Category انٹرنیشنل

وائٹ ہاؤس کے سابق ڈاکٹر رونی جیکسن نے دعویٰ کیا ہے کہ امریکا کے صدر جوبائیڈن کو صحت سے متعلق شدید نوعیت کا مسئلہ درپیش ہے جو مزید بگڑے گا۔

سابق صدور باراک اوباما اور ڈونلڈ ٹرمپ کے ادوار میں وائٹ ہاؤس کے فزیشن رہنے والے ڈاکٹر رونی جیکسن کا کہنا ہے کہ صحت کے شدید مسائل کے سبب امریکی صدر جوبائیڈن عہدے پر کام جاری رکھنے کے اہل نہیں ہیں۔

سابق ڈاکٹر وائٹ ہاؤس کا کہنا ہے کہ 79 برس کے بائیڈن کو مجبور کیا جائے گا کہ وہ مستعفی ہوں، بائیڈن مستعفی نا ہوئے تو 25 ویں ترمیم کے ذریعے انہیں ہٹانا پڑ سکتا ہے۔

خیال رہے کہ جوبائیڈن بدھ کو صحافیوں سے بات کرتے ہوئے کئی بار اٹکے اور بھول پن کا شکار ہو گئے تھے، ایک ماہ پہلے بھی رپورٹر کو جواب دیتے ہوئے بائیڈن کو جیب سے پرچہ نکالنا پڑ گیا تھا۔

اقوام متحدہ کا کہنا ہے کہ کالعدم تحریکِ طالبان پاکستان (ٹی ٹی پی) افغان حدود سے پاکستان میں حملے کر سکتی ہے۔

اقوام متحدہ مانیٹرنگ ٹیم نے 28 ویں رپورٹ سلامتی کونسل میں جمع کروائی ہے جس میں القاعدہ، داعش اور دیگر شدت پسند گروپوں سے خطرات کا جائزہ بھی پیش کیا گیا ہے۔

تجزیہ کاروں نے یو این رپوٹس کو پاکستان کے خدشات کی توثیق قرار دیتے ہوئے کہا کہ پاکستان نے گزشتہ سال ان تنظیموں کو بھارتی مدد کے ٹھوس شواہد شیئر کیے۔

مشیر قومی سلامتی امور معید یوسف نے 23 جون کو لاہور دھماکے میں بھارت کے ملوث ہونے کے واضح شواہد بھی پیش کیے تھے۔

امریکا نے دنیا کے امیر ترین شخص جیف بیزوس اور ارب پتی تاجر رچرڈ برینسن کے خود کو خلاباز کہلوانے کے ارمانوں پر پانی پھیر دیا اور خلانورد کی ’تعریف‘ کی تبدیل کردی۔

حالیہ دنوں میں خلائی سفر کرنے والے دنیا کی امیر ترین شخصیت اور آن لائن کمپنی ایمازون کے بانی جیف بیزوس اور برطانوی تاجر رچرڈ برنیسن کو امریکی حکومت نے خلاباز ماننے سے انکار کردیا۔

خلا باز کون کہلائے گا؟ اس حوالے سے امریکی حکومت نے قواعد میں تبدیلی کردی ہے۔ فیڈرل ایوی ایشن ایڈمنسٹریشن (ایف اے اے) کے قواعد کے مطابق اب خلاباز کہلانے کے خواہاں افراد کے لیے ضروری ہے کہ وہ راکٹ کو بحفاظت خلا تک لے جانے والے عملے کا حصہ ہوں اور اور خلائی سفر کو محفوظ بنانے کے لیے انہوں نے کردار ادا کیا ہو۔

خلا باز کی اس نئی تعریف کے بعد امریکی حکومت کی نظر میں جیف بیزوس اور رچرڈ برینسن خلا نورد نہیں ہیں۔

خیال رہے کہ 2004 میں ایف اے اے کے ونگز پروگرام کے شروع ہونے کے بعد پہلی بار قوائد میں تبدیلی کی گئی ہے۔ امریکی حکومتی ادارے نے اس تبدیلی کا اعلان اس روز کیا جب جیف بیزوس نے اپنی بلیو اوریجن کمپنی کے نیو شیپرڈ نامی راکٹ سے خلا کی جانب اڑان بھری تھی۔

