Category بزنس

کراچی ( وقت ٹی وی آن لائن ) پاکستانی شہریوں کے لیے مالی سال 2020 بدترین ثابت ہوا جس میں انہوں نے دنیا کی سب سے بلند مہنگائی کا مشاہدہ کیا اور پالیسی ساز شرح سود میں اضافے پر مجبور ہوئے۔

اسٹیٹ بینک پاکستان کی جانب سے اپریل کے لیے جاری کردہ مہنگائی کی جائزاتی رپورٹ میں کہا گیا کہ ’نہ صرف دنیا کی ترقی پذیر بلکہ ترقی یافتہ معیشتوں کے مقابلے میں پاکستان نے بلند ترین افراطِ زر کا مشاہدہ کیا‘۔

رواں مالی سال کے دوران اسٹیٹ بینک نے مہنگائی کے دباؤ کو کم کرنے کے لیے شرح سود میں اضافہ کیا لیکن بلند شرح سود کا الٹا اثر ہوا اور اسے نہ صرف مہنگائی میں اضافہ ہوا بلکہ نجی شعبے نے صنعتی نمو اور خدمات میں رکاوٹ بننے والی مہنگی رقم کا قرض لینا بند کردیا۔

رپورٹ کے مطابق جنوری میں دوران میں افراطِ زر کی شرح 12 سال کی بلند ترین سطح پر یعنی 14.6 فیصد تھی اور قیمتوں میں اضافے کے ردِ عمل میں اسٹیٹ بینک نے شرح سود 13.25 فیصد تک بڑھا دی تھی۔

تاہم کورونا وائرس کے پھیلاؤ کے سبب پورا معاشی منظر نامہ الٹ گیا اور طلب میں کمی کے باعث اسٹیٹ بینک صرف 3 ماہ کے دورن شرح سود کو 5.25 فیصد تک کم کرنے پر مجبور ہوگیا۔

شرح سود میں کمی کا اعلان اس وقت سامنے آیا جب مئی کے دوران مہنگائی کم ہو کر 8.2 فیصد ہوگئی جو اسٹیٹ بینک کے اندازے سے بھی کم تھی۔

اسٹیٹ بینک کے مہنگائی کے جائزے کے تفصیلی گراف کو دیکھا جائے تو ترقی پذیر معیشتوں مثلاً چین، تھائی لینڈ، بنگلہ دیش، بھارت اور سری لنکا کے مقابلے پاکستان کی افراطِ زر میں عالمی وبا کے بعد سے کمی واقع ہوئی ہے۔

رواں مالی سال کے جولائی سے لے کر مئی تک کے عرصے میں مہنگائی اسٹیٹ بینک کے 1.94 تا 11 فیصد کے تخمینے سے بھی کم رہی جس میں جون کے دوران مزید کمی کا امکان ہے۔

گزشتہ 2 ماہ کے دوران حکومت نے 2 مرتبہ پیٹرولیم مصنوعات کی قیمتوں میں کمی جس سے پیدواری لاگت اور نقل و حمل کی لاگت کم ہوئی اور اس سے افراطِ زر بھی کم ہوگئی۔

ٹی وی چینل پر ایک انٹرویو میں معروف صنعتکار زبیر موتی والا نے حکومت سے مطالبہ کیا کہ معاشی سرگرمیوں کو فروغ دینے کے لیے شرح سود کو 5.25 فیصد سے بھی کم کیا جائے۔

تجارتی اور صنعتی شعبہ جات جہاں شرح سود میں کمی کا مطالبہ کرتے ہیں وہیں انہیں معلوم ہے کہ معیشت کی مکمل بحالی کے لیے 30 سے 40 کھرب روپے درکار ہیں۔

تاہم معاشی سست روی کے ساتھ اس سال ریونیو کلیکشن بھی ہدف سے کم رہی یوں اتنے بڑے پیمانے پر حکومت کے لیے رقم کا بہاؤ شامل کرنا نامکمن ہے۔

اسٹیٹ بینک کی جانب سے قرضوں کی اصل رقم کی ادائیگی موخر ، قرضوں کی ری شیڈولنگ اور صنعتی شعبوں میں نوکریوں کے خاتمے سے بچانے کے لیے آسان شرائط پر قرض فراہم کر کے اربوں روپے کا ریلیف دیا گیا۔

