اسلام آباد (میڈیا 92 نیوز آن لائن ) چیف جسٹس پاکستان جسٹس آصف سعید خان کھوسہ نے کہاہے کہ لوگوں کے بنک اکاؤنٹ سے پیسے نکال کر بانڈ خریدے جاتے ہیں اور پتہ نہیں کیا کیا ہوتا ہو گا، اکاؤنٹ ہولڈر کو پتہ ہی نہیں ہوتا کہ اس کے پیسے کے ساتھ کیا ہو رہا ہے؟
چیف جسٹس پاکستان نے یہ ریمارکس ایک نجی بنک کے آپریشن مینیجرکی سزا کے خلاف درخواست کی سماعت کے دوران دیے ۔
سپریم کورٹ نے نجی بنک کے آپریشن مینیجر امان اللہ فارق کی بقایا سزا ختم کر دی جبکہ 90 لاکھ جرمانہ برقرار رکها۔
عدالتی حکم میں کہا گیاہے کہ ملزم آٹھ نو سال قید کاٹ چکا ہے،ٹرائل کورٹ نے 2011 میں ملزم امان اللہ کو 14 سال قید اور 90 لاکھ روپے جرمانے کی سزا سنائی تهی۔ 2016 میں لاہورہائی کورٹ نے ٹرائل کورٹ کا فیصلہ برقرار رکهاتھا۔
دوران سماعت چیف جسٹس پکاستان نے استفسار کیا کہ امان اللہ فاروق نے اکاؤنٹ ہولڈر کو بتائے بغیر اکاؤنٹ سے 90 لاکھ روپے کیوں نکال لیے؟
ملزم کے وکیل نے جواب دیا کہ امان اللہ فارق نے برانچ مینیجر کے کہنے پر رقم نکالی۔
اس پر چیف جسٹس پاکستان نے کہا ’’اس نے کہا اور آپ نے کر دیا؟اگر وہ کہتا کے قتل کر دو تو آپ کر دیتے؟‘‘
چیف جسٹس نے کہا آپریشن مینیجر کے پاس پبلک کے پیسے ہوتے ہیں،یہ ایک ذمہ دار پوسٹ ہے اس پوسٹ پر بیٹھے افسر کو پتہ ہوتا ہے کہ کس کے پیسے ہیں۔ اکائونٹ ہولڈر کو پتہ ہی نہیں ہوتا کہ اس کے پیسے کے ساتھ کیا ہو رہا ہے۔
چیف جسٹس پاکستان کی سربراہی میں تین رکنی بنچ نے کیس کی سماعت کی
کراچی (میڈیا 92 نیوز آن لائن ) ڈائریکٹر جنرل (ڈی جی)قومی احتساب بیورو( نیب )کراچی نے کھلی کچہری لگانے کا اعلان کردیاہے۔ کراچی میں کھلی کچہری 27جون کومنعقد ہوگی۔
کھلی کچہری میں ڈی جی نیب برگیڈئیر (ر) فاروق ناصر اعوان و دیگر متعلقہ افسران کرپشن سے متعلق عوامی شکایات وصول کریں گے۔
نیب کراچی کی طرف سے جاری بیان میں کہا گیاہے کہ عوام اپنی شکایات نیب آفس کراچی میں صبح11سے 1بجے تک درج کراسکتے ہیں ۔
ڈی جی نیب کراچی نے کہاہے کہ عوام کرپشن جیسی لعنت کے خاتمہ کے لئے ہمارے ساتھ مل کر اپنا قومی فریضہ ادا کریں۔
انہوں نے اپیل کی کہ عوام سرکاری اداروں و دیگر قومی املاک میں خورد برد کرنے والوں کے خلاف کھلی کچہری میں نشاندہی کریں۔
ڈائریکٹر جنرل نیب کراچی نے کہا کہ نیب قومی احتساب آرڈیننس 1999 کے تحت فوری کاورائی عمل میں لائے گی۔ قومی خزانہ کو نقصان دینے والے اشخاص پاکستان اور پاکستانی عوام کی خوشحالی کے دشمن ہیں۔
انہوں نے کہا کہ ایسے عناصر کو قانون کے کٹہرے میں لانا وقت کی اولین ترجیحات میں سے ایک اہم ترجیح ہے۔
ڈی جی نیب کراچی کی طرف سے کہا گیاہے کہ عوام اپنی شکایات شواہد کے ساتھ ای میل ایڈریس پر ارسال یا بذریعہ ٹیلیفون نمبرز پر بھی رجسٹرڈ کرواسکتے ہیں۔
