بات کی۔ وزیر خارجہ شاہ محمود قریشی نے میڈیا سے گفتگو کرتے ہوئے کہا ہے کہ یو اے ای میں پاکستانی کمیونٹی کے مسائل کے حل کیلئے کوشاں ہیں، یو اے ای کے وزیر خارجہ سے ملاقات میں کشمیر سے متعلق آگاہ کیا، یو اے ای قیادت سے افغان امن عمل میں پاکستان کے کردار پر بات کی، اسرائیل کے بارے میں عرب امارات کا مؤقف سنا، اسرائیل سے تعلقات کے بارے میں واضح مؤقف پیش کیا، واضح کر دیا فلسطین اور مسئلہ کشمیر پر ہمارا مؤقف دنیا پر عیاں ہے۔

شاہ محمود قریشی کا کہنا تھا کہ اسرائیل کو تسلیم کرنے کیلئے ہم پر کوئی پریشر نہیں، مسئلہ فلسطین کے دیر پا حل تک پاکستان اسرائیل سے تعلقات قائم نہیں کرسکتا، ہم نے پاکستان کے مفادات کو پیش نظر رکھ کر فیصلے کرنے ہیں۔ انہوں نے کہا کہ بھارت دہشتگردی کو ہوا دے رہا ہے، بھارت پاکستان کیخلاف دیگر ممالک کی سر زمین کو استعمال کر رہا ہے۔

معاون خصوصی فردوس عاشق اعوان نے کہا ہے کہ وزیراعلیٰ پنجاب عثمان بزدار طبیعت ناسازی کے باعث گھر میں ہیں، کورونا سے متاثر شعبوں کیلئے منصوبہ سازی کی جا رہی ہے۔

ڈاکٹر فردوس عاشق اعوان نے پریس کانفرنس سے خطاب کرتے ہوئے کہا کہ تحریک انصاف کے اقتدار میں آنے کا مقصد پنجاب کو خود کفیل بنانا ہے، یہ ہماری حکومت کی اولین ترجیح ہے، صنعت پنجاب کی معیشت میں ریڑھ کی ہڈی کی حیثیت رکھتی ہے۔ چھوٹی صنعتوں کے فروغ کیلئے اقدامات کر رہے ہیں۔ تمام پالیسیوں کا مقصد زیادہ سے زیادہ سہولیات فراہم کرنا ہے۔

انہوں نے کہا کہ وزیراعلیٰ عثمان بزدار طبیعت ناسازی کے باعث گھر میں ہیں، کورونا سے متاثر شعبوں کیلئے منصوبہ سازی کی جا رہی ہے۔ صوبے میں 362 سہولت بازار قائم کئے ہیں، آئندہ 10 سال کی پلاننگ کر لی جس میں ہر سال 12 لاکھ افراد کے روزگار کو یقینی بنایا گیا ہے۔

وزیراعلیٰ پنجاب عثمان بزدار کی طبیعت ناساز ہوگئی، عثمان بزدار نے سرکاری مصروفیات منسوخ کر دیں، وزیراعلیٰ پنجاب کا کورونا ٹیسٹ لے لیا گیا۔
ذرائع سی ایم آفس کے مطابق وزیراعلی پنجاب کو دو روز سے تیز بخار اور کھانسی ہے۔ عثمان بزدار کو کورونا کی رپورٹ کا انتظار ہے۔ وزیراعلی پنجاب نے خود کو قرنطینہ کرلیا۔
یاد رہے 16 نومبر کو مراد علی شاہ کے کووِڈ 19 ٹیسٹ کا نتیجہ مثبت آیا تھا، انھیں بخار ہو گیا تھا جس پر انہوں نے کورونا ٹیسٹ کروایا تھا۔ مراد علی شاہ 17 روز کورونا میں مبتلا رہے، جس کے بعد ان کا تیسرا کورونا ٹیسٹ منفی آگیا۔

12 سال سے بستر پر موجود پاکستانی کے معروف ڈرامہ نویس اور اداکار شعیب ہاشمی کی طبیعت ناساز ہو گئی۔ اہلخانہ نے دعاؤں کی اپیل کی ہے۔ پاکستان کے معروف اداکار، ڈرامہ نویس اورپروفیسرشعیب ہاشمی کی طبیعت ناسازہوگئی۔ اس متعلق اہلیہ سلیمہ ہاشمی کا کہنا ہے کہ 12 سال قبل شعیب ہاشمی پرفالج کا حملہ ہوا تھا جسکے بعد سے شعیب ہاشمی بسترپرہیں، نہ بول سکتے ہیں اورنہ خود سے چل پھرسکتے ہیں۔ ان کی طبیعت میں کوئی مثبت تبدیلی نہیں آئی۔

اہلیہ نے شعیب ہاشمی کی صحت یابی کے لئے دعاوں کی اپیل کرتے ہوئے کہا کہ شعیب ہاشمی کی عمر 82 سال ہوگئی ہے اب طبیعت زیادہ ناساز رہتی ہے۔

