Category انٹرنیشنل

برطانوی شہزادے ہیری اور ان کی اہلیہ میگھن مارکل کے ہاں بیٹی کی پیدائش ہوئی ہے۔

برطانوی میڈیا کی رپورٹس کے مطابق شہزادہ ہیری کے گھر بیٹی کی پیدائش جمعے کے روز ہوئی جس کا نام انہوں نے اپنی دادی ملکہ الزبتھ اور آنجہانی والدہ لیڈی ڈیانا کے نام پر ‘للی بیٹ ڈیانا ماؤنٹ بیٹن ونڈسر’ رکھا۔

رپورٹس میں بتایا گیا ہے کہ ’للی‘ کی پیدائش امریکا کی ریاست کیلیفورنیا کے شہر سانتا باربرا کے مقامی اسپتال میں ہوئی۔

شہزادہ ہیری اور میگھن مارکل نے ایک بیان بھی جاری کیا جس کے مطابق بیٹی کی پیدائش 4 جون کو ہوئی۔

انہوں نے کہا کہ بیٹی کی پیدائش پر دنیا بھر سے موصول ہونے والی دعاؤں اور نیک تمناؤں پر مشکور ہوں۔

بیان میں کہا گیا ہے کہ زچہ و بچہ دونوں خیریت سے ہیں جبکہ نومولود کا وزن 7 پاؤنڈ اور 11اونس ( 3 کلو اور 486 گرام) ہے۔

خیال رہے کہ شہزادہ ہیری اور میگھن مارکل کے ہاں مئی 2019 میں بیٹے آرچی کی پیدائش ہوئی تھی۔

کابل: طالبان نے افغانستان کے مختلف صوبوں کے 5 اہم اضلاع کا حکومتی فورسز سے کنٹرول حاصل کرکے اپنی عمل داری قائم کرنے کا دعویٰ کیا ہے۔

عالمی خبر رساں ادارے کے مطابق طالبان کے ترجمان ذبیح اللہ مجاہد نے اپنی سلسلہ وار ٹوئٹس میں لکھا کہ زابل، اورزگان، غزنی اور نورستان کے اہم اضلاع کا کنٹرول حکومتی فورسز کو پسپا کرکے حاصل کرلیا ہے۔

قبل ازیں طالبان نے میدان وردک، بغلان اور لغمان کے چار اضلاع میں بھی اپنی حکومت قائم کرنے کا دعویٰ کیا تھا۔ اس طرح مجموعی طور پر 9 اضلاع پر طالبان کی مکمل حکمرانی قائم ہوچکی ہے۔

اس حوالے سے افغانستان کے وزارت داخلہ کے ترجمان طارق آریان نے عالمی خبر رساں ادارے سے بات چیت کی، انہوں نے طالبان کے دعوے کو مسترد کرتے ہوئے کہا کہ افغان سیکیورٹی فورسز نے حکمت عملی کے تحت پسپائی اختیار کی ہے۔

افغان میڈیا کے مطابق طالبان جنگجوؤں نے زابل سمیت 5 صوبوں کے مختلف اضلاع میں داخل ہوکر سیکیورٹی چیک پوسٹوں پر قبضہ کرلیا اور گھمسان کی جھڑپ کے بعد سیکیورٹی اہلکاروں کو پسپائی اختیار کرنے پر مجبور کردیا۔

واضح رہے کہ افغانستان سے امریکی فوجیوں کا انخلا کا آغاز ہوچکا ہے جس کی تکمیل 11 ستمبر تک ہوجائے گی تاہم اس دوران طالبان اور سیکیورٹی فورسز کے درمیان جھڑپوں میں تیزی آگئی ہے جس میں کئی محاذوں پر فتح طالبان کو حاصل رہی ہے۔

ینگون: میانمار کے ایک گاؤں میں سرچ آپریشن کے دوران فوجی اہلکاروں اور دیہاتیوں کے درمیان جھڑپ میں 20 افراد ہلاک اور متعدد زخمی ہوگئے، ہلاک ہونے والوں میں اکثریت کسانوں کی ہے۔

عالمی خبر رساں ادارے کے مطابق میانمار کے ڈیلٹا ریجن کے ایک گاؤں میں اسلحے کی تلاش کے لیے فوج نے آپریشن کیا جس کے دوران سخت مزاحمت کا سامنا رہا۔ سرچ آپریشن کے دوران دیہاتیوں نے بھی فوج پر فصل کاٹنے والے تیز دھار آلے سے حملہ کردیا۔

