Category بزنس

رمضان سے پہلے ہی ملک بھر میں مہنگائی کے طوفان نے شہریوں کا جینا دوبھر کردیا ہے۔

پھل اور سبزی کی بڑھتی قیمتوں سے شہری پریشان ہیں اور غریب اور متوسط طبقے کی مشکلات بڑھ گئی ہیں۔

ماہِ رمضان سے قبل سبزیوں کی قیمتوں میں بھی اضافہ ہو رہا ہے، عوام کہتے ہیں حکومت کے ریلیف کے دعوے کسی کام نہیں آئے، فیصل آباد میں چینی کی فی کلو قیمت 110 روپے تک پہنچ گئی ہے۔

دوسری جانب لاہور کے یوٹیلٹی اسٹورز پر 215 روپے لیٹر میں فروخت ہونے والا خوردنی تیل 271 کا ہوگیا ہے جب کہ بازارکے مقابلے میں چینی ، دالیں اور آٹے کی کم قیمت پر فروخت جاری ہے۔

اُدھر پشاور کے یوٹیلٹی اسٹورز سے آٹا اور چینی غائب ہے، یوٹیلٹی اسٹورز میں آٹا اور چینی دستیاب نہیں،پانچ کلو گھی کے ڈبے کی قیمت 1500 روپے ہے۔

لوبیا کی فی کلو قیمت 200 روپے اور دال ماش فی کلو 250 روپے ہے جب کہ سیلہ چاول 139 روپے کلو ، بیسن 160 روپے کلو میں فروخت ہو رہا ہے۔

اسلام آباد: سی پیک عام طور پر ایک گیم چینجر کے نام سے جانا جاتا ہے اور لوگوں نے پہلے ہی اس کے ثمرات سے استفادہ حاصل کرنا شروع کر دیا ہے۔

سرمایہ کاری بورڈ حکام کے مطابق سی پیک کے تحت 9مکمل شدہ منصوبے اور 13 جاری منصوبوں نے 70 ہزار سے زیادہ براہ راست ملازمتیں پیدا کیں، آئندہ 4 سے 5 سال میں مزید ساڑھے 4 لاکھ براہ راست ملازمتیں پیدا کی جاسکتی ہیں۔ سی پیک کا مستقبل اب خصوصی اقتصادی زون اور گوادر فری ٹریڈ زون کے آغاز پر ہے۔

مزید براں سی پیک کا ادارہ جاتی میکانزم ابھی بھی برقرار ہے اور عالمی وبائی امور کی پریشانیوں اوردنیا کو اپنی لپیٹ میں لے جانے کے باوجود جے سی سی کے اجلاس مستقل بنیادوں پر ہوتے رہے ہیں۔
علاوہ ازیں سی پیک علاقائی ترقی اور خوشحالی میں مزید فعال کردار ادا کرے گی۔سی پیک اتھارٹی حکام کے مطابق چین علاقائی تعاون کے مزید فروغ میں مصنوعات کی تجارت کے حوالے سے گوادر بندرگاہ کی حمایت کرتا ہے۔

گوادر بندرگاہ پرمچھلی کے سامان کی چین سے پہنچنے کے ساتھ پہلے ہی شروع ہوگئی ہیں۔ آنے والے دنوں میں، ایل پی جی، اسٹیل پائپ، ڈی اے پی کھاد سمیت افغانستان جانے والے بین الاقوامی سامان پر مشتمل مزید جہازوں کا گوادر پورٹ پہنچنا طے ہے۔

گوادر میں ایک ڈائریکٹوریٹ آف ٹرانزٹ ٹریڈ بھی قائم کیا گیا ہے جو اسٹیک ہولڈرز کے ساتھ مل کر کام کررہا ہے تاکہ بندرگاہ کو ایک اہم ٹرانزٹ ٹریڈ حب میں تبدیل کیا جاسکے۔

اسلام آباد: وزیراعظم کی ٹیکس ایمنسٹی اسکیم کے تحت ایک ہزار سے زائد تعمیراتی پروجیکٹس رجسٹرڈ ہوئے ہیں جن کی مالیت 355 ارب روپے ہے، تاہم یہ تعداد ہدف سے کم ہے۔

سرکاری اعدادوشمار کے مطابق وزیراعطم کی دوسری ایمنسٹی اسکیم کے تحت اب تک 355 ارب روپے مالیت کے 1016 تعمیراتی منصوبے رجسٹرڈ کرائے گئے ہیں تاہم یہ تعداد حکومتی ہدف سے کم ہے۔

