All posts by Sibte Hussain

(ایمرا نیوز)
نیوزی لینڈ نے سنسنی خیز میچ کے بعد انڈیا جو کے ورلڈ کپ کی نمبر ون ٹیم تھی کو 18 رنز سے شکست دے دی. ورلڈ کپ 2019 کا پہلا سیمی فائنل میچ جو کے بارش کی وجہ سے دو دن تک جاری رہا. نیوزی لینڈ نے 239 سکور کیا جو کے انڈیا جیسی نمبر ون ٹیم کے سامنے بہت کم سکور لگ رہا تھا لیکن جب انڈیا کی باری شروع ہوئی تو 5 کے سکور پر انڈیا کی 3 وکٹوں کے گرنے کے بعد جیسے انڈیا کی وکٹیں گرنے کا سلسلہ جاری رہا تو لگ رہا تھا کے انڈیا میچ ہار جائے گا لیکن جدیجہ اور دھونی نے جیسا کھیل پیش کیا ایک وقت پر ایسا لگ رہا تھا کے انڈیا میچ میں واپس آ گیا ہے لیکن آخر کار جدیجہ اور دھونی کی وکٹیں گرنے کی دیر تھی کے میچ سیدھا نیوزی لینڈ کی جھولی میں جا گرا اور نیوزی لینڈ 18 رنز سے میچ جیت گیا .

لاہور(ایمرا نیوز)
پاکستانی بنک نے شرعی قانون نافذ کر دیا نیٹ فلیکس کو حرام قرار دے کر کارڈ کی پیمنٹ کو روک دیا
26 سالہ محمد احمد طارق نے اپنے موبائل میں مختلف گانے سننے کے لیے مختلف ایپس ڈاؤن لوڈ کی ہوئی ہیں جن کی وہ آن لائن رقم بھی ادا کرتے ہیں۔
کئی ایسی ایپس استعمال کرنے کے لیے انھیں اپنے بینک کے کارڈ کا بھی استعمال کرنا پڑتا ہے لیکن ایک دن رقم ادا کرتے ہوئے انھیں بتایا گیا کہ یہ پورا عمل ’حرام‘ ہے۔
اسی طرح جب احمد نے میوزک ڈاؤن لوڈ کرنے والی ایک موبائل ایپ کو رقم کی ادائیگی کے لیے اپنا بینک کارڈ استعمال کیا تو ان کی پیمنٹ رُک گئی۔ جب انھوں نے میزان بینک کو فون ملایا تو ترجمان نے انھیں بتایا کہ بینک اس معاملے پر کام کر رہا ہے لیکن ’اگر آپ کا معاملہ فلمیں دیکھنے والی ایپ نیٹ فلکس کو رقم کی ادائیگی کی وجہ سے رُکا ہوا ہے تو وہ پورا نہیں ہو پائے گا کیونکہ ہمارے بینک کا کارڈ نیٹ فلکس کے لیے استعمال نہیں ہوسکتا۔ یہ ہماری شریعہ پالیسی کے خلاف ہے۔‘
اس بارے میں احمد نے بتایا کہ ’ایک تو میں نے اتنی اطلاع مانگی نہیں تھی جتنی مجھے بینک فون کرنے پر مل گئی۔ میرے ذہن میں نہیں تھا کہ نیٹ فلکس کو رقم کی ادائیگی ایک بینک اس وجہ سے روک دے گا کہ اسے غیر اسلامی سمجھا جاتا ہے۔‘

