Category انٹرنیشنل

ماپوتو: افریقی ملک موزمبیق میں داعش جنگجوؤں نے ایک ہوٹل پر حملہ کرکے غیرملکیوں سمیت 180 افراد کو یرغمال بنالیا۔

عالمی خبر رساں ادارے کے مطابق شمالی موزمبیق میں ایل این جی کے پلانٹ کے علاقے پر مسلح افراد نے دھاوا بول دیا جس پر سیکیورٹی فورسز غیرملکی ملازمین کو قریبی ہوٹل میں پناہ لینے کے لیے لے گئے۔

داعش کے جنگجوؤں نے غیرملکی ملازمین کے تعاقب میں ہوٹل پر حملہ کرکے 180 افراد کو یرغمال بنالیا۔ تاحال جنگجوؤں کے مطالبات سامنے نہیں آسکے ہیں۔
داعش جنگجوؤں نے ایل این جی پلانٹ تک پہنچنے کے لیے راستے میں آنے والی ہر چیز کو تہس نہس کردیا۔ پورے علاقے میں جا بجا تباہی کے مناظر دیکھے جاسکتے ہیں جب کہ متعدد افراد کے ہلاک ہونے کی اطلاع ہے۔

اس علاقے میں فرانس کی آئل کمپنی ٹوٹل نے دیگر 6 عالمی کمپنیوں کے ساتھ مل کر ایک پروجیکٹ میں 20 ارب ڈالر کی سرمایہ کاری کی ہے جو کسی افریقی ملک میں کی گئی سب سے بڑی انویسٹمنٹ ہے۔

ابھی یہ واضح نہیں کہ ہوٹل میں داعش جنگجوؤں کی جانب سے یرغمال بنائے گئے غیر ملکی ملازمین کا تعلق کس ملک سے ہے اور وہ کس کمپنی کے ملازم ہیں۔

لندن: انگلینڈ میں متنازعہ بل کیخلاف احتجاج تشدد میں تبدیل ہوگیا۔ پولیس اور مظاہرین میں جھڑپیں، متعدد افراد کو حراست میں لے لیا گیا۔

پولیس کے مطابق برسٹل میں مظاہرین نے اہلکاروں پر شیشے کی بوتلیں اور انڈے پھینکے، چہروں پر لیزر لائٹس بھی ماری گئیں جبکہ مشتعل افراد نے اہلکاروں سے ان کی حفاظتی شیلڈز بھی چھیننے کی کوشش کی۔

اعلیٰ پولیس حکام نے کہا ہے کہ پر تشدد انتشار برداشت نہیں کیا جائے گا، انگلینڈ میں پولیس کو مزید اختیارات ملنے کے خلاف شہری سراپا احتجاج ہیں۔

پیانگ یانگ: شمالی کوریا نے نئی نوعیت کے ٹیکٹیکل گائیڈڈ پروجیکٹائل بیلسٹک میزائلوں کے تجربے کا دعویٰ کیا ہے جو ایٹمی وار ہیڈ لے جانے کی صلاحیت رکھتے ہیں۔

عالمی خبر رساں ادارے کے مطابق شمالی کوریا نے اقوام متحدہ کی سلامتی کونسل کی جانب سے عائد پابندیوں کو مسترد کرتے ہوئے اپنے مشرقی ساحل سے 600 کلومیٹر کے فاصلے پر نئے ٹیکٹیکل گائیڈڈ پروجیکٹائل میزائلوں کا تجربہ کیا ہے۔

شمالی کوریا کے سرکاری ٹیلی وژن کی رپورٹ میں ایک تصویر میں دکھائی گئی ہے جس میں میزائل کے ہدف کو نشانہ بنانے پر فوجی سربراہان کو تالیاں بجاتے ہوئے دیکھا جا سکتا ہے۔ ایٹمی وار ہیڈ لے جانے کی صلاحیت رکھنے والا یہ میزائل ڈھائی ٹن وزن اٹھانے کے قابل ہے۔
امریکا، جنوبی کوریا اور جاپان نے میزائل تجربے کو جارحیت قرار دیتے ہوئے سخت الفاظ میں مذمت کی ہے۔ جوبائیڈن کے امریکی صدر کا عہدہ سنبھالنے کے بعد شمالی کوریا کی جانب سے ایک سال میں ملک کا پہلا بیلسٹک میزائل تجربہ ہے۔