واضح رہے کہ ایمنسٹی اسکیم کے تحت حکومت ریئل اسٹیٹ سیکٹر کے سرمایہ کاروں کو انکم ٹیکس سے تین سال کی چھوٹ بھی فراہم کررہی ہے۔
اعدادوشمار کے مطابق 1016 میں سے 274 منصوبے ایمنسٹی اسکیم کے اعلان سے پہلے ہی زیرتکمیل تھے۔ دسمبر میں 782 منصوبے رجسٹرڈ کرائے گئے۔ اس کے بعد سب سے زیادہ 121 منصوبے اکتوبر میں رجسٹرڈ کرائے گئے۔

حکومت کو توقع تھی کہ دسمبر میں 10کھرب روپے سے زائد کے منصوبے رجسٹرڈ کرائے جائیں گے، تاہم ہدف پورا نہ ہونے پر ایمنسٹی اسکیم میں مزید 6 ماہ کی توسیع کردی گئی تھی۔ اسکیم میں ان منصوبوں کو بھی شامل ہونے کی اجازت دی گئی تھی جو اسکیم کے اعلان سے پہلے ہی زیرتعمیر تھے۔

آئی ایم ایف کی شرط کے تحت حکومت نے 140 ارب روپے مالیت کی 75 قسم کی انکم ٹیکس چھوٹ ختم کردی تھی مگر حکومت ریئل اسٹیٹ سیکٹر کے لیے 2024ء تک ٹیکس چھوٹ حاصل کرنے میں کام یاب ہوگئی۔

حکومت کے مطابق رجسٹرڈ شدہ 1016 منصوبوںؓ کے علاوہ 78 ارب روپے مالیت کی 285 اسکیمیں رجسٹریشن کے مرحلے میں ہیں۔ ان میں سے 43 ارب روپے کی 143 اسکیمیں پنجاب، 18 ارب روپے کی 76 اسکیمیں سندھ، 17 ارب روپے کی 57 اسکیمیں اسلام آباد اور 9اسکیمیں خیبرپختونخوا کی ہیں۔

لاہور: وفاقی وزیر سائنس اینڈ ٹیکنالوجی فواد چوہدری کی جانب سے 50 ایکڑ زمین پر آئی ٹی اور جدید ٹیکنالوجی سے وابستہ صنعتوں کیلئے اسپیشل اکنامک زون بنانے کی تجویز کو منظور کر لیا گیا۔

وفاقی وزیر فواد چوہدری اور صوبائی وزیر لیبر انصر مجید خان کی زیرصدارت پنجاب ورکرز ویلفیئر بورڈ اور کامسٹس یونیورسٹی کے مابین معاہدے کو حتمی شکل دینے کیلئے پی سی ایس آئی آر لیب کے کمیٹی روم میں اجلاس ہوا جس میں سیکرہٹری لیبر سمیت دیگر افسران اور یونیورسٹی انتظامیہ نے شرکت کی۔

فواد چوہدری کی جانب سے 50 ایکڑ زمین پر آئی ٹی اور جدید ٹیکنالوجی سے وابستہ صنعتوں کیلئے سپیشل اکنامک زون بنانے کی تجویز کو منظور کر لیا گیا۔ وفاقی وزیر نے کہا کہ سپیشل اکنامک زون سے حاصل ہونے والی آمدنی یونیورسٹی کی ڈویلپمنٹ اور طلباء پر خرچ کی جائے گی، اکنامک زون نہ صرف صنعتی ترقی میں معاون ہو گا بلکہ روزگار کے مواقع پیدا ہوں گے جس کیلئے اکنامک کونسل آف پاکستان اور محکمہ صنعت و تجارت پنجاب سے بات کریں گے۔
انصر مجید نے کامسٹس یونیورسٹی میں مزدوروں کے بچوں کیلئے کوٹہ بڑھانے کی تجویز دی جس پر مزید بات چیت کے بعد معاملات طے کرنے پر اتفاق ہوا۔ انہوں نے کہا کہ ورکرز ویلفیئر بورڈ مزدوروں کے بچوں کو بہترین اداروں میں تعلیم فراہم کر رہا ہے۔کامسٹس یونیورسٹی میں ورکرز کوٹہ پر تعلیم حاصل کرنے والے طلبا کو سالانہ 32کروڑ سے زائد کی سبسڈی دی جا رہی ہے۔

