Category انٹرنیشنل

سری نگر(مانیٹرینگ ڈیسک) مقبوضہ کشمیر کے ضلع پلوامہ میں بھارتی سینٹرل ریزرو پولیس فورس (سی آر پی ایف) کے کیمپ پر نامعلوم مسلح افراد کے حملے میں 2 اہلکار ہلاک اور متعدد زخمی ہوگئے۔غیرملکی خبررساں ادارے کے مطابق مقبوضہ کشمیر میں ضلع پلوامہ کے علاقے لیتھ پورہ میں واقع سینٹرل ریزرو پولیس
کے کیمپ پر نامعلوم مسلح افراد نے حملہ کردیا جس کے نتیجے میں 2 اہلکار ہلاک اور متعدد زخمی ہوگئے۔ترجمان سی آر پی ایف نے حملے کی تصدیق کرتے ہوئے بتایا ہے کہ سری نگر سے 32 کلومیٹر کے فاصلے پر لیتھ پورہ میں واقع نیم فوجی دستوں کی 185 ویں بٹالین کے کیمپ پر رات گئے چند مسلح افراد نے داخل ہوکر دستی بموں سے حملہ کردیا اور خود کار ہتھیاروں سے فائرنگ شروع کردی، جس کے نتیجے میں موقع پر ہی 2 اہلکار ہلاک ہوئے۔ترجمان کا کہنا ہے کہ حملہ آوروں کی جانب سے فائرنگ کا سلسلہ صبح تک جاری رہا جو اب بند ہوچکا ہے تاہم حملہ آور اب بھی کیمپ میں ہی موجود ہیں۔ انتظامیہ نے ضلع پلوامہ میں موبائل اور انٹرنیٹ سروس بند کردی ہے۔

تہران: ایران میں مہنگائی کے خلاف ہونے والے مظاہروں میں شدت آگئی ہے جب کہ احتجاج پر قابو پانے کے لیے درجنوں افراد کو گرفتار کرلیا گیا ہے۔غیرملکی خبررساں ادارے کے مطابق ایران میں ایک ہی ہفتے میں انڈوں کی قیمتیں دو گنا ہونے اور ایرانی صدر کی جانب سے آئندہ
بجٹ میں دیگر ممالک جانے والے اپنے مسافروں پر ٹیکس میں اضافے کی تجویز کے بعد ملک بھر میں مہنگائی کے خلاف مظاہرے پھوٹ پڑے۔ مظاہرے اس وقت پرتشدد ہوگئے جب پولیس کی جانب سے مظاہرین کو روکنے کے لئے آنسو گیس اور واٹرگنز کا استعمال کیا گیا۔ اس دوران 52 افراد کو حراست میں بھی لے لیا گیا۔عرب میڈیا کے مطابق ایران کے علاقے لورستان میں مہنگائی کے خلاف احتجاج کے دوران مظاہرین قابو نہ آئے تو پولیس کو فائرنگ کرنا پڑی جس کے نتیجے میں تین افراد کے ہلاک ہونے کی اطلاعات ہیں جب کہ متعدد زخمی ہیں۔شہریوں کی گرفتاریوں کے بعد مظاہروں کا دائرہ کار بڑھ کر حکومت مخالف احتجاج تک پھیل گیا ہے، مظاہرین سیاسی قیدیوں کی رہائی اور پولیس کی جانب سے تشدد ختم کرنے کا مطالبہ کررہے ہیں۔ حکومت کی جانب سے غیرقانونی اجتماع کے خلاف وارننگ جاری ہونے کے باوجود ملک بھر سے سوشل میڈیا پر احتجاج کی کالز دی جا رہی ہیں اور اب مظاہروں کا سلسلہ 8شہروں تک پھیل گیا ہے جب کہ سوشل میڈیا پر پوسٹ کی جانے والی احتجاج کی ویڈیوز میں سیکیورٹی فورسز اور عوام کے مابین ہونیوالی جھڑپیں دیکھی جا سکتی ہیں۔ (مزید خبروں کیلئے ہمارا پیج لائق کریں)

