Category کالم

ایمرا نیوز
چین اور پاکستان کے مابین سی پیک منصوبے کی اصل بنیاد پیپلز پارٹی کے دور حکومت میں رکھی گئی ۔ تفصیلات اگست 2014میں دونوں حکومتوں کے مابین طے ہوئیں اور ان پر باقاعدہ دستخط ستمبر کے مہینے میں چینی صدر کے دورہ پاکستان کے موقع پر ہونے تھے ۔ یہی وہ وقت تھا کہ سی پیک سے متعلق میاں نوازشریف کی حکومت کے کرتوتوں کا راستہ روکا جاتا ۔ اسی عرصے میں جیو نیوز اور جنگ کے ’’جرگہ‘‘ میں اس طالب علم نے سی پیک کو موضوع بحث بنایا اور مغربی روٹ کی تبدیلی کے ساتھ ساتھ اس بات کی نشاندہی بھی کی کہ نوازشریف حکومت معاملات کو پردے میں رکھ کر اور تمام پروجیکٹس کا رخ ایک مخصوص علاقے کی طرف موڑ کر سی پیک کو متنازع بنارہی ہے ۔ اسی وجہ سے میں میاں نوازشریف صاحب اور احسن اقبال صاحب کی نظروں میں دشمن بن گیا اور وفاقی وزراء تک چینی دوستوں کو یہ کہہ کر میرے خلاف ورغلاتے رہے کہ میں نعوذباللہ انڈین لابی کے ایما پر سی پیک کے حوالے سے حکومتی رویے پر تنقید کررہا ہوں۔9دسمبر 2014ء کو روزنامہ جنگ میں شائع ہونیوالے کالم میں عرض کیا کہ ’’ چند ماہ قبل جب مجھے اصل منصوبے میں اس مجوزہ تبدیلی کا علم ہوا تو میں نے اسے بالواسطہ عمران خان صاحب اور وزیراعلیٰ خیبر پختونخواپرویز خٹک صاحب کے کانوں تک پہنچایا لیکن افسوس کہ انہوںنے پختونخوا اور بلوچستان بلکہ پورے پاکستان کیساتھ ہونیوالی اس زیادتی پر کوئی توجہ نہیں دی۔ کسی فورم پر اس کو اٹھایا اور نہ دھرنے میں اس کا ذکر سننے کو ملا۔ اسکے بعد میں نے خصوصی مہم کے تحت مختلف حکومتی اور اپوزیشن رہنمائوں تک یہ فریاد پہنچائی ‘‘۔

جب عمران احمد خان نیازی کنٹینر پر کھڑے ہوکر پارلیمنٹ پر لعنتیں بھیج اور پرویز خٹک انکے ساتھ جھوم رہے تھے تو میں سی پیک کے معاملے پر نوازشریف حکومت کیساتھ جنگ میں مصروف تھا۔ دھرنوں ہی کے دنوں میں اپنا لیپ ٹاپ لے کرمیں نے پرویز خٹک کو سی پیک سے متعلق تفصیلی بریفنگ دی ۔ مراد سعید اور شبلی فراز جیسے لوگوں سے ہر روز یہی درخواستیں کرتا رہا کہ وہ کنٹینر پر کھڑے اپنے لیڈر سے سی پیک کا معاملہ اٹھوائیں اور اس میں پختونخوا، گلگت بلتستان اور بلوچستان کے حق کے لئے آواز اٹھائیں لیکن یہ بات ریکارڈ پر ہے کہ دھرنوں کے دوران نیازی صاحب نے ایک مرتبہ بھی سی پیک کا نام نہیں لیا اور الٹا ان کے دھرنوں کی وجہ سے چینی صدر کا دورہ پاکستان ملتوی ہوگیا۔ ان کی عدم دلچسپی کا یہ عالم تھا کہ کنٹینر پر کھڑے ہوکر چینی صدر کے دورے سے متعلق یہ غلط بیانی کی کہ چینی صدر پاکستان آہی نہیں رہے ہیں ۔ دوسری طرف اس عرصے میں صوبے کے وزیراعلیٰ کی حیثیت سے پرویز خٹک نے سی پیک کے معاملے کو کسی بھی فورم پر وفاقی حکومت کے ساتھ نہیں اٹھایا ۔ چنانچہ نوازشریف حکومت نے یکطرفہ طور پر چینی حکومت کے ساتھ مل کر سارے سودے طے کئے ۔ پھر جب 2015 میں چینی صدر کے دورہ پاکستان کے موقع پر باقاعدہ اعلان ہوا تو سب کی آنکھیں کھلی رہ گئیں ۔ دھرنوں کے ڈرامے سے فارغ ہوکر پی ٹی آئی کی قیادت کو بھی سی پیک یاد آگیا اور تب پرویز خٹک نے دھمکیاں دیناشروع کردیں لیکن افسوس کہ پی ٹی آئی کی قیادت اس وقت حکومت کے ساتھ اپنا مک مکا کرکے خاموش ہوگئی ۔ میرے کالم ریکارڈ پر ہیں (انہیں ان شاء اللہ اب میں سی پیک سے متعلق اپنی کتاب کا بھی حصہ بنارہا ہوں) کہ میں تسلسل کے ساتھ مطالبہ کرتا رہا کہ (۱) نوازشریف حکومت سی پیک کے معاملات کو شفاف بنا کر تمام معاہدے پارلیمنٹ کے سامنے رکھ دیں ، (۲) جے سی سی میں تمام صوبوں ، گلگت بلتستان اورآزاد کشمیر کے وزرائے اعلیٰ کو ممبر بنادیں ۔ ورکنگ گروپ میں بھی وفاق کے ان تمام یونٹوں کو نمائندگی دے اور (۳) مغربی روٹ کو ہی اصل روٹ بنا دیا جائے ۔ وغیرہ وغیرہ ۔ لیکن پی ٹی آئی کی قیادت خیبر پختونخوا کے لئے ایک اکنامک زون اور ایک پروجیکٹ (اس کی ڈیلنگ کے اختیار سمیت ) ہتھیا کر اور پارلیمنٹ کی سی پیک کمیٹی میں اسد عمر اور شبلی فراز کو ممبر بنا کر رام ہوگئی ۔ اس مک مکا کے بعد پرویز خٹک اسی طرح وکالت کرنے لگے جس طرح کہ پہلے احسن اقبال کرتے تھے ۔ ہم جیسے لوگوں کو حکومت جواب دے کر خاموش کرتی رہی کہ پارلیمنٹ کی مشترکہ کمیٹی سی پیک کے منصوبوں کی نگرانی کررہی ہے اور اس کمیٹی میں پی ٹی آئی کے اسد عمر اور سینیٹر شبلی فراز موجود ہیں ۔ یوں اس کے بعد اگر کوئی گناہ ہوا ہے تو اس میں پی ٹی آئی بھی مسلم لیگ (ن) کے ساتھ شریک رہی ۔یوں ہم جیسے لوگ تو کچھ نہیں کرسکے لیکن میں یہ بات ٹی وی پروگراموں اور اپنے کالموں میں بار بار ریکارڈ پر لاتا رہا کہ سی پیک کو نواز حکومت جس طرح سیاسی مقاصد کے لئے استعمال کررہی ہے ، اس کے پیش نظر یہ بات یقینی ہے کہ کسی وقت یہ پروجیکٹ ان کے گلے کا طوق بنے گا ۔اسی طرح میں یہ بھی عرض کرتار ہا کہ جب سی پیک کے سودوں کے قصے باہر آئیں گے تو لوگ پانامہ کو بھول جائیں گے لیکن پی ٹی آئی کی قیادت اور ملک کے اصل حاکم دیگر ایشوز میں الجھے رہے۔

سی پیک کا معاملہ 2014میں شروع ہوا تھا اور آج 2018ہے ۔ اب کوئی بھی منصوبہ واپس نہیں کیا جاسکتا ۔ دوسری طرف یہ پروجیکٹ معاشی سے زیادہ تزویراتی (Strategic) پروجیکٹ بن چکا ہے ۔ ہم نے اس پروجیکٹ کا اتنا ڈھنڈورا پیٹا کہ چین اور پاکستان کے دشمنوں کی نظروں میں یہ وقت سے پہلے کھٹکنے لگا ہے ۔ اس کی وجہ سے امریکہ جیسی طاقتیں ہماری دشمن بن گئی ہیں اور ہم ہر حوالے سے چین کے محتاج بن گئے ہیں تو پی ٹی آئی کی حکومت نے اس معاملے پر اس انداز میں بحث شروع کردی کہ اس سے چین کا ناراض اور پاکستان دشمن طاقتوں کا خوش ہونا یقینی ہے ۔ اگر سی پیک کی بنیاد پر میاں نوازشریف اور ان کی ٹیم کا احتساب ہو تو مجھ سے زیادہ خوش کوئی نہیں ہوگا ۔ سی پیک کے منصوبوں میں کمیشنوں اور کک بیکس کے معاملات کی بھی چھان بین ہونی چاہئے ۔ مغربی روٹ کے معاملے پر مسلم لیگی لیڈر شپ نے جو ظلم کیا ، اس کی تلافی بھی ہونی چاہئے اور چینی دوستوں سے مل کر مغربی سڑک کو مغربی روٹ بنا دینا چاہئے ۔ بلوچستان اور گلگت بلتستان کے ساتھ سی پیک کی مد میں جو زیادتی ہوئی اس کی تلافی کرکے پہلی فرصت میں ان دو علاقوں کو سی پیک سے مستفید کروانا چاہئے ۔ اسی طرح جے سی سی میں تمام صوبوں اور گلگت بلتستان یا آزاد کشمیر کو بھی نمائندگی دینی چاہئے ۔ جو سودے یکطرفہ ہیں ، ان پر بھی نظرثانی ہونی چاہئے لیکن یہ سب کام خاموشی کے ساتھ ، چینی دوستوں کے ساتھ مل کر ، باہمی افہام و تفہیم کے ساتھ متعلقہ فورمز پر ہونے چاہئیں ۔ یہاں تو چین کے ساتھ ایسا سلوک روا رکھا جارہا ہے جیسے وہ چین نہیں امریکہ ہے۔ اقتدار میں آتے ہی وزیراعظم عمران احمد خان نیازی نے کابینہ کی سطح پر فیصلہ کیا کہ سی پیک کے منصوبوں کو ری اوپن کیا جائے گا اور ظاہر ہے یہ خبر چینیوں کے لئے کسی بم شیل جبکہ امریکہ وہندوستان کے لئے خوشخبری سے کم نہیں تھی ۔ آخرکابینہ کی سطح پر فیصلہ کرنے کی کیا ضرورت تھی؟ یہ کام خاموشی کے ساتھ بھی کیا جاسکتا تھا۔ اسی وجہ سے تشویش میں مبتلا ہوکر چینی وزیرخارجہ نے پاکستان کے دورے کا فیصلہ کیا اور خلاف روایت ان کا استقبال دشمن ملک کے وزیر خارجہ کی طرح کیا گیا ۔ سعودی وزیر اطلاعات کے استقبال کے لئے تو وفاقی وزیرا طلاعات فواد چوہدری ائیرپورٹ پر گئے اور پھر ایئرپورٹ ہی سے انہوں نے ان کو الوداع کہا لیکن چینی وزیرخارجہ کا ایئرپورٹ پر استقبال دفتر خارجہ کے ایک معمولی افسر سے کروایا گیا۔

پھر پاکستانی حکام کے ساتھ مذاکرات کے بعد وہ ابھی وطن واپس نہیں پہنچے تھے کہ مشیر تجارت عبدالرزاق دائود کا فنانشل ٹائمز میں یہ انٹرویو سامنے آیا کہ سی پیک کے منصوبوں پر ایک سال کے لئے کام روکنا پڑے گا۔ اس روش اور ان واقعات سے پاکستان اور چین کے اسٹرٹیجک معاملات کو کتنا بڑا دھچکا لگ گیا ، یہ صرف وہی لوگ جانتے ہیں جو ان معاملات کی حساسیت کو سمجھتے ہیں۔لیکن حیرانی اس بات پر ہے کہ جو لوگ ان معاملات کی حساسیت کو سب سے زیادہ سمجھتے ہیں، انہو ں نے عمران احمد نیازی کو یہ حساس معاملات بھی نہیں سمجھائے ہیں ۔ کم ازکم ان کو اتنا تو سمجھا دیا جائے کہ ان حالات میں جبکہ ہم نے چین کی خاطر امریکہ کو اپنا دشمن بنا دیا ہے ، اس کے ساتھ تعلقات خراب کرنا قومی خودکشی کے مترادف ہے ۔پاکستان کے سادہ لوح عوام تو انہیں امریکہ مخالف سمجھ رہے تھے لیکن وہ تو پہلے دن سے امریکہ کا کام آسان کرنے لگے ہیں ۔

