Category جرم وانصاف

اسلام آباد(ایمر ا نیوز)چیف جسٹس پاکستان نے تاحیات نااہلی کے آرٹیکل 62 ون ایف کو ڈریکونین قانون قرار دے دیا۔
چیف جسٹس پاکستان کی سربراہی میں تین رکنی بینچ نے پی ٹی آئی رہنما فیصل واوڈاکی تاحیات نااہلی کےخلاف درخواست پر سماعت کی۔
دورانِ سماعت چیف جسٹس عمر عطا بندیال نے کہا کہ تاحیات نااہلی کا آرٹیکل 62 ون ایف ڈریکونین قانون ہے، ہم موجودہ کیس کومحتاط ہوکر سنیں گے، کیس کو تفصیل سے سنیں گے۔
وکیل وسیم سجاد نے عدالت کو بتایا کہ فیصل واوڈا نے 2018 میں الیکشن لڑا، 2 سال بعد ان کی غلط بیان حلفی پر نااہلی کی درخواست ہائیکورٹ میں دائر ہوئی۔
اس پر چیف جسٹس نے کہا کہ الیکشن کمیشن کو غلط بیان حلفی پر تحقیقات کا اختیار ہے، سپریم کورٹ الیکشن کمیشن کا تاحیات نااہلی کا حکم کالعدم قرار دے بھی دے تو حقائق تو وہی رہیں گے، الیکشن کمیشن نے فیصل واوڈاکیس میں حقائق کادرست جائزہ لیاہے، اس کیس میں سوال بس یہ ہے کہ الیکشن کمیشن تاحیات نا اہلی کا حکم دے سکتا ہے یا نہیں۔
بعد ازاں عدالت نے کیس کی سماعت 6 اکتوبر تک ملتوی کردی۔

لاہور(ایمرا نیوز) احتساب عدالت نے منی لانڈرنگ ریفرنس میں وزیراعظم شہبازشریف کی حاضری سے مستقل استثنیٰ کی درخواست منظور کرلی۔
لاہورکی احتساب عدالت کے جج قمر الزماں نے منی لانڈرنگ ریفرنس پر سماعت کی جس میں وزیراعظم شہباز شریف کی کیس میں مستقل حاضری معافی کی درخواست پر بھی سماعت ہوئی۔
عدالت نے وزیراعظم شہباز شریف کی مستقل حاضری معافی کی درخواست کو منظور کرلیا اور شہباز شریف کو عدالت میں پیشی کے لیے نمائندہ مقرر کرنے کی اجازت دے دی۔
عدالت نے حمزہ شہباز کی مستقل حاضری معافی کی درخواست پر نیب سے جواب طلب کرلیا اور ان کی ایک روزہ حاضری معافی کی درخواست منظور کرلی۔

اسلام آباد (ایمرا نیوز)خاتون جج سے متعلق دھمکی آمیز بیان پر اسلام آباد ہائیکورٹ کی جانب سے عمران خان کے خلاف توہین عدالت کا نوٹس ڈسچارج کرنے کے فیصلے پر مریم نواز نے ردعمل کا اظہار کیا ہے۔
مریم نواز نے ٹوئٹر پر فیصلے سے متعلق خبر شیئر کرتے ہوئے ایک بیان بھی جاری کیا۔مریم نے لکھا کہ ’توہین تو ہوئی ہے اور پوری دنیا کے سامنے ہوئی ہے، سو کیس خارج ہو گیا کہنے کی بجائے یہ کہنا زیادہ مناسب ہے کہ فتنہ کو معافی ملی ہے، درگزر ہوا ہے‘۔
یاد رہے کہ خاتون جج سے متعلق توہین آمیز بیان پر اسلام آباد ہائیکورٹ نے چیئرمین تحریک انصاف کے خلاف توہین عدالت کا نوٹس ڈسچارج کر دیا ہے۔
اسلام آباد ہائیکورٹ نے عمران خان پر فرد جرم عائد کرنے کی تاریخ مقرر کر رکھی تھی اور گزشتہ سماعت پر عدالت نے عمران خان کی جانب سے جمع کرائے گئے بیان حلفی کو تسلی بخش قرار دیا تھا۔
چیئرمین تحریک انصاف عمران خان خاتون جج سے معذرت کرنے کے لیے ان کی عدالت بھی گئے تھے تاہم وہ موجود نہیں تھی جس پر عمران خان نے ان کے ریڈر سے مکالمہ کرتے ہوئے کہا تھا کہ زیبا چوہدری صاحبہ کو بتانا، عمران خان معذرت کرنے آئے تھے۔