احمد نے بینک سے بات کرنے کے فوراً بعد سماجی رابطے کی ویب سائیٹ پر بینک کے نام سمیت پوسٹ لکھ کر ٹویٹ کردی جس کو بہت لوگوں نے پڑھا اور دوسروں کو مطلع کرنے کے لیے آگے بھی بڑھایا۔
نیٹ فلکس بین الاقوامی سٹریمنگ سروس ہے جس کے دنیا بھر میں 148 ملین دیکھنے والے ہیں۔ جب نیٹ فلکس پاکستان میں لانچ کیا گیا تھا تب مقامی سطح پر زیادہ خوشی اس بات کی تھی کہ پاکستان میں بننے والی فلموں اور ڈراموں کو اس پلیٹ فارم پر جگہ ملے گی۔
پاکستان میں اس کے دیکھنے والوں کا اندازہ گُوگل ٹریندز سے لگایا جاسکتا ہے۔ ڈان اخبار میں شائع ہونے والی ایک تحقیق کے مطابق ’پاکستان میں نیٹفلکس کی لانچ کے بعد اس کو سرچ کرنے والوں کی تعداد میں 73 فیصد اضافہ ہوا ہے۔‘
اس سے سوال یہ پیدا ہوتا ہے کہ کیا بینک مذہب کے نام پر ایسی سروس کو نظر انداز کرسکتے ہیں؟
جب بی بی سی نے میزان بینک کے کال سینٹر سے پوچھا تو انھوں نے اس بات کی تصدیق کی۔ لیکن مزید کہا کہ یہ تمام فیصلے بینک کی ’شریعہ کونسل‘ کے تحت ہوتے ہیں۔
میزان بینک کے علاوہ ملک کے جتنے بھی ’اسلامی‘ بینک ہیں وہ لائسنس یافتہ ہونے کے ساتھ ساتھ شریعت کے مطابق ہدایات پر بھی عمل کرتے ہیں۔ اسی حوالے سے ان سب بینکوں نے اپنے شرعی بورڈ میں علما کرام کو بھی شامل کیا ہوا ہے۔
یہ ماہرین بینک کے ڈیبٹ کارڈ کے استعمال کے بارے میں ہدایت نامہ جاری کرتے ہیں اور جن باتوں کو یہ غلط کہتے ہیں ان کے لیے ادائیگی نہیں ہو سکتی مثلاً جوا، شراب اور سینما گھر کا ٹکٹ وغیرہ۔

سبھی بینک ان ہدایات کو اپنی اپنی پالیسی کے تحت استعمال کرتے ہیں۔ نیٹ فلکس کو اسی زمرے میں شامل کیا گیا ہے۔
احمد اب دوسرے بینک میں اکاؤنٹ کھولنے کے بارے میں سوچ رہے ہیں۔
ان کا کہنا ہے کہ ’یہ بینک کے اپنے لیے غلط ہے۔ میں ایک بات ضرور کہنا چاہوں گا کہ میزان بینک کسٹمر سروس میں سب سے اچھا ہے، لیکن ان کو وقت کے ساتھ اپنی پالیسی کے بارے میں سوچنا پڑے گا۔‘

قصور (ایمرا نیوز آن لائن)
ڈائریکٹر انٹی کرپشن لاہور کی ہدیات پر سرکل آفیسر انٹی کرپشن شاہد عنایت بھٹی نے تحصیل آفس قصور میں علاقہ مجسٹر یٹ اور عملے کہ ہمراہ چھاپہ مارا. جس میں تحصیلدار قصور کے ہیڈ کلرک کو رنگے ہاتھوں کرپشن کرتے ہوئے پکڑ لیا گیا. ہیڈ کلرک محمد منشاء رنگے ہاتھوں گرفتار کر لیا گیا.

ذرائع کا کہنا ہے کہ ہیڈ کلرک منشاء سے 25000 ہزار نقدی برآمد ہوئی. محرر تھانہ اینٹی کرپشن قصور عمران علی نے منشاء کو ھتکڑی لگا کر حوالات میں بند کر دیا.

مدعی کا کہنا ہے کہ ہیڈ کلرک منشاء نے پراپرٹی ٹیکس کی مد میں 45000 روپے رشوت دینے کو کہا تھا. ہیڈ کلرک محمد منشاء کو اینٹی کرپشن کی ٹیم عمران علی اور محمد رمضان نے سرکل افیسر کی سربراہی میں بیٹے سمیت رنگے ہاتھوں گرفتار کیا

منشاء اور اس کے بیٹے حسنین کیخلاف FIR درج کر کے کاروائی شروع کر دی.

