Category انٹرنیشنل

بھارت میں ریکارڈ 2 لاکھ نئے کورونا وائرس کے کیسز رپورٹ ہوئے اور ملک کے مالیاتی مرکز ممبئی میں لاک ڈاؤن نافذ کردیا گیا کیونکہ شہر میں کووڈ 19 کے مریضوں کا علاج کرنے والے بہت سے ہسپتالوں میں بستر اور آکسیجن کی رسد کی شدید قلت ہوگئی ہے۔

غیر ملکی خبر رساں ادارے رائٹرز کی رپورٹ کے مطابق گزشتہ 8 روز میں یہ روزانہ کے حساب سے ساتواں ریکارڈ اضافہ تھا، بھارت میں وائرس کی دوسری لہر بری طرح پھیل رہی ہے جبکہ ملک کے معاشی طور پر اہم ریاست مہاراشٹر اس کا مرکز ہے۔

بھارت کی مغربی ریاست مہاراشٹر میں ملک میں سامنے آنے والے کیسز کا تقریبا ایک چوتھائی حصہ موجود ہے۔

جمعرات کو جاری کردہ وزارت صحت کے اعداد و شمار کے مطابق بھارت نے گزشتہ 24 گھنٹوں کے دوران 2 لاکھ 739 کووڈ 19 کیسز رپورٹ کیے۔

اس کے علاوہ ملک میں گزشتہ روز ایک ہزار 38 اموات بھی رپورٹ ہوئی جس کے بعد مجموعی طور پر ہلاکتوں کی تعداد ایک لاکھ 73 ہزار 123 ہوگئی۔

ملک میں کیسز کی تعداد ایک کروڑ 41 لاکھ تک پہنچ چکی ہے جو امریکا کے بعد دوسرے نمبر پر ہے جہاں مجموعی کیسز 3 کروڑ 14 لاکھ ہیں۔

ڈھاکا میں لاک ڈاؤن
غیر ملکی خبر رساں ادارے اے ایف پی کی رپورٹ کے مطابق بنگلہ دیش کے دارالحکومت میں بدھ کے روز ہزاروں پولیس اہلکاروں نے خالی سڑکوں پر گشت کیا جہاں حکومت نے کورونا وائرس کی نئی لہر کا مقابلہ کرنے کے لیے ملک بھر میں سخت لاک ڈاؤن نافذ کر رکھا ہے۔

عام طور پر ایشیا میں سب سے زیادہ انسانوں پر مشتمل شہر ڈھاکہ بھوتوں کی بستی کا منظر پیش کررہا تھا جہاں افسران نے 2 کروڑ آبادی کے شہر میں چوکیاں قائم کیں تاکہ کسی کو بھی بغیر کسی مخصوص پاس کے گزرنے سے روکا جاسکے۔

بدھ کا روز بنگالی سال نو کا پہلا دن تھا جس روز عام طور پر لاکھوں لوگ بڑے شہروں میں روایتی جلسوں میں جاتے ہیں، اس کے علاوہ گزشتہ روز بنگلہ دیش میں رمضان کا بھی پہلا روز تھا۔

تاہم کورونا وائرس کے خطرے کی وجہ سے ان تقریبات کو مسلسل دوسرے سال بھی منسوخ کیا گیا۔

گزشتہ ماہ بنگلہ دیش میں ایک تازہ کورونا وائرس کی لہر پھیلی، جس میں روزانہ انفیکشن میں سات گنا اضافہ اور اموات تین گنا بڑھ گئی ہیں۔

جنوبی ایشیائی ملک میں تقریباً 7 لاکھ کیسز ریکارڈ ہوئے ہیں جس میں سے 10 ہزار کے قریب افراد ہلاک ہوچکے ہیں۔

جرمنی میں جنوری کے بعد سے سب سے زیادہ کیسز ریکارڈ
خبر رساں ادارے رائٹرز کے مطابق جرمنی میں کورونا وائرس کے روزانہ کے تصدیق شدہ کیسز کی تعداد بڑھ کر 29 ہزار 426 ہوگئی جس کے بعد ملک میں مجموعی کیسز کی تعداد 30 لاکھ 73 ہزار ہوگئی ہے۔

