Category صحت

سان فرانسسكو:(نیٹ نیوز/ایمرا نیوز) کمپیوٹر اور لیپ ٹاپ پر خاص انداز سے نظر جمانے کا عمل گردن، کندھوں اور مہروں کے درد کی وجہ بن رہا ہے بظاہر یہ بے ضرر انداز ہی غنودگی، عدم توجہ، دردِ سر، پٹھوں کے تناؤ اور مہروں میں مستقل بگاڑ کی وجہ بھی بن رہا ہے۔سان فرانسسکو اسٹیٹ یونیوررسٹی میں صحت کے پروفیسر ایرک پیپر اور ان کے ساتھیوں نے کہا ہے کہ جب آپ سیدھے اور کھڑے ہوکر اپنی گردن کو ستواں رکھتے ہیں تو آپ کا جسم آپ کے سر اور گردن کا وزن سہار لیتا ہے جو 12 پونڈ تک ہوسکتا ہے۔

جیسے ہی آپ (اوپر تصویر کے مطابق) اپنے چہرے کو اسکرین کے قریب لاتے ہیں تو آپ کا سر 45 درجے زاویے تک چلا جاتا ہے اب گردن اور سر کا بوجھ بڑھ کر 45 پونڈ تک جاپہنچتا ہے اور لوگ، گردن، کاندھوں، حرام مغز اور دردِ سر کی شکایت کرنے لگتے ہیں یہاں تک کہ گردن گھمانا بھی مشکل ہوجاتا ہے اور کمر کے درد کا عارضہ بھی لاحق ہوجاتا ہے۔اس کے لیے ماہرین نے کئی طلبا و طالبات کا سروے کیا جس میں کمپیوٹراستعمال کرتے ہوئے سر اور گردن کی پوزیشن کا جائزہ لیا گیا۔ پہلے 87 افراد سے کہا گیا کہ وہ سر کو گردن کی سیدھ میں رکھیں اور پھر گردن دائیں اور بائیں گھمائیں اور 92 فیصد افراد نے اپنی گردن انتہائی حد تک گھمائی۔

اب طلبا سے کہا گیا کہ وہ چہرے کو گردن کی سیدھ سے آگے کی جانب بڑھائیں اور ان سے کہا کہ وہ اسی انداز میں رہتے ہوئے اپنی گردن دائیں اور بائیں گھمائیں۔ صرف 30 سیکنڈ بعد ہی 98 فیصد رضاکاروں نے گردن، سر، یا آنکھوں میں درد اور تناؤ کی شکایت کی۔بعد ازاں الیکٹرو مایوگرافی اور دیگر آلات کے ذریعے دیکھا گیا تو معلوم ہوا کہ سر آگے کرنے کی پوزیشن میں خاص ٹراپیزئیس پٹھوں پر تناؤ بہت بڑھ گیا تھا۔ اسی بنا پر ماہرین کہہ رہے کہ آپ کو کمپیوٹر کے سامنے بیٹھنے کا اندازہ نہیں ہوتا اور جب بھی کاندھوں، سر یا گردن میں درد محسوس ہو تو فوری طور پر اپنے بیٹھنے گردن اور سر کی پوزیشن کا جائزہ لیں۔ماہرین نے اس ضمن میں کہا ہے کہ جب بھی کمپیوٹر یا لیپ ٹاپ کے سامنے بیٹھیں تو سمجھیں کہ چھت سے ایک ان دیکھا دھاگا بندھا ہے جس کا اگلا سرا آپ کے سر سے جڑا ہے۔ اس طرح گردن سیدھی رکھ کر کئی مسائل سے بچا جاسکتا ہے۔

لاہور(نیٹ‌ نیوز) وزیر صحت پنجاب ڈاکٹر یاسمین راشدنے سرگنگا رام ہسپتال کے ایمرجنسی بلاک کا اچانک دورہ کیا ۔ایمرجنسی کی انتظارگاہ میں بیٹھے مریضوں کی شکایات پر فوری احکامات جاری کئے ، ایمرجنسی بلاک کے ساتھ ساتھ لیبر روم اور آپریشن تھیٹر کا بھی معائنہ کیا۔وزیر صحت نے ایمرجنسی وارڈ میں داخل مریضوں سے بھی فرداً فردا ً ملاقات کی ۔سر گنگارام ہسپتال کی ایمرجنسی کی انتظارگاہ میں بیٹھے مریضوں کی شکایات پر فوری احکامات جاری کئے ۔دریں اثنا سابق مرکزی صدر پی ایم اے ڈاکٹر محمد سرور چودھری کی یاد میں تعزیتی ریفرنس زیر صدارت صوبائی وزیر صحت آج7 جنوری کو صبح جناح آڈیٹوریم کنگ ایڈورڈ میڈیکل یونیورسٹی میں منعقد ہو گا۔

لاہور(نیٹ نیوز/ایمرا نیوز) شدید سردی میں بارشیں نہ ہونے سے خشک سردی کے باعث شہری مختلف قسم کی موسمی بیماریوں کا شکار ہو رہے ہیں۔

