All posts by News Editor

بیروت: لبنان کے شمالی علاقے عکار میں ایک آئل ٹینک سے پٹرول چوری کرنے کے دوران زوردار دھماکا ہوگیا جس کے نتیجے میں 20 افراد ہلاک اور 80 زخمی ہوگئے۔

عالمی خبر رساں ادارے کے مطابق لبنان کے شمالی علاقے میں فوج نے ایک خفیہ ٹینک کو ضبط کرلیا جس میں بڑی تعداد میں پٹرول ذخیرہ کیا گیا تھا۔ فوج نے قبضے کے بعد فوج نے پٹرول کو عوام میں تقسیم کرنا شروع کردیا جس کے دوران بھگدڑ مچ گئی۔

امدادی تنظیم ریڈ کراس اور سرکاری میڈیا کے مطابق 200 کے قریب افراد پٹرول جمع کر رہے تھے کہ اچانک زور دار دھماکا ہوگیا جس کے نتیجے میں 20 افراد ہلاک اور 80 زخمی ہوگئے۔ بری طرح جھلس جانے کے باعث لاشیں ناقابل شناخت ہوگئیں۔

سرکاری نیشنل نیوز ایجنسی نے بتایا کہ دھماکا پٹرول بھرنے کے لیے ٹینک کے ارد گرد جمع ہونے والے رہائشیوں کے درمیان جھڑپوں کے بعد ہوا۔ دوسری جانب فوج کی جانب سے جاری بیان میں کہا گیا ہے کہ جس وقت جھگڑا ہوا فوج وہاں سے جا چکی تھی۔

لبنان کے وزیر صحت حماد حسن نے کہا ہے کہ حکومت دھماکے سے زخمی ہونے والوں کے علاج کے اخراجات ادا کرے گی۔ لبنان کو اس وقت ایندھن کی شدید قلت کا سامنا ہے۔

ویسٹ انڈیز کے خلاف پہلے ٹیسٹ میچ میں پاکستان کی ٹیم دوسری اننگز میں 160 رنز پر 5 وکٹیں گنوا بیٹھی۔

کپتان بابر اعظم 7 چوکوں کی مدد سے 54 اور فہیم اشرف 12 رنز کے اسکور کے ساتھ ناٹ آؤٹ ہیں۔

کنگسٹن، جمیکا میں کھیلے جا رہے سیریز کے پہلے ٹیسٹ میچ کے تیسرے دن ویسٹ انڈیز نے 251 رنز 8 کھلاڑی آؤٹ سے اپنی پہلی نامکمل اننگز کا دوبارہ آغاز کیا تو جوشوا ڈی سلوا اور جومیل ویریکن وکٹ پر موجود تھے۔

پاکستان کو ویسٹ انڈین ٹیم کو آؤٹ کرنے میں زیادہ دیر نہ لگی اور میزبان ٹیم اپنے گزشتہ دن کے اسکور میں مزید 2 رنز کے اضافے سے پویلین لوٹ گئی۔

شاہین شاہ آفریدی نے دن کے پہلے ہی اوور میں ویریکن کو چلتا کیا اور پھر اپنے اگلے ہی اوور میں جوشوا ڈی سلوا کو آؤٹ کر کے ویسٹ انڈیز کے بڑی لیڈ کے حصول کے خواب پر پانی پھیر دیا۔

ویسٹ انڈیز کی پوری ٹیم پہلی اننگز میں 253 رنز بنا کر آؤٹ ہو گئی اور 36 رنز کی برتری حاصل کی۔

ویسٹ انڈیز کی جانب سے کپتان کریگ بریتھ ویٹ نے 97 رنز کی شاندار اننگز کھیلی جبکہ جیسن ہولڈر نے 58 رنز بنائے۔

پاکستان کی جانب سے شاہین شاہ آفریدی چار وکٹوں کے ساتھ سب سے کامیاب باؤلر رہے جبکہ محمد عباس نے تین وکٹیں اپنے نام کیں۔

پاکستان نے 36 رنز کے خسارے میں جانے کے بعد اننگز کا آغاز کیا تو اوپنر عمران بٹ اس اننگز میں بھی ناکام رہے اور کھاتا کھولے بغیر ہی چلتے بنے۔

اظہر علی نے عابد علی کے ساتھ مل کر 55 رنز کی شراکت قائم کی لیکن اس مرحلے پر ٹیم کے سب سے تجربہ کار بلے باز 23 رنز بنانے کے بعد کیماروچ کو وکٹ دے بیٹھے۔

عابد علی نے 34 رنز کی اننگز کھیلی لیکن جیڈن سیلز نے ان کا کام تمام کردیا لیکن پاکستان کو اصل دھچکا اس وقت لگا جب گزشتہ اننگز میں نصف سنچری بنانے والے فواد عالم بغیر کوئی رن بنائے سیلز کی دوسری وکٹ بن گئے۔

65 رنز پر چار وکٹیں گرنے کے بعد بابر اعظم کا ساتھ دینے ان کے نائب محمد رضوان آئے اور دونوں کھلاڑیوں نے ذمے دارانہ بیٹنگ کرتے ہوئے 50 رنز سے زائد کی شراکت قائم کی۔

اسکور 117 تک پہنچا ہی تھا کہ میچ میں بارش نے مداخلت کردی جس کی وجہ سے میچ کو روکنا پڑا۔

پاکستان نے اب تک 4 وکٹوں کے نقصان پر 117 رنز بنائے ہیں، بابر 28 اور رضوان 26 رنز پر کھیل رہے ہیں جبکہ پاکستان کو دوسری اننگز میں 81 رنز کی برتری حاصل ہے۔

ویسٹ انڈیز کی جانب سے کیماروچ اور سیلز نے دو، دو وکٹیں حاصل کیں۔

یاد رہے کہ پاکستان کی ٹیم پہلی اننگز میں 217 رنز بنا کر آؤٹ ہو گئی تھی۔

کیریبیئن ملک ہیٹی میں 7.2 شدت کے زلزلے نے تباہی مچادی جس کے نتیجے میں 304 افراد ہلاک ہوئے جبکہ مکانات، ہوٹلز اور اسکولز سمیت متعدد عمارتیں ملبے کا ڈھیر بن گئیں۔

