Category انٹرنیشنل

لندن: برطانیہ میں سبزیوں کی قیمتیں 40 سال کی بلند ترین سطح پر پہنچ گئیں، سال کے آغاز سے اب تک مختلف سبزیوں کی قیمتوں میں 30 سے 60 فیصد اضافہ ہوا ہے۔

برطانوی میڈیا کے مطابق برطانیہ میں پیاز، گاجر اور آلو سمیت مختلف سبزیوں کی قیمتیں 40 سال کی بلند ترین سطح پر پہنچ گئیں، سال کے آغاز سے اب تک سبزیوں کی قیمتوں میں مجموعی طور پر 70 فیصد اضافہ ہوا ہے۔

سال کے آغاز سے اب تک آلو کی قیمتوں میں 60 اور گاجر کی قیمتوں میں 37.5 فیصد اضافہ ہوا ہے۔

برطانوی میڈیا کا کہنا ہے کہ برطانیہ میں موسم کی خرابی کے باعث سپلائی چین متاثر ہوئی ہے، گزشتہ 12 ماہ کے دوران زیتون کے تیل کی قیمت میں 46.4 فیصد اضافہ ہوا جبکہ چینی کی قیمت 46.4 فیصد بڑھی۔

برطانوی ادارہ شماریات کے مطابق 12 ماہ کے دوران انڈوں کی قیمتوں میں 37 فیصد جبکہ آٹے کی قیمت میں 30 فیصد اضافہ ہوا۔

ریاض: سعودی عرب کے شہر مدینہ منورہ میں سرکاری اسپتالوں کی استعداد میں اضافہ کیا گیا ہے، یہ اضافہ رواں برس کے حج سیزن میں کیا گیا ہے تاکہ حجاج کرام کو زیادہ سے زیادہ سہولیات دی جاسکیں۔

سعودی وزارت صحت نے مدینہ منورہ کے سرکاری اسپتالوں کے بستروں کی تعداد میں 22 فیصد اضافہ کردیا ہے، ایمرجنسی وارڈ، انتہائی نگہداشت اور جنرل وارڈز میں اضافی بستر مہیا کیے گئے ہیں۔

بستروں کا اضافہ کنگ سلمان میڈیکل سٹی اور کنگ فہد اسپتال میں کیا گیا ہے، یہ اقدام حج کا موسم شروع ہونے اور حج زائرین کے مدینہ منورہ پہنچنے کے موقع پر کیا گیا ہے۔

مدینہ منورہ ہیلتھ کمپلیکس کی جانب سے جمعرات کو جاری بیان میں کہا گیا ہے کہ شاہ سلمان میڈیکل سٹی کے بڑے اسپتال کے ایمرجنسی وارڈز میں 35 فیصد کا اضافہ کیا گیا ہے جبکہ جنرل وارڈ کے بستروں میں 20 فیصد اور انتہائی نگہداشت کے شعبوں میں 35 فیصد کا اضافہ کیا گیا ہے۔

دوسری جانب مدینہ منورہ کے کنگ فہد اسپتال کے ایمرجنسی وارڈ میں 35 اور جنرل وارڈ میں 10 فیصد مزید بستر مہیا کیے گئے ہیں۔

یورپی ملک فن لینڈ میں ٹریفک خلاف ورزیوں پر جرمانے ملزمان کو ان کی سالانہ آمدنی کے حساب سے کیے جاتے ہیں، یہی وجہ ہے کہ ایک دولت مند ترین شخص کو معمولی اوور اسپیڈنگ پر پونے 4 کروڑ روپے کا جرمانہ بھرنا پڑ گیا۔

شمالی یورپی ملک فن لینڈ میں ایک گاڑی کے ڈرائیور پر تیز رفتار ڈرائیونگ کے جرم میں 1 لاکھ 21 ہزار یورو (3 کروڑ 66 لاکھ 85 ہزار پاکستانی روپے) جرمانہ عائد کر دیا گیا۔

