Category جرائم

اسلام آباد (ایمرا نیوز آن لائن ) پاکستان سے خواتین اور بچوں کو جنسی استحصال کیلئے بیرونی ممالک میں غیر قانونی طریقے بھیجا جاتا ہے ۔انسانی سمگلنگ جیسے گھناونے جرم کو روکنے کیلئے سرکاری اور نجی شعبوں کے متعلقہ محکموں کو مل کر کا م کر نا ہو گا۔ ان خیالات کا اظہار مقررین نے اقوام متحدہ کے ادارہ برائے منشیات و جرائم، یو این او ڈی سی اور امریکہ کے ڈپارٹمنٹ آف اسٹیٹ کے ادارے یوایس جے کی معاونت سے ہونے والی دوسری بین الاقوامی کانفرس سے خطاب کرتے ہوئے کیا۔یو این او ڈی سی پاکستان آفس گزشتہ 35 سال سے مشترکہ مشکلات پر قابو پانے اور بین الاقوامی ذمہ داریوں کی تکمیل میں معاونت کے مقصد کے تحت حکومت پاکستان کی مدد کر رہا ہے۔

اس کانفرنس کا مقصد اہم حکومتی اداروں اور نجی شعبے کے درمیان اشتراک عمل میں بہتری لانا تھا۔ نجی شعبے کے فریقوں میں سول سوسائٹی، غیرسرکاری تنظیمیں اور نجی کارپوریشنیں شامل ہیں۔ یہ ایک حقیقت ہے کہ پاکستان میں خواتین اور بچوں کی جنسی استحصال کے لئے سمگلنگ کی جاتی ہے جو بعض اوقات زبردستی شادیوں کی صورت میں بھی ہوتی ہے۔ انسانی سمگلنگ کو کم سے کم کرنے میں مدد دینے کے لئے یو این او ڈی سی اور ایف آئی اے کئی سالوں سے مل کر کام کر رہے ہیں۔ بطور پارٹنرز یو این او ڈی سی اور ایف آئی اے اس امر سے بخوبی آگاہ ہیں کہ انسانی سمگلنگ سے نمٹنے کے لئے سرکاری اور نجی دونوں شعبوں کے متعلقہ فریقوں کو ساتھ لے کر چلنا ضروری ہے۔ اس مقصد کے لئے اسلام آباد میں ایک کانفرنس کا اہتمام کیا گیا جس میں متعدد سینئر حکومتی افسران، قانون نافذ کرنے والے اداروں کے افسران کے علاوہ سول سوسائٹی، نجی شعبے کی تنظیموں، غیرسرکاری تنظیموں، میڈیا اور اقوام متحدہ کے دیگر اداروں کے ارکان کو شرکت کی دعوت دی گئی تاکہ انسانی سمگلنگ سے نمٹنے کی کوششوں کو اجاگر کیا جا سکے اور اس سلسلے میں اشتراک عمل کو فروغ دیا جا سکے۔ ایف آئی اے کے آڈیشنل ڈائریکٹر جنرل امیگریشن جناب احمد مکرم نے اپنے ابتدائی کلمات میں یو این او ڈی سی کی کوششوں اور امریکی ڈپارٹمنٹ آف سٹیٹ کی طرف سے فراہم کی جانے والی معاونت کو سراہا۔

