Category جرائم

لاہور: مال روڈ پر جلسہ کرنے پر پولیس نے شہبازشریف اور دیگر اپوزیشن رہنماؤں سمیت 1900 افراد کے خلاف مقدمہ درج کرلیا۔ایس ایچ او تھانہ سول لائنز کی مدعیت میں درج مقدمے میں متعدد دفعات شامل کی گئی ہیں۔

مقدمے میں مسلم لیگ (ن) لاہور کی تقریباً تمام قیادت کو نامزد کیا گیا ہے اس کے علاوہ قمر زمان کائرہ، وحید گل، رانا محمد ارشد ،رابعہ نسیم فاروقی، شیخ روحیل اصغر، ڈاکٹر اسد اشرف اور عظمیٰ بخاری سمیت دیگر کو نامزد کیا گیا ہے۔

ایف آئی آر کے متن میں کہا گیا ہےکہ مظاہرین نے مال روڈ کو چاروں اطراف سے بند کردیا، مال روڈ بند ہونے سے شہریوں کو دشواری کا سامنا کرنا پڑا، مظاہرین نے ساؤنڈ سسٹم لگاکر اشتعال انگیز تقاریر کیں اور کئی شرکا نے ڈنڈے سوٹے اٹھا رکھے تھے۔

ایف آئی آر کے مطابق مظاہرین نے پولیس بیرئیر توڑ دیے اور بینرز پوسٹر پھاڑ دیے جب کہ مظاہرین نے پولیس ملازمین سے مزاحمت کی اور حکومت مخالف نعرے لگائے۔

لندن: شہباز شریف نے زلزلہ زدگان کی امداد چوری کرنے کا الزام لگانے والے برطانوی اخبار ’ڈیلی میل‘ کے خلاف ہتک عزت کا دعویٰ دائر کردیا۔

قومی اسمبلی میں قائد حزب اختلاف شہباز شریف نے برطانوی اخبار ڈیلی میل کے خلاف باضابطہ کارروائی کے لیے برطانیہ کی معروف لاء فرم کارٹر رک کی خدمات حاصل کی ہیں جو برطانیہ میں ان کا مقدمہ لڑے گی۔

لاء فرم کا کہنا ہےکہ اخبار میں کیے گئے شہباز شریف سے متعلق دعوے انتہائی متنازع ہیں۔

دوسری جانب شہبازشریف نے اپنے دعوے میں مؤقف اپنایا ہےکہ الزامات میں سچائی ہوتی تو گرفتار کرکے مقدمہ چلایا جاتا، حکومت کی ایما پر میرے خلاف سیاسی بنیادوں پر خبر چھپوائی گئی۔

(ن) لیگ کے صدر نے مزید مؤقف اپنایا کہ 2005 میں زلزلے کے وقت برطانیہ میں جلاوطنی کی زندگی بسر کررہا تھا، اپنی ساکھ عزیز ہے، برطانوی عدالتوں سے اپنی بےگناہی ثابت کروں گا۔

واضح رہےکہ ڈیلی میل نے اپنی خبر میں دعویٰ کیا تھا کہ شہباز شریف نے بطور وزیراعلیٰ پنجاب زلزلہ زدگان کی امداد کے لیے برطانوی ادارے سے ملنے والی رقم میں خورد برد کی تھی۔

شہباز شریف نے اِن الزامات کی سختی سے تردید کرتے ہوئے برطانوی اخبار کے خلاف قانونی چارہ جوئی کا اعلان بھی کیا تھا۔برطانوی لاء فرم کارٹر رک نے 14 جولائی کو آرٹیکل کی اشاعت کے خلاف میل آن لائن اور اُس کے صحافی ڈیوڈ روز کے خلاف باضابطہ قانونی کارروائی کا آغاز کیا ہے۔

