Category جرم وانصاف

اسلام آباد(ایمرا نیوز)اسلام آباد کی عدالت نے بیرسٹر فہد ملک قتل کیس کے تینوں ملزمان کو عمر قید کی سزا سنادی ۔
اسلام آباد کی ڈسٹرکٹ اینڈ سیشن کورٹ کے جج عطا ربانی نے بیرسٹر فہد ملک قتل کیس کی سماعت کی جس دوران ملزمان کو عدالت میں پیش کیا گیا اور ان کی حاضری لگواکر انہیں بخشی خانے واپس بھیج دیا۔
بعد ازاں عدالت نے بیرسٹرفہد ملک قتل کیس کا محفوظ فیصلہ سناتے ہوئے مقدمے میں نامزد تینوں ملزمان راجہ ارشد،نعمان کھوکھر اور ہاشم کو عمرقید کی سزا سنائی۔
واضح رہے کہ 2016 میں 14 اور 15 اگست کی درمیانی شب بیرسٹر فہد ملک کو اسلام آباد میں قتل کیا گیا تھا جس کے بعد 4 چشم دید گواہان نے کیس میں نامزد تینوں ملزمان کے خلاف بیان دیا تھا۔
کیس کی فارنزک رپورٹ میں قتل میں استعمال کی گئی کلاشنکوف اور جائے وقوعہ سے ملے خول بھی میچ کر گئے تھے جب کہ کیس کے مرکزی ملزم راجہ ارشد کو ملک سے فرار کی کوشش میں طورخم بارڈر سے گرفتار کیا گیا تھا۔

اسلام آباد (ایمرا نیوز) پاکستان انٹرنیشنل ایئر لائن (پی آئی اے) کا فلائٹ اسٹیورڈ (فضائی میزبان) ٹورنٹو ایئر پورٹ سے پر سرار طور پر غائب ہوگیا۔
ترجمان پی آئی اے کا کہنا ہے کہ اعجاز علی شاہ پی کے 781 کے ذریعے اسلام آباد سے کینیڈا پہنچا تھا، فضائی میز بان نے 16 اکتوبر کوواپس اسلام آباد روانہ ہونا تھا، فلائٹ اسٹیورڈ اعجاز علی شاہ کیخلاف تحقیقات کی جارہی ہیں انکوائری مکمل ہوتے ہی ملازمت سے فارغ کردیا جائے گا۔
ترجمان کا مزید کہنا ہے کہ 2 سالوں کے دوران 7 ملازمین کو ملازمتوں سے برخاست کیاگیا، برخاست ہونے والوں میں 3 خواتین فضائی میزبان بھی شامل ہیں، تمام ملازمین کی تحقیقات مکمل ہونے کے بعد کارروائی کی جائے گی، ٹورنٹو جانے والی پروازوں پر فضائی عملے سے ڈکلیئریشن لیا جاتا ہے۔
انہوں نے کہا کہ ٹورنٹو پہنچنے پرپاسپورٹ اسٹیشن مینیجرکے پاس جمع کرانا لازمی قراردیا گیا ہے۔

اسلام آباد(ایمرا نیوز)عمران خان نے پی ٹی آئی ممنوعہ فنڈنگ کیس میں گرفتاری سے بچنے کے لیے درخواست دائر کر دی۔عمران خان نے ممنوعہ فنڈنگ کیس میں ضمانت قبل از گرفتاری کی درخواست سیشن کورٹ میں دائر کی۔
عمران خان کے وکلا کی جانب سے دائر درخواست میں مؤقف اختیار کیا گیا ہے کہ ایف آئی اے کو گرفتاری سے روکا جائے۔
چیئرمین پاکستان تحریک انصاف عمران خان کا آج اسپیشل جج سینٹرل کی عدالت میں پیش ہونے کا امکان ہے۔
یاد رہے کہ ممنوعہ فنڈنگ کیس میں اسلام آباد ہائیکورٹ نے عمران خان کی کل تک حفاظتی ضمانت منظور کر رکھی ہے۔