انہوں نے کہا کہ ان کوششوں کی بدولت پاکستان میں انسانی سمگلنگ کے خلاف قانون کا نفاذ ہوا ہے۔ انہوں نے مزید کہا کہ اس طرح کی مشترکہ سرگرمیوں سے اس مسئلے کے بارے میں متعلقہ فریقوں کے درمیان ابلاغ بہتر بنانے اور آگاہی بڑھانے میں مدد ملتی ہے۔ یہ سرگرمیاں متاثرہ افراد کے اعتراف میں مدد دیتی ہیں اور انسانی سمگلنگ سے متاثرہ افراد کے تحفظ سے متعلق خدمات کو بہتر بنانے اور دستیاب خدمات تک رسائی وسیع بنانے میں بھی مدد ملتی ہے۔یو این او ڈی سی ویانا کے کرائم پریونشن اینڈ کریمنل جسٹس آفیسر جناب ڈیوور روس نے متعلقہ فریقوں کی شرکت پر ان کا شکریہ ادا کیا۔ نجی اور سرکاری شعبے کے درمیان اشتراک عمل کی اہمیت پر زور دیتے ہوئے انہوں نے کہا کہ ہر طرح کی انسانی سمگلنگ کی روک تھام اور اس کے خاتمہ میں حکومتوں اور نجی شعبے کے درمیان اشتراک عمل وقت کا تقاضا بن چکا ہے اور انہی اجتماعی کوششوں کے ذریعے ہی ہم اس لعنت کو شکست دے سکتے ہیں اور اپنی اس دنیا کو زیادہ محفوظ بنا سکتے ہیں۔ انہوں نے مزید کہا کہ یو این او ڈی سی، سول سوسائٹی اور نجی شعبے کی تنظیموں سے امید کرتا ہے کہ وہ انسانی سمگلنگ کی روک تھام کے بارے میں آگاہی بڑھانے میں اپنا کردار ادا کریں۔ آڈیشنل ڈائریکٹر امیگریشن ایف آئی اے جناب مفخر عدیل نے بین الاقوامی و قومی اقدار اور مروجہ طریقوں پر روشنی ڈالی اور ان جرائم پر قابو پانے کے لئے ایف آئی اے کی شبانہ روز کوششوں کے بارے میں آگاہ کیا۔ یو این او ڈی سی کے کنسلٹنٹ جناب نوید احمد شنواری نے انسانی سمگلنگ کے خاتمہ میں سول سوسائٹی، این جی اوز اور نجی شعبے کے کردار، ذمہ داریوں اور مختلف سرگرمیوں پر ایک پریزنٹیشن دی۔ انہوں نے بتایا کہ اس لعنت سے نمٹنے کے لئے ہر شعبہ اپنی اپنی جگہ کوششیں کر رہا ہے لیکن ایک کلی سوچ کے تحت اس مسئلے سے نمٹنے کے لئے متعلقہ فریقوں کے درمیان کوآرڈینیشن نہیں ہو رہی۔ امریکی سفارتخانہ اسلام آباد کی محترمہ لوسی کوبرن نے ایک پریزنٹیشن دی جبکہ انسانی سمگلنگ کی نگرانی اور روک تھام کے لئے امریکی سٹیٹ ڈپارٹمنٹ کے ادارے سے محترمہ سمانتھا نوویک اور محترمہ اینڈریا بیلنت نے بھی اس کانفرنس میں شرکت کی۔ متعدد شرکاءنے اس موقع پر انسانی سمگلنگ اور اس سے نمٹنے میں نجی شعبے کے کردار کو بہتر طور پر سمجھنے کے لئے سرکاری پارٹنرز کے ساتھ مل کر کام کرنے کا عزم ظاہر کیا۔ کانفرنس کے آخر میں یو این او ڈی سی اور ایف آئی اے کی جانب سے امید کا اظہار کیا گیا کہ انسانی سمگلنگ کی روک تھام سے نمٹنے کے لئے مل کر کام کیا جائے گا اور پالیسی اور اس پر عملدرآمد میں پائی جانے والی خامیوں کو دور کرنے میں متعلقہ فریقوں کی مدد کی جائے گی۔ کانفرنس کا انعقاد انسانی سمگلنگ کی نگرانی اور خاتمہ کے لئے امریکی سٹیٹ ڈپارٹمنٹ کے ادارے کی جانب سے مالی معاونت کی بدولت ممکن ہوا۔

اسلام آباد (میڈیا 92 نیوز آن لائن ) وفاقی دارالحکومت اسلام آباد میں کینیڈین ماڈل خاتون کو حراساں کرنے کے خلاف سہالہ پولیس اسٹیشن میں مقدمہ درج کر لیا گیا۔
پولیس کے مطابق سہالہ پولیس اسٹیشن کی حدود میں واقع نجی ہاؤسنگ سوسائٹی میں دو نوجوانوں کی جانب سے سماجی کارکن کینیڈین خاتون اسومی جے کو حراساں کیا گیا۔