ماہرین طب کا کہنا ہے کہ بارش ہوجانے سے یہ تمام بیماریاں ختم ہو جائیں گی۔طبی ماہرین نے شہریوں کو اس سردموسم میں احتیاط کرنے اور غذا میں انڈوں، سوپ، یخنی، مچھلی، خشک میوہ جات اور گرم دودھ کا استعمال زیادہ کرنے پر زور دیا ہے۔

لندن:(نیٹ نیوز/ایمرا نیوز) برطانیہ میں سانس کی بایوپسی کی طبی آزمائشیں (کلینکل ٹرائلز) شروع ہوگئے ہیں جس سے کینسر کی شناخت میں مدد ملے گی۔ دو سال تک ایک خاص آلے کو انسانوں پر آزمایا جائے گا تاکہ سانس میں چھپے سرطان کے مرکبات کا اندازہ لگا کر اس کی افادیت کا جائزہ لیا جاسکے۔کیمبرج میں واقع کینسر ریسرچ انسٹی ٹیوٹ اور اول اسٹون میڈیکل مشترکہ طور پر آلے کی آزمائش کریں گی۔ دونوں مل کر بریتھ بایوپسی ٹیکنالوجی کے مختلف پہلوؤں کا جائزہ لیں گے۔اس غیرمعمولی آزمائشی نظام کے تحت 1500 سے زائد انسانی سانس کی آزمائش کی جائے گا تاکہ سانس میں پوشیدہ خاص اجزا سے مختلف کینسر کی شناخت کی جاسکے جنہیں طبی زبان میں بایو مارکرز کہا جاتا ہے۔

اگر سینسر کامیاب ہوجاتا ہے تو سرطان کی تشخیص میں یہ ایک انقلابی قدم ہوگا۔اگرچہ گزشتہ عرصے میں ملیریا سمیت کئی بیماریوں کے لیے سانس کے ذریعے مرض معلوم کرنے والے بریتھلائزر بنائے گئے ہیں لیکن ان کی افادیت اب تک ثابت نہ ہوسکی لہٰذا ان کے عام استعمال کا بھی سوال پیدا نہیں ہوتا۔پہلے مرحلے میں پھیپھڑے کے سرطان پر توجہ دی جائے گی اور اس ضمن میں ولیٹائل آرگینک کمپاؤنڈز ( وی او سی) تلاش کئے جائیں گے جو کئی اقسام کے کینسر کو ظاہر کرتے ہیں۔خیال یہ ہے کہ مختلف کینسر کی صورت میں سانس کے ساتھ وی او سی خارج ہوتے ہیں لیکن اس کی کئی اقسام ہیں اور انہی کی آزمائش ہی ماہرین کا ہم ہدف ہے تاہم پھیپھڑے کے سرطان کے ساتھ ساتھ سانس کا سینسر، غذائی نالی، معدے، گردے، مثانے، پروسٹیٹ، جگر اور پتے کے سرطان کی ’بو‘ سونگھنے کی کوشش کرے گا۔یہ آلہ 10 منٹ میں سانس کا نمونہ جمع کرکے اسے ایک کیسٹ نما کارٹریج میں داخل کرے گا جسے بعد میں ماس اسپیکٹرو میٹری کمیتی طیف نگاری) سے اس کی کیمیائی ترکیب معلوم کرنے کے لیے استعمال کیا جائے گا تاہم اس آزمائش کے نتائج 2021ء میں شائع کیے جائیں گی۔

لاہور(نیٹ نیوز) نان رجسٹرڈ کاسمیٹکس کی مارکیٹ میں سر عام فروخت سے خواتین کینسر سمیت دیگر جلدی بیماریوں کا شکا ہونے لگیں۔ اس وقت مارکیٹ میں15ہزار سے زائد میڈیکل سے منسلک ادویات، شیمپو اور کریموں سمیت میک اپ کا مکمل سامان فروخت ہورہا ہے جس میں مرکری پارہ، سٹیرائیڈ سمیت متعدد کیمیکل شامل ہیں جنہیں کسی بھی لیبارٹری سے گزارے بغیر مارکیٹ میں لانے کی اجازت نہیں ہے، چار سال سے قانون بننے کے باوجود کمپنیوں کو جان بوجھ کر چھوٹ دے دی گئی ہے۔ حیران کن امر ہے کہ یہ ڈرگ ریگولیٹری اتھارٹی پاکستان کی کرپشن ہے یا غفلت؟ ڈریپ کے رولز 2014 کے ایس آر او412کے تحت گزشتہ چار سال سے قانون سازی ہونے کے باوجود مارکیٹ میں15ہزار سے زائد کاسمیٹکس پراڈکٹ رجسٹرڈ نہ ہوسکی ہے اور ڈریپ سمیت دیگر اداروں نے اس پر خاموشی اختیار کررکھی ہے۔ افسوس کا مقام ہے کہ تاحال 99 فیصد کاسمیٹیکس کو رجسٹرڈ نہیں کیا گیا ہے جس کے باعث مرکری پارہ، سٹیرائیڈ اور مختلف کیمیکل کا بے دریغ استعمال خواتین سمیت تمام استعمال کرنے والوں کو مختلف جلدی اور خونی بیماریوں کا سبب بنا رہا ہے۔ ہر کمپنی اپنی پراڈکٹ میں شیمپوز اور میک اپ کے سامان سمیت دیگر کاسمیٹیکس کو رنگ گورا کرنے، کیل چھائیاں دور کرنے اور بالوں کو گرے کے علاوہ خشکی دور کرنے کے سرعام دعوے کئے جارہے ہیں مگر نتائج دینے میں ناکام ہیں۔ تمام کمپنیاں پراڈکٹس علاج و معالجہ سے متعلق بات کرتی ہیں مگر انہیں میڈیکل آئٹمز میں شامل کرنے کے لئے اداروں نے تاحال مجرمانہ خاموشی اختیار کررکھی ہے۔

