Category انٹرنیشنل

کویت سے تین روز کے دوران 688 غیر ملکیوں کو ملک بدر کیا گیا ہے جن میں سے 8 کا تعلقی ایشیائی جب کہ 680 افریقی ممالک کے شہری ہیں۔

غیر ملکی میڈیا رپورٹ کے مطابق کویت سے گزشتہ ماہ 27 سے 29 مئی کے دوران 688 تارکین وطن کو ملک بدر کیا گیا ہے جن میں 680 افریقی ممالک سے تعلق رکھتے ہیں جب کہ 8 کا تعلق ایشیائی ممالک سے ہے۔ حالیہ برسوں میں تین دن کے مختصر دورانیے میں اتنی بڑی تعداد میں تارکین وطن کی ملک بدری پہلی بار ہوئی ہے۔

اس حوالے سے کویت کی وزارت داخلہ کے تعلقات عامہ اور سیکیورٹی میڈیا ڈیپارٹمنٹ کا کہنا ہے کہ ان کی ملک بدری کی وجوہات انتظامی جلاوطنی اور فوجداری عدالت کے جاری فیصلے بھی ہیں اس کے علاوہ کئی افراد کو رہائشی اور لیبر قوانین کی خلاف ورزی کا مرتکب پایا گیا۔

سیکیورٹی ذرائع نے بتایا کہ ڈی پورٹ کیے گئے افراد کو طلحہ جیل میں رکھا گیا تھا اور ڈی پورٹ کرنے سے قبل ان کی انگلیوں کے نشانات اور تصاویر لی گئیں اور ان کی ملک بدری کے عمل سے متعلق تمام طریقہ کار کو ریکارڈ مدت میں مکمل کرکے ملک سے باہر روانہ کیا گیا۔

اس حوالے سے ذرائع کا کہنا ہے کہ صرف تین دنوں میں اتنی بڑی تعداد میں تارکین وطن کی ملک بدری سے اس بات کی تصدیق ہوتی ہے کہ ڈی پورٹیشن جیل ملک بدری کے طریقہ کار کو تیزی سے مکمل کرنے کے لیے کام کر رہی ہے تاکہ اس بات کو یقینی بنایا جا سکے کہ ڈی پورٹ ہونے والے افراد لمبے عرصے تک ملک بدری کی جیل میں نہ رہیں جیسا کہ کچھ سال پہلے ہوا کرتا تھا۔

بھارتی ریاست منی پور میں الگ ریاست کے مطالبات نے مزید زور پکڑ لیا ہے، عوام کی ایک بڑی تعداد بھارت سے علیحدگی کے مطالبے پر ڈٹ گئی ہے۔ منی پور میں کشیدہ صورتحال کی وجہ سے اب تک کئی سو افراد ہلاک جبکہ سیکڑوں زخمی اور 30 ہزار بے گھر ہو گئے ہیں،بھارتی فوج نے تقریباً 10ہزار فوجیوں اور فوجی دستوں کی بھاری نفری تعینات کردی ہے۔ مُودی سرکار نے یہ ثابت کردیا کہ اس کے نزدیک انسانی جانوں کی کوئی قدر وقیمت نہیں ہے، بھارتی حکومت نے ریاست میں انٹرنیٹ سروسز5دن تک معطل رکھی،ریاست میں دفعہ 144 کا نفاذ کیا گیا۔ گزشتہ ماہ سے ہونے والے اس تصادم میں اضافہ تب پیدا ہوا جب 28 مئی 2023 کی رات 2 بجے مودی کے احکامات پر شرپسندوں نے منی پور کے 5 علاقوں بشمول سیکمائی، سوگنو، کمبی، پھتینگ اور سیرو پر اندھا دھند حملہ کیا۔ یہ کارروائیاں زیادہ تر عیسائیوں، کوکی نیشنل آرگنائزیشن اور یونائیٹڈ پیپلز فرنٹ کے خلاف کی جارہی ہیں جو بھارت سے آزادی کا مطالبہ کررہے ہیں، یہ بات ثابت ہوگئی کے مودی ایک شرپسند ٹولے کا سردار ہے جو کشمیر کے ساتھ ساتھ بھارت میں بھی قتل و غارت کے اڈے کھولنا چاہتا ہے۔