برطانوی خبررساں ادارے رائٹرز کی رپورٹ کے مطابق ہیٹی کی سول پروٹیکشن سروس کا کہنا تھا کہ ابتدائی اعداد و شمار کے مطابق زلزلے کے نتیجے میں اب تک 304 افراد ہلاک جبکہ 1800 سے زائد زخمی ہوچکے ہیں۔

امریکی جیولوجیکل سروے کے مطابق زلزلے کا مرکز دارالحکومت پورٹ آ پرنس کے مغرب میں 150 کلومیٹر دور تھا جس کی گہرائی 10 کلومیٹر تھی اور زلزلے کے بعد سلسلہ وار آفٹر شاکس بھی آتے رہے۔

زلزلہ، مقامی وقت کے مطابق صبح ساڑھے 8 بجے آیا جسے دارالحکومت میں بھی محسوس کیا گیا تاہم وہاں اس سے کوئی بھاری نقصان نہیں ہوا۔

بندرگاہ، ایئرپورٹ اور ٹیلی کام انفرا اسٹرکچر بڑے نقصان سے محفوظ رہے—تصویر: اے پی
زلزلے کے نتیجے میں کم از کم 949 مکانات، 7 گرجا گھر، 2 ہوٹلز اور 3 اسکولز تباہ ہوئے جبکہ دیگر 723 مکانات، ایک جیل، 3 طبی مراکز اور 7 اسکولوں کو نقصان پہنچا البتہ بندرگاہ، ایئرپورٹ اور ٹیلی کام انفرا اسٹرکچر بڑے نقصان سے محفوظ رہے۔

ہیٹی کے نئے وزیر اعظم ایریئل ہنری نے ٹوئٹر پر اپنے پیغام میں کہا کہ خطرناک زلزلے سے ملک کے مختلف علاقوں میں متعدد ہلاکتیں ہوئیں اور بہت زیادہ نقصان پہنچا۔

ان کا کہنا تھا کہ وہ متاثرین کی مدد کے لیے تمام سرکاری وسائل بروئے کار لائیں گے اور اس صورتحال کو ڈرامائی قررا دیتے ہوئے قوم سے یکجہتی اور اتحاد کا مظاہرہ کرنے کی اپیل کی۔

وزیر اعظم نے ملک میں ایک ماہ کی ایمرجنسی کے نفاذ کا اعلان کردیا اور کہا کہ وہ نقصانات کے تعین تک عالمی امداد کی اپیل نہیں کریں گے۔

ان کا کہنا تھا کہ ساحلی پٹی پر واقع کچھ مقامات بالکل تباہ ہو چکے ہیں اور حکومت ان کی بحالی کے لیے منصوبہ تیار کر رہی ہے۔

قبل ازیں ہیٹی کے ڈائریکٹر آف سول پروٹیکشن جیری چینڈلر نے خبر رساں ایجنسی اے پی کو بتایا تھا کہ زلزلے سے اب تک 29 افراد ہلاک ہو چکے ہیں اور مزید نقصان کا پتا لگانے کے لیے امدادی ٹیمیں مختلف علاقوں میں بھیجی جائیں گی۔

وائٹ ہاؤس سے جاری بیان کے مطابق امریکی صدر جو بائیڈن اور ان کی نائب کمالا ہیرس کو ہفتے کو ہیٹی میں زلزلے کے حوالے سے بریفنگ دی گئی اور انہوں نے ہیٹی کو امداد اور مکمل تعاون کی یقین دہانی کرائی جبکہ چلی اور ارجنٹینا سمیت مختلف ممالک نے بھی امداد کی پیشکش کی۔

امریکی جیولوجیکل سروے کے مطابق زلزلے سے بڑے پیمانے پر ہلاکتوں اور تباہی کا خدشہ ہے۔

یورپی مڈیٹرینین سیسمولوجیکل سینٹر کے مطابق زلزلہ 7.6 شدت کا تھا جبکہ کیوبا کے زلزلہ مرکز کے مطابق اس کی شدت 7.4 تھی۔

امریکی جیولوجیکل سروے نے زلزلے کے بعد سونامی کی وارننگ بھی جاری کرتے ہوئے کہا تھا کہ سونامی میں تین میٹر اونچی لہریں بلند ہو سکتی ہیں تاہم بعدازاں انہوں نے یہ وارننگ واپس لے لی۔

ہیٹی کے ساتھ ساتھ پڑوسی کیریبیئن ممالک میں بھی زلزلے کے جھٹکے محسوس کیے گئے۔

زلزلے کے مرکز کے قریب رہائش پذیر کرسٹیلا نے اے ایف پی سے گفتگو کرتے ہوئے کہا کہ لاتعداد گھر تباہ ہو گئے، لوگوں کی ہلاکت بھی ہوئی ہے اور کچھ لوگ ہسپتال میں موجود ہیں۔

ان کا کہنا تھا کہ زلزلہ آتے ہی لوگ گلیوں اور سڑکوں پر باہر نکل آئے اور بڑے پیمانے پر عمارتیں تباہ ہو گئی ہیں۔

یہ زلزلہ ایک ایسے موقع پر آیا ہے جب ایک ماہ قبل ہی ملک کے صدر جووینل موئز کو قتل کردیا گیا تھا جبکہ غربت کا شکار ملک کو معاشی مسائل کے ساتھ ساتھ کووڈ-19 کے بحران سے نمٹنے کا چیلنج بھی درپیش ہے۔

اس سے قبل ملک میں 2018 میں 5.9 شدت کا زلزلہ آیا تھا جس میں ایک درجن سے زائد افراد ہلاک ہو گئے تھے لیکن 2010 میں ملک میں آنے والے تباہ کن زلزلے کے نتیجے میں 2 لاکھ افراد لقمہ اجل بن گئے تھے۔