اسلام آباد(ایمرا نیوز)خاتون جج زیبا چوہدری سے متعلق توہین آمیز بیان پر اسلام آباد ہائیکورٹ نے چیئرمین تحریک انصاف کے خلاف توہین عدالت کا نوٹس ڈسچارج کر دیا۔
عمران خان کے خلاف توہین عدالت کیس کی سماعت دوپہر ڈھائی بجے مقرر تھی تاہم عمران خان کچھ منٹ کی تاخیر سے عدالت پہنچے، کیس کی سماعت چیف جسٹس اسلام آباد ہائیکورٹ اطہر من اللہ کی سربراہی میں 5 رکنی لارجر بینچ نے کی۔
سماعت کے آغاز پر عمران خان کے وکیل حامد خان نے کہا کہ ہم نے بیان حلفی جمع کروا دیا ہے جس پر چیف جسٹس اطہر من اللہ نے ریمارکس دیے کہ ہم نے بیان حلفی دیکھا ہے۔
چیف جسٹس اسلام آباد ہائیکورٹ اطہر من اللہ نے عمران خان کے خلاف توہین عدالت کا نوٹس ڈسچارج کرتے ہوئے ریمارکس دیے کہ عمران خان کا بیان حلفی دیکھا ہے، عمران خان کے کنڈکٹ سے مطمئن ہیں، عمران خان نے نیک نیتی ثابت کی اور معافی مانگنے کے لیے جج کے پاس گئے۔
عدالتی معاون اور ایڈیشنل اٹارنی جنرل عامر رحمان نے اعتراض اٹھاتے ہوئے کہا کہ عمران خان نے بیان حلفی میں غیر مشروط معافی نہیں مانگی جس پر چیف جسٹس نے کہا کہ آپ اپنی معروضات تحریری شکل میں پیش کر دیں، ہم تفصیلی فیصلے میں اسے شامل کر دیں گے۔
یاد رہے کہ اسلام آباد ہائیکورٹ نے آج عمران خان پر فرد جرم عائد کرنے کی تاریخ مقرر کر رکھی تھی اور گزشتہ سماعت پر عدالت نے عمران خان کی جانب سے جمع کرائے گئے بیان حلفی کو تسلی بخش قرار دیا تھا تاہم انہیں بیان حلفی جمع کرانے کا حکم دیا تھا۔
چیئرمین تحریک انصاف عمران خان خاتون جج سے معذرت کرنے کے لیے ان کی عدالت بھی گئے تھے تاہم وہ موجود نہیں تھی جس پر عمران خان نے ان کے ریڈر سے مکالمہ کرتے ہوئے کہا تھا کہ زیبا چوہدری صاحبہ کو بتانا، عمران خان معذرت کرنے آئے تھے۔

اسلام آباد(ایمرا نیوز) وفاقی حکومت نے پی ٹی آئی رہنما شہبازگل کی ضمانت منسوخی کے لیے سپریم کورٹ میں درخواست دائرکردی۔
رپورٹ کےمطابق ریاست کی جانب سے درخواست اسلام آباد سٹی مجسٹریٹ نے دائر کی جس میں مؤقف اختیار کیاگیا ہےکہ شہباز گل پر ریاست سے غداری کا الزام ہے اور انہوں نے بغاوت پر اکسانے کی کوشش کی جب کہ اسلام آباد ہائیکورٹ نے حقائق کا درست جائزہ نہیں لیا۔
اسلام آباد سٹی مجسٹریٹ کی جانب سے دائر درخواست میں شہباز گل کی ضمانت کے فیصلے کو کالعدم قرار دینے کی استدعا کی گئی ہے۔