انہوں نے کہا کہ ورکرز کے کوٹہ اور اسکالرشپس کی تعداد سے متعلق کامسٹس یونیورسٹی انتظامیہ اور محکمہ لیبر معاملات طے کریں گے۔ ٹیلنٹ سکالرشپ میں شفافیت کیلئے تمام پراسیس کمپیوٹرائزڈ کیا جا رہا ہے۔ عمران خان کے ویژن کے مطابق مزدوروں کی زندگیوں میں آسانیاں پیدا کرنے کیلئے کوشاں ہیں۔ تحریک انصاف دو نہیں ایک پاکستان کے خواب کو حقیقت بنانے کیلئے پر عزم ہے۔

اسلام آباد: وزارت خزانہ نے کہا ہے کہ ملک کی اقتصادی بحالی کاسفر جاری ہے جب کہ صنعتی بڑھوتری سے کاروباری اعتماد میں اضافہ کی عکاسی ہو رہی ہے۔

وزارت خزانہ کی طرف سے مارچ 2021 کے لیے جاری کردہ اقتصادی اپ ڈیٹ کے مطابق جولائی سے لیکرفروری 2021 تک کی مدت میں سمندرپارکام کرنے والے پاکستانی محنت کشوں کی ترسیلات زرمیں مجموعی طورپر24.1 فیصداضافہ ہواہے، اس عرصہ میں پاکستانی کارکنوں نے 18.7 ارب ڈالرکازرمبادلہ ملک ارسال کیا۔

گزشتہ مالی سال کی اسی مدت میں یہ حجم 15.1 ارب ڈالررہاتھا، جاری مالی سال کے پہلے 8 ماہ میں برآمدات میں گزشتہ مالی سال کی اسی مدت کے مقابلہ میں 2.3 فیصدکی کمی ہوئی جبکہ اس کے برعکس درآمدات میں 8.6 فیصداضافہ ہوا۔
حسابات جاریہ کے کھاتوں کے توازن میں 0.9 ارب ڈالرکااضافہ ہوا، جی ڈی پی کی مناسبت سے حسابات جاریہ کے کھاتوں میں 0.5 فیصدکااضافہ ریکارڈکیاگیاہے، براہ راست غیرملکی سرمایہ کاری میں جاری مالی سال کے پہلے 8 ماہ میں گزشتہ مالی سال کے اسی عرصہ کے مقابلہ میں 29.9 فیصدکی کمی ریکارڈکی گئی ہے۔

جاری مالی سال میں براہ راست غیرملکی سرمایہ کاری کاحجم 1.300ارب ڈالر ریکارڈ کیاگیا، پورٹ فولیوسرمایہ کاری کا حجم منفی 132.2 ملین ڈالررہا۔

وزارت خزانہ کے مطابق 18 مارچ 2021 کوزرمبادلہ کے ذخائر کاحجم 20.313 ارب ڈالرکی سطح پرہے، 18 مارچ کوایکسچینج ریٹ 155.45روپے تھا، پاکستانی کرنسی کی قدرمیں اضافہ ہواہے۔

لاہور: اسٹیٹ بینک آف پاکستان (ایس بی پی) حکومت کی جانب سے کیے جانے والے نیم مالی منصوبوں یا مالیاتی اقدامات کو بند کردے گا تاہم سبسڈائز کریڈٹ (معیشت کے مختلف شعبوں) تک رسائی کی حمایت کرنے کے لیے استعمال ہونے والی سہولیات کو ‘ری فنانسنگ 1956’ کے موجودہ اسٹیٹ بینک ایکٹ میں ترمیم کی پارلیمنٹ سے منظوری کے بعد بھی جاری رکھے گا۔

رپورٹ کے مطابق مرکزی بینک کے عہدیدار نے 1956 کے اسٹیٹ بینک قوانین میں مجوزہ ترامیم، جو اپنے بنیادی مقاصد کی تشکیل نو، بینک اور اس کے گورنر کو بے مثال اختیارات دینے، مانیٹری پالیسی اور تبادلے میں سیاسی اثر و رسوخ کو روکنے کے حوالے سے ہیں، پر بریفنگ دیتے ہوئے کہا کہ ‘مرکزی بینک کے پاس مقداری ٹولز ہونے چاہئیں، اگر ہمارے پاس یہ ٹولز نہ ہوں تو ہم عارضی معاشی ری فنانس سہولت (ٹی ای آر ایف) کے تحت سود کی شرح میں کمی کے ذریعے کووڈ 19 کے بحران کے دوران معیشت اور کاروبار کی حمایت نہیں کرسکتے’۔

