Category کالم

لاہور(ایمرا نیوز)
نواز شریف نے اپنے گزشتہ دور حکومت کے 4سالوں میں 64غیر ملکی دورے کئے جن پر ایک ارب روپیہ خرچ ہوا اور حاصل وصول کی کچھ خبر نہیں یعنی کھایا پیا کچھ نہیں گلاس توڑا ایک ارب۔اس خاندان کو عربوں اور اربوں سے خصوصی دلچسپی ہے جبکہ عوام کو روٹی روزی کے چکر میں عربوں کے متعلق تو خاصا علم ہے کہ یہ کیسے ہوتے ہیں؟ان کی دلچسپیاں، ترجیحات و مصروفیات کیا ہوتی ہیں لیکن اربوں بارے عوام لاعلم ہیں۔اچھا خاصا معقول آدمی بھی نہیں جانتا کہ ایک ارب میں کتنے کروڑ ہوتے ہیں۔ عام آدمی تو شاید اس سے بھی واقف نہ ہو کہ ایک کروڑ میں کتنے لاکھ ہوتے ہیں۔پاکستان کے کرتوں دھرتوں نے تو ارب کھرب کو بھی صحیح معنوں میں ٹکے ٹوکری کرکے رکھ دیا ہے ورنہ کبھی ’’لکھ پتی‘‘ بھی بڑی شے سمجھا جاتا تھاجس کا سب سے بڑا ثبوت یہ کہ ہمارے بچپن میں ’’سات لاکھ‘‘ کے نام سے اک فلم بنی جس نے دھوم مچا دی تھی۔اس فلم کے یہ گیت تو آج بھی روز اول کی طرح سحرطاری کر دیتے ہیں۔’’آئے موسم رنگیلے سہانے جیا نہیں مانے تو چھٹی لے کے آجا بالما‘‘’’یارو مجھے معاف رکھو میں نشے میں ہوں‘‘’’قرار لوٹنے والے تو پیار کو ترسے‘‘پھر یوں ہوا کہ لکھ پتی بھی ککھ پتی ہو گئے اور اب تو چند سالوں سے نوبت یہاں تک آ پہنچی ہے کہ لاکھوں کیا، کروڑوں کی حرام خوری کے سکینڈل کو بھی کان ترس
گئے ہیں۔اربوں کھربوں سے کم کا کوئی کیس ہی سنائی دکھائی نہیں دیتا تو شاید قصور حرام خوروں اور راشیوں کا بھی نہیں کیونکہ حکمرانوں نے روپیہ ہی بری طرح رول کے رکھ دیا ہے جسے اقتصادی اصطلاح میں ’’ڈی ویلیو‘‘ ہونا کہتے ہیں۔یوں تو کسی نے بھی کم نہیں کیا لیکن پاکستان کی پوری اقتصادی تاریخ میں نواز شریف کے سمدھی اسحاق ڈار جیسا بے درد بھیانک قسم کا ’’اکنامک ہٹ مین‘‘ میری نظر سے نہیں گزرا اور میں پورے اعتماد سے کہہ سکتا ہوں کہ اس کی وجہ نااہلی نہیں تھی بلکہ یہ سب کچھ ایک انتہائی سوچے سمجھے منصوبے کے تحت کیا جا رہا ہے ۔عہد حاضر میں جنگوں کی نوعیت بدل گئی ہے ۔اب کسی ملک کے جسم کو باہر سے بم، گولی یا گولہ نہیں مارا جاتا بلکہ اندر سے زخمی، گھائل اور کھوکھلا کر دیا جاتا ہے ۔اندر سے گلائوسڑائو کا کھیل کھیلا جاتا ہے ۔ظاہراً سب ٹھیک ٹھاک چل رہا ہوتا ہے لیکن باطن میں گردے گال دیئے جاتے ہیں، پھیپھڑے چھلنی کر دیئے جاتے ہیں، دل کمزور کر دیا جاتا ہے اور جگر جواب دینے لگتا ہے ۔یہ سارے اہداف حاصل کرنے کا خفیہ طریقہ یہ ہے کہ ملکی معیشت کو مختلف طریقوں سے اس طرح تہس نہس کر دو کہ وہ ’’وائیبل‘‘ ہی نہ رہے ۔اندرونی بیرونی قرضوں کی دلدل میں دھنسے ملک کی کرنسی جب ردی کے ڈھیر میں تبدیل ہوتی ہے تو سوویت یونین کی طرح اس کا جغرافیہ بھی تبدیل ہو جاتا ہے، تاریخ پر بھی خط تنسیخ پھر جاتا ہے ۔ترقی کی آڑ میں یہی کھیل پاکستان میں بھی کھیلا جا رہا تھا۔کسی بھی ملک کی معیشت اور نتیجہ میں معاشرت کو برباد کرنے کے کئی طریقے اور حربے ہیں جن میں قرضے ہی نہیں کرپشن کے کلچر کا بے دریغ فروغ بھی شامل ہے۔ امیر کو امیر تر اور غریب کو غریب ترین کرنا بھی اسی حکمت عملی کا ایک حصہ ہے ۔یہ باریک بخیہ گری اس طرح کی جاتی ہے کہ ان پڑھ تو کیا پڑھے لکھوں کے پلے بھی کچھ نہیں پڑتا۔انہیں بھی سمجھ نہیں آتی کہ اصل میں ہو کیا رہا ہے۔وہ بھی احمقوں کی طرح یہ بھونڈی دلیل دیتے دکھائی دیتے ہیں کہ ……’’کھاتے ہیں تو لگاتے بھی ہیں ‘‘یا یہ کہ ’’کون نہیں کھاتا جی ‘‘ نتیجے میں سب کچھ کھوہ کھاتے میں چلا جاتا ہے ۔اکثریت “NEED”کی وجہ سے کرپٹ ہو جاتی ہے اقلیت “GREED”کی وجہ سے جی بھر کر ملک کو لوٹتی ہے ۔’’پوٹے‘‘ بھی بھر جاتے ہیں اور اوجھڑیاں بھی بھر جاتی ہیں لیکن ملک ’’بھوکا‘‘ رہ جاتا ہے اور بھوک سے مرنا بہت اذیت ناک ہوتا ہے۔پھر نوبت وہاں تک پہنچ جاتی ہے کہ’’وہ بھوک ہے اعضاء کہیں اعضاء کو نہ کھالیں‘‘اندھی لوٹ مار کا جو عمل تقریباً 30سال پہلے شروع ہوا اس کی انتہا کو دیکھنا اور سمجھنا ہو تو یہ تازہ ترین خبر سرخیوں سمیت ملاحضہ فرمائیں۔’’45ارب پتی موجودہ اور سابق پولیس افسروں کے خلاف انکوائری کا فیصلہ ‘‘’’کس کس کا کاروبار میں حصہ، کیسے اربوں روپے کمائے؟بیرون ملک کتنے اکائونٹس ہیں ۔اہم اداروں نے کام شروع کر دیا‘‘’’ارب پتی پولیس افسروں میں 8سابق آئی جی، 13سابق ڈی پی او، 17آر پی او اور بارہ ایس ایس پی شامل ہیں ‘‘’’انسپکٹر رینک کے 4افسر بھی ارب پتی ‘‘’’ایک سابق پولیس افسر کا پنجاب کے لینڈ مافیا سے بھی تعلق ‘‘’’رپورٹ میں ایک آئی جی رینک کے افسر کو سندھ کے اندر ایرانی تیل کا سب سے بڑا ڈیلر اور مافیا قرار دیا گیا ہے‘‘قارئین !چھوٹی موٹی رشوت ،ڈالی 30،32سال پہلے بھی موجود تھی لیکن آج کے مقابلہ پر عشر عشیر بھی نہیں کہ گزشتہ 30سال میں تو لوٹ مار ہی ہمارا ٹریڈ مارک رہ گیا اور کچھ شرفاء نے اسے باقاعدہ ’’وے آف لائف ‘‘ میں تبدیل کر دیا جسے تبدیل کرنا ہی اصل تبدیلی ہو گی۔
(بشکریہ جنگ نیوز)