درج کیے گئے مقدمہ کے مطابق دو نوجوانوں نے خاتون کی ٹیکسی کو زبردستی سڑک کے درمیان میں روکا اور اپنی کار میں بیٹھانے کی کوشش کی۔ خاتون کی جانب سے مزاحمت پر ملزمان خاتون کی گاڑی کا پیچھا کرتے رہے اور اُن کے ڈرائیور سے بار بار گھر کا پتہ معلوم کرتے رہے۔
ایف آئی آر کا عکس
بعد ازاں خاتون نے ملزمان کے ڈر سے نجی شاپنگ مال میں پناہ لی اور ملزمان سے چھٹکارا حاصل کیا۔ اس دوران خاتون کی جانب سے پولیس کو بھی اطلاع کر دی گئی۔

متاثرہ خاتون نے الزام عائد کیا کہ وفاقی پولیس کی جانب سے فوری مدد نہیں کی گئی۔ جب ہیلپ لائن 15 پر فون کیا گیا تو جواب ملا کہ تھانے میں فون کریں اور اپنی شکایت سے متعلق درخواست جمع کرائیں۔ پولیس کی جانب سے حوصلہ افزا جواب نہ ملنے پر وزیر اعظم کے پاکستان سیٹیزن پورٹل پر شکایت درج کرائی گئی۔

پاکستان سیٹیزن پورٹل سے متعلقہ شکایت ایس پی کو بھجوائی گئی جس کے بعد متاثرہ خاتون سے رابطہ کر کے واقعہ کا مقدمہ درج کیا گیا۔

انسپکٹر جنرل (آئی جی) اسلام آباد پولیس نے 24 گھنٹے میں ملزمان کی گرفتاری کا حکم دے دیا

واضح رہے کہ کینیڈین خاتون اسومی جے نے پاکستانی شہری سے شادی کر رکھی ہے اور سال 2018 سے پاکستان میں ہی رہائش پذیر ہیں جب کہ اسومی پاکستان کا اچھا اور پر امن تاثر پیدا کرنے کے لیے سوشل میڈیا پر بھی کافی متحرک ہیں۔

لاہور(نیٹ نیوز) منی لانڈرنگ کیس میں چیئرمین نیب نے شریف خاندان کی خواتین کے طلبی کے نوٹس منسوخ کر دئیے۔ چیئرمین نیب شریف فیملی کے تمام کیسز کی نگرانی خود کرینگے۔ نیب اعلامیے میں کہا گیا ہے کہ چیئرمین نیب نے شہباز شریف کی اہلیہ نصرت شہباز اور دونوں صاحبزادیوں رابعہ عمران، جوریہ علی کے طلبی کے نوٹس منسوخ کئے۔ چیئرمین نیب نے نیب کو مطلوب معلومات کے لئے سوالنامہ ارسال کرنے کا حکم دیا۔ شریف خاندان کی خواتین کو آج ہی سوالنامے ارسال کر دئیے جائیں گے۔ مذکورہ اقدامات اس بات کے غماز ہیں کہ نیب خواتین کے تقدس، حرمت، عزت ،چادر اور چاردیواری پر مکمل یقین رکھتا ہے۔

اسلام آباد (میڈیا 92 نیوز آن لائن ) جوڈیشل مجسٹریٹ نے اسلام آباد میں توہین مذہب کے جرم میں ایک شخص کو 14روزہ جوڈیشل ریمانڈ پر جیل بھیج دیا۔

اس شخص کو شمس کالونی پولیس اسٹیشن میں اس کے خلاف دفعہ 295 اے کے تحت درج مقدمے میں گرفتار کیا گیا جس کے تحت کسی شخص کے مذہب یا مذہبی جذبات کی جان بوجھ کر بدنیتی پر مبنی عزائم کے ساتھ تضحیک کرنے اور اسے مذہبی اشتعال دلانے کی کوشش کی گئی ہے

جبکہ پاکستان پینل کوڈ کی دفعہ 298 اے کے تحت بھی مقدمہ درج کیا گیا ہے جس کے تحت مقدس شخصیات کے خلاف توہین آمیز الفاظ کا استعمال جرم ہے۔