چیسٹرلی اسٹریٹ (ایمرا نیوز لائن)
ورلڈکپ کے اہم میچ میں انگلینڈ نے نیوزی لینڈ کو چاروں شانے چت کرتے ہوئے سیمی فائنل میں جگہ پکی کرلی جب کہ کیوی ٹیم کی شکست کے بعد پاکستان کی فائنل فور میں رسائی قریباً ناممکن ہوگئی ہے۔ قومی ٹیم کو اپنے آخری میچ میں بنگلادیش کے خلاف بڑے مارجن سے کامیابی درکار ہے، اگر گرین شرٹس بنگلادیش کو مطلوبہ مارجن کے مطابق شکست نہ دے سکا تو بہتر رن ریٹ کی بنیاد پر نیوزی لینڈ سیمی فائنل میں پہنچ جائے گا۔

چیسٹر لی اسٹریٹ کے میدان پر کھیلے گئے میچ میں میزبان انگلینڈ نے کیویز کو دبوچ لیا، ہاٹ فیورٹ انگلینڈ نے نیوزی لینڈ کو آؤٹ کلاس کرتے ہوئے اگلے مرحلے تک رسائی کی امیدوں کو برقرار رکھا ہے۔ انگلینڈ نے ٹاس جیت کر پہلے بیٹنگ کرتے ہوئے 306 رنز کا مجموعہ کھڑا کیا جو نیوزی لینڈ کے لیے پہاڑجیسا ثابت ہوا، بلیک کیپس ہدف کے تعاقب میں مکمل طور پر ناکام رہی اور پوری ٹیم 186 رنز پر ڈھیر ہوگئی۔

انگلینڈ کی جانب سے اننگز کا آغاز جیسن رائے اور بیراسٹو نے کیا، دونوں اوپنرز نے ٹیم کو جارحانہ کھیل پیش کیا اور 132 رنز کی شراکت قائم کی تاہم جیسن رائے 60 رنز بنانے کے بعد آؤٹ ہوگئے۔ ون ڈاؤن آنے والے جوئے روٹ نے صرف 24 رنز بنائے اور آؤٹ ہوگئے جب کہ اوپنر بیراسٹو نے جارحانہ انداز میں سنچری مکمل کی اور 106 رنز بناکر آؤٹ ہوگئے۔ بہترین اوپننگ شراکت ملنے کے باوجود بعد میں آنے والے بلے باز بڑا ٹوٹل بنانے میں ناکام رہے، جوس بٹلر اور بین اسٹوکس 11،11 رنز بناکر آؤٹ ہوئے جب کہ کپتان اون مورگن بھی 42 رنز کی اننگز کھیل کر پویلین واپس لوٹ گئے۔

نیوزی لینڈ کی جانب سے ٹرینٹ بولٹ، میٹ ہنری، جیمز نیشام نے 2،2 اور مائیکل سینٹنر نے ایک وکٹ حاصل کی۔ ہدف کے تعاقب میں بلیک کیپس کا آغاز اچھا نہ تھا اور صرف 14 رنز پر دونوں اوپنر پویلین لوٹ گئے، نکولس صفر اور مارٹن گپٹل 8 رنز ہی بنا سکے، ابتدائی نقصان کے بعد کپتان ولیمسن نے تجربہ کار بیٹسمین راس ٹیلر کے ساتھ محتاط انداز میں اننگز کو آگے بڑھاتے ہوئے 47 رنز جوڑے تاہم 61 کے مجموعی اسکور پر کپتان رن آؤٹ ہوگئے۔

آٹھ رنز کے اضافے سے راس ٹیلر بھی رن آؤٹ ہو کر ٹیم کو مشکلات میں چھوڑ کر چلتے بنے جب کہ جیمس نیشن 123 رنز پر آؤٹ ہوگئے، جارح مزاج بیٹسمین گرینڈ ہوم بھی بڑی اننگز کھیلنے میں ناکام رہے اور 3 رنز بنا کر کیچ تھما بیٹھے۔