اسلام آباد ( میڈیا 92 نیوز آن لائن ) اسلام آباد میں ایک شخص نے اپنی 10 سالہ سوتیلی بیٹی کو ریپ کا شکار بنادیا جس کی اطلاع بچی نے اپنی والدہ کو واقعے کی چند روز بعد دی۔
وفاقی دارالحکومت کے علاقے مسلم کالونی بری امام کی ایک خاتون کی مدعیت میں ویمن پولیس اسٹیشن اسلام آباد میں ملزم کے خلاف ایف آئی آر درج کی گئی۔
خاتون کی جانب سے درج کروائی گئی ایف آئی آر میں موقف اختیار کیا گیا کہ اس کے دوسرے شوہر نے اس کی بیٹی کو ریپ کا نشانہ بنایا ہے جو اس شخص کی سوتیلی بیٹی ہے۔
ایف آئی آر کے مطابق خاتون نے بتایا کہ ان کی بیٹی کو اس کے سوتیلے باپ نے رپورٹ درج کروانے سے 15 روز قبل ریپ کا نشانہ بنایا تھا۔
خاتون نے بتایا کہ اس کی 3 بیٹیاں ہیں اور وہ گھروں میں کام کرکے گزر بشر کرتی ہے۔
اس کا مزید کہنا تھا کہ جب وہ ایک دن اپنا کام کرکے گھر واپس پہنچی تو اس وقت ان کی بیٹی گھر میں پریشان تھی، تاہم وجہ پوچھنے پر اس نے اپنے ساتھ ہونے والے ریپ کے بارے میں بتایا۔
ان کا یہ بھی کہنا تھا کہ ان کی بچی نے بتایا کہ یہ واقعہ 15 روز قبل پیش آیا تھا جسے وہ شرم کی وجہ سے مجھے نہ بتاسکی تھی۔
ماثرہ بچی کی والدہ کی درخواست پر مقدمہ درج کر لیا گیا، تاہم اب تک کوئی گرفتاری عمل میں نہیں آئی۔
بنوں (میڈیا 92 نیوز آن لائن )انسداد دہشتگردی کی عدالت نے شمالی وزیر ستان کے علاقے خارقمر میں واقع پاک فوج کی چیک پوسٹ پر حملے کے کیس میں گرفتار محسن داوڑ اور علی وزیرکے مزید ریمانڈ کی استدعا مسترد کرتے ہوئے جیل بھیج دیاہے ۔
تفصیلات کے مطابق سی ٹی ڈی حکام کی جانب سے پی ٹی ایم کے رہنما اور رکن قومی اسمبلی علی وزیر اور محسن داوڑ کو بنوں کی انسداد دہشتگردی عدالت میں پیش کیا گیا جہاں مزید ریمانڈ کی استدعا کی گئی ۔ عدالت نے سی ٹی ڈی کی مزید ریمانڈ کی استددعا مسترد کرتے ہوئے انہیں جیل بھی دیا ہے ۔عدالت نے دونوں رکن اسمبلی کے مقدمات کو یکجا کرنے کا حکم جاری کرتے ہوئے سماعت نو جولائی تک ملتوی کر دی ہے ۔
یاد رہے کہ رکن قومی اسمبلی محسن جاوید داوڑ اور علی وزیر کی سربراہی میں ایک گروہ کی جانب سے شمالی وزیرستان کی خاڑ کمر چیک پوسٹ پر حملہ کرنے کا واقعہ گزشتہ ماہ 26 مئی کو پیش آیا تھا۔آئی ایس پی آر کا اس حوالے سے کہنا تھا کہ گروہ کے حملے کا مقصد دہشت گردوں کے مشتبہ سہولت کار کو چھڑانے کے لیے دباو ڈالنا تھا۔محسن جاوید داوڑ اس موقع پر فرار ہوگئے تھے جنہیں بعد میں 30 مئی کو شمالی وزیرستان سے گرفتار کیا گیا تھا۔