اس سے قبل ایک مقامی، محمد سہیل، نے ایس ایس پی اسلام آباد سے رابطہ کر کے شکایت درج کرائی تھی کہ اس کا ایک دوست، جو پیشے کے اعتبار نائی ہے، نے اسے ایک مشتبہ شخص اور اس کی گستاخانہ سرگرمیوں کے بارے میں بتایا ہے۔

ایف آئی آر کے مطابق شکایت گزار نے اپنے دوستوں سے مشورے کے بعد مشتبہ فرد کے خلاف قانونی کارروائی کے لیے معاملہ رپورٹ کرنے کا فیصلہ کیا۔

شکایت گزار نے کہا کہ مشتبہ شخص کے عمل سے علاقے کے لوگوں کے مذہبی جذبات مجروح ہوئے جس سے علاقہ مکینوں میں شدید اشتعال پایا جاتا ہے اور امن و امان کی صورتحال خراب ہو سکتی ہے۔

تفتیشی افسر سب انسپکٹر محمد نواز نے کہا کہ مشتبہ شخص کو جوڈیشل مجسٹریٹ کے سامنے پیش کیا گیا جنہوں نے اسے ریمانڈ پر جیل بھیج دیا۔

پولیس نے ملزم کے موبائل فون اور لیپ ٹاپ کو قبضے میں لے کر ثبوت اکٹھا کرنے کے لیے فیڈرل انویسٹی گیشن ایجنسی (ایف آئی اے) کے پاس بھیج دیئے ہیں۔

شیخوپورہ (میڈیا 92 نیوز آن لائن ) شیخوپورہ میں تھانہ گلبرگ لاہور کی پولیس وین الٹ گئی جس کے نتیجے میں 4 پولیس اہلکار جاں بحق، ایک زیر حراست ملزم اور 3 اہلکار شدید زخمی ہو گئے، زخمیوں کو تشویشناک حالت میں لاہور کے جنرل ہسپتال منتقل کر دیا گیا ہے۔

تھانہ گلبرگ لاہور کے پولیس اہلکار لیہ میں چھاپہ مارنے کے بعد امانت میں خیانت کے مقدمے میں مطلوب ملزم کو گرفتار کرنے کے بعد لاہور لارہے تھے کہ شیخوپورہ میں بھکھی کے قریب پولیس وین ٹائرپھٹنے کی وجہ سے الٹ گئی،

حادثے میں 2 پولیس اہلکار مجاہد اور کوثر جاں بحق اور 5 پولیس اہلکار شدید زخمی ہو گئے جن میں سے 2 بعد ازاں زخموں کی تاب نہ لاتے ہوئے چل بسے جبکہ زیرحراست ملزم بھی حادثے میں شدید زخمی ہوا ہے۔

واقعہ کے فوری بعد ریسکیو اہلکاروں نے زخمیوں کو فوری طور پر ڈی ایچ کیو ہسپتال شیخوپورہ اور پھروہاں سے تشویشناک حالت کے پیش نظر جنرل اور میو ہسپتال لاہور منتقل کر دیا۔

لاہور (میڈیا 92 نیوز آن لائن ) لاہور میں پولیس موبائل کی ٹکر سے موٹر سائیکل سوار 22 سالہ جوان شہریار علی جاں بحق ہو گیا۔ پولیس اہلکاروں کے خلاف مقدمہ درج کر لیا گیا۔

لاری اڈہ کے قریب تیز رفتار پولیس موبائل نے 5 بہنوں کے اکلوتا بھائی کو ٹکر مار دی۔ بھائی کے انتظار میں بیٹھی بہنوں کو معلوم نہیں تھا کہ آج اُن پر قیامت ٹوٹ پڑے گی اور اکلوتے چہیتے بھائی کی لاش گھر لائی جائے گی۔
پولیس گاڑی کی ٹکر سے جاں بحق ہونے والا شہریار اپنے دوستوں فیضان اور زمان کے ہمراہ گھر جا رہا تھا۔ حادثے میں فیضان بھی زخمی ہوا جسے قریبی اسپتال منتقل کیا گیا۔

جاں بحق ہونے والے شہریار کے لواحقین نے میت سڑک پر رکھ کر پولیس کے خلاف احتجاج کیا اور سڑک کو ٹائر جلا کر بند کر دیا۔ لواحقین نے پولیس اہلکاروں کے خلاف مقدمہ درج کرنے تک احتجاج جاری رکھنے کا اعلان کیا۔

