All posts by Sibte Hussain

بنگلا دیش کے خلاف اہم میچ سے قبل پاکستان ٹیم کے چیف سلیکٹر انضمام الحق نے بھی ٹریننگ سیشن دیکھا، امام الحق اور بابر اعظم کو بیٹنگ کے ٹپس دیئے۔

آئی سی سی اکیڈمی میں پاکستان ٹیم کے ٹریننگ سیشن میں قومی ٹیم کے کھلاڑیوں کی اصل توجہ کیچنگ پریکٹس پر مرکوز رہی۔

اس کے بعد نیٹ پر بیٹنگ سیشن ہوا، جس میں چیف سلیکٹر انضمام الحق نے پہلے کپتان سرفراز سے علیحدہ بات چیت کی ، پھر نیٹ پر امام الحق اور بابر اعظم کو بیٹنگ کے ٹپس دیتے نظر آئے ۔

ذرائع کے مطابق قومی ٹیم کا یہ ٹریننگ سیشن 3 گھنٹے جاری رہا۔

ایشیا کپ میں سپر فور مرحلے کا آخری میچ پاکستان اور بنگلا دیش کے درمیان آج ابوظہبی میں کھیلا جائے گا۔

ابوظہبی کے شیخ زید اسٹیڈیم میں آج ہونے والے پاکستان اور بنگلا دیش کے میچ کی فاتح ٹیم 28 ستمبر کو بھارت کے خلاف فائنل کھیلے گی۔

ذرائع کے مطابق آج کے میچ میں فاسٹ بولر محمد عامر کی جگہ جنید خان کو ٹیم میں شامل کیے جانے کا امکان ہے، دونوں ٹیموں کے درمیان آج ہونے والا میچ سیمی فائنل کی سی اہمیت اختیار کر چکا ہے۔

اس ایونٹ میں دونوں ٹیمیں آج پہلی بار مدمقابل آرہی ہیں، پاکستان بنگلا دیش کی حالیہ کارکردگی کو دیکھتے ہوئے کانٹے کے مقابلے کی توقع کی جا رہی ہے۔

ابوظہبی میں آج ہونے والا میچ پاکستانی وقت کے مطابق شام ساڑھے 4 بجے شروع ہوگا۔

ایشیا کپ کے میچ میں بھارت اور افغانستان کا میچ سنسنی خیز مقابلے کے بعد ٹائی ہوگیا ، بھارت سے آخری اوور میں7رنز نہ بن سکے اور پوری ٹیم آئوٹ ہوگئی۔ شاندار سنچری اسکور کرنے پر افغان اوپنر محمد شہزاد مین آف دی میچ قرار پائے گئے۔

دبئی میں کھیلے گئے سپر فور مرحلے کے پانچویں میچ میں افغانستان اور بھارت کا مقابلہ آخری لمحات میں انتہائی دلچسپ موڑ اختیار کرگیا۔

افغانستان کی جانب سے دیے گئے 253رنز کے ہدف کے تعاقب میں بھارتی سورما ہدف حاصل کرنے میں ناکام رہے۔

بھارتی بیٹسمین راشد خان کی جانب سے پھینکے گئے آخری اوورمیں7 رنز نہ بنا سکے اور پوری ٹیم 252رنز پر پویلین لوٹ گئی اور دونوں ٹیموں کے اسکور برابر ہونے کی وجہ سے میچ ٹائی ہوگیا۔

بھارتی ٹیم کے دونوں اوپنرز لوکیش راہول60 اور امباتی رائیودو 57کےساتھ نمایاں رہے تاہم افغان بولرز کی جانب سے محمد نبی، آفتاب عالم، راشد خان کے 2،2شکار اور جاوید احمدی نے ایک وکٹ حاصل کی۔

اس سے پہلے ٹاس جیت کر پہلے بیٹنگ کرنے والی افغان ٹیم نے اوپنر محمد شہزاد کی شاندار 124رنز کی اننگز کی بدولت افغانستان نے بھارت کو جیت کے لیے 253رنز کا ہدف دیا۔ انہوں نے مقررہ 50 اوورز میں 8 وکٹوں کے نقصان پر 252رنز اسکور کیے تھے۔

افغان اوپنر محمد شہزاد کی 124رنز کی اننگز میں 11چوکے اور 7 چھکے شامل تھےجبکہ اننگز کے آخری لمحات میں آل رائونڈر محمد نبی نے بھی 4چھکوں اور 3 چوکوں کی مدد سے زبردست 64رنز کی اننگز کھیلی اور بھارت کے لیے ایک اچھا مجموعہ ترتیب دینے میں اہم کردار ادا کیا۔

بھارتی بولرز کی جانب سے رویندرہ جدیجہ 3، کلدیپ یادو 2 تاہم خلیل احمد، دیپک چاہر اور کیدر جادو نے ایک، ایک وکٹ حاصل کی۔

اس سے قبل میچ کے ٹاس کے لئے افغانستان کے کپتان اصغر افغان اور مہندر سنگھ دھونی میدان میں اترے ۔

آج سابق بھارتی کپتان مہندرہ سنگھ دھونی بھارتی ٹیم کی کپتانی کے فرائض انجام دے رہے تھے، وہ 696 دنوں کے بعد بھارتی ٹیم کی کپتان بنے اور بطور کپتان آج ان کا 200واں ایک روزہ میچ تھا۔

بھارت کی پاکستان کے خلاف گزشتہ میچ کھیلنے والی ٹیم میں پانچ تبدیلیاں کی گئی تھیں اور روہت شرما، شیکھردھون ، جسپریت بمرا، بھونیشورکمار، یزویندرچاہل کو آج کے میچ میں آرام دیا گیا۔