ایف اے اے حکام کا ایک جاری بیان میں کہنا ہے کہ ونگز اسکیم میں یہ تبدیلیاں تجارتی پروازوں کے دوران عوام کو تحفظات فراہم کرنے سے متعلق ہیں۔

ترجمان فیڈرل ایوی ایشن اتھارٹی نے ایک انٹرویو میں کہا ہے کہ امریکا میں خلاباز ونگز کا حصول امریکی خلائی تحقیقاتی ادارے ناسا اور فوج کے ذریعے ہی بن سکتے ہیں۔

یاد رہے کہ ایمازون کے بانی جیف بیزوس نے 20 جولائی کو اپنے بھائی، ولی فنک، 18 سالہ طالب علم اور ایک خاتون کے ہمراہ بلیو اوریجن کے راکٹ میں خلا تک کا سفر دس منٹ دس سیکنڈ میں مکمل کیا تھا جبکہ اس سے قبل 11 جولائی کو ارب پتی برطانوی تاجر رچرڈ برینسن تین دیگر مسافروں اور دو پائلٹس کے ہمراہ اپنی کمپنی ورجن گلیکٹک کے راکٹ پر خلائی سفر کے بعد زمین پر واپس آئے تھے۔ اس سے قبل صرف پروفیشنل خلا باز ہی خلا میں جاتے رہے ہیں۔

آسٹریلیا کے بعد فرانس، اٹلی اور برطانیہ میں بھی کورونا ویکسینیشن، سخت ایس او پیز اور لاک ڈاؤن کے خلاف ہزاروں افراد نے شدید احتجاج کیا اور بندشیں ختم کرنے کا مطالبہ کیا۔

عالمی خبر رساں ادارے کے مطابق آسٹریلیا سے کورونا لاک ڈاؤن کیخلاف شروع ہونے والے مظاہرے عالمی تحریک میں تبدیل ہوگئے۔ ویکسین نہ لگوانے اور لاک ڈاؤن میں نرمی کے خواہش مند ہزاروں افراد نے لندن، پیرس اور روم میں پُرتشدد مظاہرے کیے جس کے دوران مظاہرین اور پولیس میں جھڑپیں بھی ہوئیں۔

سب سے بڑا مظاہرہ فرانس میں کیا گیا جس میں ایک لاکھ 60 ہزار افراد نے شرکت کی، مظاہرین نے پلے کارڈز اُٹھا رکھے تھے جس میں ایس او پیز میں نرمی کے نعرے درج تھے۔ پولیس نے آنسو گیس کی شیلنگ کرکے مظاہرین کو منتشر کیا۔

اٹلی کے دارالحکومت کی سڑکیں بھی احتجاجی مظاہرین سے بھری رہیں۔ مظاہرے کے شرکاء نے کورونا لاک ڈاؤن اور زبردستی ویکسین لگانے کے عمل کو ’’آمرانہ اقدام‘‘ قرار دیتے ہوئے حکومت سے بنیادی انسانی حقوق کی فراہمی کا مطالبہ کیا۔

اسی طرح لندن میں بھی لوگوں کی بڑی تعداد نے کورونا پابندیوں کے خلاف شدید احتجاج کیا۔ مظاہرین کا کہنا ہے کہ حکومت نے کورونا کے نام پر صرف اس ماہ 6 لاکھ سے زائد افراد کو خودساختہ قرنطینہ پر مجبور کردیا ہے جو کہ ناقابل برداشت ہے۔

واضح رہے کہ دنیا بھر میں کورونا کی بھارتی قسم تیزی سے پھیل رہی ہے جس کی وجہ سے کئی ممالک میں کورونا لاک ڈاؤن سخت کردیا گیا ہے جس پر دو سال سے کبھی قرنطینہ، کبھی کرفیو اور کبھی لاک ڈاؤن کی پابندی کا سامنا کرنے والے شہری غصے سے بھپر گئے اور سڑکوں پر نکل آئے۔