پولیس نے مظاہرین کو سڑک سے ہٹانے کی کوشش کی تو مظاہرین مشتعل ہو گئے
اس موقع پر مظاہرین نے پولیس کے خلاف شدید نعرے لگائے جب کہ پولیس اہلکاروں اور مظاہرین کے درمیان دھکم پیل بھی ہوئی۔ جس کے بعد مظاہرین نے اپنا احتجاج جاری رکھا اور پولیس اہلکاروں پیچھے ہٹنے پر مجبور کر دیا۔

مظاہرین سے مذاکرات کے لیے ایس پی سٹی غضنفر علی شاہ موقع پر پہنچے اور مظاہرین کو انصاف کی فراہمی کی یقین دہانی کراتے ہوئے کہا کہ تحقیقات کے بعد ذمہ داروں کے خلاف محکمانہ کارروائی کی جائے گی۔
لواحقین کے احتجاج پر واقعہ میں ملوث پولیس ملازمین اے ایس آئی راحیل مقبول، اہلکار محمد امین، ندیم اور ڈرائیور محمد حسین کے خلاف مقدمہ درج کر لیا گیا جب کہ لاش کو پوسٹ مارٹم کے لیے میئو اسپتال منتقل کیا گیا۔

پولیس اہلکاروں کے خلاف مقدمہ درج ہونے پر مظاہرین نے اپنا احتجاج ختم کر دیا اور پر امن طور پر منتشر ہو گئے۔

لاہور ( میڈیا 92 نیوز آن لائن ) میں 20روپے کے تنازعے پر نوجوان کو قتل کردیا گیاہے ۔ لاہور پولیس کے مطابق یہ افسوسناک واقعہ گزشتہ شام ساندہ کے علاقہ میں پیش آیا۔ محض 20 روپے کے تنازعے پر 30 سالہ نوجوان کو قتل کردیا گیاہے۔

مقتول ذوالفقار پنکچر لگانے کا کام کرتا تھا۔ پولیس تفتیش کے مطابق چار روز قبل پنکچر لگانے کی مزدوری کے معاملے پر ذوالفقار کا کسی نامعلوم شخص سے جھگڑا ہوا۔ ملزم دھمکیاں دیتے ہوئے وہاں سے روانہ ہو گیا۔
چار روز بعد ملزم نے آ کر ذوالفقار کو گولیاں مار کر قتل کر دیا،ملزم موقع سے فرار ہوگیا۔ پولیس نے لاش کو مردہ خانے منتقل کر دیاہے۔

لاہور پولیس نے مقتول کے بھائی کی مدعیت میں درج کرلیا ہے ۔ پولیس کے مطابق معاملے کی تحقیقات جاری ہیں جلد ملزم قانون کی گرفت میں ہوگا۔

دوسری جانب 20روپے کی پارکنگ فیس کے تنازع پر ایک شخص قتل،تین افراد زخمی ہو گئے۔تفصیلات کے مطابق ایبٹ آباد کے ڈسٹرکٹ ہیڈکوارٹر ہسپتال کے باہر پارکنگ فیس پر تنازعہ ہو گیا۔
یاد رہے اس سے قبل ستمبر 2017 میں صوبہ خیبرپختونخوا کے ضلع ایبٹ آباد میں بھی 20روپے کی معمولی پارکنگ فیس پر تنازعہ اتنا بڑھا کہ پارکنگ کے ٹھیکے دار نے فائرنگ شروع کر دی ۔فائرنگ کے نتیجے میں ایک راہگیر قتل جبکہ 3افراد زخمی ہو گئے تھے

میڈیا رپورٹس مطابق قتل ہونے والا راہگیر مریض تھا جو ہسپتال سے دوا لینے کے بعد گھر جا رہا تھا کہ فائرنگ کا شکار ہو گیا۔فائرنگ کے بعد ملزم فرار ہو گیاتھا۔