سندھ کے ضلع لاڑکانہ میں 2014 میں سال نو کی آمد کے موقع پر ہونے والی فائرنگ کے دوران چلنے والی 2 اندھی گولیاں ایک 46 سالہ شخص کے کاندھے کو چیرتی ان کی چھاتی سے پار ہوئیں، پھر آہستہ آہستہ ان کا جسم بے جان ہو گیا۔
نواحی شہر باڈھ کے رہائشی باقی دنیا کی طرح سال نو کو خوش آمدید کرنے میں مصروف تھے اور اندھیگولیوں کا نشانہ بننے والے شخص شان ڈھر کا خاندان ہمیشہ ہمیشہ کے لیے اجڑ گیا۔
شان ڈھر نجی ٹی وی چینل(اب تک) کے بیورو چیف تھے جبکہ وہ اپنے خاندان کے واحد کفیل ہونے کے ساتھ ساتھ گھر کے واحد مرد تھے، وہ بوڑھی والدہ، 2 چھوٹی بچیوں، اہلیہ اور بہنوں کے اکلوتے بھائی تھے، وہ لگ بھگ گذشتہ 25 برس سے صحافت اور ادب سے وابستہ تھے۔
صحافیوں کے تحفظ کے لیے کام کرنے والی تنظیم ‘پاکستان پریس فاؤنڈیشن‘ (پی پی ایف) کے مطابقشان ڈھر کو ایک ایسے وقت میں قتل کیا گیا جب وہ باڈہ کے ہسپتال میں جعلی دوائیوں کی ترسیل اور استعمال کے حوالے سے رپورٹ پر کام کر رہے تھے، مبینہ طور پر انہیں جعلی دوائیوں کی ترسیل میں ملوث ملزمان نے نشانہ بنایا۔
تاہم پولیس کا کہنا تھا کہ ان کی جانب سے تین بار تفتیش کرنے کے باوجود یہ بات سامنے نہیں آئی کہ شان ڈھر کو ٹارگٹ کرکے کسی خاص سبب کی وجہ سے مارا گیا ہو۔
پولیس نے ڈان کو بتایا کہ تین مختلف پولیس افسران کی جانب سے کی گئی تفتیش کے مطابق شان ڈھر اتفاقی گولی کا نشانہ بنے تاہم ان کی زندگی ختم ہونے میں یقینا ڈاکٹرز اور جائے وقوع پر موجود لوگوں کی غفلت بھی شامل ہے۔
تاہم شان ڈھر کے اہل خانہ پولیس کی تفتیش سے اتفاق نہیں کرتے، ان کا ماننا ہے کہ انہیں ٹارگٹ کرکے قتل کیا گیا۔
شان ڈھر کی بہن فوزیہ ڈھر بتاتی ہیں کہ اگرچہ انہیں نہیں پتہ تھا کہ ان کے بھائی کو خاص طور پر کس سبب کے باعث قتل کیا گیا، تاہم انہیں یقین ہے کہ ان کے بھائی کو غلط کام کرنے والے افراد کے کرتوت دنیا کو دکھانے کے جرم میں مارا گیا۔
انہوں نے شان ڈھر کے قتل کو یاد کرتے ہوئے بتایا کہ بھائی کا حادثہ ایک ایسے وقت میں ہوا جب وہ کسی طرح بھی یہ سمجھنے اور ماننے سے قاصر تھیں کہ ان کے چھوٹے سے خاندان کو یوں کوئی اجاڑ دے گا۔
انہوں نے جذباتی انداز میں بتایا کہ سچ تو یہ ہے کہ انہیں بھائی کو قتل کیے جانے کے ابتدائی 10 دن تک کچھ سمجھ ہی نہیں آ رہا تھا کہ ان کے ساتھ کیا ہوا ہے، وہ ان حالات سے کیسے نکلیں؟
انہوں نے تسلیم کیا کہ انہیں پولیس اور کچہریوں کا زیادہ تجربہ نہیں تھا، نہ ہی ان کے گھر میں اور کوئی مرد تھا، جو مشکل وقت میں ایسے کام سنبھالتا، اسی وجہ سے وہ آج تک بھائی کے قتل کے انصاف کے حصول میں ناکام ہیں۔
انہوں نے بتایا کہ پولیس نے گذشتہ پانچ سال میں ان کے بھائی کے قتل کیس کی تین بار تفتیش کی ہے اور تینوں بار مختلف اور اچھی ساکھ رکھنے والے افسران نے تفتیش کی ہے، تاہم تینوں تحقیقات کا نتیجہ 98 فیصد ایک جیسا ہی نکالا گیا۔
