Category بزنس

ملک بھر میں مسلسل دوسرے کاروباری روز کے دوران روپے کے مقابلے میں امریکی ڈالر 15 پیسے مہنگا ہو گیا جبکہ سٹاک مارکیٹ میں اُتار چڑھاؤ کے بعد 33 پوائنٹس کی تیزی ریکارڈ کی گئی۔

سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے دوسرے کاروباری روز کے دوران انٹر بینک میں روپے کے مقابلے میں امریکی ڈالر مزید 15 پیسے مہنگا ہو گیا اور قیمت 159 روپے 36 پیسے سے بڑھ کر 159 روپے 51 پیسے ہو گئی ہے۔

یاد رہے کہ گزشتہ روز بھی انٹر بینک میں روپے کے مقابلے میں ڈالر 19 پیسے مہنگا ہو گیا تھا اور قیمت 159 روپے 17 پیسے سے بڑھ کر 159 روپے 36 پیسے ہو گئی تھی۔

دوسری طرف پاکستان سٹاک مارکیٹ میں اُتار چڑھاؤ کے بعد 33.41 پوائنٹس کی تیزی ریکارڈ کی گئی، انڈیکس 47480.49 پوائنٹس کی سطح پر پہنچ کر بند ہوا۔ پورے کاروباری روز کے دوران کاروبار میں 10 کروڑ 24 لاکھ 58 ہزار 788 شیئرز کا لین دین ہوا۔

بجلی صارفین کے لیے اچھی خبر ہے، بجلی 26 پیسے فی یونٹ سستی کر دی گئی۔

تفصیلات کے مطابق مئی کی ماہانہ فیول ایڈجسٹمنٹ کی مد میں بجلی 26 پیسے فی یونٹ سستی کر دی گئی ، نیپرا نے اپنا فیصلہ جاری کردیا ہے۔ صارفین کو جولائی کے بجلی بلوں میں ریلیف ملے گا۔

نیپرا کی طرف سے جاری فیصلے کے مطابق بجلی سستی کرنے کے فیصلے کا اطلاق لائف لائن اور زرعی صارفین پر نہیں ہوگا، فیصلے کا اطلاق کے الیکٹرک صارفین پر بھی نہیں ہوگا۔

ملک کے سولہ بڑے شہروں میں چینی کی فی کلو قیمت ایک سو روپے یا اس سے بھی تجاوز کر گئی، ایک ہفتے میں چینی دس روپے تک فی کلو مہنگی ہوئی، کراچی اور اسلام آباد کے شہری ملک میں سب سے مہنگی چینی خریدنے پر مجبور ہیں۔

حکومتی دعوے کام نہ آئے، ایک ہفتے کے دوران چینی 10روپے فی کلو تک مہنگی ہو گئی، ادارہ شماریات کے مطابق ایک ہفتے کے دوران وفاقی دارالحکومت میں چینی 10روپے فی کلو، کراچی، لاہور اور بہاولپور میں 5 روپے، سرگودھا، سکھر، بنوں میں 4 روپے جبکہ لاڑکانہ اور خضدار میں 3 روپے فی کلو تک مہنگی ہوئی۔ حیدر آباد، گوجرانوالہ اور فیصل آباد میں بھی چینی کی فی کلو قیمت میں 2 روپے کا اضافہ ہوا۔

اضافے کے بعد کراچی اور اسلام آباد میں چینی کی فی کلو قیمت سب سے زیادہ 110روپے تک پہنچ گئی۔ لاہور، راولپنڈی، بہاولپور میں چینی کی قیمت 105 روپے، بنوں میں 102 روپے جبکہ گوجرانوالہ، سیالکوٹ، فیصل آباد، سرگودھا ملتان،حیدر آباد،سکھر، پشاور ،کوئٹہ اور خضدار میں چینی 100 روپے کلو فروخت ہو رہی ہے۔