لاہور(نیٹ نیوز/ایمرا نیوز) ہماری صبح کو روشن کرنے اور ہمیں پورا دن توانا رکھنے کے علاوہ بھی کافی کے کئی طبی فوائد سامنے آئے ہیں۔ خیال کیا جاتا ہے کہ کافی میں موجود کیفین (جسے اردو میں قہوین بھی کہا جاتا ہے)کی موجودگی نہ صرف جسمانی چستی اور قلیل مدتی یادداشت کو بہتر بناتی ہے بلکہ طویل مدت میں دماغ کے مدافعتی نظام کو مضبوط بنانے کی صلاحیت بھی اس میں موجود ہوتی ہے۔ (کیفین یا قہوین، سفید قلمی یا نامیاتی اساس ہے جو کافی سے حاصل کیا جاتا ہے)۔اس سے پہلے، کافی کے بارے میں یہ بھی کہا جاچکا ہے کہ یہ ڈیمینشیا (Dementia)اور پارکنسنز (Parkinson’s)کی بیماری کے خطرے کو کم کرتی ہے۔ اب سائنسدانوں نے انکشاف کیا ہے کہ سائنسی تحقیق کی روشنی میں وہ یہ بتاسکتے ہیں کہ کافی ان بیماریوں کے خطرات کو کیسے کم کرتی ہے۔پروسیڈنگزآف دا نیشنل اکیڈمی آف سائنسز جرنل کے حالیہ شمارے میں ایک تحقیق شائع کی گئی ہے، جو رٹگرز رابرٹ ووڈجانسن اسکول آف میڈیسن کے سائنسدانوں کی محنت ہے۔ تحقیق میں چوہوں پر تجربہ کیا گیا اور کہا کہ ’کافی بینز‘(Coffee Beans)میں پایا جانے والا ایک فیٹی ایسڈ جسےEicosanoyl-5 Hydroxytryptamideکہا جاتا ہے، چوہوں کے دماغ کو بیماریوں سے محفوظ رکھتا ہے۔ کافی بینز میں موجود یہ فیٹی ایسڈ (EHT)، پارکنسنز اور ڈیمینشیا جیسی بیماری کا باعث بننے والے نقصان دہ پروٹینز کو دماغ اور جسم کے دیگر حصوں میں جمع ہونے سے روکتا ہے۔سائنسدانوں کا کہنا ہے کہ EHTنامی فیٹی ایسڈ کافی بینز کے چھلکوں میں پایا جاتا ہے، جسے اکثر کافی بناتے وقت علیحدہ کردیا جاتا ہے۔

اب سائنسدان اس بات کی تحقیق کررہے ہیں کہ EHTاورکافی کی خوراک کس مقدار میں لی جائے کہ وہ انسانوں کے لیے مؤثر ہوسکے۔تحقیق صرف یہیں تک محدود نہیں ہے بلکہ اس میں مزید کہا گیا ہے کہ کافی میں صرف کیفین اور EHTجیسے مرکبات ہی انسانی صحت کے لیے فائدہ مند نہیں ہوتے بلکہ جب گرم پانی میں اسے تیار (Brew)کیا جاتا ہے تو اس دوران بھی ایک کیمیائی مرکب بنتا ہے، جس کا نام Phenylindanes ہے۔ یہ کیمیائی مرکب دماغ کو تباہ یا نقصان پہنچانے والی بیماری یا بیماریوں کے خلاف قوت مدافعت پیدا کرتا ہے۔ صرف یہی نہیں، سائنسدان کہتے ہیں کہ جتنی زیادہ ڈارک کافی پی جائے گی، ہر کپ میں مدافعتی مرکبات اتنے ہی زیادہ موجود ہونگے۔اس حوالے سے ایک اور تحقیق فرنٹیئرز اِن نیوروسائنس نامی جرنل میں شائع ہوئی ہے۔ یہ تحقیق ٹورنٹو کے Krembil Brain Institute کے سائنسدانوں نے کی ہے۔ اس تحقیق میں سائنسدانوں نے امریکا کے مشہور کافی برانڈ کے تین نمونوں کا تجزیہ کیا ہے۔ اس کے بعد انھوں نے ہر نمونے کے ارک (Extract)کی دو اقسام کے پروٹینز( Amyloid Betaاور Tau)کے ساتھ آمیزش کی۔ یہ دونوں پروٹینز بالترتیب الزائمر اور پارکنسنز کی بیماریوں کے ساتھ جوڑے جاتے ہیں۔ تحقیق بتاتی ہے کہ جیسے جیسے یہ بیماریاں بڑھتی ہیں، یہ پروٹینز دماغ میں کسی تودے کی مانند جمع ہونا شروع ہوجاتے ہیں، جنھیں طب کی زبان میں Amyloid Plaquesاور Tau Protein Tanglesکہا جاتا ہے۔