لاہور(ایمرا نیوز)لاہور ہائیکورٹ نے وزیر داخلہ رانا ثنااللہ کے وارنٹ گرفتاری معطل کردیے۔مسلم لیگ (ن) کے رہنما اور وفاقی وزیر داخلہ رانا ثنااللہ کے وارنٹ گرفتاری اسپیشل جوڈیشل مجسٹریٹ اینٹی کرپشن کی جانب سے جاری کیے گئے تھے۔
اینٹی کرپشن کی ٹیم وارنٹ کی تعمیل کے لیے اسلام آباد پولیس کے پاس بھی گئی تھی تاہم وفاقی پولیس نے دونوں مرتبہ ٹیم کو واپس بھجوادیا۔
رانا ثنااللہ نے وارنٹ گرفتاری کو عدالت میں چیلنج کیا تھا جس کے بعد لاہور ہائیکورٹ کے راولپنڈی بینچ نے وزیر داخلہ کے وارنٹ گرفتاری کو معطل کردیا ہے۔
گزشتہ روز پنجاب کے مشیر داخلہ عمر سرفراز چیمہ نے کہا تھا کہ پنجاب میں داخلے پر وفاقی وزیر داخلہ رانا ثنا اللہ کو گرفتار کیا جائےگا۔

اسلام آباد(ایمرا نیوز)سپریم کورٹ میں پاکستان تحریک انصاف (پی ٹی آئی) کی قومی احتساب بیورو (نیب) کے قانون میں ترامیم کے خلاف درخواست پر سماعت کے دوران جسٹس اعجاز الاحسن نے ریمارکس دیے ہیں کہ نیب ترامیم سے منظم کرپشن کو فروغ ملے گا۔
‏سپریم کورٹ میں نیب ترامیم کے خلاف چیئرمین پی ٹی آئی عمران خان کی درخواست پر ‏چیف جسٹس پاکستان عمر عطا بندیال کی سربراہی میں ‏جسٹس اعجازالاحسن اور جسٹس منصور علی شاہ پر مشتمل 3 رکنی بینچ نے سماعت کی۔
پی ٹی آئی کی جانب سے وکیل خواجہ حارث نے پانچویں روز بھی دلائل جاری رکھتے ہوئے کہا کہ کابینہ اور ورکنگ ڈیولپمنٹ پارٹیز کے فیصلے بھی نیب دائرہ اختیار سے نکال دیے گئے ہیں، جس پر چیف جسٹس آف پاکستان نے ریمارکس دیے کہ کمیٹیوں اور کابینہ میں فیصلے مشترکہ ہوتے ہیں، مشترکہ فیصلوں پر کیا پوری کابینہ اور کمیٹی کو ملزم بنایا جائے گا؟
چیف جسٹس پاکستان نے کہا کہ پوری کابینہ یا کمیٹی ملزم بنے گی تو فیصلے کون کرے گا؟ ہر کام پارلیمان کرنے لگی تو فیصلہ سازی کا عمل سست روی کا شکار ہوجائے گا، ایل این جی معاہدے کے حقائق دیکھے بغیر کیس بنایا گیا تھا، ایل این جی سطح کے معاہدے حکومتی سطح پر ہوتے ہیں۔
چیف جسٹس عمر عطا بندیال نے ریمارکس دیے کہ کئی بیوروکریٹ ریفرنس میں بری ہوئے لیکن انہوں نے جیلیں کاٹیں، بعض اوقات حالات بیوروکریسی کے کنٹرول میں نہیں ہوتے، عمران خان کے وکیل خواجہ حارث نے کہا کہ حالیہ نیب ترامیم انسداد کرپشن کے عالمی کنونشن کے بھی خلاف ہیں۔
چیف جسٹس پاکستان نے ریمارکس دیے کہ آمدن سے زائد اثاثے پوری دنیا میں جرم تصور ہوتے ہیں، عالمی معیار اور مقامی قانون کے تناظر میں نیب ترامیم کا جائزہ لیں گے۔
جسٹس منصور علی شاہ نے استفسار کیا کہ کیا نیب سے بچ نکلنے والے کسی اور قانون کی زد میں آسکتے ہیں؟ جس پر وکیل عمران خان نے کہا کہ اختیارات کے ناجائز استعمال کے لیے کوئی اور قانون موجود نہیں ہے، نیب ترامیم کے بعد 50 کروڑ سے زائد کی کرپشن ثابت کرنا بھی ناممکن بنا دیا گیا ہے۔

