Category انٹرنیشنل

برسلز: یورپی یونین، برطانیہ، کینیڈا اور امریکا نے چین کے صوبے مغربی سنکیانگ کے علاقے میں انسانی حقوق کی مبینہ خلاف ورزیوں پر چین میں عہدیداروں کے خلاف مربوط پابندیوں کا آغاز کردیا۔

غیر ملکی خبر رساں ادارے اے پی کی رپورٹ کے مطابق یورپی یونین نے سنکیانگ میں چار سینئر عہدیداروں پر پابندیاں عائد کیں۔پابندیوں میں اہلکاروں کے اثاثوں کو منجمد کرنا اور ان پر مغربی ممالک کے سفر پر پابندی عائد شامل ہے۔اس کے علاوہ یورپی شہریوں اور کمپنیوں کو انہیں مالی مدد فراہم کرنے کی بھی اجازت نہیں ہے۔

27 ممالک پر مشتمل بلاک سنکیانگ پروڈکشن اینڈ کنسٹرکشن کورپس پبلک سیکیورٹی بیورو کے اثاثوں کو بھی منجمد کرچکا ہے جس میں اس کو سنکیانگ چلانے والی اور اس کی معیشت کو کنٹرول کرنے والی ایک سرکاری معاشی اور نیم فوجی تنظیم کے طور پر بتایا گیا ہے۔

برطانوی سیکریٹری خارجہ ڈومینک راب نے کہا کہ یہ اقدامات برطانیہ، امریکا، کینیڈا اور 27 ممالک کی یورپی یونین کی طرف سے ایغور مسلمانوں کے خلاف سنگین انسانی حقوق کی پامالی سے متعلق ‘سامنے آنے والے شواہد’ کے تحت کارروائی کرنے پر سفارت کاری کا حصہ ہیں۔

امریکی وزیر خارجہ انٹونی بلنکن نے ایک بیان میں کہا کہ متحدہ رد عمل نے بین الاقوامی انسانی حقوق کی خلاف ورزی کرنے یا ان کا غلط استعمال کرنے والوں کو ایک مضبوط پیغام بھیج دیا ہے اور ‘ہم مشترکہ شراکت داروں کے ساتھ ہم آہنگی میں مزید اقدامات کریں گے، ہم چین کے جرائم کے فوری خاتمے اور متعدد متاثرین کے لیے انصاف کے حصول کے لیے پوری دنیا میں اپنے اتحادیوں کے ساتھ کھڑے رہیں گے’۔

چین نے یورپی یونین کے اس اقدام کا فوری جواب دیتے ہوئے 10 یورپی افراد اور چار اداروں پر پابندیاں عائد کیں اور کہا کہ چین کے مفادات کو نقصان پہنچا ہے اور جھوٹ اور غلط معلومات پھیلائی گئی ہیں۔

ابتدائی طور پر چین نے سنکیانگ میں ایغور مسلمانوں کو حراست میں لینے کے لیے کیمپوں کے وجود سے انکار کیا تھا تاہم بعد ازاں اسے انہوں نے ملازمت کی تربیت فراہم کرنے اور بنیاد پرست جہادی نظریے کے حامل افراد کو نئے سرے سے تعلیم دینے کے مراکز کے طور پر بتایا تھا۔
حکام نے وہاں انسانی حقوق کی پامالی کے تمام الزامات کی تردید کی ہے۔
چینی وزارت نے 10 افراد اور چار اداروں کے خلاف پابندیاں عائد کرنے کا اعلان کرتے ہوئے کہا کہ انہیں اور ان کے اہلخانہ کو چین، ہانگ کانگ یا مکاؤ میں داخل ہونے پر پابندی عائد کی جائے گی اور ان علاقوں کے ساتھ مالی معاملات سے بھی انکار کردیا جائے گا۔

امریکی ریاست کولوراڈو میں گروسری اسٹور میں فائرنگ کے واقعے میں پولیس آفیسر سمیت دس افراد ہلاک ہو گئے، واقعے کو یوٹیوب پر براہ راست دکھایا بھی گیا۔

ریاست کولوراڈو کے شہر بولڈر میں نامعلوم شخص کی فائرنگ کے نتیجے میں دس افراد ہلاک ہوگئے۔ ہلاک ہونے والوں میں ایک پولیس افسر بھی شامل ہے۔ فائرنگ کا واقعہ ایک سپر مارکیٹ میں پیش آیا۔
پولیس نے ایک مشتبہ شخص کو حراست میں لے لیا ہے۔ پولیس کا کہنا ہے فائرنگ کنگ سپر مارکیٹ میں ہوئی۔ خبر ایجنسی کے مطابق فائرنگ کرنے والے شخص کا مقصد اب تک معلوم نہیں ہو سکا۔