اس تحقیق کی روشنی میں سائنسدانوں نے دعویٰ کیا ہے کہ کافی کے تینوں نمونوں نے ان پروٹینز کو دماغ میں جمع ہونے سے روکا، جس کے بعد اب امید کی جارہی ہے کہ دنیا کے کئی لوگوں کا پسندیدہ ’مارننگ ڈرنک‘ دراصل انسان کو کئی طبی فوائد بھی پہنچاتا ہے۔اس تحقیق میں غور طلب بات یہ ہے کہ سائنسدانوں نے کافی کے تینوں نمونوں کے ڈیمینشیا اور پارکنسنز کی بیماریوں کے خلاف مؤثر ہونے کا دعویٰ کیا ہے۔ البتہ، تحقیق کے دوران سائنسدانوں نے کافی کے ڈارک نمونوں کو زیادہ مؤثر پایا۔ اس مشاہدے کی روشنی میں سائنسدانوں کا کہنا ہے کہ کافی کے کم یا زیادہ مؤثر ہونے کا تعلق درحقیقت اسے بنانے(Brew) کے عمل کے دوران پیدا ہونے والے کیمیائی مرکب Phenylindanesسے ہے۔ یہ کیمیائی مرکب کافی میں کڑوا ذائقہ پیدا کرتا ہے۔Phenylindanes نامی کیمیائی مرکب کافی کی ان اقسام میں زیادہ پایا جاتا ہے، جنھیں زیادہ دیر تک بنایا (Brew)جاتا ہے جیسےکہ ’ڈارک روسٹ‘ اور ’ایسپریسو‘۔ زیادہ دیر تک کافی بننے کے عمل کے دوران اس میں وہ کیمیائی مرکبات پیدا ہوجاتے ہیں، جو عمومی دورانیہ تک Brewکی گئی کافی میں نہیں پائے جاتے۔لیبارٹری ریسرچ میں سائنسدانوں کو یہ بھی معلوم ہوا ہے کہ کافی میں پایا جانے والا Phenylindanes، واحد مرکب ہے، جو دونوں طرح کے پروٹینز Amyloid(ڈیمینشیا کا باعث) اور Tau(پارکنسنز کا باعث)کے خلاف مدافعت رکھتا ہے۔ ان دونوں پروٹینز میں سے یہ Tauکے خلاف نسبتاً زیادہ مزاحمت کی طاقت رکھتا ہے۔ تحقیق کا یہ وہ پہلو ہے، جس کی روشنی میں سائنسدان اس نتیجے پر پہنچے ہیں کہ کافی میں پایا جانے والا Phenylindanesہی وہ مرکب ہے، جو ہمیں ڈیمینشیا اور پارکنسنز کی بیماری سے محفوظ رکھنے کی صلاحیت رکھتا ہے۔ڈی کیفینیٹڈ (Decafeinated) کافی پینے والے افراد کیلئے خوشخبری یہ ہے کہ کافی کو ڈی کیفینیٹ بنانے(Brew)کرنے کے عمل سے پہلے کیا جاتا ہے، اس لیے سائنسدان سمجھتے ہیں کہ اس کا Phenylindanes مرکبات پر کوئی فرق نہیں پڑتا۔یہ ابتدائی تحقیق ہے اور سائنسدان ابھی یہ معلوم نہیں کرسکے کہ یہ مرکبات کس طرح اور کیونکر انسانی جسم میں اثر دِکھاتے ہیں؟ تاہم ماہرین اس بات پر متفق ہیں کہ یہ ایک قابلِ ذکر سائنسی تحقیق ہے، جس کی بنیاد پر اس تحقیق کو مزید آگے بڑھایا جاسکتا ہے۔ماہرین مزید کہتے ہیں کہ دماغ کو صحت مند رکھنے کا سب سے بہترین راز صحت مند غذا کھانے، باقاعدہ ایکسرسائز کرنے اور وافر مقدار میں نیند لینے میں پوشیدہ ہے۔ ایسے میں اگر کافی کا ایک کپ روزانہ اپنی زندگی میں شامل کرلیا جائے تو یقیناً یہ دماغی صحت میں مزید بہتری کا باعث بنےگا۔

ملتان(نیٹ‌نیوز)
ملتان کے بنیادی مرکز صحت درانہ لنگانہ میں 17 اگست کو شبیر اپنی حاملہ اہلیہ شازیہ کو لے کر پہنچا جہاں میڈیکل آفیسر ڈاکٹر سدرہ کرن نے خاتون کی نارمل ڈلیوری کی، شبیر کا کہنا ہے کہ دوران ڈلیوری ڈاکٹر سدرہ کی بے احتیاطی سے بچی کو اس قدر خراشیں آئیں کہ اس کی کمر بری طرح زخمی ہوگئی۔