فوزیہ ڈھر کا کہنا تھا کہ پولیس نے انہیں تینوں تحقیقات کی کاپی فراہم نہیں کیں، تاہم انہیں بتایا گیا کہ ان کے بھائی کو کسی نے ٹارگٹ نہیں کیا بلکہ ان کی موت اتفاقی گولی سے ہوئی۔
انہوں نے تفتیش کرنے والے تمام پولیس افسران پر خدشات کا اظہار کیا اور الزام عائد کیا کہ وہ مشکوک ملزمان کے ساتھ ملے ہوئے ہیں۔
مقتول صحافی کی بہن کا دعویٰ تھا کہ ان کے بھائی کے قتل میں زہری برادران کے 2 افراد سمیت تنیو برادری کا نوجوان نصراللہ تنیو بھی ملوث ہے، کیوں کہ ان تینوں افراد کی جانب سے جہاں انہیں دھمکیاں ملتی رہتی ہیں، وہیں ان کی جانب سے صلح کے لیے دباؤ بھی ڈالا جاتا ہے۔
انہوں نے دلیل دی کہ اگر وہ تینوں بے قصور ہیں تو وہ کیوں صلح کرنے کے لیے دباؤ ڈالتے ہیں؟
تاہم پولیس ان کے الزامات سے اتفاق نہیں کرتی۔
شان ڈھر کے قتل کیس کی تفتیش کرنے والی ٹیم میں شامل افسر عبدالحکیم شاہ کے مطابق معاملے کی تینوں بار ہونے والی تحقیقات میں یہ بات سامنے آئی کہ صحافی کو کسی نے براہ راست نشانہ نہیں بنایا تھا بلکہ وہ اتفاقی گولی لگنے سے انتہائی زخمی ہوئے اور لوگوں کی غفلت کی وجہ سے چل بسے۔
عبدالحکیم شاہ نے بتایا کہ پولیس نے تفتیش کے دوران اور جائے وقوع پر موجود افراد کی گواہی کے بعد 13 ملزمان کو گرفتار بھی کیا۔
ان کے مطابق عینی گواہان نے پولیس کو بتایا کہ انہوں نے براہ راست شان ڈھر پر کسی کو فائرنگ کرتے ہوئے نہیں دیکھا، البتہ جس جگہ پر صحافی کوگولی لگی، وہاں نصراللہ تنیو سمیت دیگر 13 افراد موجود تھے اور عین ممکن ہے کہ ان میں سے کسی نے ان پر حملہ کیا ہو۔
تفتیشی افسر کے مطابق پولیس نے ان تمام ملزمان کو گرفتار کرکے تحقیق بھی کی، تاہم کسی پر بھی براہ راست صحافی کے قتل کا الزام ثابت نہیں ہوا، البتہ گرفتار کیے گئے نصراللہ تنیو سے ہتھیار بھی برآمد ہوئے تھے، اس لیے ان پر 13 ڈی کا کیس داخل کرکے انہیں چالان کرکے عدالت میں پیش کیا گیا۔
عبدالحکیم شاہ کے مطابق شان ڈھر کے قتل میں ملوث دیگر 2 مشکوک زہری برادران کے ملزمان واقعے کے فوری بعد دبئی فرار ہوگئے تھے اور اب تک وہ مفرور ہیں۔
پولیس کے مطابق شان ڈھر کا کیس اس وقت تعطل کا شکار ہے اور کوئی بھی مستند ثبوت نہ ملنے کی وجہ سے اس میں گذشتہ 3 سال سے کوئی پیش رفت نہیں ہوئی، عدالت نے گرفتار ملزم نصراللہ تنیو کو بھی ورثاء سے صلح ہونے کے بعد رہا کر دیا ہے۔
پولیس عہدیدار نے شان ڈھر کیس میں پولیس کی جانب سے کسی بھی قسم کی غفلت یا ملزمان کو تحفظ دینے کے حوالے سے مقتول صحافی کے اہل خانہ کے تمام خدشات کو مسترد کیا اور کہا کہ شان ڈھر کے کیس کی تفتیش اچھی ساکھ رکھنے والے پولیس افسران نے کی، اس لیے اس میں ملزمان کو رعایت دینے کا سوال ہی پیدا نہیں ہوتا۔