شعیب ہاشمی نے 70 کی دہائی میں معروف ڈارمے لکھے اور ان میں کام کیا۔ شعیب ہاشمی کے معروف ڈراموں میں اکڑبکڑ، سچ گپ، ٹال مٹول شامل ہیں۔

شعیب ہاشمی 1990 میں نجی اخبارمیں ٹال مٹول کے نام سے کالم نگاری کرتے رہے۔ شعیب ہاشمی کو 1995میں حسن کارکردگی کا ایوارڈ ملا اورتمغہ امتیازسے بھی نوازاگیا۔

قومی شاہینوں نے نیپئر ڈیرے جما لیے، پاکستان اور نیوزی لینڈ کے درمیان تیسرا اور آخری ٹی 20 میچ کل ہو گا، میزبان کیویز کو سیریز میں دو صفر کی فیصلہ کن برتری حاصل ہے، کپتان شاداب خان کہتے ہیں خامیاں اور ناکامیاں بھلا کر میدان میں اتریں گے۔ آکلینڈ سے ہملٹن اور اب نیپئر کا سفر مکمل، قومی ٹی 20 اسکواڈ ہملٹن سے بذریعہ بس نیپئر پہنچا۔ انجری کے باعث سیریز سے آؤٹ بابر اعظم بھی ٹیم کے ہمراہ ہیں۔ سیریز کے تیسرے اور آخری ٹی 20 میچ کی تیاریاں مکمل ہیں، پلان بھی فائنل ہیں۔

منگل کو دونوں ٹیمیں پاکستانی وقت کے مطابق صبح گیارہ بجے ہی اِن ایکشن ہوں گی، ٹیم کے بڑوں نے سر جوڑ لیے، جوڑ توڑ، ایک یا دو تبدیلیوں کا امکان ہے۔ کپتان شاداب خان کہتے ہیں کہ بار بار کی غلطیوں سے سبق سیکھ کر کم بیک کریں گے، دوسرے میچ میں ہچکولے کھاتی پاکستانی بیٹنگ لائن کو محمد حفیظ نے سہارا دیا، پروفیسر کے ناٹ آؤٹ 99 رنز بھی بے کار گئے، نو وکٹ کی شکست کھانے والی ٹیم کو سیریز میں دو صفر کا خسارہ ہے۔

شاہد خاقان عباسی نے کہا ہے کہ اسلام آباد کا کورونا جب تک ختم نہیں ہوگا ملکی حالات ٹھیک نہیں ہوں گے، حکومت کی خواہش ہے پی ڈی ایم میں اختلافات پیدا ہوں۔ پاکستان مسلم لیگ نون کے رہنما و سابق وزیراعظم شاہد خاقان عباسی نے میڈیا سے گفتگو کرتے ہوئے کہا کہ جو آئین کیخلاف اور الیکشن چوری کرتا ہے ہم اس کیخلاف ہیں، فروری سے عوام کی تکالیف کم ہوں گی۔

شہباز گل نے کہا ہے کہ نا اہلی ہو یا کورونا پر سیاست، پیپلزپارٹی اور سندھ حکومت سب سے آگے ہے، بلاول اپنا لوٹا ہوا مال بچانے کی مہم پر ہیں۔ معاون خصوصی شہباز گل نے سماجی رابطے کی ویب سائٹ پر ٹویٹ کرتے ہوئے کہا کہ کراچی میں کورونا مثبت کیسز کی شرح سب سے زیادہ 21.80 فیصد ہے، حیدرآباد 19.03 فیصد مثبت کیسز کے ساتھ دوسرے نمبر پر ہے جبکہ ملک بھر میں مثبت کیسز کی شرح 7.78 فیصد ہے۔ انہوں نے کہا کہ دنیا کے عظیم وزیراعلیٰ جھوٹا استعفیٰ تھما کر امریکا میں چھٹیوں پر ہیں، سندھ کے عوام بے یارو مدد گار ہیں۔

ادھر معاون خصوصی وزیراعلیٰ پنجاب فردوس عاشق اعوان کا کہنا تھا کہ مولانا شیرازی کے بیان نے پی ڈی ایم کا پول کھول دیا، ‏حقائق چھپ نہیں سکتے، پی ڈی ایم لیڈر نے قوم کو مولانا ڈیزل کا اصل چہرہ دکھا دیا، جو اپنے ذاتی مفادات کیلئے گڈا اور گڈی کو استعمال کر رہا ہے، وہ اپنی بھاری قیمت وصول کرنے کیلئےعمران خان کے خلاف سازش کر رہا ہے۔

انہوں نے کہا کہ کشمیر، فلسطین اور فرقہ واریت بارے پالیسی پر پوری قوم متفق ہے، پی ڈی ایم ذاتی مفادات کی جنگ لڑ رہی ہے۔