Category دلچسپ و عجیب

چین(نیٹ نیوز)
چین میں بین الاقوامی ایوی ایشن فیسٹیول کے دوران ایئر شو کا انعقاد کیا گیا جس میں ہوا بازی کے شعبے سے تعلق رکھنے والے ماہر پائلٹس نے اپنے فن کا بھرپور مظاہرہ کر کے دیکھنے والوں کو دنگ کردیا۔

اس انٹرنیشنل ایوی ایشن فیسٹیول کے دوران منعقد کئے گئے اس ایئر شو میں چین ، امریکا اور برطانیہ سمیت مختلف ممالک سے تعلق رکھنے والی ایکروبیٹکس ٹیموں نے حصہ لیا اور جہاز اُڑاتے ہوئے ایسے حیرت انگیز کرتب دکھائے کہ شائقین بھی تعریف کئے بنا رہ نہ سکے۔

واضح رہے یہ ایوی ایشن فیسٹیول میں جدید طیارے بھی نمائش کیلئے پیش کئے جائیں گے جبکہ ایئر شو منعقد کیا جانے والے ایئر شو چار روز تک جاری رہے گا۔

روس(نیٹ نیوز)

روسی دارلحکومت ماسکو کے سب وے اسٹیشن پر مسافروں نے فری ٹکٹ حاصل کرنے کیلئے اٹھک بیٹھک شروع کردی ۔

چندسال قبل انتظامیہ نے شہریوں کو صحت مند رکھنے اور ورزش کے رحجا ن کو فروغ دینے کیلئے یہ فری ٹکٹ آفر متعارف کروائی تھی جو اب تک کامیابی کے ساتھ جاری ہے۔

فری ٹکٹ حاصل کرنے کے خواہش مند مسافر 30مرتبہ اْٹھک بیٹھک کرتے ہیں جس کے بعد وینڈنگ مشین انہیں ٹکٹ فراہم کردیتی ہے۔

روسی صدر ولادیمیر پیوٹن کے مختلف انداز لِئے 2019کیلنڈر کا ایڈیشن جاری کر دیا گیا ہے۔

اس کیلنڈر میں کہیں تو پیوٹن چیتے اور ننھے کتے کو پیار کرتے دکھائی دے رہے ہیں، تو کہیں بچے کے ساتھ خوشگوار موڈ میں نظر آرہے ہیں، اور تو اورتو سائیکل چلاتے اورآئس ہاکی کھیلتے بھی دکھائی دے رہے ہیں۔

صرف یہی نہیں بلکہ روسی صدر پیوٹن دیگر صفحات پر ہیٹ پہنے گھُڑسواری کرتے، پانی میں ڈبکی لگاتے اوردیگر ایڈونچرز کرتے بھی دیکھے جاسکتے ہیں۔

پیرس:(نیٹ نیوز/ایمرا نیوز) آپ نے بچوں کی کہانیوں (فیری ٹیلز) فلموں بالخصوص ’ہینسل اینڈ گریٹل‘ میں ایک گھر دیکھا ہوگا جو مکمل طور پر چاکلیٹ اور کھانے پینے کی اشیا سے بنا ہوتا ہے لیکن اب فرانس میں ایک ایسا ہی چھوٹا کاٹیج بنایا گیا ہے جس کی ہر شے چاکلیٹ سے بنی ہے۔

اس گھر کی دیواریں، چھت، آتش داں، گھڑیال، کتابیں اور یہاں تک کہ فانوس بھی چاکلیٹ سے ڈھالے گئے ہیں۔ پیرس کے جنوب مغربی نواح میں قائم اس کاٹیج کو فرانس کے مشہور چاکلیٹ ڈیزائنر جین لوک ڈیکلوزو نے بنایا ہے۔ اس کی خاص بات یہ ہے کہ بطخوں کا تالاب اور خود بستر تک چاکلیٹ سے بنے ہیں یعنی نام کی چند چیزوں کی سوا گھر کا بیشتر حصہ چاکلیٹ سے بنایا گیا ہے۔