ملزم آندرس وکلوف پچاس کلومیٹر کی حد رفتار والے زون میں 82 کلو میٹرکی رفتار سے گاڑی چلا رہا تھا۔

پولیس کا کہنا ہے کہ ملزم ایک امیر شہری ہے اور یہ پہلا موقع نہیں ہے کہ اسے بہت بھاری جرمانہ کیا گیا ہے۔

گزشتہ ایک دہائی کے دوران اسی ڈرائیور کو 3 مرتبہ اوور اسپیڈنگ کی وجہ سے بھاری جرمانہ کیا جا چکا ہے تاہم یہ پہلا موقع ہے کہ جرمانے کی رقم 1 لاکھ یورو کی حد بھی پار کر گئی۔

اسکینڈے نیویا کی جمہوریت اور یورپی یونین کے رکن ملک فن لینڈ میں ٹریفک قوانین کی خاص بات یہ ہے کہ وہاں مقررہ حد سے زیادہ رفتار سے ڈرائیونگ کرنے والے افراد کو جرمانہ ان کی سالانہ آمدنی کے مطابق کیا جاتا ہے۔

پولیس نے بھاری جرمانے کے علاوہ 10 روز کے لیے ملزم کا ڈرائیونگ لائسنس بھی معطل کر دیا ہے۔

آندرس وکلوف ایک ایسی ہولڈنگ کمپنی کا سربراہ ہے، جو مال برداری، ہیلی کاپٹر سروسز، پراپرٹی کی خرید و فروخت، تجارت اور سیاحت سمیت کئی شعبوں میں متعدد کاروباری اداروں کی مالک ہے۔

اس کے بارے میں یہ بھی مشہور ہے کہ وہ جزائر آلینڈ کا امیر ترین باشندہ ہے۔

ایک مقامی اخبار کی رپورٹ کے مطابق آندرس وِکلوف کو اس سے قبل سنہ 2018 میں 63 ہزار 680 یورو (1 کروڑ 93 لاکھ پاکستانی روپے) کا جرمانہ کیا جاچکا ہے، جبکہ سنہ 2015 میں 95 ہزار یورو (2 کروڑ 88 لاکھ پاکستانی روپے) جرمانہ کیا جاچکا ہے۔

واشنگٹن: امریکا کی پہلی مسلمان پاکستانی خاتون پولیس افسر فرحت میر امریکی کمیونٹی کیلئے روشن مثال بن گئی۔

امریکا کی پہلی مسلمان خاتون پولیس افسر فرحت پاکستان میں ایبٹ آباد کے علاقے ملکوٹ سے تعلق رکھتی ہیں، فرحت آٹھ سال سے لاس ویگاس پولیس میں کاؤنٹر ٹیررازم آفیسر کی ذمہ داریاں سنبھال رہی ہیں۔

فرحت میر کو لاس ویگاس پولیس ٹریننگ اکیڈمی میں اعلیٰ کارکردگی پر گولڈ میڈل بھی دیا گیا تھا۔

امر یکی میڈیا نے بھی فرحت میر کی کمیونٹی کے تحفظ کیلئے خدمات پر انہیں خراج تحسین پیش کیا، کہا کہ وہ عبادت گاہوں کو دہشت گرد حملے سے بچانے کیلئے متحرک ہیں۔

فرحت میر کا کہنا تھاکہ عبادت گاہوں کے تحفظ کیلئے کمیونٹی سے مسلسل رابطہ رہتا ہے، عبادت گاہیں ہر ایک کیلئے کھلی رہتی ہیں۔

فرحت کا کہنا ہے کہ عبادت گاہیں دہشتگرد حملے کا آسان ہدف ہوتی ہیں اس لیے کمیونٹی کے ساتھ مل کر تحفظ کیلئے اقدامات کیے جاتے ہیں۔