فوجی قیادت کے ترجمان نے اپنے بیان میں کہا کہ جھڑپ میں 3 افراد ہلاک اور 5 زخمی ہوئے تاہم معزول حکومت کے ترجمان نے دعویٰ کیا ہے کہ 20 کسان ہلاک اور متعدد زخمی ہوگئے۔
آزاد ذرائع کا بھی کہنا ہے کہ گاؤں کے اسپتال میں 15 سے زائد لاشیں لائی گئی ہیں جب کہ درجن سے زائد زخمی ہیں جن میں سے 5 کی حالت نازک بتائی جارہی ہیں۔ کسان رہنماؤں نے کہا کہ سرچ آپریشن کے بہانے کسانوں کی نسل کشی کی گئی۔

واضح رہے کہ میانمار میں رواں سال فروری کو فوج نے حکمراں آنگ سان سوچی کو گرفتار کرکے ملکی اقتدار پر قبضہ کرلیا تھا اور ایک سال کے لیے ایمرجنسی نافذ کردی تھی جس کے بعد سے ملٹری قیادت کو عوامی سطح پر مزاحمت کا سامنا ہے۔

بغداد: عراق کے فوجی اڈے عین الاسد پر دو ڈرون طیاروں نے حملے کی کوشش کی تاہم فضاعی دفاعی نظام نے بروقت جوابی کارروائی کرتے ہوئے بارودی ڈرونز کو تباہ کردیا جب کہ ایک راکٹ فوجی اڈے میں گرا۔

عالمی خبر رساں ادارے کے مطابق عراق کے مغربی صوبے انبار میں عین الاسد فوجی اڈے کے فضائی دفاعی نظام نے دو بارودی ڈرون طیاروں کو مار گرایا۔ ایک راکٹ بھی نامعلوم مقام سے فوجی اڈے کے اندر آکر گرا۔ یہ فوجی اڈہ امریکی فوجیوں کے زیر استعمال ہے اور اس وقت بھی یہاں امریکی فوجی موجود ہیں۔

عراق میں اتحاد کے فوجی آپریشن کے ترجمان کرنل وائن میروٹو نے اپنی ٹویٹ میں بتایا کہ مذکورہ راکٹ بغداد سینٹر فار ڈپلومیٹک سپورٹ کے نزدیک گرا تاہم کسی قسم کے نقصان کے اطلاع نہیں ملی۔ ہفتے اور اتوار کی درمیانی شب ہونے والے اس حملے کی تحقیقات جاری ہیں۔
گزشتہ ہفتے ہی عین الاسد فوجی اڈے پر ایک راکٹ حملہ بھی کیا گیا تھا تاہم خوش قسمتی اس حملے میں کوئی جانی یا مالی نقصان نہیں ہوا تھا۔ علاوہ ازیں رواں ماہ عسکریت پسندوں نے دو مرتبہ ڈرون طیاروں سے حملہ کرنے کی کوشش کی جسے ناکام بنایا گیا۔

واضح رہے کہ گزشتہ برس جنوری کے پہلے ہفتے میں ایران کی القدس فورس کے سپریم کمانڈر قاسم سلیمانی امریکی حملے میں بغداد ایئرپورٹ پر مارے گئے تھے جس کے بعد سے عراق میں امریکی تنصیبات پر حملوں کا سلسلہ جاری ہے۔

براعظم افریقہ کے 2 ممالک برکینا فاسو اور نائیجیریا میں دہشت گردوں کی جانب سے 2 علیحدہ حملوں کے نتیجے میں مجموعی طور پر 220 افراد ہلاک ہوگئے۔

رائٹرز کی رپورٹ کے مطابق برکینا فاسو میں ہونے والے حملے کو مقامی حکومت نے حالیہ سالوں کا بدترین حملہ قرار دیا۔

حکومت کے جاری بیان کے مطابق حملہ آور جمعہ کی رات کو نائجر کی سرحد سے منسلک صوبے یوگا کے گاؤں سولہان میں داخل ہوئے، جہاں انہوں نے مکانات اور دکانوں کو آگ لگادی اور دیہاتیوں کو قتل کردیا۔