جین لوک نے پوری زندگی چاکلیٹ سے حیرت انگیز اشیا تخلیق کی ہیں اور اب اس گھر کی تیاری کے لیے بھی انہوں نے بہت سے نئے انداز اور تکنیک پر کام کیا ہے۔
لیکن اب سوال ہے کہ کیا اس گھر میں رہا جاسکتا ہے؟ تو اس کا جواب اثبات میں ہے۔ ہوٹلوں کی بکنگ کی ایک بین الاقوامی ویب سائٹ کے مطابق جو لوگ یہاں رات گزارنا چاہتے ہیں وہ 5 اور 6 اکتوبر کو یہاں ٹھہر سکتے ہیں۔
یہاں رکنے والے افراد چاکلیٹ گھر میں ایک ورکشاپ میں حصہ لے سکیں گے تاکہ وہ اسی طرح کے چاکلیٹ گھر کا ایک ماڈل بناسکیں۔ اس کے علاوہ یہاں کے دلکش پھول باغ میں بیٹھ کر لذیذ کھانے بھی کھاسکیں گے۔

بیجنگ: (نیٹ نیوز/ایمرا نیوز) چین کے دیہات کی رہائشی 28 سالہ لی لی تان ایک کسان ہیں جو زرخیز زمین ہی نہیں بلکہ ایک تخلیقی ذہن بھی رکھتی ہیں۔ لی لی تان نے شادی میں مہنگے عروسی لباس پہننے کی خواہش مند خواتین کے لیے ایک انوکھی ترکیب سوچی جس نے سوشل میڈیا پر دھوم مچا دی۔
شادی انسانی زندگی کا اہم ترین موڑ ہے۔ یہ خوشیوں بھرے لمحات ہوتے ہیں جنہیں ہر خاندان اپنے اپنے علاقائی تہذیبوں سے مزید رنگین اور خوشنما بناتے ہیں۔ سب ہی کی خواہش ہوتی ہے ان لمحات کو یادگار بنالیا جائے۔ تاہم شادی کے اخراجات ان خواہشات کے پورا ہونے میں بڑی رکاوٹ بنتے ہیں۔

چین میں ایک خاتون لی لی تان کسان نے سیمنٹ کے 40 استعمال شدہ تھیلوں سے عروسی لباس تیار کرلیا۔لی لی تان کے گھر میں تعمیراتی کام جاری تھا اور اس دوران سیمنٹ کے خالی تھیلوں کا انبار لگ گیا جنہیں کام میں لانے کے لیے بے کار تھیلوں سے عروسی لباس تیار کرلیا اور اس کام میں انہیں صرف تین گھنٹے لگے۔ عروسی لباس کا ڈیزائن لی لی تان نے ایک فیشن میگزین میں دیکھا تھا۔
لی لی تان نے سیمنٹ کے خالی تھیلوں کو کپڑے کی طرح استعمال کرتے ہوئے 40 تھیلوں کو باندھنے والی ڈوری کی مدد سے خود ہی عروسی لباس سی لیا۔ عروسی لباس زیب تن کیے لی لی تان کی ویڈیو کو سوشل میڈیا پر کافی پذیرائی ملی۔

البراجیل (نیٹ نیوز/ایمرا نیوز) مصر میں گدھوں کی میراتھن دوڑ،اول آنے والوں کے لیے انعامات کا بھی انتظام کیا گیا تھا۔ سرگرمی کا مقصد شہریوں کو صحت مند تفریح فراہم کرنا ہے۔
مصرکی الجیزہ گورنری کے البراجیل شہر میں شہری بڑے شوق اور اہتمام کے ساتھ گدھوں کی میراتھن دوڑ کا مقابلہ منعقد کرتے اور اس میں بڑھ چڑھ کر حصہ لیتے ہیں۔ ذرائع کے مطابق البراجیل میں گدھوں کی میراتھن دوڑ ایونٹ کا مقصد شہریوں کو سماجی اور ذہنی پریشیانیوں کا بوجھ کم کرنے کی کوشش کرنا ہے۔
گدھوں کی دوڑ کا مقابلہ کرنے والے ایک منتظم عماد سعودی نے میڈیا سے بات کرتے ہوئے کہا کہ دو سال قبل انہوں نے مقامی نوجوانوں کو کوئی ایسی تفریحی سرگرمی شروع کرنے کی تجویز پیش کی جس کی مدد سے مقامی شہریوں میں زندگی کی پریشانیوں کا بوجھ کم کیا جاسکے۔

