Category انٹرنیشنل

واشنگٹن(میڈیا نائن ٹو ڈاٹ ٹی وی)امریکی سپریم کورٹ نے ڈونلڈ ٹرمپ کی جانب سے 6 مسلم ممالک پر لگائی گئی سفری پابندیوں کو قانونی قرار دے دیا۔امریکی سپریم کورٹ نے صدر ڈونلڈ ٹرمپ کی جانب سے 6 مسلم ممالک پر لگائی جانے والی سفری پابندیوں کے حق میں فیصلہ دے دیا ہے، امریکی سپریم کورٹ کے 9 میں سے 7 ججوں نے امریکی انتظامیہ کے حق میں فیصلہ دیا جب کہ 2ججوں نے مخالفت کی۔
امریکی سپریم کورٹ کے اس فیصلے کے بعد اب سفری پابندیوں کے معاملے پر رواں ہفتے کیلیفورنیا، سان فرانسسکو اور رچمنڈ کی وفاقی عدالتوں میں سماعت ہوگی۔ امریکی سپریم کورٹ نے جن 6 مسلم ممالک پر سفری پابندیوں کے نفاذ کی اجازت دی ہے ان میں یمن، ایران، شام، صومالیہ، چاڈ اور لیبیا شامل ہیں۔
واضح رہے کہ امریکی صدر ڈونلڈ ٹرمپ نے گذشتہ سال جنوری میں ایک متنازع پالیسی کے تحت تین طرح کے حکم نامے جاری کیے تھے جس کے تحت 7 مسلم اکثریتی ممالک کے شہریوں کی امریکا آمد پر پابندیاں عائد کر دی گئی تھیں۔
صدر ٹرمپ کے اس حکم نامے کے خلاف ملک بھر میں مظاہرے دیکھنے میں آئے تھے اور امریکا کے ہوائی اڈوں پر شدید افراتفری کا عالم تھا تاہم اس حکم نامے کو فیڈرل کورٹ نے گذشتہ برس فروری میں معطل کردیا تھا۔

واشنگٹن(میڈیا نائن ٹو ڈاٹ ٹی وی) امریکی خفیہ ایجنسی سی آئی اے کے سربراہ مائیک پومپیو نے دھمکی دیتے ہوئے ہے کہ اگر پاکستان نے اپنے ہاں میں دہشت گردوں کی محفوظ پناہ گاہیں ختم نہ کیں تو امریکا ان کے خاتمے کے لئے کچھ بھی کر گزرے گا۔کیلی فورنیا میں نیشنل ڈیفنس فورم سے خطاب کے دوران امریکی خفیہ ایجنسی سی آئی اے کے چیف مائیک پومپیو نے کہا کہ امریکا ہر قیمت پر پاکستان میں موجود دہشت گردوں کی محفوظ پناہ گاہوں کا خاتمہ چاہتا ہے، اگر پاکستان ایسا کرنے میں ناکام رہا تو امریکا انہیں خود ختم کرنے کے لیے ہر ممکن اقدامات کرے گا۔مائیک پومپیو نےکہا کہ امریکی وزیر دفاع جیمز میٹس پاکستان کے دورے کے دوران صدر ڈونلڈ ٹرمپ کا پیغام پاکستانی انتظامیہ تک پہنچائیں گے۔
واضح رہے کہ سی آئی اے کے چیف کا یہ بیان امریکی وزیر دفاع کے دورہ پاکستان سے قبل آیا ہے۔ امریکی وزیر دفاع جیمز میٹس آج ایک روزہ دورے پر پاکستان پہنچ گئے ہیں۔ امریکی وزیر دفاع جیمز میٹس نے پاکستان کے سفر کے دوران جہاز میں صحافیوں سے گفتگو میں کہا کہ وہ اسلام آباد پہنچنے کے ساتھ ہی پاکستان پر دباؤ نہیں ڈالیں گے، ہمیں یقین ہے پاکستان دہشت گردی کے خاتمے کے اپنے دعوؤں پر پورا اترے گا۔