واشنگٹن: صدر جو بائیڈن نے جنگ کے دوران امریکی فوج کی مدد کرنے والے افغان شہریوں کی امریکا منتقلی اور آباد کاری کے لیے کروڑوں ڈالر ہنگامی فنڈز کی منظوری دیدی۔

عالمی خبر رساں ادارے کے مطابق امریکی صدر جو بائیڈن نے افغان مہاجرین کی آباد کاری کی غیر متوقع صورت حال سے نمٹنے کے لیے فوری طور پر 10 کروڑ ڈالر کا فنڈز مختص کرنے کا حکم دیا ہے۔

اس حوالے سے وائٹ ہاؤس سے جاری بیان میں کہا گیا ہے کہ اس فنڈز سے 14 سالہ جنگ میں امریکی افواج کی مدد کرنے والے افغان شہریوں کو خصوصی امیگریشن ویزا اور امریکا میں سکونت کے انتظامات بھی کیے جائیں گے۔

بیان میں مزید کہا گیا ہے کہ اس قبل بھی صدر جو بائیڈن نے ان ضروریات کو پورا کرنے کے لیے امریکی سرکاری ایجنسیوں کی انوینٹریز کی خدمات کے سلسلے میں مزید 2 کروڑ ڈالر جاری کرنے کی منظوری بھی دی چکے ہیں۔

وائٹ ہاؤس میں ایسے 18 ہزار افغان شہریوں کی امریکا منتقلی کے لیے درخواستوں پر تیزی سے کام جاری ہے جنھوں نے جنگ کے دوران امریکی افواج کی مدد کی تھی اور اب انھیں طالبان سے اپنی جانوں کا خطرہ لاحق ہے۔

توقع کی جارہی ہے کہ امریکا کی مدد کرنے والے ڈھائی ہزار افغان شہریوں اور ان کے اہل خانہ کے پہلے دستے کو رواں ماہ کے آخر تک ورجینیا میں واقع امریکی فوجی اڈے فورٹ لی میں ٹھہرایا جائے گا جہاں وہ اپنے ویزا درخواستوں کی آخری کارروائی کا انتظار کریں گے۔

یوں تو امریکی قانون میں ایسے تارکین وطن کو امریکا میں سکونت دینے کی گنجائش ہے جنھوں نے امریکا کی مدد کی ہو تاہم ایسے خصوصی ویزوں کی تعداد نہایت کم تھی البتہ جمعرات کو امریکی ایوان نمائندگان نے قانون سازی کے ذریعے خصوصی امیگریشن ویزوں کی تعداد 8 ہزار تک بڑھانے کی منظوری دیدی۔

دوسری جانب امریکی نشریاتی ادارے ’’سی این این‘‘ کے مطابق امریکی فوج کے لیے مترجم کی خدمات انجام دینے والے سہیل پردیس کو کابل میں طالبان نے اس وقت اغوا کرکے سر قلم کردیا جب وہ عید سے قبل پر اپنی بہن کو لینے گاؤں جا رہے تھے۔

واضح رہے کہ امریکی فوجیوں کے افغانستان سے انخلا کے اعلان کے بعد سے ہی امریکی افواج کی مدد کرنے والے افغان شہریوں نے کابل میں مظاہرے کیے تھے جس میں اپنی جانوں کو طالبان سے خطرہ لاحق ہونے کے خدشے کا اظہار کرتے ہوئے امریکا منتقلی کا مطالبہ کیا گیا تھا۔

بھارتی میڈیا نے انکشاف کیا ہےکہ مودی سرکار نے اسرائیلی سافٹ ویئر پیگاسس کے ذریعے ان 25 کشمیری رہنماؤں کی بھی جاسوسی کی جو دہلی کی سرکاری پالیسی کو تسلیم نہیں کرتے۔

یہ عمل 2017 سے 2019 تک جاری رہا اور اس عمل میں بھارت کی ایک ایسی ایجنسی ملوث تھی جو اسرائیل کے این ایس او گروپ کی خدمات حاصل کرتی ہے۔