کرائسٹ چرچ(ایمرا نیوز رپورٹ رضا ملک سے)
نیوزی لینڈ کے شہر کرائسٹ چرچ کی مساجدپرسفید فام انہتاپسندوں کے حملے سے 30سے زائد افراد جان سے ہاتھ دھوبیٹھے ہیں جن میں خواتین اور بچے بھی شامل ہیں. حملہ آوروں نے خودکار میشن گنوں سے اس وقت اندھادھند فائرنگ کردی جب مساجد میں جمعہ کی نماز اداکی جارہی تھی. مقامی ذرائع ابلاغ کے مطابق ملزم نے اپنی شناخت آسٹریلوی شہری برینٹن ٹیرینٹ کے نام سے کی ہے،حملہ آورفوجی وردی میں ملبوس تھا،جس کی عمر 30 سے 40 سال بتائی جارہی جبکہ ایک عورت سمیت اس کے4ساتھی شہر کے دوسرے علاقوں سے گرفتار ہوئے ہیں.امریکی نشریاتی ادارے کے مطابق ملزم نے اپنے سوشل میڈیا اکاﺅنٹ سے اسلام مخالف مواد کے87صفحات پوسٹ کیئے جن میں لوگوں کو مسلمانوں پر حملوں کے لیے اکسایا گیا تھا.

اسی طرح ملزم تارکین وطن کے خلاف بھی قابل اعتراض مواد پوسٹ کرتا رہا ہے سوشل میڈیا پر. ملزمان نے اپنی کاروائیوں کو فیس بک اور دیگر سوشل میڈیا اکاﺅنٹس پر لائیو دکھایا تاہم مقامی پولیس کی درخواست پر فیس بک انتظامیہ نے اس مواد کو ہٹا دیا. واضح رہے کہ آسٹریلیا سفید فام انتہاپسندوں(white supremacist) کا بڑا مرکزسمجھا جاتا ہے. بتایا گیا ہے کہ حملہ آور جدید ہتھیاروں سے لیس اور پیٹرول بموں سے بھری گاڑی کیساتھ پہنچا جو ہیلمٹ میں لگے کیمرے سے واردات کی ویڈیو لائیو اسٹریمنگ کرتارہا. مسلح سفید فام انتہا پسند نے مسجد میں داخل ہوتے ہی اندھا دھند فائرنگ کی، اس نے کئی بار گن کو ری لوڈ کیا اور مختلف کمروں میں جا کر فائرنگ کی. یہ بھی کہا کہ 3 منٹ تک مسجد میں فائرنگ کرنے کے بعد حملہ آور مرکزی دروازے سے باہر نکلا،جہاں اس نے گاڑیوں پر بھی فائرنگ شروع کر دی‘پولیس حکام کے مطابق اب تک چار افراد جن میں ایک عورت بھی شامل ہے کو اب تک حراست میں لیا جا چکا ہے تاہم ان کی شناخت ظاہر نہیں کی گئی.

وزیرِ اعظم جاسنڈا آرڈرن نے اسے نیوزی لینڈ کی تاریخ کا سیاہ ترین دن قرار دیا ہے‘پولیس کمیشنر مائیک ب±ش کے مطابق ڈین ایوینیو اور لِن ووڈ ایوینیو کی مساجد سے بھی ہلاکتوں کی اطلاعات ہیں‘پولیس نے لوگوں کو خبردار کیا ہے کہ جائے وقوعہ کے قریبی علاقوں سے دور رہیں، جبکہ اردگرد کے تمام سکول اور ہسپتال بند کر دیے گئے ہیں. عینی شاہدین نے بتایا کہ حملہ جمعے کے نماز کے دوران کیا گیا اور وہ حملہ آور سے اپنی جان بچا کر بھاگے‘ایک غیر مصدقہ ویڈیو بھی منظر عام پر آئی ہے جو مبینہ طور پر حملہ آور کی بنائی ہوئی ہے اس میں اسے لوگوں پر فائرنگ کرتے دیکھا جا سکتا ہے. پولیس نے ہدایات دی ہیں کہ کرائسٹ چرچ کے رہائشی تا حکم ثانی اپنے اپنے گھروں کے اندر رہیں اور باہر نکلنے سے گریز کریں. نیوزی لینڈ کے دورہ پر آئی بنگلہ دیش کرکٹ ٹیم کے کھلاڑی تمیم اقبال نے ایک ٹویٹ میں بتایا کہ پوری ٹیم جان بچا کر نکلنے میں کامیاب ہوگئی ٹیمکے کھلاڑی فائرنگ کے وقت نماز جمعہ ادا کرنے کے لیے مسجد آئے ہوئے تھے‘پریس کانفرنس کرتے ہوئے بنگلا دیش کرکٹ ٹیم کے کپتان تمیم اقبال نے کہا کہ بنگلا دیشی کرکٹ ٹیم کے تمام کھلاڑی اس واقعے میں محفوظ رہے.
بنگلا دیشی کرکٹر مشفق الرحیم نے اس موقع پر کہا کہ مسجد میں بنگلا دیشی ٹیم بھی موجود تھی جو اس واقعے میں محفوظ رہی‘انہوں نے کہا کہ ہم بہت خوش قسمت رہے کہ فائرنگ کے اس واقعے میں اللہ تعالیٰ نے ہمیں محفوظ رکھا، ہم کبھی نہیں چاہیں گے کہ ایسا دوبارہ ہو. واقعے کے حوالے سے نیوزی لینڈ کرکٹ بورڈ نے بیان جاری کیا ہے جس میں کہا ہے کہ دونوں ملکوں نیوزی لینڈ اور بنگلا دیش کے کھلاڑی محفوظ ہیں.

