Category انٹرنیشنل

بیروت(میڈیا نائن ٹو) لبنان میں 2 روز قبل مردہ حالت میں ملنے والی برطانوی خاتون سفارت کار کو زیادتی کے بعد قتل کرنے کا انکشاف ہوا ہے۔عرب ویب سائٹ کے مطابق لبنان میں تعینات برطانوی خاتون سفارت کار ’ربیکا ڈیکس‘ کی لاش 2 روز قبل دارالحکومت بیروت کے مضافاتی علاقے جل الدیب سے ملی تھی۔ پولیس اور انٹیلی جنس اداروں نے خاتون سفارت کار کی لاش کو قبضے میں لے کر تفتیش شروع کردی تھی جس کے دوران اس بات کا انکشاف ہوا ہے کہ ’ربیکا ڈیکس‘ کو زیادتی کے بعد پھندا لگاکر قتل کیا گیا ہے۔
مقامی میڈیا کا کہنا ہے کہ ’ربیکا ڈیکس‘ 2010 سے برطانوی وزارت خارجہ کی ملازم تھیں، انہیں ممکنہ طور پر گزشتہ جمعے کو اغوا کیا گیا اور پھر زیادتی کے بعد قتل کرکے ان کی لاش پھینک دی گئی۔
دوسری جانب لبنان میں برطانوی سفیر ہیوگر شورٹر نے ایک بیان میں کہا ہے کہ پورا سفارت خانہ ربیکا کے بہیمانہ قتل پر دکھ اور صدمے سے دوچار ہے۔ اس المناک واقعے پر ہم مقتولہ کے اہل خانہ، اس کےدوستوں اور ساتھیوں کے دکھ میں برابر کے شریک ہیں۔ سفارت خانہ مقتولہ کے قتل کے واقعہ کی تحقیقات کے لیے ہر ممکن کوشش کرے گا اور قاتلوں کو قانون کے کٹہرے میں لانے تک کوششیں جاری رکھی جائیں گی۔

نئی دہلی (ایم نائن ٹو) بھارت کی اپوزیشن جماعت بھارتی نیشنل کانگریس کی رہنما سونیا گاندھی نے پارٹی صدارت کا عہدہ اپنے بیٹے راہول گاندھی کے سپرد کردیا۔راہول گاندھی کے صدر منتخب ہونے کے بعد 71 سالہ سونیا گاندھی نے کہا کہ ‘میں اب ریٹائر ہونا چاہتی ہوں۔واضح رہے کہ سونیا گاندھی 15 سال سے پارٹی صدر کے عہدے پر فائز تھیں۔نئے صدر کے حوالے سے کہا جار ہا ہے کہ حالیہ انتخابات میں ناکامیوں کے بعد 130 سالہ پرانی کانگریس جماعت اندورنی معاملات کا جائزہ لینے جاری ہے۔کانگریس کے رہنما رندیپ کا کہنا تھا کہ سونیا گاندھی سیاست سے نہیں پارٹی کی صدارت سے ریٹائر ہورہی ہیں۔44 سالہ راہول گاندھی نے بطور پارٹی صدر پہلی مرتبہ خطاب میں وزیراعظم نریندر مودی پر الزام عائد کیا کہ وہ بھارت کو پتھر کے دور میں لے کر جانا چاہتے ہیں۔دوسری جانب سونیا گاندھی نے اپنی تقریر میں کہا کہ ‘وزیراعظم نریندر مودی بھارت میں (مذہبی )خوف اور دہشت پھیلا رہے ہیں’۔خیال رہے نہرو-گاندھی خاندان کی چوتھی نسل سے تعلق رکھنے والے راہول کو 2013 میں جے پور میں کانگریس کا نائب صدر بنایا گیا تھا لیکن یہ عہدہ سنبھالنے کے بعد ان کی کارکردگی مایوس کن رہی۔ان کی سربراہی میں گزشتہ الیکشن میں کانگریس کو ملکی تاریخ میں سب سے شرم ناک شکست ہوئی تھی۔کہا جارہا ہے کہ بطور صدر راہول گاندھی کے لیے بڑا چیلنج براہِ راست مذہبی انتہاپسندی کا مقابلہ کرنا ہوگا۔خیال رہے سونیا گاندھی نے 1991 میں اپنے شوہر راجیو گاندھی کے قتل کے بعد بھارتی سیاست میں قدم رکھا تھا۔سونیا گاندھی نے اپنے انٹرویو میں کہا تھا کہ ‘اگر آپ کا خاندان سیاست میں سرگرم ہے تو پارٹی کا صدر بننا مشکل نہیں لیکن بھارت ایک جمہوری ملک ہے جہاں ابتداء ہی سے اپنی حیثیت کو منوانے کے لیے جدوجہد کرنا پڑتی ہے’۔ بھارت میں سونیا گاندھی کو فرقہ پرستی کی وجہ سے 1998 کے انتخابات میں شکست کا سامنا ہوا تھا جس کے سدباب کے لیے انہوں نے سیکولر نظام کی حمایت کی اور مسلسل 10 برس اپنے مقصد کی تکمیل کے لیے لگا دیئے۔سونیا گاندھی نے 2004 میں بھارتی انتخابات میں واجپائی کے مقابلے میں کامیابی حاصل کی لیکن دائیں بازو کے ہندوتوا نے ان کے خلاف ‘غیر ملکی’ ہونے کا شور مچایا۔جس پر سونیا گاندھی نے خاموشی سے وزارت عظمیٰ کا عہدہ چھوڑ ساری توجہ عوامی فلاح و بہبود پر لگا دی۔بھارتی ذرائع ابلاغ نے سونیا گاندھی کے اس عمل پر ان کو ‘سینٹا سونیا’ کا لقب دیا تھا۔سیاسی تجزیہ کاروں کا کہنا ہے کہ سونیا گاندھی نے شاہی خاندان کی مشعل تھامے رکھی ہے ایک ایسی سیاسی جماعت جس نے 1947 میں برطانیہ سے آزادی کے بعد تین بڑے وزیراعظم جواہر لال نہرو، ان کی بیٹی اندرا گاندھی اور ان کے بیٹے راجیو گاندھی دیئے۔