میزائل تجربے کے وقت شمالی کوریا کے رہنما کم جونگ ان موجود نہیں تھے۔

ینگون: امریکا اور برطانیہ نے میانمار میں فوجی گروپ جنتا کے خلاف جاری احتجاج میں شامل مظاہرین پر وحشیانہ کریک ڈاؤن کرنے پر پابندیوں کا اعلان کردیا۔

واضح رہے کہ یکم فروری کو سویلین رہنما آنگ سان سوچی کو گرفتار کرنے اور ان کی منتخب حکومت کا تختہ الٹنے کے خلاف ملک گیر مظاہروں کو روکنے کے لیے فوج نے خونریز تشدد کا آغاز کررکھا ہے۔

رپورٹ کے مطابق بین الاقوامی سطح پر مذمت نے اب تک اس وحشیانہ اقدام کو روکنے کے لیے بہت کم کام کیا ہے تاہم امریکا اور برطانیہ نے کہا ہے کہ وہ میانمار اکنامک ہولڈنگز لمیٹڈ کے انتہائی خفیہ معاملے کے خلاف پابندیاں عائد کرے گا جس سے فوج کے سربراہوں کو بے پناہ دولت تک رسائی حاصل ہے۔

برطانیہ کے سیکریٹری خارجہ ڈومینک راب نے کہا کہ ‘آج کی پابندیوں سے فوجیوں کے مالی مفادات کو نشانہ بنایا جارہا ہے تاکہ ان کی شہریوں کے خلاف ظلم و ستم کی مہم کے لیے مالی وسائل ختم ہوسکیں’۔

امریکی محکمہ خزانہ کے ایک بیان میں کہا گیا کہ میانمار کی فوج نے ‘ان ہولڈنگ اداروں کے ذریعے ملک کی معیشت کے اہم حصوں کو کنٹرول کیا ہے’۔

اقوام متحدہ، امریکا اور برطانیہ کی جانب سے بین الاقوامی دباؤ میانمار کی فوجی گروپ جنتا پر موجود ہے تاہم اب تک اسے بظاہر نظرانداز کیا گیا ہے۔

برطانیہ اور امریکا حالیہ ہفتوں میں اس حکومت پر پابندیوں کا اعلان بھی کر چکے ہیں۔

واشنگٹن: امریکی صدر جو بائیڈن کا کہنا ہے کہ طالبان سے معاہدے کے تحت افغانستان سے تمام امریکی فوجیوں کے انخلا کے لیے دی گئی یکم مئی کی ڈیڈ لائن پر عمل درآمد کرنا ‘مشکل’ ہوگا تاہم امریکی فوج وہاں ہمیشہ کے لیے موجود نہیں ہے۔

رپورٹ کے مطابق 20 جنوری کو اقتدار سنبھالنے کے بعد اپنی پہلی پریس کانفرنس میں جو بائیڈن نے کہا کہ ‘حکمت عملی سے متعلق پیچیدگیوں کی وجہ سے یکم مئی کی آخری تاریخ کو پورا کرنا مشکل ہو گا، فوجیوں کا انخلا مشکل ہے’۔

انہوں نے کہا کہ ‘ہم چلے جائیں گے، سوال یہ ہے کہ ہم کب روانہ ہوں گے’۔

جب سوال کیا گیا کہ کیا وہ 2022 میں امریکی فوجیوں کو افغانستان میں دیکھتے ہیں تو امریکی صدر نے کہا کہ ‘میں یہ نہیں دیکھا سکتا کہ ایسا کوئی معاملہ ہو’۔

صدر نے اپنے دفتر میں 100 روز کے دوران امریکا میں کووڈ 19 کے خلاف 20 کروڑ ویکسینیشن کے عمل کا ایک نیا مقصد طے کیا اور عہدہ سنبھالنے کے بعد انہوں نے اپنی پہلی نیوز کانفرنس کے انعقاد کے بعد معاشی ترقی کا دعوٰی کیا۔

وائٹ ہاؤس میں پیش ہوتے ہوئے جو بائیڈن نے کہا کہ انہوں نے دفتر سنبھالنے کے 100 روز میں 10 کروڑ ویکسینیشن کا ابتدائی ہدف گزشتہ ہفتے شیڈول سے 42 دن پہلے ہی حاصل کرلیا تھا۔

جو بائیڈن نے کہا کہ ‘میں جانتا ہوں کہ یہ مشکل ہے اور جو ہمارا اصلی ہدف تھا اس سے دو گنا زیادہ ہے تاہم دنیا کا کوئی دوسرا ملک اس کے قریب بھی نہیں آیا’۔