دی ہندو کے مطابق جاسوسی کے لیے کل جماعتی حریت کانفرنس کے سینئر رہنما سید علی شاہ گیلانی کے خاندان کے 4 افراد کے فون کو ہدف بنایا گیا، ان افراد میں سید علی گیلانی کے داماد، صحافی افتخار گیلانی اور ان کے سائنسدان بیٹے نسیم گیلانی بھی شامل تھے۔

اسرائیلی کمپنی کی جانب سے اہم شخصیات سمیت 50 ہزار افراد کی جاسوسی کا انکشاف
یہی نہیں بلکہ کل جماعتی حریت کانفرنس کے سربراہ میر واعظ عمر فاروق کا فون بھی نشانے پر تھا اور ان کے ڈرائیور اور انسانی حقوق کے رہنما وقار بھٹی کے فون کو بھی ہدف بنایا گیا۔

ساتھ ہی حریت پسند رہنما بلال لون اور ایس اے آر گیلانی کے فون کا بھی تجزیہ کیا گیا۔

رپورٹ کے مطابق مقبوضہ کشمیر کی سابق وزیراعلیٰ محبوبہ مفتی کے خاندان کے 2 افراد کے فون کی بھی جاسوسی کی گئی، یہ اقدام ایسے وقت کیا گیا جب محبوبہ مفتی مقبوضہ وادی کی وزیراعلیٰ اور بی جے پی کی اتحادی تھیں۔ اس کے ساتھ ساتھ5 کشمیری صحافیوں کے فون کی بھی جاسوسی کی گئی۔

نئی دہلی: سابق ہندو انتہا پسند اور سنگ پریوار کے رہنما محمد عامر حیدر آباد شہر کی ایک مسجد میں پراسرار طور پر انتقال کر گئے۔ محمد عامر جن کا اسلام قبول کرنے سے قبل نام دلبیر سنگھ تھا۔

مرحوم 1992ء میں بابری مسجد کے انہدام میں شریک ہوئے۔ پولیس کے مطابق محمد عامر کی رہائشگاہ سے بدبو کی اطلاع پر جب انہوں نے کارروائی کی تو گھر سے ان کی لاش ملی، جسے پوسٹ مارٹم کیلئے ہسپتال منتقل کر دیا گیا ہے۔ پوسٹ مارٹم رپورٹ ملنے کے بعد مزید کارروائی کی جائیگی۔

بھارتی روزنامے سیاست کی رپورٹ کے مطابق بابری مسجد گرانے کے بعد آبائی شہر پہنچنے پر محمد عامر کا استقبال ایک ہیرو کی طرح کیا گیا تھا، مگر اس حرکت پر اپنے سیکولر گھرانے کی سخت تنقید کا سامنا کرنا پڑا جس پر انہیں سخت ندامت محسوس ہوئی۔ بعد ازاں وہ بیمار ہو گئے۔

مختلف جسمانی عوارض کے باعث وہ مظفر نگر کے مولانا کلیم صدیقی کے پاس گئے اور بابری مسجد کے انہدام میں شرکت پر ندامت کا اظہار کیا۔

مولانا صدیقی نے قرآنی آیات کے حوالے سے اسلامی اقدار کی جب وضاحت کی تو محمد عامر کو احساس ہوا کہ اس سے ایک سنگین گناہ سرزد ہوا ہے۔

اس کے بعد انہوں نے یکم جون 1993ء کو انہوں نے اسلام قبول کرتے ہوئے مساجد کے تحفظ اور 100 مساجد کی تعمیر اور تزئین وآرائش کا عزم کیا۔

اس دوران 26 سال میں 91 مساجد تعمیر کیں، جن میں 59 زیر تعمیر ہیں۔ انہوں نے پہلی مسجد مدینہ 1994ء میں ہریانہ میں بنائی۔

پولیس کے مطابق محمد عامر حافظ بابا نگر میں کرائے کے مکان میں رہائش پذیر تھے، جہاں وہ مسجد رحیمیہ کے نام سے 59 ویں مسجد کا کام مکمل کرا رہے تھے۔