غزہ(میڈیا نائن ٹو) مقبوضہ فلسطین کے مختلف علاقوں میں اسرائیلی فوج نے نہتے فلسطینیوں پر فائرنگ کرکے چار نوجوانوں کو شہید اور 100 سے زائد کو زخمی کردیا ہے۔عرب میڈیا کے مطابق امریکا کی جانب سے مقبوضہ بیت المقدس کو اسرائیل کو دارالحکومت قرار دیئے جانے کے بعد سے عالم اسلام بالخصوص فلسطین کے مقبوضہ علاقوں میں مزاحمت کی نئی لہر ابھر کر سامنے آئی ہے، مغربی کنارے اور غزہ میں نہتے فلسطینیوں کی جانب سے مسلسل احتجاج کیا جارہا ہے ۔ جس کے جواب میں اسرائیلی فوج مظاہرین پر آنسو گیس اور ربڑ کی گولیاں برسانے کے علاوہ فائرنگ بھی کررہی ہے۔
فلسطینی وزارت صحت کے مطابق غزہ اور مغربی کنارے میں نہتے فلسطینیوں کے احتجاج کو دبانے کے لیے اسرائیلی فوج کی فائرنگ سے مزید 4 شہری شہید ہوگئے ہیں۔ جام شہادت نوش کرنے والوں میں دونوں پیروں سے معذور 29 سالہ ابراہیم ابوطوریہۃ بھی شامل ہے جو 2008 میں اسرائیلی بمباری کے نتیجے میں اپنے دونوں پیروں سے محروم ہوا تھا۔
فلسطین کی وزارت صحت کا کہنا ہے کہ گزشتہ دس روز کے دوران علاقے میں نئی انتفاضہ تحریک کے آغاز سے اب تک 2700 سے زائد فلسطینی زخمی ہوچکے ہيں۔
واضح رہے کہ امریکی صدر ڈونلڈ ٹرمپ نے رواں ماہ مقبوضہ بیت المقدس کو اسرائیلی دارالحکومت تسلیم کرتے ہوئے اپنے ملک کا سفارت خانہ تل ابیب سے القدس منتقل کرنے کا اعلان کیا تھا۔