امریکی صدر جو بائیڈن نے صدر مملکت عارف علوی کو یومِ پاکستان پر مبارکباد دی ہے۔

امریکی صدر جو بائیڈن نے صدر مملکت ڈاکٹر عارف علوی کو یوم پاکستان کے موقع پر خط میں مبارکباد دیتے ہوئے لکھا ہے کہ پاکستان، امریکہ پارٹنرشپ علاقائی امن و خوشحالی کے مشترکہ مقصد پر مبنی ہے، مشترکہ چیلنجز خصوصاً افغانستان میں قیامِ امن، کورونا وبا اور ماحولیاتی تبدیلی پر قابو پانے کیلئے باہمی تعاون جاری رکھیں گے، ہم پاکستان کے ساتھ شراکت داری کو مستقبل میں مضبوط بنائیں گے۔ خط میں صدر جو بائیڈن نے یومِ پاکستان کے موقع پر پاکستانی قوم کو مبارکباد بھی پیش کی ہے۔

دوسری جانب یوم پاکستان کے موقع پر صدر مملکت عارف علوی نے اپنے پیغام میں کہا کہ آج کے دن ہمیں اپنے کشمیری بھائیوں کو بھی یاد رکھنا چاہیے، مظلوم کشمیریوں کو بھارتی فورسز نے دہائیوں سے محکوم بنا رکھا ہے، اقوام عالم کو غیر قانونی مقبوضہ جموں و کشمیر میں انسانی حقوق کی پامالیوں کا نوٹس لینا چاہئے، اپنے کشمیری بھائیوں کے حق خودارادیت کی منصفانہ جدوجہد کی حمایت جاری رکھنے کا عہد کرتے ہیں۔

صدر مملکت عارف علوی نے پاکستان کو معاشی طور پر مضبوط اور خوشحال بنانے کے عزم کا اعادہ کرتے ہوئے کہا کہ پاکستان میں بسنے والی اقلیتوں کیلئے رواداری اور انسان دوست معاشرہ بنانے کی جدوجہد جاری رکھنے کا عہد کرتے ہیں۔ ان کا کہنا تھا کہ کورونا وبا کا پھیلاؤ روکنے کیلئے اہم کردار ادا کرنے والے اپنے ہیروز کو سلام پیش کرتے ہیں، اتحاد، ایمان اور تنظیم کی مدد سے ہم اپنی راہ میں آنیوالے کسی بھی چیلنج پر قابو پاسکتے ہیں

پاکستان نے اقوام متحدہ کو آگاہ کیا ہے کہ سرحد پار پانی کے انتظامات اور تعاون کے بغیر، جامع پائیدار ترقی ممکن نہیں ہوگی۔

رپورٹ کے مطابق وزیر اعظم کے معاون خصوصی برائے ماحولیاتی تبدیلی ملک امین اسلم نے پانی کے بارے میں اقوام متحدہ کی جنرل اسمبلی کے اجلاس کو رواں ہفتے یاد دلاتے ہوئے کہا کہ اسلام آباد پاکستان اور بھارت کے درمیان 1960 میں ہونے والے انڈس واٹر ٹریٹی (آئی ڈبلیو ٹی) پر دستخط کنندہ تھا اور ‘ایک دستخط کنندہ کے طور پر ہم پائیدار پانی کے انتظام کے لیے ایک اہم ستون کے طور پر سرحد پار پانی کے تعاون پر یقین رکھتے ہیں’۔

ایک پاکستانی وفد 23 اور 24 مارچ کو آئی ڈبلیو ٹی کے دو روزہ اجلاس میں شرکت کے لیے آج نئی دہلی روانہ ہوگا۔اس سے پہلے یہ اجلاس دو سال قبل لاہور میں ہوا تھا۔
توقع ہے کہ پاکستان دریائے چناب پر بھارت کے متنازع آبی منصوبوں پر اپنے اعتراضات پیش کرے گا۔

اس حوالے سے اقوام متحدہ کے اجلاس میں پاکستان کے سفیر منیر اکرم نے بتایا کہ دنیا کی 40 فیصد آبادی بھارت اور پاکستان کی طرح مشترکہ دریا کے قریب رہتے ہیں۔