یہ 8 جنوری کے بعد سب سے بڑا اضافہ ہے کیونکہ حکومت وائرس کی تیسری لہر پر قابو پانے کے لیے ملک بھر میں سخت پابندیوں کے نفاذ پر غور کر رہی ہے۔

اطلاعات کے مطابق گزشتہ روز اموات کی تعداد 293 رہی جس کے بعد اب تک وائرس سے مجموعی ہلاکتوں کی تعداد 79 ہزار 381 ہوگئی۔

ترکی میں جزوی کرفیو
انادولو کی رپورٹ کے مطابق ترکی کی وزارت داخلہ نے مسلمانوں کے مقدس ماہ رمضان المبارک کے دوران جزوی طور پر لاک ڈاؤن کے حوالے سے کورونا وائرس اقدامات پر عوامی نوٹس جاری کیا۔

ملک کے تمام 81 صوبوں کو ارسال کیے گئے نوٹس کے مطابق قواعد پر عمل کیا جائے اور صوبائی بنیادوں پر کیے جانے والے کورونا وائرس اقدامات کا تعین گورنر شپ کے ذریعے کیا جائے گا۔

نئی پابندیوں کے تحت عام دنوں میں کرفیو رات 9 بجے کے بجائے 7 بجے شروع ہوگا اور صبح 5 بجے تک جاری رہے گا اور اس دوران ضروری اور ایمرجنسی صورتحال کے علاوہ شہروں کے اندر سفر پر بھی پابندی ہوگی۔

ملک بھر میں ہفتے کے آخر میں کرفیو 2 اپریل کو نافذ کیا گیا تھا جو 17 مئی تک جاری رہے گا۔

منگل تک ترکی میں کورونا وائرس سے مجموعی طور پر 34 ہزار 455 اموات ریکارڈ کی گئیں جب کہ مجموعی 39 لاکھ 60 ہزار کیسز میں سے 34 لاکھ 20 ہزار افراد اس سے صحت یاب ہوچکے ہیں۔

روس میں تقریبا 9 ہزار نئے کیسز، 398 اموات رپورٹ
روس میں کووڈ 19 کے 8 ہزار 944 کیسز رپورٹ ہوئے ہیں جن میں سے صرف ماسکو سے 2 ہزار 455 کیسز شامل ہیں۔

ملک میں سرکاری سطح پر مجموعی کیسز کی تعداد 46 لاکھ 75 ہزار 153 ہوگئی ہے۔

سرکاری کورونا وائرس ٹاسک فورس کا کہنا تھا کہ گزشتہ 24 گھنٹوں کے دوران ملک میں 398 افراد ہلاک ہوئے جس سے ملک میں مجموعی ہلاکتوں کی تعداد ایک لاکھ 4 ہزار 398 ہوگئی۔

امریکی صدر جوزف بائیڈن کی طرف سے افغانستان سے اپنی فوج کے انخلاء کے اعلان کے بعد نیٹو ممالک نے بھی نیٹو ممالک نے بھی اپنی افواج کے انخلا پر ایک ساتھ مل کر کام کرنے کا اعلان کیا ہے۔

نیٹو کے اتحادی ممالک نے ایک اہم میٹنگ میں افغانستان میں اپنا آپریشن ختم کرنے پر اتفاق کر لیا ہے۔ یہ فیصلہ امریکی صدر جو بائیڈن کے اعلان کے تناظر میں کیا گیا ہے جس میں امریکی فوج کو آئندہ 11 ستمبر تک افغانستان سے نکال لینے کی بات کہی گئی تھی۔

امریکا نے 2001ء میں 11 ستمبر کو نیو یارک کے ٹوئن ٹاورز پر القاعدہ کے حملے کے بعد افغانستان پر حملہ کیا تھا۔ اس حملے میں نیٹو ممالک نے بھی امریکا کا ساتھ دیا تھا اور اپنی افواج افغانستان میں تعینات کی تھیں۔