انہوں نے  پیغام دیا کہ امریکا میں آباد پاکستانیوں کو پولیس اور سیاست سمیت ہر میدان میں آگے آنا چاہیے۔

 انہوں نے اسلامو فوبیا کے خاتمے اور امریکی معاشرے میں مسلمانوں کے مثبت اور تعمیر ی کردار کو اجاگر کیا۔

رپورٹ کے مطابق فرحت میر چار زبانیں پڑھ اور تین روانی سے بول سکتی ہیں، وہ مسز نیواڈا کے مقابلے میں حصہ لے رہی ہیں۔

مسلمز آف امریکا کے سربراہ اور ریپبلکنز رہنما ساجد تارڑ نے فرحت میر کو کمیونٹی رپورٹ میں بتایا گیا کہ  پاکستان میں ایبٹ آباد کے علاقے ملکوٹ سے تعلق رکھنے والی فرحت میر نائن الیون حملے کے دو سال بعد امریکا منتقل ہوئیں۔

ریاض: سعودی عرب نے سرمایہ کاروں کے لیے مخصوص ویزے کا اجرا کیا ہے، یہ ویزا فی الحال چند مخصوص ممالک کے سرمایہ کاروں کو جاری کیا جاسکے گا۔

ایمرا نیوز کے مطابق سعودی وزارت خارجہ نے وزارت سرمایہ کاری کے تعاون سے نیا ویزا متعارف کروایا ہے جسے مستشمر زائر (انویسٹر وزیٹر) کا نام دیا گیا ہے، یہ بزنس ویزا ہوگا جسے آن لائن جاری کروایا جاسکے گا۔

بزنس ویزے کے اجرا کا مقصد سرمایہ کاروں کو سعودی عرب میں سرمایہ کاری کے امکانات سے واقفیت کا موقع فراہم کرنا ہے۔

انویسٹر وزیٹر ویزا سعودی دفتر خارجہ کے نیشنل ویزا پورٹل کے ذریعے جاری کروایا جا سکے گا۔

جو سرمایہ کار بزنس ویزا حاصل کرنا چاہتے ہوں انہیں دفتر خارجہ کے مشترکہ نیشنل ویزا پورٹل پر درخواست دینا ہوگی۔

اگلے مرحلے میں درخواست پر کارروائی ہوگی اور فوری طور پر ویزہ جاری کر دیا جائے گا، انویسٹر کو بزنس ویزا ای میل پر موصول ہوگا۔ پہلے مرحلے میں اس کا دائرہ محدود ہوگا اور مخصوص ممالک کے انویسٹرز ہی یہ سہولت حاصل کر سکیں گے۔

دوسرے مرحلے میں بزنس ویزا دیگر ممالک کے انویسٹرز کے لیے بھی جاری کیا جائے گا، اس کا مقصد سعودی وژن 2030 کے اہداف کی تکمیل میں آسانی پیدا کرنا ہے۔

وژن 2030 کے تحت سعودی عرب پرکشش سرمایہ کار طاقت بننا چاہتا ہے۔

سابق امریکی صدر ڈونلڈ ٹرمپ پر فرد جرم عائد کر دی گئی.سابق امریکی صدر ڈونلڈ ٹرمپ پر خفیہ دستاویزات کیس میں فرد جرم عائد کی گئی ہے۔ ڈونلڈ ٹرمپ کو منگل کو میامی کی وفاقی عدالت میں طلب کر لیا گیا ہے۔ سابق امریکی صدر ڈونلڈ ٹرمپ پر خفیہ دستاویزات کیس میں فرد جرم عائد کی گئی ہے۔ ڈونلڈ ٹرمپ کو منگل کو میامی کی وفاقی عدالت میں طلب کر لیا گیا ہے۔ واضح رہے کہ فلوریڈا میں ٹرمپ کی اسٹیٹ پر چھاپہ مار کر 13 ہزار دستاویزات کو قبضے میں لیا گیا تھا