انہوں نے کہا کہ ‘پانی کے چیلنجز کا مقابلہ کرنے اور اس پر قابو پانے کے لیے ایک جامع، نظام اور کثیر الجہتی ردعمل کے لیے ہر سطح پر تعاون کی ضرورت ہے، ہماری کوششوں کا مرکز دنیا کے تمام لوگوں کے لیے اس بنیادی حق (پانی) پر مکمل طور پر عمل درآمد ہونا چاہیے’۔

پاکستانی مندوب نے خبردار کیا کہ کسی حد تک پانی کے مؤثر تعاون کے بغیر ‘جامع پائیدار ترقی رک جائے گی اور امن و سلامتی کو لاحق خطرات کا امکان برقرار رہے گا’۔

ماحولیاتی ڈپلومیسی جو ماحول کی حفاظت کے لیے وقف ہے، نے حالیہ رپورٹ میں عالمی رہنماؤں پر زور دیا تھا کہ وہ اس انتباہ کو نظر انداز نہ کریں کہ آئندہ جنگیں پانی کے اوپر لڑی جاسکتی ہیں۔

اس تنظیم نے بھارت اور پاکستان کے درمیان آبی تنازع اور تعاون سے متعلق ایک رپورٹ میں خبردار کیا کہ بھارت اور پاکستان کے درمیان آبی تنازعات گہرے ہوتے جارہے ہیں۔

نئی دلی: بھارتی کسانوں کو بجلی، بیج، زمینیں چھن جانے کے خدشات کی وجہ سے مودی سرکار کے خلاف تادم مرگ تحریک جاری رکھنے کا اعلان کر دیا، 26مارچ کو پورا بھارت بند کرنے کی تیاریاں بھی تیزی کر دی گئیں۔

بھارتی کسانوں کی تحریک جاری ہے، دلی کے ارد گرد ٹکری، غازی پورہ، اور سنگھو بارڈز پر لاکھوں کاشتکار موجود ہیں۔ کسان کارکنوں نے کہا ہے حکومت کورونا وائرس کا بہانہ کر کے دھرنے ختم کرانا چاہتی ہے۔ موہگا، فیروز پور، کپور تھلہ سے کارکنوں کے مزید جھتے دلی پہنچ گئے۔

بھارتی کسانوں میں بجلی، بیج، زمینیں چھن جانےکے خدشات موجود ہیں، مظاہرین نے مودی سرکار کے خلاف تحریک تادم مرگ جاری رکھنے اعلان کر دیا۔ کسان رہنما وں نے کرناٹکا کا بھی دورہ کیا اور کسانوں کا پیغام لوگوں تک پہنچایا۔ 26 مارچ کو پورا بھارت بند کرنے کی تیاریاں بھی تیزی کر دی گئیں۔

واشنگٹن: سابق صدر ڈونلڈ ٹرمپ سوشل میڈیا پر جلد ہی واپس آرہے ہیں اور اس بار یہ واپسی ان کے اپنے سوشل میڈیا پلیٹ فارم پر ہوگی۔

امریکی نشریاتی ادارے کے مطابق صدارتی الیکشن میں ناکامی اور ٹوئٹر پر مستقل پابندی کے بعد سابق صدر ٹرمپ نے سوشل میڈیا میں انٹری کے لیے نئے پلیٹ فارم کے استعمال کا فیصلہ کیا ہے جو ان کا ذاتی پلیٹ فارم ہوگا۔

ٹرمپ کے مشیر اور ترجمان جیسن ملر نے فاکس نیوز کو بتایا کہ سابق صدر دو سے تین ماہ کے دوران سوشل میڈیا پر واپس آجائیں گے تاہم یہ واپسی ان کے اپنے پلیٹ فارم پر ہوگی جس میں لاکھوں نئے صارفین بھی شامل ہوسکیں گے۔

برسٹل: برطانیہ میں مظاہرین اور پولیس کے درمیان ہونے والی جھڑپ میں 20 اہلکار زخمی ہوگئے جن میں سے 2 کی حالت نازک بتائی جا رہی ہے۔

عالمی خبر رساں ادارے کے مطابق برطانیہ کے شہر برسٹل میں نئے پولیس نظام کے لیے کی گئی قانون سازی کے خلاف مظاہرہ کیا گیا جس میں شرکاء نے ’’ برطانیہ کو پولیس اسٹیٹ نہ بناؤ‘‘ اور ’’ احتجاج بنیادی انسانی حقوق ہے‘‘ کے بینرز اُٹھا رکھے تھے.