نیوزی لینڈ کرکٹ بورڈ نے یہ بھی کہا ہے کہ اگلے لائحہ عمل کے لیے اتھارٹیز کے ساتھ کام رہے ہیں کل سے شروع ہونے والے ٹیسٹ میچ کے حوالے سے اقدامات پر بات چیت جاری ہے. ادھر حملے کے بعد نیوزی لینڈ اور بنگلا دیش کی کرکٹ ٹیموں کے درمیان ہونے والا تیسرا ٹیسٹ منسوخ کر دیا گیا ہے. ٹیسٹ منسوخ کرنے کا فیصلہ نیوزی لینڈ اور بنگلا دیش کے کرکٹ بورڈز نے مشترکہ طور پر کیا ہے، دونوں ملکوں کے درمیان تیسرا ٹیسٹ کل سے ہیگلے اوول میں کھیلا جانا تھا .نیوزی لینڈ میں پاکستانی ہائی کمیشن کے مطابق کرائسٹ چرچ کی مسجد نور اور مسجد لنٹن میں فائرنگ کے واقعے میں کسی پاکستانی کے زخمی ہونے کی اطلاع نہیں ہے.

لڑکی حاملہ ہوگئی ، ملزم موبائل پر فورن ویڈیو دیکھنے کا عادی تھا ، جنسی تسکین کیلئے اپنی بہن کو زیادتی کا نشانہ بنایا ، پولیس نے گرفتار کرکے جیل منتقل کردیا
ممبئی(ایمرا نیوز آن لائن) بھارتی عدالت نے گاں کموتھے کے رہائشی 14 سالہ لڑکے کو اپنی 16 سالہ بہن کے ساتھ ریپ اور اسے حاملہ کرنے کے الزام میں بچوں کی جیل منتقل کردیا۔ پولیس آفیسر سب انسپکٹر پارشورام بھاتوسے کا کہنا تھا کہ ملزم اپنے موبائل پر پورن ویڈیوز دیکھنے کا عادی تھا اور اس نے جنسی تسکین حاصل کرنے کے لیے اپنی بڑی بہن کو نشانہ بنایا۔رپورٹ میں بتایا گیا کہ جس وقت والدین مکان کے گرانڈ فلور پر قائم دکان میں ہوتے تو ملزم اور اس کی بہن اپنے مکان کی پہلی منزل پر ہوتے تھے۔پولیس کا کہنا تھا کہ مذکورہ واقعے کے حوالے سے والدین کو اس وقت معلوم ہوا جب وہ اپنی بیٹی کو پیٹ میں درد کے باعث علاج کے لیے ڈاکٹر کے پاس لے کر گئے۔جہاں ڈاکٹر نے لڑکی کا چیک اپ کیا اور بتایا کہ وہ حاملہ ہے، اس کے علاوہ خون کے حاصل نمونے کے ٹیسٹ میں بھی تصدیق ہوئی کہ لڑکی 2 ماہ کی حاملہ ہے۔پولیس افسر نے مزید بتایا کہ مذکورہ ڈاکٹر چائلڈ ویلفیئر کمیٹی کی رکن ہیں جنہوں نے کم عمر لڑکی کے ساتھ پیش آنے والے واقعے کے حوالے سے پولیس کو آگاہ کیا۔جس کے بعد خاتون پولیس اہلکاروں نے لڑکی سے تفتیش کی، متاثرہ لڑکی نے پولیس کو بتایا کہ اس کا چھوٹا بھائی گزشتہ 2 ماہ سے اس کے ساتھ ریپ کررہا ہے۔پولیس نے واقعے کا مقدمہ درج کرکے 14 سالہ ملزم کو عدالت میں پیش کیا اور عدالتی حکم پر اسے بچوں کی جیل منتقل کردیا گیا۔