(کہانی نویس کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

ایمرا نیوز
سینٹرل جیل راولپنڈی جسے اڈیالہ جیل بھی کہا جاتا ہے، 1970ء اور 1980ء کے درمیان جنرل ضیاء الحق کے دور میں قائم کی گئی تاہم ذوالفقار علی بھٹو کی پھانسی کے بعد اس جیل کو منہدم کرکے پارک میں تبدیل کردیا گیا اور بعد ازاں اڈیالہ جیل کا قیام عمل میں آیا۔ راولپنڈی کے علاقے اڈیالہ کے مقام پر انتہائی حساس نوعیت کی اس جیل کو یہ اعزاز بھی حاصل ہے کہ یہاں سابق وزیراعظم یوسف رضا گیلانی، ممتاز قادری اور سیف الرحمن جیسی شخصیات قید رہیں جبکہ کرنسی اسمگلنگ میں ملوث ماڈل ایان علی کو بھی اسی جیل میں قید رکھا گیا۔ گزشتہ دو ماہ سے یہ جیل ایک بار پھر خبروں اور لوگوں کی توجہ کا مرکز بنی ہوئی ہے جہاں آج کل تین بار منتخب وزیراعظم میاں نواز شریف، اُن کی صاحبزادی مریم نواز اور اُن کے داماد کیپٹن صفدر اسیر ہیں۔

میں مراکش سے جیسے ہی وطن واپس لوٹا تو مجھے پیغام ملا کہ نواز شریف سے ملاقات کرنے والوں کی لسٹ میں میرا نام بھی شامل ہے۔ اس طرح اگلے روز علی الصبح کی فلائٹ سے اسلام آباد اور پھر ایک گھنٹے کی ڈرائیو کے بعد اڈیالہ جیل پہنچا۔ اڈیالہ جیل کے گیٹ نمبر 5 پر متعین جیل اہلکار نے شناختی کارڈ کی تصدیق اور جامہ تلاشی کے بعد مجھے اندر جانے کی اجازت دی۔ کڑکڑاتی دھوپ میں 500 میٹر چلنے کے بعد ایک اور جگہ جامہ تلاشی لی گئی اور موبائل رکھوالئے گئے حالانکہ جیل میں نصب جیمر کے باعث فونز کام نہیں کررہے تھے۔ شناختی کارڈ کے اندراج اور ایک پرچی پر نام تحریر ہونے کے بعد ایک چھوٹے کمرے میں انتظار کیلئے کہا گیا جہاں سینیٹر پرویز رشید، عرفان صدیقی، خواجہ آصف، مشاہد اللہ، طارق فاطمی اور رانا مشہود سمیت کئی شناسا چہرے پسینے میں شرابور نظر آئے جو صبح سے نواز شریف سے ملاقات کے انتظار میں بیٹھے تھے۔ ایک موقع پر جب برداشت حد سے باہر ہوگئی تو طارق فاطمی، پولیس اہلکار عمران پر یہ کہتے ہوئے برس پڑے کہ آپ نے کئی گھنٹوں سے ہمیں یہاں بٹھا رکھا ہے، آخر آپ کب ہماری ملاقات نواز شریف سے کروائیں گے؟ مگر پولیس اہلکار پر ان کی باتوں کا کوئی اثر نہ ہوا۔ بالآخر انتظار کے کٹھن لمحات ختم ہوئے اور پرچی پر درج نام اس طرح پکارے گئے جیسے عدالتوں میں پکارے جاتے ہیں۔ کچھ فاصلے پر ایک دوسری عمارت کے بڑے گیٹ پر لایا گیا اور ایک بار پھر جامہ تلاشی کے بعد ڈپٹی سپرنٹنڈنٹ کے کمرے میں بٹھادیا گیا جو بڑے ایکشن سے چائے نوش کرنے میں مصروف تھا۔ ڈپٹی سپرنٹنڈنٹ کو چائے پیتے دیکھ کر چائے کی طلب محسوس ہوئی مگر میں نے پانی مانگنے پر ہی اکتفا کیا لیکن جب جیل اہلکار پانی لے کر آیا تو اس کی رنگت دیکھ کر پینے کی ہمت نہ ہوئی۔ میں نے جیل اہلکار سے دریافت کیا کہ ’’کیا یہ منرل واٹر ہے؟‘‘ جس پر جیل اہلکار نے طنزیہ مسکراتے ہوئے کہا کہ ’’یہ جیل ہے، یہاں منرل واٹر کا کوئی انتظام نہیں اور نواز شریف بھی یہی پانی پیتے ہیں۔‘‘ کچھ دیر میں جیل کے ایک اہلکار نے میری ہتھیلی پر سرخ رنگ کی وزیٹر اسٹمپ لگاتے ہوئے تاکید کی کہ ’’یہ اسٹمپ مٹنے نہ پائے کیونکہ یہی آپ کے وزیٹر ہونے کی نشانی ہے ، بصورت دیگر آپ کا جیل سے نکلنا ممکن نہ ہوسکے گا۔‘‘

نواز شریف سے ملاقات کے کمرے تک جانے کیلئے راہداری سے گزرتے ہوئے کچھ قیدیوں پر نظر پڑی جو بیڑیوں میں جکڑے ہوئے تھے۔ کمرے میں داخل ہونے سے پہلے ایک بار پھر تلاشی لی گئی اور جیب میں لگا پین یہ کہہ کر لے لیا گیا کہ اسے لے جانے کی اجازت نہیں۔ کمرے میں ایک کرسی پر نواز شریف آسمانی رنگ کی شلوار قمیض اور ان کی برابر والی کرسی پر مریم نواز کالے رنگ کی شلوار قمیض میں ملبوس بیٹھی تھیں جبکہ انہوں نے سر پر کالے رنگ کا دوپٹہ اوڑھ رکھا تھا۔ وہ دونوں انتہائی کمزور دکھائی دے رہے تھے مگر ان کے حوصلے بلند تھے۔نواز شریف نے کھڑے ہوکر مصافحہ کیا اور خیریت دریافت کی۔ میں نے نواز شریف کو بتایا کہ الیکشن میں ہمیں کراچی کے عوام اور بزنس کمیونٹی کا بھرپور تعاون حاصل رہا، گوکہ (ن) لیگ دھاندلی کے باعث کوئی نشست حاصل نہیں کرسکی لیکن اگر کئی نشستوں پر دوبارہ ووٹوں کی گنتی ہوئی تو (ن) لیگ کو یہ نشستیں حاصل ہوسکتی ہیں۔ میں نے بتایا کہ میں ایک روز قبل ہی مراکش سے وطن واپس لوٹا ہوں اور مراکش کے مشہور صوفی بزرگ مولے ادریس اور محمد بن سلیمان الجزولی کے مزار پر آپ اور شریف فیملی کیلئے خصوصی دعائیں کی ہیں، مجھے امید ہے کہ ان شاء اللہ بہت جلد آپ کی مشکلات دور ہوں گی۔ نواز شریف کے برابر میں بیٹھی مریم نواز بہت کمزور دکھائی دے رہی تھیں جنہوں نے اسپنچ چپل پہن رکھی تھی اور وہ متواتر درود شریف کا ورد کررہی تھیں۔ یہ اس مریم نواز سے بہت مختلف تھیں جنہیں ہم ٹی وی پر دیکھا کرتے تھے۔ میں نے جب ان کی خیریت دریافت کی تو انہوں نے مجھے تلقین کی کہ آپ نے ہمت نہیں ہارنی۔ یہ سن کر میری آنکھیں نم ہوگئیں کہ میں جن کی ہمت بندھانے آیا تھا، وہی مجھے ہمت نہ ہارنے کا حوصلہ دے رہے ہیں۔دوران ملاقات میں نے نواز شریف کو اپنے کالموں کا مجموعہ ’’آج کی دنیا‘‘ پیش کیا جس پر نواز شریف نے بتایا کہ وہ میرے کالمز باقاعدگی سے پڑھتے اور پسند کرتے ہیں۔

13 جولائی کو جب نواز شریف کو اڈیالہ جیل لایا گیا تو انہیں جیل میں سی کلاس دی گئی، بیرک میں کوئی چارپائی اور نہ ہی کوئی گدا تھا جبکہ بیرک کے باہر باتھ روم انتہائی گندا تھا۔ بیرک میں ایک بہت پرانا پنکھا نصب تھا جو گرم ہوا پھینک رہا تھا۔ میاں نواز شریف نے وضو کیا، قرآن مجید مانگا اور نماز پڑھنے کے بعد فرش پر لیٹ کر رات گزاری۔ وہ رات بھر پسینے میں شرابور رہے اور دوسرے دن جب شریف فیملی کے افراد ملاقات کیلئے آئے اور انہوں نے نواز شریف کی یہ حالت دیکھی تو یہ بات میڈیا پر لیک ہوئی تو نواز شریف کو بی کلاس میں منتقل کیا گیا جہاں اُنہیں ایک چارپائی کی سہولت حاصل تھی جبکہ کمرے سے منسلک ایک باتھ روم بھی تھا جو انتہائی بدبو دار تھا۔ نواز شریف کو کھانا جیل کا ملتا تھا مگر وہ جیل کا پانی نہیں پیتے تھے جس کے باعث انہیں گردے کا مرض لاحق ہوگیا اور ان کی طبیعت تشویشناک حد تک بگڑگئی اور ڈاکٹروں کے مطابق گردے کسی وقت بھی فیل ہوسکتے تھے، اسپیشلسٹ نے میاں نواز شریف کو اسپتال منتقل کرنے کا مشورہ دیا مگر جیل حکام نے ہدایت پر عمل کرنے سے انکار کردیا۔ الیکشن کے بعد میاں نواز شریف کی طبیعت مزید بگڑتی چلی گئی، یہاں تک اُنہیں ہارٹ اٹیک ہوا اور ڈاکٹرز نے انہیں اسپتال منتقل کرنے کی ہدایت کی مگر نواز شریف نے اسپتال شفٹ ہونے سے صاف انکار کردیا۔ بعد ازاں مریم نواز اور کیپٹن صفدر کے اصرار پر نواز شریف کو پمزاسپتال کے سی سی یو میں منتقل کیا گیا۔ کچھ روز بعد جب نواز شریف کی حالت بہتر ہوئی تو وہ اس بات پر بضد رہے کہ وہ اسپتال میں نہیں رہنا چاہتے اور انہیں جیل منتقل کیا جائے۔ اس طرح میاں نواز شریف کو دوبارہ جیل پہنچا دیا گیا۔

میں نے پارٹی کے سینئر لوگوں کو یہ کہتے سنا کہ نواز شریف کا مریم نواز کے ساتھ پاکستان واپسی کا فیصلہ درست نہیں تھا۔ایسے میں جب کلثوم نواز وینٹی لیٹر پر تھیں تو نواز شریف اور مریم نواز کے وطن واپس نہ آنے کا جائز جواز موجود تھا۔ لندن سے پاکستان روانگی سے قبل سینئر پارٹی رہنمائوں کا یہ مشورہ بھی تھا کہ اگر نواز شریف نے وطن واپس جانے کا فیصلہ کرلیا ہے تو مریم ان کے ساتھ نہ آئیں کیونکہ اس طرح وہ لندن میں بیٹھ کر اپنے ساتھ ہونے والی زیادتیوں کے خلاف آواز بلند کرسکتی ہیں مگر مریم نواز نے اپنے باپ کو اکیلا چھوڑنے سے انکار کردیا جو میرے نزدیک ایک جذباتی فیصلہ تھا کیونکہ باہر بیٹھ کر وہ اپنے اور اپنے والد کے ساتھ ہونے والی زیادتیوں پر آواز بلند کرسکتی تھیں۔ ہمارے سامنے آیت اللہ خمینی کی مثال موجود ہے جنہوں نے فرانس میں بیٹھ کر بڑی کامیابی سے ایران میں انقلابی مہم چلائی اور وہ اس وقت وطن واپس لوٹے جب شاہ محمد پہلوی کا طیارہ انہیں لے کر ملک سے پرواز کرچکا تھا۔ میرے نزدیک بہادری اور سمجھداری میں یہی فرق ہے۔

پاکستان کی تاریخ میں اس طرح کی کوئی مثال نہیں ملتی کہ ایک باپ یہ جانتے بوجھتے کہ اسے اور اس کی بیٹی کو سلاخوں کے پیچھے ڈالا جائے گا،اپنی بیٹی کا ہاتھ تھامے جیل چلاگیا۔ایسے ملک میں جہاں کسی باپ کو اگر اپنی بیٹی کو تھانے لے جانا مقصود ہوتا ہے تو وہ ایسا کرنے کی ہمت نہیں کرپاتا۔ پاکستانی معاشرے میں بیٹیوں کے ساتھ ظلم و زیادتی کو ایک برا فعل سمجھا جاتا ہے۔ پنجاب میں مریم نواز کے ساتھ ہونے والی زیادتیوں اور ناروا سلوک کا بہت برا منایا جارہا ہے۔ نواز شریف، مریم نواز اور کیپٹن صفدر کو الگ الگ کمروں میں قید تنہائی میں رکھا گیا ہے اور وہ سیل میں ہی نماز ادا کرتے ہیں۔اُنہیں پورے ہفتے ایک دوسرے سے ملنے کی اجازت نہیں اور وہ صرف ملاقاتیوں کیلئے مختص جمعرات کے دن ایک دوسرے سے ملتے ہیں۔ مریم نواز کی 13 سالہ بیٹی ہر ملاقات میں ماں سے لپٹ کر رونے لگتی ہے کہ وہ اسے چھوڑ کر نہیں جائیں گی اور یہی حالت نواز شریف کی والدہ کی ہوتی ہے جن کی چیخیں جیل میں گونجتی ہیں کہ ’’مجھے بھی جیل میں بیٹے کے ساتھ رکھا جائے۔‘‘ مریم نواز کمزور ہوگئی ہیں اور پہچانی نہیں جاتیں جبکہ نواز شریف کا وزن کئی کلو گرچکاہے۔ میں یہ سمجھتا ہوں کہ نواز شریف اور ان کی فیملی کے ساتھ ظلم و زیادتی ہورہی ہے جو وہ Deserve نہیں کرتے۔حالیہ الیکشن میں مطلوبہ نتائج مل چکے، عمران خان وزیراعظم بن گئے، انہیں پنجاب کی حکومت بھی مل گئی، سینیٹ اور صدارتی انتخاب جیسے اہداف بھی حاصل ہوگئے، اب نواز شریف فیملی پر مزید ٹارچر نہیں ہونا چاہئے۔ زیادہ اچھا ہے کہ اس سلسلے کو اب بند کردیا جائے کیونکہ خدانخواستہ نواز شریف جنہیں کئی بیماریاں لاحق ہیں، کو اگر کچھ ہوگیا تو قوم انہیں اس حال میں پہنچانے والوں کو معاف نہیں کرے گی۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