اس زلزلے کے بعد ملک کا انفرا اسٹرکچر بری طرح متاثر ہوا تھا اور وہ اب تک اس زلزلے کے اثرات سے نہیں نکل سکا جبکہ لاکھوں افراد بے گھر بھی ہو گئے تھے۔

ترکی میں رواں ماہ بحیرہ اسود کے علاقوں میں آنے والے بدترین سیلاب میں کئی علاقے تباہ ہوگئے اور 58 افراد جان کی بازی ہار گئے۔

خبر رساں ایجنسی رائٹرز کے مطابق ترک حکام دو ہفتوں تک جنوبی ساحلی علاقوں میں جنگل کی آگ پر قابو پانے میں کامیاب ہوئے ہی تھے کہ سیلاب نے شمالی صوبوں میں تباہی مچا دی۔

ڈیزاسٹر اینڈ ایمرجنسی مینجمنٹ ڈائریکٹوریٹ نے بتایا کہ صوبہ کستامونو میں سیلاب کے نتیجے میں 48 افراد ہلاک ہوئے جبکہ مزید 9 افراد سینوپ اور ایک بارٹن میں لقمہ اجل بن گیا۔

کستامونو صوبے کے بوزکرٹ قصبے میں بڑے پیمانے پر نقصان ہوا اور ایمرجنسی کارکن لاپتا افراد کو منہدم عمارتوں میں تلاش کر رہے ہیں۔

سیلاب میں درجنوں کاریں اور ملبے کے ڈھیر سڑکوں پر آ گئے جبکہ عمارتیں اور پل تباہ جبکہ سڑکیں بند ہو گئی اور سیکڑوں دیہات کی بجلی منقطع ہو گئی۔

اے ایف اے ڈی نے بتایا کہ 2 ہزار سے زائد افراد کو متاثرہ علاقوں سے نکالا گیا اور اس سلسلے میں کچھ لوگوں کو نکلانے کے لیے ہیلی کاپٹروں اور کشتیوں کی مدد بھی لی گئی۔

وزیر داخلہ سلیمان سوئلو نے بارٹن، کستامونو اور سینوپ صوبوں میں ہوئے نقصان کا سروے کرنے کے بعد جمعرات کو صحافیوں سے گفتگو کرتے ہوئے کہا کہ یہ سیلاب سے آنے والی بدترین تباہی ہے۔

طالبان نے افغانستان کے دارالحکومت کابل میں داخلے سے قبل افغان حکومت کے ساتھ ساتھ اتحادی افواج کے لیے بھی کام کرنے والوں کے لیے عام معافی کا اعلان کرتے ہوئے کہا ہے کہ عوام کے مال و جان کی حفاظت امارات اسلامی افغانستان کی بنیادی ذمے داری ہے۔

الجزیرہ کی رپورٹ کے مطابق دوحا میں طالبان کے ترجمان سہیل شاہین نے کہا کہ جنگجو دارالحکومت کے مضافات میں موجود ہیں اور مذاکرات ہو رہے ہیں۔

انہوں نے کہا کہ ‘ہماری جنگجو کابل میں داخل نہیں ہوئے اور ہم نے ابھی بیان بھی جاری کردیا ہے کہ ہماری فورسز کابل میں داخل نہیں ہوں گی’۔

سہیل شاہین نے کہا کہ ‘ہم دارالحکومت اور پرامن انتقال اقتدار کے لیے مذاکرات اور انتظار کر رہےہیں’۔

طالبان کے ترجمان سہیل شاہین نے اس سےقبل سماجی رابطوں کی ویب سائٹ ٹوئٹر پر اپنے پیغام میں کہا کہ مجاہدین خزانہ، عوامی سہولیات، سرکاری دفاتر اور آلات، پارکس، سڑکوں اور پل وغیرہ پر خاص توجہ دیں گے۔

ان کا کہنا تھا کہ یہ عوام کی املاک ہیں اور اس سلسلے میں کسی بھی قسم کی ذاتی مداخلت یا غفلت ہرگز برداشت نہیں کی جائے گی اور اس کا انتہائی سختی کے ساتھ تحفظ کیا جائے گا۔

ان کا کہنا تھا کہ امارات اسلامی ان تمام افراد کے لیے اپنے دروازے کھولتی ہے جنہوں نے ماضی میں حملہ آوروں کے لیے کام کیا اور ان کی مدد کی یا جو ابھی بھی کرپٹ افغان حکومت کے ساتھ کھڑے ہیں اور ہم ان کے لیے عام معافی کا اعلان کرتے ہیں اور انہیں دعوت دیتے ہیں کہ وہ قوم اور ملک کی خدمت کریں۔

طالبان کے ترجمان نے کہا کہ حال ہی میں کابل انتظامیہ نے بے بنیاد پروپیگنڈا شروع کیا ہے کہ امارات اسلامی کے جنگجو لوگوں کو اپنی بیٹیوں سے شادی پر مجبور کررہے ہیں یا مجاہدین سے ان کی بیٹیوں کی شادی کے لیے دباؤ ڈال رہے ہیں، وہ کبھی کہتے ہیں کہ طالبان عوام اور قیدیوں کو قتل کررہے ہیں لیکن یہ تمام تر الزامات بے بنیاد ہیں۔

بعد ازاں انہوں نے مزید ٹوئٹس کرتے ہوئے کہا کہ امارات اسلامی افغانستان، کسی کی نجی املاک (گاڑی، زمین، گھر، مارکیٹوں یا دکانوں) میں دلچسپی نہیں رکھتی بلکہ عوام کے مال و جان کی حفاظت ہماری بنیادی ذمے داری ہے۔

انہوں نے سابقہ مؤقف کو ایک مرتبہ پھر دہراتے ہوئے باور کرایا کہ ایسے تمام تر دعوے بے بنیاد ہیں کہ امارات اسلامی افغانستان، لوگوں کو اپنی بیٹیوں کی شادی مجاہدین سے کرنے پر مجبور کررہے ہیں اور یہ زہریلا پروپیگنڈا ہے۔