جب سے کابینہ کی جانب سے 6 ارب ڈالر کے آئی ایم ایف قرض کی بحالی کے لیے اسٹیٹ بینک ترمیمی بل 2021 کا مسودہ منظور ہوا ہے تب سے ہی مارکیٹ ان خبروں سے نالاں ہے کہ اسٹیٹ بینک چھوٹے، ہاؤسنگ سیکٹر کو فروغ دینے کے لیے سبسڈی والے قرضوں اور درمیانے درجے کی صنعتوں، زراعت، برآمد کنندگان، وغیرہ کو بند کرسکتا ہے۔

نام ظاہر نہ کرنے کی شرط پر بینک کے ایک عہدیدار نے کہا کہ ‘ترمیم شدہ اسٹیٹ بینک قانون ہمیں مرکزی بینک کے پاس ری فنانس سہولیات رکھنے اور قیمت اور مالی استحکام کے اس طے شدہ مینڈیٹ کے حصول میں ان کا استعمال کرنے کی اجازت دیتا ہے، اس کا مطلب یہ نہیں ہے کہ ہم اس پر بھاری یا مستقل انحصار کریں گے، اس کا مطلب صرف یہ ہے کہ جب ہمیں (اس کی) ضرورت ہو تو مرکزی بینک کو لیکویڈیٹی (معیشت میں) دینے کے لیے ہمارے ٹول کٹ کافی مضبوط ہوں’۔

ان کا کہنا تھا کہ ‘تاہم جب معیشت بہتر ہو، پیداوار کا فرق مثبت ہو، سرمایہ کاری بہت تیزی سے بڑھ رہی ہو اور طلب کی وجہ سے افراط زر بہت زیادہ ہو تو ہم ایسا کرنے کے قابل نہیں ہوں گے، اس طرح کی صورتحال میں زیادہ سے زیادہ رعایت قیمت اور مالیات کے استحکام کو نقصان پہنچائے گی’۔

سرکاری قرض
قانون میں مجوزہ تبدیلیوں سے مرکزی بینک کو اپنے خسارے کی مالی اعانت کے لیے براہ راست حکومت کو قرض دینے سے روک دیا گیا ہے۔

بینکر نے وضاحت کی کہ ‘یہ پالیسی فیصلہ ہے جو مالی نظم و ضبط کو یقینی بنانے کے لیے اٹھایا جاتا ہے، پھر بھی یہ اسٹیٹ بینک کو سیکنڈری مارکیٹ سے قرض خرید کر حکومت کو قرض دینے سے نہیں روکتا، اس طرح کی مداخلت حکومت کو قیمتیں معلوم کرنے میں معاون ثابت ہوتی ہیں۔

یہاں تک کہ ابھی بھی اوپن مارکیٹ آپریشنز مارکیٹ میں لیکوئڈیٹی فراہم کرنے کے لیے استعمال کیا جاتا ہے تاکہ کمرشل بینک حکومتی قرضے خرید سکیں۔

اگرچہ حکومت آئی ایم ایف پروگرام کی شرائط کے ایک حصے کے طور پر اسٹیٹ بینک سے کوئی قرض نہیں لے رہی ہے تاہم اس ترمیم شدہ قانون کی پارلیمنٹ کی منظوری کے بعد حکومت کو اسٹیٹ بینک پر اپنے بجٹ خسارے کی مالی معاونت کے لیے نئے کرنسی نوٹ پرنٹ کرنے کے لیے زبردستی کرنے پر قانونی طور پر پابندی کا سامنا ہوگا۔

خودمختاری
مرکزی بینک کی موجودہ انتظامیہ کے نقطہ نظر سے اسٹیٹ بینک ایکٹ میں مجوزہ تبدیلیاں مقاصد کو واضح کریں گی، ان کے حصول کے لیے عملی اور خودمختاری کو فروغ دیں گی اور اپنے مقاصد کے حصول میں اس کے احتساب کو مستحکم کریں گی۔

وزارت خزانہ کی جانب سے پیش کیے گئے بل میں کہا گیا کہ ‘اگر مقاصد واضح نہیں ہیں تو احتساب واضح نہیں ہوگا، مقاصد کو حاصل کرنے اور کارروائیوں میں شفافیت کو یقینی بنانے کے لیے ضروری وسائل، جن میں بین الاقوامی وسائل اور مالی اور انتظامی خود مختاری شامل ہیں، کو کسی بھی بیرونی اثر و رسوخ کے بغیر اسٹیٹ بینک کے لیے دستیاب بنانا ہوگا’۔