باڈہ پولیس تھانے کے اسٹیشن ہاؤس آفیسر (ایس ایچ او) عبدالغفور چھٹو نے بھی ملزمان کو کسی طرح کی رعایت یا انہیں مدد فراہم کرنے کے تاثر کو مسترد کرتے ہوئے بتایا کہ پولیس کو کسی ایک عینی گواہ نے یہ نہیں بتایا کہ صحافی کو براہ راست فائرنگ کرکے قتل کیا گیا۔
ایس ایچ او نے اندازا بتایا کہ عین ممکن ہے کہ کسی نے صحافی کو کسی ذاتی مسئلے پر قتل کیا ہو اور وہاں موجود افراد نے ان پر کسی کو فائرنگ کرتے ہوئے بھی دیکھا ہو، تاہم ڈر اور خوف کی وجہ سے وہ سامنے نہ آیا ہو، کیوں کہ گواہ خوف میں آجاتے ہیں اور انہیں اپنے تحفظ کی فکر لاحق ہوجاتی ہے۔
شان ڈھر کی بہن فوزیہ ڈھر نے بھی تسلیم کیا کہ کیس میں کوئی عینی گواہ نہیں ہے، تاہم انہوں نے دعویٰ کیا کہ ان کے بھائی کو جعلی دوائیوں کی ترسیل اور ہسپتال میں ان دوائیوں کو استعمال کرنے کی رپورٹ کرنے پر قتل کیا گیا۔
صحافیوں کے قتل کی وجوہات کے حوالے سے پاکستان پریس فاؤنڈیشن کی ایک رپورٹ کے مطابق گزشتہ 18 سال میں قتل کیے جانے والے پاکستان کے 72 میں سے 48 صحافی خبر دینے، معلومات عوام تک پہنچانے اور مسائل کی کوریج کے دوران قتل کیے گئے، جب کہ دیگر 24 صحافی مختلف وجوہات کی بنیاد پر قتل ہوئے۔
18 برس میں شان ڈھر سمیت لاڑکانہ ڈویژن کے 3 صحافیوں کو بھی خبر عوام تک پہنچانے سمیت دیگر معاملات پر قتل کیا گیا۔
لاڑکانہ ڈویژن میں 2006 میں سندھی ٹی وی چینل کے ٹی این کے کیمرا مین منیر سانگی کو بھی قتل کیا گیا تھا، جبکہ 2003 میں اسی چینل سے وابستہ شکارپور کے رپورٹر امیر بخش بروہی کو بھی قتل کیا گیا تھا۔
پاکستان میں سندھ کو صحافیوں کے حوالے سے مشکل ترین صوبہ قرار دیا جاتا ہے، اس کا اندازہ گذشتہ ماہ 4 مئی کو عالمی یوم صحافت سے ایک دن بعد وسطی سندھ کے شہر نوشہروفیروز کے نواحی شہر پڈ عیدن میں قتل کیے جانے والے صحافی علی شیر راجپر کے قتل سے بھی لگایا جا سکتاہے، جن کے قتل میں ملوث ملزمان کے خلاف تاحال درست انداز میں کارروائی کا آغاز نہیں کیا جا سکا۔
اسی طرح لاڑکانہ ڈویژن میں قتل کیے گئے منیر سانگی اور امیر بخش بروہی کے قاتلوں کو بھی سزائیں نہیں دی جا سکیں بلکہ صحافیوں کے اہل خانہ نے مجبور ہوکر ملزمان سے صلح کی اور اب اسی طرح کا دباؤ شان ڈھر کے اہل خانہ پر بھی ہے۔
تاہم شان ڈھر کی بہن فوزیہ ڈھر نے ابھی ہمت نہیں ہاری اور وہ بھائی کو انصاف دلانے کے لیے آخری سانس تک لڑنے کے لیے پر عزم ہیں۔
انہوں نے شان ڈھر کے ملزمان کو کیفر کردار تک پہنچانے کا عزم ظاہر کرتے ہوئے کہا کہ بھائی کے قتل کے بعد ان کی دنیا ختم ہوگئی، ان کی والدہ صدمے میں انتقال کر گئیں جبکہ ان کا چھوٹا سا خاندان اجڑ گیا، وہ کیسے اپنے خاندان کو اجاڑنے والوں سے صلح کریں گی؟