نئی دہلی(میڈیا نائن ٹو) بھارتی کابینہ نے سپریم کورٹ کے فیصلے کی روشنی میں بیک وقت 3 طلاق دینے کو جرم قرار دینے کا بل منظور کرلیا ہے۔بھارتی میڈیا رپورٹس کے مطابق بھارت کی کابینہ نے بیک وقت تین طلاقوں پر پابندی کا بل منظور کرلیا ہے، مجوزہ بل کے مطابق ایک ساتھ تین طلاق دینا ناقابل ضمانت جرم ہوگا اور ایسا کرنے والے کو تین سال قید کی سزا د ی جاسکے گی جب کہ متاثرہ خاتون علاقہ مجسٹریٹ سے اپنے اور بچوں کے تحفظ کی درخواست بھی کرسکتی ہے.
بھارتی ماہرین کا کہنا ہے کہ کابینہ کی جانب سے منظور کئے گئے بل کو قانونی شکل دینے کے لیے پارلیمنٹ میں پیش کیا جائے گا، جہاں سے منظوری کے بعد یہ بل ملک بھر کے مسلمانوں پر لاگو ہوگا۔
دوسری جانب بل کی منظوری پر بھارتی مسلمان تنظیموں نے شدید احتجاج کرتے ہوئے کہا ہے کہ طلاق کے معاملے پر قانون سازی پرسنل لاء میں مداخلت ہے جوآئین کے خلاف ہے۔
واضح رہے کہ بھارتی سپریم کورٹ نے بیک وقت 3 طلاقوں کو غیر قانونی اورآئین کے خلاف قرار دیا تھا تاہم بھارت کے علمائے کرام نے اس فیصلے پر اپنے تحفطات کا اظہار کیا تھا۔

واشنگٹن(میڈیا نائن ٹو ) امریکا نے ایک بار پھر ایران پر الزام عائد کرتے ہوئے کہا ہے کہ سعودی عرب کے شہروں پر جن میزائلوں سے حملہ کیا گیا وہ ایران نے فراہم کیے تھے۔واشنگٹن میں ایک پریس کانفرنس کے دوران اقوام متحدہ میں امریکا کی مستقل نمائندہ نکی ہیلی کا کہنا تھا کہ گزشتہ ماہ یمن سے حوثی باغیوں نے سعودی عرب کے شہروں کو جن میزائلوں سے نشانا بنایا وہ ایران نے فراہم کیے تھے، نکی ہیلی نے واشنگٹن کے فوجی اڈے پر صحافیوں کو میزائل کی باقیات دکھاتے ہوئے کہا کہ ایران ہتھیاروں کے پھیلاؤ سے متعلق اقوام متحدہ کی قراردادوں پر عمل نہ کرکے خلاف ورزی کا مرتکب ہورہا ہے۔
اس سے قبل اقوام متحدہ کے اہلکاروں نے سعودی عرب کا دورہ کیا جہاں انہوں نے میزائل کے ٹکروں کا جائزہ لیا اور تحقیقاتی رپورٹ میں کہا کہ حوثی باغیوں کی جانب سے سعودی عرب پر حملے کے لیے داغے گئے میزائلوں کی ساخت یکساں ہیں۔ ان کے ٹکروں پر ایرانی کمپنی شاہد بغیری انڈسٹریل گروپ کے لوگو سے ملتا جلتا نشان تھا جسے اقوام متحدہ بلیک لسٹ کر چکی ہے۔
واضح رہے کہ گزشتہ ماہ سعودی عرب کے دارالحکومت ریاض اور شہر خمیس مشیط پر یمن سے میزائل حملہ کیا گیا تاہم سعودی سیکیورٹی فورسز نے حملوں کو ناکام بنادیا تھا۔

واشنگٹن(میڈیا نائن ٹو) ری پبلکن پارٹی سے تعلق رکھنے والے امریکی رکن پارلیمنٹ ڈین جونسن نے خود کو گولی مار کر زندگی کا خاتمہ کرلیا۔غیرملکی خبررساں ادارے کے مطابق امریکا میں ریپبلکن پارٹی سے تعلق رکھنے والے ایوان نمائندگان کے رکن ڈین جونسن نے گزشتہ شب خود کو گولی مارکر خودکشی کرلی ہے۔
امریکی میڈیا کے مطابق کینٹکی کی نمائندگی کرنے والے 57 سالہ جونسن پر کینٹکی تحقیقاتی کمیٹی نے 3 روز قبل الزام عائد کیا تھا کہ انہوں نے 2012ء میں اپنی بیٹی کی 17 سالہ دوست ماراندا ریچمونڈ کو جنسی حملے کا نشانہ بنایا تھا، اس الزام کے نتیجے میں کانگریس میں ریپبلکن اور ڈیموکریٹک رہنماؤں نے جانسن سے مستعفی ہونے کا مطالبہ کیا تھا تاہم ڈین جونسن نے اس الزام کی تردید کرتے ہوئے کہا تھا کہ یہ ڈیمو کریٹس کی جانب سے صرف اُن کی ساکھ بدنام کرنے کی سازش ہے۔
پولیس حکام کا کہنا ہے کہ گزشتہ رات جونسن ماؤنٹ واشنگٹن برج کے قریب اپنے گاڑی پر سوار کہیں جارہے تھے کہ اچانک گاڑی روک کر پیدل چلنا شروع کردیا اور پل کے پاس پہنچتے ہی خود کو گولی مارلی۔

