Category بزنس

اسلام آباد: پاکستان میں ٹیکس وصول کرنے والے ادارے نے رواں مالی سال کے 11 ماہ میں 41 کھرب 43 ارب روپے اکھٹا کرنے کا دعویٰ کیا ہے جو ملک میں معاشی سرگرمیوں کی بحالی کو ظاہر کرتا ہے جبکہ گزشتہ برس کے اسی عرصے میں 35 کھرب 30 ارب روپے اکٹھے کیے گئے تھے۔

رپورٹ کے مطابق رواں ماہ کے آخری 2 روز (30، 31 مئی) میں مزید 15 سے 20 ارب روپے کا ریونیو حکومت کے خزانے میں آئے گا جو رواں مالی سال کے جولائی سے مئی تک کے عرصے میں ریونیو کلیشن کو مزید بہتر بنادے گا۔

جب یہ اعداد و شمار وزیراعظم کو بتائے گئے تو اس کے فوراً بعد انہوں نے سماجی روابط کی ویب سائٹ ٹوئٹر کے ذریعے فیڈرل بورڈ آف ریونیو (ایف بی آر) کی کارکردگی کو سراہا، جس نے کسی مالی سال میں پہلی مرتبہ 40 کھرب روپے اکٹھا کر کے اس تاریخی سنگ میل کو عبور کیا ہے۔

وزیراعظم عمران خان کا کہنا تھا کہ جولائی تا مئی ریونیو کلیکشن 18 فیصد زائد رہی، ایسی کارکردگی حکومتی پالیسیسز کے باعث وسیع تر معاشی بحالی کو ظاہر کرتی ہیں۔

وزیراعظم نے کہا کہ ایف بی آر کی مجموعی ریونیو کلیکشن گزشتہ برس کے 36 ارب 60 ارب روپے کے مقابلے میں جولائی تا مئی کے دوران 19 فیصد زیادہ یعنی 43 ارب روپے رہی۔

انہوں نے کہا کہ حکومتی پالیسیوں سے حاصل ہونے والی وسیع البنیاد معاشی بحالی کے یہ واضح آثار ہیں۔

رواں برس 11 ماہ میں 2 کھرب 16 ارب روپے کا ریونیو فنڈ تقسیم کیا گیا جو گزشتہ برس کے ایک کھرب 24 ارب روپے کے مقابلے میں 74 فیصد زائد ہے۔

وزیراعظم کے معاون خصوصی برائے ریونیو اینڈ فنانس ڈاکٹر وقار مسعود خان نے ڈان کو بتایا کہ 40 کھرب روپے کا ہندسہ عبور کرنا ایف بی آر کے لیے نفسیاتی رکاوٹ تھی کیوں کہ گزشتہ 3 برسوں سے ریونیو کلیکشن تقریباً 38 کھرب روپے رہی ہے۔

انہوں نے کہا کہ 31 مئی تک ریونیو کلیکشن کا اضافہ مزید بہتر ہوگا اور آئندہ 2 روز میں نمایاں ریونیو کی توقع ہے کیوں کہ پاکستان میں عموماً لوگ آخری دنوں میں ٹیکس ادا کرتے ہیں۔

معاون خصوصی نے کہا کہ یہ اعداد و شمار عید کی تعطیلات کے دوران ریونیو کلیکشن متاثر ہونے کے باوجود بہتر ہوئے، عید کے بعد پیداوار نے رفتار پکڑی جس سے زیادہ ریونیو جمع ہوا، ساتھ ہی انہوں نے رواں مالی سال کا ریونیو ہدف پانے کا اشارہ بھی دیا۔

حکومت نے مالی سال 2021 کو بجٹ تیار کرتے ہوئے عالمی مالیاتی فنڈ (آئی ایم ایف) کو 49 کھرب 60 ارب روپے ریونیو اکٹھا کرنے کی یقین دہانی کروائی تھی جو مالی سال 2020 کے مقابلے 24.4 فیصد زائد ہدف تھا۔