لاہور(ایمرا نیوز)
وزیراعظم عمران خان نے پہلی فرصت میں ہی جی ایچ کیو کا دورہ کر کے بہت اچھا کیا۔ یہ دورہ محض رسمی نہیں تھا، انھوں نے نیشنل سکیورٹی، دفاع اور دہشت گر دی کے حوالے سے آٹھ گھنٹے تک سیر حاصل بریفنگ لی۔ اس سے قبل وہ دفتر خارجہ کا بھی اسی قسم کا دورہ کر چکے ہیں۔ اس لحاظ سے یہ خوش آئند ہے کہ ان کے پیش رو میاں نواز شریف نے کبھی اس قسم کا تکلف نہیں کیا، وہ زیادہ سے زیادہ وزیراعظم ہاؤس، سیکرٹریٹ میں فوجی قیادت کو طلب کر کے میٹنگ کر لیتے یا قومی سلامتی کمیٹی کے اجلاس کی صدارت کر لیتے تھے۔ نومنتخب وزیراعظم ا ور ان کے وفد کو جو وزیر دفاع پرویز خٹک، وزیر خارجہ شاہ محمود قریشی، وزیر خزانہ اسد عمر، وزیر مملکت برائے داخلہ امور شہریار آفریدی اور وزیر اطلاعات فواد چوہدری پر مشتمل تھا کو حسب توقع جی ایچ کیو میں مکمل پروٹوکول دیاگیا۔ عمران خان کی یہ ٹیم ان متعلقہ افراد پر مشتمل تھی جن کا جی ایچ کیو سے رابطہ آنے والے دنوں میں پڑتے ہی رہنا ہے۔ وزیراعظم نے یہ یقین دہانی کرائی کہ دفاعی استعداد بڑھانے کے لیے فوج کو تمام ممکنہ وسائل فراہم کیے جائیں گے۔ دوسری طرف فوجی قیادت نے بھی جمہوری حکومت کو اپنے بھرپور تعاون کا یقین دلایا۔ ماضی میں فوج اور سویلین قیادت کے درمیان تعلقات کی بڑی تلخ تاریخ رہی ہے۔ وطن عزیز میں چار مرتبہ مارشل لا لگا اور میاں نواز شریف سمیت اکثر سیاستدانوں کا یہ گلہ رہا ہے کہ فوج ہمیںکام نہیں کرنے دیتی۔ لیکن یہ گلہ کرتے وقت سیاستدان اس بات کو نظر انداز کر دیتے ہیں کہ ان میں سے اکثر اچھی گورننس دینے کے بجائے اپوزیشن میں اسی فوج سے سازباز کر کے حکومتیں گرانے کو معیوب نہیں سمجھتے تھے۔ اب لگتا ہے کہ عمران خان اور جنرل قمر جاوید باجوہ کی سربراہی میں فوج نئی شروعات کرنا چاہتی ہے۔ ناقدین یہ کہہ سکتے ہیں کہ عمران خان تو جی ایچ کیو کی ہی پیداوار ہیں حالانکہ یہ الزام درست نہیں ہے۔ ’’سیاسی انجینئرنگ‘‘ کا گلہ اپنی جگہ لیکن خان صاحب نے یہ الیکشن جیتا ہے اور ان کے مخالفین بھی انتخابات میں دھاندلی کا شکوہ کرنے کے باوجود انھیں عملی طور پر پانچ سال دینے کو تیار ہیں۔ وزیراعظم نے جس مرحلے پر دفتر خارجہ اور جی ایچ کیو کا دورہ کیا وہ انتہائی اہمیت کا حامل ہے۔ امریکی وزیر خارجہ مائیک پومپیو اور چیئرمین جوائنٹ چیفس آف سٹاف جنرل جوزف ڈنفورڈ پرسوں اسلام آباد آرہے ہیں۔ امریکی وزیر دفاع جیمز میٹس نے کہا ہے جنرل جوزف وزیراعظم عمران خان اور دیگر رہنماؤں سے واضح طورپر طے کریں گے کہ ہمیں کیا کرنا ہے۔ بات چیت کا بنیادی نکتہ مشترکہ دشمنوں اور دہشت گردی کے خلاف کارروائی ہو گا۔ لیکن امریکی وفد کی آمد سے قبل ہی پاکستان کی 300 ملین ڈالر فوجی امداد کا پروگرام منسوخ کر کے امریکہ نے یہ عندیہ دے دیا ہے کہ اس کا پاکستان کے بارے میں موڈ کیسا ہے۔ بعض مبصرین کا خیال ہے کہ پینٹاگون کی طرف سے یہ اچانک اعلان ایرانی وزیر خارجہ جواد ظریف کے حالیہ دورہ اسلام آباد کا شاخسانہ ہو سکتا ہے۔ اس دورے کے دوران پاکستان نے ایران کے ساتھ جوہری معاہدے سے یکطرفہ امریکی انحراف پر ایرانی موقف کی حمایت کی اور کہا پاکستان اس مشکل گھڑی میں ایران کے ساتھ کھڑا ہے۔ مبصرین کا کہنا ہے کہ امدادی پروگرام بند کرنے کے اعلان کے بعد پاکستان کو چاہیے امریکہ سے کہے فی الحال امریکی وفد دورے کی زحمت نہ کرے۔ بعض کا خیال ہے کہ مزید کشیدگی بڑھانے کے بجائے بات چیت کا دروازہ کھلا رکھا جائے۔ اگرچہ امریکی زعما کا یہ دورہ اسلام آباد میں محض سٹاپ اوور کی صورت میں ہی ہے اور ان کی اگلی منزل نئی دہلی ہے جہاں ان کے بھارتی قیادت سے سٹریٹیجک معاملات پر مذاکرات ہونگے۔ ایک اعلیٰ مغربی سفارتکار کے مطابق پاکستان کی فوجی اور سیاسی قیادت سے ان امریکی رہنماؤں کے مذاکرات انتہائی کلیدی اہمیت کے حامل ہیں۔ امریکی انتظامیہ سابق وزیراعظم نوازشریف سے ناخوش تھی کیونکہ وہ وزارت خارجہ کا قلمدان اپنے پاس رکھنے کے باوجود کچھ ڈیلیور کرنے کی پوزیشن میں نہیں تھے جبکہ عمران خان اپنے بیانات اور اقدامات کے ذریعے یہ تاثر دے رہے ہیں کہ وہ سکیورٹی اور خارجہ معاملات میں امریکہ سے بہتر تعلقات استوار کرنے کے حامی ہیں۔ جمعہ کو عمران خان نے اینکر پرسنز سے گفتگو میں کہا کہ امریکہ عزت سے پیش آئے، غلط بات نہیں مانیں گے۔ اصل بات افغانستان پر ہو گی جہاں امریکہ کی خواہش ہے کہ پاکستان طالبان سے مذاکرات شروع کرانے میں امریکہ کی مدد کرے۔ عمران خان ماضی میں کہتے رہے ہیں کہ طالبان پرڈرون نہ پھینکیں بلکہ ان سے مذاکرات کر یں۔ ان بیانات کے حوالے سے انھیںبعض لبرل حضرات طنزاً ’طالبان خان‘ بھی کہتے رہے ہیں۔ وقت نے عمران خان کے موقف کو درست ثابت کر دیا ہے، اب وہی مغربی سفارتکار خان صاحب پر زور دے رہے ہیں کہ آ پ واقعی ’طالبان خان‘ بنیں اور طالبان سے ہمارے مذاکرات کرا دیں۔ یہ اچھا ہو اکہ وزیر خارجہ شاہ محمود قریشی نے وزیراعظم عمران خان کی مائیک پومیپو سے گفتگو کی روداد پر تنازع ختم کر دیا اور یہ اعلان کر دیا کہ ہمیں اب سیاسی طور پرآ گے بڑھنا چاہیے۔ اول تو پروٹوکول کی سطح پر کم از کم امریکی نائب صدر کو پاکستانی وزیراعظم کو مبارکبا د کا فون کرنا چاہیے تھا لیکن اگر وزیر خارجہ کا فون نو منتخب وزیراعظم نے لے ہی لیا تھا تو گفتگو کی روداد کے معاملے میں ذرا احتیاط سے کام لینا چاہیے تھا جیساکہ امریکہ کی طرف سے جاری کردہ گفتگو کی روداد سے آشکار ہو گیا کہ امریکی وزیر خارجہ نے پاکستانی علاقے میں دہشت گردوں کی پناگاہیں ختم کرنے کی بات کی تھی۔ یہ باتیں وہ کئی مرتبہ ’ڈومور‘ کے حوالے سے پاکستان سے کرتے رہے ہیں۔ نہ جانے شاہ محمود قریشی نے ا س کو وقار کا مسئلہ کیوں بنا لیا تھا۔ حقیقت تو یہ ہے کہ آئندہ چند ہفتوں میں پاکستان اور امریکہ کے تعلقات کی نئی جہت طے ہو جائے گی جس کے خدوخال پہلے ہی واضح ہونا شروع ہو گئے ہیں۔ فوج کے سربراہ جنرل قمر جاوید باجوہ کا خارجہ اور سکیورٹی پالیسی کے معاملے میں انتہائی مثبت رویہ ہے، وہ امریکہ کے علاوہ بھارت سے بھی اچھے تعلقات کے خواہاں ہیں اورکشمیر سمیت تمام مسا ئل پر بات چیت کے حامی ہیں۔ آرمی چیف کی عمران خان کی حلف برداری کے موقع پر ان کے ذاتی مہمان مشرقی پنجاب کے وزیر بلدیات اور بھارتی نیشنل کانگریس کے رہنما سابق کرکٹر نوجوت سنگھ سدھو سے جپھی ایک اچھی سفارتی موو تھی۔ اس پربھارتی انتہا پسند حلقے ان کے درپے ہو گئے۔ سدھو نے کہا کہ وہ بابا گورونانک کے 550ویں جنم دن پر وفد کے ہمراہ آنا چاہتے ہیں تو جنرل باجوہ نے کہا کہ وہ ہمارے مہمان ہونگے انھوں نے جنم دن کی تقریبات پر کرتارپور کا راستہ کھولنے کی بھی یقین دہانی کرادی۔ فوج کسی صورت مسئلہ کشمیر کو نظر انداز نہیں کرنا چاہتی لیکن ایٹمی طاقت ہونے کے باعث پاک فوج پرُ اعتماد ہے کہ وہ دہشت گردوں پر قابو پانے کے علاوہ وطن عزیزکی سرحدوں کو بھی محفوظ کر چکی ہے اور اب موقع پاکستان کو اقتصادی طور پر محفوظ کرنے کا ہے۔ فو ج اور سویلین حکومت کے درمیان موجودہ ’ہنی مون‘ پریڈ کے بعد دیکھنا یہ ہے کہ سیاسی اورفوجی قیادت کے درمیان تعلقات کو کس طرح مستقل شکل دی جاتی ہے۔ اگر عمران خان اپنے پیش رو کی طرح ہر ادارے پر غلبہ حاصل کرنے کی کوشش کریں گے تومعاملات پھر خراب ہو جائیں گے۔ دوسری طرف فوج بھی اگر اپنے دائرکار میں رہ کر سویلین حکومت کو مقام دے گی تومعاملات ٹھیک ڈگر پر چلتے رہیں گے۔ فوج کی ایک اہم ضرورت سامان حرب کے لیے بجٹ کی بھی ہے لیکن اس کے لیے تمام سٹیک ہولڈرز کو اقتصادی صورتحال بہتر کرنے کی طرف توجہ دینی چاہیے۔ جب شاہد خاقان عباسی وزیراعظم اور اسحق ڈار وزیر خزانہ تھے تو آرمی چیف نے قومی سلامتی کمیٹی کی میٹنگ میں ٹینکوں کے لیے رقم کا ذکر کیا۔ جس پر اسحق ڈار نے کورا سا جواب دے دیا کہ سیاسی عدم استحکام کی بنا پر خزانہ تو خالی ہو چکا ہے۔ اب یقینا تمام توانائیاں خزانے کو بھرنے کے لیے استعمال کرنا ہونگی۔
(بشکریہ روزنامہ 92 نیوز)

لاہور(ایمرا نیوز)
اسلام، قرآن اور سید الانبیائﷺ کی شخصیت کو مسخ کرکے دنیا کے سامنے پیش کرنے کا آغاز طلوع اسلام کے تقریبا دو سو سال کے بعد شروع ہوا۔جب مسلمان فاتحین نے ایران کی عالمی سلطنت کا مکمل طور پر خاتمہ کردیا اور روم کی سلطنت کے وسیع حصوں مصر، مراکش، شام، الجزائر یہاں تک کہ 711 عیسوی میں اسپین کے بادشاہ روڈرک (Roderik) کو شکست دی ، اور عیسائت کو موجودہ اٹلی یعنی روم اور قسطنطنیہ یعنی موجودہ استنبول تک محدود کر دیا۔ اسی دوران مسلمانوں کی قسطنطنیہ پرمسلسل یلغار جاری تھی کہ روم کے کلیسا نے اسلام اور پیغمبر اسلام کے بارے میں ایک منفی پراپیگنڈے کا آغاز کیا۔ نویں صدی عیسوی میں رسول اکرم ﷺکو نعوذباللہ دشمنِ عیسیٰ علیہ السلام یعنی Antichrist کہا گیا جس کا عدد 666 بتایا گیا۔ باقاعدہ اسلام دشمن تحریروں میں پہلا نام نائی سیٹس آف بازنطین (Nicetas of Byzantium) کا آتا ہے جس نے پہلی دفعہ ایک کتاب تحریر کی جس کا عنوان تھا ’’قرآن محمدؐکی تصنیف ہے‘‘ (نعوذ باللہ)۔ اس کتاب میں قرآن پاک کے غلط ترجمے کیے گئے مثلا سورہ اخلاص میں لفظ ’’الصمد‘‘کو ’’صم‘‘ سے مشتق کر کے اس کا ترجمہ کوئی گول سی چیز کیا گیا اور بتایا کہ پیغمبر اسلام نے خدا کو اس طرح سمجھا ہے۔ اس دور میں روم کی بازنطینی سلطنت پر مائیکل سوئم( III Michail) کی حکومت تھی جو 842 عیسوی سے 867 عیسوی تک وہاں برسراقتدار رہا ہے۔ نائی سیٹس نے اس کے کہنے پر تین کتابیں لکھیں جن کا بنیادی مقصد اسلام اور سید الانبیائﷺکی ذات کی تنقید تنقیص تھا۔ اس کے بعد خاموشی چھا گئی کیونکہ مسلمانوں اور اسلام کا ستارہ بام عروج پر رہا۔ بغداد و طلیطلہ کے علمی مراکز جگمگا رہے تھے، اسی لیے تحریف قرآن اور توہین رسالت کی یہ مہم آگے نہ بڑھ سکی۔ یہاں تک کہ 29 مئی 1453 کو 21سالہ سلطان محمد فاتح نے رومن بازنطینی سلطنت کے مرکز قسطنطنیہ کو 53 روزہ محاصرے کے بعد فتح کرلیا اور مسیحی یورپ کا آخری تاجدار کونسٹنٹائن یاز دہم (Constantine XI ) کا اقتداربھی ختم ہوگیا۔ وہ رومی سلطنت جو 27 قبل مسیح میں قائم ہوئی تھی پندرہ سو سال بعد اس کا سورج باسفورس میں غروب ہو گیا۔ یہ مسلمانوں کے عروج کا آخری سورج تھا جو عثمانی خلافت کی صورت میںطلوع ہوا تھا۔لیکن اس وقت تک مجموعی طور پر امت مسلمہ میں تاتاریوں کے حملوں اور غرناطہ کے سقوط کے بعد بحیثیت مجموعی ایک زوال کا آغاز ہو چکا تھا ،جبکہ دوسری جانب مسیحی یورپ انگڑائی لے رہا تھا۔ صلیبی جنگوں کا زمانہ گزر چکا تھا۔ان جنگوں نے یورپ کو مسلمانوں کے خلاف متحد کردیا تھا۔ صلاح الدین ایوبی کے ہاتھوں مسیحی یورپ کی اتحادی افواج کی شکست کا زخم تازہ تھا۔ بغداد، اسکندریہ اور طلیطلہ کے علمی مراکز سے جو روشنی مستعار لی گئی تھی اس سے یورپ میں تحریکِ احیائے علوم (Renaissance) کا آغاز ہو چکا تھا۔لیکن اس احیائے علوم کی تحریک کے ساتھ ساتھ یورپ کی زیرسرپرستی اسلام، قرآن اور پیغمبر اسلام ﷺکی تعلیمات اور شخصیت کو ایک غیر محسوس طریقے سے مسخ کرنے کی زیر زمین تحریک بھی چل رہی تھی۔ ان کوششوں کا آغاز 1537 میں الیگزنڈر پاگانینی نے ایک تحریف شدہ قرآن شائع کر کے کیا جس کا مقصد یہ تھا کہ اسے خلافت عثمانیہ میں تقسیم کیا جا سکے۔ یورپ میں چھاپہ خانہ ایجاد ہو چکا تھا اس لیے اس تحریف شدہ قرآن کی لا تعداد کاپیاں بنائی گئیں۔ مسلمانوں پر مجموعی طور پر یہ الزام لگایا جاتا ہے کہ انہوں نے اپنے علاقوں میں چھاپہ خانے کی اجازت نہیں دی تھی۔ یہ حقیقت کے بالکل برعکس بات ہے۔ سلطان بایزید نے اپنے دور میں اسی قرآن پاک کی اشاعت کی وجہ سے صرف اور صرف عربی زبان میں کتابیں چھاپنے پر پابندی عائد کی تھی تاکہ اصل اور نقل کے درمیان عام آدمی پہچان کر سکے۔ جبکہ باقی تمام علوم اور مذاہب کے لوگوں کو کتابیں چھاپنے کی اجازت تھی۔ 1727 میں عربی زبان کی پرنٹنگ پر سے بھی پابندی اٹھا لی گئی، لیکن قرآن پاک اور احادیث کی پرنٹنگ کی اجازت نہ دی گئی۔ خطرہ وہی تھا کہ اس طرح غلط اور تحریف شدہ قرآن پاک لوگوں میں تقسیم نہ ہو جائے۔ لیکن 1742 میں ابراہیم متفریکہ نے پہلا پرنٹنگ پریس قائم کیا۔ یہاں ایک اور پروپیگنڈہ بھی عام ہے کہ علماء پرنٹنگ پریس کے مخالف تھے۔ لیکن تاریخ بتاتی ہے کہ جب تحریف شدہ قرآن کے تمام نسخے ڈھونڈ کر جلا دیے گئے اور پرنٹنگ پر پابندی برقرار تھی توجب ابراہیم نے اس کی اجازت کیلئے درخواست دی تو سلطان احمد سوئم نے مفتی شیخ عبداللہ سے رائے لی۔ مفتی صاحب نے کس قدر مناسب رائے دی۔ ’’چونکہ اس سے فائدہ ہو گا، مگر ذہین اور ہوشیار لوگ اس کام پر لگائے جائیں تاکہ چھپائی میں غلطی نہ ہو‘‘۔ دوسری جانب رسول اکرم ﷺکی شان میں غیر محسوس طریقے سے گستاخی والی کتابوں کی اشاعت کا سلسلہ شروع کیا گیا۔ 758 عیسوی میں پیدا ہونے والے ایک شاتم رسول تھیوفنس (Theophanes) کی کتاب (Chornicles) کو ڈھونڈ کر شائع کیا گیا۔ یہی وہ کتاب ہے جو پورے مغرب میں توہین رسالت کا ماخذ تصور ہوتی ہے اور آج بھی جب کسی نے میرے پیارے آقا ﷺکی شان میں گستاخی کرنا ہو تو وہ اس کتاب کی ایک عبارت کا ’’نقل کفر کفر نہ باشد‘‘ حوالہ دیتا ہے۔ تھیوفنس کی اس بے بنیاد اور توہین آمیز عبارت پر گزشتہ پانچ برس سے سرکار دو عالم ﷺ پر سائنسی، نفسیاتی اور معاشرتی تحقیق کے نام پر بکواس کی جاتی رہی ہے، ہرزہ سرائی کی گئی ہے۔ جب میں یونیورسٹی میں نفسیات پڑھ رہا تھا اور آج بھی جو طلبہ دنیا کی یونیورسٹیوں میں نفسیات اور دیگر علوم کا مطالعہ کرتے ہیں تو انتہائی غیر محسوس طریقے سے کتاب کے اس حوالے سے میرے پیارے آقا ﷺ کی شخصیت کا تجزیہ کرنے کی کوشش کی جاتی ہے۔ ہر وہ گمراہ سیکولر اور لبرل استاد اس غلیظ اور گستاخانہ کتاب کا برسبیل تذکرہ حوالہ دیتے ہوئے کہہ جاتا ہے کہ دیکھو یہ آج سے بارہ سو سال پہلے لکھی گئی تھی، اس لیے یہ بنیادی ماخذوں میں سے ایک ہے۔ یہ ہے وہ علمی بددیانتی جو مغرب نے یونیورسٹیوں میں رائج کر رکھی ہے کہ اسلام کو سمجھنے کے لیے بنیادی ماخذ قرآن و حدیث اور سیرت نہیں ہے بلکہ مستشرقین (Orientalist) کی وہ کتابیں ہیں جو انہوں نے اسلام قرآن اور رسول اکرمﷺ کی شخصیت کے بارے میں تحریر کیں ہیں۔ یہ تمام لکھاری اور مورخ وہ تھے جو چرچ کی سرپرستی میں کتابیں تحریر کرتے تھے۔ یہ انتہائی چالاکی سے ایسے لکھتے کہ وہ غیر جانبدار نظر آئیں اور بظاہرلگے کہ وہ مسلمانوں کے حق میں لکھ رہے ہیں۔ اسی لیے یہ سمجھا جاتا ہے کہ انہوں نے انتہائی غیر جانبداری اور اخلاص سے اسلام پر کام کیا ہے۔ حالانکہ وہ اپنی کتابوں میں خاموشی سے ایسا میٹھا زہر بھر دیتے تھے جس سے اسلام، قرآن اور سید الانبیائﷺ کی تعلیمات مسخ ہو کر رہ جاتیں۔ یہ کون تھے اور انہوں نے کیسے رسول اکرمﷺ کی شخصیت کو غیرمحسوس انداز میں نعوذباللہ انسانیت کا دشمن بنا کر پیش کیا۔ یہ ایسی کتابیں ہیں جو دنیا بھر میں گستاخانہ خاکوں کا ماخذ ہیں اور یہ سب کی سب دنیا بھر کی یونیورسٹیوں میں پڑھائی جاتی ہیں اور پاکستان کے تعلیمی اداروں کی لائبریریوں میں آج بھی سنبھال کر رکھی جاتی ہیں۔ یہ سب کون تھے اور کیا تحریر کرتے رہے؟ یہ آئندہ کالم کا موضوع ہوگا۔ (جاری ہے )
(بشکریہ روزنامہ 92 نیوز)