(ایمرا نیوز آن لائن)
اسلام آباد: فیڈرل بورڈ آف ریونیو (ایف بی آر) نے اثاثے ظاہر کرنے کی اسکیم کی ڈیڈ لائن ختم ہونے کے بعد کارروائیوں کا آغاز کرتے ہوئے مسلم لیگ (ن) کے رہنما سینیٹر چوہدری تنویر کی 6 ہزار کنال بے نامی جائیداد منجمد کردی۔ اثاثے ظاہر کرنے کی اسکیم کی ڈیڈ لائن ختم ہونے کے بعد ایف بی آر حرکت میں آگیا ہے اور اس حوالے سے کراچی، راولپنڈی و دیگر شہروں میں کارروائیوں کا آغاز کردیا گیا ہے۔

ذرائع کے مطابق ایف بی آر نے مسلم لیگ سے تعلق رکھنے والے سینیٹر چوہدری تنویرکی 6 ہزار کنال بے نامی جائیداد منجمد کردی ہے۔ یہ اراضی چوہدری تنویر کے ملازموں محمد بشارت، راجا عبدالشکور، شاہ جہاں بیگم، محمد معروف، اظہر علی اور عبدالعزیز کے نام پر رکھی گئی تھی۔ ان تمام ملازمین کو نوٹس جاری کردیا گیا ہے۔ کارروائی کی تکمیل پر حکومت یہ جائیداد ضبط کرسکتی ہے۔

کراچی میں بھی بےنامی جائیدادوں کےخلاف ایف بی آر نے کارروائی کرتے ہوئے کچھ جائیدادیں منجمد کردی ہیں، اب یہ جائیدادیں نہ فروخت کی جاسکتی ہیں اور نہ کسی کے نام منتقل ہوسکتی ہیں۔ چوہدری تنویر کی پراپرٹی منجمد کرنے کے احکامات ڈپٹی کمشنر انکم ٹیکس راولپنڈی نے جاری کیے اور کارروائی مکمل ہونے کے بعد حکومت یہ جائیداد ضبط کرسکتی ہے۔

دوسری جانب کراچی میں بھی ایف بی آر نے بےنامی جائیدادیں رکھنے والوں کو نوٹسز جاری کیے ہیں اور یہ نوٹسز ڈپٹی کمشنر انکم ٹیکس سید مشکور علی کی جانب سے جاری کیےگئے۔ یاد رہے کہ حکومت کی اثاثے ظاہر کرنے کی اسکیم کی ڈیڈ لائن تین جولائی شام 5 بجے تک تھی جو کہ اب ختم ہوگئی ہے۔

وزیراعظم کی معاون خصوصی برائے اطلاعات فردوس عاشق اعوان نے کہا ہے کہ اب ملک میں کوئی بے نامی دار نہیں رہے گا۔ انہوں نے کہا کہ آج ن لیگ کے سینیٹر چوہدری تنویر کی 6 ہزار کنال بے نامی اراضی واگزار کرالی،کل کراچی میں آصف زرداری کی بے نامی جائیدادوں کو منجمد کیا تھا۔ وفاقی وزیر برائے سائنس و ٹیکنالوجی فواد چوہدری کا کہنا ہے کہ لوگ سمجھ رہے تھے کہ اس بار بھی ویسا ہی ہوگا جیسا پہلے ہوتا آیا ہے لیکن اب کارروائی کا وقت شروع ہوگیا۔

چیئرمین ایف بی آر شبر زیدی کا کہنا ہے کہ اثاثہ جات اسکیم سے ایک لاکھ دس ہزار افراد فائدہ اُٹھا چکے، مزید 25 ہزار پائپ لائن میں ہیں۔ انہوں نے کہا کہ اسکیم سے فائدہ اُٹھانے والوں کی تعداد ایک لاکھ پینتیس ہزار سے زیادہ ہو جائے گی۔ دوسری طرف ذرائع ایف بی آر کا کہنا ہے کہ اثاثہ جات اسکیم سے 70 ارب روپے کا ریونیو حاصل ہو چکا ہے، پچھلے سال اسکیم سے 84 ہزار افراد نے استفادہ کیا تھا۔ گزشتہ سال اسی اسکیم کے تحت 124 ارب 50 کروڑ روپے کا ریونیو جمع ہوا تھا۔