تاہم آئی ایم ایف نے ریونیو کے ہدف کو نظرِ ثانی کے بعد کم کر کے 46 کھرب 91 ارب روپے کردیا تھا۔

آئندہ مالی سال کے لیے آئی ایم ایف نے ایف بی آر کے لیے 59 کھرب 63 ارب روپے ریونیو کلیکشن کا ہدف تجویز کیا ہے لیکن وزیر خزانہ شوکت ترین پہلے ہی اشارہ دے چکے ہیں اصل ہدف تجویز کردہ ہدف سے کم ہوگا۔

اسلام آباد: پاکستان نے آئندہ بجٹ میں پرسنل انکم ٹیکس ( ذاتی آمدنی پر ٹیکس) سے متعلق اقدامات کرنے میں دل چسپی ظاہر کی ہے جس کے نتیجے میں 30 ارب روپے کا ریونیو اکٹھا ہوگا، تاہم ان اقدامات سے کچھ انکم گروپوں پر ٹیکس کا بوجھ بڑھ جائے گا۔

وزارت خزانہ کے ذرائع کے مطابق آئی ایم ایف سے مذاکرات میں ٹیکس حکام نے انکم ٹیکس سے استثنیٰ رکھنے والوں کی اکثریت کو اس ٹیکس سے مستثنیٰ رکھنے ہی کی تجویز پیش کی ہے، اگر اکثریت سے یہ استثنیٰ واپس لے لیا گیا تو اس سے تنخواہ دار ملازمین، ججوں، سرکاری ملازموں اور پنشنرز پر نمایاں مالی دباؤ پڑے گا۔ تاہم اس حوالے سے آئی ایم ایف کے ساتھ ابھی تک کوئی اتفاق نہیں ہوسکا ہے اور اس ضمن میں اہم اجلاس آئندہ ہفتے متوقع ہے۔

ذرائع کے مطابق 30 ارب روپے کے انکم ٹیکس سے متعلق اقدامات کا مطلب ہے کہ تنخواہ دار ملازمین اور کاروباری حضرات پر کچھ مالی بوجھ ضرور ڈالا جائے گا۔ اس کے علاوہ گھر بنانے کے قرضے، تعلیمی اخراجات، ہیلتھ انشورنس اور شیئرز میں سرمایہ کاری کے لیے ٹیکس کریڈٹ پر انکم ٹیکس استثنیٰ ختم یا جزوی طور پر انکم ٹیکس لاگو کیا جاسکتا ہے۔
واضح رہے کہ حکومت صدارتی آرڈیننس کے ذریعے 81 ارب روپے مالیت کے کارپوریٹ انکم ٹیکس سے متعلق اقدامات پر پہلے ہی عملدرآمد کرچکی ہے۔

ذرائع کے کہنا ہے کہ 30 ارب روپے ریونیو کا نصف ٹیکس استثنیٰ واپس لینے سے حاصل ہو گا جبکہ 10 ارب روپے تنخواہ دار افراد اورکاروباری آمدنی پر لاگو ٹیکس سلیب کی ایڈجسٹمنٹ سے حاصل کیا جائے گا،مثلاً پائلٹوں، انجنیئراور آرمی ، پی آئی اے، سول ایوی ایشن کے نیوی گیٹرز اور نیول افسران کا سب میرین الاؤنس واپس لیا جاسکتا ہے۔ر

ریٹائرڈ اور حاضر سرکاری و عسکری ملازمین کو الاٹ کی جانے والی جائیداد پر عائد انکم ٹیکس استثنیٰ ختم کیا جا سکتا ہے، بجٹ میں 190 ارب روپے کی لاگت کے سیلز ٹیکس اقدامات کیے جاسکتے ہیں جو آئی ایم ایف کے ساتھ پروگرام کی بحالی کے وقت طے کیے گئے اقدامات سے نصف ہیں۔