بینک کے عہدیدار نے وضاحت کی کہ ‘موجودہ اسٹیٹ بینک قانون میں مجوزہ تبدیلیاں اسے قیمت اور مالی استحکام کو نشانہ بنانے اور کرنسی کے انتظام کو آزادانہ مالیاتی اور ایکسچینج ریٹ پالیسیوں کے تحت کرنے کے لیے بہتر پوزیشن میں ڈال دے گی’۔

ملک بھر میں اشیائےخوردونوش کی قیمتو ں میں ہوش ربا اضافہ ہوگیا ہے اور رمضان سے قبل ہی مہنگائی کے طوفان نے عوام کا جینا محال کردیا ہے۔

کراچی میں ایک کلو چینی 105روپے اور مرغی کا گوشت 450 روپے کلو ہوگیا ہے جب کہ پکانے کا تیل 280 روپے لیٹر پر دستیاب ہے، دالوں کی قیمتوں میں بھی اضافہ دیکھنے میں آیا ہے۔

وفاقی دارالحکومت اسلام آباد میں بھی چینی ، مرغی، پھل اور سبزی کی بڑھتی قیمتو ں سے شہری پریشان ہیں۔

وفاقی ادارہ شماریات کی رپورٹ کے مطابق مہنگائی کی شرح 15.35 فیصد تک پہنچ چکی ہے، اوپن مارکیٹ میں چینی کی فی کلو قیمت میں 6 روپے اضافہ ہوا جب کہ فی کلو ٹماٹر کی قیمت بھی 35 روپے سے بڑھ کر 70 روپے ہوگئی، مرغی کے گوشت کی قیمت 380 روپے سے 410 روپے فی کلو تک پہنچ گئی۔

گوجرانوالا میں بکرے کا گوشت 900 کے بجائے 1200 روپے کلو ہوگیا اور مرغی کے گوشت کی قیمت میں فی کلو 25 روپے کا اضافہ ہوا ہے۔

پشاورمیں پھل، سبزی اور دالوں کی قیمتوں میں10 سے 15 روپے فی کلو اضافہ ہوا ہے۔

کوئٹہ میں سوروپے کے اضافےکے بعد بکرے کا گوشت 1200روپے کلو اور مرغی کا گوشت 420 روپے کلو ہوگیا۔

ملتان میں ایک ہفتہ کےدوران چینی ، گھی ، پھلوں اورگوشت کی قیمتوں میں اضافہ ہوگیا،لاک ڈاؤن میں روزگار کے حصول کےلیے پریشان شہری کھانے پینے کی اشیاء کی قیمتوں پر اضافہ ہونے پر بھی پریشان ہیں۔

آٹا ، چینی ، پھل ، سبزی سمیت تمام اشیاء ضرورت قوت خرید سے باہر ہیں، شہری کہتے ہیں خریداری کرتے ہوئے دس بار سوچنا پڑتا ہےکہ کیا خریدیں کیا چھوڑ دیں جب کہ دکانداروں کا کہنا ہےکہ مہنگائی کی وجہ سپلائی میں کمی ہے۔

اسلام آباد: ٹریڈنگ کارپوریشن آف پاکستان نے 9 شوگرملوں کو بلیک لسٹ کردیا۔

ٹریڈنگ کارپوریشن آف پاکستان نے 9 شوگرملوں کو بلیک لسٹ کردیا، بلیک لسٹ کی جانے والی کمپنیوں پر ٹی سی پی کے 10 ارب سے زائد کے واجبات ہیں۔

بلیک لسٹ کی جانے والی کمپنیوں میں عبداللہ شگر ملز دیپالپور، عبداللہ شوگر ملز، حسیب وقاص شوگرملز، سیری شوگرملز، ٹی ایم کے شوگرملز، ٹانڈیا والا شوگر ملز، عبداللہ شاہ غازی شوگرملز، حق باہو شوگر ملز اورمکہ شوگر ملز شامل ہیں۔

ٹریڈنگ کارپوریشن پاکستان (ٹی سی پی ) کے مطابق یہ شوگر ملز مقرر کیے گئے کوٹے کے مطابق چینی فراہم کرنے میں ناکام رہیں، اب یہ کمپنیاں ٹی سی پی کے کسی بھی ٹینڈرمیں حصہ نہیں لے سکیں گی۔

اسلا م آباد: سال 2019 کے 9 ماہ میں پی آئی اے کی آمدنی 42 فیصد اضافے سے ایک کھرب 7 ارب 33 کروڑ 90 لاکھ روپے رہی۔