اسلام آباد ( وقت ٹی وی آن لائن ) پٹرولیم مصنوعات کی عدم فراہمی اور کمی پر آئل اینڈ گیس ریگولیٹری اتھارٹی (اوگرا) کے شوکاز پر آئل مارکیٹنگ کمپنیز نے جواب جمع کرادیا۔

اوگرا کے شوکاز پر اپنے جواب میں آئل مارکیٹنگ کمپنیز نےمؤقف اختیار کیا ہے کہ مارچ میں بغیر منصوبہ بندی درآمدات بند کی گئیں اور اسمگلنگ رکنے سے بھی طلب میں اضافہ ہوا۔

آئل مارکیٹنگ کمپنیز کا کہنا ہے کہ اپریل میں تیل مصنوعات درآمد کرنے کی بار بار درخواست کی گئی، تاہم طے شدہ درآمدات بھی منسوخ کردی گئیں اور اپریل میں درآمد نہ کھلنےسےکم ترین قیمت کافائدہ نہ اٹھایاجاسکا۔

آئل مارکیٹنگ کمپنیز نےکہا ہے کہ پیٹرولیم مصنوعات کی دستیابی میں کمی وزارت پیٹرولیم کے فیصلہ نہ کرنے کی وجہ سے ہوئی۔

اوگرا کو دیے گئے جواب میں کہا گیا ہے کہ ریفائنریز مکمل گنجائش پر نہیں اس لیے مطلوبہ سپلائی نہیں مل رہی، اب عالمی منڈی میں پاکستان سےکہیں زائد قیمت پرتیل دستیاب ہے اس لیے بحران سےنمٹنے کے لیے 15دن اوسط قیمت پر ریٹیل پرائس کا اعلان کیاجائے۔

خیال رہے کہ مارکیٹ میں پیٹرولیم مصنوعات کی عدم فراہمی کی شکایات پر گذشتہ روز اوگرا نے تین آئل کمپنیز کو شو کاز نوٹس بھیجا تھا۔

اوگرا کا کہنا تھا کہ یہ کمپنیاں ریٹیل آؤٹ لیٹس کو پٹرولیم مصنوعات کی پوری فراہمی نہیں کر رہی ہیں اور اس صورتحال میں مارکیٹ میں تیل سپلائی متاثر ہوئی ہے ،اوگرا نے تین آئل مارکیٹنگ کمپنیز کو شوکاز نوٹس دیتے ہوئے 24گھنٹے میں جواب طلب کیا تھا۔

اسلام آباد ( وقت ٹی وی آن لائن ) وفاقی حکومت نے ملکی معیشت اور ترقی کی منصوبہ بندی کے لیے بین الااقوامی تجربےکا حامل چیف اکانومسٹ لانے کا فیصلہ کیا ہے۔

ذرائع کے مطابق وفاقی کابینہ نے وزارت منصوبہ بندی کی سمری کی سرکولیشن کے ذریعے منظوری دے دی ہے۔

ذرائع کا کہنا ہے کہ چیف اکانومسٹ کے لیے اسپیشل پروفیشنل پے اسکیل منظور کرایا گیا ہے اور چیف اکانومسٹ کے لیے ایم پی1کو اسپیشل پروفیشنل پے اسکیل سے بدلنےکی منظوری دی گئی ہے۔

ذرائع نے بتایا ہے کہ چیف اکانومسٹ کو اسپیشل پروفیشنل اسکیل کے تحت بھاری مشاہرہ دیا جائےگا جب کہ چیف اکانومسٹ کو وفاقی وزارت منصوبہ بندی میں تعینات کیا جائے گا۔

چیف اکانومسٹ کےانتخاب کے لیے عالمی اخبارات میں اشتہار دےکرمسابقتی عمل سے تعیناتی کی جائے گی۔

لاہور (وقت ٹی وی آن لائن ) ضلعی انتظامیہ اور پولیس نے مارکیٹوں میں کورونا ایس او پیز پر عمل درآمد نہ ہونے پر کارروائی کا آغاز کرتے ہوئے متعدد دکانیں سیل کردیں۔