بیجنگ:چین، 13 سالہ بچی نے ویڈیو گیمز پر 63000 ڈالر خرچ کردیئے۔ میڈیا رپورٹ کے مطابق چین کے صوبے ہینان میں 13 سالہ بچی کے والدین کو احساس ہوا کہ بینک میں جمع ان کی برسوں کی پونجی بالکل ختم ہوچکی ہے اور اکاؤنٹ میں صرف ایک نصف چینی یوا ن بچا ہے۔ معلوم ہوا کہ ساری رقم ان کی بیٹی نے خرچ کردی ہے جو 63000 ڈالر کے لگ بھگ ہے۔ویڈیو گیمنگ کی جنونی بیٹی نے والدین کے کریڈٹ کارڈ سے نہ صرف ویڈیو گیم خریدے بلکہ گیم کے اندر مجازی اشیا بھی دھڑادھڑ خریدی اور بینک اکاؤنٹ بالکل خالی کردیا۔ صرف چار ماہ میں ہی بچی نے تمام رقم خرچ کرڈالی بلکہ اس کے ا ٓثار مٹانے کے لیے فون کی ہسٹری اور بینکنگ کے ٹیکسٹ پیغامات بھی مٹاتی رہی۔ اس طرح لڑکی نے ایک کروڑ 80 لاکھ روپے خرچ کئے ہیں۔چار ماہ تک والدین اس عمل سے ناواقف رہے اوراسکول کی استانی نے اس کا انکشاف کیا۔ اسکول ٹیچر نے نوٹ کیا کہ بچی غیرمعمولی طور پر ویڈیو گیم پر وقت صرف کررہی ہے۔ اس کی خبر والدین کو دی گئی کہ کچھ گڑبڑ ہے۔ معلوم ہوا کہ بچی نے اپنی ہم جماعتوں کے لیے بھی لاکھوں روپے کے گیمز خریدے اور والدین کی رقم برباد کردی۔والدین نے اعتراف کیا کہ کریڈٹ کارڈ کا پاس ورڈ دینا اس کی غلطی تھی۔ ان کی بیٹی نے اعتراف کیا ہے کہ اسے گیم کھیلنے کا بہت شوق تھا اور وہ اپنے ناراض ساتھیوں کو خوش کرنے کے لیے بھی ویڈیوگیمز خریدتی رہی تھیں۔

بھارت میں قتل کی واردات کے بعد لاش کو بدترین طریقے سے ٹکڑے کرنے کا ایک اور واقعہ سامنے آیا ہے۔

بھارتی میڈیا کے مطابق مہاراشٹر کے شہر میرا بھائیندر کے ضلع نیا نگر کی عمارت کی ساتویں منزل پر واقع ایک فلیٹ میں ایک 36 سالہ خاتون کی ٹکڑوں  میں لاش ملی ہے۔

پولیس کا کہنا ہے کہ 36 سالہ سرسوتی ویدیا 56 سالہ منوج سہانی پچھلے تین سالوں سے بنا شادی کے ایک ساتھ فلیٹ میں مقیم تھے۔

رپورٹس کے مطابق عمارت میں رہنے والے دیگر افراد نے فلیٹ سے آنے والی بدبو کے بعد واردات سے متعلق پولیس کو اطلاع دی تھی۔

پولیس کا کہنا ہے کہ جب ٹیم موقع پر پہنچی تو وہاں خاتون سرسوتی ویدیا کی سڑی ہوئی لاش ملی جسے کئی ٹکڑوں میں کاٹا گیا تھا۔

پولیس کا کہنا ہے کہ دو مشتبہ افراد کو حراست میں لے لیا گیا ہے اور ان سے پوچھ گچھ کی جا رہی ہے۔

پولیس کا کہنا ہے کہ اس واقعے کی مزید تفتیش کی جارہی ہے کہ ملزم نے کیوں خاتون کو اتنی بےدردی سے قتل کیا۔