ایمرا نیوز

ایڈولف آئیچمین کو ہولوکاسٹ کا معمار کہا جاتا ہے، وہ نازی جرمنی کی بدنام زمانہ ایس ایس تنظیم میں لیفٹیننٹ کرنل تھا، دوسری جنگ عظیم میں جب جرمنی میں یہودیوں کی نسل کشی جاری تھی تو آئیچمین کے ذمہ یہودیوں کو عقوبت خانوں تک پہنچانا اور جبراً ملک بدر کرنا تھا، اس دوران لاکھوں لوگ کنسنٹریشن کیمپوں میں بھجوائے گئے جہاں اُن پر اذیت ناک تجربات کئے گئے، ان میں معصوم بچے، عورتیں، مرد سب شامل تھے، آئچمین اس تمام منصوبے کا مہتمم اعلیٰ تھا جس کے ذمہ لاجسٹک سپورٹ اور قیدیوں کو ایک جگہ سے دوسری جگہ منتقل کرنا تھا، یہ وہ وقت تھا جب یہودی قیدی حراستی مراکز میں جانوروں کی طرح رکھے جاتے، انہیں گیس چیمبرز میں جمع کر کے مار دیا جاتا اور لاشیں مشین کی مدد سے پھینک دی جاتیں۔ دوسری جنگ عظیم کے بعد آئیچمین کو امریکیوں نے گرفتار کر لیا مگر اِس نے نہایت چالاکی سے اپنی شناخت چھپا لی اور شک سے بچ گیا تاہم بعد میں جب اِس کا بھید کھلا تو اُس نے ریڈ کراس کی ایک جعلی دستاویز تیار کی اور یورپ سے فرار ہو کر ارجنٹینا آگیا اور ایک فرضی نام سے کاریں بنانے والی ایک بڑی کمپنی میں نوکری کر لی، بیوی بچے بھی وہیں بلا لیے اور گوشہ نشینی کی زندگی بسر کرنے لگا۔ لیکن قسمت نے دیر تک یاوری نہیں کی، جرمن اہلکاروں نے آئیچمین کے بارے میں اسرائیل کے جاسوسوں کو اطلاع دے دی جنہوں نے اسے پکڑنے کا ایک منصوبہ بنایا، چونکہ ارجنٹینا کا اسرائیل کے ساتھ قیدیوں کے تبادلے کا کوئی معاہدہ نہیں تھا سو واحد طریقہ یہی تھا کہ آئیچمین کو اغوا کر کے اٹھا لیا جاتا۔ موساد نے یہی کیا۔ 11مئی 1960کو اسرائیلی کمانڈوز آئیچمین کے بیونس آئرس میں واقع گھر کے سامنے گھات لگا کر بیٹھ گئے، اُس روز وہ گھر سے کچھ دیر سے نکلا مگر جونہی وہ اسرائیلی کمانڈوز کی گاڑی کے قریب پہنچا اسے دبوچ کر گاڑی میں بٹھا لیا گیا، وہاں سے اسے ایک گھر میں لے جایا گیا جسے کچھ روز پہلے ہی اسرائیلیوں نے کرائے پر لیا تھا، آئیچمین سے پوچھ گچھ کی گئی تو اُس نے تھوڑی ہی دیر میں سچ اگل دیا، 20مئی کو اسے اسرائیل پہنچا دیا گیا اور 23مئی کو اسرائیلی وزیر اعظم نے پارلیمنٹ میں ایڈولف آئیچمین کی گرفتاری کا اعلان کیا۔ اپریل 1961میں یروشلم میں آئیچمین کے خلاف جنگی جرائم کے الزام میں مقدمے کا آغاز ہوا جس کی سماعت تین ججوں نے کی، یہ مقدمہ اگست تک چلا، دسمبر میں ججوں نے اس کا فیصلہ سنایا، آئیچمین کو سزائے موت ہوئی، 31مئی 1962کی رات اسے رملہ جیل میں پھانسی دے دی گئی جب اس کی عمر 56برس تھی، اس کی لاش کو جلا کر راکھ سمندر میں بہا دی گئی۔ اسرائیل میں پھانسی چڑھنے والا یہ پہلا اور آخری شخص تھا۔

آئیچمین پر چلایا گیا مقدمہ تاریخی نوعیت کا تھا، اس مقدمے کو پوری دنیا نے دیکھا، اس مقدمے کی خاص بات یہ تھی کہ اس میں ہولوکاسٹ سے بچ جانے والے افراد اپنی داستان لے کر پیش ہوئے، انہیں ٹی وی پر دکھایا گیا اور یوں عالمی سطح پر ہولوکاسٹ کے مظالم کی مربوط کوریج شاید پہلی مرتبہ ایسے ہوئی کہ ظلم کی داستانیں انسانی یادداشت کا حصہ بن گئیں۔ مقدمے کی کارروائی کے دوران آئیچمین کو ایک بلٹ پروف شیشے کے پیچھے بٹھایا جاتا کہ کہیں اسے قتل نہ کر دیا جائے، پیشی کے دن وہ صاف ستھرے کپڑے پہن کر آتا، اپنے کاغذات کو ترتیب سے رکھتا اور ایسے اطمینان سے کرسی پر بیٹھتا جیسے کوئی بیورو کریٹ اپنے دفتر میں بیٹھا ہو، عدالت میں گواہ پیش ہوتے، اُس کے خلاف گواہی دیتے مگر اُس کے چہرے پر کوئی تاثر نہ ابھرتا، ہولوکاسٹ کے مارے جب اپنے مظالم کی داستان سناتے تو آئیچمین کا موقف یہی ہوتا کہ وہ ایک پروفیشنل تھا جس نے ایک قانونی حکومت کے احکامات مانتے ہوئے اپنی ’’جاب‘‘ کی، وہ ایک بڑی مشین کا پرزہ تھا، بس۔ مقدے کے آخری روز اُس نے تسلیم کیا کہ وہ لاکھوں یہودیوں کی منتقلی کا ذمہ دار ہے جو موت کے گھاٹ اتار دیئے گئے مگر وہ اس پر شرمندہ ہے اور نہ خود کو مجرم سمجھتا ہے کیونکہ وہ قانونی احکامات پر عملدرآمد کر رہا تھا۔

اس مقدمے کی کارروائی دیکھنے کے لئے دنیا بھر سے لوگ یروشلم آئے جن میں سے ایک جرمن فلسفی اور مفکر ھینا آریند بھی تھیں، یہ خاتون یہودی تھیں، جب ہٹلر برسرر اقتدار آیا تو یہ نسل پرستی پر تحقیق کر رہی تھیں، گستاپو نے انہیں گرفتار کرلیا، رہائی کے بعد یہ جرمنی چھوڑ گئیں اور پھر بعد میں امریکہ چلی گئیں، انہیں بیسویں صدی کا ایک بڑا سیاسی مفکر مانا جاتا ہے۔ مس آریند نے اس مقدے کے بارے میں تاریخ ساز تبصرہ کیا، انہوں نے اس مقدے کے لئے Banality of Evilکی اصطلاح تراشی، ان کا کہنا تھا کہ ایڈولف آئیچمین یہودیوں کی نسل کشی کے ہولوکاسٹ پراجیکٹ کا اپنی مرضی سے حصہ بنا مگر یوں لگتا ہے جیسے اُس کی سوچنے سمجھنے کی صلاحیتیں اُس وقت مفقود ہو گئی تھیں، اگر آئیچمین یہ کہتا کہ وہ یہودیوں سے نفرت کرتاہے اس لئے مرگ انبوہ جائز ہے تو یہ اس کے کاموں کی نفسیاتی توجیہ سمجھی جا سکتی تھی مگر کسی شخص کا سپاٹ انداز میں یہ کہنا کہ وہ بس اپنی جاب کر رہا تھا بے حد خطرناک رجحان ہے، یہ اُس نام نہاد پروفیشنلزم کی آڑ میں چھپنے کی کوشش ہے جس میں انسان بس ایک مشین کے پرزے کی طرح کام کرتا ہے اور جس طرح کسی مشین کو علم نہیں ہوتا کہ وہ کسی انسان کا سر کاٹ رہی ہے یا درخت کا تنا بالکل اسی طرح آئیچمین جیسے لوگ بھی بے حس ہو جاتے ہیں، انہیں بیسویں صدی کے نام نہاد پروفیشنلزم نے جذبات سے عاری کر دیا ہے، نیکی، بدی، ظلم، بربریت، حق، باطل جیسی باتیں اُن کے لئے معنی نہیں رکھتیں، انہیں یہ دکھائی دینا بند ہو جاتا ہے کہ سچائی کیا ہے اور ظلم کیا ہے اور وہ نہایت غیر محسوس طریقے سے انسان سے درندے کا روپ دھار لیتے ہیں۔ آئیچمین کا مقدمے کے دوران ضمیر کی ملامت کے بغیر یہ صفائی دینا کہ وہ بس اپنی جاب کر رہا تھا دراصل اس مشینی دور کی سفاکیت کا مظہر ہے جس میں انسان فقط احکامات کا پابند ہے، وہ سمجھتا ہے کہ جو کام اسے دیا جائے اُسے مستعدی سے بجا لانا اُس کی ذمہ داری ہے، اِن احکامات کی راہ میں اگر کوئی انسانی جان آجائے تو آ جائے، یہ احکامات اُسی طرح مانے جائیں گے جیسے کوئی بھی اور بیورو کریٹک کام کیا جاتا ہے۔ ھینا آریند کا کہنا تھا کہ آئیچمین کی سوچنے کی صلاحیت ختم ہو چکی تھی، وہ بدی کو بدی نہیں سمجھ رہا تھا، وہ ہولوکاسٹ کو بس ایک پراجیکٹ سمجھ کر انجام دے رہا تھا۔

ایڈولف آئیچمین کا مقدمہ کئی سوالات کو جنم دیتا ہے۔ جرمنی کی اُس وقت کی حکومت بظاہر ایک قانونی حکومت تھی اور آئیچمین اپنی نوکری کے تحت احکامات کی پیروی کر رہا تھا مگر کیا یہ ایسے احکامات کو ماننے کا پابند تھا جو ظلم عظیم کو جنم دے رہے تھے؟ کیا کوئی قانون ہر حال میں مانا جائے گا چاہے وہ قانون کی تعریف پر ہی پورا نہ اترتا ہو جیسے کہ غلامی بھی ایک زمانے میں قانونی تھی؟ کیا آج کا انسان مادیت کے اس دور میں اخلاقی فیصلہ کرنے کی صلاحیت سے محروم ہو چکا ہے؟ اگر ہر انسان کا یہ حق تسلیم کر لیا جائے کہ وہ اپنی سمجھ بوجھ اور اخلاقی معیار کے مطابق قانون کی تشریح کرکے فیصلہ کر سکتا ہے تو کیا معاشرے میں انارکی نہیں پھیل جائے گی؟ نہیں، ہر انسان کو یہ حق نہیں دیا جا سکتا کہ وہ اپنی من مانی کرتا پھرے مگر جن کے پاس اختیار ہوتا ہے وہ تاریخ میں ضرور مجرم ٹھہرائے جاتے ہیں کہ انہوں نے ظلم اور نا انصافی کا ساتھ کیوں دیا جیسے کہ ایڈولف آئی چمین۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

ایمرا نیوز
عمران حکومت کی کامیابی یا ناکامی کا بوجھ وزیر خزانہ اسد عمر کے لمبے قد اور ناتواں کندھوں پر آن پڑا ہے اگر تو وہ ملک کو اقتصادی بھنور سے نکلنے کا راستہ دکھا پاتے ہیں تو واہ واہ۔ عمران حکومت چل پڑے گی لیکن اگر وہ اس بوجھ سے دب کر کنفیوز رہتے ہیں، فیصلہ نہیں کر پاتے یا پھر غیر ضروری تاخیر کرتے ہیں تو جان لیجئے گا کہ موجودہ حکومت اپنا پہلا امتحان پاس نہیں کر پائی۔