صنعاء(میڈیا نائن ٹو) یمن کے دارالحکومت صنعاء میں حوثی باغیوں کے قید خانے پر سعودی اتحادی فضائیہ کی بمباری کے نتیجے میں کم ازکم 30 قیدی ہلاک ہوگئے. غیر ملکی میڈیا رپورٹس کے مطابق اتحادی طیاروں نے مشرقی صنعاء میں حوثی باغیوں کے زیرِ قبضہ ایک قید خانے کو نشانہ بنایا، جنگی طیاروں نے جیل پر اس وقت بمباری کی جب وہاں 180 کے قریب قیدی پابندِ سلاسل تھے۔
جیل کے ایک گارڈ نے میڈیا کو بتایا کہ جنگی طیاروں کے پہلے حملے میں جیل کا ایک حصے تباہ ہوا جب کہ قیدیوں کےفرار ہونے کے دوران مزید بمباری کے نتیجے میں عمارت کے دیگر حصے بھی تباہ ہوگئے۔ حوثی باغیوں کے نشریاتی ادارے ’المسیراہ ٹی وی‘ کا کہنا ہے کہ سعودی اتحاد کی بمباری میں 30 افراد ہلاک ہوئے جو سب قیدی تھے اور حملے میں متعدد زخمی بھی ہوئے ہیں۔
واضح رہے کہ عرب اتحاد نے سابق یمنی صدر علی عبداللہ صالح کے باغیوں کے ہاتھوں ہلاکت کے بعد حوثیوں کے خلاف کارروائیاں تیز کردی ہیں تاہم اب بھی صنعا مکمل طور پر باغیوں کے کنٹرول میں ہے۔

نئی دہلی(میڈیا نائن ٹو ڈاٹ ٹی وی ) سابق بھارتی وزیراعظم من موہن سنگھ نے ریاستی انتخابات میں کانگریس کو کامیاب کرانے کے لیے پاکستانی مداخلت کے الزامات کو احمقانہ قرار دیتے ہوئے کہا ہے کہ نریندرا مودی سیاسی فائدے کے لئے عوام کو گمراہ کرنے کی کوشش کررہےہیں۔بھارتی میڈیا رپورٹس کے مطابق سابق بھارتی وزیراعظم من موہن سنگھ نے نریندرا مودی کو خط لکھا ہے جس میں انہوں نے پاکستانی ہائی کمشنر سے خفیہ ملاقات کے حوالے سے الزامات پر برہمی کا اظہارکرتے ہوئے کہا ہے کہ نریندرا مودی کی جانب سے خفیہ ملاقات کے بےبنیاد الزامات ان کے لیے تکلیف کا باعث بنے ہیں، درحقیقت گجرات کے ریاستی انتخابات میں ممکنہ ہار دیکھ کر مودی بوکھلا گئے ہیں اور سیاسی فائدے کےلئے عوام کو گمراہ کر رہے ہیں، انہوں نے سابق وزیر اعظم اور فوج کے سربراہ سمیت آئینی اداروں کو بدنام کرنے کی ایک خطرناک روایت کا آغاز کردیا ہے۔
سابق بھارتی وزیر اعظم نے کہا کہ کانگریس کو قوم پرستی سے متعلق کسی وعظ کی ضرورت نہیں، عوام کانگریس اور ان کی خدمات کو بخوبی جانتے ہیں، مجھے وزیراعظم مودی کی طرف سے محض سیاسی فائدے کےلئے احمقانہ الزام تراشی دراصل گجرات کے انتخابات میں واضح شکست کی بوکھلاہٹ ہے۔ انہوں نے کہا کہ وہ امید کرتے ہیں کہ نریندرا مودی اپنےعہدے کا وقار بحال کرنے کے لیے معافی ضرور مانگیں گے۔
واضح رہے کہ نریندرا مودی نے چند روز قبل گجرات میں ایک انتخابی جلسے سے خطاب کرتے ہوئے الزام لگایا تھا کہ پاکستان ریاستی انتخابات کے نتائج پر اثر انداز ہونے کی کوشش کر رہا ہے اور اس کوشش میں کانگریس پارٹی بھی اس کے ساتھ ہے۔ اس سلسلے میں من موہن سنگھ اور بھارت کے سابق نائب صدر حامد انصاری نے پاکستانی حکام سے خفیہ ملاقاتیں بھی کی ہیں۔