ایران کے سپریم لیڈر آیت اللہ علی خامنہ ای نے قحط سے متاثرہ سرحد کے قریب واقع جنوب مغربی صوبے خوزستان کے رہائشیوں کو خبردار کیا ہے کہ وہ مظاہرے کرکے ’دشمن‘ کے عزائم کو مزید تقویت نہ بخشیں۔

رپورٹ کے مطابق متاثرہ علاقے میں پولیس سے جھڑپوں میں کم از کم 4 افراد ہلاک ہوچکے ہیں۔

تیل کی پیداوار کے لیے مشہور اور 31 صوبوں میں سب سے زیادہ امیر صوبہ کہلانے والا خوزستان مارچ سے خشک سالی کی لپیٹ میں ہے اور 15 جولائی سے متعدد شہروں میں مظاہرے ہو رہے ہیں۔

اس ضمن میں آیت اللہ خامنہ ای نے قلت آب کے مسئلے کو تسلیم کرتے ہوئے کہا کہ خوزستان کے رہائشیوں کی ناراضگی اپنی جگہ درست ہے لیکن انہوں نے زور دیا کہ وہ اپنے رویے میں احتیاط برتیں۔

ان کی آفیشل ویب سائٹ پر جاری بیان میں سپریم لیڈر نے کہا کہ دشمن انقلاب، قوم اور لوگوں کے مفاد کے خلاف کسی بھی آلے کو استعمال کرسکتا ہے۔

انہوں نے کہا کہ ہمیں ہر حال میں محتاط رہنا ہے اور دشمن کو کوئی موقع فراہم نہیں کرنا۔

انہوں نے متاثرہ علاقوں کے لوگوں کو مخاطب کرکے کہا کہ ’لوگوں نے اپنے غصے کا اظہار کیا لیکن ہم ان پر تنقید نہیں کر سکتے، پانی کا مسئلہ کوئی چھوٹی بات نہیں ہے خاص طور پر خوزستان کے گرم علاقے میں‘۔

ایرانی میڈیا کے مطابق مظاہرین اور پولیس کی جھڑپوں میں پولیس اہلکار سمیت 3 افراد ہلاک ہوئے۔

ریاستی میڈیا کے مطابق چوتھا شخص مظاہرے میں زخمی ہونے کے بعد ہسپتال میں زیر علاج تھا جہاں وہ زخموں کی تاب نہ لاسکا۔

رپورٹ میں کہا گیا کہ لوگوں نے پانی کے مسئلے کے حل کے لیے سڑکوں کا رخ کرلیا تھا۔

براڈکاسٹر کے مطابق گولیاں نامعلوم عناصر نے چلائی، سیکیورٹی فورسز کو صورتحال سنبھالنے کے لیے تعینات کیا گیا تھا۔

یہ پہلی مرتبہ ہے کہ مقامی میڈیا نے جھڑپوں میں ہلاکتوں کا تذکرہ کیا، خوزستان میں پانی کی شدید قلت پر گزشتہ ہفتے سے مظاہرے جاری ہیں۔

علاوہ ازیں اقوام متحدہ کے انسانی حقوق کے چیف مائیکل بیچلیٹ نے ایران پر زور دیا کہ وہ صوبے میں مظاہرین پر تشدد کے بجائے پانی کے شدید بحران پر قابو پانے کے لیے اقدامات اٹھائے۔

انہوں نے کہا کہ لوگوں پر گولیاں چلانے اور انہیں گرفتار کرنے سے صورتحال مزید کشیدہ ہوگی اور مایوسی بڑھے گی۔

ان کا کہنا تھا کہ ’تباہ کن‘ صورتحال گزشتہ کئی عرصے سے بڑھ رہی ہے۔

اٹلی کے وزیر ماحولیاتی تبدیلی روبرٹو سِنگولانی نے کہا کہ جی 20 گروپ کے امیر ممالک کے توانائی اور ماحولیات کے وزرا حتمی مذاکرات میں ماحولیاتی تبدیلی سے متعلق تحریری وعدے پر اتفاق رائے کے قیام میں ناکام ہوگئے۔