اسد عمر کے والد ریٹائرڈ میجر جنرل غلام عمر عمدہ شعری ذوق رکھتے تھے، اقبال کی نظمیں تو انہیں زبانی یاد تھیں وہ اپنے بچپن ہی سے علامہ اقبال کی شاعری اور فکر سے متاثر تھے، اقبال سے ان کا عشق زندگی کے آخری لمحے تک جاری رہا۔ اسد عمر فنانس اور مینجمنٹ کے شعبوں کے کھلاڑی ہونے کے سبب اعداد و شمار کے گورکھ دھندے میں زیادہ مصروف رہتے ہیں پھر بھی کہیں نہ کہیں والد کا شعری ذوق منتقل تو ہوا ہو گا اس لئے ان پر بوجھ اور ذمہ داری کے حوالے سے کلیاتِ سراج میں سے ایک شعر پیش خدمت ہے ؎

نہ پائے سو پرسش کیا بادشاہ

مقرر ہوا ہے اس کے ذمے گناہ

اسد عمر کا پہلا مسئلہ 10ارب ڈالر کا ہے۔ اس ذمہ داری سے وہ کیسے عہدہ برآ ہوتے ہیں کیا کشکول لے کر آئی ایم ایف کے دروازے پر 10ارب ڈالر کا سوال کرتے ہیں یا پھر اپنے دوست عربوں یا مربی چینیوں سے آسان شرائط پر کمٹ منٹ لے کر عالمی اداروں کے دروازوں پر جاتے ہیں یا پھر اسد عمر اور ان کے تھنک ٹینک کے پاس جادو اور روحانیت کے ایسے کمال ہیں کہ وہ بنا قرض مانگے ہی ملکی معاملات کو درست کر لیں گے یا پھر اسد عمر کی پُراسرار اور لمبی خاموشی کی وجہ ان کی خفیہ مہارت ہے جو تیر بہدف اقتصادی فارمولے سے ملک کو ایک بار پھر پٹڑی پر چڑھا دیں گے یا کہیں خدانخواستہ اسد عمر اس بوجھ تلے اتنے دب جائیں کہ پی ٹی آئی کی کشتی کو بھنور میں دھکیل دیں۔

برتفنن طبع عرض ہے کہ ضلع سرگودھا کے قدیمی قبائل میں سے ایک ’’لک‘‘ اپنی مشرقی فہم و فراست اور دیہی دور اندیشی کے حوالے سے مشہور ہیں۔ لک بڑے بہادر بھی ہیں مگر ساتھ ہی بلاوجہ اور بلا غرض لڑنے پر آمادہ نہیں ہوتے۔ ایک زمانہ تھا کہ وہ انگریزوں کے لئے دردِ سر بنے مگر دوسری جنگ عظیم سے بہت پہلے وہ انگریزوں کے مطیع اور سلطنت برطانیہ کے اتحادی بن چکے تھے۔ جرمنی سے جنگ شروع ہوئی تو پنجاب میں فوجیوں کی بھرتی یعنی لام بندی شروع ہوئی۔ ڈپٹی کمشنر نے لک قبیلہ کو بھرتی کی طرف راغب کرنے کے لئے سکیسر میں دربار لگایا اور کرسی نشین، سفید پوش و نمبردار لک معززین کو بتایا کہ ہٹلر نامی ایک خونخوار اور ظالم شخص آپ کی مالکہ اور ملکہ برطانیہ پر حملہ آور ہے، ملکہ چاہتی ہے کہ لک اس معاملے میں لڑنے کے لئے آگے آئیں، چند لمحے خاموشی رہی مگر پھر ایک بوڑھا کرسی نشین لک کھڑا ہوا اور انتہائی سنجیدگی سے کہنے لگا کہ اگر ہماری پیاری ملکہ اس قدر مشکل میں آگئی ہے کہ اسے لک قبیلہ کی مدد کی ضرورت پڑ گئی ہے تو پھر میرا مخلصانہ مشورہ ہے کہ ملکہ فوراً ہٹلر سے صلح کر ے۔ امید یہی کی جاتی ہے کہ اسد عمر اقتصادی حالات سے نکلنے کے لئے لک فارمولا کی بجائے کوئی نیا راستہ نکالیں گے تاکہ اس ملک کے مجبور اور مقہور عوام کے دلدّر دور ہوں اور وہ تبدیلی آنے کے بعد تو معاشی آسانیاں دیکھ سکیں۔

اسد عمر پر بوجھ ہی بوجھ ہیں، گردشی قرضوں اور لوڈشیڈنگ کا چولی دامن کا ساتھ ہے۔ اگر گردشی قرضے ادا نہ ہوئے تو لوڈشیڈنگ آٹھ گھنٹے فی دن تک پہنچ جائے گی۔ عوام خان کچھ ماہ تو صبر کرے گا مگر پھر عوام خان کی بیوی ہر روز اس کو طعنے دے گی، ہا ہا کار مچے گی۔ امید کرنی چاہئے کہ وزیر خزانہ چھ ماہ کے اندر اس معاملے کا ایسا حل نکال لیں گے جس سے لوڈشیڈنگ دو گھنٹے فی دن سے زیادہ نہ ہو۔

کہنے کو تو بہت دلائل دیئے جا سکتے ہیں لیکن سیدھی سادی بات یہ ہے کہ عوام خان کے لئے آسانیاں پیدا نہ ہوئیں اور عسکری خان نے معاشی مشکلات کو بڑھتے دیکھا تو یقین جان لیجئے حکومت کے پائوں اکھڑ جائیں گے۔ عوام خان نے توقعات اس قدر باندھ لی ہیں کہ سب کو پورا کرنا تو ناممکن ہو گا۔ ہاں 6ماہ میں وہ سمت تو دکھائی دینی چاہئے جس سے عوام خان اور عسکری خان کو یقین ہو جائے کہ کم از کم سمت تو درست ہے۔

اسد عمر پر یہ بھی بوجھ ہے کہ اس نے لڑکھڑاتی ہوئی پی آئی اے، ڈوبتی ہوئی سٹیل ملز اور دیگر سرکاری کارپوریشنز کا کچھ فیصلہ کرنا ہے۔ ان کی نجکاری کرنی ہے یا ان کی بہتری کے لئے کوئی اور لائحہ عمل طے کرنا ہے؟ عمران خان نے مجھے ایک ٹی وی انٹرویو میں بتایا تھا کہ ان کے ذہن میں دو سو کے قریب سمندر پار پاکستانی ہیں جو آ کر پاکستان کے اداروں کو بہتر کر دیں گے اسد عمر کو چاہئے کہ عمران خان سے وہ فہرست جلد از جلد لے کر نقصان میں چلنے والے تمام ادارے ان ماہرین کے سپرد کریں۔ ابھی تک تو اس فہرست میں سے صرف ایک نام انیل مسرت سامنے آیا ہے جو 50لاکھ گھر بنانے کے منصوبے کے ساتھ پاکستان پہنچ گئے ہیں۔ اس حوالے سے ہونے والی میٹنگز میں بھی وہ شامل ہو رہے ہیں۔ امید کی جانی چاہئے کہ وہ اپنی پروفیشنل مہارت کی بناء پر پاکستان میں جہاں تعمیر و ترقی کا معیار بلند کریں گے وہاں لوئر مڈل کلاس کی ضرورت کا خیال رکھتے ہوئے سستی ہائوسنگ کے منصوبے بنائیں گے۔ بیرون ملک آباد باقی 199افراد کو بھی فوراً بلایا جائے تاکہ وہ اسد عمر کے ممد و معاون بن کر ملکی ترقی میں اپنا حصہ ڈال سکیں۔ چھ ماہ گزر گئے تو عوامی دبائو بڑھ جائے گا ہنی مون پیریڈ ختم ہو جائے گا اس میں ان 199پروفیشنلز (اگر وہ واقعی ہیں؟) کا کام کرنا اور ملک کو سیدھے راستے پر لانا اور مشکل ہو جائے گا۔ اس لئے انہیں جلدی سے بلائیں اور پاکستان کے مسئلے حل کرائیں۔ اسد عمر کارپوریٹ دنیا کے ستارے رہے ہیں، ایک بڑی پرائیویٹ کمپنی کے سربراہ رہے ہیں، پڑھی لکھی یوتھ انہیں رول ماڈل سمجھتی رہی ہے، وہ ہر ماہ کہیں نہ کہیں Motivationalلیکچر دیتے ہیں۔ توقع کی جاتی ہے کہ وہ اپنا عمر بھر کا تجربہ، مطالعہ اور تحقیق کو کام میں لاتے ہوئے جلد از جلد معاشی مسائل کے حل کی طرف قدم بڑھائیں گے۔ اسحاق ڈار اور شاہد خاقان عباسی پر معیشت خراب کرنے اور ایل این جی کی مہنگے داموں خرید کے حوالے سے بہت کچھ کہا گیا تھا اسد عمر کو اس حوالے سے بھی وضاحت کرنی ہو گی کہ کیا سچ اور کیا جھوٹ تھا۔ اگر الزامات سچے تھے تو پھر ان کے خلاف مقدمات درج ہونے چاہئیں اور اگر معاملہ صرف سیاسی تھا تو چاہے بالواسطہ ہی سہی وضاحت کر دیں تاکہ کم از کم ریکارڈ تو صحیح ہو جائے۔

مجھے پھر سے کہنے دیجئے کہ سارے کا سارا بوجھ اسد عمر پر ہے اور وہ تاحال معاشی بحران کے حل کے حوالے سے پراسرار طور پر خاموش ہیں۔ اسحاق ڈار کی سب سے بڑی غلطی یہ تھی کہ انہوں نے سارے ملک کو اپنے سر پر اٹھا لیا تھا، ہر کمیٹی کے سربراہ وہ تھے، سیاسی معاملات میں بھی پیش پیش اور اقتصادی معاملات میں بھی سب سے آگے۔ نتیجہ یہ نکلا کہ ان کے پاس کسی بھی کام کے لئے وقت نہ بچا۔ اسد عمر کو چاہئے کہ سب کچھ چھوڑ چھاڑ کر صرف اور صرف معیشت پر توجہ دیں۔ معیشت درست ہو گئی تو اسد عمر کا بول بالا ہو گا اور عمران بھی سربلند ہو گا اور اگر معیشت نہ چلی تو پھر واہ واہ نہیں ٹھاہ ٹھاہ ہو گی۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

ایمرا نیوز
کبھی کبھار کچھ سروے ہمیں بتاتے ہیں کہ خوش رہنے میں پہلے، دوسرے، تیسرے، چوتھے، پانچویں نمبر وغیرہ پر کون سی قوم ہے۔ اس قسم کے کسی سروے میں میں نے پاکستانیوں کو کبھی 15ویں، 20ویں نمبر پر بھی نہیں دیکھا جس کی ایک وجہ تو شاید وہ صورتحال ہو جو اس شعر میں دکھائی دیتی ہے۔وقت خوش خوش کاٹنے کا مشورہ دیتے ہوئےروپڑا وہ آپ، مجھ کو حوصلہ دیتے ہوئےخوشی کی بھی شاید سنو بالنگ یا چین ری ایکشن ہوتا ہے، لاکھ کہتے ہیں کہ خوشی ایک’’کیفیت‘‘ یا’’مائند سیٹ‘‘ ہے تو سب خلا میں تو جنم نہیں لیتے۔ مخصوص حالات، وجوہات اور عوامل ہی مخصوص کیفیات اور مائنڈ سیٹ کو جنم دیتے ہیں۔ خوشی کا بےپناہ انحصار اس بات پر بھی ہے کہ آپ کس قسم کے ماحول اور معاشرہ میں ز ندہ ہیں اور جن کے درمیان زندہ ہیں وہ کس قسم کی زندگیاں گزار رہے ہیں۔ وہ جو کہتے ہیں ناں کہ مسکراہٹ چھوت کے مرض کی مانند ہوتی ہے تو شاید ٹھیک ہی کہتے ہیں کیونکہ عموماً یہ ممکن نہیں ہوتا کہ آپ کسی کو دیکھ کر مسکرائیں اور مسکراہٹ کا جواب مسکراہٹ سے نہ آئے۔خوشی کو کئی انداز میں بیان کیا گیا ہے۔ دنیا کی شاید ہی کوئی زبان ہو جس میں خوشی کوDefineکرنے کی کوشش نہ کی گئی ہو مثلاً ہسپانوی کہتے ہیں’’خوشی اس چیز کا نام ہے کہ تم ہو کون اور تمہارے پاس ہے کیا‘‘پنجابی میں خوشی کی قدر و قیمت یوں
بیان کی جاتی ہے’’جے توں خش نئیں تے تیرے پلے کش نئیں‘‘یعنی اگر انسان کے پاس سب کچھ ہو لیکن خوشی نہ ہو تو وہ سب کچھ بیکار ہےاطالوی کہتے ہیں’’خوشی منزل نہیں منزل تک پہنچنے کے راستے پر چلنے کے طریقہ کار کا نام ہے‘‘اک فارسی مصرعہ کا ترجمہ ہے’’خوش رہنے کے لئے ضروری ہے کہ کیچڑ کی بجائے کہکشاں پر نظر رکھو‘‘صوفیا کہتے ہیں کہ’’خوشی کو یقینی اور دائمی بنانا چاہتے ہو تو اپنے آپ کو کسی عظیم تر مقصد کے لئے وقف کردو۔جتنا عظیم مقصد ہوگا اتنی ہی عظیم خوشی نصیب ہوگی‘‘قدیم ریڈ انڈینز کہا کرتے تھے’’خوشی ان پھولوں کا نام ہے جو تمہاری پہنچ میں ہوں‘‘Benjamin Franklinنے کہا تھا”The US costitution does not guarantee happinessʼ only the PURSUIT of it. You have to catch up to it yourself”کسی فرانسیسی دانشور کا قول ہے’’وائلن بجانے کی مشق کے دوران کے احساسات کا دوسرا نام خوشی ہے‘‘نام بھول رہا ہوں لیکن کسی بڑے آدمی کا کیا غضب کا جملہ ہے کہ’’خوشی اس بےپناہ لگاتار مصروفیت کا نام ہے جس کے دوران آپ کا دھیان ہی اس طرف نہ جائے کہ آپ خوش ہیں یا غمگین‘‘کچھ کے نزدیک خوشی پکتی ہوئی روٹی کا نام ہے۔ یہاں ایک اور محاورہ یاد آیا کہ’’روٹی کی پٹ پٹ بہرا بھی سن لیتا ہے‘‘پرتگالی کہتے ہیں’’خوشی دو قسم کی ہوتی ہے، اول مہمان کے تشریف لانے کی اور دوم مہمان کے تشریف لے جانے کی‘‘Charles Wileyکا مشورہ ہے’’دن میں ایک انسان کا دل خوش کردو تو یقین مانو 40سال کی عمر تک تم14000خوشیوں کا خزانہ پالو گے‘‘’’کوئی اچھا کرے تو دل کھول کر اس کی اچھائی کرو کہ اس طرح ایک ہی وقت میں تم دو لوگوں کو خوش کرلو گے‘‘’’کل کی فکر کل کے مسئلہ کا حل نہیں لیکن تمہارا آج ضرور ناخوش گزرے گا‘‘’’خوشی اک بہت چھوٹی سی چیز ہے جس کے پہلو میں بہت بڑی ردی کی ٹوکری پڑی ہوتی ہے‘‘اور تقریباً آخر پر”Happiness is the inner joy that can be sought and caught but never taught or bought”.ایک بات جو کبھی نہ بھولنے والی ہے کہ جس شے کو”Inner joy”کہا گیا ہے، ان لوگوں کو کبھی نصیب نہیں ہوتی جو حسد یا غیبت جیسے موذی امراض میں مبتلا ہوتے ہیں۔
(بشکریہ جنگ لاہور)