حکومت نے واقعے کو دہشت گردی قرار دیتے ہوئے قومی سطح پر 3 روزہ سوگ کا اعلان کردیا۔

دوسری جانب تاحال کسی بھی گروہ نے واقعے کی ذمہ داری قبول نہیں کی۔

حکومت کے ترجمان اوسینی تامبورا نے میڈیا کو بتایا کہ واقعے میں 40 افراد زخمی بھی ہوئے ہیں۔

اقوام متحدہ کے مطابق سیکریٹری جنرل انتونیو گوتریس نے واقعے پر غم و غصے کا اظہار کیا ہے جس مں 7 بچے بھی ہلاک ہوئے ہیں۔

یاد رہے کہ مذکورہ علاقے میں اقوام متحدہ کی امن فوج کے ہزاروں اہلکار تعینات ہیں لیکن اس کے باوجود القائدہ اور داعش سے تعلق رکھنے والے دہشت گردوں نے حالیہ سالوں میں برکینا فاسو، مالی اور نائجر میں حملے کیے ہیں اور سیکڑوں افراد کو قتل کیا۔

برکینا فاسو میں جاری تنازع کی وجہ سے 11 لاکھ 40 ہزار افراد گزشتہ دو سال میں نقل مکانی کرچکے ہیں جس میں سے 20 ہزار افراد ہمسایہ ملک مالی میں قیام پذیر ہیں۔

اس سے قبل رواں سال مارچ میں نائجر کے جنوب مغربی علاقے کے متعدد دیہاتوں پر حملے کے نتیجے میں 137 افراد ہلاک ہوگئے تھے۔

بعد ازاں رائٹرز کی ایک اور رپورٹ کے مطابق افریقی ملک نائیجیریا میں دہشت گردوں کے علیحدہ حملے میں 88 افراد ہلاک ہوگئے۔

رپورٹ کے مطابق یہ حملہ نائیجیریا کی ریاست کیبی کے 8 دیہاتوں میں کیا گیا اور اس دوران لوگوں کو قتل کیا گیا جبکہ ان کی املاک لوٹ لی گئیں۔

کیبی کے گورنر ابو بکر باگوڈو کا کہنا تھا کہ حملہ آور ہمسایہ ممالک نائجر اور زمفارا سے آئے تھے اور انہوں نے فصلوں کو تباہ کردیا جبکہ مویشی ساتھ لے گئے۔

واضح رہے کہ مسلح افراد کی جانب سے حالیہ برسوں میں نائیجیریا کی شمالی سرحد پر حملوں میں اضافہ دیکھا گیا ہے، گزشتہ سال دسمبر سے اب تک مسلح افراد اس علاقے میں مختلف حملوں کے دوران 8 سو سے زائد اسکول کے طلبہ کو اغوا کرچکے ہیں۔

نائجیریا نے صدر محمد ہوباری کی پوسٹ ڈیلیٹ کرنے پر سماجی رابطوں کی ویب سائٹ ٹوئٹر کی سروس کو غیرمعینہ مدت تک کے لیے معطل کردیا ہے۔

خبر رساں ایجنسی رائٹرز کے مطابق صدر محمد بوہاری نے اپنی ٹوئٹ میں مقامی علیحدگی پسندوں کو سزا دینے کی دھمکی دی تھی جس کے نتیجے میں وہ ٹوئٹر قوانین کی خلاف ورزی کے مرتکب قرار پائے تھے اور دو دن قبل ان کی ٹوئٹ کو سماجی رابطوں کی ویب سائٹ نے ڈیلیٹ کردیا تھا۔

صدر کی پوسٹ ڈیلیٹ کرنے کے دو دن بعد ہی نائجیریا نے ملک میں ٹوئٹر سروس غیرمعینہ مدت تک کے لیے بند کردی۔

وزیر اطلاعات لائی محمد نے ٹوئٹر سروس کی معطلی کے حوالے سے کہا کہ حکومت نے یہ کارروائی اس لیے کی کیونکہ ان سرگرمیوں کے لیے پلیٹ فارم کے مستقل استعمال کی وجہ سے نائیجیریا کے کارپوریٹ وجود کو خطرات لاحق ہیں۔