(ایمرا نیوز آن لائن)
پیساڈینا، کیلیفورنیا: قارئین کو یاد ہوگا کہ چند ماہ قبل پتا چلا کہ سیارہ زحل (سیٹرن) کے ایک مشہور چاند اینسلیڈیئس کی برفیلی سطح کے نیچے ایسے مرکبات موجود ہیں جن میں کاربن پایا جاتا ہے اور ہم جانتے ہیں کہ کاربن والے نامیاتی مالیکیول کسی بھی جگہ زندگی کی نوید دے سکتے ہیں تاہم ماہرین کا خیال ہے کہ ٹائٹن پر بھی زندگی کا پتا دینے والے سالمات موجود ہوسکتے ہیں اور اسی لیے ناسا نے سیارہ جاتی مشن کے لیے ٹائٹن کا انتخاب کیا ہے۔

ایٹمی توانائی سے چلنے والا یہ روبوٹ سطح پر نہیں چلے گا بلکہ اپنے 8 پنکھوں کی مدد سے ٹائٹن کی فضا میں اڑے گا اور وہاں نامیاتی مرکبات اور آثار تلاش کرے گا۔

لیکن اول تو ٹائٹن ہماری زمین سے 1.4 ارب کلومیٹر دور ہے دوم وہاں کی فضا میں میتھین گیس بھری ہوئی جو ہم چولہے میں جلاتے ہیں۔ تیسری رکاوٹ یہ ہے کہ ٹائٹن کا درجہ حرارت منفی 179 درجے سینٹی گریڈ ہے۔ اس طرح یہ سب امور مل کر اس خلائی مشن کو مشکل بناتے ہیں لیکن ناسا کے ماہرین ان چیلنجز سے بخوبی واقف ہیں۔

ناسا نے اس پروجیکٹ کا نام بھنبھیری یا ڈریگن فلائی رکھا ہے۔ ٹائٹن پر ثقلی قوت زمینی قوت کے 0.133 حصے کے برابر ہے اور فضا زمین سے چار گنا کثیف ہے۔ ٹائٹن پر ندی ، دریا اور سمندر موجود ہیں جو ہائیڈروکاربنز پر مشتمل ہیں۔ پھر فرش پر اونچے نیچے راستے ہیں اور شاید نامیاتی برف بھی ہے۔ اسی وجہ سے ٹائٹن پر کسی گاڑی کو بھیجنا کسی بھی طرح مفید نہ ہوگا۔

ابھی منزل بہت دور ہے اور ڈریگن فلائی کو 2026ء میں ٹائٹن کی طرف بھیجا جائے گا جو 2034ء میں وہاں اترے گا۔ نیوکلیائی قوت کی بدولت اس کا ریڈیو تھرمل جنریٹر کام کرے گا اور خلائی جہاز کو 36 کلومیٹر فی گھنٹہ کی رفتار سے پرواز کرے گا۔

انجینیئروں نے پورے خلائی جہاز کو بچانے کے لیے خاص مٹیریل تیار کیا ہے جو اسے تباہ کن ماحول سے بچائے گا۔ جدید ترین آلات میں ماس اسپیکٹرو میٹر، گیما رے اور نیوٹران اسپیکٹرومیٹر لگے ہیں۔ علاوہ ازیں جیوفزکس کے جدید ترین آلات بھی موجود ہے جو ٹائٹن کے اندر کی خبر لیں گے۔

اس مشن سے وابستہ ناسا کے ماہر تھامس زربیوکین نے کہا کہ ٹائٹن ایک غیرمعمولی مقام ہے اور خود ڈریگن فلائی مشن بھی ایک انوکھا پروگرام ہے، یہ بہت دور کی ایک دنیا میں نامیاتی مرکبات کی تلاش کا اہم کام کرے گا۔

(ایمرا نیوز آن لائن)
کیلیفورنیا: پیغام رسانی کی مقبول ترین ایپلی کیشن’واٹس ایپ‘ نے اسٹیٹس اسٹوریز کو فیس بک اور انسٹاگرام پر براہ راست شیئر کرنے کے لیے نئے فیچر کی آزمائش کی ہے۔