برسلز میں کانفرنس کے دوران نیٹو کے سکریٹری جنرل جینس سٹولٹلن برگ نے اعلان کرتے ہوئے کہا کہ نیٹو کے اتحادیوں نے منظم، مربوط اور سوچ سمجھ کر یکم مئی سے ریزولوٹ سپورٹ فورسز کی واپسی شروع کرنے کا فیصلہ کیا ہے۔ ہم افغانستان کو اپنی حمایت جاری رکھیں گے، ہمارے رشتوں میں یہ ایک نئے باب کا آغاز ہے۔ ہم افغانستان میں ایک ساتھ گئے تھے۔ ہم نے ایک ساتھ مل کر وہاں اپنا انداز اور طریقہ اختیارکیا اور وہاں سے نکلنے میں بھی ہم ساتھ ہیں۔

افغانستان سے افواج کے انخلا کے معاملے پر بات چیت کے لیے اتحادی ممالک کے دفاعی اور خارجی امور کی وزرا کی میٹنگ ہوئی جس میں اس مسئلے پر تفصیلی بات چیت ہوئی۔ اس کے بعد نیٹو کے سکریٹری جنرل نے افغانستان کے تعلق سے یہ بیان جاری کیا۔

اس سے قبل امریکی صدر جو بائیڈن نے وائٹ ہاؤس سے اپنے خطاب کے دوران افغانستان سے امریکی فوج کے انخلا کے اپنے منصوبے کا باضابطہ اعلان کیا۔ انہوں نے کہا کہ اس کا آغاز یکم مئی سے ہوگا اور اختتام 11 ستمبر کو ہو جائیگا۔ یہ امریکا کی طویل ترین جنگ کے خاتمے کا وقت ہے اور امریکا اس انخلا کے عمل میں جلد بازی سے کام نہیں لے گا۔

قوم سے خطاب کرتے ہوئے جوبائیڈن کا کہنا تھا کہ افغان امن مذاکرات کی حمایت کرتے اور پاکستان کےکردارکو تسلیم کرتے ہیں کیونکہ امن مذاکرات میں پاکستان،روس، چین نے اہم کردار ادا کیا۔

دوسری طرف افغان صدر اشرف غنی نے بھی فوجی انخلا کے حوالے امریکی صدر جو بائیڈن سے فون پر بات چیت کی۔

انہوں نے ایک ٹویٹ میں گفتگو کے بارے میں کہا کہ افغانستان امریکا کے فیصلے کا احترام کرتا ہے اور آسان انخلاء کو یقینی بنانے کے لیے ہم اپنے امریکی شراکت داروں کے ساتھ مل کر کام کریں گے۔ افغانستان کی قابل فخر سکیورٹی اور دفاعی فورسز اپنی عوام اور ملک کے دفاع کی پوری صلاحیت رکھتے ہیں۔

بائیڈن انتظامیہ نے متحدہ عرب امارات کے ساتھ 23 ارب ڈالر مالیت کااسلحہ فروخت کرنے کےمعاہدے کو بحال کرنے کا فیصلہ کرلیا ہے۔

اس ڈیل کے تحت یو اے ای کو F-35 ڈرون جہاز اور دیگر جدید آلات دیے جائیں گے۔ اس معاہدے کی بابت جو بائیڈ ن انتظامیہ نے کانگریس کو بتایا ہے کہ ہم ٹرمپ انتظامیہ کی جانب سے متحدہ عرب امارات کے ساتھ ہونے والی23ارب ڈالر سے زائد اسلحے کی فروخت کے معاہدے کو آگے بڑھا رہے ہیں۔

اسٹیٹ ڈیپارٹمنٹ کے ترجمان کا اس معاہدے پر کہنا ہے کہ بائیڈن انتظامیہ یواے ای کو اسلحے کی مجوزہ فروخت کے معاملات کو آگے بڑھا رہی ہے اور ہم اس سے متعلق تمام تفصیلات پر نظر ثانی کرتے ہوئے اماراتی حکام کے ساتھ ان ہتھیاروں کے استعمال پر بھی مشاورت کر رہے ہیں۔
یاد رہے کہ یہ ڈیل ٹرمپ انتظامیہ نے متحدہ عرب امارات کے ساتھ کی تھی، تاہم بائیڈن انتظامیہ نے اس معاہدے پر عمل درآمد کومزید نظر ثانی کے لیے روک دیا تھا، حالانکہ کہ ٹرمپ کے وائٹ ہاؤس چھوڑنے سے قبل فروخت کا معاملہ حتمی ہوچکا تھا۔