معطلی کی تفصیلات کے بارے میں پوچھے گئے سوال کے جواب میں ایک معاون خصوصی نے رائٹرز کو بتایا کہ انتظار کریں اور دیکھیں کہ معاملات کیا شکل اختیار کرتے ہیں۔

رائٹرز نے ٹوئٹرز سروس کی بندش کی جانچ کے حوالے سے جب لاگوس اور ابوجا میں ٹیسٹ کیے تو ہفتے کو دن کے ابتدائی گھنٹوں کے دوران کچھ موبائل آپریٹرز کے ذریعے ویب سائٹ تک رسائی ممکن نہ تھی البتہ ٹوئٹر کی ایپلی کیشن اور ویب سائٹ ملک میں دیگر نیٹ ورکس کے ذریعے قابل رسائی تھی۔

ٹوئٹر نے اپنے بیان میں کہا کہ نائجیریا کی حکومت کی جانب سے آپریشن کی معطلی کے بارے میں ٹوئٹر کو شدید تشویش ہے اور وہ اس بارے میں تحقیقات کررہا ہے، جب مزید معلومات ہوں گی تو اس حوالے سے آگاہ کردیا جائے گا۔

بدھ کے روز امریکی کی ٹیکنالوجی کمپنی نے کہا کہ سرکاری عمارتوں پر حملوں میں ملوث عناصر کو ٹوئٹ میں سزا دینے کی دھمکی دے کر نائجیریا کے صدر ٹوئٹر کے ‘خراب رویے’ کی پالیسی کی خلاف ورزی کے مرتکب ہوئے اور اس پوسٹ کو ہٹا دیا گیا۔

اپریل میں نائجیریا کے وزیر اطلاعات نے اس وقت غصے میں شدید ردعمل کا اظہار کیا تھا جب ٹوئٹر نے پڑوسی ملک گھانا کو اپنے پہلے افریقی دفتر کے طور پر منتخب کیا تھا، انہوں نے کہا کہ کمپنی نائیجیریا کے حوالے سے ان خبروں سے متاثر تھی جن میں اس کی غلط منظر کشی کی گئی اور مظاہروں پر کریک ڈاؤن کی خبریں نشر کی گئیں۔

پولیس اصلاحات کا مطالبہ کرنے والے مظاہرین نے پولیس کی جانب سے ہراساں کرنے کے مبینہ ثبوت سوشل میڈیا پر شیئر کرنے کے لیے منظم انداز میں چندہ اکٹھا کیا تھا، ٹوئٹر کے چیف ایگزیکٹو جیک ڈورسی نے اپنے فالوورز کو عطیہ کرنے کی ترغیب دینے کے لیے ٹوئٹ کی تھی۔

مظاہروں کے تناظر میں محمد بوہاری نے ‘جعلی خبروں’ کے سدباب کے سلسلے میں سوشل میڈیا کے حوالے سے ضابطہ اخلاق بنانے کی ہدایت کی تھی۔

جمعہ کے روز نائیجیریا کے ایک سب سے بڑے موبائل آپریٹرز میں سے ایک ایئرٹیل کے ترجمان نے رابطہ کرنے پر یہ بتانے سے انکار کردیا کہ آیا کمپنی کو معطلی کے بارے میں کوئی سرکاری ہدایت موصول ہوئی ہیں یا نہیں۔

سب سے بڑے موبائل آپریٹر ایم ٹی این سے اس حوالے سے رابطے کی کوشش کی گئی لیکن انہوں نے کال اور میسیجز کا جواب دینے سے گریز کیا۔

وزیر خارجہ شاہ محمود قریشی نے کہا ہے کہ افغانستان کے نیشنل سیکیورٹی ایڈوائزر پاکستان کے خلاف نازیبا زبان استعمال کر کے افغانستان میں قیام امن کی راہ میں رکاوٹیں کھڑی کررہے ہیں اور ماحول کو سازگار بنانے کے بجائے اسے بگاڑنے کی کوشش کررہے ہیں۔

شاہ محمود قریشی نے ملتان میں پی ٹی آئی ورکرز سے خطاب کرتے ہوئے کہا کہ اسلامی تعاون تنظیم اور عرب لیگ کے اجلاس سے مغرب کے دارالحکومتوں میں اتنا ماحول بن گیا کہ اسرائیل کو ناچاہتے ہوئے اپنے فیصلے پر نظرثانی کرنی پڑی اور جو سلامتی کونسل نہ کر سکی، وہ پاکستان کی وکالت کی بدولت ممکن ہوا اور مسلمانوں پر ہونے والے جبر کو رکوانے میں مدد ملی۔