کراچی: انٹر بینک میں پیر کو روپے کے مقابلے میں ڈالر مہنگا ہوگیا جبکہ مقامی اوپن کرنسی مارکیٹ میں ڈالر کی قدر مستحکم رہی۔

فاریکس ایسوسی ایشن آف پاکستان کے مطابق پیر کو انٹر بینک میں روپے کے مقابلے میں ڈالر 20 پیسے مہنگا ہوگیا جس کے بعد ڈالر کی قیمت خرید 159.10 روپے سے بڑھ کر 159.30 روپے اور قیمت فروخت 159.20 روپے سے بڑھ کر 159.40 روپے ہو گئی تاہم مقامی اوپن کرنسی مارکیٹ میں ڈالر کی قیمت خرید 159.40 روپے اور قیمت فروخت 159.70 روپے پر برقرار رہی۔

فاریکس رپورٹ کے مطابق یورو کی قدر میں 60 پیسے کی کمی واقع ہوئی جس سے یورو کی قیمت خرید 187 روپے سے گھٹ کر 186.50 روپے اور قیمت فروخت 189 روپے سے گھٹ کر 188.40 روپے ہو گئی۔

اسی طرح کمی سے برطانوی پاؤنڈ کی قیمت خرید 219 روپے سے گھٹ کر 218 روپے اور قیمت فروخت 221 روپے سے کم ہو کر 220 روپے پر آگئی۔

کراچی: عالمی مارکیٹ میں سونے کی فی اونس قیمت 7 ڈالرز کمی سے 1801 ڈالرز کی سطح پر ریکارڈ کی گئی جس کے باعث مقامی مارکیٹ میں بھی سونے کے نرخ کم ہوگئے۔

عالمی منڈی میں سونے کے نرخ میں کمی کے باعث مقامی مارکیٹ میں سونے کی فی تولہ قیمت 450 روپے کمی سے 1 لاکھ 8 ہزار 850 اور دس گرام سونے کی قیمت 386 روپے کمی سے 93 ہزار 321 روپے رہی جبکہ چاندی کی فی تولہ قیمت 1440 روپے کی سطح پر مستحکم ریکارڈ کی گئی۔

اسلام آباد: آذربائیجان اسٹیٹ آئل کمپنی (سوکار) نے پاکستان کو تیل اور گیس کی فراہمی کے لیے 22 کروڑ ڈالر سے زیادہ کی دو کریڈٹ لائنوں کی فراہمی کی پیشکش پر پیٹرولیم ڈویژن کی مسلسل خاموشی پر مایوسی کا اظہار کیا ہے۔

رپورٹ کے مطابق باخبر ذرائع نے بتایا کہ باکو میں پاکستان کے سفیر بلال حئی نے اس حوالے سے حکومت کو خبردار کرتے ہوئے کہا تھا کہ وہ اس معاملے سے اس انداز میں نمٹے جس سے دونوں ممالک کے مابین قریبی دوستانہ تعلقات پر منفی اثرات مرتب نہ ہوں۔

جنوری میں آذربائیجان کے وزیر خارجہ کے دورہ پاکستان کے دوران دونوں حکومتوں نے تیل اور گیس کے شعبے میں باہمی تعاون کو وسعت دینے پر اتفاق کیا تھا تاکہ دونوں ممالک کے مابین اسٹریٹیجک دوستانہ تعلقات کو فروغ دیا جا سکے۔

اس دورے کے نتیجے میں آذربائیجان کی اسٹیٹ آئل کمپنی ‘سوکر ٹریڈنگ’ نے مارچ میں باضابطہ طور پر پاکستان اسٹیٹ آئل (پی ایس او) اور پاکستان ایل این جی لمیٹڈ (پی ایل ایل) کو حکومت سے حکومت (جی 2 جی) انتظام کے تحت پیٹرولیم مصنوعات اور ایل این جی کارگوس کی فراہمی کی پیش کش کی تھی۔