لاہور(ایمرا نیوز)لاہور ہائیکورٹ نے مریم نواز کی پاسپورٹ واپسی کی درخواست منظور کر لی۔مریم نواز کی پاسپورٹ واپسی کے لیے درخواست پر سماعت چیف جسٹس لاہور ہائیکورٹ امیر بھٹی کی سربراہی میں 3 رکنی فل بینچ نے کی۔
چیف جسٹس امیر بھٹی نے وکیل امجد پرویز ایڈووکیٹ سے استفسار کیا کہ کیا مریم نوازنے پہلے بھی پاسپورٹ واپسی کی درخواستیں دائر کی تھیں، جس پر مریم کے وکیل نے بتایا کہ موجودہ درخواست کی روشنی میں پرانی درخواستیں غیر مؤثر ہو چکیں۔
امجد پرویز ایڈووکیٹ نے کہا کہ مریم نواز کو پاسپورٹ جمع کرانے پر ضمانت ملی، 4 سال ہو گئے لیکن ابھی تک چوہدری شوگر ملز کا کوئی ریفرنس نہیں آیا، اگر یہ کیس فائل کرتے اور مریم اس کا دفاع کرتیں تو صورتحال مختلف ہوتی، کسی کی نقل و حرکت کو روکنا بنیادی حقوق کا معاملہ بھی ہے۔
انہوں نے مزید کہا کہ مریم چاہتی تھیں کہ یہ کیس فائل ہوتا تاکہ وہ اس کے دفاع میں آتیں، لمبی تاخیر کرنا قانون کے غلط استعمال کے مترادف ہے، لمبی تاخیر پر عدالتیں بغیر میرٹ دیکھےکیس ختم کرا دیتی ہیں۔
مریم نواز کے وکیل نے جواب دیا کہ مریم نے 4 سال تک انتظار کیا ہے،کوئی ریفرنس دائر یا تفتیش نہیں کی گئی۔
جسٹس امیر بھٹی نے پھر پوچھا کہ کیا ہم ضمانت کے فیصلے میں شرط والے حصےکی ترمیم کریں گے یا اس حصے کو واپس لیں گے؟ جس پر امجد پرویز ایڈووکیٹ نے کہا کہ عدالت مریم نواز کی ضمانت کے حکم میں ترمیم کر سکتی ہے۔
جسٹس امیر بھٹی نے پوچھا کہ وفاقی حکومت کا اس پر کیا جواب ہے؟ڈپٹی اٹارنی جنرل نے کہا کہ ہمیں پاسپورٹ واپس دینے پر کوئی اعتراض نہیں ہے۔جسٹس امیر بھٹی نے پوچھا کہ کیا مریم کی ضمانت کے خلاف اپیل دائر کی گئی تھی؟ جس پر ڈپٹی اٹارنی جنرل نے کہا کہ مجھے اس بارے میں معلوم نہیں ہے، چیف جسٹس محمد امیر بھٹی نے کہا کہ تو وہ کون بتائے گا؟ یا آپ نے صرف ایک فقرہ سن لیا کہ کچھ نہیں کرنا، مخالفین آجائیں تو زمین آسمان ایک کر دیتے ہیں اپنے ہوں تو زمین پر بچھ جاتے ہیں۔
لاہور ہائیکورٹ نے مسلم لیگ ن کی نائب صدر کی درخواست منظور کرتے ہوئے مریم نواز کا پاسپورٹ انہیں واپس کرنے کی ہدایت کر دی۔

لاہور (ایمرا نیوز) وزیراعلیٰ پنجاب چودھری پرویز الٰہی نے کہا ہے کہ ماڈل ٹاؤن کیس میں انصاف کے تقاضے پورے کئے جائیں گے۔ متاثرین کو ہر صورت میں انصاف مہیا کیاجائے گا۔
وزیراعلیٰ پنجاب کی زیر صدارت اعلی سطح اجلاس ہوا، اجلاس میں سابق وفاقی وزیر مونس الٰہی، صوبائی وزیر راجہ بشارت اور صوبائی معاون خصوصی عامر سعید راں بھی موجود تھے۔ اجلاس میں ایڈووکیٹ جنرل احمد اویس،سیکرٹری قانون او ردیگر نے بھی شرکت کی۔ اجلاس میں سانحہ ماڈل ٹاؤن کیس کاجائزہ لیاگیا۔
اس موقع پر پرویز الٰہی نے کہا کہ ماڈل ٹاؤن کیس میں انصاف کے تقاضے پورے کئے جائیں گے۔ سانحہ ماڈل ٹاؤن کے متاثرین کو ہر صورت میں انصاف مہیا کیاجائے گا۔سانحہ ماڈل ٹاؤن میں مظلوم خاندانوں کو انصاف فراہم کرنا حکومت کی ذمہ داری ہے۔سانحہ کے ذمہ داروں کو ہر صورت انصاف فراہم کیاجائے گا۔
انہوں نے کہا کہ سانحہ ماڈل ٹاؤن میں انصاف کی ذمہ داری پوری کرکے اللہ تعالیٰ اور عوام کے سامنے سرخروہوں گے۔متاثرین سانحہ ماڈل ٹاؤن کی معاونت کے لئے تمام تر اقدامات بروئے کار لائیں گےسانحہ ماڈل ٹاؤن کے بعد سب سے پہلے وہاں پہنچے اور ان کی دادرسی کی۔