واٹس ایپ اپنے صارفین کی اسٹیٹس اسٹوریز کو دیگرسماجی ویب سائٹس فیس بک ، انسٹاگرام، جی میل اور گوگل پر براہ راست شیئر کرنے کی سہولت فراہم کرنے کے لیے نئے فیچر کی تیاری میں مصروف ہے۔

نئے فیچر کے تحت واٹس ایپ اسٹیٹس اسٹوری کو دیگر ایپس پر شیئر کرنے کے لیے آپشن فراہم کیا جائے گا جس کا انتخاب کرکے اسٹیٹس کو براہ راست دوسری ایپس پر با آسانی شیئر کیا جاسکے گا۔
رپورٹ کے مطابق واٹس ایپ اس فیچر کی آزمائش میں مصروف ہے اور بعض صارفین کو بی ٹا ورژن کے ذریعے تجرباتی بنیادوں پر اس فیچر تک رسائی دی گئی ہے۔

اس وقت انسٹاگرام اور فیس بک کو اسٹیٹس اسٹوری کے لیے باہمی طور پر منسلک کیا گیا ہے تاہم فیس بک کی ملکیت پیغام رسانی کی ایپلی کیشن ’واٹس ایپ‘ میں یہ سہولیت میسر نہیں۔

خیال یہی کیا جارہا ہے کہ فیس بک کے سی ای او مارک زکربرگ کے ویژن 2020 کے تحت واٹس ایپ، فیس بک اور انسٹاگرام کو باہمی منسلک کرکے مشترکہ فیچرز سے صارفین کے لیے نئی آسانیاں پیدا کی جائیں۔

(ایمرا نیوز آن لائن)
اسلام آباد: حکومت کی ٹیکس ایمنسٹی اسکیم کی مدت ختم ہونے میں 2 دن رہ گئے ہیں اور اس دوران دبئی سے اثاثے ظاہر کرنے والے سب سے آگے ہیں۔

حکومت کی جانب سے ایسیٹس ڈیکلیریشن آرڈینس 2019 کے نام سے جاری کردہ ایمنسٹی اسکیم کے تحت ٹیکس نادہندگان 4 فیصد ٹیکس کی ادائیگی کرکے اپنے ملکی اور غیر ملکی اثاثے ظاہر کر سکتے ہیں۔ ایمنسٹی اسکیم کی مدت 30 جون کو ختم ہورہی ہے۔ ٹیکس ایمنسٹی اسکیم کے آن لائن پورٹل پر شدید دباؤ پڑ چکا ہے۔ جس کی وجہ سے متعدد صارفین کو اثاثے ظاہر کرنے میں شدید مشکلات کا سامنا ہے۔

ایف بی آر حکام کا کہنا ہے کہ ٹیکس ایمنسٹی میں متحدہ عرب امارات سے اثاثے ظاہر کرنے والے سب سے آگے ہیں، پاکستانیوں نے دبئی کی جائیدادوں کو بڑے پیمانے پر ظاہر کیا ہے۔
ایف بی آر نے اثاثے ظاہر کرنے والوں کی شکایات کے لیے ٹیمیں تشکیل دے دی ہیں، ایف بی آر پورٹل پر دباؤ کو کم کیا جارہا ہے، کراچی , لاہور اور راوالپنڈی میں 3 کمشنرز کو آن لائن سسٹم اپ ڈیٹ کرنے کی ہدایات جاری کردی ہیں، ایف بی آر پورٹل کو آن لائن رکھنے کے لیے پرال کا عملہ بھی متحرک کردیا گیا۔

تاجروں، سرمایہ کاروں اور صنعتکاروں نے ٹیکس ایمنسٹی کی مدت میں 3 ماہ کی توسیع کا مطالبہ کیا ہے، اس کے علاوہ بینک اور چارٹرڈ اکاونٹنٹس فرم بھی اسکیم کی مدت میں توسیع کا مطالبہ کررہی ہیں۔ جس کے بعد ایسیٹس ڈکلیریشن آرڈینس 2019 کی میعاد میں توسیع کا امکان ظاہر کیا جارہا ہے۔