لاہور: ایف بی آر نے اسمگلنگ کی موثر روک تھام کیلیے محکمہ کسٹمز میں اہم تبدیلیوں کا فیصلہ کیا ہے جن کا اطلاق یکم جولائی سے ہو گا۔

خیبر پختونخوا میں کسٹم کا نیا آپریشنل نظام قائم کیا جائے گا اور اسمگلنگ کیلیے زیادہ استعمال ہونے والے اضلاع میں نئی کسٹم کلکٹریٹ قائم کی جائیں گی، پنجاب میں کسٹم کلکٹریٹس کی زمینی حدود اور آپریشنل اختیارا ت میں تبدیلیاں کی جائیں گی، ملک بھر میں محکمہ کسٹمز کے ماڈل کسٹمز کلکٹریٹس کو کسٹمز کلکٹریٹس کا درجہ دیا جائے گا جبکہ ان کی ذمہ داریوں کا ازسر نو تعین ہوگا۔

وزیر خزانہ شوکت ترین، چیئرمین ایف بی آر عاصم احمد، ممبر کسٹمز ڈاکٹر طارق ہدیٰ کی باہمی مشاورت اور تمام فیلڈ افسران کی رائے لینے کے بعد ان تبدیلیوں کا فیصلہ کیا گیا۔
ایف بی آر ذرائع کے مطابق خیبر پختونخوا میں چیف کلکٹر کسٹمز عہدے کا کوئی افسر موجود نہیں ہے، صوبے کیلئے چیف کلکٹر کسٹمز کا نیا عہدہ تخلیق کیا جائے گا جو پورے صوبے میں محکمہ کسٹمز کا سربراہ ہوگا ۔ ڈیرہ اسماعیل خان میں نئی کسٹمز کلکٹریٹ قائم کرنے کا فیصلہ کیا ہے جو صوبے میں تیسری کسٹم کلکٹریٹ ہو گی۔

ایف بی آر کے تیار کردہ نئے ایس اوپیز کے مطابق ملک بھر میں چیف کلکٹرز اور کلکٹرز کی ذمہ داریوں کا از سر نو تعین کردیا گیا ہے۔ خیبر پختونخوا اور سندھ میں کسٹم کلکٹریٹس کے آپریشنل اختیارات میں ردوبدل کیا گیا ہے جبکہ پاکستان کسٹمز کے حوالے سے سب سے اہم تبدیلیاں پنجاب میں کی جائیں گی۔

اسمگلنگ کی روک تھام میں ناکامی پر ملتان کسٹم کلکٹریٹ کی زمینی حدود اور اختیار میں کمی کی جائے گی ،کسٹمز کلکٹریٹ ملتان سے ساہیوال، فیصل آباد اور سرگودھا ڈویژنز میں اسمگلنگ کی روک تھام کی ذمہ داری واپس لیکر کلکٹر کسٹمز انفورسمنٹ لاہور کے سپردکرنے کا فیصلہ کیا گیاہے۔

ایف بی آر ذرائع کے مطابق اس وقت ملک بھر میں فروخت ہونے والی اسمگل شدہ اشیاکا 80فیصد کوئٹہ سے ملک بھر میں بھیجا جاتا ہے اور اس تمام نیٹ ورک کا سرغنہ ایک ہی گروہ ہے۔

اسلام آباد: حکومت نے 25 ہزار اور 40 ہزار روپے کی انعامی بانڈ کی منسوخی میں توسیع کردی۔

اس حوالے سے جاری کردہ نوٹیفکیشن کے مطابق 25 اور 40 ہزار کا پرائز بانڈ 30 ستمبر 2021 تک کیش کروایا جا سکے گا۔

خیال رہے کہ 40 ہزار روپے مالیت کے پرائز بانڈز کیش کروانے کی آخری تاریخ 21 دسمبر 2020 تھی۔