ضلع کی 66 سرکاری ایمبولینسوں میں سے اکثر خراب اور پیٹرول نہ ملنے کی وجہ سے فعال نہیں، یہی وجہ ہے کہ نومولود کو ریسکیو 1122 کی ایمبولینس میں نشتر اسپتال منتقل کیا گیا، لیکن زخم گہرے ہونے کی وجہ سے بچی چند گھنٹوں بعد ہی انتقال کرگئی۔ شازیہ اور شبیر کے اس سے قبل 4 بچے ہیں، جن میں 3 بیٹے اور 1 بیٹی شامل ہے۔ ان کا کہنا ہے کہ اس سے قبل انہیں کبھی ایسی مشکل کا سامنا نہیں کرنا پڑا۔

اس حوالے سے ‘معلومات کی رسائی’ کے قانون کے تحت حاصل کی گئی معلومات خوفناک صورتحال کی منظرکشی کر رہی ہیں۔ حاصل ہونے والے اعدادوشمار کے مطابق 2016ء میں زچگی کے دوران بے احتیاطی برتنے پر سالانہ 713 بچے دم توڑ گئے، 2017 میں انتقال کرنے والے بچوں کی تعداد 683 ہے جبکہ جون 2018 تک 104 بچوں کا انتقال ہوا۔ ان تمام بچوں کے انتقال کی وجہ طبی عملے کی بے احتیاطی، ناتجربہ کاری اور سہولیات کا فقدان تھی اور یہ بچے محض ایک ماہ سے کم عرصے کے دوران مختلف زخموں کے باعث انتقال کرگئے جبکہ جون 2018ء تک صرف دوران زچگی انتقال کرنے والے بچوں کی تعداد 928 ہے جو کہ انتہائی خطرناک ہے۔

ملتان میں اگر ماں اور بچے کی صحت کے حوالے سے سہولیات کی بات کی جائے تو دستیاب معلومات کے مطابق ضلع ملتان میں 7 سرکاری اسپتال موجود ہیں جہاں زچہ اور بچہ کو طبی سہولیات فراہم کی جا سکتی ہیں، جن میں تحصیل شجاع آباد اور تحصیل جلال پور پیر والا کے اسپتال بھی شامل ہیں۔ ان اسپتالوں میں 45 گائناکولوجسٹ موجود ہیں جبکہ سرکاری اسپتالوں میں منظور شدہ گائنا کولوجسٹس کی تعداد صرف 15 ہے۔

بنیادی مرکز صحت درانہ لنگانہ کی سپروائرز بتاتی ہیں کہ 10 اگست کو ان کے مرکز پر ایک حاملہ خاتون آئیں، میڈیکل آفیسر نے انہیں کئی گھنٹے تک لیبر روم میں رکھا، جب خون زیادہ بہہ گیا تو انہیں شہر کے سرکاری اسپتال منتقل کرنے کے بجائے اپنے نجی کلینک منتقل کرنے کا مشورہ دیا اور اس دوران مزید وقت ضائع ہوا، تاہم خاتون کا شوہر ان کی حالت دیکھ کر انہیں شہر کے کسی دوسرے کلینک لے گیا، دوران منتقلی ایمبولینس بھی نہ ملی، جس پر خاتون کو آٹو رکشہ میں بٹھا کر اسپتال پہنچایا، لیکن وہاں کے اخراجات ادا نہ کرنے پر اسے اپنی موٹر سائیکل گروی رکھوانا پڑی، جس کے بعد ڈاکٹر نے بچے کی پیدائش کے لیے آپریشن کا آغاز کیا، کئی گھنٹے مسلسل خون بہنے کی وجہ سے خاتون کئی روز تک دوبارہ زندگی پانے کے لیے موت سے لڑتی رہی اور بالآخر اسے نئی زندگی مل گئی۔

محکمہ صحت پنجاب کی جانب سے ماں اور بچے کی صحت کے منصوبہ کے لیے صوبے میں سالانہ 2 ارب روپے سے زائد کا بجٹ مختص ہے، جس میں ملتان کے لیے 53 کروڑ روپے مختص ہیں۔

اس واقعے کے خلاف متاثرہ خاندان نے ڈاکٹر کے خلاف کارروائی کے لیے ہیلتھ کیئر کمیشن پنجاب کو درخواست دی، تاہم چند ہی دنوں بعد درخواست واپس لے لی گئی۔ ڈپٹی ڈائریکٹر کمیونیکیشن اینڈ میڈیا کوآرڈنیشن پنجاب ہیلتھ کیئر کمیشن عامر وقاص چوہدری کے مطابق، ‘طبی عملے کی جانب سے کسی بھی طرح کی غفلت برتنے پر پنجاب ہیلتھ کیئر کمیشن کارروائی کرنے کے حوالے سے سول کورٹ کا درجہ رکھتا ہے، لیکن لوگ اکثر اوقات خود ہی کارروائی سے پیچھے ہٹ جاتے ہیں اور دونوں فریقین آپس میں راضی نامہ کر لیتے ہیں’، تاہم انہوں نے بتایا کہ ‘جن لوگوں نے کارروائی کی درخواست واپس نہ لی ہو تو ایسی درخواستوں پر عملدرآمد کرکے جرمانے اور سزائیں دی گئیں، جن میں زیادہ سے زیادہ جرمانہ 5 لاکھ روپے تک مقرر ہے اور اگر پنجاب ہیلتھ کیئر کمیشن کی کارروائی سے متاثرہ شخص مطمئن نہ ہو تو وہ کمیشن کے فیصلے کو بھی چیلنج کرسکتا ہے’۔