تہران(میڈیا نائن‌ٹو ڈاٹ ٹی وی)ایرانی صدر حسن روحانی نے چاہ بہار بندرگاہ کے پہلے مرحلے کا افتتاح کردیا۔غیر ملکی میڈیا رپورٹ کے مطابق ایرانی صدر حسن روحانی نے چابہار بندرگاہ کے پہلے مرحلے کا افتتاح کردیا، افتتاحی تقریب میں افغانستان اور بھارت سمیت 60 ممالک کے نمائندوں نے شرکت کی۔ چاہ بہار بندرگاہ افغانستان، ایران اور بھارت کے درمیان ٹرانزٹ راستہ ہے جس کے لیے بھارت 500 ملین ڈالرز کی سرمایہ کاری کررہا ہے، بندرگاہ کے پہلے مرحلے کا نام شاہد بہشتی پورٹ ہے۔
چاہ بہار منصوبے میں کامیابی کی صورت میں بھارت کو ایران کے ذریعے افغانستان اور وسطی ایشیا تک پاکستان کو بائی پاس کرتے ہوئے نیا اسٹریٹجک ٹرانزٹ روٹ میسر آجائے گا۔ خیال کیا جارہا ہے کہ بھارت ایران سے چاہ بہار پورٹ کے دوسرے مرحلے کو مکمل ہونے سے قبل اپنے انتظامی اختیارات میں لینے کی خواہش کا اظہارکرے گا۔
علاوہ ازیں بھارت کی وزیر خارجہ سشما سوراج نے اس موقع پر ایران کا دورہ کیا اور دارالحکومت تہران میں ایرانی وزیر خارجہ جواد ظریف سے ملاقات کی، دونوں رہنماؤں کے درمیان چاہ بہار بندرگاہ سمیت مختلف امور پر تبادلہ خیال کیا گیا۔

سرینگر(میڈیا نائن ٹو ڈاٹ ٹی وی)بھارتی فوج کے زیر اہتمام کرکٹ لیگ کے میچ کے دوران اسٹیڈیم میں تماشائیوں نے پاکستان اور حریت رہنما ذاکر موسیٰ کے حق میں نعرے لگا دیے۔بھارتی فوج کئی برسوں کے ظلم و تشدد کے بعد بھی کشمیریوں کے دل سے پاکستان کی محبت کو ماند نہیں کر سکی، انھیں جب بھی موقع ملتا ہے وہ اس محبت کا اظہار کچھ اس طریقے سے کرتے ہیں کہ بھارت اپنا سا منہ لے کر رہ جاتا ہے۔
کشمیر میڈیا سروس کے مطابق بھارتی فوج کے زیر اہتمام ضلع بڈگام میں کشمیر پریمیر لیگ کا انعقاد کیا گیا جس میں بھارتی پولیس اور فوج کے اعلیٰ حکام نے شرکت کی، میچ کے دوران بھارتی پولیس اور فوج کے اعلیٰ افسران کو اس وقت شدید شرمندگی کا سامنا کرنا پڑا جب اسٹیڈیم میں موجود تماشائیوں اور کھلاڑیوں نے پاکستان اور حریت رہنما ذاکر موسیٰ کے حق میں نعرے بازی کرنا شروع کردی۔
کشمیر میڈیا سیل کی جانب سے جاری بیان کے مطابق میچ کی اختتامی تقریب کے دوران اسٹیڈیم میں موجود کھلاڑیوں اور تماشائیوں نے پاکستان کا جھنڈا لہرایا اور بھارت سے آزادی کے نعرے لگائے۔
واضح رہے کہ چند روز قبل مقبوضہ کشمیر میں ایسا ہی ایک واقعہ پیش آیا تھا جب بھارتی فوج کی جانب سے منعقد کرکٹ میچ کے دوران بھارتی کھلاڑی مہندرا سنگھ دھونی کی آمد پر کشمیری نوجوانوں نے’’بوم بوم آفریدی‘‘ کے نعرے لگائے تھے۔