دوسری جانب چیئرمین ایف بی آر نے ٹیکس ایمنسٹی کا پورٹل ہر صورت آن لائن کرنے کی ہدایات جاری کردی ہیں۔ ایف بی آر نے اثاثے ظاہر کرنے والوں کی شکایات کے لیے ٹیمیں تشکیل دے دی ہیں، ایف بی آر پورٹل پر دباؤ کو کم کیا جارہا ہے، کراچی , لاہور اور راوالپنڈی میں 3 کمشنرز کو آن لائن سسٹم اپ ڈیٹ کرنے کی ہدایات جاری کردی ہیں، ایف بی آر پورٹل کو آن لائن رکھنے کے لیے پرال کا عملہ بھی متحرک کردیا گیا۔

ایف بی آر حکام کا کہنا ہے کہ ٹیکس ایمنسٹی اسکیم کی مدت بڑھانا بہت مشکل ہے کیونکہ ٹیکس ایمنسٹی اسکیم کی مدت بڑھانے کیلئے وزیراعظم نے کوئی ہدایات جاری نہیں کیں، 30 جون تک ایسیٹس ڈیکلیریشن آرڈینس 2019 سے مستفید ہونے والوں کو ہر ممکن سہولت فراہم کی جائیں گی، ایف بی آر کے تمام فیلڈ دفاتر 29 جون کو رات 8 بجے جب کہ 30 جون کو رات 11 بجے تک کھلے رہیں گے، تمام ٹیکس گزار ٹیکسز، ڈیوٹیز اور ٹیکس گوشوارے جمع کرا سکتے ہیں۔

لیڈز: ورلڈکپ کے 36 ویں میچ میں پاکستان کے خلاف افغانستان کی بیٹنگ جاری ہے
(ایمرا نیوز آن لائن)
لیڈز کے ہیڈنگلے گراؤنڈ میں کھیلے جارہے میچ میں افغانستان نے ٹاس جیت کر بیٹنگ کا فیصلہ کیا۔ افغان اوپنرز نے جارحانہ انداز میں کھیل کا آغاز کیا تاہم شاہین آفریدی نے پانچویں اوور کے دوران اپنے پہلے ہی اوور میں 27 کے مجموعے پر کپتان گلبدین نائب کو پویلین بھیج دیا اور اگلی ہی گیند آنے والے حشمت اللہ بھی بغیر کوئی رن بنائے عماد وسیم کے ہاتھوں کیچ آؤٹ ہوگئے۔

57 کے مجموعے پر اوپنر رحمت شاہ عماد وسیم کی گیند پر بابراعظم کے ہاتھوں کیچ آؤٹ ہوگئے، انہوں نے 43 گیندوں پر 35 رنز بنائے۔ اس سے قبل ٹاس جیت کر افغان کپتان گلبدین نائب کا کہنا تھا کہ کوشش ہوگی آج کے میچ میں بڑا اسکور کریں۔ اس موقع پر قومی کرکٹ ٹیم کے کپتان سرفراز احمد کا کہنا تھا کہ اگر ہم ٹاس جیتتے تو ہم بھی پہلے بیٹنگ کا فیصلہ کرتے، پوری کوشش کریں گے آج بھی اچھی پرفارمنس دیں۔

افغانستان کے خلاف پاکستان کی ٹیم میں کوئی تبدیلی نہیں کی گئی ہے، کپتان سرفراز احمد سمیت فخرزمان، امام الحق، بابر اعظم، حارث سہیل، محمد حفیظ، عماد وسیم، شاداب خان، وہاب ریاض، محمد عامر اور شاہین آفریدی بھی ٹیم میں شامل ہیں۔ دونوں ٹیمیں ٹورنامنٹ میں اب تک 7 میچز کھیل چکی ہیں، قومی کرکٹ ٹیم نے اب تک 7 میچوں میں سے تین میں کامیابی اور تین میں ناکامی کا سامنا کیا ہے جب کہ ایک میچ بارش سے متاثر ہوگیا۔