اسلام آباد(ایمرا نیوز)ممنوعہ فنڈنگ کیس میں عدالت کے طلب کرنے پر عمران خان اسلام آباد ہائیکورٹ پہنچ گئےوفاقی تحقیقاتی ادارے (ایف آئی اے) نے چیئرمین پی ٹی آئی عمران خان کے خلاف ممنوعہ فنڈنگ کا مقدمہ درج کیا ہے جس کے بعد سابق وزیراعظم نے گرفتاری سے بچنے کے لیے عدالت سے رجوع کیا۔
عمران خان نے حفاظتی ضمانت کے لیے اسلام آبادہائیکورٹ میں درخواست دائر کی جس میں مؤقف اختیار کیا گیا ہےکہ ایف آئی اے نے فارن ایکسچینج ایکٹ کے تحت مقدمہ درج کررکھا ہے، عدالت حفاظتی ضمانت منظورکرے تاکہ متعلقہ عدالت میں پیش ہوسکیں۔
چیف جسٹس اسلام آباد ہائیکورٹ جسٹس اطہر من اللہ نے عمران خان ی درخواست پر سماعت کی جس دوران پی ٹی آئی چیئرمین کے وکیل نے کہا کہ عمران خان کی گرفتاری کا خدشہ ہے۔
جسٹس اطہر نے سوال کیا کہ آپ کے خیال میں ممنوعہ فنڈنگ کیس کون سی عدالت جانا چاہیے ؟ اس پر وکیل نے کہا کہ کیس اسپیشل جج سینٹرل کی عدالت جانا چاہیے۔
عدالت نے پوچھا کہ عمران خان کہاں ہیں؟ پیش کیوں نہیں ہوئے؟ وکیل نے کہا کہ عدالت حکم کرے تو عمران خان فوری عدالت پیش ہوجائیں گے، بنی گالہ میں پولیس نے ان کے گھر کا محاصرہ کیا ہوا ہے، غیرمعمولی صورتحال کےباعث درخواست گزار پیش نہیں ہوئے۔
جسٹس اطہر نے کہا کہ درخواست گزار تین بجے تک اس عدالت میں پیش ہوجائیں ، اس پر ان کے وکیل نے مؤقف اپنایا کہ تین بجے دیر ہو جائے گی ابھی آدھے گھنٹے میں آجاتے ہیں۔
اسلام آباد ہائیکورٹ نے حکم دیا کہ عدالت میں پیش ہونے تک عمران خان کو گرفتار نہ کیا جائے جب کہ عدالت نے انتظامیہ کو سابق وزیراعظم کو ہراساں کرنے سے بھی روک دیا۔
عمران خان پر الزام کیا ہے؟ایف آئی آر میں ابراج گروپ کے اکاؤنٹ سے 21لاکھ ڈالر کی رقم کی منتقلی کا ذکر ہے اور مقدمے میں سردار اظہر طارق، طارق شفیع اور یونس عامر کیانی بھی نامزد ہیں۔
ایف آئی آر کے متن کے مطابق ابراج گروپ نے تحریک انصاف کے اکاؤنٹ میں پیسے بھیجے، یہ پیسے ایک بینک کی جناح ایونیو برانچ میں بھیجے گئے۔
ایف آئی آر کے متن میں کہا گیا ہے کہ تحریک انصاف نے عارف نقوی کا بیان حلفی الیکشن کمیشن میں جمع کرایا تاہم عارف نقوی کا الیکشن کمیشن میں جمع کرایا گیابیان حلفی جھوٹا اورجعلی ہے۔
ایف آئی آر کے متن کے مطابق تحریک انصاف کا نجی بینک میں اکاؤنٹ تھا جو نیا پاکستان کے نام پر بنایا گیا، نجی بینک کا منیجر بھی مقدمہ میں نامزد کیا گیا ہے، بینک منیجر نےغیر قانونی بینک اکاؤنٹ آپریٹ کرنے کی اجازت دی۔