کارٹر رک نے جیو نیوز سے گفتگو میں تصدیق کی ہے کہ اُس نے ایک ہفتے تک کیس کا جائزہ لینے کے بعد شہباز شریف کی نمائندگی کرنے پر اتفاق کیا ہے۔ کارٹر رک کا کہنا ہے کہ ڈیلی میل کی خبر شہباز شریف کے لیے سخت توہین آمیز ہے جس میں غلط الزامات لگائے گئے ہیں کہ انہوں نے زلزلہ زدگان کی مدد کے لیے برطانیہ سے ملنے والی امدادی رقم میں خوردبرد کی۔

کوئٹہ (میڈیا 92 نیوز آن لائن ) تیزاب گردی کے سنگین واقعہ میں دو خواتین سمیت تین افراد جھلس کر زخمی ہو گئے ہیں، زخمیوں میں ایک بچہ بھی شامل ہے۔

بدھ کے روز سریاب روڈ کے قریب مینگل آباد میں نامعلوم افراد نے ایک گھر میں گھس کر خواتین اور بچوں پر تیزاب پھینک دیا، زخمیوں کو فوری طور پر بولان میڈیکل کمپلیکس اسپتال منتقل کر دیا گیا جہاں انہیں برن وارڈ میں داخل کر دیا گیا ہے۔

واقعہ کی اطلاع ملتے ہیں پولیس جائے وقوعہ پر پہنچ گئی تاہم اس دوران ملزمان موقع سے فرار ہونے میں کامیاب ہو چکے تھے۔

نامعلوم ملزمان کے خلاف مقدمہ درج کر کے واقعہ کی تحقیقات شروع کر دی گئی ہے، پولیس کا کہنا ہے کہ یہ واقعہ دن کو اس وقت ہوا جب مرد حضرات کام کاج کے سلسلے میں گھر سے باہر تھے۔

دوسری جانب غیرسرکاری تنظیموں نے واقعہ کی شدید الفاظ میں مذمت کرتے ہوئے حکومت سے ملزمان کی فوری گرفتاری کا مطالبہ کیا ہے۔ملک میں تیزاب گردی کے بڑھتے ہوئے واقعات کے باعث قوانین میں سختی اور ان پر عمل درآمد یقینی بنانے کا مطالبہ زور پکڑ رہا ہے۔

لاہور (اپنے رپورٹر سے ) ضلع کچہری میں پیشی پر آنے والے ملزم کو فائرنگ کرکے قتل کردیا گیا۔پولیس کے مطابق ضلع کچہری لاہور میں ایک ملزم کو پیشی پر لایا گیا جس پر پہلے سے گھات لگائے اس کے مخالف نے فائرنگ کردی۔

پولیس نے بتایا کہ ملزم فائرنگ سے شدید زخمی ہوا جسے فوری طبی امداد کے لیے اسپتال منتقل کیا گیا جہاں وہ جانبر نہ ہوسکا۔پولیس کے مطابق فائرنگ کرنے والے ملزم کو بھی گرفتار کرلیا گیا ہے جس کی شناخت علی حیدر کے نام سے ہوئی ہے۔

فیصل آباد (میڈیا 92 نیوز آن لائن ) فیصل آباد پولیس نے مسلم لیگ نواز کی نائب صدر اور سابق وزیراعظم نواز شریف کی صاحبزادی مریم نواز کی قیادت میں بغیر اجازت ریلی نکالنے کے سلسلے میں مختلف تھانوں میں درج مقدمات پر پکڑ دھکڑ شروع کر دی ہے۔

پولیس ذرائع کے مطابق چار مقدمات میں نامزد مسلم لیگ کے رہنماؤں اور کارکنوں کی گرفتاریوں کی لیے چھاپے مارنے کا سلسلہ شروع کر دیا گیا۔تھانہ منصور آباد کے علاقے میں 12 افراد تھانہ ملت ٹاؤن میں دس جبکہ تھانہ نشاط آباد کے علاقے میں 15 افراد کو گرفتار کر لیا گیا۔