بھارتی پلئنگ الیون مہندرہ سنگھ دھونی کپتان، لوکیش راہول، منیش پانڈے، دیپک چاہر، سدھارت کول، خلیل احمد، امباتی رائیدو، دنیش کارتک، کیدار جادیو، رویندر جدیجا اور کلدیپ یادیو پر مشتمل تھے۔

افغانستان کی فائنل الیون میں محمد شہزاد، جاوید احمدی، رحمت شاہ ،حشمت اللہ شاہدی ،نجیب اللہ زادران، محمد نبی، راشد خان، گلبدین نیب ،مجیب الرحمٰن اور آفتاب عالم شامل تھے ۔

بھارت سپر فور کے دونوں میچز جیت کر پہلے ہی فائنل کے لئے کوالیفائی کرچکا ہے جبکہ افغانستان کی ٹیم پاکستان اور بنگلادیش سے شکست کے بعد فائنل کی دوڑ سے باہر ہوگئی ہے ۔

ایونٹ میں افغانستان کی کارکردگی نے سب کو متاثر کیا، گروپ میچ میں بنگلادیش اور سری لنکا کو بڑے مارجن سے ہرایا جبکہ پاکستان سے بہت اچھا مقابلہ کیا۔

حافظ آباد میں دریائے چناب میں سیلابی ریلہ قادر آباد بیراج سے گزر رہا ہے، قادرآباد بیراج کے مقام پر آہستہ آہستہ پانی کی سطح کم ہو رہی ہے۔

ڈپٹی کمشنرحافظ آباد عدنان ارشد اولکھ کے مطابق دریائےچناب میں سیلابی ریلا قادرآباد بیراج سے گزر رہا ہے،پانی کی آمد میں مسلسل اضافے کے باوجود کسی قسم کا کوئی خطرہ نہیں۔

قادر آباد بیراج پر پانی کی آمد 97 ہزار 500 کیوسک سے کم ہو کر 79 ہزار671 کیوسک رہ گئی ہے جبکہ بیراج سے بھی پانی کے اخراج میں بھی کمی کی جارہی ہے۔

پانی کا اخراج 75 ہزار 500 کیوسک سے کم کر کے 57 ہزار 671 کیوسک ہوگیا ہے، سیلابی ریلا بحفاظت گزر رہا ہے، کسی بھی ہنگامی صورت حال سے نمٹنے کیلئے تمام محکموں کو الرٹ کردیا گیا ہے۔

ادھر نارووال میں دریائے راوی جسٹر کے مقام پر پانی کا بہاؤ کم ہونے لگاہے۔

گذشتہ چند دہائیوں سے پاکستان ہاکی فیڈریشن میں اکھاڑ پچھاڑ ، عہدوں کی کھینچا تانی ، اقربا پروری، فنڈز کا غیر ضروری استعمال اور سیاسی آلودگی نے مل کر قومی کھیل کو دیمک کی طرح چاٹ لیا ہے ۔ جس کی واضح مثال چند سالوں کی کاکردگی ہے اب تو نوبت یہاں تک آپہنچی ہے کہ پاکستان میں پہلی بارہاکی ایسوسی ایشنز میں متوازی ت ایسوسی ایشنز قائم ہوگئی ہیں۔ اسکول اور کلب ہاکی صفر کی سطح پر آگئی ہے ۔ ہاکی سمٹ کر چند لوگوں اور چند شہروں تک محدود ہو کررہ گئی ہے ۔ فتح تو دور کی بات کلب کی سطح کی ٹیموں سے جیت کر بغلیں بجانے والوں سے کوئی پوچھے کہ اُن لوگوں کو ہاکی نے دولت، شہرت ، عزت ، مقام و مرتبہ اور وہ سب کچھ دیا جوانسانی خواہشات کے دائرے میں آسکتا تھا لیکن انہوں نے ہاکی کو کیا دیا؟

کتنے لوگ ہیں جنہوں نے نئے کھلاڑیوں کی حوصلہ افزائی کے لئے اُن کی سرپرستی کی ہو؟ اب وقت آ گیا ہے کہ نئی حکومت پاکستان ہاکی میں تبدیلی لائےپاکستان ہاکی فیڈریشن ٹیکنو کریٹ ,اسپورٹس سائنسز ,مارکیٹنگ اور ایمان دار سابق ہاکی اولمپئینز کو شامل کیا جائے،جب تک پاکستان ہاکی فیڈریشن کا ہیڈ آفس کراچی میں تھا یہ کھیل ترقی کررہا تھا اس لئےپاکستان ہاکی فیڈریشن کا دفتر کراچی منتقل کیاجائے ۔ تمام مالیاتی اداروں، ملٹی نیشنل کمپنیز کے صدر دفاتر کراچی میں موجود ہیں اس لئے مارکیٹنگ کے حوالے سے یہاں دفتر کی موجودگی زیادہ سود مند ثابت ہے۔ہاکی فیڈریشن میں ٹیکنیکل آفیشل کے حوالے سے ڈائریکٹیوریٹ قائم کیاجائے،سابق اولمپینز اور انٹرنیشنل کھلاڑیوں پر مشتمل غیر سیاسی ،متحرک اور موثر ’’تھنک ٹینک ‘‘بنا کر ان کے تجربات سے حقیقی معنوں میں استفادہ کیا جائے ۔ وزیراعظم عمران خان خود ایک معروف کھلاڑی رہے ہیں اور کھیلوں کے مسائل سے بخوبی واقف ہیں۔ اس لئےان کو ہاکی کے معاملات پر خصوصی توجہ دینا ہوگی اور فیڈریشن کو ملنے والے فنڈ کا حساب کتاب بھی لینا ہوگا