منی پور ( آن لائن ) بھارتی ریاست منی پور میں نسل کشی کا بازار گرم، بھارت میں الگ ریاست کے مطالبات زور پکڑ گئے۔بھارت کی ریاست منی پور میں نسلی تصادم شدت اختیار کر گئے۔ میڈیا رپورٹس کے مطابق کشیدہ صورتحال کے باعث 70 سے زائد افراد ہلاک، سینکڑوں زخمی اور 30 ہزار بے گھر ہو چکے ہیں ،بھارتی فوج نے تقریباً 10,000 فوجیوں اور فوجی دستوں کی بھاری نفری تعینات کردی۔مْودی نے یہ ثابت کردیا کہ اس کے نزدیک انسانی جانوں کی کوئی قدر وقیمت نہیں،مْودی سرکار نے ریاست میں انٹرنیٹ سروسز تقریباََ 30 لاکھ آبادی کے لیے 5دنوں تک معطل کر کے دفعہ 144 کا اطلاق بھی نافذ کر دیا گیا۔28 مئی 2023 کی رات تقریباً 2 بجے مودی سرکار کی ایما پر شرپسندوں نے منی پور کے 5 علاقوں (سیکمائی، سوگنو، کمبی، پھتینگ اور سیرو) پر حملہ کیاحملے میں 1 پولیس اہلکار سمیت 5 افراد جاں بحق جبکہ 12 زخمی ہوئے ۔بھارت کی ہندو قوم پرست جماعت بی جے پی کی سربراہی میں حکومت نے کرفیو کے نفاذ کے لیے ”Shoot at sight” کے احکامات جاری کر رکھے ہیں ۔منی پور کی اس کشیدہ صورتحال کے باعث30 ہزار سے زائد شہری قریبی ریاستوں میں پناہ لینے پر مجبور ہو چکے ہیں جھڑپوں نے جنگ جیسی صورتحال کی شکل اختیار کر لی ہے۔ویڈیو اور تصاویر میں مشتعل ہجوم نے املاک کو آگ لگا دی۔ عینی شاہدین نے CNN کو بتایا کہ گھروں اور گرجا گھروں کو بھی جلا دیا گیا ۔امپھال کے ایک نوجوان قبائلی رہنما نے CNN سے بات کی اور کہا کہ ہمارے گھر میں توڑ پھوڑ کی گئی جس سے ہم فوجی کیمپ میں رہنے پر مجبور ہوئے۔ ” بدقسمتی سے یہاں جو کچھ ہو رہا ہے اس سے معلوم ہوتا ہے کہ ان حملوں کا ایک بہت ہی منظم منصوبہ بنایا گیا ہے۔بی جے پی مسلسل امتیازی سلوک میں مصروف ہے جو مذہبی اور دیگر اقلیتوں کو نشانہ بنا رہی ہے جبکہ یہ بنیادی انسانی حقوق کی کھلم کھْلا خلاف ورزی ہے۔کانگریس پارٹی نے بی جے پی حکومت پر الزام لگایا ہے کہ وہ اس نسلی بحران کو حل کرنے کے بجائے خطے میں جنگ کے خطرات بڑھانے کی سازش کر رہی ہے

ٹیکساس: ڈاکٹر عافیہ کی بہن ڈاکٹر فوزیہ نے امریکی مسلمانوں سے اپنی بہن عافیہ کیلئے مالی قانونی اور اخلاقی مدد فراہم کرنے کی اپیل کی ہے۔ پلانو اسلامک سینٹر میں ڈاکٹرفوزیہ اور سینیٹرمشتاق احمد نے مسلم کمیونٹی سے خطاب کرتے ہوئے کہا کہ امریکا میں جیل حکام نے بہت تعاون کیا۔ڈاکٹر فوزیہ نے کہا کہ امریکی مسلمان اپنی بہن ڈاکٹرعافیہ کیلئے فنڈ اکٹھا کرنے میں مدد کریں۔اس موقع پر سینیٹر مشتاق احمد نے کہا کہ میں اپنی بہن ڈاکٹر عافیہ سے ملنے ذاتی حیثیت میں آیا ہوں، میں پاکستانی حکومت کی نمائندگی نہیں کررہا، امریکا میں مقیم مسلمان انسانی حقوق کیلئے اپنا بھرپور کردار ادا کریں۔اس کے علاوہ ڈاکٹر عافیہ صدیقی کیلئے ٹیکساس کی پلانو مسجد میں دعا بھی کرائی گئی