اس حوالے سے مختلف تجاویز سامنے آئیں مگر ان پرعمل درآمد نہیں ہوسکا۔ اس دوران گدھوں کی میراتھن کرانے کا تخیل پیدا ہوا۔ یہ خیال بہت سے لوگوں کو پسند آیا۔ چونکہ مقامی آبادی زراعت پیشہ ہے۔ اس لیے شہر میں گدھوں کی کمی نہیں۔
گدھوں کی پہلی میراتھن میں 20 گدھوں نے حصہ لیا مگر دوسرے سال اس مقابلے میں شامل ہونے والوں کی تعداد توقع سے کہیں زیادہ تھی۔ شہریوں نے تماشائیوں کی شکل میں بھی اس کی حوصلہ افزائی کی۔

(نیٹ نیوز/ایمرا نیوز)
یوں تو آپ نے فلموں میں پولیس کو مجرموں کا پیچھا کرتے دیکھا ہی ہوگا لیکن جناب ایسا ہی منظرامریکا میں اُس وقت دیکھنے کو ملا جب پولیس مجرم کا پیچھا کرتے دکھائی دی۔

یہ واقعہ امریکی ریاست واشنگٹن میں دیکھا گیا جب پولیس اہلکار اپنی موبائل میں ایک کار کا پیچھا کر رہے تھے اور کئی گھنٹوں تک پیچھا کرنے کے بعد بلا آخر پولیس نے مجرم کو دھر ہی لیا۔
رپورٹ کے مطابق اہلکاروں نے چور کا پیچھا قانون کی خلاف ورزی کرنے پر شروع کیا جو گاڑی چرا کر فرار ہو رہا تھا اور معمول کی چیکنگ پر رکنے اور لائسنس دکھانے کے بجائے بھاگ نکلا تھا جبکہ انتظامیہ کی جانب سے واقعے کی مزید تفتیش کی جا رہی ہے۔

سنگا پور:(نیٹ نیوز/ایمرا نیوز) اگرچہ دنیا میں کئی اشیا حیرت انگیز قیمتوں میں فروخت ہوتی ہیں تاہم پالتو مچھلی کا کروڑوں روپوں میں فروخت ہونا بہت ہی حیرت انگیز عمل ہے۔ ایک پالتو مچھلی ایسی بھی ہے جس کےلیے لوگ 3 لاکھ ڈالر یعنی سوا 3 کروڑ روپے قیمت دینے پر تیار ہیں۔ مچھلی کا نام ’ایشیئن آروانا‘ ہے۔
اس مچھلی کا دوسرا نام ’ڈریگن فِش‘ ہے جو عام پالتو مچھلی نہیں بلکہ جنوب مشرقی ایشیا میں بہت شہرت رکھتی ہے۔ بعض لوگوں نے اس کی قیمت کو افواہ قرار دیا ہے لیکن حقیقت یہ ہے کہ اس مچھلی کا ایک بچہ سنگاپور میں 35 ہزار اور نایاب سفید (ایلبینو) مچھلی 80 ہزار میں آسانی سے فروخت ہوجاتی ہے۔

یہ مچھلی زیادہ سے زیادہ تین فٹ تک پہنچتی ہے لیکن حیرت انگیز بات یہ ہے کہ اسے پالنے والے اس کی پلاسٹک سرجری پر بھی رقم خرچ کرتے ہیں، آنکھوں کو خوبصورت بنانے کے عمل پر 10 ہزار اور ٹھوڑی اٹھانے پر 8 ہزار روپے خرچ ہوجاتے ہیں۔
جنوب مشرقی ایشیا میں اس مچھلی کو دولت اور خوش بختی کی علامت سمجھا جاتا ہے۔ ایک کہانی یہ مشہور ہے کہ جب اس کے پالنے والے کا جانی یا مالی نقصان ہونے والا ہوتا ہے تو وہ اپنے ایکویریم سے باہر چھلانگ لگا دیتی ہے۔ پالنے کی غرض سے بڑے پیمانے پر پکڑے جانے کی بنا پر یہ مچھلی اب اپنے قدرتی مسکن سے تیزی سے ختم ہورہی ہے۔
1975 میں 183 سے زائد ممالک نے اس کے تحفظ پر زور دیتے ہوئے اس کی بین الاقوامی تجارت پر پابندی عائد کردی تھی جس کے بعد یہ غیرقانونی طور پر فروخت ہورہی ہے اور بہت مہنگے داموں میں خریدی اور بیچی جاتی ہے۔ حقیقت یہ ہے کہ پابندی کے بعد یہ مچھلی ایک قیمتی متاع کی حیثیت اختیار کرچکی ہے یہاں تک کہ لوگ اسے بڑی تعداد میں چوری بھی کرتے ہیں۔