سابق صدر ڈونلڈ ٹرمپ نے گزشتہ سال نومبر میں کانگریس کو بتایا تھا کہ ہم نے ’ابراہم اکارڈز‘ ( امریکا کی موجودگی میں ہونے والا معاہدہ جس کے تحت متحدہ عرب امارات نے اسرائیل کے ساتھ تعلقات معمول پر لانے پر رضامندی ظاہر کی تھی ) کی سائیڈ ڈیل کے طور پر یو اے ای کو اسلحہ فروخت کرنے کی منظوری دے دی ہے۔ ٹرمپ انتظامیہ کے آخری مہینوں میں اسرائیل نے معاہدے کے مطابق متحدہ عرب امارات، بحرین، سوڈان اور مراکو کے ساتھ معاہدے کیے تھے۔

23 ارب 37 کروڑ ڈالر کے اس معاہدے کے تحت متحدہ عرب امارات کو جنرل اٹامکس، لاک ہیڈ مارٹن اینڈ ریتھیون ٹیکنالوجیز، پچاس F-35 لائٹننگ II ایئر کرافٹ، 18 MQ-9B فضائی نظام اور فضا سے فضا اور فضا سے زمین پر مار کرنے والا اسلحہ فراہم کیا جائے گا۔

پاکستان اقتصادی شبعوں میں ترقی کے لیے جرمنی میں جلد ایک قونصل خانہ کھولے گا۔

رپورٹ کے مطابق وزیر خارجہ شاہ محمود قریشی نے منگل کو اعلان کیا کہ میونخ میں قونصل خانہ کھولا جائے گا۔

جرمنی کے دارالحکومت میں میڈیا سے گفتگو کرتے ہوئے شاہ محمود قریشی نے کہا کہ پاکستان اور جرمنی کے مابین تجارت اور سرمایہ کاری میں تعاون کے بہت زیادہ امکانات ہیں۔

انہوں نے اعتماد کا اظہار کیا کہ نیا قونصل خانہ اس سلسلے میں معاملات میں تیزی لائے گا۔

وزیر خارجہ نے کہا کہ برلن میں ملک کے سفارتخانے کی سفارتی کوششوں کو پورا کرنے کے لیے میونخ مشن میں ایک قونصل جنرل مقرر کیا جائے گا۔

شاہ محمود قریشی نے مزید کہا کہ پاکستان نے یورپ کے ساتھ اسٹریٹجک اشتراک عمل منصوبہ وضع کرنے کا عزم کر رکھا ہے۔

ان کا کہنا تھا کہ پاکستان جرمنی کے ساتھ بالخصوص انفارمیشن ٹیکنالوجی، شمسی توانائی اور برقی گاڑیوں کے شعبوں میں تعاون کر سکتا ہے۔

انہوں نے اس بات پر اطمینان ظاہر کیا کہ اس وقت 5 ہزار کے قریب پاکستانی طلبہ جرمنی کے مختلف تعلیمی اداروں میں زیر تعلیم ہیں۔

شاہ محمود قریشی نے کہا کہ شاعر مشرق علامہ محمد اقبال نے بھی میونخ کے ایک انسٹی ٹیوٹ میں تعلیم حاصل کی۔

ان کا کہنا تھا کہ ہائیر ایجوکیشن کمیشن کو شامل کرکے تعلیم کے شعبے میں تعاون کے دائرہ کار کو وسعت دینے کی کوشش کی جائے گی تاکہ جرمنی میں پاکستانی طلبہ کی اولین منزل بن سکے۔

جرمنی میں پاکستانی کمیونٹی کے وفد سے ملاقات میں شاہ محمود قریشی نے کہا کہ حکومت بیرون ملک مقیم پاکستانیوں کو ووٹ کا حق دینے کے لیے سنجیدہ کوششیں کررہی ہے۔