نئی دہلی(اے این این) بھارتی میڈیا نے انکشاف کیا ہے کہ ہرسال ایک ہزارچھ سو بھارتی فوجی اپنے ہی ہاتھوں زندگیوں کا خاتمہ کرتے ہیں، گزشتہ 9 سالوں میں ایک ہزار بائیس فوجیوں نے خودکشیاں کی۔بھارتی اخبار ٹائمز آف انڈیا کی رپورٹ میں کہا کہ بھارت میں ہر سال 1600 فوجی
جوان جنگ کے بغیر ہی مارے جاتے ہیں۔ ورکنگ باﺅنڈری اور لائن آف کنٹرول پر تعینات بھارتی فوجی دستوں کے حوصلے پست ہوتے جارہے ہیں۔ بھارتی اخبار میں خودکشیوں کی وجوہات بیان کی گئی ہیں جن میں مقبوضہ جموں کشمیر میں بھارتی فوجیوں کی ہلاکتیں، ریاستی طاقت کے استعمال کے باوجود کشمیر میں ناکامی کے ساتھ شدید مزاحمت کو قرار دیا گیا ہے جبکہ سرحدی علاقوں میں تعینات فوجیوں کو صرف دو فیصد الانس ملنا، گھرسے دوری ، فوجی افسروں کا جوانوں کے ساتھ ہتک آمیز رویہ اورچھٹیوں کی درخواستوں کا مسترد ہونا بھی بھارتی فوجیوں کی حوصلہ شکنی کا بڑا سبب ہے۔دوسری جانب بھارتی وزیرمملکت برائے دفاع سبھاش بھامرکی جانب سے پارلیمنٹ میں پیش کی جانے والی رپورٹ کے مطابق 2009 سے اب تک 9 برسوں میں ایک ہزار 22 بھارتی فوجیوں نے خودکشی کی، 2014 سے 2017 کے درمیان 425 جبکہ 2009 سے 2013 کے درمیان 597 فوجیوں نے مختلف وجوہات کی بنا پر اپنی زندگیوں کا خاتمہ کیا ۔ گزشتہ چار برسوں میں فوج کے 9 افسران اور 26 اہلکاروں نے خودکشی کی، سب سے کم خودکشیوں کے واقعات بحریہ میں دیکھنے میں آئے جہاں دو افسران اور 16 سیلرز نے اپنی زندگی کا خاتمہ کیا۔واضح رہے کہ بھارت کا بڑا دفاعی بجٹ جو زیادہ ہتھیاروں کی خریداری پر خرچ ہورہا ہے، مگر سہولیات کا فقدان فوجیوں کو خودکشی جیسے سنگین اقدام کی طرف مائل کر رہا ہے۔

انقرہ(اے این این) ترکی اورروس کے درمیان زمین سے فضا میں مارکرنےوالے دنیا کے خطرناک ایئر ڈیفنس سسٹم ایس 400 کی خریداری کا معاہدہ طے پاگیا ہے۔غیر ملکی خبررساں ادارے کے مطابق ترکی کے دارالحکومت انقرہ میں ترکی اور روس کے درمیان زمین سے فضا میں مارکرنےوالے میزائل ایس400 دفاعی نظام