پولیس نے مظاہرین کو منتشر کرنے کی کوشش کی جس پر مظاہرین مشتعل ہوگئے اور تھانے پر حملہ کرکے 12 گاڑیوں کے شیشیے توڑ دیئے اور 2 کو آگ لگادی گئی۔ اس دوران جھڑپ میں 20 اہلکار زخمی ہوگئے جن میں سے دو کی حالت نازک بتائی جاری ہے۔
پولیس نے ہنگامہ آرائی کرنے کے الزام میں 7 مظاہرین کو حراست میں لے لیا ہے جب کہ مظاہرین نے الزام عائد کیا کہ پولیس نے پیلٹ گن، اسٹون گن اور آنسو گیس کا بے دریغ استعمال کیا۔
واضح رہے کہ برطانیہ میں نئی قانون سازی کے ذریعے پولیس کے اختیارات میں اضافہ کردیا گیا ہے جس پر مختلف شہروں میں احتجاجی مظاہروں کا سلسلہ جاری ہے

جموں و کشمیر پر قابض بھارتی فورسز نے وادی میں مزید 4 کشمیری نوجوانوں کو شہید کر دیا۔

کشمیر میڈیا سروس کے مطابق قابض بھارتی فورسز نے ریاستی دہشتگردی کا مظاہرہ کرتے ہوئے شوپیاں کے علاقے میں 4 نوجوانوں کو شہید کیا۔

کے ایم ایس کے مطابق بھارتی فورسز نے شوپیاں کے علاقے منی ہال میں سرچ آپریشن کی آڑ میں چاروں نوجوانوں کو شہید کیا۔

میڈیا رپورٹ کے مطابق قابض بھارتی فورسز کے ہاتھوں شہید ہونے والے نوجوانوں کی تاحال شناخت نہیں ہو سکی ہے جبکہ علاقے میں تاحال سرچ آپریشن جاری ہے۔

صنعا: سعودی سربراہی میں قائم عسکری اتحاد نے یمن میں حوثی باغیوں کے زیر تسلط علاقوں پر فضائی بمباری کی تاہم حملے میں جانی نقصان نہیں ہوا۔

عالمی خبر رساں ادارے کے مطابق سعودی عرب کی سربراہی میں عسکری اتحاد کے فضائی طیاروں نے حوثی باغیوں کے ٹھکانوں پر بمباری کی۔ اتحادی افواج نے یہ فضائی کارروائی سعودی عرب میں آئل پلانٹ پر ڈرون حملوں کے جواب میں کی گئی۔

حوثی باغیوں کے ٹیلی وژن نے اتحادی افواج کی فضائی بمباری کی تصدیق کرتے ہوئے بتایا کہ صنعاء ایئرپورٹ کو بھی نشانہ بنایا گیا تاہم کوئی بڑا نقصان نہیں ہوا۔
ینی شاہدین نے عالمی خبر رساں ادارے کو بتایا کہ سعودی اتھادی طیاروں نے پہلے فضائی گردش کی اور پھر حوثیوں کے ملٹری کیمپس اور اسلحہ ڈپو پر بمباری کی جس سے آگ بھڑک اُٹھی۔

واضح رہے کہ گزشتہ روز اتحادی فوج کے ترجمان نے دعویٰ کیا تھا کہ جنوبی سعودی شہر خمیس مشیط کی جانب داغے گئے بارود سے بھرے ڈرون کو فضا میں ہی تباہ کردیا گیا تھا۔

ریاض: سعودی عرب کے نائب وزیر خارجہ عادل الجبیر نے کہا ہے کہ پاکستان اور بھارت کے درمیان کشیدگی کو کم کرنے کی کوشش کر رہا ہے۔

عرب نیوز کو دیئے ایک انٹرویو میں عادل الجبیر نے کہا کہ سعودی عرب پورے خطے میں امن چاہتا ہے اور اس کے لیے متعدد سطح پر کوشش کرتا ہے۔ ہم علاقے میں امن اور استحکام کے لیے مستقل کوششیں کرتے رہتے ہیں، چاہے وہ اسرائیل اور فلسطینیوں کے مابین امن ہو یا لبنان، شام، عراق، ایران، افغانستان کا معاملہ ہو، یہاں تک کہ ہم پاکستان اور بھارت کے درمیان کشیدگی کو کم کرنے کی کوشش کر رہے ہیں۔

عادل الجبیر نے اصرار کیا کہ کچھ عرب ممالک اور اسرائیل کے درمیان تعلقات ’معمول‘ پر آنے کے باوجود سعودی عرب ایسا نہیں کر رہا کیوں کہ ہم فلسطین کا امن اقدامات اور اقوام متحدہ کی متعلقہ قراردادوں پر مبنی دو ریاستی حل چاہتے ہیں۔