مقدمہ ایف آئی اے بینکنگ سرکل تھانے میں درج کیا گیا اور مقدمہ ایف آئی اے کے کارپوریٹ بینکنگ سرکل نے درج کیا۔
ایف آئی آر میں کہا گیا ہے کہ ملزمان نے فارن ایکسچینج ایکٹ کی خلاف ورزی کی، ملزمان نجی بینک اکاؤنٹ کے بینفشری ہیں۔
تحریک انصاف کے سیف اللہ نیازی بھی ایف آئی آر میں نامزد ہیں۔

لاہور(ایمرانیوز) محکمہ اینٹی کرپشن نے داخل دفترکیسز کو دوبارہ کھولنے کا فیصلہ کیا ہے۔وزیراعلیٰ پنجاب کے مشیر مصدق عباسی نے پراسیکیوٹر جنرل کو بند کیسز دوبارہ کھولنے کی ہدایت کی ہے۔
مصدق عباسی نے کہا کہ 2013 سے 2022 تک تمام غیر معینہ مدت سے بند کیسز فوری کھولے جائیں گے، مدعیان کی عدم پیروی اور گواہوں کی غیر حاضری پرخارج کیسزپربھی فوراً اپیلیں دائرکی جائیں۔
انہوں نے کہا کہ کیسزکو دوبارہ ٹرائل کرنےکا فیصلہ پنجاب بھر میں بلا تفریق کیا جائےگا، پراسیکیوٹرز تمام قانونی تقاضے پورے کرتے ہوئے کیسز کو دوبارہ دائر کریں۔
واضح رہے کہ اینٹی کرپشن پنجاب نے وفاقی وزیرداخلہ رانا ثنااللہ کے بھی وارنٹ گرفتاری جاری کررکھے ہیں۔

اسلام آباد (ایمرا نیوز)اسلام آباد ہائیکورٹ نے شہر میں دفعہ 144 کے قانون کے خلاف پی ٹی آئی کی درخواست کے قابل سماعت ہونے پر فیصلہ محفوظ کرلیا۔
اسلام آباد ہائیکورٹ میں پی ٹی آئی، سینیٹر سیف اللہ نیازی اور اسد عمر کی درخواست پر سماعت ہوئی جس میں عدالت نے زیر سماعت کیسز کے ساتھ درخواست کو منسلک کرنےکی ہدایت کی۔
اسد عمر نے عدالت میں بتایا کہ ڈسٹرکٹ مجسٹریٹ نے 2 ماہ کے لیے دفعہ 144 کا نفاذ کیا جو خلاف قانون ہے، اس پر عدالت نے استفسار کیا کہ آپ کس طرح متاثرہ ہیں؟ آپ کو کسی بات سے روکا گیا ہے؟ اس پر پی ٹی آئی کے وکیل بابر اعوان نے کہا کہ اس صورت میں ریلی نہیں نکالی جاسکتی۔
جسٹس اطہر من اللہ نے کہا کہ احتجاج یا ریلی نکالنے کا طریقہ ہے جس کے لیے اجازت لینی ہوتی ہے، دھرنا کیس کا ایک فیصلہ بھی موجود ہے، آپ نے وہ پڑھا ہے؟ اس جماعت کی دو صوبوں میں حکومت ہے، کیا ادھر کبھی دفعہ 144 نافذ نہیں کی گئی؟ لا اینڈ آرڈر کا معاملہ ایگزیکٹو نے دیکھنا ہے جس میں عدالت کبھی مداخلت نہیں کرے گی۔
اسد عمر کے وکیل نے کہا کہ یہ ایک سیاسی جماعت کی نہیں سابق ایم این اے کی درخواست ہے، اس پر جسٹس اطہر من اللہ نے ریمارکس دیےکہ یہ سابق رکن اسمبلی کی درخواست نہیں بلکہ پٹیشنر اب بھی ممبر قومی اسمبلی ہیں، جب تک استعفی منظور نہیں ہوا، تب تک وہ رکن اسمبلی ہیں۔
چیف جسٹس اسلام آباد ہائیکورٹ کا کہنا تھا کہ پنجاب اور کے پی میں اس جماعت کی حکومتیں ہیں، آپ پہلے ان صوبوں میں جا کر یہ قانون اسمبلی سے ختم کرائیں، صوبائی اسمبلیوں سے قانون ختم کراکے یہاں آ جائیں۔
بعد ازاں عدالت نے شہر میں دفعہ 144 کے قانون کے خلاف پی ٹی آئی کی درخواست کے قابل سماعت ہونے پر فیصلہ محفوظ کرلیا۔