اسی طرح 25 ہزار روپے مالیت کے پرائز بانڈز کیش کروانے کی آخری تاریخ 9 دسمبر 2020 تھی۔

ملک میں سونے کی فی تولہ قیمت میں اضافہ ہوگیا۔

سندھ صرافہ بازار جیولرز ایسوسی ایشن کے مطابق سونے کی فی تولہ قدر میں 300 روپے اضافہ ہوا جس کے بعد سونے کی فی تولہ قیمت ایک لاکھ 12ہزار 100 روپے ہوگئی۔

10 گرام سونے کی قدر 258 روپے بڑھ کر 96108 روپے ہے جبکہ عالمی صرافہ میں سونےکی قدر 9 ڈالر اضافے سے 1904ڈالر فی اونس ہے۔

اسلام آباد: پاکستان کو کورونا سے نمٹنے کیلیے بیرون ملک سے 3 ارب 9 کروڑ ڈالر ملے۔

چیئرمین صادق سنجرانی کی زیر صدارت اجلاس میںوزارت خزانہ نے بتایاآئی ایم ایف نے 1386 ، ،ایشین انفرا اسٹرکچر انوسمنٹ بینک 750 ،ورلڈ بینک 114.2 ،اے ڈی بی 248 اورفرانس نے21.42 ملین ڈالرقرض دیا۔

یورپین یونین نے 39.50 ،امریکا20.87 ،جاپان 6.87 ،اے ڈی بی 0.50 ،چین 4 ،برطانیہ 3.38 ،کینیڈا 2.39 ،جنوبی کوریا 0.85 ،اقوام متحدہ 0.40 اوراسلامک ترقیاتی بینک نے 0.21 ملین ڈالرکی مدددی۔

گزشتہ اڑھائی برسوں میں ملکی وغیرملکی قرضوں میں 12.5کھرب روپے اضافہ ہوا،حکومت نے4کھرب 99ارب 35کروڑ80لاکھ روپے کے قرضے واپس بھی کئے۔2015/16 ء میں 20 ارب 78 کروڑ ، 2016/17 ء میں 20 ارب 42 کروڑ،2017/18 ء میں 23 ارب21 کروڑڈالرکی برآمدات ،2018/19 ء میں 22 ارب 95 کروڑ ڈالرکی درآمدات ، 2019/20 ء میں برآمدات 21 ارب 39 کروڑ،مارچ تک 18 ارب 68 کروڑ ڈالرکی رہیں۔

وزارت خزانہ نے بتایااین ایف سی ایوارڈ ارکان کے باہمی اتفاق سے ختم کر دیا گیا،حکومت نئے ایوارڈ کو جلدی حتمی صورت دینے کیلئے سہولت فراہم کر رہی ہے۔رضا ربانی نے وزیر اور سیکرٹری خزانہ کی تبدیلی پر خدشہ ظاہر کیاآئندہ عوام کش بجٹ حکومت پاکستان کا نہیں بلکہ آئی ایم ایف کا ہوگا،ہم اسے تسلیم کرنے کیلئے تیارنہیں۔

قائد ایوان شہزاد وسیم نے موقف اپنایاوزیراعظم کا حق ہے جسے چاہے اپنی ٹیم میں رکھیں،معاشی اعشاریے بہتری کی طرف جا رہے ہیں ،آئندہ بجٹ پردیکھے بغیرتنقید کا جواز نہیں،حکومت کاہدف ہے معاشی نظام میں ایسی بہتری لائے کہ آئی ایم ایف سے ہمیشہ کیلئے چھٹکارامل سکے۔

پانی تقسیم کے تنازع پررضا ربانی اور مولا بخش چانڈیو نے کہا سندھ کے لوگوں کو پینے کا پانی تک نہیں مل رہا،یہ زندگی اور موت کا مسئلہ ہے،حکومت صوبوں کے درمیان جان بوجھ کر اختلافات پیدا کر رہی ہے، ہمیں یہ معاہدہ قبول نہیں۔