واشنگٹن: کینیڈا کے جنگلوں میں لگنے والی آگ کے بعد دھوئیں کے بادل امریکی شہر نیویارک کی فضاء تک پھیل گئے جس کے نتیجے میں شہر کی فضا نارنجی رنگ میں بدل گیا۔

غیر ملکی میڈیا رپورٹ کے مطابق موسمیاتی تغیرات کی وجہ سے کینیڈا کے جنگلات میں لگی خوفناک آتشزدگی بے قابو ہوگئی جس سے امریکا کی فضا بھی آلودہ ہوگئی، کینیڈا کے صوبے کیوبیک کے جنگلات میں لگی آگ بے قابو ہوگئی جس سے تقریباً 30 لاکھ ہیکٹر سے زائد ہیکٹر کا علاقہ جل کر خاکستر ہوگیا۔

رپورٹ کے مطابق کیوبیک کے جنگلات میں چار سو مقامات پر آگ لگی ہوئی ہے جبکہ ڈھائی سو مقامات پر آگ قابو سے باہر ہے، آگ سے اوٹاوا اور کینیڈا کے سب سے بڑے شہر ٹورنٹو میں ہوا کا معیار شدید متاثر ہوا ہے جبکہ کینیڈا کے جنگلات میں آتشزدگی کی وجہ سے امریکا میں فضا آلودہ ہو گئی۔

رپورٹ میں بتایا گیا کہ آگ بھڑکنے سے دھوئیں کے بادل کئی امریکی ریاستوں تک پہنچ گئے، لوگوں کے لیے سانس لینا مشکل ہو گیا جس کے باعث مختلف شہروں میں انتباہ جاری کر دیا گیا۔

آگ کے بعد دھوئیں کے بادل نے امریکی شہر نیویارک کی فضاء کو بہت زیادہ متاثرکررہا ہے جس کے نتیجے میں شہر کی فضا کو نارنجی رنگ میں بدل دیا۔

رپورٹ میں بتایا گیا کہ فضائی آلودگی کی وجہ سے 10 کروڑ امریکی متاثر ہو ئے ہیں شہر میں گالف کورسز، پارکس اور چڑیا گھر کو بند کر دیا گیا۔

اس کے علاوہ نیویارک میں ہوا کا معیار ریکارڈ بد ترین سطح پر آگیا، نیویارک کے گورنر نے شہریوں کو بلا ضرورت گھر سے باہر نہ نکلنے اور ماسک پہنے کی ہدایات کی ہے۔

حیدرآباد: بھارت میں ملاوٹ شدہ کیک کی تیاری کا پردہ فاش ہوگیا بیکری میں گندگی کی ویڈیو منظر عام پر  آگئی۔

بھارتی میڈیا کے مطابق بھارت کی ریاست تلنگانہ کا دارالحکومت اور صوبے کے سب سے بڑا شہر حیدرآباد میں ٹاسک فورس پولیس نے اطلاع ملنے پر بالاجی بیکری پر چھاپہ مارا۔

ٹاسک فورس  پولیس نے بتایا کہ انہیں اطلاع دی گئی تھی کہ یہ بیکری بغیر اجازت کے چلائی جارہی ہے اور یہاں ملاوٹ شدہ کیمیکل سے کیک بنا کر فروخت کیے جارہے ہیں۔

ٹاسک فورس کا کہنا ہے کہ یہاں صاف صفائی کے بھی مناسب انتظامات نہیں کیے گئے تھے، فورس نے چھاپہ مارنے کے بعد معاملے کا مقدمہ بھی درج کر لیا۔

حیدرآباد کے شہریوں نے متعلقہ حکام اور پولیس سے مطالبہ ہے کہ عوام کی جان و مال سے کھلواڑ کرنے والوں کے خلاف مہم چلاتے ہوئے ان کے خلاف سخت سے سخت کاروائی کی جائے۔