لاہور(ایمرا نیوز)
ذوالفقار علی بھٹو کی پھانسی کی سزا کو عدالتی قتل سے تشبیہ دی جاتی ہے تو نواز شریف، مریم اور کیپٹن صفدر کو دی جانی والی سزا کے حوالے سے احتساب عدالت کے فیصلہ کے نقائص پربھی کافی بحث ہو چکی لیکن ایک اور عدالتی فیصلہ ایسا ہے جو انتہائی متنازع ہے لیکن اُس پر میڈیا یا سیاست میں کوئی خاص بات نہیں ہوئی۔ یہ فیصلہ راولپنڈی سے ن لیگ کے سابق ایم این اے حنیف عباسی کے بارے میں تھاجس کے تحت انہیں غیر قانونی طور پر 137 کلو گرام کی ایفی ڈرین رکھنے پر عمر قید کی سزا دے دی۔ اس کیس سے متعلق دی نیوز کے سینئر رپورٹر وسیم عباسی نے چند دن پہلے ایک خبر دی جس نے اس عدالتی فیصلہ کی کمزوریوں کو بے نقاب کر دیا۔ انسداد منشیات کی خصوصی عدالت کے اس فیصلہ پر لاہور ہائی کورٹ کے ایک ایسے سابق جج جسٹس (ر) صغیر احمد قادری نے اپنی رائے بھی دی جنہوں نے ہائی کورٹ کے ایک اور جج کے ساتھ مل کر چند سال پہلے اسی کیس میں حنیف عباسی کی ضمانت منظور کی تھی۔ جسٹس(ر) صغیراحمدقادری کامانناہے کہ ملزم کوشک کافائدہ ملناچاہیےتھاکیونکہ گمان کی بنیادپرسزانہیں دی جاسکتی تھی۔خبر کے مطابق انسداد منشیات کی خصوصی عدالت راولپنڈی کے جج محمد اکرم خان کے69صفحات پرمبنی فیصلے کو پڑھنے پر انکشاف ہوتا ہے کہ حنیف عباسی کیخلاف پورا مقدمہ عدالت کی جانب سے گوگل پرکی گئی تحقیق اور اس گمان پرمبنی ہے کہ ملزم کی ملکیت میں غیرقانونی کیمیکل تھا جس کی مدد سے میتھم فیٹامائن نامی منشیات تیارکی جاسکتی ہے۔ جسٹس(ر) صغیراحمد قادری کا کہنا ہے کہ فیصلہ کمزور ہے کیونکہ کنٹرول آف نارکوٹکس سبسٹنسزایکٹ کی شق 9-cکے تحت ملزم کوجوسزادی گئی ہے وہ اس مقدمے کیساتھ مطابقت نہیں رکھتی کیونکہ ملزم نے ایفی ڈرین قانونی طورپر حاصل کی تھی اور انھیں ایکٹ کی شق16کے تحت ہی سزا مل سکتی تھی جو کوٹے کے غلط استعمال پربات کرتی ہے۔انہوں نے لاہور ہائی کورٹ کے نومبر2012کے فیصلے کاحوالہ دیاجس میں کہاگیاتھاکہ سیکشن 9-c جس میں سزائے موت رکھی گئی ہے وہ حنیف عباسی کے مقدمے پر لاگو نہیں ہوتی کیونکہ ملزم کیلئے2010 میں گولیاں تیارکرنے کیلئے قانونی طورپر500کلوگرام ایفی ڈرین کاکوٹہ مختص کیاگیاتھا۔ جسٹس صغیرقادری اور جسٹس باقرنجفی پر مشتمل ہائی کورٹ بنچ نے حنیف عباسی کو 2012میں ضمانت دیتے ہوئے اے این ایف کو بتایاتھاکہ اگر حنیف عباسی کے خلاف الزامات ثابت ہوجاتے ہیں تو جرم پرسیکشن16 لاگوہوگی جو قابلِ ضمانت جرم ہے اور جرم کے خلاف زیادہ سے زیادہ سزاایک سال قید بنتی ہے۔ آرڈرمیں کہاگیاتھاکہ ایف آئی آراور بعد میں ہونیوالی تحقیقات میں حنیف عباسی کیخلاف واحد الزام یہ ہے کہ انھوں نے ایفی ڈرین کاغلط استعمال کیایا اس ایفی ڈرین کو ادویات (ڈی-ایسم 30ایم جی ٹیبلٹس)کی تیاری میں استعمال نہیں کیا۔ ہائی کورٹ کے سابق جج نے انسداد منشیات کی خصوصی عدالت کے فیصلے میں گمان لفظ کے استعمال پر شدید تنقید کی کہ الزام ثابت کرنا استغاثہ کی ذمہ داری تھی۔ جسٹس (ر) صغیرنے کہاکہ عدالت نے ایفیڈرین کو کنٹرولڈ اور منشیاتی چیز ثابت کرنے کیلئے گوگل کاسہارالیا جبکہ پاکستانی قانون میں اس کی کوئی اہمیت نہیں ہے۔ تاہم انہوں نے کہاکہ لاہور ہائی کورٹ کے بنچ جس میں وہ بھی شامل تھے، اس کے فیصلے کیمطابق ایفیڈریین ضرور کنٹرولڈ چیزوں میں آتی ہے۔ حنیف عباسی کو جس عدالتی فیصلہ میں عمر قید کی سزا دی گئی وہ بھی یہ تسلیم کرتا ہے کہ استغاثہ ملزم کی جانب سےا سمگلروں یا منشیات فروشوں کوایفی ڈرین کی فروخت سے متعلق کوئی ثبوت پیش کرنے میں ناکام رہا لہٰذا عدالت نے فرض کرلیا کہ حنیف عباسی کے پاس 137کلوگرام غیرقانونی ایفی ڈرین ہے۔ یہ ذکرکرنابھی اہم ہے کہ استغاثہ ملزم سے کوئی منشیات برآمد نہیں کرسکا۔ تحریری فیصلے میں عدالت نے استغاثہ کے پیش کردہ ثبوت کوتسلیم کیاکہ 500کلوگرام ایفی ڈرین میں سے باقی بچ جانیوالی مقدار عباسی فارماسوٹیکل فیکٹری کی جانب سے ادویات(ڈی-ایس ٹیبلیٹس) کی تیاری میں استعمال کرلی گئی۔ یاد رہے کہ حنیف عباسی کو عام انتخابات سے چند دن قبل 21جولائی کو سزا دے کراڈیالہ جیل بھیج دیاگیا تھا۔ اُن کا کیس گزشتہ کئی سال سے زیر التوا رہا اور اس دوران حنیف عباسی کئی بار اخبار نویسوں کو یہ درخواست کرتے نظر آئے کہ اُن کا کیس لٹکایا جا رہا ہے ۔ لیکن الیکشن سے کوئی دو تین ہفتے قبل انسداد منشیات کی خصوصی عدالت کو لاہور ہائی کورٹ کے ایک بنچ کے ذریعے ہدایت جاری کر دی گئی کہ روزانہ کی بنیاد پر اس کیس کو سن کر فیصلہ 21 جولائی تک سنا دیا جائے۔ فیصلہ سنانے کے لیے صبح کا وقت دیا گیا لیکن سنایا کوئی رات بارہ بجے کے قریب گیا اور جب عمر قید کی سزا کا اعلان ہوا تو اس نے بہت سوں کو حیران کر دیا۔ عدالت نے تسلیم کیاکہ ایفی ڈرین کا متعلقہ قانون میں بطور کنٹرولڈ یا منشیاتی چیز کے ذکر نہیں ہے لہٰذا عدالت نے کسی کیمیائی ماہر کی غیرموجودگی میں گوگل پرتحقیق کا استعمال کیا۔ عدالتی فیصلے میں لکھا گیاہے کہ کنٹرول آف نارکوٹکس سبسٹنسز ایکٹ1997میں ایفی ڈرین کاکوئی ذکرنہیں ہے۔ لہٰذا عدالت نے گوگل کے مضمون پر انحصارکیاتاکہ ثابت کیاجائے کہ ایفی ڈرین کو ’’میٹافیٹمائن‘‘یا’’میتھم فیٹامائن‘‘ کی تیاری میں استعمال کیاجاتاہے اس کا ذکرفہرست کی سیریل نمبر47 میں موجودہے۔ دلچسپ بات یہ ہے کہ 1990کے مضمون کوفیصلے میں مکمل طورپر کاپی پیسٹ کیاگیاتھا۔ فیصلے میں کہاگیاہے کہ گوگل ’’ریسرچ‘‘ نے واضح کردیاہے کہ ’’میتھم فیٹامائن‘‘ کو ایفی ڈرین کی استعمال سے تیار کیاجاسکتاہے۔ دی نیوز کی خبر کے مطابق دوسری جانب عدالت کو ایسا بھی کوئی ثبوت نہیں ملا کہ حنیف عباسی نے اس شئے کو بلیک مارکیٹ میں فروخت کردیا۔ تاہم عدالت کہتی ہے کہ اگرچہ استغاثہ یہ ثابت کرنے میں ناکام رہاکہ عباسی نے کسی کو ایفی ڈرین فروخت کردی ہے لیکن تب بھی یہ عدالت کاخیال ہے کہ ملزم گریز فارماسوٹیکل کمپنی کامالک یاشریک مالک ہونے کے ناطے ایفی ڈرین کاقانونی استعمال بتانے کاپابندتھا۔عدالت نے یہ گمان کرلیاکہ الفا کیمیکل لاہور 500کلوگرام ایفی ڈرین سے خریدنے کے بعد 363کلوگرام ڈی ایسم ٹیبلٹ بنانے میں استعمال کرلی گئی اور باقی 137کلوگرام ایفی ڈرین تاحال ملزم کے پاس ہے۔ حیران کن انداز میں عدالت نے تمام سات ملزمان بشمول حنیف عباسی کے بزنس پارٹنرکوشک کافائدہ دیتے ہوئے بری کردیا تاہم حنیف عباسی کو شک کا فائدہ نہیں دیاگیا۔ دلچسپ بات یہ ہے کہ 9000کلوگرام ایفی ڈرین رکھنے کاپی پی پی کے سیاستدانوں بشمول موسیٰ گیلانی (سابق وزیراعظم یوسف رضاگیلانی کے بیٹے)اور مخدوم شہاب الدین کا کیس سالوں سے التواکاشکارہے کیونکہ ملزمان اعلیٰ عدالتوں سے رجوع کیاہے کہ موجودہ قوانین کے تحت ایفی ڈرین ایک نان کنٹرولڈمواد ہے۔وسیم عباسی کی اس خبر کو پڑھ کر احساس ہوتا ہے جیسے کسی ملزم کو قتل کی سزا تو دے دی گئی لیکن نہ لاش ملی نہ ہی یہ ثابت ہوا کہ قتل بھی ہوا کہ نہیں۔
(بشکریہ جنگ نیوز)