انہوں نے کہا کہ تارکین وطن کی سہولت کے لیے الیکٹرانک ووٹنگ کا آپشن زیر غور ہے۔

ان کا کہنا تھا کہ حکومت نے قانونی ذرائع سے پاکستان میں آسانی سے رقم کی منتقلی کے لیے ڈیجیٹل روشن پاکستان منصوبہ شروع کیا تھا۔

وفد نے شاہ محمود قریشی کی جرمنی کے ساتھ تعلقات کو فروغ دینے کی کوششوں کو سراہا اور میونخ میں قونصل خانہ کھولنے کے اعلان پر ان کا شکریہ ادا کیا۔

امریکی صدر جو بائیڈن نے رواں سال گیارہ ستمبر تک افغانستان سے تمام امریکی افواج نکالنے کا فیصلہ کرلیا اور وہ بدھ کو اپنے فیصلے کا اعلان کر سکتے ہیں۔

امریکی اخبارکے مطابق امریکی عہدیدارکا کہنا ہے کہ ہماری پالیسی حقائق کو مدنظررکھ کر بنائی جارہی ہے، معاہدے کی شرائط پوری نہ ہونے کی صورت میں طالبان سے جنگ کی طرف جا سکتے ہیں۔

امریکی عہدیدار کا کہنا تھا کہ صدر بائیڈن جنگ کو قومی مفاد کےخلاف سمجھتے ہیں، فوجیں نکالنے کا مطلب یہ نہیں کہ امریکا افغانستان کو چھوڑ دے گا، افغان حکومت کے ساتھ سفارتی تعلق میں رہیں گے۔

طالبان امریکا معاہدے کے مطابق امریکی افواج کو یکم مئی سے پہلے افغانستان سے نکلنا تھا، افغان طالبان نے معاہدے کے مطابق انخلا نہ ہونے کی صورت میں نتائج کی دھمکی دے رکھی ہے، افغانستان میں 2500 سے زائد امریکی فوجی موجود ہیں۔

امریکی شہر بروک لین سینٹر میں سیاہ فام نوجوان کی پولیس کے ہاتھوں ہلاکت کے بعد حالات مسلسل کشدیدہ ہیں، عوام نے پولیس ہیڈ کواٹر کے سامنے مظاہرہ کیا۔ شہر کے پولیس چیف اور نوجوان کو مارنے والے اہلکار نے استعفی دے دیا۔

امریکا میں سیاہ فام نوجوان کی پولیس کے ہاتھوں ہلاکت، بروک لین سینٹر میں مظاہرے جاری ہیں، ہزاروں افراد نے پولیس ہیڈ کواٹر کے سامنے شمع جلا کر احتجاج کیا۔ لوگوں نے مارے جانے والے سیاہ فام نوجوان ڈانٹے رائٹ کی یاد میں پھول بھی رکھے، لوگوں نے بڑی بڑی ریلیاں نکالیں جس میں مختلف کمیونٹیز کے افراد نے شرکت کی۔ لوگوں نے مارے جانے والے نوجوان کی تصاویر اٹھا رکھی تھیں۔

شہر میں کئی مقامات پر مظاہرین اور پولیس کے ساتھ جھڑپیں بھی ہوئیں۔ نوجوان کو ہلاک کرنے والےاہلکار اور بروک لین پولیس کے چیف نے استعفیٰ دے دیا۔

بھارت میں کورونا وبا کے باوجود 25 لاکھ کے لگ بھگ یاتریوں نے کمبھ میلے میں شرکت کی جس کے بعد ایک دن میں کورنا کے نئے کیسز کی تعداد ایک لاکھ 84 ہزار سے زائد ہوگئی۔

بھارتی میڈیا کے مطابق ریاست اتراکھنڈ کے شہر ہریدوار میں کمبھ میلے میں اب تک 25 لاکھ سے زائد افراد گنگا میں ڈبکی لگا کر اپنی مذہبی رسم پوری کرچکے ہیں۔ یہ میلہ دو ماہ تک جاری رہے گا اور پولیس ایس او پیر پر عمل درآمد کرانے میں ناکام رہی ہے۔