شان ڈھر کے ٹی وی چینل کی جانب سے مدد کے حوالے سے پوچھے گئے سوال کے جواب میں انہوں نے الزام عائد کیا کہ شان ڈھر کے ٹی وی چینل نے ان کی کوئی خاص مدد نہیں کی اور نہ ہی سندھ حکومت کی جانب سے کیے گئے اعلانات آج تک پورے ہوئے ہیں۔
تاہم اب تک نیوز کے سندھ کے بیورو چیف امتیاز چانڈیو نے ان الزامات کو مسترد کرتے ہوئے دعویٰ کیا کہ چینل نے شان ڈھر کے اہل خانہ کی مدد کی۔
ان کا کہنا تھا کہ عین ممکن ہے کہ اس وقت چینل کے کچھ عہدیداروں نے جو اب چینل کا حصہ نہیں ہیں، شان ڈھر کے اہل خانہ سے تعاون نہ کیا ہو۔
امتیاز چانڈیو مزید بتاتے ہیں کہ جب سے وہ بیورو چیف بنے ہیں، تب سے شان ڈھر کے اہل خانہ نے ان سے رابطہ نہیں کیا، اگر انہیں چینل سے شکایت ہے تو وہ رابطہ کرکے خدشات کا اظہار کر سکتے ہیں۔
شان ڈھر کے قتل کے شبے میں پولیس کی جانب سے گرفتار کیے گئے اور پھر 13 ڈی کے کیس میں چالان کیے گیے نصراللہ تنیو کا کہنا تھا کہ وہ اسی محلے میں پلے، بڑھے، جہاں شان ڈھر بڑا ہوا اور وہ ان کے بڑے بھائیوں کی طرح تھا، وہ کیسے اور کیوں انہیں قتل کریں گے؟
نصراللہ تنیو نے شان ڈھر کے اہل خانہ سے صلح کرنے کا پولیس کا دعویٰ مسترد کرتے ہوئے بتایا کہ انہیں عدالت نے عدم ثبوتوں کی بناء پر رہا کیا۔
شان ڈھر کی بہن نے بھی نصراللہ تنیو سے کسی طرح کا صلح کیے جانے کا پولیس کا دعویٰ مسترد کیا اور کہا کہ انہیں عدالت نے آزاد کیا ہے۔
نصر اللہ تنیو اگرچہ جیل سے رہا ہوگئے، تاہم انہوں نے شکایت کی کہ قتل کا جھوٹا الزام لگا کر ان کی زندگی برباد کردی گئی۔
نصراللہ کے مطابق 2014 میں وہ سندھ یونیورسٹی جامشورو میں ارضیات (جیولوجی) کے آخری سال میں زیر تعلیم تھے کہ انہیں جھوٹے الزام میں گرفتار کیا گیا، جہاں ان کی تعلیم ختم ہوئی، وہیں انہیں محلے، شہر اور احباب میں مجرم سمجھا جانے لگا۔
انہوں نے بتایا کہ انہیں خود سمجھ نہیں آ رہا کہ انہیں پولیس نے کیوں کیس میں پھنسایا، تاہم انہوں نے خدشہ ظاہر کیا کہ عین ممکن ہے کہ انہیں سیاسی وابستگی کی وجہ سے نشانہ بنایا گیا ہو۔
انہوں نے بتایا کہ وہ سیاسی طور پر سابق صوبائی وزیر الطاف انڑ کے گروپ کے حامی ہیں اور ان کے اہل محلہ اس گروپ کے مخالف ہیں عین ممکن ہے کہ اسی بناء پر انہیں نشانہ بنایا گیا ہو۔
ساتھ ہی انہوں نے کہا کہ پولیس پر اس کیس میں دباؤ بھی تھا، اس لیے وہ کسی نے کسی کو قربانی کا بکرا بنا کر خود کو آزاد کرنا چاہتی تھی، اس لیے ان کے ہتھے وہ چڑھ گئے اور ان کی زندگی برباد کردی گئی۔
ٹیکسیلا میں اپنی بیٹی کو ریپ سے بچاتے ہوئے ماں اپنی جان گنوا بیٹھی، پولیس نے مشتبہ شخص کو گرفتار کرکے مقدمہ درج کر لیا۔