لاہور(ایمرا نیوز)
کون کہتا ہے کہ ابن صفی مر گیا، ابن صفی اب بھی زندہ ہے۔ عمران سیریز بھی چل رہی ہے اور جاسوسی ناولوں کے تمام کردار بھی اسی طرح اپنا کام کر رہے ہیں۔ ہنودویہود کی سازشیں اب بھی اسی طرح جاری و ساری ہیں۔ ساری دنیا متحد ہو کر پاکستان کے لئے اب بھی معاشی مشکلات پیدا کر رہی ہے۔ امریکہ نے 300 ملین ڈالر کی جو امداد بند کی ہے اس سے امریکہ کے پاکستان مخالف ارادے صاف ظاہر ہوتے ہیں۔
عوام خان کل بھی ابن صفی کی دنیا میں زندہ تھا اور آج بھی اسی دنیا میں زندہ ہے۔ وہ کل بھی افسانوی اور جاسوسی کہانیوں کو سچ سمجھتا تھا اور آج بھی انہیں سچ سمجھتا ہے، ملک و قوم بچانے کے لئے ابن صفی کا ہیرو عمران تھا اور آج عوام خان بھی دنیا بھر کا مقابلہ کرنے کے لئے عمران کو ہیرو سمجھتا ہے۔ کل کا افسانہ بھی یہی تھا کہ دنیا بھر کے یہود و ہنود اکٹھے ہو کر ہمارے ملک کے خلاف سازشیں تیار کر چکے ہیں۔ پاکستان میں ان کے سیاسی ایجنٹ اور حسینائیں، عوام خان کو جھانسے میں لانے کے لئے میدان میں اتر چکے ہیں۔ اسی جاسوسی دنیا سے یہ خبر بھی آئی ہے۔ آصف زرداری کو ڈاکٹر نے دوپہر کے کھانے میں دس ڈالر اور ہزار پائونڈ کا ملیدہ کھانے کا مشورہ دیا ہے اسی لئے وہ آج کل دوپہر کا کھانا عوام خان کے سامنے نہیں بلکہ چھپ کر کرتے ہیں۔ یہ بھی پتہ پڑا ہے کہ آصف زرداری نے سوئس بینکوں میں سرنگ لگا کر وہاں سے اپنے ڈالر غائب کر لئے ہیں۔ اسی جاسوسی کی دنیا کے جیمز بانڈ نے یہ بھی بتایا ہے آصف زرداری نے فرانس کا پرانا محل اور برطانیہ کا سرے محل دوبارہ سے آراستہ کروا لئے ہیں جونہی اعتزاز احسن صدر کا انتخاب ہاریں گے زرداری صاحب برطانیہ اور فرانس کے ’’سرکاری‘‘ دورے پر روانہ ہو جائیں گے۔ اسی ’’ابن صفات‘‘ میں ہیرو عمران کے ذمہ یہ لگا ہے کہ وہ ولن آصف زرداری کو بیرون ملک جانے سے روکے اور چاہے پیٹ میں چاقو ہی کیوں نہ مارنا پڑے، پیٹ چاک کرکے کروڑوں ڈالر برآمد کرے جو آج کل زرداری صاحب دوپہر کے کھانے میں کھاتے ہیں۔
یہودی سازشوں کے حوالے سے فریدی سیریز کے ذریعے انکشاف ہوا ہے کہ سنگ ھی نامی ولن دراصل پاکستان کا ایک نامور سیاستدان تھا جس نے اپنے اصلی نام کو چھپا کر سنگ ھی کے نام سے خود کو مشہور کیا ہوا تھا۔ جونہی منی ٹریل کے ذریعے سے منی لانڈرنگ کی پوری کہانی ملی فوراً ہی فیصلہ کیا گیا کہ کس طرح عمران کی مدد سے منی لانڈرنگ کے سارے نیٹ کو بے نقاب کرکے لوٹی ہوئی دولت کو واپس لانا ہے۔
عمران سیریز کی تازہ کتاب ’’اڈیالہ سازش کیس‘‘ میں ملک و قوم کے خلاف بڑی سازش اور اس کے ذمہ داروں کا تعین کیا گیا ہے۔ ہیرو عمران کو ایک معتبر ذریعے سے خبر ملتی ہے جس کی حمید عون چودھری تصدیق کرتے ہیں کہ خواجہ آصف نامی ایک سیالکوٹی مفرور، پرویزرشید نامی ایک بین الاقوامی گروہ کا سرغنہ اور بین الاضلاعی لائلپوری گینگ کا اہم کردار رانا ثناءاللہ گزشتہ رات بارہ بجے اڈیالہ جیل سے دو کلو میٹر دور ایک اندھیرے مکان سے گرفتار کر لئے گئے ہیں۔ حمید عون چودھری نے صحافیوں کو بتایا کہ یہ تینوں پاکستان کے خلاف ایک گہری سازش میں مصروف تھے۔ اگر یہ کامیاب ہو جاتے تو پاکستان کا قرضہ دوگنا ہوجاتا، گردشی قرضے چھ گنا ہو جاتے۔ سیلاب آجاتا، طوفان آجاتا، سب کچھ ادھر ادھر ہو جاتا۔ ایک صحافی نے پوچھا کہ یہ کرنا کیا چاہتے تھے۔ حمید عون چودھری جو عمران سیریز میں ہمیشہ عمران کے مددگار ہوتے ہیں، نے روتے ہوئے بتایا کہ یہ سارے مجرم دراصل اندھیرے میں بیٹھے ٹامک ٹوئیاں مار رہے تھے جس پر ہمیں شک ہوا اور اب یہ شک یقین میں بدل چکا ہے کہ سارے اکٹھے ہو کر نواز شریف کی خوبیاں بیان کر رہے تھے جو کہ ایک بہت بڑی سازش کاپیش خیمہ ہے، اس لئے انہیں فوراً گرفتار کرلیا گیا ہے اور اب ان کی اس غداری کی سزا انصاف کے ایوانوں سے ملے گی۔
عمران سیریز کے ہیرو کو یہ مصدقہ اطلاع بھی ملی ہے کہ مولانا فضل الرحمٰن ملک و قوم کے خلاف ایک خفیہ اتحاد بنانے کی کوششوں میں ہے۔ اس اتحاد کا مقصد ملک میں ڈینگی وائرس پھیلانا، ملیریا کو عام کرنا اور خاص کر ان ووٹرز کو بیمار کرنا ہے جنہوں نے اس بار تحریک انصاف کو ووٹ دیا تھا۔ جونہی حکومتی عہدیداروں کو اس باغیانہ سرگرمی کی اطلاع ملی ، اسی لمحے سرکاری اور غیر سرکاری ہر سطح پر اس خفیہ اتحاد کے خلاف منظم کارروائی کا آغاز کر دیا گیا۔ امید ہے کہ چند دنوں تک پوری سازش طشت ازبام ہو جائے گی اور اس کے باقی کردار بھی سامنے آجائیں گے۔ البتہ یہ بات طے ہے کہ اس سازش میں امریکہ، اسرائیل، بھارت، افغانستان اور دنیا کےدیگر ممالک شامل ہیں۔ امید کی جارہی ہے کہ عمران سیریز کے ہیرو ہمیشہ کی طرح ان وطن دشمنوں کو کیفر کردار تک پہنچائیں گے اور ایسا قلع قمع کریں گے کہ یہ مجرمانہ گروہ کبھی دوبارہ سے ایسی سازش کا سوچ بھی نہ سکے۔
عمران سیریز کی ایک اور کتاب ’’شیخو کی شیخیاں‘‘ میں یہ دلچسپ واقعہ بیان کیا گیا ہے کہ کس طرح عمران کے بہادر ساتھی شیخوپنڈی وال نے دیوار پھلانگ کر امریکی صدر ٹرمپ کے اس ٹویٹ کا کھوج لگایا جو اس نے پاکستان کے خلاف دیا تھا۔ شیخوپنڈی وال کو اب مودی کی جاسوسی کے لئے بھیجا رہا ہے۔ اب ان کے ذمہ یہ لگایا جا رہا ہے کہ وہ یہ پتہ لگائیں کہ مودی کے اندر سے بھارت دشمنی کی جو بو آتی ہے اس کا مرکز کیا مودی کے جسم کے اندر ہے یا پھر کہیں اور؟ امید ہے ہمیشہ کی طرح شیخوپنڈی وال اس مشن سے بھی کامیاب لوٹیں گے اور عمران سیریز کے لئے ایک نئی کتاب ’’شیخو اور مودی‘‘ کا اضافہ کریں گے۔
ابن صفی کبھی مرا نہیں تھا پہلے بھی اپنی کتابوں کے ذریعے زندہ تھا اور آئندہ بھی زندہ رہے گا۔ البتہ ابن صفی کی عمران سیریز ان دنوں کچھ زیادہ ہی پاپولر ہوگئی ہے۔ لگتا ہے کہ افسانوی دنیا، حقیقی دنیا پر اتر آئی ہے۔ ہر حقیقی کردار پر بھی آج کل افسانوی کردار کا گمان ہونے لگا ہے۔ آس پاس کوئی بھی اصلی انسان نظر نہیں آرہا، یاتو کوئی عمران سیریز کا ہیرو ہے یا پھر اس کا ولن؟ وہ جو اس سیریز کے کردار نہیں ان کا کوئی کردار ہی نہیں رہا، انہیں چاہئے وہ سو جائیں۔۔۔۔!!!
(بشکریہ جنگ نیوز)