رپورٹ کے مطابق جی 20 اجلاس کو نومبر میں 100 دن کے بعد گلاسگو میں ہونے والی اقوام متحدہ کی ماحولیاتی گفتگو (کوپ 26) سے قبل فیصلہ کن اقدام کے طور پر دیکھا جارہا تھا۔

کسی ایک نکتے پر اتفاق رائے میں ناکامی سے اسکاٹ لینڈ میں معنی خیز معاہدے کی امیدوں کو شدید دھچکا پہنچا ہے۔

روبرٹر سنگولینی نے صحافیوں کو بتایا کہ جنوبی اٹلی میں ہونے والے اجلاس میں وزرا دو متنازع امور پر اتفاق نہیں کر سکے اور اب ان معاملات پر روم میں اکتوبر میں ہونے والے جی 20 سربراہی اجلاس میں بات ہوگی۔

انہوں نے کہا کہ چین، روس اور بھارت سے مذاکرات خصوصی طور پر مشکل ثابت ہوئے۔

روبرٹو سنگولینی کا کہنا تھا کہ ان میں سے ایک اہم نقطہ کوئلے کے ذریعے بجلی کی تیاری کو ختم کرنا ہے، کم و بیش تمام ممالک سال 2025 تک ایسا کامیابی کے ساتھ کرنا چاہتے ہیں لیکن کچھ ممالک نے کہا ہے کہ یہ ان کے لیے ناممکن ہے۔

دوسرا مسئلہ جس پر بات چیت کی گئی وہ عالمی درجہ حرارت 1.5 سے 2 ڈگری سینٹی گریڈ بڑھنے کی حد ہے جو پیرس معاہدے میں مقرر کی گئی تھی۔

اوسطاََ عالمی درجہ حرارت اس سے قبل ہی سائنسدانوں کے مقرر کردہ پری انڈسٹریل حد کے مقابلے ایک ڈگری سے زائد بڑھ چکا ہے اور 1.5 سے 2 ڈگری کی حد تجاوز کر رہا ہے۔

اٹلی کے وزیر نے کہا کہ حتمی گفتکو جمعہ تک شائع ہونے کی توقع تھی لیکن ممکن ہے کہ اب شاید ہفتے سے قبل جاری نہ کی جائے۔

کوپ 26 سے قبل ماہرین ماحولیات نے توقع ظاہر کی تھی کہ جی 20 کا اجلاس ماحولیاتی تبدیلی کے ہدف کو مضبوط، ماحولیاتی تبدیلی کے متعلق فنانسنگ کے لیے نئے عزائم ظاہر کرے گا اور 2050 تک صفر اخراج کرنے والے ممالک میں اضافہ ہوگا۔

روبرٹو سنگولینی نے مزید کہا کہ جی 20 نے کوئی نئے مالی وعدے نہیں کیے تاہم اٹلی خود ترقی پذیر ممالک کے لیے ماحولیاتی تبدیلی کے حوالے سے مالی تعاون بڑھائے گا۔

رواں ماہ یورپ میں آنے والے تباہ کن سیلاب، امریکا میں جنگلات میں آگ لگنے کے واقعات اور سائبیریا میں درجہ حرارت میں اضافے سے ماحولیاتی تبدیلی کے حوالے سے ہنگامی اقدامات کی ضرورت عیاں ہو چکی ہے، لیکن اکثر ممالک ابھی تک شش و پنج میں مبتلا ہیں کہ گلوبل وارمنگ کو ختم کرنے کے حوالے سے متعلق مہنگی پالیسیوں کے لیے خطیر رقم کس طرح ادا کی جائے۔

طالبان کا کہنا ہے کہ وہ اقتدار پر اجارہ داری نہیں رکھنا چاہتے لیکن وہ اس بات پر اصرار کرتے ہیں کہ جب تک کابل میں نئی حکومت قائم نہ ہو اور صدر اشرف غنی کا عہد ختم نہ ہو تب تک افغانستان میں امن قائم نہیں ہوسکتا۔