لاہور(میڈیا 92 نیوز) پنجاب لینڈ ریکارڈ اتھارٹی میں بطور ڈائریکٹر مانیٹرنگ اینڈ کوالٹی اور ایچ آر کے عہدے پر براجمان آفیسر عاصم جاوید کے اچانک تبادلے نے محکمہ کی کمزور پالیسیوں کے پول کھول کر رکھ دیئے ایک سال سے زائد عرصہ تعینات رہنے والے آفیسر سے ملازمین کے سروس رولز اور سروس سٹرکچر کے حوالے سے کوئی تیاری نہ کی بلکہ پرکشش تنخواہوں کی وصولی کرتے ہوئے سرکاری خزانے پر بوجھ ثابت ہوئے مزید ذرائع نے آگاہی دی ہے کہ پنجاب لینڈ ریکارڈ اتھارٹی میں بطور ڈائریکٹر مانیٹرنگ اینڈ کوالٹی انشورنس اور ڈائریکٹر ایڈمن کا ایک سال سے چارج سنبھالنے والے آفیسر عاصم جاوید کے اچانک تبادلے نے کئی سوالات کو جنم دیدیا ہے ایک طرف تو صوبے بھر کے ملازمین سروس رولز مکمل کئے جانے اور سروس سٹرکچر کی بحالی کے لئے اراضی ریکارڈ سنٹر بند کر کے سڑکوں پر احتجاج کر رہے ہیں اور ہڑتال دوسرے روز میں داخل ہو چکی ہے دوسری جانب عاصم جاوید ڈائریکٹر ایڈمن اینڈ کوالٹی انشورنس کے اچانک تبادلے سے مزید شکوک و شبہات بھی پیدا ہو چکے ہیں ذرائع نے مزید آگاہی دی ہے کہ منسٹر ریونیو کرنل انور اور پنجاب حکومت کی جانب سے سروس رولز میں تاخیر کی وجوہات اور تیاری میں رکاوٹ کا سبب عیاں ہونے سے پہلے پہلے اپنی جان چھڑانے کے لئے عاصم جاوید ڈائریکٹر ایڈمن نے خود تبادلہ کر دیا ہے ذرائع کا کہنا ہے کہ اس طرح 2007ءسے لیکر 2018ءتک ڈائریکٹر پالیسی کے عہدے پر براجمان رہنے والے افسران بھی 4-4لاکھ سے زائد تنخواہیں تو وصول کرتے رہے ہیں مگر کارکردگی صفر بٹا صفر نظر آئی ہے ذرائع نے مزید آگاہی دی ہے کہ قومی خزانے سے لاکھوں روپے تنخواہیں وصول کرنے والے ان افسران نے ان تنخواہوں کی مد میں انتظامی کام نہ کیا ہے ڈی جی اینٹی کرپشن پنجاب حسین اصغر اور ڈائریکٹر اینٹی کرپشن محمد اصغر جوئیہ اس کیس پر تحقیقات کریں کہ کیسے لاکھوں روپے کی پرکشش تنخواہیں وصول کرنے والے قومی خزانے کو لوٹتے رہے ہیں اور کام صرف کاغذی کارروائی تک محدود رہا ہے جس سے تمام حقیقت بھی سامنے آ سکتی ہے۔