انہوں نے کہا کہ ہم نے فلسطینیوں پر جاری ظلم روکنے کے لیے فائربندی کرائی اور دوسری سفارتی کامیابی اس وقت حاصل ہوئی جب جنیوا میں مخالفت کے باوجود پاکستان کی قرارداد اکثریت ووٹوں سے منظور کی گئی اور ایک تحقیقاتی کمیشن بھی تشکیل پایا جو اسرائیل کے جنگی جرائم کی تحقیق کرے گا۔

ان کا کہنا تھا کہ فلسطین نئے وزیر خارجہ نے مجھے بتایا کہ ہم پر 25 منٹ میں 125 بم گرائے گئے، اس سے آپ اندازہ لگا سکتے ہیں کہ وہاں معصومین کی کیا کیفیت ہو گی لیکن اللہ نے ہمیں اس میں کامیابی دی اور ان کو کٹہرے میں لا کر کھڑا کیا گیا۔

انہوں نے کہا کہ جب میں فلسطین کا مقدمہ پڑھ رہاتھا تو میری نگاہ سرینگر پر بھی جا رہی تھی کیونکہ کشمیری بھی یہی کچھ کہہ رہے ہیں اور میں آپ سے وعدہ کرتا ہوں کہ جس طرح ببانگ دہل فلسطینیوں کا مقدمہ لڑا، تو اسی طرح مارچ 2022 میں پورے عالم اسلام کے وزرائے خارجہ کو اسلام آباد آنے کی دعوت دے کر مسئلہ کشمیر پر ان کو اکٹھا کرنے کی کوشش کروں گا اور کشمیریوں کا حق اور سچ پر مبنی مقدمہ پیش کیا جائے گا۔

ان کا کہنا تھا کہ وزیر اعظم عمران خان کی سوچ کو پذیرائی ملی اور دنیا اس بات پر متفق ہوئی کہ افغانستان کا مسئلہ جنگ سے نہیں بلکہ مذاکرات سے حل کیا جا سکتا ہے، وہ لوگ جو تہمتیں لگاتے تھے، وہ اس بات پر قائل ہو گئے کہ افغانستان کے مسئلے کا حل گفت و شنید ہے۔

شاہ محمود قریشی نے کہا کہ دو دن قبل افغانستان اور چین کے وزرائے خارجہ سے دوبدو گفتگو کی اور افغانستان میں امن کے قیام کے لیے عمران خان کے اقدامات اور ان کی ہدایات کو سامنے رکھتے ہوئے پاکستان کا موقف پیش کیا اور امن و استحکام کے لیے ہماری کاوشیں جاری رہیں گی۔

ان کا کہنا تھا کہ میں آج ببانگ دہل کہہ رہا ہوں کہ افغانستان کا نیشنل سیکیورٹی ایڈوائزر کان کھول کر سن لے کہ پاکستان نے بڑی قیمت ادا کی ہے، 83ہزار جنازے ہمارے کندھے پر اٹھے ہیں، 128ارب ڈالر کی قیمت میرے ملک کی معیشت نے ادا کی ہے، ہم امن اور استحکام کی بات کررہے ہیں لیکن ننگرہار میں تم نے تقریر میں پاکستان کے خلاف انتہائی غلط الفاظ استعمال کیے، تم جو الفاظ استعمال کررہے ہو اور پاکستان پر جو تہمتیں لگا رہے ہو تو اگر یہ سلسلہ نہ رکا تو کوئی پاکستانی تم سے ہاتھ نہیں ملائے گا اور نہ گفتگو کرے گا۔

انہوں نے عالمی برادری کو مخاطب کرتے ہوئے کہا کہ نیشنل سیکیورٹی ایڈوائزر کہلانے والے یہ صاحب صورتحال خراب کرنے والے کا کردار ادا کررہے ہیں اور افغانستان میں امن کے قیام کی راہ میں رکاوٹیں کھڑی کررہے ہیں اور ماحول کو سازگار بنانے کے بجائے بگاڑنے کی کوشش کررہے ہیں لہٰذا امن کے متلاشی افغانستان کے باشعور شہری انہیں اپنے رویے پر نظرثانی کے لیے قائل کریں کیونکہ یہ رویہ درست نہیں۔