واضح رہے کہ گزشتہ ایک ہفتے کے دوران انتہائی تیزی سے پیش قدمی کرنے والے طالبان آج افغانستان کے دارالحکومت کابل کے مضافات میں داخل ہوگئے ہیں۔

تاہم طالبان کا کہنا تھا کہ انہوں نے اپنے جنگجوؤں کو کابل کے دروازے پار کر کے طاقت کے ذریعے شہر کا کنٹرول نہ حاصل کرنے کی ہدایت کی ہے۔

ان کا کہنا تھا کہ ‘کابل کے شہریوں کی زندگی، املاک، عزت پر سمجھوتہ کیے بغیر اقتدار کی محفوظ منتقلی کا عمل یقینی بنانے کے لیے مذاکرات جاری ہیں’۔

اس سے قبل طالبان نے مزاحمت اور لڑائی کے بغیر افغانستان کے شہر جلال آباد پر قبضہ کرلیا تھا جس کے بعد افغان حکومت کا کنٹرول دارالحکومت کابل تک ہی محدود ہوگیا تھا جبکہ اس سے پہلے وہ مزار شریف پر بھی بغیر کسی مزاحمت کے قابض ہو گئے تھے۔

طالبان کی پیش قدمی
واضح رہے کہ افغانستان میں امریکا نے 2001 میں پہلی مرتبہ طالبان حکومت کے خلاف حملے شروع کیے تھے، جو نائن الیون حملوں کا نتیجہ تھا۔

تاہم 2 دہائیوں سے جاری جنگ کے خاتمے کے لیے امریکا نے طالبان کے ساتھ مذاکرات کے بعد گزشتہ برس فروری کو امن معاہدہ کیا تھا جس کی رو سے غیر ملکی افواج کے انخلا اور افغان حکومت کی طالبان کے ساتھ بات چیت پر اتفاق ہوا تھا۔

افغانستان میں جاری لڑائی میں رواں برس مئی سے ڈرامائی تبدیلی آئی جب امریکا کی سربراہی میں افغانستان میں موجود غیر ملکی افواج کے انخلا کی تاریخ کا اعلان کیا گیا تھا اور رواں مہینے کے اختتام سے قبل انخلا مکمل ہوجائے گا۔

جس کے پیشِ نظر طالبان کی جانب سے پہلے اہم سرحدی علاقوں پر قبضہ کیا گیا اور پھر برق رفتاری سے صوبائی دارالحکومتوں پر قبضہ کرتے چلے گئے۔

چند روز قبل ایک امریکی رپورٹ میں پیش گوئی کی گئی تھی کہ طالبان 30 روز میں کابل پر قبضہ کرسکتے ہیں۔

طالبان جنگجووں کو افغانستان کے صدر اشرف غنی اور ان کے قریبی ساتھی کے ملک چھوڑ کر جانے کے بعد دارالحکومت کابل میں داخل ہونے کی اجازت دے دی گئی جبکہ افغان اور غیر ملکی شہری انخلا میں مصروف ہیں۔

طالبان کے ترجمان ذبیح اللہ نے سماجی رابطےکی ویب سائٹ ٹوئٹر پر اپنے بیان میں جنگجووں کو دارالحکومت کابل میں داخل ہونے کے احکامات جاری کردیے۔

غیرملکی خبر ایجنسی اے پی کو دو ذرائع نے شناخت ظاہر نہ کرنے کی شرط پر بتایا کہ اشرف غنی جا ہوچکے ہیں۔

افغان مصالحتی کونسل کے سربراہ عبداللہ عبداللہ آن لائن ویڈیو بیان میں اشرف غنی کے ملک چھوڑنے کی تصدیق کردی۔

انہوں نے کہا کہ ‘وہ مشکل وقت میں افغانستان چھوڑ گئے ہیں، اللہ ان سے پوچھے گا’۔

آج ہونے والی اہم پیش رفت

اشرف غنی افغانستان چھوڑ گئے

طالبان کا کہنا ہے کہ وہ کابل پر بزور طاقت قبضہ نہیں کریں گے۔

طالبان مذاکرات کار اقتدار کی منتقلی پر بات چیت کیلئے صدارتی محل روانہ

انخلا کے لیے امریکی سفارتخانے میں ہیلی کاپٹروں کی آمد

طالبان کا طور خم بارڈر پر قبضہ

طالبان کا جلال آباد پر قبضہ

خبرایجنسی رائٹرز نے وزارت داخلہ کے سینئر ذرائع کے حوالے سے کہا کہ ‘اشرف غنی دارالحکومت کابل سے تاجکستان جا چکے ہیں’ تاہم ان خبروں کی تصدیق نہیں ہوئی کہ وہ اپنے عہدے سے مستعفی ہوچکے ہیں۔

عبداللہ عبداللہ نے اپنے فیس بک پیج پر جاری ویڈیو پیغام میں افغان سیکیورٹی فورسز سے اپیل کی کہ وہ ملک میں امن برقرار رکھنے کے لیے اپنا کردار ادا کریں۔

انہوں نے طالبان سے بھی اپیل کرتے ہوئے کہا کہ کسی نقصان نہ پہنچائیں یا ایسا عمل نہ کریں جس سے کابل میں افراتفری ہو۔

ان کا کہنا تھا کہ اشرف غنی مشکل وقت میں ملک کو چھوڑ کر گئے ہیں، جس پر انہیں تاریخ میں یاد رکھا جائے گا۔

افغان صدر کے دفتر نے رابطہ کرنے پر بتایا کہ ‘سیکیورٹی وجوہات کی بنا پر اشرف غنی کی نقل و حرکت کے بارے میں کچھ نہیں کہا جاسکتا’۔

اشرف غنی، ان کے قریبی ساتھی اور غیرملکیوں نے افغانستان کو تبدیل کرنے کے مغرب کے 20 سالہ تجربے کی ناکامی کے اشاروں کے ساتھ ہی ملک سے چلے جانے کے لیے دوڑ لگا دی ہے۔