افغانستان ایونٹ کے 7 میچز میں سے ایک میں بھی کامیابی حاصل کرنے میں ناکام رہا ہے۔ پوائنٹس ٹیبل کے اعتبار سے پاکستانی ٹیم چھٹے نمبر پر ہے جب کہ افغانستان آخری یعنی دسویں نمبر پر موجود ہے۔ شاہین آج کا میچ بھی جیتنے کے لیے پر عزم ہیں جس کے لیے تمام کھلاڑیوں نے گزشتہ روز بھرپور پریکٹس بھی کی ہے۔ پاکستان کو سیمی فائنل میں جگہ بنانے کے لیے آج کا میچ بھی جیتنا ضروری ہوگا۔

دوسری جانب لندن کے لارڈز گراؤنڈ میں آج نیوزی لینڈ اور آسٹریلیا کی ٹیمیں بھی مدمقابل ہوں گی۔ نیوزی لینڈ کو سیمی فائنل میں جگہ بنانے کے لیے آج کا میچ جیتنا لازمی ہوگا۔

میں نے سابق آرمی چیف راحیل شریف کے ساتھ میچ کھیلا جس میں جان بوجھ کر ہار مان لی تھی،راحیل شریف کو ایسی گیند کروائی کہ انہوں نے چوکا لگا دیا

(ایمرا نیوز آن لائن)
پاکستان کرکٹ ٹیم کے سابق کپتان چاہد آفریدی نے اپنے کیرئیر میں ایک فکسڈ میچ کھیلنے کا اعتراف کیا ہے۔لیکن دلچسپ بات یہ ہے کہ شاہد آفریدی کے میچ فکسڈ کھیلنے پر کسی پاکستانی کو بھی اعتراض نہیں ہو گا کیونکہ شاہد آفریدی نے یہ میچ وزیرستان میں کھیلا تھا جو کہ سابق آرمی چیف راحیل شریف کے ساتھ کھیلا گیا تھا۔

میڈیا رپورٹس میں بتایا گیاہے کہ شاہد آفریدی نے اپنی کتاب میں لکھا ہے کہ جب وہ اور راحیل شریف میچ کھیلنے جا رہے تھے تو راحیل شریف نے کہا کہ میں تمہاری گیند پر چوکا ماروں گا۔مجھے یہ معلوم نہیں تھا کہ وہ اپنا پلان بتا رہے ہیں یا پھر آرڈر دے رہے ہیں۔شاہد آفریدی کا کہنا تھا کہ میں چاہتا تو انہیں بولڈ کرسکتا تھا تاہم میں نے بہت آرام سے انہیں گیند کروائی کیونکہ وہ مجھ سے بڑے تھے۔

واضح رہے 2015ء میں یوم آزادی کے موقع پر آئی ڈی پیز کی مالی امداد کیلئے آرمی الیون اور پی سی بی الیون میں میچ کھیلا گیا تھا جس میں سابق آرمی چیف جنرل راحیل شریف نے گراؤنڈ کے اندر بھی دھاک بٹھا دی تھی ، سٹار کرکٹر شاہد آفریدی کی گیند پر چوکا لگای تھا۔اس دوران سابق ڈی جی آئی ایس پی آر میجر جنرل عاصم سلیم باجوہ نے وکٹ کیپر کے فرائض سرانجام دئیے۔

فنڈ ریزنگ میچ کے مہمان خصوصی سابق آرمی چیف جنرل راحیل شریف تھے۔میچ شروع ہونے سے قبل راحیل شریف سے گراؤنڈ میں دونوں ٹیموں کا تعارف کرایا گیا۔اس موقع پرپاک فوج اور پی سی بی کے دیگر حکام بھی موجود تھے۔کھلاڑیوں سے تعارف کرانے کے بعد شاہد آفرید ی نے راحیل شریف کے ہاتھ میں بیٹ تھمادیا اور ’’پچ ‘‘پر لے آئے جہاں شاہد آفریدی نے گیندکرائی جس پر راحیل شریف نے شاندار چوکا لگاکرمیچ کا آغاز کیا، آرمی الیون کی قیادت شاہد آفرید ی نے کی تھی ، دوستانہ میچ میں محمد حفیظ ،احمد شہزاد،اظہر علی، مصباح الحق،محمد رضوان ،یاسر حمید،سہیل تنویر، باؤلنگ کوچ محمد اکرم اور ان کے علاوہ انڈر 19 سے بھی کھلاڑی شامل تھے۔