واقعہ ٹیکسیلا کے قریب ایک گاؤں جلیا میں ہزرو پولیس اسٹیشن کی حدود میں پیش آیا۔
اسٹیشن ہاؤس افسر (ایس ایچ او) محمد اعظم نے صحافیوں کو بتایا کہ ملزم دیوار پھلانگ کر گھر میں داخل ہوا اور وہاں موجود ایک شادی شدہ خاتون کے ساتھ ریپ کی کوشش کی۔
خاتون اپنے سسرال والوں سے اختلافات بڑھ جانے کی وجہ سے واپس اپنی والدہ کے گھر پر رہنے آئی ہوئی تھی۔
پولیس حکام کا کہنا ہے کہ جیسے ہی ملزم نے خاتون کا ریپ کرنے کی کوشش کی تو اس نے چیخ و پکار شروع کردی جس کے نتیجے میں خاتون کی والدہ اسے بچانے کے لیے آئی، لیکن ملزم نے اس پر چاقو سے حملہ کرکے اسے شدید زخمی کردیا۔
حملہ آور والدہ کو زخمی کرنے کے بعد بیٹی کو بھی زخمی کرکے فرار ہوگیا۔
ایس ایچ او نے بتایا کہ واقعے کے کچھ دیر بعد ہمسائے دونوں زخمی خواتین کو تحصیل ہیڈکوارٹرز (ٹی ایچ کیو) ہسپتال ہزرو لے گئے، تاہم زخم گہرے ہونے کے باعث انہیں فوری طور پر راولپنڈی منتقل کیا گیا جہاں والدہ جان کی بازی ہار گئی۔
خاتون کی لاش ٹی ایچ کیو ہسپتال واپس لائی گئی جہاں متاثرہ خاتون اور حملہ آور کے اہل خانہ کے درمیان جھگڑا ہوا، تاہم پولیس نے جھگڑا کرنے والے کچھ افراد کو گرفتار کر لیا۔
ایس ایچ او ہزرو کا کہنا ہے کہ پولیس نے مشتبہ شخص کے خلاف قتل کا مقدمہ درج کرکے اسے گرفتار کر لیا۔
خاتون کی لاش کا پوسٹ مارٹم کئی گھنٹوں تک نہیں کیا گیا کیونکہ اس کے لیے ہسپتال میں لیڈی ڈاکٹر ہی موجود نہیں تھی۔
کراچی (میڈیا 92 نیوزمانٹرنگ ڈیسک ) کراچی پولیس نے دعویٰ کیا ہے کہ سپر ہائی وے کے صنعتی علاقے کے قریب چھاپہ مار کارروائی کے دوران داعش سے تعلق رکھنے والے 3 دہشت گرد ہلاک ہوگئے۔
سینئر سپرنٹنڈنٹ آف پولیس ملیر عرفان بہادر کا کہنا ہے کہ ہلاک ہونے والے دہشت گرد سندھ اور بلوچستان کے 35 سیکیورٹی اہلکاروں کے قتل میں ملوث تھے جبکہ ان میں سے ایک کراچی میں 2000 کی دہائی میں وال اسٹیٹ جرنل کے لیے کام کرنے والے امریکی صحافی ڈینیئل پرل کے قتل میں ملوث تھا۔
ان کا کہنا تھا کہ پولیس اور انٹیلی جنس اداروں نے پیر کی علی الصبح خفیہ معلومات کی بنا پر نادرن بائی پاس پر قائم خدا بخش بروہی گوٹھ پر چھاپہ مار کارروائی کی۔
انہوں نے بتایا کہ ‘کارروائی کے دوران ملزمان نے پولیس کی ٹیم پر فائرنگ کی، جوابی فائرنگ میں 3 دہشت گرد ہلاک ہوگئے جبکہ اندھیرے کا فائدہ اٹھاتے ہوئے 2 دہشت گرد فرار ہونے میں کامیاب ہوگئے’۔
پولیس نے ملزمان کے قبضے سے 2 ایس ایم جی رائفل، ایک پستول، 4 دستی بم اور ایک خودکش جیکٹ بر آمد کرلی جبکہ لعشوں کو قانونی چارہ جوئی کے لیے عباسی شہید ہسپتال منتقل کردیا۔