قبل ازیں غیرملکی خبر ایجنسیوں نے رپورٹ کیا تھا کہ طالبان جنگجو کابل کے اطراف میں پہنچ گئے ہیں اور پریشان افغان حکومت ایک عبوری حکومت کے قیام کی کوشش کررہی ہے لیکن اس کے پاس محدود اختیار باقی رہ گیا ہے۔

دوسری جانب شہریوں اس خوف کے پیشِ نظر کہ طالبان دوبارہ جابرانہ نظام مسلط کردیں گے جس میں خواتین کے حقوق سلب ہوں گے، ملک چھوڑنے کی کوششیں کررہےہیں اور مشینوں سے رقم نکالنے کے لیے طویل قطاریں لگ گئیں۔

دوسری جانب طالبان کا کہنا تھا کہ وہ اقتدار کی پر امن منتقلی کے منتظر ہیں اور اس عزم کا اظہار کیا کہ وہ دارالحکومت کابل پر بزور طاقت قبضہ نہیں کریں گے۔

ایک آن لائن بیان میں طالبان کا کہنا تھا کہ انہوں نے اپنے جنگجوؤں کو کابل کے دروازے پار کر کے طاقت کے ذریعے شہر کا کنٹرول نہ حاصل کرنے کی ہدایت کی ہے۔

ان کا کہنا تھا کہ ‘کابل کے شہریوں کی زندگی، املاک، عزت پر سمجھوتہ کیے بغیر اقتدار کی محفوظ منتقلی کا عمل یقینی بنانے کے لیے مذاکرات جاری ہیں’۔

طالبان ترجمان نے قطر نشریاتی ادارے الجزیرہ سے بات کرتے ہوئے وہ کابل شہر کی پر امن منتقلی کا انتظار کررہے ہیں تاہم انہوں نے جنگجوؤں اور حکومت کے درمیان ہونے والی بات چیت کی تفصیلات بتانے سے انکار کیا۔

البتہ معاہدے کی تفصیلات کے اصرار پر سہیل شاہین نے اعتراف کیا کہ وہ مرکزی حکومت کے غیر مشروط ہتھیار ڈالنے کا مطالبہ کررہے ہیں۔

ایک طالبان عہدیدار نے خبررساں ادارے سے بات کرتے ہوئے بتایا کہ گروپ اقتدار کے حصول میں کوئی جانی نقصان نہیں چاہتا لیکن اس نے جنگ بندی کا اعلان بھی نہیں کیا ہے۔

دوسری جانب طالبان مذاکرات کار اقتدار کی پر امن منتقلی کے لیے بات چیت کرنے افغان صدارتی محل روانہ ہوئے، حکام کا کہنا تھا کہ یہ واضح نہیں کہ اقتدار کی منتقلی کب ہوگی۔

دوسری جانب ایک ویڈیو بیان میں افغان قائم مقام وزیر داخلہ نے کہا کہ کابل پر حملہ نہیں کیا جائے گا اور اقتدار کی منتقلی پر امن ماحول میں ہوگی۔

طالبان کا طور خم بارڈر پر بھی قبضہ
قبل ازیں اتوار کے روز ہی طالبان نے افغان حکام کے زیر انتظام آخری زمینی گزرگاہ طورخم بارڈر پر بھی قبضہ کرلیا جس کے بعد افغانستان سے باہر جانے کا واحد ذریعہ کابل ایئرپورٹ ہی بچا ہے جو اشرف غنی حکومت کے زیر انتظام ہے۔

امریکی صدر کی مزید ایک ہزار فوجی بھیجنے کی منظوری
امریکی صدر جوبائیڈن نے افغانستان میں موجود امریکیوں کے محفوظ انخلا کے لیے مزید ایک ہزار اہلکاروں کی تعیناتی کی اجازت دے دی جس کے بعد محفوظ انخلا کے لیے مقرر کیے امریکی فوجیوں کی تعداد 5 ہزار ہوجائے گی۔

خبررساں ادارے اے پی کی رپورٹ کے مطابق امریکی فوجی اہلکار 2 دہائی سے جاری جنگ کے دوران غیر ملکی افواج کے ساتھ کام کرنے والے افغانوں کے انخلا میں بھی مدد کریں گے۔

آخری لمحات میں ہزاروں امریکی فوجیوں کی دوبارہ تعیناتی افغانستان کی گھمبیر سیکیورٹی صورتحال ظاہر کررہے ہے۔

خیال رہے کہ گزشتہ ہفتے ہی ایک امریکی خفیہ رپورٹ میں کہا گیا تھا کہ کابل پر قبضے میں 3 ماہ کا عرصے لگ سکتا ہے۔

ایک امریکی عہدیدار نے بتایا کہ امریکی ٹیم کے اہم ترین اراکین کابل ایئرپورٹس سے کام کررہے ہیں جبکہ نیٹو حکام کا کہنا تھا کہ یورپی عملے کے اراکین کو دارالحکومت میں نامعلوم محفوظ مقام پر منتقل کردیا گیا ہے۔

قبل ازیں امریکی شہریوں کے انخلا کے لیے ایک ہزار امریکی فوجی رکھنے کا اعلان کیا گیا تھا تاہم حکام کو یہ تعداد ناکافی معلوم ہوئی جس کے بعد مزید 3 ہزار فوجی بھیجنے کا فیصلہ کیا گیا اور اتوار کے روز اس میں ایک ہزار اہلکاروں کا اضافہ کرنے کا اعلان سامنے آیا۔

طالبان کا بغیر مزاحمت جلال آباد پر قبضہ
افغان صدارتی محل کی ایک ٹوئٹ میں بتایا گیا کہ کابل کے اطراف میں متعدد مقامات پر فائرنگ کی آوازیں سنی گئیں لیکن سیکیورٹی فورسز بین الاقوامی شراکت داروں کے ساتھ شہر کا کنٹرول سنبھالے ہوئے ہیں۔