خرطوم : سوڈان کے دارالحکومت خرطوم میں فوج اور پیرا ملٹری فورسز کی جنگ میں درجنوں بچے بھوک اور پانی کی کمی سے جان کی بازی ہار چکے ہیں۔

برطانوی خبررساں ایجنسی کی رپورٹ میں انکشاف کیا گیا ہے کہ سوڈان میں 15 اپریل سے جاری فوج اور پیراملٹری فورسز کے درمیان جھڑپوں کے دوران دارالحکومت خرطوم کے ایک یتیم خانے میں 50 سے زائد بچے غذائی قلت کی وجہ سے ہلاک ہوگئے ۔

رپورٹ میں بتایا گیا ہے کہ جنگ شروع ہونے کے بعد سے خرطوم میں واقع میوگوما کے سرکاری یتیم خانے میں بچوں کی دیکھ بھال کے لیے درکار عملہ موجود نہیں چونکہ ہر تین گھنٹے بعد بچوں کو کھانا کھلانا ہوتا ہے توعملے کی غیر موجودگی نے صورتحال کو تشویش ناک بنا دیا ۔

جنگ شروع ہونے کے بعد سے خرطوم کے یتیم خانوں میں کام کرنے والا عملہ گھر رہنے یا پھر نقل مکانی پر مجبور ہوگیا۔

رپورٹ کے مطابق غذائی قلت کی وجہ سے ہونے والی زیادہ تر اموات نوزائیدہ بچوں کی ہیں، جن کی عمر ایک سال سے کم ہے اور شدید غذائی قلت اور پانی کی کمی کے باعث صرف جمعہ کے روز ہی 13 بچے جان سے ہاتھ دھو بیٹھے ۔

ریاست خرطوم میں سماجی ترقی کی وزارت کے ڈائریکٹر جنرل صدیق الفارینی نے کہا ہے کہ  اموات کی بڑی وجہ بنیادی طور پر عملے کی کمی اور لڑائی کی وجہ سے بجلی کی بار بار بندش تھی۔

دوسری جانب سوڈان کی فوج اور ریپڈ سپورٹ فورسز ( آر ایس ایف ) کی جانب سے جنگ بندی میں توسیع پر اتفاق کیا گیا ہے، اپریل کے وسط میں جنرل عبدالفتاح البرہان کی قیادت میں فوج اور آر ایس ایف کے رہنما جنرل محمد حمدان دگالو کے درمیان لڑائی شروع ہونے کے بعد سوڈان افراتفری کا شکار ہے۔

تنازعہ نے دارالحکومت اور دیگر شہری علاقوں کو جنگ کے میدانوں میں تبدیل کر دیا ہے جس کی وجہ سے تقریباً 1.4 ملین افراد سوڈان کے اندر اپنے گھر بار چھوڑ کر محفوظ علاقوں کی طرف یا پڑوسی ممالک میں جانے پر مجبور ہو گئے ہیں۔

سوڈان کی طبی تنظیموں کے مطابق لڑائی کے دوران کم از کم 866 شہری ہلاک اور ہزاروں زخمی ہوئے ہیں۔

واضح رہے 49 ملین کی آبادی والا سوڈان دنیا کے غریب ترین ممالک میں سے ایک ہے، اس ملک میں لڑائی نے قبل ہی صحت کی دیکھ بھال کی خدمات ناقص ہیں۔

اردن میں ولی عہد شہزادہ الحسین بن عبد اللہ الثانی کی سعودی خاتون انجینئر رجوۃ خالد السیف کے ساتھ شادی کے 2 روزہ جشن کا آغاز آج سے ہوگیا ہے۔

اردن کے سرکاری خبررساں ادارے کے مطابق شاہ عبداللہ الثانی اس موقع پر الہاشمی ایوان شاہی میں عشائیہ دیں گے جس میں چار ہزار سے زیادہ اردنی شہری شریک ہوں گے۔ عشایے کے دوران اردن کے گیت اور نظمیں پیش کی جائیں گی جن کے ذریعے ملک کے رنگا رنگ ثقافتی ورثے کا اظہار ہوگا۔

کل زہران محل میں نکاح کی رسم ادا ہوگی جس کے بعد شاہی جوڑے کا کارواں سرخ جلوس کے جلو میں الحسینیہ محل کا رخ کرے گا۔ اس موقع پر شاہی جوڑے کا کارواں دارالحکومت عمان کی متعدد سڑکوں سے گزرے گا۔ جنہیں قومی پرچموں سے آراستہ کر دیا گیا ہے۔