امریکہ(نیٹ نیوز/ ایمرا نیوز) دنیا کا مہنگا ترین لڑاکا طیارہ ایف تھرٹی فائیو ٹریننگ کے دوران امریکا میں گر کر تباہ ہو گیا، تاہم طیارے کا پائلٹ محفوظ رہا۔
طیارے کی تباہی یقینی دیکھتے ہوئے طیارے کے پائلٹ نے پیراشوٹ کے ذریعے کود کر اپنی جان بچائی، امریکا کی فضائیہ کی 17سالہ تاریخ میں اتنے قیمتی طیارے کی تباہی کا اپنی نوعیت کا یہ پہلا واقعہ ہے۔
امریکا کا ایف35 فائٹر جیٹ طیارہ جو ایف 35بی لائٹننگ ٹو کے نام سے بھی اپنی شناخت رکھتا ہے اس کی مالیت سو ملین ڈالر یعنی 12 ارب 31 کروڑ 50 لاکھ پاکستانی روپے ہے۔
طیارے کے حادثے کے سلسلے میں تحقیقات شروع کر دی گئی ہیں۔
اسٹیلتھ ٹیکنالوجی سے لیس ایف 35فائٹر جیٹ طیارے کو جمعرات کو امریکی کی جانب سے افغانستان میں پہلی مرتبہ کسی فضائی کارروائی کے سلسلے میں استعمال کیا گیا تھا۔

نئی دہلی: (نیٹ نیوز/ایمرا نیوز) روئے زمین پر ایک ایسا گاؤں بھی ہے جہاں کے مکانات، تعلیمی ادارے ،یہاں تک کہ بینکوں میں بھی کوئی دروازہ موجود نہیں اس کے باوجود یہاں کے باسی چین کی نیند سوتے ہیں۔
بھارتی ریاست مہاراشٹرا میں واقع ’’شنی شنگناپور ‘‘نامی گاؤں کی تمام عمارتیں ’’بے در‘‘ ہیں۔ داخلی دروازے نصب کرنے سے گریز کا سبب مقامی ہندو آبادی کا مذہبی عقیدہ ہے جسکے مطابق صدیوں پہلے دیوتا شنی مہاراج گاؤں کے مُکھیا کے خواب میں آئے اور حکم دیا کہ کسی بھی گھر میں دروازہ نہ لگایا جائے کیونکہ میں خود گاؤں کی حفاظت کرونگا۔ اسکے بعد سے یہ گاؤں ’’بے در ‘‘ ہی چلا آرہا ہے یہاں تک کہ عوامی بیت الخلا بھی دروازے سے محروم ہیں تاہم گاؤں کی خواتین کے مطالبے پر دروازوں پر پردے ڈال دیئے گئے ہیں۔
رات کے وقت گھر کے داخلی دروازوں پر ایک تختی لگا دی جاتی ہے تاکہ کسی خونخوار جانور کے داخلے کو روکا جا سکے۔ یہاں کوئی کسی سے ملنے کیلئے آتا ہے تو اسکے گھر کے سامنے پہنچ کر نام پکارتا ہے کیونکہ کھٹکھٹانے کیلئے دروازہ ہی موجود نہیں ہوتا یہاں کوئی دکان ایسی نہیں ملے گی جہاں تالے چابی دستیاب ہوں۔ لوگوں کی بڑی تعداد اس منفرد گاؤں کو دیکھنے اور شنی دیوتا کی پوجا کرنے کیلئے آتی ہے، اب روزانہ یہاں 40 ہزار یاتری آتے ہیں۔ پندرہ برس قبل گاؤں کے باشندوں کا انحصار گنے کی کاشت پر ہوتا تھا مگر اب یاتریوں کی صورت میں آنیوالے سیاح ان کی آمدنی کا بڑا ذریعہ بن گئے ہیں۔