لاہور(ایمرا نیوز) مونس الٰہی اور بے نامی داروں کے خلاف منی لانڈرنگ کیس کا چالان عدالت میں جمع کرادیا گیا۔
وفاقی تحقیقاتی ادارے (ایف آئی اے) کی جانب سے جمع کرائے گئے چالان کے مطابق 4 ارب روپے کی 36 بے نامی اکاؤنٹس کے ذریعے منی لانڈرنگ کی گئی، مونس الٰہی خاندان پر نائب قاصد کے ذریعے 73 کروڑ روپے کے شوگر ملز شیئر خریدنے کا الزام ہے، منی لانڈرنگ میں ملوث قیصر اقبال بھٹی کو 2019 میں پنجاب اسمبلی میں نائب قاصد بھرتی کیا گیا، دونوں بے نامی دار وزیراعلیٰٰ کے پرنسپل سیکرٹری محمد خان بھٹی کے قریبی ہیں۔
ایف آئی اے کا کہنا ہےکہ بے نامی اکاؤنٹس باہر سے کروڑوں روپے کی منی لانڈرنگ کے لیے بھی استعمال ہوئے، کروڑوں روپے کی ٹرانزیکشن نائب قاصد پنجاب اسمبلی اور چوہدری فیملی ممبرز کے مابین ہوئی، ملزمان 2008 سے 2011 کے درمیان کی گئی 73 کروڑ روپے کی منی ٹریل دینے میں ناکام رہے۔
ایف آئی اے نے دستاویزی ثبوت چالان کے ساتھ عدالت میں جمع کرایا۔

اسلام آباد(ایمرا نیوز) ڈسٹرکٹ اینڈ سیشن کورٹ نے بغاوت پر اکسانے کے مقدمے میں شہباز گل کو طلب کرلیا۔
شہبازگِل کیس میں ایڈیشنل سیشن جج طاہر عباس سپرا کو جج مقرر کیا گیا ہے جب کہ سماعت میں شہبازگل عدالت سے غیرحاضر رہے اور پراسیکیوٹر رضوان عباسی عدالت میں پیش ہوئے۔
سیشن کورٹ اسلام آباد نے اس مقدمے میں شہباز گِل کو طلب کیا ہے اور انہیں 6 اکتوبر کو عدالت کے سامنے پیش ہونے کا حکم دیا گیا ہے۔
پولیس نے شہباز گِل کے خلاف چالان سیشن کورٹ میں پیش کردیا جس پر ٹرائل کے لیے شہباز گِل کی طلبی کا سمن جاری کیا گیا ہے۔

اسلام آباد(ایمرا نیوز) دفعہ 144 کی خلاف ورزی کے کیس میں چیئرمین تحریک انصاف عمران خان کی ضمانت منظور ہو گئی۔
دفعہ 144 کے کیس میں عمران خان ضمانت کے لیے ایڈیشنل سیشن جج ظفر اقبال کی عدالت میں پیش ہوئے۔
ایڈیشنل سیشن جج ظفر اقبال نے بابر اعوان کو وقت پر عدالت آنے پر سراہا اور کہا کہ اچھا لگا وقت پر آئے، نوجوانوں کو بھی یہی پیغام دینا چاہیے۔
جج کے ریمارکس پر بابر اعوان نے ساتھی وکلاء کو پیغام دیتے ہوئے کہا کہ نوجوانو سنو، وقت کی پابندی کرو۔
یاد رہے کہ گزشتہ سماعت پر پی ٹی آئی کے رہنماؤں کے وقت پر نہ آنے پر عدالت نے برہمی کا اظہار کیا تھا۔