پاکستان کے سفیر بلال حئی نے بتایا کہ اس پیش کش میں ایل این جی کے لیے 12 کروڑ ڈالر اور پیٹرولیم مصنوعات کے 10 کروڑ ڈالر پر مشتمل دو الگ الگ کریڈٹ لائنیں 60 دن کے لیے شامل ہیں۔

انہوں نے بتایا کہ کمپنی کے چیف آپریٹنگ افسر (سی ای او) توگورول کوچارلی نے ان سے رابطہ کیا تھا تاکہ وہ آذربائیجان کی اس جامع پیشکش پر پاکستان حکومت کا جواب جان سکیں۔

اس حوالے سے تبصرے کے لیے وزیر اعظم کے معاون خصوصی برائے پٹرولیم اور توانائی تابش گوہر سے رابطہ کیا گیا لیکن کوئی جواب موصول نہیں ہوا۔

سفارتی نوٹ کے مطابق آذربائیجان کے وزیر خارجہ نے ’طویل خاموشی اور پیٹرولیم ڈویژن کی جانب سے جواب نہ ملنے پر مایوسی‘ کا اظہار کیا تھا۔

انہوں نے آذربائیجان کے وزیر خارجہ کا حوالے دے کہا کہ سوکر ’برادر ملک پاکستان کی توانائی کی ضروریات کو پورا کرنے میں مدد کے لیے اب بھی تعاون چاہتا ہے لیکن مارچ میں کی جانے والی پیش کش غیر معینہ مدت کے لیے نہیں تھی‘۔

علاوہ ازیں ایک سینئر سرکاری عہدیدار نے اتفاق کیا کہ اگر تجارتی یا دیگر معاملات پر پیش کش سے انکار کردیا گیا تو کوئی بڑی بات نہیں ہوئی لیکن دوستانہ تعلقات میں غیرسنجیدہ طرز عمل ایک ناپسندیدہ اقدام ہے اور اس پر سنجیدگی سے غور کرنا چاہیے۔

اسلام آباد: ایف بی آر نے نئی ایکسپورٹ سہولتی اسکیم2021 کے قوانین کا مسودہ جاری کردیا ہے لہٰذا یہ اسکیم14اگست سے نافذ العمل ہو گی۔

ایف بی آر نے نئی ایکسپورٹ سہولتی اسکیم2021 کے قوانین کا مسودہ جاری کردیا جب کہ تمام اسٹیک ہولڈرز بشمول صنعت سے وابستہ افراد اور ایکسپورٹرز سے ان قوانین پر آرا طلب کی گئی ہیں،موجودہ سکیموں جیسے مینوفیکچرنگ بانڈ، ڈی ٹی آر ای اور ایکسپورٹ اورینٹڈ اسکیموں کو مرحلہ وار دو سال کے اندر ختم کر دیا جائے گا جس کے بعد نئی ایکسپورٹ سہولتی اسکیم مکمل طور پر لاگو ہو جائیگی۔

نئی سہولتی سکیم کے تحت کم از کم ڈاکیومینٹیشن کی ضرورت اور چھوٹے اور درمیانے درجے کے انٹرپرائزز کی حوصلہ افزائی ہو گی۔ یہ اسکیم وی بوک اور پاکستان سنگل ونڈو کے تحت مکمل طور پر خودکار ہو گی۔ اس اسکیم کی نمایاں خصوصیت میں پوسٹ کلیئرنس آڈٹ اور کنٹرول شامل ہے۔

اسلام آباد: وفاقی حکومت نے سپورٹس انڈسٹری کو فروغ دینے کیلئے کھیلوں کے سامان کی برآمدات پر0.93 فیصد سے4.45 فیصد تک ڈیوٹی ڈراء بیک کی سہولت دینے کا فیصلہ کیا ہے۔