بلوچستان کے ارکان نے کہا سندھ خود بلوچستان کا پانی چور ی کرتا ہے، اگر پنجاب چورہے تو سندھ بھی ہے۔ مشاہد حسین نے کہا ملک کو ایٹمی طاقت بنانے والی اور اس کا مظاہرہ کرنے والی بھی سیاسی قیادت تھی۔

اسلام آباد: پاکستان کی 9 علاقائی ممالک کے لیے برآمدات میں 1.818 فیصد کا معمولی اضافہ ریکارڈ کیا گیا۔

رپورٹ کے مطابق اسٹیٹ بینک کے تازہ ترین اعداد و شمار کے مطابق رواں مالی سال کے پہلے 10 ماہ میں ان ممالک سے درآمدات میں تقریباً 31 فیصد اضافہ ہوا ہے۔

پاکستان کی عالمی برآمدات کا حجم رواں مالی سال کے پہلے 10 ماہ میں 20 ارب 90 کروڑ ڈالر رہا جبکہ علاقائی ممالک افغانستان، چین، بنگلہ دیش، سری لنکا، بھارت، ایران، نیپال، بھوٹان اور مالدیپ کے لیے برآمدات کا حجم 3 ارب 19 کروڑ ڈالر ریکارڈ کیا گیا جو عالمی برآمدات کا محض 15.26 فیصد ہے۔

دوسری جانب ان ممالک سے رواں مالی سال کے پہلے 10 ماہ کے دوران درآمدات 10 ارب 75 کروڑ ڈالر تھیں جو گزشتہ برس کے اسی عرصے کے دوران 7 ارب 63 کروڑ ڈالر تھیں۔

جولائی تا اپریل 21-2020 کے دوران چین کے لیے پاکستان کی برآمدات میں اضافہ ریکارڈ کیا گیا جو علاقائی ممالک کے مقابلے میں 51.4 فیصد رہا۔

رواں مالی سال کے پہلے 10 ماہ کے دوران چین کے لیے پاکستان کی برآمدات 16.22 فیصد اضافے کے ساتھ ایک ارب 64 کروڑ ڈالر رہیں جو گزشتہ مالی سال کے اسی عرصے میں ایک ارب 41 کروڑ ڈالر تھیں۔

اسٹیٹ بینک کے مطابق کووڈ کے بعد کے عرصے میں برآمدات میں اضافہ نوٹ کیا گیا۔

اس کے برعکس چین کی برآمد کا حجم 35 فیصد بڑھا جو 10 ارب 31 کروڑ ڈالر پر مشتمل رہا۔

افغانستان کے لیے پاکستان کی برآمدات میں مالی سال کے پہلے 10 کے دوران 2.35 فیصد اضافہ ہوا جو 82 کروڑ 87 لاکھ ڈالر ریکارڈ کی گئی، جو گزشتہ مالی سال کے اس عرصے میں 80 کروڑ 96 لاکھ ڈالر تھیں۔

خیال رہے کہ امریکا کے بعد افغانستان دوسرا بڑا پاکستان کے لیے برآمدی ملک ہے۔

رواں مالی سال کے پہلے 10 ماہ کے دوران بنگلہ دیش کے لیے پاکستانی برآمدات 17 فیصد، بھارت کے لیے 90.9 فیصد، سری لنکا کے لیے 18.5 فیصد کمی سے دوچار ہوئی۔

جبکہ رواں مالی سال کے پہلے 10 ماہ کے دوران ایران کے لیے پاکستانی برآمدات میں 374.5 فیصد اضافہ ہوا۔

پاکستان اور روس نے کراچی سے قصور تک گیس کی ترسیل کے لیے پاکستان اسٹریم گیس پائپ لائن تعمیر کرنے کے لیے بین الحکومت معاہدے (آئی جی اے) پردستخط کر دیے۔