(میڈیا نائن ٹو ڈاٹ ٹی وی )پوپ فرانسس نے میانمار سے بے گھر ہونے والے مسلمانوں پر ہونے والے ظلم پر معافی مانگتے ہوئے ان کو حقوق دینے کا مطالبہ کیا اور دو روز قبل لفظ روہنگیا کہنے سے انکار کے بعد پہلی مرتبہ ڈھاکا میں ایک اجتماع میں روہنگیا کا لفظ بھی ادا کیا۔پوپ فرانسس نے بنگلہ دیش میں موجود روہنگیا مسلمانوں کے ایک گروپ سے ملاقات کی اور ان کی دکھ بھری کہانی سنی اور ان کے ساتھ ہمدردی کا اظہار کیا۔انھوں نے دنیا کی بے حسی پر معذرت کرتے ہوئے انھیں روہنگیا کے نام سے مخاطب کیا۔پوپ فرانسس کا کہنا تھا کہ آج خدا کی موجودگی بھی روہنگیا کہے گی۔بنگلہ دیش کے سرحدی علاقے کوکس بازار میں قائم مہاجرکیمپ سے 12 مرد، 2 خواتین اور 2 کم سن لڑکیوں سمیت 16 روہنگیا افراد دارالحکومت ڈھاکا پہنچے جبکہ مہاجر کیمپ میں 6 لاکھ 20 ہزار سے زائد افراد موجود ہیں۔خیال رہے کہ میانمار میں بدترین فسادات کا شکار ہوکر ہجرت پر مجبور ہونے والے روہنگیا مسلمانوں کو میانمار کے مقامی بدھ مذہب کے پیروکار اور حکومت انھیں روہنگیا نہیں مانتی اور انھیں بنگالی مہاجرین کہا جاتا ہے۔میانمار انھیں مقامی بھی نہیں سمجھتا اور شہریت بھی دینے کو تیار نہیں جبکہ وہ کئی نسلوں سے میانمار میں رہتے ہیں۔ڈھاکا پہنچنے والے روہنگیا مسلمانوں کے گروپ کے تمام اراکین نے انفرادی طور پر پوپ فرانسس سے ملاقات کی اور بچوں اور جوانوں کو حوصلہ دیا۔پوپ فرانسس کا کہنا تھا کہ ‘ہوسکتا ہے کہ ہم آپ کے لیے زیادہ کچھ نہ کرسکیں لیکن آپ کا دکھ ہمارے دلوں میں ہے۔انھوں نے بھرائی ہوئی آواز میں کہا کہ ‘ان تمام افراد کی جانب سے جنھوں نے آپ کو سزا دی، جنھوں نے آپ کو دکھ پہنچایا اور دنیا کی بے حسی پر میں آپ سے معافی کا خواست گار ہوں۔پوپ فرانسس نے روہنگیا مہاجرین کے حقوق کو مسلمہ قرار دیتے ہوئے اس کو اجاگر کرتے رہنے کا اعادہ کیا اور بنگلہ دیش کو ان مہاجرین کی مدد پر بڑے دل کا مظاہرہ قرار دیتے ہوئے مزید مدد جاری رکھنے کی اپیل کی۔خیال رہے کہ پوپ فرانسس نے میانمار میں میزبان سے سفارتی اقدار کے خیال سے کھلے عام لفظ روہنگیا ادا کرنے احتراز برتا تھا جس کے بعد انسانی حقوق کی تنظیموں اور خود روہنگیا مسلمانوں کی جانب سے شدید مایوسی کا اظہار کیا تھا۔پوپ فرانسس کی جانب سے روہنگیا نہ کہنے کے معاملے پر روہنگیا مسلمان افراد ان سے ملنے ڈھاکا پہنچے اور انھیں ان کی شناخت کے اعتراف پر زور دیا۔32 سالہ روہنگیا مسلمان محمد ایوب کا کہنا تھا کہ ‘وہ دنیا کے رہنما ہیں اور انھیں وہ لفظ کہنا چاہیے کہ ہم روہنگیا ہیں۔ پوپ فرانسس نے ان افراد کی آمد پر شکریہ ادا کرتے ہوئے کہا کہ ‘آپ کی عزت افزائی کا شکریہ اور اس سے چرچ سے آپ کی محبت کا بھی اظہار ہوتا ہے۔

ہرارے(میڈیا نائن ٹو ڈاٹ ٹی وی) زمبابوے کے نئے صدر ایمرسن منانگاگوا نے نئی کابینہ میں اعلیٰ فوجی افسران کو شامل کرکے انہیں اہم وزارتیں تفویض کردیں۔بین الاقوامی میڈیا رپورٹس کے مطابق گزشتہ ہفتے صدارت کا منصب سنبھالنے کے بعد نئے صدر ایمرسن منانگاگوا نے اپنی پہلی کابینہ تشکیل دے دی ہے جس میں فوجی افسران کو بھی شامل کیا گیا ہے۔ نئے صدر نے فضائیہ کے ایئر مارشل پیرنس شیری کو وزیر زراعت مقرر کردیا جب کہ سابق صدر رابرٹ موگابے کا تختہ الٹنے کے بعد قوم سے خطاب کرنے والے فوجی جنرل سیبوسیسو کو وزارت خارجہ کا قلمدان سونپ دیا۔
سابق فوجیوں کی تنظیم کے سربراہ کرس متس وانگوا کو وزیر اطلاعات بنادیا گیا۔ اعلیٰ ملٹری افسران کو کابینہ میں شامل کرنے پر نئے صدر کو تنقید کا سامنا ہے اور مخالفین کا کہنا ہے کہ مسلح افواج کی اعلیٰ قیادت کو اہم وزارتیں تفویض کرنا غیر دانشمندانہ فیصلہ ہے۔
نئے وزیر زراعت پیرنس شیری 1980 میں موگابے کے دور حکومت میں عام شہریوں کے قتل عام میں بھی ملوث تھے۔ زمبابوے کی سیاست میں ملکی افواج کا کردار متنازع رہا ہے اور رابرٹ موگابے کے 37 سال تک برسراقتدار رہنے کی وجہ بھی فوج کی حمایت کو قرار دیا جارہا ہے۔ نئی کابینہ میں موگابے حکومت کے وزرا کو بھی شامل کیا گیا ہے ۔ حکومت نے ان سابق فوجی افسران کو بھی کیبنٹ کا حصہ بنایا ہے جو ماضی میں سابق صدر موگابے کو سپورٹ کرتے رہے ہیں۔