لاہور(ایمرا نیوز)
کپتان کو یہ ضرور سوچنا چاہئے کہ کیا وجہ 12دنوں میں اتنی بات پرفارمنس پر نہ ہوئی جتنی ان غلطیوں پر، جن سے باآسانی بچا جا سکتا تھا۔
سہ پہر پونے 3بجے وزیراعظم سیکرٹریٹ کے پورچ میں گاڑی سے اترا،سامنے نظر پڑی، وزیراعظم کی دو مرسیڈیز کاریں کھڑیں ،صرف دو گاڑیاں، میں نے سوچا، گیلانی صاحب اور میاں نواز شریف نے تو حد ہی کر دی تھی، مگر ظفر اللہ جمالی اور شوکت عزیز کیلئے بھی یہیں اپنی آنکھوں سے 20بیس ،25پچیس گاڑیاں کھڑی دیکھیں اور پھر یہ بھی دیکھا کہ ایک اشارے پر سفید کرولا رُکی،ڈرائیور کے ساتھ اکیلئے جمالی صاحب،نہ کوئی آگے ،نہ پیچھے، نجانے اقتدار میں آکر لوگ قیمتی اور اقتدار سے نکل کر سستے کیوں ہو جاتے ہیں، میں ابھی وہیں کھڑا تھا کہ ایک گاڑی آکر رُکی،یہ دوست فواد چوہدری تھے ،سلام دعا اور پھر اگلے دو منٹوں میں چوتھے فلور پر، ہمیں وزیراعظم کے دفتر کے عین سامنے اس کمرے میں بٹھایا گیا ،جو وزیراعظم کے مہمانوں کاویٹنگ روم ، وقت ِ ملاقات تھا 3بجے، ٹھیک 3بجے عمران خان آئے، ہاتھ ملانے کی زحمت میں پڑے بنا ایک مشترکہ سلام پھینک کر وہ سامنے صوفے پر بیٹھے اور کوئی بھاشن دیئے بنا بس یہ کہہ کر کہ ’’میں نے سوچا آپ سب سے ملا جائے، ایشوز پر آن بورڈ کیا جائے ‘‘ جی پوچھئے، سوال جواب شروع ہوئے اور پونے دو گھنٹوں تک ہوتے رہے۔
ان پونے دو گھنٹوں میں 18صحافیوں نے وزیراعظم کیساتھ بلامبالغہ ٹوئنٹی ٹوئنٹی کھیلا، پاکپتن سے امریکہ تک ، خاور مانیکا سے ٹرمپ تک، ہیلی کاپٹر خرچے سے ملکی قرضوں تک اور سیاسی و بیوروکریسی تقرریوں سے دورہ جی ایچ کیو تک ویسے تو ہر معاملے پر ہی چبھتے، تلخ سوال ہوئے لیکن پاکپتن ایشو پر وزیراعظم پر یوں تابڑ توڑ حملے ہوئے کہ بعض موقعوں پر کپتان کے پاس کہنے کو کچھ نہ تھا، دو چار سوالوں کے بعد میں نے پوچھا ’’خاور مانیکا کی کوئی سیاسی یا قانونی حیثیت‘‘ وہ بولے ’’ نہیں ‘‘ پوچھا ’’ کیا وہ قانون سے بالاتر‘‘جواب آیا ’’ وہ کیا میں بھی قانون سے بالاتر نہیں‘‘ میں نے کہا ’’پھر پولیس کے روکنے پر مانیکا صاحب کا یہ ردِعمل کیوں ‘‘وزیراعظم کا جواب تھا ’’ مگر میرے پاس جو کہانی، اسکے مطابق پولیس نے زیادتی کی ‘‘ عامر متین بول پڑے ’’لگ رہا آپ کو حقائق کا علم نہیں، آپ کی کہانی درست نہیں‘‘ وزیراعظم بولے ’’چلو پھر تو اچھا ہوا کہ سپریم کورٹ نے نوٹس لے لیا ، حقائق سامنے آجائیں گے ‘‘۔
بات یہیں پہنچی تھی کہ دوست روف کلاسرا نے وزارت ِعظمیٰ کی مبارکباد دیکر مانیکا ایشو پر میٹھے، دھیمے انداز میں چڑھائی کی تو کپتان نے کہا ’’کیا میں نے کسی کو فون کیا ،کیا میں نے آئی جی یا وزیراعلیٰ کو کہا کہ یہ کرو یا وہ کرو ، کسی نے وزیراعظم ہاؤس سے کسی پر کوئی دباؤ ڈالا،یہ چھوڑیں، بشری بی بی نے کوئی فون کیا یا پریشر ڈالا ہو ، بلکہ 5اگست کو جب پولیس نے مانیکا فیملی سے بدتمیزی کی،تو بشری بی بی نے مجھے کہا کہ آپ نے اس معاملے میں نہیں پڑنا ، کہانیاں بنیں گی، ہاں اس بارے میں نے پرنسپل سیکرٹری سے یہ ضرور کہا کہ’’ آئی جی سے اس معاملے کی رپورٹ لیں‘‘،باقی یہ تو آئی جی سطح کا معاملہ تھا ،انہیں حل کر لینا چاہئے تھا ، بات وزیراعلیٰ تک بھی نہیں پہنچنا چاہئے تھی ‘‘وزیراعظم کے ساتھ بیٹھے رؤف کلاسرا بھلا اس جواب پر کب مطمئن ہونے اور خاموش رہنے والے تھے ،انہوں نے ڈیڑھ منٹ میں بشری بی بی کی دوست فرح کے خاوند احسن جمیل گجر کی وزیراعلیٰ پنجاب کی موجودگی میں ڈی پی او،آر پی اوپاکپتن کو جھاڑنے اور خاور مانیکا سے معافی مانگنے تک پوری کہانی سناڈالی ،ابھی خان صاحب جواب دینے والے ہی تھے کہ مجھ سے بھی نہ رہا گیا ،میں نے کہا’’ وزیراعظم صاحب ابھی سابقہ ’’شاہی خاندانوں ‘‘ سے جان چھو ٹنے کی امید ہی پیدا ہوئی تھی کہ ’’مانیکا شاہی ‘‘ شروع ہو گئی ‘‘ عمران خان کا چہرہ سرخ ہوا مگر اگلے ہی لمحے اپنے روایتی غصے پر قابو پا کر وہ مسکرا کر بولے ’’ میں ،میرا خاندان ،میرے دوست یا کوئی بھی قانون سے بالاتر تھا،نہ ہوگا،میں بادشاہت کا قائل ہوں اور نہ شاہی رویوں کا ،کیس سپریم کورٹ میں ہے ،سب پتا چل جائے گا کہ قصور کس کا ‘‘۔
ویسے تو پاکپتن معاملے پر اتنے سوال ، جواب ہوئے کہ سامنے دیوار پر لگی گھڑی دیکھ کر وزیراعظم کو کہنا پڑا ’’ یار آدھا گھنٹہ ہو گیا اسی معاملے پر ،کچھ ملکی معاملات پر بھی بات کر لیں ‘‘اور ویسے تو ایک سوال اور ، بس ایک آخری سوال کہہ کہہ کر دوستوں نے مزید 15منٹ اس ایشو کے بخیئے ادھیڑ ے لیکن اس حوالے سے ایک کہانی یہ بھی کہ وزیراعظم چاہتے ہوئے بھی ہمیں یہ نہ بتا پائے کہ 5اگست کو پولیس بدتمیزی کے بعد خاور مانیکا کو پتا چلا کہ یہ سب اوپر سے ہورہا ،تو خاور مانیکا نے گھر آکر بتایا کہ مجھے لگ رہا کہ فلاں فلاں وجوہات کی بنا پر یہ سب ہمارے ساتھ بشری بی بی اور عمران خان کروا رہے اور پھر جب دوسرا واقعہ ہو اتو خاور مانیکا کی بیٹی نے اپنی والدہ بشری بی بی کو فون کر کے کہا’’ پہلے تو میں نہیں مان رہی تھی ، لیکن اب یقین ہوگیا کہ یہ سب آپ لوگ کروا رہے ، مجھے بازو سے پکڑ کر گاڑی سے اتارنا اور ہم پر بندوقیں تاننا ، سب کچھ منصوبہ بندی کے تحت ہورہا، یہ بھی سنا جارہا کہ بشری بی بی یہ سوچ رہیں کہ یہ سب اپنے وفاداروں کے ذریعے لیگی کروا رہے ، مقصد عمران خان کو سکینڈلائز کرنا اور یہ بھی سنا جارہا کہ وزیر اعظم کے کہنے پر وزیراعلیٰ عثمان بزدار نے پولیس افسران سے میٹنگ کی ابتداء ہی یوں کی کہ’’ سائیں اس معاملے کو جلدی نمٹائیں ،سب کچھ ہم پر آرہا ہے ‘‘ بلکہ جب انہوں نے اپنے ہاتھوں سے کیک پیش کیا اور گوندل صاحب نے یہ کہہ کر مجھے بھوک لگی ہوئی تقریباً آدھا کیک پلیٹ میں ڈال لیا تو وزیراعلیٰ ہنس کر بولے ’’ سائیں اب میں یہ سمجھوں کہ معاملہ ختم ہو گیا ‘‘۔
خیر اصل کہانی کیا ،یہ توپتا چل ہی جائے گا‘‘ لیکن حیرت کی بات یہ کہ عمران خان مطلب وزیراعظم پاکستان کو وزیراعلیٰ اور احسن جمیل گجر کی پولیس افسران سے ملاقات سمیت بہت ساری چیزوں کا علم ہی نہیں تھا، یعنی الیکٹرانک وپرنٹ میڈیا اور خاص طور پر سوشل میڈیا پر طوفان برپا مگر عمران خان بہت کچھ سے لا علم ،حیرت تب بھی ہوئی جب فیاض چوہان صاحب کے ’’ نرگس ‘‘ سمیت فرمودات کا بتایا گیا تو عمران خان نے ساتھ بیٹھے فواد چوہدری سے پوچھا’’ یہ اس نے آن ائیر کہایا آف ائیر‘‘ جس پر فواد چوہدری نے بتایا کہ آن ائیر،مطلب وزیراعظم اس حوالے سے بھی لاعلم ،خیر بات آگے بڑھی اور سیاسی وبیوروکریٹ تقرریوں پر جب میں نے کہا کہ ’’ آپ کے کافی وزراء اورسیکریٹری ایسے کہ جن پر سنگین الزامات ‘‘تو وزیراعظم کا جوا ب تھا ’’ جب میں انکی سنتاہوں تو ان کے پاس دوسری کہانی لیکن پھر بھی میں کسی کے ماضی کا ذمہ دار نہیں ،میں ان سب کے حال کا ذمہ دار ہوں ، اب فرشتے کہاں سے لاؤں، مگر آپ بے فکر رہیں ، میں اوپر بیٹھا ہوں، وزیر ہو یا بیوروکریٹ ، ،پرفارمنس دیکھوں گا، اگر کارکردگی ٹھیک نہ ہوئی تو تبدیل کر دوں گا ‘‘۔
دوست کاشف عباسی کے اس سوال پر کہ چند دنوں کے معاملات دیکھ کر لگ رہا کہ آپ تیار نہیں تھے حکومت کیلئے ، وزیراعظم کا جواب تھا ’’ ہم تیار تھے مگر ملکی حالات اتنے برے ہوں گے ۔
یہ اندازہ نہیں تھا ، آج بحیثیت وزیراعظم میرا پانچواں ورکنگ ڈے ،ان پانچ دنوں میں ہی جو کچھ دیکھا ،یہی کہوں گا کہ ملک جن کے حوالے تھا ،انہیں خوفِ خدا نہیں تھا‘‘ ، حامد میر صاحب کے اس مشورے پر کہ ’’ آپکو یواین اوجنرل اسمبلی سے خطاب کرنے جانا چاہئے اور خطاب بھی اردو میں کرنا چاہئے ‘‘ وزیراعظم کا جواب تھا ’’ اس وقت جو ملکی حالات ، میں صرف خطاب کرنے یا صدر ٹرمپ کو ملنے چار دنوں کیلئے نہیں جا سکتا ‘‘یہیں عمران خان نے پھر کہا کہ ’’ میری اور امریکی وزیرخارجہ کی دہشت گردی پر کوئی بات نہیں ہوئی اورامریکہ سے باعزت تعلقات رکھیں گے ‘‘انہوں نے یہ بھی بتایا کہ ’’ میں تو یہ کال سننا ہی نہیں چاہتا تھا،امریکی وزیرخارجہ کو ہمارے وزیر خارجہ سے بات کرنی چاہئے تھی لیکن اپنے فارن آفس کے مجبور کرنے پر بات کی ‘‘۔
اسی بیٹھک میں صورتحال تب دلچسپ ہوئی جب ملٹری سیکرٹری اور سیکرٹری خارجہ نے آکر کہا’’ فرانسیسی صدر بات کرنا چاہ رہے‘‘ ، عمران خان بولے ’’ مبارکباد ہی دینا ہوگی ،بتا دیں میں میٹنگ میں ہوں ،آدھے گھنٹے بعد بات کروں گا ‘‘پندرہ بیس منٹوں پر ایم ایس دوبارہ آئے تو وزیراعظم نے انہیں دیکھتے ہی کہا’’پھر آگئی کال ‘‘ جس پر قہقہے لگے لیکن ایم ایس نے مسکراتے ہوئے کہا کہ’’ سر میں تو بتانے آیا تھا کہ آپکی اگلی میٹنگ کا وقت ہو گیا ہے ‘‘ اسی بیٹھک کے عین درمیان ڈاکٹر شاہد مسعود نے کھڑے ہو کر بتایا ’’وزیراعظم صاحب میں چلا ہی جاؤں تو اچھا کیونکہ مجھے 45منٹ پہلے اس ملاقات کے حوالے سے بتایا گیا ،نسیم زہرہ نے پی ٹی آئی سوشل میڈیا کی صحافیوں کی کردار کشی کی جانب توجہ دلائی ،روف کلاسرا نے 4سو کلو میٹر طویل تلہ کنگ ،میانوالی، ملتان روڈ کی بات کی جہاں سنگل ٹریک ہونے کی وجہ سے روزانہ درجنوں جانیں ضائع ہوں ،صابر شاکر بولے ’’میرے ڈویژن سے بھی کوئی وزیر بنادیں ‘‘ ، چوہدری غلام حسین نے کہا ’’جو تقرریاں آپ کر چکے بس فواد حسن فواد کی کمی رہ گئی ‘‘، اپنے دورہ جی ایچ کیو پر بات کرتے ہو ئے وزیراعظم کا کہنا تھا ’’مجھے خوشی کہ آرمی چیف جنرل قمر جاوید باجوہ کا جمہوریت پر یقین ،جمہوریت کے ساتھ اور جمہوریت کی مضبوطی کے خواہاں ‘‘ ، وزیراعظم نے یہ بھی کہا’’ میر ی حکومت کیلئے دو معاملے سنگین ،قرضے اور انرجی بحران ،انہوں نے یہ بھی بتایا کہ ’’ہم سی پیک ،ایل این جی سمیت سابقہ ادوار میں کئے گئے ہر معاہدے کا جائزہ لے رہے ، وزیراعظم عمران خان نے آخر میں کہا’’ آپ مجھ پر تنقید کریں مگر ایک تو مجھے 3ماہ کا وقت دیں ،ڈلیور کر کے دکھاؤں گا،دوسرا مجھے دو چیزوں پر آپکی مدد درکار، پہلی کفایت شعاری ،بچت مہم ، اس حوالے سے آپ قوم کو شعور وآگہی دیں ،دوسرا احتساب پر میری مد د کریں ، احتساب بلا امتیاز اور بے رحم ہوگا ، کوئی بچ نہیں پائے گا،میں نے قوم کا لٹا پیسہ واپس لانا ہے اگر یہ نہ ہوسکا تو پھر آگے اندھیرا ہی اندھیرا ‘‘‘۔
ملاقات کے بعد ڈھلتی سہ پہر وزیراعظم سیکرٹریٹ سے نکلتے ہوئے جہاں میں یہ سوچ رہا تھا کہ یہ عمران خان ہی جنہوں نے ’’صحافی عدالت ‘‘میں سخت اور مشکل سوالات کا تحمل سے جواب دیا،تلخ باتوں کو مسکرا کر سنا، برداشت کیا ، جہاں میں یہ سوچ رہا تھا کہ بلاشبہ کپتان کی نیت ٹھیک ،وہ کچھ کرنا چاہتے اورانہیں وقت بھی دینا چاہئے ،وہاں ذہن میں بار بار یہ خیال بھی آرہا تھا کہ کپتان کو یہ ضرور سوچنا چاہئے کہ کیا وجہ 12دنوں میں اتنی بات پرفارمنس پر نہ ہوئی جتنی ان غلطیوں پر،جن سے باآسانی بچا جا سکتا تھا ۔
(بشکریہ جنگ نیوز)

عامر محمود بٹ
0321-6666202
[email protected]