رپورٹ کے مطابق روس میں پاکستانی سفارتخانے نے کہا کہ ماسکو میں روسی وزیر توانائی نِکولائی شلگینوو اور پاکستان کے سفیر شفقت علی خان نے شمال ۔ جنوب گیس پائپ لائن منصوبے پر معاہدے میں ترامیم کے پروٹوکولز پر دستخط کیے۔

پروٹوکول کے مطابق منصوبے کا نام تبدیل کرکے ‘پاکستان اسٹریم گیس پائپ لائن’ کردیا گیا ہے۔

پائپ لائن منصوبہ پاکستان اور روس کے درمیان فلیگ شپ اسٹریٹیجک وینچر ہے جس سے دوطرفہ تعاون کو فروغ حاصل ہوگا۔

مرغیاں ایک نئے مہلک وائرس ’ایڈینو‘ کا شکار ہونے لگیں۔

لاہور کی ویٹرنری یونیورسٹی میں مرغیوں کے پوسٹ مارٹم کے بعد ان میں پائے جانے والے وائرس کا انکشاف ہوا ہے جبکہ نئے وائرس سے روزانہ 4 ہزار مرغیاں ہلاک ہو رہی ہیں۔

ویٹرنری یونیورسٹی شعبہ مائیکروبیالوجی کے ڈائریکٹر پروفیسر طاہر یعقوب نے لاہور میں جیو نیوز سے گفتگو کی اور بتایا کہ رانی کھیت اور انفلوئنزا کے بعد ایڈینو وائرس مرغیوں کو اپنا شکار بنانے لگا ہے۔

انہوں نے کہا کہ یہ وائرس مرغیوں کے عصبی نظام پر حملہ آور ہوتے ہیں اور سانس کی بیماریوں کا سبب بھی بنتے ہیں جبکہ ایڈینو وائرس کی وجہ سے رانی کھیت ویکسین غیر مؤثر ہو گئی ہے۔

پروفیسر طاہر یعقوب کا کہنا ہے کہ شہری مارکیٹوں میں فروخت ہونے والی چھوٹی اور کم عمر مرغیاں خریدنے سے اجتناب کریں اور صرف 2 کلو وزن والی مرغیاں ہی خریدیں۔

انہوں نے بتایا کہ وائرس سے مرغیوں کے مرنے کی وجہ سے بھی ان کی قیمت میں اضافہ ہورہا ہے۔

کراچی: ملکی معیشت میں مثبت خبروں کے باعث پاکستان سٹاک مارکیٹ میں مسلسل تیسرے کاروباری روز حجم ایک ارب شیئرز سے زائد رہا۔

تفصیلات کے مطابق پاکستان سٹاک مارکیٹ میں زبردست کاروبار کا تسلسل جاری ہے، گزشتہ تین کاروباری روز کے دوران کاروباری حجم ایک ارب شیئرزسے زائد رہا۔ ٹریڈنگ کے دوران اُتار چڑھاؤ دیکھنے کو بھی ملا، ایک موقع پر انڈیکس 47246.50 پوائنٹس کی سطح پر پہنچ گیا تھا۔

تاہم کاروبار کے اختتام پر یہ سطح برقرار نہ رہ سکی اور سٹاک مارکیٹ میں 335.54 پوائنٹس کی تیزی ریکارڈ کی گئی جس کے باعث 47 ہزار کی نفسیاتی حد بحال ہو گئی اور انڈیکس 47126.29 پوائنٹس کی سطح پر پہنچ کر بند ہوا۔

100 انڈیکس 4سال کی بلندترین سطح پربند ہوا۔ 3 اگست 2017ء کومارکیٹ 47 ہزارکی سطح پر بند ہوئی تھی۔

پورے کاروباری روز کے دوران کاروبار میں 0.72 فیصد کی بہتری دیکھی گئی، جبکہ 22 کروڑ 36لاکھ 96 ہزار 244 ولیم کا کاروبار ہوا۔