اس سے قبل طالبان نے مزاحمت اور لڑائی کے بغیر افغانستان کےشہر جلال آباد پر قبضہ کرلیا تھا جس کے بعد افغان حکومت کا کنٹرول دارالحکومت کابل تک ہی محدود ہوگیا تھا۔

خبررساں ادارے رائٹرز کی رپورٹ کے مطابق جلال آباد کے سقوط نے طالبان کو اس سڑک کا کنٹرول بھی دے دیا جو پاکستان کے شہر پشاور کو افغانستان سے ملاتی ہے اور ملک کی اہم ترین شاہراہوں میں سے ایک ہے۔

اس سے قبل طالبان نے ملک کے چوتھے بڑے شہر مزار شریف پر بھی قبضہ کرلیا تھا جس کا دفاع 2 سابق وار لارڈز نے کرنے کا وعدہ کیا تھا، یوں طالبان کو افغانستان کے پورے شمالی حصے پر قبضہ حاصل ہوگیا۔

جلال آباد میں ایک افغان عہدیدار نے بتایا کہ شہر میں کوئی لڑائی نہیں ہورہی کیوں کہ گورنر نے طالبان کے سامنے ہتھیار ڈال دیے ہیں اور انہیں راستہ دینا شہریوں کی زندگی بچانے کا واحد راستہ تھا۔

ایک دوسرے سیکیورٹی عہدیدار نے کہا کہ طالبان نے حکومتی عہدیداران اور سیکیورٹی فورسز کو جلال آباد سے نکلنے کی صورت میں محفوظ راستہ دینے پر رضامندی ظاہر کی ہے۔

دوسری جانب ہفتہ کو طالبان جنگجو مزار شریف میں بھی مزاحمت کے بغیر داخل ہوگئے کیوں کہ سیکیورٹی فورسز شاہراہ سے پڑوسی ملک ازبکستان کی جانب بھاگ گئیں۔

ایسے میں حکام نے شناخت پوشیدہ رکھنے کی شرط پر بتایا کہ افغان صدر کے 2 اتحادی وار لارڈز عطا محمد نور اور عبدالرشید دوستم ازبکستان فرار ہوگئے۔

اس سلسلے میں سوشل میڈیا پر وائرل ہونے والی غیر مصدقہ ویڈیو میں دیکھا جاسکتا ہے کہ افغان فوج کی گاڑیاں اور یونیفارم میں ملبوس آدمی افغان قصبے حیرتان اور ازبکستان کے درمیان لوہے کے پل پر جمع ہورہے ہیں۔

دوسری جانب عسکریت پسندوں نے اتوار کی صبح تصاویر اور ویڈیوز پوسٹ کیں جن میں انہیں صوبہ ننگر ہار کے دارالحکومت جلال آباد میں گورنر کے دفتر میں دیکھا جاسکتا ہے۔

ادھر کابل میں امریکی سفارت خانے کے عملے کو حکم دیا جاچکا ہے کہ وہ حساس مواد کو جلانا شروع کردیں جبکہ برطانیہ، جرمنی، ڈنمارک اور اسپین سمیت یورپی ممالک اپنے متعلقہ سفارت خانوں سے اہلکاروں کو واپس بلانے کا اعلان کر چکے ہیں۔

کابل کے باشندوں کے ساتھ ساتھ دارالحکومت میں پناہ لینے والے ہزاروں افراد بھی خوف اور عدم تحفظ کے احساس کا شکار ہیں۔

طالبان کی پیش قدمی
واضح رہے کہ افغانستان میں امریکا نے 2001 میں پہلی مرتبہ طالبان حکومت کے خلاف حملے شروع کیے تھے، جو نائن الیون حملوں کا نتیجہ تھا۔

تاہم 2 دہائیوں سے جاری جنگ کے خاتمے کے لیے امریکا نے طالبان کے ساتھ مذاکرات کے بعد گزشتہ برس فروری کو امن معاہدہ کیا تھا جس کی رو سے غیر ملکی افواج کے انخلا اور افغان حکومت کی طالبان کے ساتھ بات چیت پر اتفاق ہوا تھا۔

افغانستان میں جاری لڑائی میں رواں برس مئی سے ڈرامائی تبدیلی آئی جب امریکا کی سربراہی میں افغانستان میں موجود غیر ملکی افواج کے انخلا کی تاریخ کا اعلان کیا گیا تھا اور رواں مہینے کے اختتام سے قبل انخلا مکمل ہوجائے گا۔

جس کے پیشِ نظر طالبان کی جانب سے پہلے اہم سرحدی علاقوں پر قبضہ کیا گیا اور پھر برق رفتاری سے صوبائی دارالحکومتوں پر قبضہ کرتے چلے گئے۔

چند روز قبل ایک امریکی رپورٹ میں پیش گوئی کی گئی تھی کہ طالبان 90 روز میں کابل پر قبضہ کرسکتے ہیں۔

اسلام آباد: وزیراعظم نے افغانستان کی صورتحال پر قومی سلامتی کونسل کا اجلاس کل طلب کرلیا۔

ذرائع کے مطابق وزیراعظم عمران خان نے قومی سلامتی کونسل کا اجلاس کل طلب کرلیا جس میں وفاقی وزرا سمیت عسکری حکام بھی شرکت کریں گے، ذرائع کا کہنا ہے کہ اجلاس میں افغانستان کی صورتحال پر غور کیا جائے گا۔

واضح رہے کہ طالبان جلال آباد اور مزار شریف کو فتح کرنے کے بعد کابل کے مضافات میں داخل ہوگئے جب کہ ترجمان طالبان نے دارالحکومت میں پُرامن طریقے سے داخل ہونے اور عام معافی کا اعلان کیا ہے دوسری جانب صدارتی محل میں اقتدار کی منتقلی اور عبوری حکومت کے قیام پر مذاکرات جاری ہیں جس میں اشرف غنی حکومت چھوڑنے کو تیار ہوگئے ہیں۔
اس کے علاوہ چمن سے متصل باب دوستی گیٹ کا کنٹرول سنبھالنے کے بعد اب طالبان نے طور خم بارڈر پر بھی مکمل کنٹرول حاصل کرلیا ہے اور پولیس کا کہنا ہے کہ طالبان نے کنٹرول حاصل کرنے کے بعد بارڈر بند کر دیا ہے۔