بے روزگاری، تفرقہ اور اقربا پروری نے جہاں معاشرے کو اپنی لپیٹ میں بری طرح جکڑ رکھا ہے وہاں آج جس بھی محکمے کی سمت نظر دوڑائی جائے تو وہاں لابی سسٹم، لاقانونیت، اختیارات کا ناجائز استعمال، پسند نا پسند کی بنا پر ٹرانسفر پوسٹنگ اور خلاف قانون مقدم ایگزیکٹو لیٹر کے ذریعے کام چلانے کی مثالیں واضح نمایاں نظر آتی ہیں چوں کہ اب پاکستان بھی نیا ہو چکا ہے اور ضلع لاہور کے محکمہ ریونیو کی بیورو کریسی بھی اپنا کام احسن طریقے سے کر رہی ہے تو میں نے سوچا کہ آج ان سے چند گزارشات ہی کر لوں شاید میں کہیں لیٹ نہ ہو جاﺅں، تو جناب محترمہ کمشنر صاحب ڈپٹی کمشنر صاحب اور ایڈیشنل ڈپٹی کمشنر ریونیو سمیت تمام ریونیو انتظامی افسران سے اپیل کرنا چاہتا ہوں گذارش ہے کہ سرپلس پول میں جانے والے 84شعبہ سیٹلٹمنٹ کے پٹواریوں میں سے جن کی دوبارہ واپسی محکمہ ریونیو میں ہو وہ کم از کم ایسا پٹواری ضرور ہو جس نے اپنی سروس کے دوران سیلٹمنٹ موضع جات کے ریکارڈ کو اپ گریڈ کیا ہو موضع جات کی مثل حقیت مکمل کرتے ہوئے موضع کو آن لائن کروایا ہو کیوں کہ ایسے متعدد ، سینکڑوں پٹواری بھی واپس آرہے ہیں جنہوں نے شعبہ سیٹلمنٹ میں تعیناتی کے دوران کسی ایک بھی پٹوار سرکل کا سیٹلمنٹ نہ کیا بلکہ سیاسی سفارشات کے ذریعے اربن پٹوار سرکل انجوائے کئے جائیدادیں بنائیں، کرپشن کی اور ہر نئے آنیوالے اے ڈی سی آر، ڈپٹی کمشنر صاحبان اور اسسٹنٹ کمشنرز صاحبان کی خوشنودی حاصل کرتے ہوئے اپنے آپ کو تمام قوانین اور کنٹریکٹ کی شرائط سے بری الذمہ قرار پائے جانے کی آشیر باد حاصل کی اور حکومتی خزانے سے تنخواہوں کی مد میں لاکھوں روپے بھی وصول کئے جو کہ غبن سرکار کے تحت ان سے واپس لئے جانے چاہئیں جنہوں نے کہیں بھی موضع کا سیٹلمنٹ مکمل نہ کیا ہے اچھی کارکردگی دکھانے والے شعبہ سیٹلمنٹ کے پٹواریوں کو کارکردگی کی بنیاد پر پٹوار سرکل الاٹ کرنے چاہئیں تاکہ وہ مزید دل لگا کر کام کریں، ایک اور گذارش ہے کہ گزشتہ دس سال قبل بنائی جانے والی پٹواریوں کی بلیک لسٹ میں سے 90فیصد پٹواری 10سال بعد لسٹ کی کلیئرنس کے بعد قانگوترقی پا گئے اور بعض پٹواریوں کو بھی پٹوار خانے دیدیئے گئے مگر اب بھی گنتی کے چند پٹواری ایسے ہیں جن کے پاس کوئی سفارش نہ ہے اور نہ ہی وہ لابی سسٹم کے من پسند ہیں جو محکمہ ریونیو کی تگڑی لابی اے ڈی سی ا ٓر یا ڈپٹی کمشنر کو بتا سکے کہ جناب ان کا کوئی والی وارث نہ ہے اور ان کوئی بھی لگا دیا جائے جن میں وسیم اللہ، محمد عارف ہمایوں، اکمل چیمہ ، ظہیر الدین بابر سمیت اور پٹواری بھی شامل ہیں صرف ان کے پاس تاحال کوئی سفارش نہ ہونے کی بنا پر ان کو نظر انداز کیا جا رہا ہے یہ میرٹ نہ ہے، جناب اگر آپ ضلع لاہور کی عوام کو حقیقی معنوں میں ریلیف دلانا چاہتے ہیں تو پرچہ رجسٹری قانون پر عمل درآمد کروا دیں پرچہ رجسٹری کے
مطابق پٹواری حضرات فری آف کاسٹ انتقال کی کاپی عوام کو 15 روز کے اندر دینے کے پابند ہیں یہ ضلع لاہور کی عوام کیلئے بہت بڑا ریلیف ہو گا اور ریونیو افسران کا دورہ پروگرام لازم دیکھیں جو کہ کبھی ایک ماہ بعد کبھی 20دن بعد کبھی 2ماہ بعد غرض اپنی مرضی اور مزاج کے مطابق دورہ پروگرام تیار کیا جا رہا ہے جو کہ غیر اخلاقی، غیر قانونی اور خلاف قانون بھی ہے اس حوالے سے سابقہ کمشنر لاہور اور بورڈ آف ریونیو پنجاب کی بھی سخت ہدایات موجود ہیں جن پر آج کل عمل درآمد نہیں ہو رہا جس کی وجہ جہاں کمشنر لاہور، ڈپٹی کمشنر لاہور ڈینگی، صفائی، پولیو، شادی ہالوں کی چیکنگ اور دیگر انتظامی ڈیوٹیوں میں مصروف ہیں وہاں محکمہ ریونیو کی ذمہ داریوں کو بھی ان کو لازم دیکھنا ہو گا ڈپٹی کمشنر لاہور کیپٹن(ر) انوار الحق صاحب سے ٹیلی فون پر جب بھی بات ہوئی انہوں نے بتایا کہ ریونیو کے معاملات وہ دیکھنے میں دلچسپی نہیں لیتے ان کو اے ڈی سی آر اور اسسٹنٹ کمشنر صاحبان دیکھ رہے ہیں یہاں پر بھی ایک گڑ بڑھ ہو رہی ہے
سر وہ یہ کہ تمام تحصیلوں کے اسسٹنٹ کمشنر کے دفاتر میں چند مخصوص پٹواریوں کی اجارا داری اور قربت لازم بخوبی دیکھی جا سکتی ہے جس کی وجہ سے جو ایکشن اور نوٹس آپ لے سکتے ہیں وہ کوئی اور شاید نہ لیں سکے ایک ایسے ڈی سی او کا بھی ذکر کرنا ضروری سمجھوں گا جن کے حوالے سے مشہور تھا کہ یہ سابق وزیر اعلیٰ پنجاب شہباز شریف کے استاد بھی تھے اور یہ رات کو سوتے بہت کم تھے سارا دن انتہائی ہارڈ ورکنگ کرتے رہتے اور اس بات میں کوئی شک بھی نہ تھا کہ وہ محکمہ ریونیو کی تمام انتظامی میٹنگیں خود کرتے تھے عمارہ خان اے ڈی سی آر اس بات سے بھی انتہائی خوش تھی کہ ریونیو کے معاملات میں انتہائی اچھے فیصلے جو کئے گئے ان میں نسیم صادق کا بھی ایک اہم کرداررہا ہے ایک اور اہم بات کی طرف بھی آپ انتہائی معزز افسران کی توجہ دلانا چاہتاہوں کہ ضلع لاہور میں ایسے ریونیو سٹاف سے کام لیا جا رہا ہے جن پر سرکاری زمینوں پر قبضے کروانے کا الزام ہے سرکاری زمینیں بیچنے کا الزام ہے ریکارڈ میں رد و بدل، کرپشن، رشوت وصولی اور انتہائی سنگین الزامات کے تحت ہونے والے مقدمات میں ملوث سٹاف سے بھی آپ کام لے رہے ہیں جس کی وجہ مجبوری بتائی جاتی ہے اور وہ مجبوری میں دس سالوں سے سن رہا ہوں کہ چونکہ پٹواریوں کی نئی بھرتی پر پابندی عائد ہے تو اس پرانے اور الزامات سے بھرے سٹاف سے کام لینا آپ کی مجبوری بن چکا ہے۔آپ پرانے سٹاف کو نکال کر نیا نہیں رکھ سکتے ہیں پرانے سٹاف کو بھی پتا ہے کہ جتنی مرضی بڑی کرپشن کر لو ریکارڈ میں ٹمپرنگ کرتے ہوئے دیہاڑی لگا لو، آفسر3ماہ یا چھ ماہ تک معطل رہنے کے بعد دوبارہ سرکل مل ہی جاتا ہے تو وہ زیادہ دلیری سے کھیل رہے ہیں سر زائد بیع انتقالات کرنے والوں ، سرکاری زمینوں کو بیچنے والوں اور ریکارڈ میں ٹمپرنگ کرنے والوں کو ہرگز نظر انداز مت کریں میڈیا کے نمائندے آپ کی آنکھیں اور بازو ہیں محکمہ ریونیو کے تمام انتظامی افسران کو یہ بات بھی بتاتا چلوں کہ جسے پولیس، ایل ڈی اے ہیلتھ ، ریلوے اوقاف، ایجوکیشن، پی ایچ اے اور دیگر صوبائی محکموں کی روزانہ کی بنیاد پر خبریں لگتی ہیں اور ان بیٹوں پر عبور حاصل کرنے والے ایک سے بڑھ کر ایک رپورٹر موجود ہیں مگر بورڈ آف ریونیو کی بیٹ میں ایسا نہ ہے یہ ٹیکنیکل سی بیٹ ہے اور اس پر کام کرنے والے پروفیشنل جرنلسٹ بھی کم ہیں جو صرف آپ کی توجہ ان بااثر سٹاف اور کاموں کی طرف کرواتے ہیں جہاں لاکھوں کروڑوں روپے کے مفادات کسی نہ کسی لینڈ مافیا کے ضرور ہوتے ہیں اور رپورٹر اپنی جان جوکھوں میں ڈال کر آپ کے نوٹس اور علم میں وہ بے ضابطگی لانے کی کوششیں کر رہا ہوتا ہے تو پلیز نوٹس لیا کریں اسٹیٹ لینڈ کے تحفظ کیلئے جس طرح موجودہ ڈپٹی کمشنر انوار الحق اور پانچوں تحصیلوں کے اسسٹنٹ کمشنرز متحرک ہو چکے ہیں وہ قابل تعریف اور خوش آئند بات ہے جس کی وجہ سے اس محکمے کے وقار میں جہاں اضافہ ہو رہا ہے وہاں حکومت کی ملکیتی جائیدادیں بھی محفوظ ہو رہی ہیں جن کو قابل ازیں بندر بانٹ کرتے ہوئے تقسیم کر لیا جاتا تھا، اس بات میں کوئی شک نہیں کہ پاکستان کا ہر افسر دبنگ بننے کی خواہش رکھتا ہے مگر حقیقت میں وہی لوگ یہ اعزاز حاصل کرنے کا حق رکھتے ہیں جو محب وطن ہوں اور اپنے فرائض کو ملک و قوم کی امانت اور ان کی خدمت سمجھ کر سرانجام دیتے ہوں۔

(ایمرا نیوز)

کوئی جو بھی کہہ رہا ہے کہتا رہے درویش تو علت، قلت اور ذلت کے لئے تیار رہتے ہیں، اپنی عادتوں پر شرمندہ، کم کھانے پر آمادہ اوراپنے گناہ جھڑوانے کے لئے بدنامی اور ذلت پر بھی تیار۔ سچ یہ ہے کہ پاک پتن کے ڈی پی او کے تبادلے میں نہ قصور عمران خان کا ہے اور نہ ہی بشریٰ عمران کا۔ اصل حقیقت، سنی سنائی کہانیوں سے قطعاً مختلف ہے۔ بشریٰ عمران اوران کے سابق خاوند خاور فرید مانیکا میں سخت لڑائی اور کشمکش جاری ہے۔ خاور فرید گریڈ 21کے ملازم، علاقے کے بڑے زمیندار اور پھر دربار فریدیہ سے وابستگی کے سبب اپنا ایک مزاج اور مقام رکھتے ہیں۔ کہنے کوتو خاور فرید اور بشریٰ بی بی کی علیحدگی اور طلاق ہنسی خوشی اور مرضی سے ہوئی،مگر حقیقت میں کیاطلاق بھی کبھی ہنسی خوشی ہوتی ہے؟سچ یہ ہے کہ دونوں میں مزاج کا اختلاف بڑھ چکا تھا، خاورفرید سرکاری ملازم ہونے کے ناطے پہلے صرف شام ہی کو گھر آیا کرتے تھے۔ نوکری کے اوقات کار میں نرمی ہوئی تو زیادہ وقت گھر گزرنے لگا۔ مزاجوں کا تفاوت بڑھنے لگا۔ آئے دن لڑائی اور اختلاف ہونے لگا۔ دونوں نے کوشش کی کہ کسی طرح اس رشتے کو نبھایا جائے، 5بچے، ساری عمر کا ساتھ، ایک دوسرے کا احترام سب موجود تھا۔ قریبی دوستوں نے مشورہ دیا کہ ہر وقت اکٹھے نہ رہیں، ہفتے میں صرف ایک دن کے لئے اکٹھے ہوں۔ خاور اسلام آباد آئیں تو بشریٰ بی بی لاہور رہ لیں۔ مگر یہ بندوبست بھی نہ چل سکا، تعلقات کے شیشے میں بال آجائے تو پھر یہ جڑتے نہیں ٹوٹ کر ہی رہتے ہیں، یہی کچھ خاور فرید مانیکا اور بشریٰ بی بی کے ساتھ ہوا۔ بشریٰ بی بی کے بشریٰ عمران بننے کے بعد بھی تعلقات کی خرابی ختم نہ ہوئی بلکہ ایک دوسرے کے خلاف شکوک و شبہات بڑھنے لگے۔ الیکشن 2018ء کا ڈول ڈالا چکا تھا۔ خاور فرید مانیکا کے بھائی ن لیگ سے الیکشن لڑ رہے تھے یوں وہ بھی بشریٰ بی بی سے اپنی ناراضی کا اظہار کھلے عام کرتے تھے اسی لئے جب خاور فرید مانیکا کی بیٹی کو پہلے واقعے میں 5اگست کو پولیس نے روکا، بیٹے ابراہیم سے پولیس کی تلخ کلامی ہوئی۔ بیٹی مبشرہ مانیکا کو بازو سے پکڑ کر کھینچا گیا۔ ابراہیم نے والد کو فون کردیا اور خاور فرید مانیکا خود وہاں پہنچ گئے اور بچوں کو وہاں سے گھر لے گئے۔ حکومت پنجاب کی طرف سے کی گئی انکوائری میں ابراہیم مانیکا کا یہ بیان درج ہے کہ وہ اور اس کی بہن مبشرہ مانیکا پیر غنی اسٹیٹ سے ننگے پائوں بابا فرید کے مزار پر حاضری کے لئے جارہے تھے جب یہ واقعہ پیش آیا۔ خاور فرید کا پہلا شک بشریٰ بی بی کی طرف گیا اور انہوں نے اپنے مشترکہ دوستوں کے ذریعے بشریٰ بی بی کو یہ کہلوایا کہ ہمیں سب علم ہے، پولیس سب کچھ آپ ہی کے ایماء پر کررہی ہے۔ بیٹی مبشرہ مانیکا اور بیٹا ابراہیم مانیکا ماں بشریٰ بی بی سے ناراض ہوگئے اور بول چال تک بند کردی۔ دوسری طرف بشریٰ بی بی کا خیال تھا کہ خاور کے بھائی، ماں، بچوں کو آپس میں لڑانے کے لئے یہ سب کچھ کررہے ہیں۔ خاور فرید مانیکا نے اپنے اسی شک کا اظہار ڈی پی او سے بھی کیا اور بار بار کہا کہ آپ مجھے بتائیں کہ آپ کے پیچھے کون ہے، یہ کروا کون رہا ہے؟ ڈی پی او کیا کہتا ایسا کچھ تھا ہی نہیں۔ پولیس والوں کو ایک بار آپ ڈانٹیں تو یہ آپ کے پیچھے پڑ جاتے ہیں، اونچا بولیں تو وہ دل میں ٹھان لیتے ہیں کہ بدلہ کیسے لیں۔ خاور فرید یہ نفسیات نہ سمجھ سکے وہ سمجھے کہ یہ سب کچھ ان کی سابقہ بیوی کروا رہی ہے جبکہ دوسری طرف ان کی سابقہ بیوی بشریٰ بی بی یہ سمجھ رہی تھیں کہ خاور کے بھائی یہ سب کچھ کروا رہے ہیں۔