وزیر خارجہ نے مزید کہا کہ تحریک انصاف کی حکومت آنے سے قبل 2017 میں ہی پاکستان کو ایف اے ٹی ایف کی گرے لسٹ میں ڈال دیا گیا اور پاکستان کی حکومت نے ڈھائی سالوں میں دن رات کوششیں کی ہیں، کچھ سیاسی طاقتوں نے ایف اے ٹی ایف کے پلیٹ فارم کو سیاست کی نذر اور پاکستان کو کٹہرے میں کھڑا کرنے کی کوششیں کیں لیکن ہماری کاوشیں اور محنت اس قدر تھی کہ کل ایشیا پیسیفک گروپ کے اجلاس میں انہیں کہنا پڑا کہ ہم نے جتنی سفارشات پیش کی تھیں، حکومت پاکستان نے ان میں سے اکثریت پر ٹھوس اقدامات کیے ہیں۔

انہوں نے جون میں ہونے والے اجلاس میں پاکستان کو گرے لسٹ سے نکالنے کی اپیل کرتے ہوئے کہا کہ اگر انصاف کے ترازو میں رکھ کر تولا جائے تو اب پاکستان کو گرے لسٹ میں رکھنے کا کوئی جواز باقی نہیں رہ گیا اور عمران خان کی قیادت میں پاکستان گرے لسٹ سے نکل کر دوبارہ وائٹ لسٹ کی جانب پیش قدمی کررہا ہے۔

انہوں نے کہا کہ ایک اتحاد سامنے آیا جسے پاکستان ڈیموکریٹک موومنٹ کا نام دیا گیا جس کا ایک ہی مقصد تھا کہ این آر او کے سہارے میں اپنی منزل کو پہنچ جاؤں اور جو کھایا ہے وہ ہضم ہو جائے لیکن آج یہ کہتا ہوں کہ پی ڈی ایم کے اتحاد کو آگ لگ گئی، ملتان کے چراغ سے اور اس چراغ نے خود کو جلانے کے لیے پی ڈی ایم کو گُل کردیا۔

بیجنگ: امریکی صدر جو بائیڈن کی جانب سے چینی کمپنیوں میں امریکیوں کو سرمایہ کاری سے روکنے کے لیے بلیک لسٹڈ کمپنیوں کی فہرست میں توسیع کے بعد چین نے امریکا پر چینی کمپنیوں کو ‘دبانے’ کا الزام لگایا اور انتقامی کارروائی کی دھمکی دی۔

رپورٹ کے مطابق جو بائیڈن نے دو روز قبل فہرست کو 59 چینی کمپنیوں تک بڑھا دیا تھا جو بیجنگ کے ‘فوجی – صنعتی کمپلیکس’ سے تعلق ہونے پر امریکی سرمایہ کاروں کی حدود سے باہر ہیں کیونکہ امریکا، ایشیائی سپر پاور پر دباؤ کی مہم برقرار رکھے ہوئے ہے۔

اس سے قبل سابق امریکی صدر ڈونلڈ ٹرمپ نے نومبر میں 31 چینی کمپنیوں کی ایک فہرست جاری کی تھی جن کے بارے میں کہا گیا تھا کہ وہ چین کی فوج اور سیکیورٹی اداروں کی مدد کر رہی ہیں، رواں سال کے آغاز میں اس فہرست میں مزید کمپنیوں کو شامل کیا گیا تھا۔

تاہم قانونی چیلنجز کے بعد جو بائیڈن کی ٹیم نے بلیک لسٹ کا جائزہ لیا اور کچھ نام حذف کرکے بالآخر اس میں توسیع کردی۔

اس فہرست میں کئی کمپنیاں پہلے سے شامل کمپنیوں کی ذیلی کمپنیاں ہیں۔

وائٹ ہاؤس سے جاری بیان میں کہا گیا کہ پابندیوں میں ان کمپنیوں کو نشانہ بنایا گیا ہے جو چینی نگراں ٹیکنالوجی میں کردار ادا کر رہی ہیں۔

چین کی وزارت خارجہ نے اس اقدام کو ‘مارکیٹ کے قوانین کی خلاف ورزی’ اور چینی کمپنیوں کو ‘دبانے’ کی کوشش بتاتے ہوئے مسترد کردیا۔