ضلع بھر میں قائم 82 بنیادی مراکز صحت میں ڈاکٹرز اور میڈیکل اسٹاف کی کُل تعداد 407 ہے، 8 دیہی مراکز صحت میں طبی عملے کی تعداد 171 ہے جبکہ 128 سرکاری میٹرنٹی سینٹرز میں زچگی کی سہولت صرف نارمل حالت میں تو موجود ہے لیکن اگر زچہ کی حالت تشویشناک ہو تو کوئی گائنا کولوجسٹ نہ ہونے کے باعث اسے شہر کے اسپتال منتقل کرنا پڑتا ہے۔

ملتان میں اس وقت نجی اسپتالوں کی تعداد 120 ہے جہاں زیادہ تر اسپتالوں میں گائنی کے حوالے سے بلاشبہ بہترین سہولیات دستیاب ہیں لیکن ایک بچے کی پیدائش پر ان اسپتالوں میں تقریباً 1 لاکھ روپے یا اس سے بھی زائد اخراجات ہوتے ہیں جو برداشت کرنا ہر خاندان کے بس کی بات نہیں جبکہ بچے کی پیدائش سے قبل کسی گائناکولوجسٹ سے ماہوار طبی معائنہ کے لیے بھی فی معائنہ کی کم سے کم فیس 2 ہزار روپے مقرر ہے۔

نیشنل پروگرام ہیلتھ اینڈ ایمپلائز ایسوسی ایشن پنجاب کی صدر رخسانہ انور بتاتی ہیں کہ تمام دیہی اور بنیادی مراکز صحت پر سہولیات انتہائی ناکافی ہیں، الٹرا ساؤنڈ مشینیں خراب ہیں جبکہ آکسیجن سلنڈرز بھی فراہم نہیں کیے گئے۔ محکمہ صحت پنجاب کی جانب سے ماں اور بچے کی صحت کے منصوبہ کے لیے صوبے میں سالانہ 2 ارب روپے سے زائد کا بجٹ مختص ہے، جس میں ملتان کے لیے 53 کروڑ روپے مختص ہیں لیکن ان مراکز کی حالت پھر بھی تبدیل نہیں کی جا سکی اور زچگی کی صورت میں حاملہ خاتون کے لواحقین دوائیوں سے لے کر ڈاکٹرز کے دستانے تک میڈیکل اسٹورز سے خود خریدکر دیتے ہیں، جبکہ سرکاری اسپتالوں میں یہ تمام اشیاء فراہم کرنا سرکار کی ذمہ داری ہے۔

ملتان میں اس وقت نجی اسپتالوں کی تعداد 120 ہے، لیکن وہاں ایک بچے کی پیدائش پر تقریباً 1 لاکھ روپے یا اس سے زائد کے اخراجات ہوتے ہیں جو برداشت کرنا ہر خاندان کے بس کی بات نہیں۔

رخسانہ انور بتاتی ہیں کہ ہر ایک رورل ہیلتھ سنٹر پر 5 اور بنیادی مرکز صحت پر صرف 1 میڈیکل آفیسر تعینات ہے، ان کی ڈیوٹی مکمل ہونے کے بعد کوئی ڈاکٹر سنٹرز پر موجود نہیں ہوتا، مردوں کے لیے پیرامیڈیکس اسٹاف جبکہ خواتین کے لیے مڈوائف یا پھر ایل ایچ وی موجود ہوتی ہے جو میٹرنٹی ایمرجنسی میں مریضوں کی دیکھ بھال کرتی ہیں۔

ملتان بھر میں 1980 لیڈی ہیلتھ ورکرز اور 225 مڈوائف رجسٹرڈ ہیں جن کی تربیت صرف عمومی حالت میں ڈلیوری تک محدود ہے، ڈلیوری کا کیس خراب ہونے کی صورت میں ہیلتھ کیئر کمیشن کی جانب سے ذمہ داروں کے خلاف کارروائی کا دعویٰ تو کیا جاتا ہے لیکن اکثر ڈاکٹرز کی جانب سے دباؤ اور اثر و رسوخ استعمال ہونے کے بعد یہ کارروائی عمل میں نہیں لائی جاتی۔

ڈلیوری کے لیے شہری علاقوں کے مہنگے پرائیویٹ اسپتالوں میں تو سہولیات میسر ہیں تاہم ملتان کے سرکاری اسپتالوں میں حکومت پنجاب کو زچہ بچہ کی زندگی کو محفوظ بنانے کے لیے اقدامات اٹھانا ہوں گے، تحصیل ہیڈکوارٹرز اسپتالوں اور دیہی علاقوں میں سہولیات نہ ہونے سے زچگی کے دوران بچے اور ماں کی قیمتی جانوں کے ضیاع کی بنیادی وجوہات بروقت اسپتالوں تک رسائی نہ ہونا اور قریبی رورل ہیلتھ سنٹرز پر ہمہ وقت میٹرنٹی لیڈی ڈاکٹرز کی عدم دستیابی ہے۔