پی آئی اے نے سال 2019 کی تیسری سہ ماہی کی مالیاتی رپورٹ اسٹاک ایکسچینج میں جمع کرادی جس کے مطابق سال 2019 کے 9 ماہ میں پی آئی اے کی آمدنی 42 فیصد اضافے سے ایک کھرب 7 ارب 33 کروڑ 90 لاکھ روپے رہی جب کہ 2018 کے اسی عرصے میں پی آئی اے کو 75 ارب 56 کروڑ 10 لاکھ روپے کی آمدن ہوئی تھی۔

رپورٹ میں بتایا گیا کہ 2018 کے مقابلے 2019 میں پی آئی اے کے آپریشنل اخراجات میں 78 فیصد کمی ہوئی ہے، سال 2019 میں پی آئی اے کی کارگو اور پسنجر آمدنی میں بھی 41 فیصد اضافہ ہوا جب کہ پروازوں میں نشستوں کی فروخت سال 2019 میں 5 فیصد اضافے کے بعد 81 فیصد رہی۔

رپورٹ کے مطابق پی آئی اے اخراجات کا کل 24 فیصد حصہ فیول کی مد میں خرچ ہوا جب کہ رپورٹ میں بتایا گیا ہےکہ عالمی وبا کورونا کی صورتحال پی آئی اے کے لیے چیلنجنگ ہے۔

اسلام آباد: وفاقی بورڈ آف ریونیو (ایف بی آر) نے ٹیکس دہندگان کے پروفائلز جمع کروانے کی آخری تاریخ کو 30 جون تک توسیع دیتے ہوئے عمل نہ کرنے والے افراد کو خبردار کیا ہے کہ ان کے نام ایکٹو ٹیکس پیئر لسٹ (اے ٹی ایل) سے نکال دیے جائیں گے اور دوبارہ شامل کیے جانے پر سرچارج ادا کرنا پڑے گا۔

رپورٹ کے مطابق انکم ٹیکس آرڈیننس 2001 کی دفعہ 114 اے کے تحت ٹیکس دہندگان کے پروفائلز جمع کروانے اور انہیں اپڈیٹ کرنے کی ڈیڈلائن 31 دسمبر 2020 تھی۔

تاہم ایف بی آر نے اس ڈیڈ لائن کو 31 مارچ 2021 تک 3 ماہ کے لیے توسیع دے دی تھی اور اب تفصیلات جمع کروانے کے لیے مزید 3 ماہ کی توسیع دے دی گئی۔

خیال رہے کہ حکومت نے ٹیکس سال 2020 میں تاخیر سے ٹیکس ریٹرن فائل کرنے والے 5 لاکھ 9 ہزار 39 کو سزا کے طور پر ایکٹو ٹیکس پیئرز لسٹ سے خارج کردیا تھا۔

پروفائل ٹیکس دہندہ سے متعلق بنیادی معلومات کا مجموعہ ہوتا ہے اور اکثر افراد جب اپنا رہائشی پتا یا بینک اکاؤنٹ تبدیل کرتے ہیں تو اپنے پروفائل کو اپڈیٹ نہیں کرتے۔

موجودہ حکومت نے گزشتہ برس تمام ٹیکس دہندگان کے لیے لازمی قرار دے دیا تھا کہ وہ اپنے پروفائل کو اپگریڈ کریں۔

اے ٹی ایل فہرست میں موجود ٹیکس دہندگان لوئر ٹیکس ریٹ سے فائدہ اٹھا سکتے ہیں۔

ایف بی آر کے ترجمان ندیم رضوی نے ڈان سے بات کرتے ہوئے کہا کہ ریفنڈ کی رقم براہِ راست ٹیکس دہندہ کے اکاؤنٹ میں جمع کروانے کے لیے اپڈیٹ پروفائل اہم ہے اور اس کے لیے آئی بی اے این درکار ہوتا ہے۔

ساتھ ہی انہوں نے یہ بھی کہا کہ ٹیکس دہندگان کی اے ٹی ایل میں دوبارہ شمولیت جرمانے کی ادائیگی سے مشروط ہے۔

انہوں نے بتایا کہ ٹیکس دہندہ کو موبائل نمبر، ای میل ایڈریس، بزنس ایڈریس، یوٹیلیٹی کے استعمال کی تفصیلات، آئی بی این سی والے بینک اکاؤنٹس کی تفصیلات دینی ہوں گی، یہ معیشت کو دستاویزی بنانے کا ایک اقدام ہے۔