چین کی وزارت خارجہ کے ترجمان وانگ وین بین نے صحافیوں سے گفتگو کرتے ہوئے امریکا سے چینی کمپنیوں کے ساتھ منصفانہ اور غیر امتیازی سلوک رکھنے کی اپیل کی اور کہا کہ کہ ‘چینی کمپنیوں کو دبانے والی یہ نام نہاد فہرستیں ختم کردیں’۔

انہوں نے کہا کہ ‘چین اپنی کمپنیوں کے جائز حقوق اور مفادات کے استحکام کے لیے ضروری اقدامات اٹھائے گا’۔

ڈونلڈ ٹرمپ کے دور اقتدار میں شائع ہونے والی ابتدائی فہرست میں چائنا موبائل، چائنا ٹیلی کام، ویڈیو نگرانی کی کمپنی ہیک ویژن اور چائنا ریلوے کنسٹرکشن کارپوریشن جیسی بڑی ٹیلی کمیونی کیشن، تعمیراتی اور ٹیکنالوجی ادارے شامل تھے۔

چائنا نیشنل آف شور آئل کارپوریشن (سی این او او سی) کو جنوری میں اس فہرست شامل کیا گیا تھا جس کی وجہ سے ایس اینڈ پی نے اسے اپنے اسٹاک انڈیکس سے ہٹادیا تھا اور یہ جو بائیڈن کی فہرست میں اب بھی شامل ہے۔

سرمایہ کاری پر پابندی 2 اگست سے نافذ ہوگی اور موجودہ حصص یافتگان کو اس میں سے اپنا سرمایہ نکالنے کے لیے ایک سال کا وقت دیا گیا ہے۔

جو بائیڈن انتظامیہ نے جہاں ڈونلڈ ٹرمپ کے جانے کے بعد چین کے ساتھ مزید سفارتی انداز اختیار کرنے کے عزم کا اظہار کیا ہے وہیں اس نے کہا ہے کہ وہ دفاع اور ٹیکنالوجی سمیت متعدد امور پر سخت گیر موقف پر برقرار رہے گی۔

واضح رہے کہ ریپبلکن سینیٹرز ٹام کاٹن اور مارکو روبیو نے ڈیموکریٹس گیری پیٹرز اور مارک کیلی کے ساتھ مل کر ایک خط لکھا تھا جس میں انتظامیہ سے نئی فہرست شائع کرنے پر زور دیا گیا تھا۔

بھارت نے ٹوئٹر کو نئے انفارمیشن ٹیکنالوجی قوانین کو تسلیم کرنے کا آخری موقع دیتے ہوئے انتباہ کیا ہے کہ اگر ایسا نہیں کیا گیا تو اسے ‘غیردانستہ نتائج’ کا سامنا ہوگا۔

یہ بات خبررساں ادارے رائٹرز نے ایک آفیشل خط کے حوالے سے اپنی رپورٹ میں بتائی۔

بھارت میں نئے آئی ٹی قوانین کا اعلان فروری میں کیا گیا تھا اور ان کا اطلاق مئی 2021 کے اختتام پر ہوا، جس کا مققصد سوشل میڈیا پر مواد کو ریگولیٹ کرنے کے ساتھ مختلف کمپنیوں جیسے فیس بک اس کے زیرملکیت واٹس ایپ میسنجر اور ٹوئٹر کو قانونی درخواستوں پر قابل احتساب بنانا ہے۔

ان قوانین کے تحت بڑی سوشل میڈیا کمپنیوں کو شکایات دور کرنے کے لیے میکنزمز کے قیام کے ساتھ قانون نافذ کرنے والے اداروں کے ساتھ رابطے کے لیے نئے عہدیداران کا انتخاب کرنا ہوگا۔

5 جون کو وزارت آئی ٹی کی جانب سے ٹوئٹر کے ڈپٹی جنرل کونسل جم بیکر کے نام لکھے گئے خط میں کہا گیا ‘بھارتی وزارت آئی ٹی کی جانب سے ٹوئٹر کو 26 اور 28 مئی کو نئے قواین کے حوالے سے خطوط ارسال کیے گئے تھے مگر کمپنی کی جانب قوانین کو مکمل طور پر تسلیم کرنے یا وزارت کی جانب سے طلب کی گئی وضاحتوں پر کوئی ردعمل ظاہر نہیں کیا گیا’۔