لیڈی ہیلتھ ورکرز نارمل کیس کو تو سنبھال لیتی ہیں لیکن اگر کیس بگڑ جائے تو زچہ اور بچہ کی زندگی داؤ پر لگ جاتی ہے، رورل ہیلتھ سینٹرز میں کام کرنے والی لیڈی ڈاکٹرز شہر میں رہائش پذیر ہونے کی وجہ سے جنرل ڈیوٹی کرکے واپس شہر آ جاتیں ہیں، ان کی غیر موجودگی میں آنے والے نارمل کیس ہوں یا ایمرجنسی، ایل ایچ ویز اور مڈوائف اکیلے سنبھال نہیں پاتیں جس کی وجہ سے زچہ بچہ کی شرح اموات میں اضافہ ہوتا ہے۔

ان مسائل پر قابو پانے کے لیے حکومت پنجاب کو چاہیے کہ مرکز کے ادارے منصوبہ بندی کے ساتھ اشتراک کرکے رورلز ہیلتھ کلینکس اور ڈسپنسریز میں میٹرنٹی سروسز کا انتظام کریں، جیسا کہ منصوبہ بندی کے موبائل ایمبولینس پروجیکٹ میں موبائل وین میں لیڈی ڈاکٹرز، نرسنگ ہیلپرز اور ڈرائیور سمیت میٹرنٹی سے لے کر نارمل اور آپریشنز کی سہولیات میسر تھیں جو کہ دور دراز کے علاقوں میں بھی جا کر سہولیات فراہم کرتیں تھیں۔

لیڈی ہیلتھ ورکرز نارمل کیس کو تو سنبھال لیتی ہیں لیکن اگر کیس بگڑ جائے تو زچہ اور بچہ کی زندگی داؤ پر لگ جاتی ہے۔

حکومت کو چاہیے کہ رورل ہیلتھ سنٹرز میں قریبی علاقے سے تعلق رکھنے والی لیڈی ڈاکٹرز کو تعینات کیا جائے تاکہ کسی بھی وقت ضرورت پڑنے پر وہ بروقت اسپتال پہنچ کر طبی امداد فراہم کریں، اسپتالوں کو ضرورت کے مطابق اپ گریڈ کیا جائے تاکہ ایمرجنسی کیس کو وہیں پر ہینڈل کیا جائے اور ڈلیوری خراب ہونے پر زچہ و بچہ کو کہیں دور ریفر کرنے میں وقت کو بچانے کے ساتھ ماں اور بچے کی جان کو بھی خطرے میں ڈالنے سے محفوظ رکھا جا سکے۔

صوبائی وزیر صحت پنجاب ڈاکٹر یاسمین راشد سے ماں اور بچے کی صحت سے متعلق پوچھے گئے سوال پر انہوں نے کہا کہ ہماری حکومت ابھی نئی ہے، ہم اب ماں اور بچے کی صحت کے حوالے سے کام کر رہے ہیں اور جلد ہی جنوبی پنجاب میں 3 اسپتال تعمیر کیے جائیں گے، جس میں صرف ماں اور بچے کو طبی سہولیات فراہم کی جائیں گی جن میں سے ایک اسپتال ملتان میں ہو گا جبکہ باقی 2 اسپتال کن شہروں میں تعمیر کرنے ہیں ان پر ابھی فیصلہ ہونا باقی ہے، لیکن ماں اور بچے کو صحت کی بہترین سہولیات دینے کے حوالے سے باقاعدہ منصوبہ بندی کی جا رہی ہے۔

دوسری جانب ماں اور بچے کی جانب سے سرکاری سہولیات سمیت مختلف معاملات پر موقف لینے کے لیے بارہا چیف ایگزیکٹو ہیلتھ آفیسر ملتان ڈاکٹر منور عباس سے رابطہ کیا گیا لیکن ہر بار انہوں نے میٹنگ میں مصروفیت کا کہہ کر کسی بھی قسم کا موقف دینے سے گریز کیا۔

واضح رہے کہ 2017ء کی مردم شماری کے مطابق ضلع ملتان کی آبادی47 لاکھ 45 ہزار 109 ہے اور ضلع بھر کے لیے صحت کا مجموعی طور پر سالانہ بجٹ 3 ارب 49 کروڑ 51 لاکھ 8 ہزار روپے ہے۔

لاہور(نیٹ نیوز) محکمہ صحت نے سرکاری ہسپتالوں میں تعینات ڈاکٹر اور ملازمین کو پرائیویٹ پریکٹس کی اجازت دیدی۔ مسودہ کے مطابق میڈیکل یونیورسٹیوں میں بورڈ آف گورنر کی تعیناتی بھی لازمی قرار دے دی گئی ہے۔ بورڈ آف گورنر 7 افراد پر مشتمل ہوگا، اور وائس چانسلر اور سیکرٹری صحت بھی بورڈ کا حصہ ہونگے۔ مسودہ کے مطابق وائس چانسلر کو پرو وائس چانسلر کو ہٹانے یا متبادل لانے کا اختیار بھی ہو گا۔