انہوں نے اس خبر کے ساتھ معاشی ترقی کا بھی دعویٰ کیا کہ بے روزگاری انشورنس کا دعویٰ کرنے والوں کی تعداد میں نمایاں کمی واقع ہوئی ہے۔

ان کا کہنا تھا کہ ‘ابھی بھی بہت سارے امریکی کام نہیں کر رہے ہیں، بہت سارے خاندانوں کو تکلیف پہنچ رہی ہے اور ابھی بہت کام کرنا باقی ہے تاہم میں امریکی عوام سے کہہ سکتا ہوں، آپ کی مدد کی جائے گی اور اُمید بھی نظر آرہی ہے’۔

جو بائیڈن نے امریکی کانگریس میں ریپبلکنز سے مطالبہ کیا کہ وہ اپنے ایجنڈے کے ساتھ آگے بڑھنے یا ‘تقسیم کی سیاست کو جاری رکھنے’ میں مدد کریں کیونکہ وہ بندوقوں کے کنٹرول، ماحولیاتی تبدیلی اور امیگریشن اصلاحات جیسے امور پر غور کررہے ہیں۔

انہوں نے کہا کہ ‘میں صرف اتنا جانتا ہوں کہ مجھے مسائل حل کرنے کے لیے رکھا گیا ہے، نہ کہ تفرقہ پیدا کرنے کے لیے’۔

مبئی: بھارت میں مال کے اندر بنائے گئے کووڈ سنٹر میں آتشزدگی کے باعث 10 افراد ہلاک ہوگئے۔

بھارتی میڈیا کے مطابق ممبئی میں مال کی بالائی منزل پر اسپتال کی جانب سے کورونا مریضوں کے علاج کے لیے وارڈ بنایا گیا تھا جہاں گزشتہ رات اچانک آگ بھڑک اٹھی جس کے نتیجے میں 10 افراد ہلاک اور متعدد زخمی ہوگئے، واقعہ کی اطلاع ملتے ہی فائر بریگیڈ کی ٹیمیں موقع پر پہنچ گئیں جب کہ عمارت میں پھنسے مریضوں اور دیگر افراد کو محفوظ مقام پر منتقل کرنے کے لیے امدادی کام شروع کردیا گیا۔

بھارتی میڈیا کے مطابق مال کے نچلے حصے میں قائم دکان میں آگ بھڑک اٹھی جس نے دیکھتے ہی دیکھتے شدت اختیار کرلی، کووڈ سینٹر میں موجود 76 مریضوں میں سے 73 کو بحفاظت دوسرے اسپتال منتقل کیا گیا جب کہ آگ بجھانے کے لیے اب بھی امدادی کارروائیاں جاری ہیں۔
دوسری جانب اسپتال انتظامیہ کا کہنا ہے کہ اسپتال میں صرف 2 افراد کورونا کی وجہ سے ہلاک ہوئے، آتشزدگی کا ہلاکتوں سے کوئی تعلق نہیں جب کہ میئر ممبئی کا کہنا ہے کہ پہلی بار کسی مال کے اوپر اسپتال دیکھا ہے تاہم واقعہ کے ذمہ داران کے خلاف کارروائی کی جائے گی۔

ڈھاکا: وزیراعظم نریندر مودی کی بنگلادیش آمد پر شہریوں نے شدید احتجاج کیا اور مظاہرین نے بھارتی ریاستوں میں گائے کو ذبح کرنے کی پابندی کے خلاف احتجاجاً مرکزی شاہراہ پر ایک گائے ذبح کردی۔

عالمی خبر رساں ادارے کے مطابق بنگلادیش میں آزادی کی گولڈن جوبلی منائی جارہی ہے جس کے لیے بھارتی وزیراعظم نریندر مودی کو مدعو کیا گیا تھا تاہم اس موقع پر ہزاروں مظاہرین سڑکوں پر نکل آئے اور شدید احتجاج کیا۔

مظاہرین نے گجرات میں مسلم کش فسادات میں مودی کے مرکزی کردار پر شدید نعرے بازی کی، مظاہرین نے ’’مودی ۔۔۔ گجرات کا قصاب‘‘ اور ’’ مودی واپس جاؤ‘‘ کے بینرز اُٹھا رکھے تھے۔
مودی کے دور حکومت کے دوران مختلف ریاستوں میں گائے کو ذبح کرنے پر پابندی کے خلاف احتجاجاً مظاہرین نے ڈھاکا کے ریڈ زون کی مرکزی شاہراہ پر ایک گائے کو ذبح کردیا۔