اسلام آباد(ایمرانیوز)اینٹی کرپشن عدالت میں وزیر داخلہ رانا ثنااللہ سے متعلق کیس کی سماعت ہوئی جس میں اینٹی کرپشن حکام کی جانب سے رانا ثنااللہ کے خلاف توہین عدالت کی کارروائی کی استدعا مسترد کرتے ہوئے کہا گیا ہے کہ رانا ثنا اللہ ناتو عدالت میں پیش ہو رہے ہیں اور نا ہی گرفتاری دے رہے لہٰذا ان کے خلاف توہین عدالت کی کارروائی شروع کی جائے۔
تاہم عدالت نے رانا ثنا اللہ کے خلاف توہین عدالت کی کارروائی کی استدعا مسترد کرتے ہوئے اینٹی کرپشن ٹیم کو وزیر داخلہ کی گرفتاری کے لیےکوشش جاری رکھنے کا رانا ثناللہ کو گرفتار کرکے پیش کرنے کا حکم دیدیا۔
یاد رہے کہ ماڈل ٹرائل کورٹ کے جج غلام اکبر نے وزیر داخلہ رانا ثنا اللہ کے ناقابل ضمانت وارنٹ گرفتاری جاری کیے تھے۔

لاہور(ایمرا نیوز) سرکاری زمینوں پر قبضے کے الزامات پر اینٹی کرپشن پنجاب نے سابق اسپیکر پنجاب اسمبلی دوست محمد مزاری کو طلب کر لیا۔ترجمان اینٹی کرپشن پنجاب کے مطابق دوست مزاری کو سرکاری زمینوں پر قبضے کے الزامات پر طلب کیا گیا ہے، زاہد مزاری، شیر محمد مزاری اور معظم مزاری کو بھی طلب کیا ہے۔
ترجمان اینٹی کرپشن کا کہنا ہے کہ دوست محمد مزاری کے خلاف جعلی کاغذات کے ذریعےسرکاری زمینوں پرقبضےکےالزامات ہیں، اینٹی کرپشن پنجاب سرکاری زمینوں پرقابضین کیس میں انکوائری کررہاہے۔
دوست محمد مزاری اور دیگر کو 11 اکتوبر کو لاہور ہیڈ کوارٹرز میں طلب کیا گیا ہے، دوست مزاری کو ڈائریکٹر ویجیلینس ہیڈ کوارٹرز کے آفس میں دوپہر ایک بجے حاضر ہونے کا نوٹس بھیجا گیا ہے۔
ترجمان اینٹی کرپشن کے مطابق اسسٹنٹ کمشنر روجھان، تحصیلدار اور حلقہ پٹواری کو بھی ریکارڈ سمیت طلب کیا گیا ہے۔