ذرائع کا کہنا ہے کہ ریل بازار پولیس نے بغیر اجازت نکالی گئی ریلی میں شرکت کرنے پر موبائل ایسوسی ایشن کچہری بازار کے صدر خالد جٹ کو بھی گرفتار کر لیا۔ یاد رہے پولیس نے اکیس جولائی کو ریلی نکالنے پر مریم نواز کیپٹن صفدر دیگر مرکزی رہنماؤں اور ڈھائی ہزار سے زائد کارکنوں کے خلاف مقدمات درج کئے تھے۔

ن لیگ کے رہنما چوئدری امجد علی جاوید نے میڈیا 92 نیوز کو بتایا کہ پچیس جولائی کے یوم سیاہ کی کال کو ناکام بنانے کے لیے حکومت پولیس کا استعمال کر رہی ہے اور ایک سیاسی مقدمے میں کارکنوں کو گرفتار کیا جا رہا ہے ،
ہم 25 جولائی کو ہر صورت باہر نکلیں گے اور اس کٹھ پتلی حکومت حکومت کے اوچھے ہتھکنڈے ہمارا راستہ نہیں روک سکتے !

لاہور (اپنے رپورٹر سے ) پاکستانی اداکار و گلوکار محسن عباس حیدر کی اہلیہ فاطمہ سہیل نے رواں ماہ 20 جولائی کو اپنے شوہر پر گھریلو تشدد اور شادی شدہ ہونے کے باوجود افیئرز چلانے کا الزام عائد کیا تھا، جس کے بعد اب لاہور کے ڈیفنس پولیس اسٹیشن میں اداکار کے خلاف ایف آئی آر درج کرلی گئی۔

محسن عباس حیدر کے خلاف ایف آئی آر دفعہ 406 اور 506 کے تحت درج کی گئی جبکہ ان پر درخواست گزار کو جان سے مارنے کی دھمکیاں دینے کا بھی الزام عائد کیا گیا۔

یاد رہے کہ مقدمہ درج ہونے سے قبل محسن عباس اور ان کی اہلیہ دونوں ایس پی کینٹ لاہور کے دفتر پہنچے تھے جہاں انہوں نے اپنے بیانات ریکارڈ کرائے۔

ایف آئی آر میں فاطمہ نے اپنے شوہر پر الزام لگاتے ہوئے بتایا کہ چار سال قبل محسن کا رویہ ان کے ساتھ کافی خراب ہونا شروع ہوگیا تھا اور وہ متعدد مواقع پر ان سے بہت بری طرح پیش آتے تھے، محسن کا کسی اور خاتون کے ساتھ افیئر بھی سامنے آیا۔

انہوں نے یہ بھی الزام لگایا کہ ‘محسن نے مجھ سے مطالبہ کیا تھا کہ میں اپنے گھر والوں سے پیسے لے کر ان کے پاس جاؤں تاکہ وہ نیا کاروبار شروع کرسکیں، جس کے لیے میرے والد نے انہیں 50 لاکھ روپے بھی دیے، کچھ عرصے بعد جب میں نے محسن سے اس رقم اور بزنس کے حوالے سے سوال کیا تو محسن نے میرے ساتھ بدسلوکی کی اور مجھے سنگین نتائج کی دھمکیاں دیں اور والدین سے مزید 50 لاکھ روپے لانے مطالبہ کیا، جس کے انکار پر انہوں نے مجھ پر جسمانی تشدد شروع کردیا۔’

فاطمہ نے دعویٰ کیا کہ ‘گزشتہ سال 26 نومبر کو میں نے محسن کو رنگے ہاتھوں پکڑا اور پوچھنے پر محسن نے ان پر حاملہ ہونے کے دوران تشدد کیا جس کے باعث میرے چہرے اور جسم پر چوٹوں کے نشان بھی آئے، باوجود یہ جانتے ہوئے کہ میں اس وقت حاملہ تھی۔’