پنجاب میں کورونا کیسز میں تیزی سے اضافے کے بعد لاہور میں ضلعی انتظامیہ اور پولیس نے مشترکہ آپریشن شروع کردیا۔

ضلعی حکام اور پولیس افسران نے ایس او پیز پر عملدرآمد کے لیے مختلف مارکیٹوں کا دورہ کیا اور جن دکانوں پر اس کی خلاف ورزی کی گئی انہیں سیل کردیا۔

کارروائی کے دوران جوہرٹاؤن کی جی ون مارکیٹ میں اسسٹنٹ کمشنر سٹی رائیونڈ نے مختلف دکانیں سیل کر دیں جب کہ ٹاؤن شپ بازار میں 24 دکانوں کو سیل کیا گیا۔

اسسٹنٹ کمشنر سٹی تبریز مری نے الیکٹرانکس کی معروف مارکیٹ ہال روڈ میں بھی کارروائی کی اور وہاں بھی ایس او پیز پر عملدرآمد نہ کرنے پر 35 دکانیں سیل کر دیں۔

علاوہ ازیں پنجاب حکومت کی جانب سے ضلعی انتظامیہ اور پولیس کو جمعہ کے روز سے ایس او پیز پر عملدرآمد کرانے کے لیے سخت ایکشن کی ہدایات بھی جاری کر دی گئی ہیں۔

واضح رہے کہ حکومت پاکستان نے ایس او پیز پر سختی سے عمل درآمد کروانے کے لیے خلاف وزری پر جرمانے عائد کرنے کا بھی فیصلہ کیا ہے۔

اسلام آباد ( وقت ٹی وی آن لائن ) آئل اینڈ گیس ریگولیٹری اتھارٹی (اوگرا) نے پیٹرولیم مصنوعات کی ذخیرہ اندوزی کرنے والے پمپس کے خلاف کارروائی کے لیے انتظامیہ سے رابطہ کرلیا۔

جیونیوز کے مطابق اوگرا نے ملک بھر میں پیٹرول اور ڈیزل کی فراہمی یقینی بنانے کیلئے چاروں صوبوں، گلگت بلتستان اور آزاد کشمیر کے چیف سیکر ٹریز کو خطوط لکھ دیے۔

اوگرا کی جانب سے متعلقہ ڈپٹی کمشنرز کے ذریعے پیٹرولیم مصنوعات کی ذخیرہ اندوزی کرنے والے پیٹرول پمپس کےخلاف قانونی کارروائی کی درخواست کی گئی ہے۔

واضح رہے کہ پیٹرولیم مصنوعات کی قیمت میں کمی کے بعد یکم جون سے ملک بھر میں پیٹرول کی قلت ہے اور کراچی سمیت کئی شہروں میں بیشتر پیٹرول پمپس پر پیٹرول نہیں مل رہا جس پر اوگرا نے کچھ آئل مارکیٹنگ کمپنیوں کو شوکاز نوٹس بھی جاری کیے ہیں۔

لاہور ( وقت ٹی وی آن لائن ) کورونا سے بچاؤ کے لیے بنائی گئی ایس اوپیز پر عملدرامد نہ کرنے پر پنجاب کے کئی شہروں میں بڑی مارکیٹیں بند کر دی جائیں گی۔

ذرائع کا کہنا ہے کہ لاہور، فیصل آباد اور راولپنڈی میں ایس او پیز کی خلاف ورزی کرنے والی مارکیٹوں کے خلاف ایکشن چند گھنٹوں میں شروع ہو جائےگا۔

ذرائع کا بتانا ہے کہ پنجاب کی بڑی مارکیٹیں بند کرنے کا فیصلہ این سی او سی کے فیصلوں کے تناظر میں کیا گیا۔

دوسری جانب حکومت پاکستان نے بھی ایس او پیز پر سختی سے عمل درآمد کروانے کے لیے خلاف وزری پر جرمانےعائد کرنے کا فیصلہ کیا ہے۔

اسلام آباد ( وقت ٹی وی آن لائن ) وزیراعظم عمران خان کی زیر صدارت قومی رابطہ کمیٹی (این سی سی) کے اجلاس میں ملک میں کورونا وائرس کے پیش نظر ہفتے میں صرف 2 دن لاک ڈاؤن کرنے کا فیصلہ کیا گیا ہے۔