ترجمان دفتر خارجہ زاہد حفیظ چوہدری نے کہا ہے کہ پاکستان، افغانستان میں وقوع پزیر صورتحال پر گہری نظر رکھے ہوئے ہے اور سفارتی برادری، میڈیا اور دیگر افراد کے ویزا یا ملک آمد کے لیے سہولت فراہم کررہا ہے۔

طالبان کی برق رفتار پیش رفت کے تناظر میں ترجمان دفتر خارجہ نے ایک بیان جاری کرتے ہوئے کہا کہ کابل میں پاکستانی سفارت خانہ پاکستانیوں کو ضروری معاونت اور مدد فراہم کررہا ہے جبکہ افغان شہریوں، سفارتکاروں اور عالمی برادری کو قونصلر خدمات بھی فراہم کی جارہی ہیں۔

ان کا مزید کہنا تھا کہ کابل میں پاکستانی سفارت خانہ، پی آئی اے پروازوں کے لیے کوآرڈینیشن بھی کررہا ہے۔

بیان میں بتایا گیا کہ صورتحال کے پیش نظر وزارت داخلہ میں اعلیٰ سطح کا بین الوزارتی سیل قائم کردیا گیا ہے جس کا مقصد سفارتی عملے، اقوام متحدہ کے اداروں، عالمی تنظیموں، میڈیا اور دیگر افراد کو ویزا اور آمد سے متعلق سہولیات فراہم کرنا ہے۔

انہوں نے ایک مرتبہ پھر اس عزم کو دہرایا کہ سیاسی تصفیے کے لیے کی جانے والی کوششوں کی پاکستان حمایت جاری رکھے گا۔

ساتھ ہی اس اُمید کا اظہار بھی کیا کہ تمام افغان فریقین داخلی سیاسی بحران حل کرنے کے لیے مل کر کام کریں گے۔

وفاقی وزیر اطلاعات و نشریات فواد چوہدری نےٹوئٹ میں کہا کہ ‘کابل میں پاکستان پریس سیکشن کو بین الاقوامی میڈیا کی جانب سے ویزے کے لیے سیکڑوں درخواستیں موصول ہوئی ہیں’۔

انہوں نے کہا کہ یہ درخواستیں ‘ان کی کابل سے انخلا میں سہولت دینے کے لیے کی گئی ہیں، بین الاقوامی میڈیا کو سہولت دینے کے لیے ایک خصوصی سیل بھی تشکیل دیا گیا ہے’۔

فواد چوہدری نے کہا کہ ‘افغانستان میں امن و استحکام کے لیے ہماری دعائیں ہیں’۔

خیال رہے کہ امریکی حکام کی پیش گوئی کے برعکس طالبان محض چند روز میں افغانستان کے تمام اہم شہروں اور صوبائی دارالحکومتوں پر قبضہ کرنے کے بعد کابل پہنچ گئے۔

قبل ازیں افغان فوج کی جانب سے کسی قسم کی مزاحمت کے بغیر وہ جلال آباد اور مزار شریف پر قبضہ کرچکے تھے۔

یہاں یہ بات مدِ نظر رہے کہ ایک ماہ قبل طالبان نے پاکستان اور افغانستان کے مابین چمن-اسپن بولدک سرحد پر قبضہ کیا تھا۔

طالبان کی پیش قدمی
واضح رہے کہ افغانستان میں امریکا نے 2001 میں پہلی مرتبہ طالبان حکومت کے خلاف حملے شروع کیے تھے، جو نائن الیون حملوں کا نتیجہ تھا۔

تاہم 2 دہائیوں سے جاری جنگ کے خاتمے کے لیے امریکا نے طالبان کے ساتھ مذاکرات کے بعد گزشتہ برس فروری کو امن معاہدہ کیا تھا جس کی رو سے غیر ملکی افواج کے انخلا اور افغان حکومت کی طالبان کے ساتھ بات چیت پر اتفاق ہوا تھا۔

افغانستان میں جاری لڑائی میں رواں برس مئی سے ڈرامائی تبدیلی آئی جب امریکا کی سربراہی میں افغانستان میں موجود غیر ملکی افواج کے انخلا کی تاریخ کا اعلان کیا گیا تھا اور رواں مہینے کے اختتام سے قبل انخلا مکمل ہوجائے گا۔

جس کے پیشِ نظر طالبان کی جانب سے پہلے اہم سرحدی علاقوں پر قبضہ کیا گیا اور پھر برق رفتاری سے صوبائی دارالحکومتوں پر قبضہ کرتے چلے گئے۔

چند روز قبل ایک امریکی رپورٹ میں پیش گوئی کی گئی تھی کہ طالبان 90 روز میں کابل پر قبضہ کرسکتے ہیں۔

افغانستان میں غیر یقینی صورتحال کے پیش نظر پاک افغان بارڈر کو سیل کر دیا گیا، سکیورٹی حکام ہائی الرٹ ہیں۔

افغانستان میں طالبان کی پیش قدمی جاری ہے، اطلاعات کے مطابق پاک افغان بارڈر کو سیل کردیا گیا، طورخم بارڈر پر پاکستان نے پہلے ہی 6 گیٹس بند کر دیئے تھے۔ طورخم بارڈر ہر قسم کی آمدورفت اور مال بردار گاڑیوں کیلئے بند کر دیا گیا۔ پاکستانی سکیورٹی حکام ہائی الرٹ ہیں، گیٹ کے دوسری جانب طالبان موجود ہیں۔

دریں اثنا وفاقی وزیر اطلاعات فواد چودھری نے کابل میں تعینات پاکستانی سفارتکاروں اور اسٹاف کوخراج تحسین پیش کیا، ان کا کہنا تھا کہ تمام اسٹاف کڑے وقت میں بھی خدمات سرانجام دے رہے ہیں، اسٹاف کابل میں پھنسے تمام لوگوں کیلئے امید ہیں، خداحفظ وامان میں رکھے۔