تفصیلات کے مطابق وفاقی حکومت نے اسپورٹس انڈسٹری کو فروغ دینے کیلئے کھیلوں کے سامان کی برآمدات پر اعشاریہ 93 فیصد سے 4 اعشاریہ 45 فیصد تک ڈیوٹی ڈراء بیک کی سہولت دینے کا فیصلہ کیا ہے، کھیلوں کے سامان کی برآمد پر ڈیوٹی ڈراء بیک کی فراہمی کا اطلاق 5 جولائی 2021سے کیا گیا ہے۔

فیڈرل بورڈ آف ریونیو(ایف بی آر) کی جانب سے جاری کردہ نوٹیفکیشن کے مطابق آئس ہاکی شافٹ سمیت دیگر اسپورٹس گُڈز کی برآمد پر 3.97 فیصد اور آئس ہاکی بلیڈ کی برآمد پر3.39 فیصد کے حساب سے ڈیوٹی ڈراء بیک دیا جائے گا، اس اقدام کا مقصد کھیلوں کے سامان کی برآمدات کو فروغ دینا ہے اور ملک میں اسپورٹس گڈز تیار کرنے والی انڈسٹری کو ترقی دے کر روزگار کے مواقع پیدا کرنا ہے، اس طرح ان اشیاء کی برآمدات کو فروغ ملے گا اور برآمدات کے بڑھنے سے ملک کو زرمبادلہ حاصل ہوگا۔

نوٹیفکیشن کے مطابق ٹینس راکٹ کی برآمد پر3.76 فیصد، بیڈ منٹن راکٹ کی برآمد پر 3.73فیصد، اسکواش راکٹ کی برآمد پر 4.08 فیصد، اسکیٹ بورڈ کی برآمد پر 2.71 فیصد، اسٹریٹ ہاکی کی برآمد پر3.85 فیصد، اسنوکر اور گالف شافٹ کی برآمد پر 3.54 فیصد، فیلڈ ہاکی اسٹک کی برآمد پر 2.53فیصد، فیلڈ ہاکی بمعہ ووڈن ہیڈ اور گرافٹ ساٹ کی برآمد پر4.14 فیصد، بیڈ منٹن راکٹ بمعہ ایلمونیئم ہیڈ اور گرافٹ شافٹ کی برآمد پر3.52 فیصد، پیڈل ٹینس راکٹ کی برآمد پر 1.67فیصد، رولر ہاکی کی برآمد پر4.45 فیصد، کینیو کے لئے پیڈل کی برآمد پر 2.74 فیصد، مصنوعی لیدر سے بنے ہوئے بیس بال کی برآمد پر 0.93 فیصد کے حساب سے ڈیوٹی ڈراء بیک کی سہولت فراہم کی جائے۔

جی 20 ممالک نے معاشی سرگرمیوں کی بحالی میں بھارتی وائرس ڈیلٹا کو خطرہ قرار دے دیا۔

ایک بیان میں جی 20 ممالک کے وزرائے خزانہ نے خبردار کرتے ہوئےکہا کہ تیزی سے پھیلنے والا بھارتی کورونا وائرس ڈیلٹا معیشت کی بحالی میں رکاوٹ بنتے ہوئے سرگرمیوں کی رفتارسست کر رہاہے۔

جی 20 کے وزرائے خزانہ نے مختلف ممالک میں ویکسی نیشن مہم کی سست روی پر بھی تشویش کا اظہارکیا ہے۔

ادھر فرانس کے وزیر معاشیات کا کہنا ہےکہ جی 20 ممالک کی جانب سے بہترین معیشت کی پیش گوئی کی گئی ہے تاہم کورونا کی بھارتی قسم سب کچھ الٹ کر رکھ دےگی۔

لاہور: پاکستان پوسٹ نے جنوبی پنجاب کے شہر ملتان میں پہلے ایمازون فُل فلمنٹ اینڈ فیسلیٹیشن سینٹر (اے ایف ایف سی) کا افتتاح کرنے کی تیاری مکمل کرلی۔