کورونا ایس او پیز کی کھلی خلاف ورزی کے ساتھ دو روز قبل شروع یونے والے کمبھ میلے کے دوران لاکھوں افراد نے بغیر ماسک پہنے اور سماجی فاصلے کا خیال رکھے بغیر جتھے کے جتھے گنگا میں ڈبکی لگا رہے ہیں۔
کمبھ میلے کے اگلے روز ہی ملک بھر میں کورونا کے نئے ایک لاکھ 68 ہزار مریض سامنے آئے جو ایک ریکارڈ تھا تاہم آج کیسز کی تعداد میں مزید ہوا اور 24 گھنٹوں میں سامنے نئے کیسز کی تعداد ایک لاکھ 84 ہزار سے تجاوز کرگئی۔

بھارت میں کورونا وائرس سے متاثر ہونے والوں کی تعداد ایک کروڑ 36 لاکھ سے تجاوز کرگئی جب کہ اس مہلک وائرس سے ہلاک ہونے والوں کی تعداد 1 لاکھ 71 ہزار ہوگئی جس کے بعد بھارت دنیا بھر میں امریکا کے بعد کورونا سے متاثر ہونے والا دوسرا بڑا شہر بن گیا۔

ایرانی وزیر خارجہ جواد ظریف نے خبردار کیا ہےکہ ایران پر عائد پابندیاں اور حملے امریکا کو کوئی فائدہ نہیں پہنچائیں گی۔

تہران میں گفتگو کرتے ہوئے ایرانی وزیر خارجہ نے کہا کہ نطنز کے جوہری مرکز پر تازہ حملہ اور پابندیاں امریکا کو ایران کے جوہری معاہدے کی بحالی کے لیے بات چیت میں فائدہ نہیں دے گا۔

ایرانی وزیر خارجہ کا کہنا تھا کہ ایران جوہری معاہدے سے متعلق ایکشن پلان پر واپس آنے کے لیے پوری طرح تیار ہے لیکن اس کے لیے امریکا کی جانب سے ایران پر عائد یکطرفہ پابندیاں اٹھائے جانے کی تصدیق کی ضرورت ہے۔

جواد ظریف نے مزید کہا کہ امریکیوں کو یہ پتا ہونا چاہیے کہ سبوتاژ کرنے کی کوئی بھی پابندیاں یا عمل اسے مذاکرات کا ہتھیار فراہم نہیں کرے گا جب کہ یہ سب کچھ اس کے لیے صورتحال کو مزید مشکل بنادے گا۔

دوسری جانب ایران کے وزیر خارجہ جواد ظریف نے اقوام متحدہ کے سیکرٹری جنرل کو ایک خط بھی لکھا ہے جس میں انہوں نے کہا کہ اگر امریکا اس احمقانہ کھیل کے نتائج روکنا چاہتا ہے تو وہ لازمی ٹرمپ کی معاشی دہشتگردی پر غور کرے اور ساتھ ہی تمام پابندیاں اٹھائے۔

میڈیا رپورٹس کے مطابق امریکا نے ایرانی وزیر خارجہ کے بیان کو مسترد کرتے ہوئے کہا ہے کہ حالیہ جوہری مرکز پر حملے سے اس کا کوئی تعلق نہیں۔

امریکی حکام نے خون جمنے یا گاڑھا کرنے کی شکایات کے بعد جانسن اینڈ جانسن کی سنگل ڈوز کورونا ویکسین کے استعمال کو بند کرنے کے احکامات جاری کردیے۔

امریکا کی ڈرگ ریگولیٹر اتھارٹی فوڈ ایند ڈرگ ایڈمنسٹریشن (ایف ڈی اے) نے فروری کے اختتام پر جانسن اینڈ جانسن کی سنگل ڈوز ویکسین کے استعمال کی منظوری دی تھی۔