سری نگر(میڈیا نائن ٹو ڈاٹ ٹی وی) مقبوضہ کشمیر میں قابض بھارتی فوج نے سرچ آپریشن کے نام پر خاتون سمیت مزید 4 کشمیریوں کو شہید کردیا ہے۔کشمیر میڈیا سروس کے مطابق مقبوضہ کشمیر کے ضلع کپواڑہ کے گاؤں یونسو میں علی الصبح قابض بھارتی فوج اور پیرا ملٹری سینٹرل ریزرو پولیس اہلکار سرچ آپریشن کے نام پر گھروں میں جاگھسے۔ قابض فوجیوں نے فائرنگ کرتے ہوئے 4 افراد کو شہید کردیا، جام شہادت نوش کرنے والوں میں ایک خاتون بھی شامل ہیں۔ جن کی شناخت مسریٰ بانو کے نام سے ہوئی ہے۔
ڈائریکٹر جنرل پولیس ایس پی وید نے بھارتی فوج کی بربریت پر پردہ ڈالنے کے لیے دعویٰ کیا ہے کہ تین نوجوانوں کی ہلاکت مقابلے کے دوران جوابی کارروائی کے نتیجے میں ہوئی ہے۔
دوسری جانب واقعے کے خلاف عوامی ردعمل سے بچنے اور بھارتی بربریت سے متعلق معلومات عالمی برادری تک پہنچنے سے روکنے کے لیے کپواڑہ میں موبائل سروس اور انٹر نیٹ کو بھی بند کردیا گیا ہے۔
واضح رہے کہ مقبوضہ کشمیر میں گزشتہ برس حریت پسند نوجوان برہان وانی کی شہادت کے بعد آزادی کے لیے جدو جہد کی نئی لہر ابھری ہے اور بھارتی فوج نے اسے دبانے کے لیے صرف گزشتہ ماہ 28 کشمیریوں کو شہید کیا ہے۔

قاہرہ(میڈیا نائن ٹو ڈاٹ ٹی وی) عرب لیگ نے بیت المقدس کواسرائیل کا دارالحکومت تسلیم کرنے کے فیصلے کو خطرناک اورناقابل قبول قراردے دیا۔مصرکے دارالحکومت قاہرہ میں امریکی صدرڈونلڈ ٹرمپ کی جانب سے مقبوضہ بیت المقدس کو اسرائیل کا دارالحکومت تسلیم کیے جانے کے خلاف عرب لیگ کا ہنگامی اجلاس ہوا، جس میں 22 عرب ممالک کے وزرائے خارجہ کی شرکت کی۔
اجلاس کے جاری اعلامیہ کے مطابق مقبوضہ بیت المقدس سے متعلق امریکی صدرڈونلڈ ٹرمپ کے فیصلے کی کوئی قانونی حیثیت نہیں، امریکی فیصلہ عالمی قوانین کی خلاف ورزی ہے اورامریکا مقبوضہ بیت المقدس کو اسرائیل کا دارالحکومت تسلیم کرنے کا فیصلہ واپس لے۔
اجلاس میں عرب لیگ کے سربراہ احمد ابو الغيط نے امریکی صدرڈونلڈ ٹرمپ کے فیصلے کو خطرناک اور ناقابل قبول بھی قراردیا جب کہ اس موقع پرلبنان کے وزیرخارجہ جبران باسل نے تجویز دی کہ ٹرمپ کےاس فیصلے پرعرب ممالک کو امریکا پر معاشی پابندیاں عائد کرنی چاہیئں۔ عرب لیگ کی جانب سے یہ فیصلہ بھی کیا گیا کہ امریکی صدرکے اس اقدام کواقوام متحدہ کے سیکیورٹی کاؤنسل کے پلیٹ فارم پرلے کرجایا جائے گا۔
واضح رہے کہ 2 روزقبل امریکی صدرڈونلڈ ٹرمپ نے مقبوضہ بیت المقدس کو اسرائیل کا دارالحکومت تسلیم کرنے کا باضابطہ اعلان کردیا تھا جس کے بعد دنیا بھرکے مختلف ممالک نے اس فیصلے کی مزمت کرتے ہوئے غیر ذمہ دارانہ فیصلہ قراردے دیا ہے۔