ابھی یہ معاملہ ٹھنڈا نہ ہوا تھا کہ مانیکا خاندان کو 23اگست 2018ء کی رات دوسرا واقعہ پیش آگیا۔ خاور فرید مانیکا نے دوسری شادی رچائی تھی اور وہ نئی دلہن، ملازمائوں اور گارڈ کے ہمراہ پیر غنی اسٹیٹ جارہے تھے۔ ایڈیشنل آئی جی ابوبکر خدا بخش کی انکوائری رپورٹ کے مطابق ناکے پر انہیں رکنے کا اشارہ کیا وہ نہ رکے جبکہ خاور فرید مانیکا نے اپنے بیان میں بتایا کہ انہیں نہ تو کوئی ناکہ نظر آیا اور نہ ہی کوئی سرخ روشنی۔ ناکے پر موجود پولیس نے خاور فرید مانیکا کی دوگاڑیوں کا پیچھا کیا اور آگے جا کر انہیں روک لیا۔ خاور فرید مانیکا نے باہر نکل کر پولیس کو اپنا تعارف کروایا۔ پولیس پارٹی نے اصرار کیا کہ وہ گاڑی کے اندر سے تلاشی لینا چاہتے ہیں کیونکہ انہیں شک ہے کہ آپ کے مسلح گارڈز کے پاس ناجائز اسلحہ ہے۔ خاور فرید مانیکا نے اسی وقت ڈی پی اورضوان عمر گوندل کو فون کیا اور بتایا کہ وہ کس صورتحال میں گرفتار ہیں۔ ڈی پی او نے متعلقہ پولیس کو حکم دیا کہ انہیں جانے دیا جائے۔ یوں مانیکا صاحب اپنی نئی نویلی دلہن کے ساتھ وہاں سے نکل تو آئے لیکن انہیں غصہ بہت تھا۔ پہلا خیال جو ان کے ذہن میں آیا وہ یہی تھا کہ بار بار ہونے والے واقعات کے پیچھے کوئی نہ کوئی سازش ہے، پولیس کسی نہ کسی کے کہنے پر ایسا کررہی ہے اسی خیال کے مطابق ان کے ذہن میں اپنی پہلی بیوی بشریٰ بی بی آئیں جوفرسٹ لیڈی ہیں اور وہ انتقاماً سب کچھ کروا رہی ہیں۔

دوسری طرف بشریٰ عمران کا خیال تھا کہ پاک پتن میں جو کچھ ہورہا ہے یہ خاور فرید کے بھائی کروا رہے ہیں۔ بہرحال دوسرے واقعے کے بعد خاور فرید مانیکا نے اپنے اور سابقہ بیوی بشریٰ کے فیملی فرینڈز احسن جمیل اقبال اور ان کی اہلیہ فرح خان کے ذریعے پیغام دیا کہ پولیس یکے بعد دیگرے ایسے اقدامات بشریٰ عمران کے کہنے پر کررہی ہے وگرنہ ایسے کس طرح ممکن ہے۔ احسن جمیل اقبال اور ان کی اہلیہ بشریٰ بی بی کے عقیدت مند بھی ہیں اور مداح بھی۔ وہ یہ گواہی بھی دیتے ہیں کہ بشریٰ بی بی مذہبی عقائد پر سختی سے عمل کرتی ہیں، ان کے گھر میں کسی شراب نوش کا داخلہ تک ممنوع ہے، بزرگان دین سے انہیں بے حد عقیدت ہے۔ خیر جب ایک دوسرے پر شک اور الزامات کا سلسلہ بڑھا تو احسن جمیل اقبال نے دونوں کو ٹھنڈا رکھا اور سمجھایا کہ یہ کوئی سازش نہیں ہے۔ پولیس والے کسی بات پر بھڑکے ہوئے ہیں۔ احسن جمیل ایک بار سردار عثمان بزدار سے بنی گالہ مل چکے تھے، دوسری بار بزدار صاحب کو بنی گالہ اندر جانے میں مدد کی تھی اس لئے احسن جمیل وزیراعلیٰ عثمان بزدار کے پاس پہنچے اور انہیں ساری روئیداد سنائی۔ ایڈیشنل آئی جی ابوبکر خدا بخش کی انکوائری رپورٹ میں یہ لکھا گیا ہے کہ ڈی پی او پاک پتن رضوان عمر گوندل کو نہ تو آئی جی پنجاب اور نہ ہی کسی اور افسر نے کہا کہ وہ ڈیرے پر جا کر معافی مانگے، یہ تجویز وزیراعلیٰ ہائوس کی میٹنگ میں ضرور زیر بحث آئی تھی کہ خاور فرید مانیکا کی غلط فہمی دور کرنے کے لئے رضوان عمر گوندل ان سے معذرت کرلیں یا ان کے بیٹے ابراہیم کو بلا کر انہیں صفائی پیش کردیں۔ ظاہر ہے اس کے بعد معاملہ پریس میں آگیا اور ڈی پی او پاک پتن کا تبادلہ بھی سیاسی رنگ اختیار کر گیا۔ لیکن حقیقت یہی ہے کہ عمران خان اور بشریٰ عمران دونوں کا اس سارے معاملے سے تعلق ہی نہ تھا۔ پولیس کے دو الگ الگ شعبوں یعنی ہائی وے پٹرولنگ پولیس اور ایلیٹ فورس نے اپنے اپنے طور پر مانیکا خاندان کو روکا۔ دونوں واقعات رات گئے پیش آئے جس وقت پولیس ہر ایک ہی کو مشکوک سمجھ کر روک لیتی ہے اور کوئی اگر آگے سے بول پڑے تو پولیس بھڑک کر بدتمیزی بھی کر ڈالتی ہے۔ آئے روز پنجاب میں یہی کچھ ہوتا ہے کچھ ایسا ہی پاک پتن میں بھی ہوا مگر ڈی پی او کے تبادلے نے بات کا بتنگڑ اس لئے بنا دیا کہ معاملہ وزیراعلیٰ پنجاب، فرسٹ لیڈی اور پھر اس کے سابقہ شوہر سے متعلق تھا۔

ظاہر ہے یہ پہلا ایسا واقعہ نہیں جس کا اسکینڈل بنا اور نہ ہی یہ ایسا آخری واقعہ ہوگا۔ اسکینڈل بنتے رہیں گے لیکن کیا ہی اچھا ہو کہ ہم میں سے ہر کوئی بغیر تحقیق کئے اس پر تبصرہ نہ کرے، صرف ایک ذریعے سے سنی گئی کہانی کبھی مکمل نہیں ہوتی جب تک آپ دو تین ذرائع سے کسی اسکینڈل کے واقعات کی جانچ پڑتال نہ کرلیں اس پر خامہ فرسائی میں غلطی کا احتمال رہتا ہے۔ یہ بھی ہوسکتا ہے کہ میری معلومات بھی ناقص ہوں مگر میں اپنے طور پر ہر پہلو جاننے کی بھرپور کوشش ضرور کی ہے۔
(بشکریہ جنگ لاہور)

(ایمرا نیوز)

”تبدیلی“ کا جو مژدہ کئی برسوں سے ہمارے کانوں میں رس گھولتا رہا ہے، وہ ابھی کہیں نوکر شاہی کے نہاں خانوں میں ترتیب پا رہا ہے۔ آخری اطلاع کے مطابق بس ابھی 100 روز اَور ”انتظار کیجیے“ کا بورڈ وزیراعظم کے دفتر پہ آویزاں کر دیا گیا ہے۔ متاثرینِ ”انصاف انقلاب“ کی بے چینیاں دیدنی ہیں جو ہر پل انقلابی تجلیوں کے لئے بے چین تھے۔ لے دے کے کرپٹ سیاستدانوں کا احتساب تھا جو پہلے ہی خوب بیچا جا چکا ہے اور کر و فر سے ”قانون کی حکمرانی“ کے نام پہ جاری و ساری ہے۔ رہی سہی کسر ”انتظار کیجیے“ کے وقفہ میں ہمارے بوالعزم وزیراعظم اور طاقتور وزیرِ داخلہ جناب عمران خان کے ہاتھوں پوری ہوتی دکھائی دے رہی ہے۔ اب 100 روز کا انقلابی رزمیہ ”ٹاسک فورسز“ کے حوالے ہے، دیکھتے ہیں کہ ہمارے ڈسٹرکٹ مینجمنٹ گروپ (DMG) کے ہر فن مولا کیا گل کھلاتے ہیں۔ لوگ بھی کیا سادہ ہیں، اُمید کا دامن پھر بھی تھامے خوشخبری کے منتظر۔ بھلا خوش فہمیوں میں مبتلا رہنے پہ کسی کو کیا اعتراض ہو سکتا ہے۔ جہاں ستر سال وعدوں پہ ٹرخانے میں گزر گئے، 100 روز انتظار اور سہی۔ ہمارے انصافیان نے دس برس نعرے بازی میں گزار دیئے یا پھر مخالفین کی پگڑیاں اُچھالنے میں۔ کوئی ایسا نہ تھا کہ گورنر ہاؤسز کی دیواروں اور دیگر نوآبادیاتی زمانے کی یادگاروں کو ڈھا کر دس صفحہ کا متبادل منصوبہ ہی تیار کر رکھتا کہ ہمیں تحریکِ انصاف والے کپتان کے حکومت میں آتے ہی ان پُرشکوہ نوآبادیاتی ورثوں کی دیواریں گراتے نظر آتے۔ کہا تو یہ گیا تھا کہ وہ جو مبینہ چوری کے 200 ارب ڈالرز مغربی بنکوں کی کمیں گاہوں میں چھپائے گئے تھے، بس پلک جھپکتے برآمد کر لئے جائیں گے، جن میں سے 100 ارب سے قرضہ واپس اور 100 ارب ڈالرز سے عوام کے لئے راحت کا بندوبست ہو جائے گا۔ لوٹی ہوئی دولت تو جانے کب واپس آئے گی، ابھی تو جو دولت لوٹی جا رہی ہے اور جو دہشت گردوں کے بھی کام آ رہی ہے اُسے روکنے کا بندوبست بھی نہیں ہو رہا۔ اور تو اور جو اقدامات منی لانڈرنگ کو روکنے کے لئے فنانشل ایکشن ٹاسک فورس (FATF) نے کرنے کا مطالبہ کیا ہے، اُس پر ابھی بھی وہ کچھ نہیں کیا جا رہا جو پاکستان کو گرے لسٹ سے بلیک لسٹ پہ آنے سے بچا پائے۔ لیکن خواتین و حضرات! ذرا صبر! بس 100 روز اور!

یادش بخیر! ایک انقلاب 1970ءکے انتخابات کے بعد بھی آیا تھا جب ذوالفقار علی بھٹو نے ایک تباہ حال اور ٹوٹے ہوئے پاکستان کی باگ ڈور سنبھالی تھی۔ پہلے 100 روز میں کیا تھا کہ جو نہیں ہو گیا۔ جنرل یحییٰ اور اس کے ٹولے کو برخاست کر دیا گیا، حمود الرحمان کمیشن قائم کر دیا گیا، 22 سرمایہ دار خاندانوں کی اجارہ داریاں ختم اور تمام بنک، انشورنس کمپنیاں اور بڑے بڑے کارخانے قومیا لئے گئے، زرعی اصلاحات کا اعلان کر دیا گیا، لیبر اصلاحات متعارف کر دی گئیں، نجی مشنری تعلیمی ادارے قومیا لئے گئے، آئین سازی کا آغاز کر دیا گیا، دولتِ مشترکہ کا طوق اُتار پھینکا گیا اور عالمی سامراجی فوجی معاہدوں سے علیحدگی اختیار کر لی گئی، آزاد خارجہ پالیسی اور تیسری دُنیا اور مسلم دُنیا کے اتحاد کے لئے کوششوں کا آغاز کر دیا گیا۔ بھارت سے 90 ہزار جنگی قیدیوں کی واپسی کے لئے سفارت کاری کو متحرک کیا گیا، مارشل لاءکی جگہ عبوری آئین کی تیاری شروع کر دی گئی۔ نوکرشاہی کی تطہیر کی گئی۔ مزدوروں نے فیکٹریوں کا کنٹرول سنبھال لیا، بے شمار مقامات پر کسانوں نے جاگیرداروں کو بیگار دینا بند کر دیا، جیالوں نے ڈپٹی کمشنروں، ایس پی آفسز اور دیگر دفاتر پر عوامی کنٹرول قائم کر دیا۔ عوام کی اقتدار میں شراکت کے کیا کیا مناظر تھے جو ہر لمحے ظہور پذیر نہ ہو رہے تھے۔ پہلی بار عوام کے منتخب نمائندوں کا راج قائم ہوا اور ایک حقیقی عوامی اور بااختیار وزیراعظم نے ملک کو ایک بالکل نئی سمت میں ڈال دیا۔ (پھر کیا ہوا؟ کیا غلطیاں ہوئیں؟ قومی اتحاد کا ردِّانقلاب کیوں آیا؟ اور عوامی انقلاب کا کیوں اور کیسے اسقاط ہوا؟ یہ ایک علیحدہ کہانی ہے۔ البتہ اُس کے خونین انجام سے ہم بخوبی واقف ہیں جب ایک بوٹ پالشیئے کے ایما پر ایک مقبول وزیراعظم کا عدالتی قتل کر دیا گیا)۔