کی خریداری سے متعلق سمجھوتے پر دستخط کردیے گئے ہیں۔ ترک حکام کا کہنا ہے کہ روس کے ساتھ فوجی تعلقات کو مزید مضبوط کرنے کےلئے اس معاہدے کو حتمی شکل دی گئی ہے۔مبینہ طورپر ڈھائی ارب ڈالرمالیت کے اس معاہدے پر نیٹو اتحاد کو تشویش ہے، اگرچہ ترکی اور روس نیٹو اتحاد کے اراکین ہیں لیکن روسی ساختہ یہ ایس 400 میزائل سسٹم نیٹو میں شامل نہیں کیا گیا ہے، نیٹو کے اتحادی معاہدے کے مطابق نیٹو میں شریک تمام اتحادی اپنے دفاعی سازوسامان اور اسلحہ کو دیگر اتحادیوں کےساتھ مشترکہ طور پر استعمال کے پابند ہوں گے جبکہ یہ ایس 400 میزائل سسٹم نیٹو کا حصہ نہیں ہے۔معاہدے کے تحت روس ترکی کو ایس 400 میزائل سسٹم کی دو بیٹریز فراہم کرے گا جبکہ ترک فوج اس کو آزادانہ طورپراستعمال کرنے کا اختیار رکھتی ہے۔واضح رہے کہ ترک صدر رجب طیب ایردوان نے ستمبر میں اس ڈیل سے متعلق اور پیشگی ادائیگی کے بارے میں انکشاف کیا تھا۔واضح رہے کہ ترکی اورروس کے درمیان زمین سے فضا میں مارکرنےوالے دنیا کے خطرناک ایئر ڈیفنس سسٹم ایس 400 کی خریداری کا معاہدہ اب طے پاگیا ہے۔ )مزید تازہ ترین اور دلچسپ خبروں و تبصروں کیلئے وزٹ کیجئے ہماری ویب سائٹ m92.tv)

بیجنگ(اے این این) چین نے بھارت کو خبردار کیا ہے کہ وہ اپنی فوج کو قابو میں رکھے اور سرحدی معاہدوں پر عمل کرے۔بھارتی میڈیا رپورٹس کے مطابق چینی وزارت دفاع کے ترجمان کرنل رین نے ڈوکلام تنازع کا حوالہ دیتے ہوئے کہا کہ بھارتی سرحدی دستوں کو قابو میں رکھنا
بھارت کی ذمہ داری ہے، ساتھ ہی جو معاہدے ہوئے ہیں ان پر عمل بھی کیا جائے۔ترجمان کا مزید کہنا تھا کہ چینی فوج نے2017 میں اپنے علاقے کا پورے عزم سے دفاع کیا ہے۔ترجمان کرنل رین نے کہا کہ چینی فوج، بھارت کے ساتھ ڈوکلام تنازع سے نمٹنے کیلئے پر عزم ہے، ساتھ ہی بحیرہ جنوبی چین میں بھی اپنے اقتدار اعلی کو برقرار رکھنے کیلئے تیار ہے۔دوسری طرف بھارت کا کہنا ہے کہ وہ کیملاش مان سرور یاترا کے لیے چین سے رابطے میں ہے جو2017 میں ڈوکلام تنازع کی وجہ سے نہیں ہوسکی تھی۔یاد رہے کہ رواں برس جولائی میں ڈوکلام کے علاقے میں ایک سڑک کی تعمیر کے معاملے پر چینی اور بھارتی افواج ایک دوسرے کے آمنے سامنے آگئی تھیں۔یہ علاقہ بھارت کے شمال مشرقی صوبے سکم اور پڑوسی ملک بھوٹان کی سرحد سے ملتا ہے، اس علاقے کی ملکیت کے حوالے سے بھوٹان اور چین کا تنازع کافی عرصے سے جاری ہے، جبکہ بھارت بھوٹان کی حمایت کرتا ہے۔رواں برس جولائی میں چین نے یہاں سڑک کی تعمیر شروع کی، جس کے بعد بھوٹان کی حمایت میں بھارت نے یہاں اپنی فوجیں بھیجیں تاکہ نئی سڑک کی تعمیر کو روکا جاسکے۔بعدازاں اگست کے آخر میں بھارتی فوج نے تنازع ختم کرنے کا فیصلہ کرتے ہوئے فوجی اہلکاروں کو علاقہ خالی کرنے کا حکم دے دیا تھا۔اس حوالے سے بھارتی وزارت خارجہ کا کہنا تھا کہ بیجنگ سے مذاکرات کے بعد مفاہمت طے پا گئی ہے۔