پاکستان میں شاید ہی کوئی اور دھندہ اتنی تیزی سے پھلا پھولا ہو جتنا پیری فقیری، مساجد، مزارات کی تعمیر کے لئے چندہ اکٹھا کرنے کا دھند۔ جی ہاں بھلے وقتوں میں جسے کوئی کام دھندہ کرنا عذاب لگتا تھا وہ کچھ دن کسی پیر صاحب کے پاس مرید بن کر گذارتا، کچھ جنتر منتر ، کچھ دم درود کے ٹوٹکے سیکھتا اور پھر کسی دن چپکے سے ان سے خلافت کی دستار بندھوا کے تصویر کھنچواتا اور سکی نئی جگہ پہ پہنچ کر اپنا ڈیرہ جماتا، اس تصویر کو نمایاں جگہ پر ٹانگ کے اپنے مرشد کے نام پر ان پڑھ، گنوار لوگوں کو الو بنا کے بیعت لیتا، مرشد کے مزار کے لئے چندے کے صندوقچی پر سبز چادر ڈال کے مریدین کے علاہ آتے جاتے راہگیروں سے بھی اس میں چندہ ڈالنے کے لئے کہا جاتا۔ڈیرے کی پہلی جمعرات ہی دھندے کے چمکنے کا فیصلہ کر دیتی کہ اس کے بعد کسی کو کچھ کہنے کی ضرورت نہیں پڑتی تھی کہ لوگ از خود اپنے لئے دعا کروانے آتے اور پیر صاحب کو نذر نیاز دے کر چندے کی صندوقچی میں بھی حسب توفیق کچھ نہ کچھ ڈال جاتے تھے۔
پاکستان کے پہلے فوجی آمر جنرل ایوب خاں کی ضعیف الاعتقادی نے مزارات اور خانقاہوں کے اس دھندے کو یوں سرکاری سرپرستی میں لیا کہ باقاعدہ محکمہ اوقاف بنا کے مزارات اور مساجد کو حکومتی تحویل میں لے کر اپنی حکومت کی جائز آمدنی میں اضافہ کر لیا اور اس کے ساتھ ساتھ علماءو مشائخ کے ساتھ تعلقات، جو ابتدا میں بگڑ رہے تھے انہیں سرکاری مراعات اور پرکشش مشاہرے و دیگر ترغیبات سے رام کر لیا گیا یوں نہ صرف سرکاری افسران کی کھپت کے لئے زبردست جگہ میسر آ گئی بلکہ مذہبی طبقے کے ساتھ قربت بڑھنے سے ایک آمر کو دس سال سے زیادہ عرصہ تک حکومت کرنے کا موقع مل گیا جس نے بعد میں آنے والے جاہ پرست جرنیلوں کے لئے اقتدار پر قبضے ایسی راہ ہموار کی کہ یہ ملک اپنے وجود میں آنے کے بعد سے 35برس تک براہ راست جرنیلوں کے قبضے میں رہا اور آج بالواسطہ بھی انہی کے زیر دست ہے۔ بے شک کہنے کو ملک میں جمہوریت ہے مگر اس کے ضامن کون ہیں؟ کبھی اسلم بیگ جمہوری نظام کے ضامن بنے اور تمغہ جمہوریت لے اڑے مگر جمہوریت مشرق کی دست برد سے نہ بچ سکی۔ جنرل کیانی نے مشرف کے خلاف عوامی نفرت کا رخ دیکھ کر دانشمندانہ فیصلہ کیا اور فوج کو کچھ عرصے کے لئے سیاسی کی آلائش سے پاک رکھا کہ اگر وہ ایسا نہ کرتے تو جس طرح مشرف کی نفرت میں باوردی فوجی اہلکاروں کی سر عام پٹائی شروع ہو گئی تھی جس پر مشرف رجیم کو باقاعدہ طور پر نوٹیفیکیشن جاری کرنا پڑا کہ فوجی افسران خصوصاً پبلک مقامات پر وردی میں نہ جایا کریں، اس قسم کا ماحول ملکی سلامتی کے لئے نہایت مہلک ہو سکتا تھا اگر جنرل کیانی اس وقت مشرف کو نکالنے کی جمہوری حکومت کی کوشش کا ساتھ نہ دیتے۔ یہ جمہوری حکومت کا ہی کارنامہ تھا کہ جس نے رفتہ رفتہ اپنی فوج کا کھویا ہوا وقار بحال کرایا اور عوام کی نظروں میں اس کی ساکھ بنانے کے لئے جنرل کیانی کو عہدے میں توسیع دی یہ الگ بات کہ ان کو ملنے والی توسیع کو نظیر بنا کر ان کے بعد والے جرنیل نے بھی نواز شریف سے اس قسم کی امید لگا لی جو بوجوہ پوری نہ ہونے پر جمہوری حکومت کے ساتھ مسلسل اٹ کھڑکا لگائے رکھا یہاں تک کہ انہیں اقتدار سے محروم کرا کے ہی دم لیا۔
آج نواز شریف جمہوری اصولوں کی پاسداری کی پاداش میں جیل میں بیٹھے ہیں جبکہ ان کے حریف جمہوریت کے اس تسلسل کا ثمر سمیٹ رہے ہیں جسے مضبوط کرنے کے لئے نواز شریف نے جنگ لڑی اور ابھی تک اسی جدوجہد میں مصروف ہیں جبکہ ان کے بدترین مخالفین ان قوتوں سے جمہوریت کے تسلسل کی ضمانت لے رہے ہیں جنہوں نے بڑی ہوشیاری کے ساتھ پارلیمان کو اپنی کٹھ پتلیوں کے ذریعے یرغمال بنایا ہوا ہے۔ ان کٹھ پتلیوں کو جنہوں نے چندہ جمع کرنے کے ہنر کو آزما کر دنیا سے اربوں روپے اینٹھ کر عالمی جواءمنڈی میں ہار دیئے تھے ایک بار پھر چندہ مہم پر لگا دیا ہے۔ آج یہ چندہ ہسپتال نہیں ڈیم کے لئے مانگا جا رہا ہے۔ جبکہ چھوٹے چھوٹے ڈیم بنا کر کے پی کے کو بجلی میں خود کفیل بنانے کے وعدے ادھورے چھوڑ کر صوبے کو اللہ کے حوالے کر رکھا ہے۔ دوسری طرف نواز شریف دور کے بجلی کے منصوبوں سے پیدا وار بند کروا کے قوم کو دھوکا دیا جا رہا ہے کہ پچھلی حکومت نے کچھ نہیں کیا تھا اگر واقعی نواز حکومت نے توانائی منصوبے مکمل نہیں کئے تھے تو عمران خان کی حکومت بننے کے بعد بھی کیوں بجلی کی لوڈشیڈنگ نہیں ہو رہی تھی ابھی کیوں یہ عذاب مسلط ہوا ہے اورکس نے کیا ہے؟ چندہ خوری کے عادی کچھ اس بارے میں بتانا پسند کریں گے؟
آج ہی کسی نے کیا خوب لطیفہ وٹس ایپ کیا ہے آپ بھی محظوظ ہوں:
عمران نیازی …….. امی جان کہتی تھیں ……..
کوئی دھندہ چھوٹا نہیں ہوتا ….
اور چندے سے بڑا کوئی دھندہ نہیں ہوتا ……..

(میڈیا 92نیوز)
سیاسی صورتحال کے حوالے سے لکھنے کے لئے بہت سے موضوعات منتظر ہیں لیکن میں اپنے’’خود پروردہ‘‘ شوق کے ہاتھوں مجبور ہوکر گیارہ ستمبر کے حوالے سے کالم لکھ رہا ہوں۔ گیارہ ستمبر قائد اعظم محمد علی جناح کا یوم وفات ہے۔ بدقسمتی سے قائد اعظم کی زندگی کے آخری ایام کے بارے میں بہت سی سازش نما کہانیاں مشہور کردی گئی ہیں جنہیں میں زمانہ طالبعلمی سے سنتا رہا ہوں۔ سیدھے سادے واقعات کے خاکے میں رنگ بھر کر اسے رنگین بنا دینا ایک پاپولر فن(Popular)ہے کیونکہ ہمارے قومی مزاج کو رنگین داستانیں نہایت’’مرغوب‘‘ ہیں۔ ایک اور قباحت یہ ہے کہ ہمارے اکثر لکھاریوں نے قائد اعظم کی سینکڑوں صفحات پر محیط تقاریر اور ان پر لکھی گئی تحقیقی کتابیں پڑھنے کی زحمت نہیں کی لیکن ذہن میں ایک سطحی خاکہ بنالیا ہے، چنانچہ جب کوئی حقیقت ان کے خاکے کے خدوخال سے ٹکراتی ہے تو وہ بلا تحقیق اسے رد کردیتے ہیں۔ علمی دنیا کا ایک اصول ہے کہ اگر آپ کو کسی دلیل یا حوالے پر شک ہے تو اسے تحقیق سے غلط ثابت کریں نہ کہ طعنوں اور طنزوں پہ اتر آئیں۔

قائد اعظم شدید علالت کے سبب کوئٹہ میں تھے لیکن ساتھ ہی ساتھ سرکاری فائلیں بھی نپٹا رہے تھے اور کبھی کبھار ملاقاتیں بھی کرلیتے تھے۔ ڈاکٹر ریاض علی شاہ قائد اعظم کے معالجین میں شامل تھے۔ ڈاکٹر ریاض علی شاہ نے اپنے مضمون ’’قائد اعظم کے آخری ایام‘‘ میں لکھا ہے(ماہِ نو کراچی1948)کہ میں جب 17جولائی 1948 کو قائد اعظم کے کمرے میں داخل ہوا تو وہ مسہری پر دراز تھے، جسم نحیف ہوچکا تھا لیکن چہرہ باوقار اور پرجلال، آنکھوں میں بلا کی چمک اور ہونٹوں پہ ہلکی سی مسکراہٹ تھی۔ کوئٹہ کی آب و ہوا میں ان کی صحت بہتر ہونے لگی تھی۔ ایک دن ہنستے ہنستے باتوں میں کرنل الٰہی بخش نے کہا کہ ہم دونوں کی انتہائی کوشش ہے کہ آپ کی صحت اتنی اچھی ہوجائے جتنی آج سے سات آٹھ برس قبل تھی۔ قائد اعظم مسکرائے اور فرمانے لگے’’چند سال قبل یہ یقیناً میری بھی آرزو تھی کہ میں زندہ رہوں۔ میں اس لئے زندگی کا طالب نہیں تھا کہ مجھے دنیا کی تمنا تھی اور میں موت سے خوفزدہ تھا بلکہ اس لئے زندہ رہنا چاہتا تھا کہ قوم نے جو کام میرے سپرد کیا ہے اور قدرت نے جس کے لئے مجھے مقرر کیا ہے میں اسے پایہ تکمیل تک پہنچا سکوں۔ وہ کام پورا ہوگیا ہے میں اپنا فرض ادا کرچکا ہوں، پاکستان بن گیا ہے اس کی بنیادیں مضبوط ہیں۔ اب چندماہ سے مجھے ایسے خیالات آتے رہتے ہیں کہ میں اپنا فرض ادا کرچکا ہوں اب قوم کا کام ہے کہ وہ اس کی تعمیر کرے، اسے ناقابل تسخیر اور ترقی یافتہ ملک بنادے حکومت کا نظم و نسق دیانتداری اور محنت سے چلائے۔ میں طویل سفر کے بعد تھک گیا ہوں۔ آٹھ سال تک مجھے قوم کے اعتماد و تعاون کے ساتھ تنہا عیار اور مضبوط دشمنوں سے لڑنا پڑا ہے۔ میں نے خدا کے بھروسے پر ان تھک محنت کی ہے، اپنے خون کا آخری قطرہ تک حصول پاکستان کے لئے صرف کردیا ہے۔ میں تھک گیا ہوں، آرام چاہتا ہوں اور اب مجھے زندگی سے زیادہ دلچسپی نہیں۔‘‘