فاطمہ کے مطابق رواں ماہ 17 تاریخ کو وہ جب ڈیفنس میں محسن کے گھر ان سے پیسوں کا مطالبہ کرنے گئیں تھیں کیونکہ وہ علیحدہ ہونے کا فیصلہ کرچکی تھیں۔اس موقع پر محسن نے پھر ان پر تشدد کیا اور وہ ان پر گولی چلانے والے ہی تھے، لیکن اپنے بھائی کی مدد سے وہ وہاں سے باحفاظت نکل سکیں۔

فاطمہ نے اپنی میڈیکل رپورٹ بھی جمع کروائی اور پولیس سے مطالبہ کیا کہ وہ محسن کے خلاف سخت کارروائی کریں اور ان کی رقم کی برآمدگی کو یقینی بنائیں۔پولیس کے ایک ذرائع نے بتایا کہ محسن عدالت سے ضمانت قبل از گرفتاری حاصل کرچکے ہیں۔

واضح رہے کہ اہلیہ کی جانب سے سوشل میڈیا پر الزام لگانے کے بعد محسن عباس حیدر نے 21 جولائی کو ایک پریس کانفرنس میں خود پر لگے تمام الزامات کو بےبنیاد قرار دے دیا تھا۔

محسن عباس حیدر نے کہا تھا کہ ‘وہ جو کچھ کہہ رہی ہیں وہ جھوٹ ہے، میں نے ان کو چھوا بھی نہیں، یہ ٹھیک ہے کہ ماضی میں غصے کے حوالے سے مجھے مسائل رہے ہیں مگر اب میں بدل چکا ہوں’۔

فیصل آباد (میڈیا 92 نیوز آن لائن ) پاکستان مسلم لیگ (ن) کی نائب صدر مریم نواز سمیت 3 ہزار سے زائد کارکنان پر مختلف پولیس اسٹیشنز میں 5 مقدمات درج کرلیے گئے۔

مذکورہ مقدمات حکومت مخالف تقاریر کرنے، اجازت لیے بغیر ریلی نکالنے، امن و عامہ میں رکاوٹ ڈالنے اور خطرات پیدا کرنے پر درج کیے گئے۔یہ مقدمات نشاط آباد، سرگودھا روڈ، ریل بازار، فیکٹری ایریا اور ثمن آباد پولیس اسٹیشن میں درج کیے گئے۔

ان مقدمات میں مریم نواز ان کے شوہر محمد صفدر، سابق گورنر سندھ محمد زبیر عمر، سابق وزیر مملکت طلال چوہدری، مصدق ملک، پنجاب کے سابق وزیر قانون رانا ثنا اللہ کی اہلیہ نبیلہ، ان کے داماد شہریار، سابق میئر ملک عبدالرزاق، اراکین قومی اسمبلی جاوید لطیف، شہباز بابر اور عالیہ رجب بلوچ کو مرکزی ملزم نامزد کیا گیا۔

پولیس کا کہنا تھا کہ ملزمان نے مختلف سڑکیں بلاک کریں جس سے گاڑیوں میں سوار افراد کو شدید پریشانی کا سامنا کرنا پڑا۔

خیال رہے کہ نائب صدر مسلم لیگ (ن) مریم نواز نے اتوار کی رات فیصل آباد کا دورہ کیا تھا جہاں وہ تقریباً 7 گھنٹے کے سفر کے بعد ثمن آباد میں رانا ثنا اللہ کی رہائش گاہ پہنچی تھیں اس دوران مختلف سڑکوں پر لوگوں نے ان کا استقبال کیا تھا۔

اس بارے میں ایک پولیس افسر کا کہنا تھا کہ مقدمہ حکومت کی ہدایت پر درج کیا گیا، ان کا کہنا تھا کہ حکومت کی ہدایت کے بعد ملزمان کی گرفتاری کے لیے چھاپے مارے جائیں گے۔

لاہور :اینٹی نارکوٹکس فورس (اے این ایف) نے مسلم لیگ (ن) کے رہنما رانا ثناءاللہ کے خلاف 15 کلو ہیروئن کا چالان عدالت میں جمع کرادیا۔