کینٹکی، امریکہ:(نیٹ نیوز/ایمرا نیوز) ایک چھوٹے سے عملی مشاہدے سے معلوم ہوا ہے کہ جو لوگ سرسبز مقامات کے پاس رہتے ہیں اور درختوں کے قریب ہوں وہ دماغی تناؤ کے کم کم شکار ہوتے ہیں ۔ اس سے دل کی شریانوں کی صحت اچھی رہتی ہے اور وہ دل کے امراض اور فالج کے خطرے سے دور رہتے ہیں۔دوسری جانب آبادی کی سطح پر سبزے میں رہنے والے افراد کو ہسپتال جانے کی ضرورت بھی کم پیش آتی ہے۔

اگرچہ یہ ایک چھوٹے پیمانے کا مطالعہ ہے تاہم اس کی تفصیلات جرنل آف دی امریکن ہارٹ ایسوسی ایشن میں شائع ہوئی ہے۔ تاہم ماہرین ہر فرد پر اس کے یکساں اثرات کا دعویٰ نہیں کررہے۔اس تحقیق کے لیے لوئی ویلی کینٹکی کے ایک ہسپتال میں 408 مریضوں کی خون اور پیشاب میں تناؤ اور امراضِ قلب کے بایومارکرز دیکھے گئے ۔ ساتھ ہی ناسا کے سیٹلائٹ ڈیٹا اور یوایس جی ایس سے ہر شخص کے قریب موجود سبزے کی تفصیلات بھی اس کےڈیٹا کے ساتھ جمع کرکے پیش کی گئیں۔ان میں سے جو لوگ سب سے زیادہ درختوں اور سبزے والےمقام پر رہتے تھے ان میں پیشاب میں ایپی نیفرائن کی مقدار سب سے کم تھی جو ذہنی تناؤ کو ظاہر کرتی ہے۔ جبکہ ان کی پیشاب میں آکسیڈیٹو اسٹریس کا ایک اور علامتی بایومارکر ایف ٹو آئسوپروسٹین بھی کم تھا۔ اگر یہ دونوں علامات زیادہ ہوں تو مریض اتنا ہی تناؤ کا شکار ہوسکتا ہے۔ایک اور بات سامنے آئی کے ہرے بھرے ماحول میں رہنے والے افراد کی قلبی شریانیں بہت اچھی حالت میں رہتی ہیں۔ اس رپورٹ کے مرکزی مصنف ڈاکٹر ارونی بھٹناگر نے کہا کہ فطری نظاروں کے قریب وقت گزارنے سے صحت پر حیرت انگیز اثرات مرتب ہوتےہیں۔سروے میں شامل افراد کی اوسط عمر 51 برس تھی اور ان میں سے جو لوگ سبزے کے اطراف نہیں رہتے تھے ان میں کولیسٹرو، بلڈ پریشر اور تناؤ کی کیفیات دیکھی گئی تھیں۔ اسی بنا پر ماہرین نے کہا ہے کہ شہروں میں شجرکاری کی جائے اور سبزے کے قریب وقت گزارنے کو ترجیح دی جائے۔

ممبی(نیٹ نیوز)

نیند کے مسائل سے دوچار افراد کے لئے ایک یہی حل ہے کہ وہ تکیے کے نیچے لہسن رکھ کر سوئیں۔ اس کی خوشبو دماغ پر اثر انداز ہوتی ہے اور اسے بے چینی و منفی لہروں سے پاک کرکے پرسکون کردیتی ہے۔

لہسن قدرت کی ان نعمتوں میں سے ایک ہے جو ناصرف کھانوں کو پرلطف بناتا ہے بلکہ طرح طرح کی بیماریوں سے بھی بچاتا ہے۔کھانوں کے علاوہ ہربل ادویات کی تیاری میں بھی اس کا استعمال عام پایا جاتا ہے۔ ماہرین کہتے ہیں کہ لہسن کا استعمال 7ہزار سال سے جاری ہے۔

لہسن کا استعمال خصوصاً دوران خون کے لئے بہت مفید ہے کیونکہ یہ بند شریانوں کو کھولنے کے لئے اکسیر کی حیثیت رکھتا ہے۔

لہسن کھانے کے علاوہ تکیے کے نیچے رکھنا بھی بے حد فائدہ مند ہے۔ اگر آپ پرسکون اور بہترین نیند کے خواہاں ہیں تو لہسن تکیے کے نیچے رکھ کر سونے سے بہتر شاید ہی کوئی اور نسخہ آپ کو مل سکے۔

نیند کی خرابی کے مسائل سے دوچار افراد یا جو لوگ اپنی معمول کی نیند کو مزید پرسکون بنانا چاہتے ہیں تو لہسن کا ایک ٹکڑا چھلکے سمیت تکیے کے نیچے رکھ کر سوئیں، اور پھر اس کا کمال دیکھیں۔