امریکی خبر رساں ادارے اے پی کو دیے گئے ایک انٹرویو میں طالبان کے ترجمان سہیل شاہین جو مذاکرات کرنے والے گروہ کے رکن بھی ہیں، نے طالبان کے مؤقف کی نشاندہی کی کہ ملک میں آگے کیا ہوسکتا ہے۔

سہیل شاہین نے کہا کہ جب اشرف غنی کی حکومت ختم ہوگی اور دونوں فریقین کی جانب سے قابل قبول مذاکرات کے بعد نئی حکومت کابل میں قائم ہوجائے گی تو وہ اپنے ہتھیار ڈال دیں گے۔

‘وہ مفاہمت نہیں چاہتے مگر چاہتے ہیں کہ ہم ہتھیار ڈال دیں’
انہوں نے کہا کہ ’میں یہ واضح کرنا چاہتا ہوں کہ ہم اقتدار کی اجارہ داری پر یقین نہیں رکھتے کیونکہ ماضی میں افغانستان میں اقتدار پر اجارہ داری قائم کرنے والی حکومتیں کامیاب نہیں ہوئیں لہذا ہم اسی فارمولے کو دہرانا نہیں چاہتے‘۔

تاہم انہوں نے اشرف غنی کی مستقل حکمرانی پر بھی کوئی سمجھوتہ نہیں کیا اور انہیں جنگی راہب قرار دیا اور ان پر یہ الزام عائد کیا کہ انہوں نے عیدالاضحٰی کے اسلامی دن کے روز بھی تقریر کے دوران طالبان کے خلاف کارروائی کے عزم کا اظہار کیا تھا۔

سہیل شاہین نے اشرف غنی کے حکومت کرنے کے حق کو مسترد کرتے ہوئے 2019 کے انتخابات میں سامنے آنے والے بڑے فراڈ کی نشاندہی کی۔

یاد رہے کہ اس انتخابات میں اشرف غنی اور ان کے حریف عبداللہ عبد اللہ دونوں نے اپنی جیت ظاہر کرتے ہوئے خود کو صدر قرار دیا تھا، بعد ازاں ایک معاہدے کے بعد اب عبداللہ عبداللہ حکومت میں دوسرے نمبر پر ہیں اور مصالحتی کونسل کے سربراہ ہیں۔

واضح رہے کہ اشرف غنی نے اکثر یہ اعلان کرچکے ہیں کہ وہ اس وقت تک عہدے پر رہیں گے جب تک نئے انتخابات اگلی حکومت کا تعین نہیں کردیتے۔

گزشتہ ہفتے کے آخر میں عبداللہ عبداللہ نے طالبان رہنماؤں کے ساتھ بات چیت کے لیے قطر کے دارالحکومت دوحہ میں ایک اعلیٰ سطح کے وفد کی سربراہی کی تھی۔

جس کا اختتام مزید مذاکرات کے وعدوں کے ساتھ ساتھ عام شہریوں اور بنیادی انفرا اسٹرکچر کے تحفظ پر ترجیح کے ساتھ ہوا تھا۔

سہیل شاہین نے مذاکرات کو ایک اچھا آغاز قرار دیا تاہم انہوں نے کہا کہ حکومتیں بار بار جنگ بندی کا مطالبہ کرتی ہیں جبکہ اشرف غنی کا اقتدار میں رہنا طالبان کے سرینڈر کرنے کے مطالبے میں رکاوٹ ہے۔

ان کا کہنا تھا کہ ’وہ مفاہمت نہیں چاہتے مگر وہ چاہتے ہیں کہ ہم ہتھیار ڈال دیں‘۔

انہوں نے کہا کہ کسی بھی جنگ بندی سے پہلے ایک نئی حکومت کے لیے معاہدہ ہونا چاہیے جو ہمارے اور دیگر افغانوں کے لیے قابل قبول ہو، پھر جنگ نہیں ہوگی۔

‘حجاب یا اسکارف کے ساتھ خواتین کو کام کی اجازت ہے’
سہیل شاہین نے کہا کہ اس نئی حکومت کے تحت خواتین کو کام کرنے، اسکول جانے اور سیاست میں حصہ لینے کی اجازت ہوگی تاہم انہیں حجاب یا سر پر اسکارف پہننا پڑے گا۔