قائد اعظم زندگی بھر قوم کو بیدار اور منظم کرنے اور حصول منزل کے لئے اس قدر مصروف رہے کہ انہیں کبھی اپنے باطن اور اندرونی احساسات کو بےنقاب کرنے کا موقع ہی نہ ملا۔ ان کی ساری تقاریر اپنی نوعیت کے اعتبار سے سیاسی، تاریخی اور قومی مسائل کے رنگ میں ڈوبی ہوئی ہیں، اگر آپ اوپر دئیے گئے قائد اعظم کے الفاظ کو بغور پڑھیں تو آپ کو ان میں باطنی سچائی، رضائے الٰہی کی تمنا دنیاوی زندگی کے بجائے زندگی برائے مقصد، قوم سے بےپناہ پرخلوص محبت، قدرت کی جانب سے ودیعت کردہ فرض کی انجام دہی، موت سے بے خوفی اور امانت و دیانت کی خوشبو آئے گی۔ میرے مطالعے کی روشنی میں اللہ پاک، اللہ سبحانہ و تعالیٰ نے مومن کے لئے ایسی ہی صفات کا ذکر کیا ہے اور علامہ اقبال نے اسے اللہ کی برہان قرار دیا ہے۔ میں عرض کررہا تھا کہ قائد اعظم کی سوچ قانون، ضابطے، آئین اور امانت و دیانت کے سانچے میں ڈھلی ہوئی تھی اس لئے ان کی تقاریر پڑھتے ہوئے یہ احساس ہوتا ہے کہ وہ عزم و استقامت کا اعلیٰ ترین ماڈل تھے اور شاید ہی کبھی جذبات سے مغلوب ہوئے ہوں۔ اسی منطقی انداز فکر کا نتیجہ تھا کہ ہندوستان کے آخری وائسرائے لارڈ مائونٹ بیٹن نے انہیں سرد مہری کا طعنہ دیا۔ اس سے قبل صرف ایک بار انہوں نے اپنی قلبی کیفیت اور باطنی سوچ کا اظہار کیا اور اپنا دل کھول کر مسلم لیگ کونسل کے اراکین کے سامنے رکھ دیا ورنہ انہوں نے ہمیشہ اپنی ذات کو الگ رکھا اور قومی مسائل کو حرز جان بنائے رکھا۔ ان کی بے غرض شخصیت کسی انعام یا صلے سے بلند و بالا تھی۔ میں نے بعض لکھاریوں اور دانشوروں کو اس تقریر کے حوالے سے کنفیوژن کا شکار دیکھا ہے اس لئے اخبار سے ان کے صحیح الفاظ نقل کررہا ہوں تاکہ آپ کو اندازہ ہو کہ بظاہر ایک ماڈرن، فیشن ایبل اور رئیسانہ ٹھاٹھ باٹھ کی شہرت رکھنے والا محمد علی جناح اندر اور باطن سے کیا تھا اور کون سا جذبہ ان کی شخصیت کا محور تھا۔

کئی سو افراد پر مشتمل آل انڈیا مسلم لیگ کونسل انتہائی اہم ادارے کی حیثیت رکھتی تھی۔ اس میں ہندوستان بھر کے چیدہ چیدہ مسلمان سیاسی رہنما شامل تھے اور پارلیمنٹ کی مانند کونسل سے سارے فیصلوں کی منظوری لی جاتی تھی۔ قائد اعظم کونسل کے اجلاسوں کی صدارت بھی کرتے تھے اور سالانہ کارکردگی کے علاوہ اہم قومی مسائل پر بھی کھل کر اظہار کرتے تھے۔ اکتوبر1938کا آل انڈیا کونسل کا اجلاس وہ واحد موقع تھا جہاں قائد اعظم نے اپنی تقریر میں اپنی باطنی کیفیت کو بے نقاب کیا۔ روزنامہ انقلاب مورخہ 22اکتوبر 1938کے مطابق قائد اعظم نے خطاب کرتے ہوئے فرمایا ’’مسلمانو! میں نے دنیا میں بہت کچھ دیکھا، دولت، شہرت اور عیش و عشرت کے بہت لطف اٹھائے، اب میری زندگی کی و احد تمنا یہ ہے کہ مسلمانوں کو آزاد و سربلند دیکھوں۔ میں چاہتا ہوں کہ جب مروں تو یہ یقین اور اطمینان لے کر مروں کہ میرا ضمیر اور میرا خدا گواہی دے رہا ہو کہ جناح نے اسلام سے خیانت اور غداری نہیں کی اور مسلمانوں کی آزادی، تنظیم اور مدافعت میں اپنا فرض ادا کردیا۔ میں آپ سے اس کی داد اور صلہ کا طلبگار نہیں ہوں۔ میں یہ چاہتا ہوں کہ مرتے دم میرا دل، میرا ایمان اور میرا اپنا ضمیر گواہی دے کہ جناح تم نے واقعی مدافعت اسلام کا حق ادا کردیا۔جناح تم مسلمانوں کی تنظیم اتحاد اور حمایت کا فرض بجا لائے۔ میرا خدا یہ کہے کہ بےشک تم مسلمان پیدا ہوئے اور کفر کی طاقتوں کے غلبہ میں اسلام کے علم کو بلند رکھتے ہوئے مسلمان مرے۔‘‘ ہر جدوجہد، تحریک اورعظیم نصب العین کے پس پردہ کچھ محرکات و مقاصد ہوتے ہیں۔ صحت اور آرام کی پروا کئے بغیر قائداعظم کی مسلسل جدوجہد، یقین محکم اور حصول منزل کے جذبے کے پیچھے کیا محرکات تھے؟ مسلمانوں کی آزادی و سربلندی، رضائے الٰہی کہ میرا رب راضی ہو، مدافعت اسلام اور کفر کے خلاف اسلام کا جھنڈا بلند رکھنا، اور بحیثیت مسلمان موت!!یہ تھے وہ محرکات و مقاصد جن کے لئے قائد اعظم نے اپنا سب کچھ حتیٰ کہ زندگی اور زندگی بھر کی کمائی قوم پر نچھاور کردی۔ اس فرض کو نہایت ایمانداری اور خلوص سے سرانجام دینے کا نتیجہ تھا کہ موت سے دو ماہ قبل انہوں نے ڈاکٹر ریاض علی شاہ سے گفتگو کرتے ہوئے کہا کہ نہ دنیامیری تمنا تھی نہ میں موت سے خوفزدہ ۔ جو مشن قدرت اور قوم نے میرے سپرد کیا وہ میں نے پایہ تکمیل تک پہنچادیا۔ گویا اب ان کا ضمیر مطمئن تھا اور انہیں رحمت خداوندی کا پورا یقین تھا۔ موت سے پہلے یہ اطمینان، یقین اور قلبی مسرت قرب الٰہی کی علامت ہوتی ہے۔ قرآن مجید نے اسے نفس مطمئنہ کہا ہے۔ یہ میرے رب کا سب سے بڑا انعام ہوتا ہے۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

(میڈیا 92نیوز)
دوہفتے قبل ’’میر ےمطابق‘‘ کی ٹیم کے ساتھ میٹنگ کے دوران ڈیم فنڈ میں عطیہ پر بات ہوئی تو میں کچھ کہتے کہتے رک گیا اور موضوع تبدیل کردیا۔ گزشتہ اتوار مورخہ 9ستمبر میں نے ’’میرے مطابق‘‘ میں اس فنڈ کے حوالے سے چند جملے بولے اورریکارڈنگ کے بعد گھر پہنچ کر اپنے بیسمنٹ تک محدود ہوگیا کہ یہی میرا معمول ہے کہ میں گھرکے اندر ایک گھر میں رہتا ہوں۔ 6:30تا 7:00بجے روٹین کے مطابق پروگرام ٹیلی کاسٹ ہوا تومیں کمر سیدھی کرنے لیٹا ہوا تھا کہ بچے خلاف معمول نیچے آئے اور یہ جان کر کہ میں آرام کر رہاہوں، واپس چلےگئے۔ 8:30بجے میں سٹڈی میں آیا توبتایا گیا کہ بچے آئے تھے اور یہ کہہ گئے ہیں کہ جب بابا اٹھیں ہمیں بتا دینا۔میں نے بلوا بھیجا تو تینوں باجماعت آئے اور میرے سامنے بیٹھ کر چپ چاپ ایک دوسرے کی شکلیں دیکھنے لگے۔ میری اکلوتی بیٹی محمدہ ماس کمیونی کیشن میں آنرز کی طالبہ ہے۔ دونوں بیٹے حاتم اورہاشم سکول کے مراحل میں ہیں۔ تینوںبہن بھائیوں کی یہ کنفیوژڈ سی خاموشی میرے لئے نئی اور ناقابل فہم تھی کیونکہ ہمارے درمیان مودب دوستی کا فرینک سارشتہ ہے….. کوئی اباگیری نہیں۔کچھ دیر بعد مجھے ہی پوچھنا پڑا کہ ’’کیوں بھائی! اتنا بے وقت اتنا ہائی پاورڈ وفد کس چکر میں؟‘‘ دونوں بھائیوں نے بہن کو دیکھا، مسکرائے جو مسکراہٹ سے زیادہ خاموش پیغام سا تھا۔ محمدہ بیٹی نے تمہید باندھی۔’’بابا!ہم نے ابھی آپ کا پروگرام دیکھا۔ آپ نے ڈیم فنڈ کے حوالے سےبہت اچھی باتیں کی ہیں‘‘’’تھینک یو بیٹا‘‘’’ایک سوال ہے‘‘ ’’پوچھیں‘‘’’کیا یہ ساری اچھی باتیں صرف لوگوں کے لئے تھیں؟‘‘’’مطلب؟‘‘’’کیاہم نے خود کچھ نہیں کرنا؟‘‘’’سو بارکرو بیٹا! کس نے روکا ہے؟‘’’ہم اپنی سیونگز میں سے عطیہ کرنا چاہتے ہیں۔ میں لاکھ روپیہ ڈونیٹ کروں گی۔ حاتم 50ہزار اورہاشم 30ہزار۔‘‘ محمدہ نے جواب دیا تو میری کیفیت بیان سے باہر تھی لیکن مکمل ضبط کے ساتھ میں نے پوچھا کہ ’’ہاشم 30ہزار کیوں؟‘‘ تو انکشاف ہوا کہ ہاشم کے پاس ہیں ہی 30ہزار۔ میں نے کہا ’’اگر میں ہاشم کو 20ہزار ’’ادھار‘‘ دے دوں توکیاوہ بڑاہوکر یہ رقم مجھے واپس کردے گا؟‘‘ ہاشم جو سب سے چھوٹا ہے، چمک کر بولا ’’نہیں….. آپ ہر ماہ 500 روپیہ منتھلی میری پاکٹ منی سے کاٹ لینا۔‘‘اب ذرا پیچھے چلتے ہیں۔ دوہفتے پہلے جب ’’میرے مطابق‘‘ کی ٹیم فاروق، امان اور شجیہ سے اس موضوع پر گفتگو کے دوران میں نے گفتگو گول کردی تھی تو دراصل اک خیال نے میرے ذہن وزبان پر تالے لگا دیئے تھے۔ خیال یا خواہش یہ تھی کہ میری بجائے میرے گھر کے اندر سے یہ آوازآنی چاہئے۔ میں جاننا چاہتا تھا کہ میرے بچوںپر میرے دھیمے دھیرے بھاشنوں کاکوئی اثر ہوا ہے یا نہیں کیونکہ جب بچے شروع شروع بیرون ملک گئے تو ہر بار واپسی پر پاکستان انہیں کچھ دن عجیب عجیب، اوپرااوپرا لگتا تھا۔ خاص طور پر میرے بڑے بیٹے حاتم کو جو ذرا ریزرو اور صاحب ٹائپ ٹین ایجرہے۔ اس بار دو ماہ بعد امریکہ سے واپسی پر وہ بالکل بدلا ہوا تھا۔ میں نے دو ماہ کی چھٹیوں کا حال پوچھا توبولا ’’بابا! ونڈرفل لیکن پاکستان پاکستان ہی ہے،اپنے وطن جیسا کوئی نہیں۔‘‘ میں بہت خوش تھا کہ میری بہت ہی دھیمی دھیری لیکچرنگ ضائع نہیں گئی۔ اسی لئے امید تھی کہ ڈیم فنڈمیںشمولیت کی آوازاندر سےآئے گی…… الحمد للہ ایسا ہی ہوا۔ایسا ہی ہوتا۔65ء کی جنگ میں کوئی ’’ٹیڈی پیسہ ٹینک‘‘ ٹائپ مہم چلی۔ میں روز پاکٹ منی اس میں ڈال دیتا۔ والد صاحب کو علم ہوا تو پاکٹ منی دوگنا کرتے ہوئے کہا ’’ٹینک کے ساتھ کچھ اوربھی لے لیاکرو‘‘ تب برگر نہیں بھٹورے اور جہانگیر مرغ پلائو ہوتا تھا جس میں مرغ بھی دیسی ہوتا کہ ابھی پولٹری عام نہ ہوئی تھی۔اس سے بھی بڑھ کر بچپن میں ایک فلم دیکھی ’’بیداری‘‘ جس کے ہیرو تب بھی میرے فیورٹ سنتوش کمارتھے۔ اس فلم کےگیت اس وقت بھی میرے کانوں میں گونج رہے ہیں مثلاً ؎’’آئو بچو سیر کرائیں تم کو پاکستان کی جس کی خاطر ہم نے دی قربانی لاکھوں جان کی‘‘اور اس سے بھی بڑھ کر یہ لازوال نغمہ؎ہم لائے ہیں طوفان سے کشتی نکال کےاس ملک کو رکھنا میرے بچو، سنبھال کے
(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