مشتعل مظاہرین کو منتشر کرنے کے لیے پولیس نے آنسو گیس کی شیلنگ کی اور لاٹھی چارج کیا۔ پولیس اور مظاہرین کے درمیان جھڑپ میں درجن سے زائد افراد زخمی ہوئے اور 15 مظاہرین کو حراست میں لے لیا گیا۔

سری نگر: مقبوضہ وادی میں قابض فوج پر حملے کے نتیجے میں 3 اہلکار ہلاک اور متعدد زخمی ہوگئے۔

کشمیر میڈیا سروس کے مطابق سرینگر کے علاقے میں بھارتی فوج کا قافلہ ڈیوٹی پر موجود تھا کہ اسی دوران نامعلوم مسلح افراد نے فائرنگ کردی جس کے نتیجے میں متعدد اہلکار زخمی ہوگئے جنہیں اسپتال منتقل کیا گیا جہاں زخموں کی تاب نہ لاتے ہوئے 3 اہلکار دم توڑ گئے جب کہ دیگر زخمی اہلکاروں کو طبی امداد فراہم کی جارہی ہے۔

بھارتی میڈیا کے مطابق ہلاک اہلکاروں کا تعلق سینٹرل ریزرو پولیس فورس سے ہے جو حملے کہ وقت معمول کے گشت پر تھے، واقعہ کے بعد علاقے میں بھارتی فورسز کی بھاری نفری کو طلب کرلیا گیا اور علاقے کے داخلی اور خارجی راستوں کو سیل کرکے حملہ آوروں کی تلاش کے لیے سرچ آپریشن جاری ہے۔

بھارتی ریاست اترپردیش کے وزیر نے ملک میں برقعہ پر پابندی کا مطالبہ کیا ہے۔

بھارت میں بڑھتی انتہاپسندی کے باعث مسلمانوں کے لیے زندگی روزبروز مشکل ہوتی جارہی ہے، کبھی گائے کا گوشت کھانے پر ماراجاتا ہے تو کبھی مذہبی فرائض کی ادائیگی میں مشکلات کا سامنا کرنا پڑتاہے، چند روز قبل ریاست آسام میں مدارس بھی بند کردیے گئے تھے جب کہ اب ایک وزیر نے برقعہ پر پابندی کا مطالبہ کیا ہے۔

بھارتی ریاست اترپردیش کے وزیر پارلیمانی امور و دیہی ترقی آنند سواروپ شکلا نے ہرزہ سرائی کرتے ہوئے کہا ہے کہ برقعہ غیر انسانی اور شیطانی لباس ہے، بیشتر اسلامی ممالک برقعہ پر پابندی عائد کرچکے ہیں لہذا پورے ملک میں اس پر پابندی ہونی چاہیے۔
بھارتی وزیر نے مساجد میں آذان سے متعلق بھی غیر مناسب زبان استعمال کرتے ہوئے کہا کہ لاؤڈ اسپیکرز کی وجہ سے نہ صرف آس پاس کے تعلیمی اداروں کو پریشانی کا سامنا کرنا پڑتا ہے بلکہ مجھے بھی عبادت اور دیگر کاموں کے دوران پریشانی ہوتی ہے۔

الریاض: سعودی ولی عہد محمد بن سلمان سے چینی وزیرخارجہ وانگ یی نے ملاقات کی جس میں مختلف امورپرتبادلہ خیال کیا گیا۔

سعودی ولی عہد محمد بن سلمان سے چینی وزیرخارجہ وانگ یی نے ملاقات کی، اس موقع پرسعودی وزیرخارجہ شہزادہ فیصل بن فرحان، وزیرمملکت و رکن کابینہ ڈاکٹرمساعد العیبان بھی موجود تھے۔

ملاقات میں سعودی عرب اورچین کے درمیان سلامتی واستحکام کے لیے دوطرفہ تعاون کوبڑھانے سمیت دلچسپی کے مختلف امور پر گفتگوکی گئی۔ اس کے علاوہ مختلف شعبوں میں دوطرفہ تعاون کے فروغ سے متعلق بات چیت کی گئی جب کہ علاقائی اور عالمی سطح پرہونے والی حالیہ پیش رفت کا بھی جائزہ لیا گیا۔
ملاقات کے دوران چینی وزیرخارجہ نے سعودی ولی عہد کو چینی صدرشی جین پنگ کا نیک خواہشات اور خیرسگالی پرمبنی پیغام بھی پہنچایا۔