دیگر ویکسینز کے مقابلے جانسن اینڈ جانسن کی ویکسین کا ایک ڈوز ہی کورونا سے بچاؤ کے لیے کافی ہوگا اور امریکا کے بعد یورپ کے متعدد ممالک نے بھی اس کے استعمال کی منظوری دی تھی۔

جانسن اینڈ جانسن کی ویکسین کی ایک اور خاص بات یہ تھی کہ اس ویکسین کو دیگر ویکسینز کے مقابلے صرف فرج کے درجہ حرارت پر تین ماہ تک اسٹاک کیا جا سکتا ہے۔

اگرچہ اس ویکسین کے نتائج دوسری ویکسینز کے مقابلے کم افایت والے تھے، تاہم ماہرین کا ماننا تھا کہ سنگل ڈوز ہونے کی وجہ سے جانسن اینڈ جانسن کی افادیت دیگر کے مقابلے زیادہ ہے۔

جانسن اینڈ جانسن نے امریکی حکام کو مارچ کے وسط تک 2 کروڑ ڈوز فراہم کیے تھے اور باقی 10 کروڑ ڈوز جون تک فراہم کرنے کا وعدہ کیا تھا۔

تاہم ویکسین کے استعمال کے چند ہفتوں بعد اس کے استعمال کو فوری طور پر بند کرنے کے احکامات جاری کردیے گئے۔

خبر رساں ادارے ’رائٹرز‘ نے اپنی رپورٹ میں بتایا کہ امریکی ڈرگ ریگولیٹر اتھارٹی نے ہسپتالوں اور تمام ویکسینیشن سینٹرز کو جانسن اینڈ جانسن کی ویکسین کے استعمال سے روک دیا۔

رپورٹ میں بتایا گیا کہ جانسن اینڈ جانسن کی ویکسین کے استعمال کے بند ویکسین لگوانے والے افراد کے خون جمنے یا گاڑھے ہونے کی شکایات کے بعد اس کے استعمال کو روکنے کے احکامات جاری کیے گئے۔

رپورٹ میں نیویارک ٹائمز کی رپورٹ کا حوالہ دیتے ہوئے بتایا گیا کہ جانسن اینڈ جانسن ویکسین لگوانے والے 6 افراد میں شدید بلٹ کلاٹس یعنی خون جمنے کی شکایات سامنے آئی تھیں، جس کے بعد اس کے استعمال پر پابندی لگائی گئی۔

رپورٹ میں بتایا گیا کہ جن 6 افراد میں بلڈ کلاٹس یعنی خون جمنے کی شکایات تھیں، ان میں سے ایک خاتون ہلاک ہوگئیں تھیں جب کہ دوسری کو انتہائی تشویش ناک حالت مین ہسپتال پہنچایا گیا تھا۔

ویکسین میں بلڈ کلاٹس کی شکایات سامنے آنے اور اس کے استعمال کی بندش کے بعد جانسن اینڈ جانسن کے مارکیٹ شیئر میں 3 فیصد تک کمی بھی دیکھی گئی۔

جانسن اینڈ جانسن سےقبل فائزر اور آکسفورڈ یونیورسٹی کی ویکسین سمیت دیگر ویکسینز میں بھی دنیا کے مختلف ممالک میں یہی شکایات سامنے آئی تھیں اور ایسے ممالک میں کچھ ہفتوں کے لیے ویکسین کے استعمال کو روک دیا گیا تھا۔

بھارتی کسانوں کا احتجاج جاری ہے۔ امریکا میں بھی کاشتکاروں کے حق میں مظاہرہ کیا گیا۔ دلی دھرنے میں شریک مزید دو افراد ہلاک ہو گئے۔

امریکا میں بھارتی کسانوں کے حق میں بڑا مظاہرہ کیا گیا، سان فرانسسکو شہر میں ہونے والے احتجاج میں امریکیوں نے بھی شرکت کی۔ شرکا نے مودی کے خلاف اور کسانوں کے حق میں نعرے لگائے۔

دلی دھرنوں میں شریک مزید دو افراد زندگی کی بازی ہار گئے، ایک سو انتالیس روز سے جاری احتجاج میں تین سو باون کسان جان دے چکے ہیں۔