لاہور(ایمرا نیوز)

ڈاکٹر عارف علوی کے صدر مملکت کا عہدہ سنبھالنے کے بعد ملک میں جمہوری طرز پر انتقال اقتدار کا عمل کامیابی سے پایہ تکمیل کو پہنچ چکا ہے ، صدر، وزیر اعظم ، اسپیکر ،ڈپٹی اسپیکر کے عہدوں سمیت مرکز ، پنجاب اور سندھ میں پاکستان تحریک انصاف جبکہ بلوچستان میں مخلوط حکومت کے حصول کے بعد راوی چین ہی چین لکھ رہا ہے۔ پاکستان پیپلز پارٹی کی طرف سے مکمل تعاون کے بعد اس چین میں اگر خلل پیدا ہوگا تو وہ اپوزیشن کے ہاتھوں نہیں بلکہ تحریک انصاف کی حکومت کی اپنی غلطیوں کی وجہ سے کیونکہ پہلے تین ہفتوں میں بد انتظامی اور نا تجربہ کاری کے جوثبوت پیش کئے گئے ہیں ان سے تو یہی ظاہر ہو رہا ہے۔ وزیر اعظم پاکستان عمران خان نے چونکہ میڈیا سے تین ماہ کی مہلت طلب کی ہے جو کہ ایک جائزبات ہے اسلئے حکومتی کارکردگی پر اس مدت کے پورا ہونے پر ہی سوالات اٹھائیں گے۔ فی الوقت اس ایوان صدر کی بات کرتے ہیں جہاں آصف علی زرداری کے بعد دوسرے جمہوری صدر ممنون حسین پانچ سالہ آئینی مدت پوری کرتے ہوئے باعزت طریقے سے سبکدوش ہو چکے ہیں۔ ایوان صدر کے نئے مکین ڈاکٹر عارف علوی اگرچہ فرما چکے ہیں کہ بطور صدروہ نہ تو آصف زرداری ثابت ہوں گے اور نہ ہی ممنون حسین۔ یقیناً ان کا اشارہ صدر کے کردار کے حوالے سے تھا کیونکہ بطور صدر آصف علی زرداری ایک طاقتور اور فعال صدر مملکت تھے لیکن جناب ممنون حسین درویش صفت اور خاموش طبع صدر مملکت رہے ہیں۔ موجودہ صدر مملکت ڈاکٹر عارف علوی کو یہ نہیں بھولنا چاہئے کہ آصف علی زرداری صرف اس لئے انتہائی متحرک اور با اثر صدرمملکت تھے کیونکہ وہ حکومتی جماعت پاکستان پیپلزپارٹی پارلیمنٹرینز کے شریک چیئرمین تھے۔ پارٹی کے وزیر اعظم ،وفاقی کابینہ کے ارکان کی نامزدگی سے لیکر سیاسی جوڑ توڑ سمیت سب ان کے ہاتھ میں تھا اسلئے تب طاقت کا مرکز ایوان صدر تھا۔ اس دور میں ایوان صدر سیاسی سرگرمیوں کا محور تھا جہاں ہر روز کے ظہرانوں اور عشائیوں پر سجائی جانے والی سیاسی بساط کے باعث ایک موقع پر لاہور ہائی کورٹ نے آصف زرداری کو پارٹی عہدہ چھوڑنے اور ایوان صدر کو سیاست کا گڑھ نہ بنانے کی ہدایات بھی دی تھیں،اس کے برعکس گزشتہ روز آئینی مدت پوری کرکے سبکدوش ہونے والے ممنون حسین کے پانچ سالہ دور میں ایوان صدر غیر اہم اور صدر مملکت کا عہدہ بظاہر نمائشی رہا۔ اپنے پیش رو کی طرح ممنون حسین کے بہت زیادہ متحرک نہ ہونے کے باعث ان کے بارے میں طرح طرح کے لطیفے گردش کرتے رہے۔ اس میں کوئی شک نہیں کہ ممنون حسین اس عہدے پر اس وقت کے پارٹی صدر نواز شریف کی خصوصی شفقت کے باعث پہنچے تھے اور یہی وجہ ہے کہ بعض اوقات پارلیمنٹ کے مشترکہ اجلاس یا کسی دیگر میٹنگ میں وہ اس وقت کے وزیر اعظم نواز شریف کے ہمراہ نظر آئے تو ہمیشہ ان سے دو قدم پیچھے چلنے کی کوشش کرتے رہے۔ بطور صدر مملکت پارٹی کی طرف سے انہیں اہمیت دینے کا یہ عالم تھا کہ سابق وزیر اعظم نواز شریف کی طرف سے موجودہ آرمی چیف کی تقرری کے وقت جب وہ فائل لے کر خود ایوان صدر گئے تو تقررنامے سے متعلق سطروں پر کاغذ رکھ کر صدر مملکت سے دستخط کرائے گئے تاکہ وفاقی حکومت کی طرف سے اس اہم تقرری کا باضابطہ اعلان کرنے تک اسے خفیہ رکھا جا سکے۔ یہ تو مسلم لیگ ن اور صدر مملکت کے درمیان معاملہ تھا جہاں طاقت کا مرکز بلا شبہ مسلم لیگ ن کی قیادت تھی تاہم بطور صدر مملکت ممنون حسین کے قومی منظرنامے میں کوئی اہم کردار ادا نہ کرنے پر طنز کرنے اور نئے صدر مملکت ڈاکٹر عارف علوی سے بہت زیادہ توقعات وابستہ کرنیوالے شاید آئین پاکستان سے ناواقف تھے اور ہیں۔ وہ نہیں جانتے کہ موجودہ آئین پاکستان میں صدر مملکت کا عہدہ اگرچہ سب سے بڑا ہے لیکن اسکے اختیارات نہایت محدود ہیں۔ سابق وزیر اعطم نواز شریف کے دوسرے وزارت عظمی کے دور 1997 ءمیں انہوں نے دو تہائی اکثریت کی مدد سے صدر کے سب سے اہم اختیار یعنی اسمبلیاں تحلیل کرنے کے آرٹیکل 58 ٹو بی کو آئین سے نکال دیا تھا لیکن پرویز مشرف کی آمریت میں نہ صرف اسے دوبارہ آئین کا حصہ بنا دیا گیا بلکہ آئین میں وسیع پیمانے پرترامیم کے ذریعے انہوں نے تمام اختیارات صدر کی ذات میں مرتکز کر دئیے۔ سابق صدر آصف زرداری کی ہدایت پر آئینی اصلاحات کمیٹی کی متفقہ سفارشات پر 18 اپریل 2010 ءمیں پارلیمنٹ کی طرف سے منظور کی گئی متفقہ 18 ویں ترمیم کے ذریعے آمروں کی طرف سے آئین میں شامل کی گئی تمام غیر آئینی ترامیم کو نکال دیا گیا۔ یوں ایک بار پھر نہ صرف صدرمملکت کا اسمبلیاں تحلیل کرنے کا اختیار ختم کر کے اسے وزیر اعظم کی ایڈوائس سے مشروط کر دیا گیا بلکہ مسلح افواج کے سربراہان کی تعیناتی سمیت دیگر اہم اختیارات بھی واپس وزیر اعظم کے حوالے کردئیے گئے اگرچہ صدر بدستورمسلح افواج کا سپریم کمانڈر ہے۔ موجودہ آئین پاکستان میں صدر مملکت کے اہم اختیارات کا جائزہ لیا جائے تو وہ وزیر اعظم اور کابینہ کے مشورے پر عمل کا پابند ہے،وزیر اعظم، وفاقی کابینہ کے ارکان، چیف جسٹس پاکستان، آڈیٹر جنرل اور وفاقی محتسب جیسے عہدوں کا حلف لے سکتا ہے،صدر مملکت کو کسی عدالت، ٹریبونل یا دیگر ہئیت مجاز کی دی گئی سزا کو معاف کرنے، ملتوی کرنے اور کچھ عرصے کیلئے روکنے ،اس میں تخفیف کرنے یا اسے معطل اور تبدیل کرنیکا اختیارحاصل ہے۔آئین کی رو سے صدر مملکت ہر پارلیمانی سال کے آغاز پر پارلیمنٹ کے مشترکہ اجلاس سے خطاب میں حکومت کو امور سلطنت چلانے کیلئے رہنمائی فراہم کرتا ہے۔ پارلیمنٹ سے منظور کوئی بل اس وقت تک ایکٹ نہیں بن سکتا جب تک صدر مملکت اس کی توثیق نہ کریں۔ مالیاتی بل کا اطلاق بھی صدر کی توثیق کے بعد ممکن ہے، صدر مملکت وزیر اعظم کی ایڈوائس پر قومی اسمبلی تحلیل کرسکتا ہے ، نوے دن کے اندرعام انتخابات کی تاریخ کا اعلان کر سکتا ہے،صدر مملکت چیف جسٹس ، آڈیٹر جنرل مسلح افواج کے سربراہان سمیت اہم عہدوں پر تعیناتی بھی صرف وزیر اعظم کی ایڈوائس پر کر سکتا ہے،آئین کے تحت وزیر اعظم صدر کو عالمی اور خارجہ پالیسی کے تمام معاملات اور ان تمام قانونی تجاویز پر جو وفاقی حکومت پارلیمنٹ میں پیش کرنے کا ارداہ رکھتی ہے ،آگاہ کرنے کا پابند ہے ( عملی طور پر ایسا ہوتا نہیں ہے)۔

صدر مملکت سینیٹ یا قومی اسمبلی کا اجلاس نہ ہونے کی صورت میں آرڈیننس وضع اور نافذ کر سکتا ہے، صدر کسی صوبے کے گورنر کو اپنے نمائندے کے طور پر بعض امور سر انجام دینے کا حکم دے سکتا ہے، صوبوں سے متعلق محصولات کیلئے کوئی بھی بل قومی اسمبلی میں پیش کرنے سے قبل صدر مملکت کی منظوری ضروری ہے،آڈیٹر جنرل وفاق سے متعلق سالانہ آڈٹ رپورٹیں صدر مملکت کو پیش کرنے کے پابند ہیںجنہیں وہ پارلیمنٹ میں پیش کرنے کی ہدایت دیتے ہیں،صدر جنگ یا داخلی خلفشار کی بنیاد پر کسی صوبے میں ہنگامی حالت کے نفاذ اور اس دوران بنیادی حقوق کو معطل کرنے کا اعلان کر سکتا ہے تاہم اس کیلئے صوبائی اسمبلی کی قرارداد ضروری ہے۔ وفاق کے زیر انتظام قبائلی علاقے بھی صدر مملکت کے تحت ہیں، اسی طرح وفاقی کے زیر انتظام تمام یونیورسٹیاں بھی صدر مملکت کے دائرہ اختیار میں ہیں۔ موجودہ اختیارات کے مطابق وہی قصر صدارت جو آمریت کے دور میں طاقت کا مرکز ہوا کرتا تھا اب محض نمائشی حیثیت اختیارکر چکا ہے۔ سبکدوش ہونروالے صدر مملکت ممنون حسین نے آئین کی پاسداری کو مقدم رکھا اور اپنے اختیارات سے تجاوز نہ کرتے ہوئے بعض اہم اقدامات کئے، جن میں ارکان پارلیمنٹ کی حاضری کو عام کرنا، ایوان صدر میں اردو زبان کا نفاذ، ہرملکی و غیر ملکی فورم پر اردو زبان میں خطاب، وسطی ایشائی ریاستوں سے روابط کو فروغ ، نائیجیریا اور آذر بائیجان کے ساتھ دفاعی آلات کی فراہمی، تیل گیس کے شعبوں میں تعاون کے معاہدے، آذر بائیجان میں نیشنل بینک کی برانچ کھولنا، زیر انتظام یونیورسٹیوں کے وائس چانسلرز کی تقرری کیلئے خود انٹرویو لینا،وفاقی اردو یونیورسٹی میں اربوں روپے کی بد عنوانی کے مرتکب افراد کا احتساب یقینی بنانا، بابائے اردو مولوی عبد الحق کی ہزاروں نایاب کتابوں اور قلمی نسخوں کو اردو باغ کے قیام سے محفوظ بنانا،صوابدیدی فنڈزغریب مستحق بچوں اور انڈس اسپتال جیسے فلاحی ادارے کو دینا اور سب سے اہم رائل کالج آف فزیشنز کے پاکستانی ڈاکٹروں کے امتحانات کو پاکستان میں لینے کو ممکن بنانا قابل ذکر ہیں۔ ادب اور صحافت سے تعلق رکھنے والے سابق صدر ممنون حسین کے کنسلٹنٹ فاروق عادل کی یہ بات بہت بھلی کہ جو صدر مملکت آئین کے مطابق فرائض منصبی ادا کرے گا ناقدین اسے نمائشی صدر ہی کہیں گے۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