مقبوضہ بیت المقدس(اے این این)اسرائیل کے ایک کثیرالاشاعت عبرانی اخبار نے اپنی رپورٹ میں بتایا ہے کہ ملک میں فوج میں بھرتی ہونے کے رحجان میں غیرمعمولی کمی آئی ہے۔ اس کا اندازہ حال ہی میں وزیراعظم کو یہودی طلبا کی طرف سے لکھے گئے ایک مکتوب سے بھی ہوتا ہے۔
یہ امر حیران کن ہے کہ اسرائیل کے اندر سے بھی انسانی حقوق کی سنگین خلاف ورزیوں کے خلاف آواز بلند ہو رہی ہے۔ حال ہی میں 63 یہودی طلبا نے وزیراعظم بنجمن نیتن یاھو، وزیر دفاع آوی گیڈور لائبرمین، وزیر تعلیم نفتالی بینت اور آرمی چیف گیڈی آئزن کوٹ کو ایک مکتوب ارسال کیا ہے۔ اس مکتوب میں یہودی طلبا کا کہنا ہے کہ وہ فوج میں نہیں بھرتی ہونا چاہتے۔اپنے اس مکتوب میں یہودی طلبا نے فوج میں بھرتی نہ ہونے کی وجہ بھی بیان کی ہے اور کہا ہے کہ فوج حکومت کی نسل پرستانہ پالیسی کو آگے بڑھاتے ہوئے بنیادی انسانی حقوق کی پامالیوں کی مرتکب ہو رہی ہے۔ اسرائیلی فوج فلسطینیوں پر جو ہم سے الگ تھلگ رہتے ہیں پر بھی اسرائیلی قانون نافذ کرناچاہتی ہے۔ اس لیے وہ فوج میں بھرتی ہو کر انسانی حقوق کی خلاف ورزیاں نہیں کرنا چاہتے۔یہودی طلبا کا کہنا ہے کہ ہماری طرح کے ہزاروں دیگر نوجوان طلبا اور طالبات جو فوج کی لازمی سروس کی عمر میں ہیں اس لیے فوج میں بھرتی نہیں ہونا چاہتے کہ فوج حکومت کے غاصبانہ ہتھکنڈوں کے استعمال کے لیے دست وبازو بنی ہوئی ہے۔ (مزید خبروں ا ور اپ ڈیٹس کیلئے وزٹ کیجئے ہماری ویب سائٹ)

نیویارک: برانکس کے علاقے میں رہائشی عمارت میں آگ لگ گئی جس کے نتیجے میں 12 افراد ہلاک اورمتعدد زخمی ہوگئے۔بین الاقوامی میڈیا کے مطابق رات گئے نیویارک کے علاقے برانکس میں واقع رہائشی عمارت میں اچانک آگ بھڑک اٹھی۔ آگ کی شدت اتنی زیادہ تھی کہ اس نے پوری عمارت
کو اپنی لپیٹ میں لے لیا۔ آتشزدگی کے نتیجے میں بچوں سمیت 12 افراد ہلاک اور متعدد زخمی ہوگئے۔امریکی میڈیا کے مطابق واقعے کی اطلاع ملتے ہی ریسکیو ٹیمیں فوراً جائے وقوع پر روانہ ہوگئیں اور امدادی کارروائیاں کرتے ہوئے لاشوں اور زخمیوں کو متاثرہ عمارت سے نکال کر اسپتال منتقل کیا۔ نیویارک حکام کا کہنا ہے کہ آگ لگنے کی وجہ تاحال سامنے نہیں آسکی ہے اور تفتیش کا آغاز کردیا ہے۔نیویارک کے میئر بل دی بلیزیو نے واقعے کے بارے میں ٹوئٹ کیا ہے کہ ’کم سے کم ایک چوتھائی صدی میں اس شہر میں لگنے والی یہ بدترین آگ ہے، یہ ایک غیر معمولی سانحہ ہے‘۔ اس آگ میں 12 لوگ اپنی جان سے ہاتھ دھو بیٹھے ہیں جب کہ زخمیوں میں سے 4 کی حالت تشویشناک ہے۔ نیویارک کے میئر نے حادثے میں ہلاک ہونے والے افراد کے لواحقین سے اظہار افسوس کرتے ہوئے کہا کہ وہ ان کے غم میں برابر کے شریک ہیں جب کہ انہوں نے نیویارک میں رہنے والے افراد سے مرنے والے افراد کےلیے دعا کرنے کی بھی درخواست کی۔ اس آگ میں 12 لوگ اپنی جان سے ہاتھ دھو بیٹھے ہیں جب کہ زخمیوں میں سے 4 کی حالت تشویشناک ہے۔

کابل:کابل میں یکے بعد دیگرے دو خودکش حملوں میں 3صحافیوں سمیت40افراد جاں بحق،70سے زائد زخمی ،پہلا دھماکہ ایک خبر ایجنسی کے دفتر کے قریب دوسرا شیعہ مسجد کے باہر ہوا جس میں ثقافتی مرکز کو نشانہ بنایا گیا،مرنے والوں میں طلباء بھی شامل ،کئی زخمیوں کی حالت تشوشناک،ہلاکتوں میں اضافے کا
خدشہ ،تا حال کسی گروپ نے واقعہ کی ذمہ داری قبول نہیں کی۔افغانستان میں مقامی اور غیر ملکی میڈیا کے مطابق افغان دارالحکومت میں یکے بعد دیگرے دو بم دھماکوں میں40افراد جاں بحق اور 70سے زائد زخمی ہو گئے ہیں ۔مرنے والوں میں تین صحافی اور کئی طلباء بھی شامل ہیں ۔دہشتگردوں نے پہلے دھماکے میں ایک خبر ایجنسی کو نشانہ بنایا جبکہ دوسرا دھماکہ ایک شیعہ مسجد کے باہر ہوا جس میں ثقافتی مرکز کو نشانہ بنایا گیا ہے ۔زخمیوں کو قریبی ہسپتالوں میں منتقل کیا گیا ہے ۔افغان وزارت داخلہ نے دو نوں حملوں کو خد کش قرار دیا ہے اور 40افراد کے جاں بحق اور 50سے زائد کے زخمی ہونے کی تصدیق کی ہے ۔وزارت داخلہ کے مطابق دھماکوں میں خبر ایجنسی اور ثقافتی مرکز کو نشانہ بنایا گیا۔مرنے والوں میں تین صحافی اور طلباء بھی شامل ہیں ۔افغان وزارتِ داخلہ کا کہنا ہے کہ دونوں دھماکوں کے نتیجے میں 50 سے زائد افراد زخمی ہیں جن میں سے بیشتر کی حالت تشویشناک ہے اور ہلاکتوں میں اضافے کا خدشہ ہے۔ دھماکے کی ذمہ داری تاحال کسی گروپ نے قبول نہیں کی۔افغان میڈیا رپورٹس کے مطابق دارالحکومت کابل جمعرات کی صبح ساڑھے دس بجے کے قریب دو خودکش حملے ہوئے۔افغان میڈیا کے مطابق پہلا خودکش دھماکا کابل کے علاقے برچی میں واقعے خبر ایجنسی کے دفتر کے قریب ہوا جب کہ دوسرا دھماکا شیعہ مسجد کے باہر ثقافتی مرکز کے دروازے پر کیا گیا۔

مقبوضہ بیت المقدس:امریکا کی جانب سے سے مقبوضہ بیت المقدس کو اسرائیلی ریاست کا دارالحکومت قرار دینے کے بعد صہیونی حکومت نے ڈونلڈ ٹرمپ کی نمک حلالی کی کوششیں شروع کردی ہیں۔ فلسطینی میڈیا رپورٹس کے مطابق انہی نمک حلالی کے اقدامات میں مشرقی بیت المقدس کا ایک ریلوے اسٹیشن امریکی