شادی کی خوشی میں ملکہ اردن رانیہ العبداللہ الحسینیہ محل میں استقبالیہ دیں گی جس کے بعد باقاعدہ عشایے کا اہتمام ہوگا۔

اردن کے شاہی جوڑے کی شادی کی تقریبات میں شرکت کے لیے مہمان عمان پہنچنے لگے ہیں جس میں برادر اور دوست ممالک کے سربراہ، ولی عہد اور ممتاز شخصیات شامل ہیں۔

واضح رہے کہ اس سے قبل ان کی شادی کی تقریبات کا آغاز گزشتہ دنوں مہندی کی تقریب سے ہوا تھا جس میں ملکہ رانیہ کی جانب سے پرتکلف عشائیہ دیا گیا تھا۔ اس تقریب میں شاہی اور دلہن کے خاندان کے افراد کے علاوہ اہم شخصیات نے شرکت کی تھی۔

مہندی کی تقریب اور عشایے میں اردنی اور سعودی روایتی گیت گائے گئے تھے جب کہ نامور گلوکاروں اور میوزیکل گروپ نے بھی پرفارم کیا تھا۔اس تقریب کے لیے ولی عہد کی ہونے والی دلہن رجوۃ خالد السیف نے مہنگے ترین سعودی برانڈ کا لباس زیب تن کیا تھا۔

کیلیفورنیا : امریکی جیلوں میں خواتین قیدیوں کے ساتھ جنسی زیادتی کے واقعات عام سی بات بن ہوگئی ہے جن میں جیل کے سینئر حکام بھی ملوث پائے گئے ہیں۔

تازہ ترین اطلاعات کے مطابق کیلیفورنیا میں خواتین کی سب سے بڑی جیل میں سابق افسر کو 13 خواتین قیدیوں کے ساتھ جنسی زیادتی کے الزام میں گرفتار کرکے مقدمہ درج کیا گیا ہے۔

55سالہ گریگوری روڈریگز نے سنٹرل جیل کیلیفورنیا میں سال 2010 سے 2022تک ملازمت کی۔ لاس اینجلس ٹائمز کی رپورٹ کے مطابق ملزم روڈریگز نے گزشتہ موسم گرما میں ملازمت سے اس وقت استعفیٰ دے دیا تھا جب محکمہ اصلاح کے تفتیش کاروں نے شکایات ملنے پر اس کیخلاف تحقیقات کا آغاز کیا۔

غیرملکی خبر رساں ادارے کی رپورٹ کے مطابق گریگوری روڈریگز پر تحقیقات کے دوران مجموعی طور پر 95 الزامات عائد کیے گئے ہیں، جن میں عصمت دری، بدفعلی، اختیارات کا ناجائز استعمال اور دیگر جرائم شامل ہیں، اس کے ساتھ ساتھ ایک الزام منشیات کی فراہمی سے متعلق بھی ہے۔

پراسیکیوٹرز نے عدالت کو بتایا ہے کہ مذکورہ جرائم اور جنسی زیادتیوں کے الزامات سال 2014 کے ہیں لیکن زیادہ تر الزمات گزشتہ دو سالوں میں عائد کیے گئے۔

میڈیا رپورٹ کے مطابق الزامات کی تحقیقات کے دوران پہلے سے موجود متاثرین کے علاوہ بعد میں مزید متاثرین بھی سامنے آئے۔

برازیل میں ہونے والے مقابلہ حسن میں شریک خاتون کے شوہر نے ملکہ حسن کا تاج توڑ دیا جس کی وجہ یہ تھی کہ اس کی اہلیہ کو فاتح قرار دینے کے بجائے دوسرا نمبر دیا گیا۔

غیر ملکی میڈیا کے مطابق برازیل میں ہونے والے مقابلہ حسن میں اس وقت صورتحال تشویشناک ہوگئی جب مقابلہ حسن کی فاتح ایمانیولی بیلینی کو تاج پہنایا جانے لگا تو مقابلے میں دوسرے نمبر پر آنے والی نتھالی بیکر کا شوہر غصے میں اسٹیج پر آیا اور تاج پہنانے والی خاتون کے ہاتھ سے تاج کھینچ کر زمین پر پھینک دیا۔