لاہور(ایمرا نیوز)
جنرل ہیڈ کوارٹر ( جی ایچ کیو ) راولپنڈی میں یوم دفاع و شہداء کی مرکزی تقریب سے خطاب کرتے ہوئے وزیر اعظم عمران خان نے ایک اہم بات کی ہے ۔ اگر اس پر عمل درآمد ہو جائے تو بحیثیت قوم ہم اپنا ایک نیاعہد شروع کر سکتے ہیں ، جس میں ہم زیادہ خود مختار ہوں گے اور اپنے فیصلے خود کریں گے ۔ وزیر اعظم عمران خان نے کہا ہے کہ آئندہ ہم دوسروں کی جنگ نہیں لڑیں گے ۔ ان کا اشارہ امریکہ کی دہشت گردی کے خلاف نام نہاد جنگ کی طرف تھا ، جس میں پاکستان نے الجھ کر اپنا بہت کچھ برباد کر دیا ہے اور آج اپنی بقاکے سوال سے دوچار ہے ۔ وزیر اعظم عمران خان کا یہ بھی کہنا تھا کہ وہ ہمیشہ سے اس جنگ میں شمولیت کے مخالف تھے ۔
سوال یہ پیدا ہوتا ہے کہ ہم دوسروں کی جنگ میں برے طریقے سے الجھ توگئے ہیں مگر اب اس سے کیسے نکل سکتے ہیں جبکہ ایک ایسا مخصوص مفاد پیدا ہو چکا ہے ، جوہمیں اس جنگ سے نکلنے بھی نہیں دیتا ؟ اس سوال کا جواب حاصل کرنے کیلئے ہمیں تاریخ کا جائزہ لینا ہو گا اور ان اسباب کا پتہ چلانا ہو گا ، جنہوں نے ہمیں دوسروں کی لڑائی میں الجھائے رکھا ۔ وزیراعظم عمران خان نے اسی تقریب میں اپنے خطاب کے دوران ایک واقعہ کا بھی ذکر کیا کہ انہیں 1965ء میں وہ دن بھی یاد ہے ، جب انہوںنے اچانک فائرنگ کی آوازیں سنیں اور 12 سال کی عمر میں اپنے والد کی بندوق لے کر لڑنے کے لئے باہر آ گئے۔ یہ واقعہ ان اسباب کی نشاندہی کرتا ہے ، جو ہمیں دوسروں کی لڑائی میں الجھا گئے ۔ بنیادی سبب بھارتی جارحیت کا خدشہ تھا ۔ 1965 ء میں اس جارحیت کے کامیاب دفاع پر ہم ہر سال 6ستمبر کو یوم دفاع مناتے ہیں لیکن ہم نے سرحد پار کی جارحیت کے خلاف دفاع تو ہمیشہ کیا ہے ۔ سرحدوں کے اندر ہم پر جو جنگ مسلط کی گئی ہے ، اسکے نقصانات کا اندازہ ابھی تک ہم پوری طرح نہیں لگا سکے ۔

حقیقت یہ ہے کہ قیام پاکستان کے فوری بعد ہی بھارتی جارحیت کے خوف سے ہم ابتدائی دنوں میں ہی سرحدوں کی لڑائی میں الجھ گئے اور ہم نے امریکہ پر نہ صرف انحصار کیا بلکہ اپنی ضرورتوں اور تقاضوں کے مطابق خود مختار داخلہ اور خارجہ پالیسیاں بھی نہ بنا سکے ۔ امریکی جال میں ہم اس طرح پھنسے کہ ہمارے جس لیڈر نے بھی اس سے نکلنے کی کوشش کی ، اسے ’’ عبرت کی مثال ‘‘ بنا دیا گیا ۔ لیاقت علی خان کا امریکی کیمپ میں جانے کا فیصلہ درست نہیں تھا لیکن اب تحقیقات سے یہ ثابت ہو چکا ہے کہ امریکہ کی بعض باتوں سے انکار ان کی شہادت کا سبب بنا ۔ اس کے بعد امریکی شکنجہ مضبوط ہوتا گیا ۔ مئی 1954 ءمیں پاکستان نے امریکہ کے ساتھ ’’ باہمی دفاعی تعاون ‘‘ کا پہلا معاہدہ کیا ۔ پھر اسی سال وہ ایک اور دفاعی معاہدے سیٹو (ساؤتھ ایسٹ ایشین ٹریٹی آرگنائزیشن ) کا رکن بنا ۔ اس معاہدے میں امریکہ، برطانیہ ، فرانس ، تھائی لینڈ ، فلپائن اور آسٹریلیا اور نیوزی لینڈ بھی شامل تھے ۔ اگلے سال یعنی 1955ء میں پاکستان معاہدہ بغداد کاحصہ بنا ۔ یہ ایک اور دفاعی معاہدہ تھا ۔ اس معاہدے میں برطانیہ کیساتھ ساتھ ترکی ، ایران اورعراق بھی شامل تھے ۔ 1958ء میں عراق نے اس معاہدے سے علیحدگی اختیار کی تو اسے سینٹو ( Cento ) یعنی سینٹرل ٹریٹی آرگنائزیشن کا نام دیا گیا ۔ امریکہ اس معاہدے میں اگرچہ شامل نہیں تھا لیکن وہ اس معاہدے کا سب سے بڑا حامی اور محافظ تھا ۔ اس کا ثبوت یہ ہے کہ 1959ء میں امریکہ نے پاکستان کیساتھ ایک اور دفاعی معاہدہ کیا ، جس کا مقصد سینٹو کے دفاعی مقاصد کو آگے بڑھانا تھا ۔ اس طرح پاکستان صرف 5سال میں امریکہ کیساتھ ایک نہیں بلکہ چار سیکو رٹی معاہدوں میں منسلک ہو گیا ۔ یہ ایشیا کا واحد ملک تھا ، جو بیک وقت سیٹو اور سینٹو کا رکن تھا ۔ اس عرصے میں پاکستان نے اگرچہ کسی بڑی لڑائی میں حصہ نہیں لیا لیکن وہ سرد جنگ کے زمانے میں امریکی کیمپ ( جسے سرمایہ دارانہ یا سامراجی کیمپ کا نام دیا جاتا تھا ) کا اہم رکن بن گیا ۔ پاکستان کو اس زمانے میں امریکہ کا ’’ Most Allied Ally ) یعنی سب سے زیادہ قریبی اتحادی کہا جاتا تھا ۔ دراصل ہم اشتراکی اور غیر جانبدارانہ بلاکس کیخلاف ایک بڑی جنگ میں الجھ گئے تھے ۔ روس کی گرم پانیوں تک رسائی کو روکنے کی ذمہ داری ہمیں سونپی گئی ۔ پاکستان کو ایک جمہوری ملک کی بجائے سیکورٹی اسٹیٹ بنا دیاگیا ، جس کا بنیادی جوہر سیاسی اور جمہوری عمل کو روکنا تھا ۔ امریکہ اور اس کے اتحادیوں کی لڑائی میں الجھنے کیخلاف عراق ، ترکی اور ایران میں انقلابات رونما ہوئے یا فوجی بغاوتیں ہوئیں اور 1960 اور 1980 ء کے عشروں کے درمیان وہ اس صورت حال سے نکل تو گئے لیکن وہ اب تک اس کا خمیازہ بھگت رہے ہیں ۔ پاکستان میں ذوالفقار علی بھٹو نے اس صورتحال سے نکلنے کی کوشش کی اور وہ ’’ عبرت کی مثال ‘‘ بن گئے ۔ پھر وہ مرحلہ شروع ہو گیا ، جس میں امریکہ اور اسکے اتحادیوں کی جنگ میں براہ راست شامل ہونے کے سوا پاکستان کے پاس کوئی راستہ نہیںبچا ۔ پہلے افغانستان میں سوویت یونین کیخلاف جنگ میں پاکستان کو جھونکا گیا ۔ اسکے لئےخصوصی طور پر پاکستان میںضیاء الحق کو اقتدار میں لانے کی راہ ہموار کی گئی ۔ یہ جنگ 1985ء میں افغانستان میں تو ختم ہو گئی اور اس نے سرد جنگ کے عہد کا بھی خاتمہ کرکے دنیا پر نیا امریکی ضابطہ ( نیو ورلڈ آرڈر ) نافذ کیا لیکن پاکستان کے اندر یہ جنگ ختم نہ ہوئی اور دہشت گردی کی صورت میں جاری رہی ۔ اسی دہشت گردی اور خونریزی کی بنیاد پر امریکہ نے 2001 ء میں ’’ دہشت گردی کے خلاف جنگ ‘‘ کے نام پر ایک اور عالمی جنگ شروع کی ۔ اس میں بھی پاکستان کو ایندھن بنا یاگیا ۔ اس کیلئے پرویز مشرف کو اقتدار میں لانے کے حالات پیدا کئے گئے ۔ یہ جنگ مسلم دنیا کے انتہا پسند گروہوں کیخلاف تھی ، جو قبل ازیں سوویت یونین کے خلاف افغان جنگ میں امریکہ کے اتحادی تھے ۔ دہشت گردی کے خلاف اس جنگ کے دوران انتہا پسندی اور دہشت گردی میں حیرت انگیز طور پر اضافہ ہوتا گیا ۔ اس جنگ میں انتہائی اہم کردار کی وجہ سے پاکستان کو امریکہ اور اس کے اتحادیوں کا سب سے بڑا نان نیٹو اتحادی ( Major Non Nato Ally ) قرار دیا گیا ۔ بہر صورت ہم گزشتہ 4 عشروں یعنی 40 سال سے امریکہ کی لڑائی میں براہ راست ملوث ہیں ۔ اس سے قبل ہم بالواسطہ طور پر ملوث تھے ۔ اس کے جانی و مالی نقصانات اس قدر زیادہ ہیںکہ دنیا کے کسی ملک نے پہلی اور دوسری جنگ عظیم میں بھی انفرادی طور پر اتنے نقصانات کا سامنا نہیں کیا ہو گا ۔ سب سے زیادہ نقصان یہ ہوا ہے کہ پاکستان میں اعتدال اور ترقی پسندانہ سیاسی قوتیں کمزور ہو چکی ہیں ، جو اس جنگ میں شمولیت کے خلاف مزاحمت کر سکتی تھیں ۔

دوسروں کی اس جنگ میں شامل رہنا ایک مخصوص مفاد بن گیا ہے ، جو بہت طاقتور ہے ۔ ان حالات میں پاکستان تحریک انصاف ایک بڑی سیاسی جماعت بن کر ابھری ہے ۔ اس کے لئے بہت چیلنجز ہیں ۔ پاکستان بھارتی جارحیت کے خوف سے پہلے امریکہ کا ’’ Most Allied Ally ‘‘ بنا ۔ پھر ’’ Major Non Nato Ally ‘‘ کا درجہ حاصل کیا ۔ اب امریکی پاکستان کو ’’ Double Dealing Ally ‘‘ کا نام دے رہے ہیں اور یہ الزام عائد کر رہے ہیں کہ پاکستان امریکہ کا اتحادی ہوتے ہوئے امریکہ کے مخالف انتہا پسند گروہوں کی افغانستان میں سرپرستی کر رہا ہے۔ اب امریکی پاکستان کے مقابلے میں بھارت کو زیادہ اہمیت دے رہے ہیں ۔ پاکستان کی اس تشویش پر کوئی توجہ نہیں دے رہا ہے کہ بھارت افغانستان کی سرزمین کو پاکستان کے خلاف استعمال کر رہا ہے اور وہاں سے پاکستان کے اندر دہشت گردی کرا رہا ہے ، جس خوف سے ہم نے اپنے سفر کا آغاز کیا تھا ، آج وہ خوف پہلے سے زیادہ ہے ۔ بھارتی جارحیت کے خلاف ہم امریکہ اور اس کے اتحادیوں کی اخلاقی اور سفارتی حمایت سے بھی محروم ہو چکے ہیں ۔ اس گمبھیر صورت حال میں دوسروں کی لڑائی سے نکلنے کا اب صرف ایک ہی راستہ ہے ۔ پاکستان میں دہشت گردی کا خاتمہ کیا جائے اور اعتدال اور ترقی پسند سیاسی قوتوں کو پنپنے کا موقع فراہم کیا جائے۔ اسکے ساتھ ساتھ پاکستان میں جمہوری عمل جاری و ساری رہے ۔ ہمیں اپنے گھر کو ٹھیک کرنا ہے ۔ تجھ کو پرائی کیا پڑی ، اپنی نبیڑ تو ۔

(بشکریہ جنگ لاہور)