سینیئر پولیس افسر کا کہنا تھا کہ ہلاک ہونے والے دہشت گردوں کی شناخت شاہد، عثمان اور طلعت کے نام سے ہوئی۔
انہوں نے بتایا کہ ‘ملزمان اس سے قبل القائدہ بر صغیر سے منسلک تھے بعد ازاں انہوں نے داعش میں شمولیت اختیار کی تھی’۔
ان کا کہنا تھا کہ ہلاک ملزمان سندھ اور بلوچستان میں فوج، رینجرز اور پولیس کے 35 اہلکاروں کی ٹارگٹ کلنگ میں ملوث تھے۔
انہوں نے کہا کہ ‘ملزم شاہد امریکی صحافی ڈینیئل پرل کے قتل میں بھی ملوث تھا’۔
افسر کا کہنا تھا کہ ایک اور ہلاک ملزم عثمان چند سال قبل کورنگی کے ایک ریسٹورانٹ میں 4 پولیس اہلکاروں کو قتل کرنے میں ملوث رہا تھا، جس کے علاوہ وہ کورنگی ہی کے علاقے میں امام بارگاہ پر بھی قتل کے واقعے میں ملوث رہا تھا۔
ان کا کہنا تھا کہ عثمان اپنئے ساتھوں کے ہمراہ ضیا کالونی میں ایک پولیس اہلکار، اورنگی ٹاؤن میں 4 رینجرز اہلکار اور صدر کے علاقے میں 2 فوجی اہلکاروں کے قتل میں ملوث رہے تھے۔
انہوں نے بتایا کہ ‘تیسرے ہلاک ہونے والے ملزم طلعت محکمہ انسداد دہشت گردی (سندھ) کے ریڈ بک میں تھے ‘۔
ان کا کہنا تھا کہ طلعت القائدہ داعش میں شمولیت اختیار کرنے سے قبل القائدہ بر صغیر کے ساتھ منسلک تھا اور متعدد دہشت گردی کے واقعے میں مفرور تھا۔
ان کے مطابق یہ گروہ کراچی کے علاوہ حیدر آباد میں بھی قانون نافذ کرنے والے اداروں پر حملوں میں ملوث ہے۔
لاہور(مانٹرنگ ڈیسک)گھریلو ناچاقی ،انتقام یا کوئی اور معاملہ ہربنس پورہ کے علاقہ میں بیوی نے اپنے بھائی اور دیگر ساتھیوں سے مل کر شوہر کو چھت سے دھکا دے کر موت کے گھاٹ اتار دیا۔ پولیس نے مقدمہ درج کر کے تحقیقات کا آغاز کردیا ہے۔
تاحال کسی ملزم کی گرفتاری عمل میں نہیں آئی ۔ محمد زاہد نے پولیس کو بتایا اس کے بھائی محمد عرفان کو اس کی بیوی انعم نے اپنے بھائی خرم,مالک مکان اور دیگر سہیلیوں کے ہمراہ چھت سے دھکا دیا جس کے باعث وہ شدید زخمی ہوگیا۔ عرفان کو طبی امداد کیلئے ہسپتال لے جایا گیا جہاں ڈاکٹرز نے اس کی موت کی تصدیق کردی۔
مدعی کے مطابق چھت سے گرانے کا واقعہ اس کی آنکھوں کے سامنے پیش آیا۔ پولیس کے مطابق واقعہ کا مقدمہ درج کرتے ہوئے مقتول کی نعش مردہ خانے جمع کرا دی گئی ہے۔مزید قانونی کارروائی جاری ہے جلد ہی اصل حقائق سامنے آ جائیں گے۔
لاہور (کرائم رپورٹرسے )رات گئے انجینئر نگ یونیورسٹی کے بند سوئمنگ پول سے 12 سالہ شیراز کی لا ش ملی ہے۔ یونیورسٹی انتظامیہ کی غفلت کے باعث 12 سالہ لڑکا ہلاک ہوگیا،
شیراز اپنے دوست کے ہمراہ دوپہر کو سوئمنگ پول میں آیا اور رات گئے تک واپس گھر نہ جانے پر ورثاء نے اس کی تلاش شروع کی تو معلوم ہوا کہ شیراز سوئمنگ پول میں مردہ حالت میں پڑاہے پو لیس نے لاش قبضے میں لیکر تحقیقات شروع کردی ہیں۔