انقرا(میڈیا نائن ٹو ڈاٹ ٹی وی) ترک فوج کے شمالی عراق میں فضائی حملوں میں علیحدگی پسند جماعت کردستان ورکرز پارٹی کے 80 جنگجو ہلاک ہوگئے ہیں۔غیرملکی خبررساں ادارے کی رپورٹ کے مطابق ترک فوج نے شمالی عراق کے علاقے اسوس میں فضائی کارروائی کی ہے۔ جس کے نتیجے میں کرد علیحدگی پسند گروپ ’پی کے کے‘ سے وابستہ 80 شدت پسند ہلاک ہوگئے ہیں۔
ترک فوج کی جانب سے فضائی کارروائی کی تصدیق کردی گئی ہے، فوجی حکام کے بیان میں کہا گیا ہے کہ شمالی عراق میں کی گئی کارروائی میں ترکی کے جنگی طیاروں نے حصہ لیا اور اس میں ’’پی کے کے‘‘ کے زیر استعمال اسلحہ کا ڈپو اور کئی گاڑیاں بھی تباہ ہوئیں۔
یادرہے کہ 1984 کے بعد سے علحیدگی پسند جماعت اور حکومت کے درمیان شروع ہونے والے تنازع میں اب تک 40,000 سے زائد افراد مارے جا چکے ہیں جن میں اکثریت کردوں کی ہے،ترکی کی حکومت اور ’پی کے کے‘ کے درمیان جنگ بندی سے متعلق معاہدہ جولائی 2015 میں ختم ہو گیا تھا، جس کے بعد خاص طور پر ملک کے جنوب مشرقی علاقوں میں تشدد کے بدترین واقعات دیکھے گئے جبکہ علیحدگی پسند جماعت پی کے کے کو ترکی، امریکا اور یورپی یونین کی جانب سے دہشتگردتنظیم بھی قراردیاجاچکا ہے۔

نیویارک سٹی(میڈیا نائن ٹو ڈاٹ ٹی وی ) امریکا نے کہا ہے کہ شمالی کوریا پر جنگی جنون سوار ہے اس لیے عالمی برادری اس سے سفارتی اور تجارتی تعلقات توڑ لے۔ شمالی کوریا کی جانب سے بیلسٹک میزائل کے حالیہ تجربے کے بعد امریکا اور جاپان کی درخواست پر اقوام متحدہ کی سلامتی کونسل کا ہنگامی اجلاس ہوا۔ جس میں شمالی کوریا کے میزائل پروگرام پر شدید تشویش کا اظہار کیا گیا۔
اقوام متحدہ میں امریکا کی مستقل مندوب نکی ہیلے نے کہا کہ شمالی کوریا کو بار بار امن کا پیغام دیا گیا مگر پیانگ یانگ نے امن کے بجائے تباہی کا راستہ چنا ہے۔ اس پر جنگی جنون سوار ہے۔ اگر جنگ ہوئی تو شمالی کوریا کا حکومتی نظام مکمل طور پر تباہ ہوجائے گا۔ عالمی برادری شمالی کوریا سے سفارتی اور تجارتی تعلقات توڑ لے۔
دوسری جانب امریکی صدر ڈونلڈ ٹرمپ نے اپنی ایک ٹوئٹ میں شمالی کوریا پر مزید پابندیاں عائد کرنے کا اعلان کیا ہے تاہم امریکی حکام کی جانب سے اب تک اس کی تفصیلات فراہم نہیں کی گئیں۔
واضح رہے کہ شمالی کوریا نے دو روز قبل اپنے نئے بیلسٹک میزائل کا کامیاب تجربہ کیا تھا اور ماہرین نے تصدیق کی ہے کہ اس میزائل کے کامیاب تجربے کے بعد اب امریکا شمالی کوریا کی زد میں آگیا ہے۔