خدیجہ صدیقی، جن پر 2016 میں چھری سے قاتلانہ حملہ ہوا تھا، پر ہفتے کے روز نامعلوم حملہ آوروں نے مبینہ طور پر لاہور کے علاقے گلبرگ میں واقع رہائش گاہ کے باہر ان کی گاڑی پر فائرنگ کردی تاہم وہ حملے میں محفوظ رہیں۔

رپورٹ کے مطابق خدیجہ صدیقی نے اپنی تحریری شکایت، جس کی کاپی ڈان ڈاٹ کام کو دستیاب ہے، میں پولیس کو بتایا کہ وہ اس وقت گھر میں تھیں، جب انہوں نے فائرنگ کی آواز سنی، جب وہ گھر سے باہر گئیں تو انہوں نے دیکھا کہ ان کی گاڑی کے بونٹ میں گولی لگی ہے۔

انہوں نے کہا کہ ‘نامعلوم افراد نے میری گاڑی پر فائرنگ کی’ اور درخواست میں 2016 میں خود پر ہونے والے حملے کا ذکر بھی کیا۔

خدیجہ صدیقی نے پولیس سے کارروائی کا مطالبہ کرتے ہوئے کہا کہ ان کی زندگی خطرے میں ہے۔

دریں اثنا خدیجہ صدیقی کی قانونی ٹیم کے رکن بیرسٹر حسان نیازی نے کہا کہ ان کے گھر پر ‘براہِ راست فائرنگ’ کی گئی اور اس وقت وہ گھر میں تھیں۔

انہوں نے کہا کہ ‘خدیجہ صدیقی مضبوط رہیں، وہ ایک پیدائشی فائٹر ہیں، یہ گولیاں آپ جیسی مضبوط اعصاب کی مالک خاتون کو خوف زدہ نہیں کر سکتیں’۔

بیرسٹر حسان نیازی نے وزیر اعلیٰ پنجاب عثمان بزدار سے مذکورہ واقعے کا نوٹس لینے کا مطالبہ بھی کیا۔

ان کا کہنا تھا کہ ایک گولی ان کے والد کی گاڑی سے پار ہوئی مگر خدیجہ محفوظ رہیں، ‘ان سے ابھی بات ہوئی وہ بالکل بھی خوف زدہ نہیں ہیں بلکہ پہلے سے زیادہ مضبوط لگیں’۔

حسان نیازی کا مزید کہنا تھا کہ ڈی آئی جی لاہور (آپریشنز) نے واقعے کا نوٹس لے لیا، ٹیم بھیجی اور انہیں انصاف فراہم کرنے کا وعدہ کیا۔

وزیراعلیٰ پنجاب نے واقعے کا نوٹس لے لیا
دریں اثنا وزیراعلیٰ پنجاب عثمان بزدار نے واقعے کا نوٹس لیتے ہوئے لاہور کیپٹل سٹی پولیس افسر (سی سی پی او) سے رپورٹ طلب کرلی۔

وزیراعلیٰ نے پولیس حکام کو ہدایت دی کہ واقعے میں ملوث افراد کو گرفتار کرکے قانون کے دائرہ کار میں لایا جائے۔

ڈی آئی جی (آپریشنز) لاہور ساجد کیانی نے ماڈل ٹاؤن کے سپرنٹنڈنٹ پولیس (ایس پی) کو مجرموں کے خلاف کارروائی کرنے اور افسران کو سیف سٹی کیمروں کے ذریعے جرائم پیشہ افراد کا سراغ لگانے کی ہدایات دیں۔

انہوں نے کہا کہ اس طرح کے واقعات برداشت نہیں کیے جائیں گے، انہوں نے مزید کہا کہ شہریوں کی حفاظت پولیس کی سب سے اولین ذمہ داری ہے۔

شاہ حسین کی جلد رہائی، خدیجہ کی سیکیورٹی کی درخواست
رواں برس جولائی میں خدیجہ صدیقی پر قاتلانہ حملہ کرنے والے مجرم شاہ حسین کی جلد رہائی کے بعد خدیجہ نے میڈیا کو بتایا تھا کہ ‘انہوں نے سیکیورٹی کے لیے لاہور پولیس کو درخواست جمع کرائی ہے تاہم مجھے کوئی جواب موصول نہیں ہوا’۔

ان کا مزید کہنا تھا کہ انہوں نے ایسی ہی درخواست چند ماہ قبل بھی جمع کروائی تھی۔

یاد رہے کہ خدیجہ صدیقی نے اپنے ساتھی طالب علم شاہ حسین کی جانب سے ان پر حملہ کرنے کا الزام عائد کیا تھا۔

شاہ حسین نے 3 مئی 2016 کو شملہ ہلز کے قریب اس وقت چھریوں کے وار کرکے زخمی کر دیا تھا جب وہ اپنی چھوٹی بہن کو اسکول سے لینے جارہی تھیں۔

جوڈیشل مجسٹریٹ نے 29 جولائی 2017 کو شاہ حسین کو 7 سال قید کی سزا سنائی تھی تاہم بعدازاں لاہور ہائی کورٹ نے شاہ حسین کو اگلے سال بری کردیا تھا۔

سال 2019 میں سپریم کورٹ نے لاہور ہائی کورٹ کے فیصلے کو منسوخ کرتے ہوئے شاہ حسین کی فوری گرفتاری کا حکم دیا تھا۔

تاہم گزشتہ ماہ شاہ حسین اپنی سزا کے صرف ساڑھے تین سال گزارنے کے بعد جلد رہائی حاصل کرنے میں کامیاب ہوگیا۔

انسانی حقوق کے کارکنان اور سوشل میڈیا صارفین نے مجرم کی رہائی پر شدید تنقید کی تھی جس کے بعد حکومت نے ایک بیان بھی جاری کیا تھا۔