اس خط کی نقل رائٹرز نے دیکھی جس میں متعدد دیگر امور پر بھی بات کی گئی تھی۔

ٹوئٹر کی جانب سے بھارتی وزارت کو نئے قوانین کے تحت عہدیداران کے بارے میں کچھ نہیں بتایا گیا۔

خط میں کہا گیا کہ قوانین پر عملدرآمد نہ کرنے سے ‘غیردانستہ نتائج’ بشمول مواد پوسٹ ہونے پر ٹوئٹر کے احساب کا امکان کا سامنا ہوسکتا ہے، اس حوالے سے کمپنی کو بھی استثنیٰ حاصل ہے۔

خط میں مزید کہا گیا ‘خیرسگالی کے اقدام کے طور پر ٹوئٹر کو قوانین کو فوری تسلیم کرنے کے لیے آخری بار مطلع کیا جارہا ہے’۔

بھارتی وزارت آئی ٹی نے اس حوالے سے خبررساں ادارے کے رابطے پر کوئی بیان نہیں دیا جبکہ ٹوئٹر کی جانب سے بیان جاری کرنے گریز کیا گیا۔

بھارت کے نئے قوانین کے بعد عدالتی جنگ کا آغاز ہوا تھا جبکہ واٹس ایپ کی جانب سے مقدمہ دائر کیا گیا تھا جس میں حکومت پر قانونی اختیارات سے تجاوز کرنے کا الزام عائد کیا گیا تھا۔

دہلی ہائی کورٹ میں دائر مقدمے میں کہا گیا کہ نافذ کیے گئے قوانین میں سے ایک بھارت کے آئین میں موجود رازداری کے حقوق کی خلاف ورزی ہے کیونکہ اس میں سوشل میڈیا کمپنیوں کو حکام کے مطالبے پر کسی ‘انفارمیشن سے وابستہ’ پہلے شخص کی نشاندہی کرنی ہوگی۔

اگرچہ نئے قانون میں واٹس ایپ سے مطالبہ کیا گیا ہے کہ وہ صرف ان لوگوں کو بے نقاب کرے جن پر مصدقہ طور پر غلط کاموں کا الزام لگایا گیا ہے لیکن کمپنی کا کہنا ہے کہ وہ عملی طور پر تنہا یہ کام نہیں کرسکتی۔

کمپنی کے مطابق چونکہ پیغامات اینڈ-ٹو-اینڈ انکرپٹڈ ہیں اور مذکورہ قانون کی تعمیل کے لیے واٹس ایپ کو پیغام موصول کرنے والوں کے لیے اور بھیجنے والوں کے لیے انکرپشن کو توڑنا ہوگا۔

اترپردیش: بھارت میں انتہا پسند ہندوؤں نے گاؤ ماتا کی رکھشا کے نام پر ایک مسلمان نوجوان کو قتل جب کہ 5 کو شدید زخمی کردیا۔

بھارتی میڈیا کے مطابق ریاست اتر پردیش کے علاقے علی گڑھ میں جنونی ہندوؤں نے مسلم خاندان پر حملہ کردیا۔ لاٹھیوں، ڈندوں اور تیز دھار آلے کے وار سے 6 افراد شدید زخمی ہوگئے۔

پولیس نے زخمیوں کو قریبی اسپتال منتقل کیا جہاں نوجوان شیرا نے زخموں کی تاب نہ لاتے ہوئے دم توڑ دیا جب کہ دیگر 5 بھی شدید زخمی حالت میں زیر علاج ہیں۔ پولیس کا کہنا ہے کہ حملہ آوروں نے مسلم خاندان پر گائے کی اسمگلنگ کا الزام عائد کیا ہے۔

پولیس نے خدشہ ظاہر کیا ہے کہ یہ دو گروہوں کی لڑائی تھی جسے مذہبی رنگ دیا گیا۔ پولیس نے مسلم خاندان پر حملہ کرنے کے الزام میں ایک ہندو پجاری کو حراست میں لیا ہے۔ سوشل میڈیا پر ہندو پجاری کی اقبالِ جرم کی ویڈیو بھی سامنے آئی ہے۔