وزیراعظم عمران خان کی زیر صدارت قومی رابطہ کمیٹی کا اجلاس ہوا جس میں چاروں صوبوں کے وزرائے اعلیٰ سمیت دیگر حکام نے شرکت کی۔

اجلاس میں کورونا وائرس کی صورتحال پر غور کیا گیا اور کئی اہم فیصلے کیے گئے۔

ذرائع کا کہنا ہے کہ اجلاس میں فیصلہ کیا گیا کہ ہفتے میں صرف دو روز ہفتے اور اتوار کولاک ڈاؤن ہوگا جبکہ جمعے کو بھی دکانیں کھلی رہیں گی۔

اجلاس میں فیصلہ کیا گیا کہ دکانیں کھولنے کیلئے پرانے اوقات کار پرعمل ہوگا جبکہ مارکیٹس اور شاپنگ مال بھی طے کردہ ضابطہ کار کے تحت کھلے رہیں گے۔

ذرائع کے مطابق اجلاس میں شادی ہالز، اسکولز، کالجز اور ریسٹورنٹس نہ کھولنے کا فیصلہ کیا گیا۔

ملک بھر میں کورونا 92 فیصد مقامی طور پر پھیل رہا ہے: این سی سی میں بریفنگ
دوسری جانب وزیراعظم کی زیر صدارت قومی رابطہ کمیٹی کے اجلاس کی اندرونی کہانی بھی سامنے آگئی ہے۔

اجلاس میں بریفنگ دی گئی کہ پاکستان میں کورونا وائرس مقامی طور پر پھیلنا شروع ہوچکا ہے اور ملک بھر میں کورونا کے مقامی سطح پر پھیلاؤ کی شرح 92 فیصد ہے۔

ذرائع کے مطابق اجلاس میں وزیراعظم نے سعودی عرب سمیت تمام ممالک سے رجسٹریشن کرانے والے پاکستانیوں کومرحلہ وار واپس لانے کی ہدایت کی۔

ذرائع نے بتایا کہ وزیراعظم نے ہدایت کی کہ خیبرپختونخوا اور گلگت بلتستان کے حکام سیاحت کے فروغ کیلئے ضابطہ کار تیار کریں۔

ذرائع کے مطابق وزیر ریلوے شیخ رشید کی سفارش پر وزیراعظم نے مزید 10 ٹرینیں چلانے کی منظوری دی جس کے بعد مجموعی طور پر اب ملک بھر میں 40 ٹرینیں چلیں گی۔

سندھ حکومت کے وفاق سے گلے شکوے برقرار
ذرائع کے مطابق سندھ حکومت کے وفاق سے گلے شکوے برقرار ہیں اور وزیراعلیٰ سندھ مراد علی شاہ نے اجلاس میں بھی گلے شکوے کیے ہیں۔

ذرائع نے بتایا کہ مراد علی شاہ نے شکوہ کیا کہ کورونا سے متعلق فیصلوں پرپہلے اعتماد میں لیا کریں۔

ذرائع کا کہنا ہے کہ وزیراعلیٰ سندھ مراد علی شاہ نے صحت کیلئے فنڈز کا مطالبہ کرتے ہوئے کہا کہ اسپتالوں میں سہولتیں بڑھاناچاہتے ہیں لیکن وفاق تعاون نہیں کررہا۔

خیال رہے کہ قومی رابطہ کمیٹی کے اجلاس کے بعد وزیر اعظم عمران خان کا میڈیا سے بریفنگ میں کہنا تھا کہ مخصوص شعبوں کے علاوہ سب کچھ ضابطہ کار کے تحت کھول دیا جائے گا۔

انہوں نے کہا کہ کورونا کہیں نہیں جارہا، عوام احتیاط کریں ورنہ اپنا ہی نقصان ہوگا۔

وزیراعظم عمران خان نے کہا کہ کم از کم اس سال تو ہمیں وائرس کے ساتھ گزارا کرنا پڑے گا، امیرملکوں نے بھی لاک ڈاؤن کھولنے کا فیصلہ کیا، پہلے ہی کہہ دیا تھا کہ کورونا وائرس پھیلےگا، ہماری انتظامیہ اور پولیس پر بہت دباؤ ہے، کچھ شعبے بند رہیں گے باقی سب کھول رہے ہیں۔