استنبول(میڈیا نائن ٹو ڈاٹ ٹی وی) ترکی میں پولیس نے غیرقانونی طریقے سے یورپ جانے والے 57 پاکستانیوں کو بازیاب کرا لیا ہے۔ترک میڈیا کے مطابق مقامی پولیس نے پیر کو استنبول میں خفیہ اطلاعات پر کارروائی کرتے ہوئے چھاپوں کے دوران 57 پاکستانی مغویوں کو بازیاب کرایا ہے جنہیں انسانی اسمگلروں نے ایک عمارت کے تہہ خانے میں قید کیا ہوا تھا ، ان افراد کو 10 ہزار ڈالرز کے عوض یورپ پہنچانے کا جھانسہ دے کر ترکی لایا گیا تھا اور انہیں کہا گیا تھا کہ وہ یہ رقم یورپ پہنچنے کے بعد ادا کریں، مقامی پولیس کے مطابق کارروائیوں میں تین پاکستانی اسمگلروں کو بھی گرفتار کیا گیا ہے جن پر تارکین وطن کو گمراہ کرنے کے الزامات ہیں۔
چند ماہ قبل ترکی سے متعدد پاکستانی باشندے پہلے بھی بازیاب ہوچکے ہیں، انسانی اسمگلروں نے انہیں اغوا کرکے بدترین تشدد کا نشانہ بنا کر ویڈیو پاکستان بھیجی تھی، پاکستانی حکام کی درخواست پر ترک پولیس نے انہیں کارروائیاں کرتے ہوئے متعدد پاکستانیوں کو بازیاب کرایا تھا۔
خیال رہے کہ یورپ جانے کے خواہش مند پاکستانی شہری بلوچستان سے براستہ ایران اور پھر ترکی سے یورپ جانے کی کوشش کرتے ہیں، گزشتہ چند برس میں لاکھوں شامی، عراقی، پاکستانی اور افغان شہری غیر قانونی طریقوں سے یورپ پہنچ چکے ہیں، چند روز قبل ہی بلوچستان میں پنجاب سے تعلق رکھنے والے 20 افراد کو مار دیا گیا تھا، یہ تمام افراد انسانی اسمگلروں کو رقم دے کر براستہ ایران ترکی یورپ جانے کے خواہش مند تھے۔

ٹوکیو(میڈیا نائن ٹو ڈاٹ ٹی وی) جاپان نے شمالی کوریا کے خفیہ ریڈیو سگنلز کا سراغ لگایا ہے جس کے بعد خدشہ ظاہر کیا جارہا ہے کہ شمالی کوریا آئندہ چند روزمیں ایک اور میزائل کا تجربہ کرنے کی تیاریوں میں ہے۔جاپانی حکام کا کہنا ہے کہ ان کے اداروں نے شمالی کوریا کے خفیہ ریڈیو سگنلوں کا سراغ لگالیا ہے جن سے ظاہر ہوتا ہے کہ کہ شمالی کوریا آئندہ چند روز میں ایک اور میزائل تجربہ کرنے کی تیاریوں میں مصروف ہے۔ البتہ جاپانی دعوے کی تصدیق امریکی جاسوس سیارچوں سے نہیں ہوتی جو شمالی کوریا کی ایک ایک حرکت پر مسلسل نظر رکھے ہوئے ہیں۔
جاپانی خبررساں ادارے کا کہنا ہے کہ شمالی کوریا کے ممکنہ میزائل تجربے سے متعلق موصول ہونے والے ریڈیو سگنلز کے بعد جاپانی کی حکومت مستعدی سے صورتحال کا جائزہ لے رہی ہے جبکہ یہ بھی توقع کی جارہی ہے کہ یہ میزائل تجربہ شمالی کوریا کی سرمائی فوجی مشقوں کا حصہ ہوگا۔
دوسری جانب شمالی کوریا کی جانب سے ممکنہ میزائل تجربے کےحوالے سے ایک سوال کا جواب دیتے ہوئے امریکی محکمہ دفاع (پنٹاگون) کے ترجمان کرنل روبرٹ میننگ کا کہنا ہے کہ امریکا شمالی کوریا پر گہری نگاہ رکھے ہوئے ہے۔
ان کا مزید کہنا تھا کہ سرِدست امریکا کی جانب سے شمالی کوریا کا تنازعہ الجھانے کےلیے سفارتی کوششیں جاری ہیں البتہ ان میں فوجی کارروائی کے امکانات بھی شامل ہیں جبکہ امریکا اور جنوبی کوریا کا اتحاد شمالی کوریا کے کسی بھی اشتعال انگیز حملے کا مؤثر جواب دینے کی صلاحیت رکھتا ہے۔