صدر ڈونلڈ ٹرمپ کے نام کیا جانا بھی شامل ہے۔اسرائیلی وزیر برائے مواصلات یسرائیل کاٹز نے مشرقی بیت المقدس کی یہودی کالونی کے قریب شہر کی مغربی دیوار سے متصل ایک ریلوے اسٹیشن کو امریکی صدر ڈونلڈ ٹرمپ کے نام موسوم کرنے کی منظوری دی ہے۔عبرانی اخبار یدیعوت احرونوت کی رپورٹ کے مطابق مذکورہ ریلوے لائن فی الحال زیرتکمیل ہے اور ریلوے لائنکیلئے پرانے بیت المقدس کی مغربی دیوار کے نیچے کوئی تین کلو میٹر کے علاقے میں زمین دوز لائن بچھائی جائے گی۔ یہ ریلوے اسٹیشن سے متصل دوسرے اسٹیشن کو سابق اسرائیلی صدر آئزق نافون کے نام موسوم کیا گیا ہے۔سابق صدر کے نام موسوم اسٹیشن سے ریلوے لائن قریبا 52 میٹر زمین کے اندر سے گذرے گی۔ یہ ریلوے لائن دو سڑکوں شاہراہ شاہ جارج اور یافا اسٹیشن کو عبور کرے گی جس کے بعد ڈونلڈ ٹرمپ اسٹیشن آئے گا۔خیال رہے کہ اسرائیل القدس اور تل ابیب کے درمیان ایک تیز ترین ریلوے لائن بچھانے کے منصوبے پر کام کررہا ہے۔ اس منصوبے کی تکمیل کے بعد القدس اور تل ابیب کے درمیان زمینی سفر سمٹ کر صرف 28 منٹ پرآجائے گا۔ یہ ریلوے لائن اللد ہوائی اڈے، مودیعین یہودی کالونی اور الامہ اسٹیشن سے گذر کر القدس میں داخل ہوگی۔اسرائیلی وزیر مواصلات یسرائیل کاٹز کا کہنا ہے کہ القدس کی مغربی دیوار یہودی قوم کے لیے ایک مقدس مقام ہے اور اسے امریکی صدر کے نام موسوم کرنے سے ان کی اسرائیل کے لیے خدمات بالخصوص القدس کو صہیونی ریاست کا دارالحکومت قرار دینے کے اقدام پر ان سے اظہار تشکر ہے۔

واشنگٹن: امریکا نے شمالی کوریا کے میزائل پروگرام سے منسلک دو حکام پر نئی پابندیاں عائد کر دی ہیں۔غیر ملکی خبر ایجنسی کے مطابق امریکی محکمہِ خزانہ نے شمالی کوریا کے 2 اعلیٰ ترین حکام کم جونگ سک اور ری پیونگ چول کو پیانگ یانگ کے میزائل پروگرام کا اہم کردار قرار دیتے ہوئے ان پر پابندیاں عائد کردی ہیں۔ پابندیوں کے نتیجے میں اب دونوں افراد امریکا میں کسی قسم کا بھی مالی لین دین نہیں کر سکیں گے اور اگر ان کے امریکا میں کوئی اثاثے ہوئے تو انھیں بھی منجمد کرلیا جائے گا۔
واضح رہے کہ 2017 کے دوران شمالی کوریا نے ایٹم بموں کے علاوہ کئی بیلسٹک میزائلوں کے بھی کامیاب تجربات کئے ہیں، اقوام متحدہ نے بھی شمالی کوریا پر نئی پابندیاں عائد کی تھیں تاہم شمالی کوریا نے اسے مسترد کرتے ہوئے ‘جنگی اقدام’ قرار دیا تھا۔