انہوں نے کہا کہ جن شعبوں کو نہیں کھولنا ہے اس کی تفصیلات جلد عوام کے سامنے رکھ دی جائیں گی۔

وزیراعظم نے کہا کہ اس کے علاوہ این سی ای اجلاس میں جو فیصلے کیے گئے ہیں وہ کل وفاقی وزیر برائے منصوبہ بندی اسد عمر کی سربراہی میں ہونے والے نیشنل کمانڈ اینڈ کنٹرول سینٹر (این سی او سی) کے اجلاس کے بعد عوام کے سامنے رکھے جائیں گے۔

ملک میں کورونا وائرس تیزی سے پھیل رہا ہے جس کے باعث 1500 سے زائد افراد جاں بحق ہوچکے ہیں جبکہ متاثرہ مریضوں کی تعداد 74 ہزار سے زائد ہے۔

لاہور ( وقت ٹی وی آن لائن ) پاکستانی روپے کے مقابلے میں امریکی ڈالر کی قدر میں اضافے کا سلسلہ جاری ہے۔

انٹر بینک میں ایک امریکی ڈالر 98 پیسے مہنگا ہوگیا ہے۔ کاروباری ہفتے اور ماہ جون کے پہلے روز کاروبارکے اختتام پر انٹربینک میں ڈالر 164 روپے 8 پیسے کا ہوگیا۔

دوسری جانب اوپن مارکیٹ میں بھی ڈالر کی قدر میں اضافے کا سلسلہ جاری ہے اور ایک امریکی ڈالر 50 پیسے مہنگا ہوکر 164 روپے کا ہوگیا ہے۔

لاہور ( وقت ٹی وی آن لائن ) حکومت کی جانب سے پیٹرولیم مصنوعات کی قیمتوں میں تو کمی کر دی گئی لیکن اس کے باوجود عوام روز مرہ کی اشیاء کی قیمتوں میں کمی سے محروم ہیں۔

یکم مارچ سے ملک میں پیٹرول و ڈیزل قیمت میں تقریباً 36 فیصد کمی ہو چکی ہے اور گزشتہ روز جاری کیے گئے اعلامیے کے بعد پیٹرول کی قیمت میں فی لیٹر 7 روپے 6 پیسے کمی ہو کر نئی قیمت 74 روپے 52 پیسے فی لیٹر ہوگئی ہے۔

اس کے باوجود ٹرانسپورٹ کرائے کم ہوئے، نہ آٹا دال چاول گوشت کی قیمتیں نیچے آئیں۔

اس سے متعلق سابق صدر کے سی سی آئی ہارون اگار نے کہا ہے کہ دالوں کی عالمی قیمت 30 فیصد تک کم ہوئی لیکن پاکستان میں کوئی کمی نہیں ہوئی، خشک دودھ کی قیمت میں 3400 سے 2300 ڈالر کمی کا بھی اثر نہیں آیا یہاں تک کہ ٹرانسپورٹرز نے کرائے بھی کم نہیں کیے۔

ان کا کہنا تھا کہ وزیراعظم عمران خان نے دو مئی 2020 کو ملک کے تمام چیف سیکرٹریز کو حکم دیا تھا کہ پیٹرولیم مصنوعات کی قیمتوں میں کمی کا فائدہ عوام تک پہنچایا جائے یا تو چیف سیکرٹریز نے وزیراعظم کا حکم سُنا نہیں، یا سمجھا نہیں۔

تاجر وں اور عوام کا کہناہے کہ پیٹرولیم مصنوعات پر اربوں روپے ٹیکسوں میں کمی کا اثر عوام کو منتقل نہیں ہو رہا۔

ادھر رہنما گڈز ٹرانسپورٹرز ملک شبر کہتے ہیں کم کاروبار اور مستقل لاگت کے سبب کرائے کم نہیں کیے گئے۔

ان کا کہنا ہے کہ پیٹرولیم مصنوعات کی قیمتوں میں کمی تو ہو گئی لیکن ہمیں ڈرائیورز کو تنخواہیں بھی دینی ہیں لہذا موجودہ صورت حال میں کرایوں میں کمی نہیں کی جا سکتی۔