وزیراعظم عمران خان بھی بے نظیر بھٹو کے بعد ایک پاپولر وزیراعظم کے طور پر سامنے آئے ہیں۔ انہیں نواز شریف کی طرح دو تہائی اکثریت تو حاصل نہیں لیکن انہیں ریکارڈ ووٹ ضرور ملے ہیں اور اُن کی عوامی حمایت اپنے عروج پر ہے۔ جنرل ہیڈکوارٹر میں اُن کا پُرتپاک اور حسبِ عہدہ شایانِ شان استقبال کیا گیا ہے۔ ہمارے دوست فواد چوہدری سپہ سالار کی اس یقین دہانی پہ کہ فوج بھی انتظامیہ ہی کا حصہ ہے جس کے آئینی و انتظامی سربراہ وزیراعظم عمران خان ہیں اتنے مسرور ہیں کہ اُنہوں نے کہا ہے کہ تمام ادارے ایک صفحے پہ ہی نہیں بلکہ ایک کتاب پر متحد ہیں۔ یہ بات سننے اور دیکھنے کو ہمارے کان اور آنکھیں پتھرا سی گئی تھیں۔ کاش جس کتاب کا ذکر کیا گیا ہے وہ 1973 کے آئین ہی کی ہو۔ وزیراعظم ذوالفقار علی بھٹو کے بعد وزیراعظم عمران خان کو یہ تکریم نصیب ہو رہی ہے۔ نیب کے چیئرمین بھی حاضرِ دفتر (PMO) ہو چکے ہیں اور خود وزیراعظم قانونی و عدالتی اصلاحات پہ گزارشات پیش کرنے کے لئے سپریم کورٹ کے چیف جسٹس صاحب کی خدمت میں حاضر ہونے کی تیاری کر رہے ہیں۔ اداروں میں ایسی ہم آہنگی دیکھنے کو یہ آنکھیں ترستی رہی ہیں۔ غالباً مقتدرہ (جس میں تمام غیرمنتخب ادارے شامل ہیں) اور ایک پاپولر وزیراعظم کے درمیان یہ یگانگت گزشتہ 40 برس میں پہلے یوں کبھی نظر نہیں آئی۔ اوپر سے بابا فرید شکر گنج کی درگاہ سے کیا کیا سوغاتیں اور برکتیں ہیں کہ خاتونِ اوّل کے طفیل برس رہی ہیں۔ بابا فرید نے کیا خوب کہا تھا:

یا فریدا، جو تو میرا ہو رہیں

سب جگ تیرا ہوئے

بس اب اگر تبدیلی آئی بھی ہے تو یہ کہ اب عمران خان اپوزیشن میں نہیںرہے، حکومت میں ہیں۔ اُن کے اقوالِ زرّیں، وعدے، دعوے، پیمانے، معیار اور نئے پاکستان کے خد و خال، اب اُن کا امتحان بن گئے ہیں۔ ہر روز اک نیا انقلاب تو کیا آنا تھا، نت نئے تماشے لگ رہے ہیں۔ ابھی تک وزیراعظم کی رہائش اور سفر کے معاملات بھی طے نہیں ہو پا رہے۔ بیچارہ وزیراعظم سڑک سے سفر کرے تو سلامتی اور پروٹوکول کے مسائل اور اگر وہ 55 روپے فی ایئروناٹیکل میل ہیلی کاپٹر پہ سفر کرے تو تمسخر کا نشانہ، کابینہ بنائے تو صاف ستھرے لوگ کہاں سے لائے، وہی مشرف دور کے آزمائے گئے جغادری اکٹھے کرے یا پھر اتحادیوں کے بدنام لوگوں کو شامل کرے تو مصیبت۔ افسر شاہی میں اکھاڑ پچھاڑ کرے تو وہی ڈی ایم جی گروپ کی شاہی، قومی وقار کو بچائے تو امریکی ٹیپ موجود، پاکپتن میں ایک عیاش ڈی پی او فارغ ہو تو وزیراعلیٰ معتوب، سرائیکی علاقے سے ایک غریب سردار چُنے یا سوات سے پہلی بار کسی خان کو وزیراعلیٰ بنائے تو حسنِ انتخاب پر اعتراض۔ سادگی اختیار کرے تو پھر طرح طرح کے شگوفے۔ بھئی وزیراعظم کو کام بھی کرنے دو، ابھی تو اُنہوں نے روڈ میپ بھی نہیں بنایا تو آپ خاک تنقید کریں گے۔ لے دے کے ہیلی کاپٹر، مانیکا کیس اور اسی طرح کی دوسری مضحکہ خیز درفنطنیاں رہ جاتی ہیں۔ سو میڈیا اسی میںمصروف رہے اور ہمارے افسرانِ اعلیٰ ”اسٹیٹس کو“ کو توڑنے اور تبدیلی کا روڈ میپ تیار کرنے میں مگن رہیں۔ پھر دیکھیں گے کہ تبدیلی کی ٹوکری سے کیا برآمد ہوتا ہے۔ 100 روز میری جان، 100 روز اَور سہی!
(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

وطن سے وفا کی ایک لازوال داستان ختم ہو چکی ہے ۔ سپاہی مقبول حسین اس مٹی کے سپرد ہو گئے ہیں ، جس کی محبت میں انہوں نے ساری زندگی دکھ جھیلے ۔ ہم ہر سال 6 ستمبر کو یوم دفاع پاکستان مناتے ہیں ۔ یہ دن 1965 میں بھارتی جارحیت کے خلاف کامیاب دفاع کی یاد میں منایا جاتا ہے ۔ پاکستان کی مسلح افواج کے بہادر افسروں اور جوانوں نے اپنی جانوں پر کھیل کر وطن کا دفاع کیا ۔ متعدد افسر اور جوان شہید ہوئے لیکن ایک جوان ایسا بھی تھا ، جس کے لئے 6 ستمبر 1965 کی جنگ کے بعد مصائب اور دکھ شروع ہوئے اور 40 سال تک وہ یہ جنگ لڑتا رہا ۔ پاکستان کا یہ عظیم سپوت سپاہی مقبول حسین تھا ۔

مقبول حسین کی دستان بڑی عجیب ہے ۔ 1965 ء کی پاک بھارت جنگ میں انہوں نے سر ی نگر میں اپنا مشن مکمل کیا ۔ لڑائی کے دوران وہ زخمی ہوئے اور کسی طرح بھارتی سرحد کے اس پار چلے گئے ۔ اس کے بعد انہوں نے پاکستان کے لئے جو دکھ جھیلے ، اس کا کوئی تصور ہی نہیں کر سکتا ۔ 40 سال تک انہوں نے بھارتی جیل میں قیدی بن کر زندگی گزاری لیکن انہیں ’’ جنگی قیدی ‘‘کا درجہ نہیں دیا گیا کیونکہ جنگی قیدیوں کو کچھ مراعات حاصل ہوتی ہیں ۔ جیل میں ان پر مظالم کی انتہا کر دی گئی ۔ انہیں روزانہ تشدد کا نشانہ بنایا جاتا تھا اور ان سے کہا جاتا تھا کہ وہ پاکستان کے خلاف غلط زبان استعمال کریں ۔ ان کے ہاتھوں اور پاؤں کے ناخن نکال لئے جاتے تھے لیکن انہوں نے کبھی بھی پاکستان کے خلاف بات نہیں کی ۔ کہا جاتا ہے کہ جب تشدد کے دوران ان کا خون بہنے لگتا تھا تو وہ اپنے خون سے جیل کی دیواروں پر ’’ پاکستان زندہ باد ‘‘ لکھتے تھے ۔ بھارتیوں نے انہیں ہر قسم کے ظلم اور غیر انسانی سلوک کا نشانہ بنایا۔ حالانکہ جنگی قیدیوں کو بھی جنیوا کنونشن میں کچھ حقوق دیئے گئے ۔ بھارت نے انہیں کبھی جنگی قیدی کا درجہ بھی نہیں دیا ۔ مقبول حسین سے کہا جاتا تھا کہ وہ پاکستان کی افواج کے بارے میں کچھ خفیہ معلومات فراہم کریں تو انہیں چھوڑ دیا جائے گا لیکن مقبول حسین کہتے تھے کہ ان کی زبان کاٹ دی جائے ۔ وہ کبھی ایک لفظ بھی ایسا نہیں بولیں گے ، جس سے وطن سے غداری کا ارتکاب ہو ۔ زندگی کے 40 سال دشمن کی قید میں گزارنا کوئی ایسی بات نہیں ، جسے صرف بیان کر دیا جائے اور کچھ محسوس کیے بغیر سن لیا جائے ۔ یہ کوئی معمولی قیدی نہیں تھے ۔ بھارتیوں کے ہاتھ میں ایک پاکستانی فوجی آ گیا تھا ، جس پر تشدد کرنا وہ اپنا فرض سمجھتے تھے ۔ وہ اپنے غضب اور قہر کی مشق کرتے تھے لیکن مقبول حسین نے وطن سے وفا اور محبت کی طاقت کے ساتھ اس صورت حال کا مقابلہ کیا اور دشمن کو بتا دیا کہ ان کے ظلم و ستم مقبول حسین کی ہمت کو شکست نہیں دے سکتے ۔ دھرتی کا یہ عظیم بیٹا جرات و بہادری ، وفااور محبت کی روزانہ ایک نئی داستان رقم کرتا رہا ۔ 20 اگست 1965 ء کو مقبول حسین کو لاپتہ قرار دیا گیا تھا ۔ طویل عرصے بعد معلوم ہوا کہ مقبول حسین حیات ہیں اور بھارت کی قید میں ہیں ۔ اگر وہ بھارتی جیل میں پاکستان مخالف نعرہ لگاتے تو انہیں فوراً رہائی مل سکتی تھی لیکن انہوں نے ایسا کبھی نہیں کیا ۔ مقبول حسین جانتے تھے کہ ان کے بارے میں کسی کو علم بھی نہیں ہے اور انہیں بچانے کے لئے بھی کوئی نہیں آئے گا لیکن انہوں نے بھارتی جیل کی دیواروں پر اپنے خون سے ’’ پاکستان زندہ باد ‘‘ لکھا ۔ مقبول حسین یہ بھی نہیں جانتے تھے کہ وہ زندہ وطن واپس جا سکیں گے یا نہیں اور ان کی اس عظیم قربانی اور وطن سے محبت کے اس لازوال جذبے کا کوئی اعتراف بھی کرے گا یا نہیں ۔ مٹی سے محبت ان کے خون میں شامل تھی اور ایسی محبت کسی صلے یا ستائش کی محتاج نہیں ہوتی ۔

1965 ء میں وطن کا دفاع کرنے والے شہداء کے ساتھ ساتھ سپاہی مقبول حسین کی قربانیوں پر بھی انہیں سلام پیش کرتے ہیں ۔ دھرتی کا یہ عظیم سپوت 28 اگست 2018 ء کو مٹی ماں کے حوالے ہوگیا ہے۔ ہم ایسے لوگوں کی وجہ سے فخریہ کہہ سکتے ہیں کہ ہم ایک عظیم قوم ہیں ۔ مقبول حسین نے اپنے خون سے بھارتی جیل کی دیواروں پر پاکستان زندہ باد لکھ کر پاکستان کو امر کر دیا ہے۔ جو لوگ پاکستان کے وجود کو نہیں مانتے ، انہیں مقبول حسین نے باور کرا دیا ہے کہ پاکستان ایک حقیقت ہے۔

کچھ لوگ سیاسی غلط فہمیوں کی وجہ سے پاکستان کی مسلح افواج کی ان قربانیوں کا ادراک نہیں کر پاتے ہیں ، جو وطن کے دفاع میں پیش کرتی ہیں ۔ بھارت نے 1965ء میں جس طرح کی جارحیت کا مظاہرہ کیا تھا ، اس کا اگر کامیاب دفاع نہ کیا جاتا تو آج شاید ہمارے ملک کا یہ نقشہ نہ ہوتا اور ہمارے حالات بھی بدتر ہوتے ۔ 1965ء کی بھارتی جارحیت کا مسلح افواج کے افسروں اور جوانوں نے اپنے خون سے دفاع کیا ۔ غیر معمولی بہادری اور جرأت کے لئے مختص ’’ نشان حیدر ‘‘ سب سے زیادہ اسی جنگ میں شہید ہونے والوں کو ملا ۔ کیپٹن سرور شہید ، میجر طفیل شہید ، میجر راجہ عزیز بھٹی شہید ، میجر شبیر شریف شہید ، میجر محمد اکرم شہید ، محمد حسین جنجوعہ شہید ، لارنس نائیک محمد محفوظ شہید اور حوالدار لالک جان شہید نے جرات اور بہادری کے ایسے کارنامے انجام دیئے ، جو رہتی دنیا تک جانبازوں کے لئے مثال بنے رہیں گے۔ اسی بنیاد پر ان سب کو ’’ نشان حیدر ‘‘ سے نوازا گیا ۔ ہمیں سیاسی مغالطوں سے نکل کر ان قربانیوں کا ادراک کرنا چاہئے ۔ وطن کے یہ عظیم بیٹے ہماری آزادی کی حفاظت کے لئے قربان ہوئے ۔ مقبول حسین نے 40 سال تک (1965ء سے 2005 ء تک) بھارتی قید میں پاکستان زندہ باد کے نعرے لگا کر یہ بتا دیا کہ وطن سے وفا کیا ہوتی ہے اور دھرتی سے محبت کا مطلب کیا ہے ۔ وطن کے رکھوالوں کو ہمارا سلام ۔ اس مرتبہ 6 ستمبر کا فلسفہ مقبول حسین کی داستان سے سمجھا جا سکتا ہے ۔
(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)