اے این ایف نے رانا ثناءاللہ کے خلاف 15 کلو ہیروئن کا چالان جج مسعود ارشد کے تعطیلات پر ہونے کے باعث ڈیوٹی جج کے روبرو جمع کرایا۔رانا ثناء اللہ کے خلاف سی این ایس اے 1997ء کی دفعات 9 سی، 15 اور17 کےتحت کیس درج کیا گیا ہے۔انسداد منشیات عدالت نے رانا ثناءاللہ کو 29 جولائی کو طلب کرلیا ہے۔

واضح رہےکہ انسداد منشیات فورس (اے این ایف) نے رانا ثناءاللہ کو 2 جولائی کو فیصل آباد سے لاہور جاتے ہوئے گرفتار کیا اور اے این ایف نے دعویٰ کیا کہ رانا ثناء کی گاڑی سے بھاری مقدار میں منشیات برآمد کی گئی۔

گزشتہ روز منشیات اسمگلنگ کیس میں گرفتار رانا ثناءاللہ نے اپنے وکیل کے توسط سے لاہور کی مقامی عدالت میں درخواست دائر بھی کی جس میں مؤقف اپنایا گیا ہےکہ رانا ثناءاللہ بیمار ہیں، ان کوگھر کا کھانا دینے کی اجازت دی جائے، جیل قوانین کے مطابق زیرٹرائل ملزم کو گھر کا کھانا دیا جاسکتا ہے۔

لاہور(ایمرا نیوز آن لائن)ڈئی آئی جی پنجاب کی مہم ڈرگس فری پنجاب کے تحت ایس پی کینٹ، ڈی ایس پی اشتیاق خان کی زیر نگرانی اہم آپریشن، مختاراں مائی عرف رکشہ والی کے ڈیرے سے 6کلو چرس برآمد کر لی گئی۔ ایس ایچ او تھانہ غازی آباد جاوید چیمہ نے میڈیا سے بات کرتے ہوئے کہا کہ اس آپریشن میں پولیس نے 3افراد اور ایک عورت کو گرفتار کر لیا ہے اور لاکھوں روپے مالیت کی چرس بھی برآمد کر لی گئی ہے۔ ان کا مزیدکہنا تھا کہ میں نے چند روز قبل علاقہ غازی آباد کا چارج سنبھالا ہے میں اپنے علاقے میں بحکم ڈی آئی جی منشیات و دیگر جرائم کو جڑ سے اکھاڑ پھینکوں گا۔

اسلام آباد (میڈیا 92 نیوز آن لائن ) عدلیہ کے خلاف اشتعال انگیز انٹرویو سے متعلق کیس میں سابق سینیٹر فیصل رضا عابدی کو باعزت بری کر دیا گیا۔

اسلام آباد کی انسداد الیکٹرانک کرائم کی عدالت کے جج طاہر خان نے فیصل رضا عابدی کی بریت کی درخواست منظور کرتے ہوئے سابق سینیٹر کو باعزت بری کرنے کا فیصلہ سنایا۔

فیصل رضا عابدی پر سابق چیف جسٹس ثاقب نثار کے خلاف اشتعال انگیز انٹرویو کا الزام تھا۔

عدالت کی جانب سے بریت کے فیصلے کے بعد میڈیا سے بات کرتے ہوئے فیصل رضا عابدی کا کہنا تھا کہ وقت آگیا ہےکہ مستتقبل کا فیصلہ کروں، پاکستان میں رہنا ہے تو سیاست میں واپس آنا پڑے گا۔

سابق سینیٹر نے کہا کہ فیصلہ والدین اور فیملی کی مشاورت سےکروں گا، اپنے سیاسی راستوں کا انتخاب خود کروں گا۔

خیال رہے کہ انسداد دہشتگردی عدالت پہلے ہی 2 مقدمات میں فیصل رضا عابدی کو بری کر چکی ہے۔