اے ایف ایف سی کا افتتاح عید الاضحیٰ کے بعد ہوگا، اس سینٹر کے ذریعے مقامی طور پر ہاتھ سے تیار کی جانے والی اور ثقافتی اشیا کی بین الاقوامی مارکیٹ میں رسائی کی راہ ہموار ہوگی۔

رپورٹ کے مطابق ڈیڑھ ماہ قبل وزیر اعظم کے مشیر تجارت عبدالرزاق داؤد نے اعلان کیا تھا کہ ای کامرس کی بڑی کمپنی ایمازون نے پاکستان کو سیلر لسٹ میں شامل کر لیا ہے۔

اس پیشرفت کے بعد پاکستان کے کاروباری افراد اپنی اشیا ایمازون پر فروخت کرنے کے اہل ہوگئے ہیں، ایمازون کے ذریعے چھوٹے اور درمیانے درجے کے کاروبار، خواتین اور جوانوں کو عالمی مارکیٹ سے منسلک ہونے کے خاطر خواہ مواقع ملیں گے۔

اس پلیٹ فارم سے ایمازون کے تھری پی ماڈل (تھرڈ پارٹی ریلیشن) کی سہولت فراہم کی جائے گی جہاں سے خوردہ فروش بلاواسطہ اپنی اشیا خریدار کو فروخت کرتے ہیں۔

ایمزون کے ون پی ماڈل کے تحت مارکیٹ ریٹیلر کے طور پر کام کرتی ہے لیکن برانڈ ہول سیل سپلائر ہوتا ہے جو ایمازون برانڈ آئٹمز کے لیے پیداوار کرنا چاہتا ہے۔

پوسٹ ماسٹر جنرل ذوالفقار حسنین نے کہا کہ اس سہولت سے ملک کے مینوفیکچرینگ سیکٹر کے لیے عالمی مارکیٹ میں مقابلے کے مواقع پیدا ہوں گے۔

انہوں نے مزید کہا کہ جنرل پوسٹ آفس ڈیرہ اڈا میں اے ایف ایف سی سے متعلق زیادہ تر کام مکمل ہوچکا ہے اور یہ عید الاضحیٰ کے بعد فعال ہوجائے گا، جی پی او ملتان میں ایمازون کا ایک ویئر ہاؤس بھی بنایا گیا ہے جبکہ بہاولپور، رحیم یار خان، مظفر گڑھ، ساہیوال اور جنوبی پنجاب کے دیگر اضلاع میں ویئرہاؤسز کے ساتھ ایمازون سینٹرز کے حوالے سے کام جاری ہے۔

اس حوالے سے پاکستان پوسٹ آفس حکام نے ملتان چیمبر آف کامرس اینڈ انڈسٹریز (ایم سی سی آئی) سے ملاقات کی تاکہ مقامی اشیا کی بین الاقوامی مارکیٹ میں فروغ کے لیے مشترکہ طور پر کام کیا جاسکے۔

اس موقع پر ایم سی سی آئی کے صدر خواجہ صلاح الدین اور دیگر شرکا نے ایمازون کے ساتھ کام کرنے پر تبادلہ خیال کیا۔

ذوالفقار حسنین نے کہا کہ پاکستان پوسٹ، ایم سی سی آئی اور ایمازون کو اسمال اینڈ میڈیم انٹرپرائزز (ایس ایم ای) میں اقتصادی ترقی بڑھانے کے لیے مل کر کام کرنا چاہیے۔

ان کا کہنا تھا کہ ہم کاروباری افراد کو جدید سہولیات فراہم کریں گے اور پیشہ ور افراد کو ایمازون پر رجسٹر ہو کر اپنی مصنوعات کی بین الاقوامی مارکیٹ میں فروغ کے لیے مواقع دیں گے۔