انہوں نے کہا کہ خواتین کو گھر سے نکلنے کے لیے ان کے ساتھ مرد سربراہ کی ضرورت نہیں ہوگی اور نئے قبضہ ہونے والے اضلاع میں طالبان کمانڈروں کو یہ حکم ہے کہ یونیورسٹیز، اسکولوں اور بازاروں میں پہلے کی طرح کام جاری رہے گا جس میں خواتین اور لڑکیوں کی شرکت بھی شامل ہے۔

سہیل شاہین نے کہا کہ چند طالبان کمانڈرز نے جابرانہ اور سخت رویے کے خلاف قیادت کے احکامات کو نظرانداز کیا ہے اور ان میں سے متعدد کو طالبان کے ایک فوجی ٹربیونل کے سامنے پیش کیا گیا ہے اور انہیں سزا دی گئی ہے تاہم انہوں نے اس حوالے سے مزید تفصیلات فراہم نہیں کیں۔

سہیل شاہین نے کہا کہ کابل پر فوجی دباؤ ڈالنے کا کوئی منصوبہ نہیں ہے اور اب تک طالبان نے صوبائی دارالحکومتوں پر قبضہ کرنے سے خود کو روک لیا ہے۔

تاہم انہوں نے خبردار کیا کہ نئے قبضہ کیے گئے اضلاع سے ملنے والے اسلحہ اور سازوسامان کے بعد وہ ایسا کرسکتے ہیں۔

ان کا کہنا تھا کہ میدان جنگ میں زیادہ تر کامیابی انہیں لڑائی سے نہیں بلکہ مذاکرات کے ذریعے حاصل ہوئی ہے۔

انہوں نے کہا کہ وہ اضلاع جو ہمارے پاس آچکے ہیں اور فوجی دستے جو ہمارے ساتھ شامل ہوچکے ہیں، وہ بات چیت کے ذریعے ہی آئے ہیں لڑائی کے ذریعے نہیں، ’لڑائی سے ہمیں صرف 8 ہفتوں میں 194 اضلاع حاصل کرنے میں بہت مشکل ہوتی‘۔

‘طالبان سے ڈرنا نہیں چاہیے’
سہیل شاہین نے طالبان کے وعدوں کو بھی دہرایا جس کا مقصد اس گروہ سے خوف زدہ افغانوں کو یقین دلانا ہے۔

دوسری جانب واشنگٹن نے وعدہ کیا ہے کہ وہ ہزاروں امریکی افواج کے حامیوں کو بھی افغانستان سے منتقل کرے گا۔

جس پر سہیل شاہین نے کہا کہ انہیں طالبان سے ڈرنا نہیں چاہیے تاہم اگر کچھ لوگ مغرب میں سیاسی پناہ لینا چاہتے ہیں کیونکہ افغانستان کی معیشت بہت خراب ہے، تو یہ ان پر منحصر ہے۔

انہوں نے اس بات کی بھی تردید کی کہ طالبان نے صحافیوں اور افغانستان کی سول سوسائٹی کو دھمکی دی ہے۔

سہیل شاہین نے کہا کہ صحافی بشمول مغربی ذرائع ابلاغ کے اداروں میں کام کرنے والے افراد کو ایسی حکومت سے ڈرنے کی کوئی ضرورت نہیں ہے جس میں طالبان بھی شامل ہوں۔

ان کا کہنا تھا کہ ’ہم نے صحافیوں کو وارننگ جاری نہیں کی خاص طور پر ان لوگوں کو جو غیر ملکی میڈیا اداروں کے لیے کام کر رہے ہیں، وہ مستقبل میں بھی اپنا کام جاری رکھ سکتے ہیں‘۔

واضح رہے کہ اپریل میں امریکی صدر جو بائیڈن نے اعلان کیا تھا کہ 11 ستمبر تک امریکی افواج کا افغانستان سے انخلا مکمل ہو جائے گا جس کے ساتھ ہی 20سال تک جاری رہنے والی امریکی تاریخ کی طویل ترین بھی اختتام پذیر ہو جائے گی۔