رپورٹ کے مطابق اس موقع پر مقابلے کے ججز کے فیصلے سے ناراض شوہر نے چیخ وپکار کر کے ہنگامہ آرائی کی اور اسی پر بس نہیں کیا بلکہ اپنی اہلیہ کو پکڑ کر اپنے ساتھ لے جاتے ہوئے اس نے ایک مرتبہ پھر تاج زور سے زمین پر مارا جس سے وہ ٹوٹ گیا۔

اس دوران مقابلہ جیتنے والی امیدوار سمیت تمام حاضرین ششدر رہ گئے۔ بعد ازاں مقابلے کی سکیورٹی ٹیم نے مداخلت کرتے ہوئے تاج توڑنے والے شخص کو اسٹیج کے پیچھے پکڑ لیا۔

اس حوالے سے مقابلہ حسن کی کو آرڈینیٹر ملونی ہینسیچ نے واقعے کی بھرپور مذمت کی اور کہا کہ مقابلہ حسن کی جج بیلینی کو فاتح قرار دینے کا فیصلہ درست تھا۔

ماں باپ کی جدائی کسی اندوہناک صدمے سے کم نہیں ہوتی اور کسی پیارے کی موت کے صدمے سے نکلنے کے لیے بہت ہمت اور وقت درکار ہوتا ہے، تاہم ایسے افراد بھی ہیں جو ہمت ہار بیٹھتے ہیں اور اس صدمے سے نکل نہیں پاتے۔

الجزائر کا ایک نوجوان بھی ماں کی جدائی کے غم میں ہمت ہار بیٹھا اور اس نے ماں کی قبر کے پاس ہی اپنا مسکن بنالیا۔

الجزائر سے تعلق رکھنے والے نوجوان نے ماں کی وفات کے بعد دنیا سے کٹ کر قبرستان میں ہی رہنا شروع کردیا جس کی ویڈیو سوشل میڈیا پر بھی زیرگردش ہے۔

رپورٹ میں بتایا گیا ہے کہ جنوبی الجزائر کے صوبے ادرار کا اسماعیل بیرابا نامی نوجوان والدہ کی وفات کے بعد 2 سال سے قبرستان میں رہ رہا ہے۔

اسماعیل کی والدہ 2 سال قبل وفات پاگئی تھیں، ماں سے جدائی کے غم میں مبتلا اسماعیل نے والدہ کی قبر پر ہی رہنے کا فیصلے کیا اور جب سے اب تک وہ والدہ کی قبر کے پاس ہی زندگی گزار رہا ہے۔

سعودی عرب نے سرمایہ کاروں کے لیے بڑا اعلان کر دیا ہے اور مملکت کے اکنامک زونز میں سرمایہ لگانے والوں کو مختلف ٹیکس رعایتیں دی جائیں گی۔

غیر ملکی میڈیا کے مطابق سعودی وزیر خزانہ محمد الجدعان نے سعودی عرب کے اکنامک زونز میں انویسٹمنٹ فورم کے اجلاس سے خطاب کرتے ہوئے سرمایہ کاروں کے لیے ٹیکس رعایتیں دینے کا اعلان کیا۔

محمد الجدعان نے کہا کہ سعودی عرب اکنامک زونز میں سرمایہ لگانے والوں کو 20 برس تک رعایتی ٹیکس سہولت دے گا تاکہ وہ طویل منصوبہ بندی کر سکیں۔

ان کا مزید کہنا تھا کہ آجروں کو سوشل انشورنس ٹیکس سے استثنٰی دیا جائے گا۔

اکنامک زون میں کام کرنے والی کمپنی اور مختلف اکنامک زونز میں موجود کمپنیوں کے درمیان کاروبار پر ویلیو ایڈڈ ٹیکس نہیں لیا جائے گا اس کے علاوہ مملکت کی جانب سے اعلٰی صلاحیت کے مالک افراد کو لانے کے لیے مختلف فیسوں سے استثنٰی دے گا۔

سعودی وزیر خزانہ نے کہا کہ سعودی عرب دنیا کا واحد ملک ہے جس کو ایک سال کے دوران درجہ بندی کرنے والی تین ایجنسیوں نے تین بہترین درجے دیے ہیں جس سے ظاہر ہوتا ہے کہ سعودی وژن 2030 جس کی شروعات 7 برس قبل ہوئی تھیں وہ ہمارا بہترین اقدام تھا اور ہم درست راستے پر گامزن ہیں۔