Category انٹرنیشنل

ریاض: سعودی عرب میں حج کرنے کے لیے آنے والے عراقی شہری کی اچانک طبیعت خراب ہوگئی جس کے بعد سعودی ڈاکٹرز نے ان کا علاج کر کے ان کی جان بچائی۔

سعودی عرب میں مکہ مکرمہ کے کنگ عبداللہ میڈیکل سٹی کے ڈاکٹروں نے ایک معمرعراقی عازم حج کی زندگی بچا لی، عازم حج کو دل کا شدید عارضہ لاحق ہو گیا تھا۔

کنگ عبداللہ میڈیکل سٹی کے ترجمان حاتم المسعودی کا کہنا ہے کہ عراقی عازم حج کو النور اسپیشلسٹ اسپتال سے لایا گیا تھا، ہاٹ لائن کے ذریعے فوری رابطہ کر کے علاج شروع کیا گیا۔

حاتم المسعودی نے کہا کہ عراقی عازم حج کو ایمرجنسی وارڈ سے براہ راست کیتھیٹرائزیشن روم پہنچا کر کیتھیٹرائزیشن کی گئی جس سے پتہ چلا کہ کورونری شریانوں میں سے ایک 95 فیصد تک بلاک ہے۔

ڈاکٹڑز نے کیتھیٹرائزیشن کر کے شریان کو کھول دیا اور سٹنٹ ڈالے، عراقی عازم حج کو دو روز تک انتہائی نگہداشت کے شعبے میں رکھ کر اسپتال سے فارغ کر دیا گیا۔

ترجمان کا کہنا تھا کہ عراقی عازم حج کی صحت اب تسلی بخش ہے اور وہ اطمینان سے حج کے مناسک کی ادائیگی کر سکیں گے۔

عراقی عازم حج نے سعودی صحت عملے اور مکہ کے اسپتالوں کے انتظامات پر صحت عملے کا شکریہ ادا کیا، انہوں نے کہا کہ اگر بر وقت علاج میسر نہ آتا تو فریضہ حج کی ادائیگی سے محروم ہو سکتا تھا۔

ٹیکساس: امریکا میں لاکھوں مچھلیاں پانی میں دم گھٹنے سے مر گئیں، حکام کا کہنا ہے کہ مچھلیاں شدید گرمی برداشت نہیں کر سکیں۔

میڈیا رپورٹس کے مطابق امریکی ریاست ٹیکساس میں کوئنٹانا بیچ پر لاکھوں کی تعداد میں مردہ مچھلیاں بہہ کر ساحل پر آ گئی ہیں، شدید گرمی میں مچھلیوں کا دم پانی میں گھٹنے لگا ہے۔حکام کے مطابق یہ مچھلیاں درجہ حرارت میں اضافے کے باعث پانی میں دم گھٹنے سے مریں، ٹیکساس میں محکمہ جنگلی حیات کے اہلکار کا کہنا ہے کہ گرم پانی میں آکسیجن کی کمی ہے۔گرم پانی میں آکسیجن کی کمی کی وجہ سے مچھلیوں کو سانس لینا مشکل ہو جاتا ہے اور وہ مر جاتی ہیں، اس عمل کی وجہ سے مرنے والی زیادہ تر مچھلیاں مینہیڈن نسل کی ہوتی ہیں، مردہ مچھلیوں کی ویڈیوز بھی سوشل میڈیا پر وائرل ہو رہی ہیں۔

حکام کا کہنا ہے کہ گرمیوں میں مچھلیوں کا اس طرح مرنا ایک عام واقعہ ہے، ساحل کے قریب کا پانی سمندر میں گہرے پانی سے زیادہ تیزی سے گرم ہوتا ہے، اکثر ایسا ہوتا ہے کہ مچھلیاں ساحل کے قریب پانی میں پھنس جاتی ہیں اور واپس نہیں جا پاتیں۔ مچھلیاں مرنے سے پہلے پانی سے نکل کر آکسیجن لینے کی کوشش کرتی ہیں، جب کہ کچھ سردی کے لیے دامنِ کوہ کی طرف جاتی ہیں۔

ٹیکساس کے ساحل پر جمعہ سے مردہ مچھلیوں کا آنا جاری ہے، تاہم انتظامیہ نے کہا ہے کہ وہ انھیں ہٹا کر ساحل سمندر کی صفائی کر رہے ہیں

ریاض: سعودی عرب میں مسجد الحرام میں باب ملک عبد العزیز کے میناروں میں 2 نئے ہلال نصب کر دیے گئے ہیں، یہ کام وزارت خزانہ کے ماتحت ادارہ تعمیرات کے تعاون سے کیا گیا ہے۔

سعودی عرب میں حرمین شریفین انتظامیہ کے سربراہ اعلیٰ شیخ ڈاکٹر عبدالرحمٰن السدیس کا کہنا ہے کہ مسجد الحرام میں باب ملک عبد العزیز کے میناروں میں 2 نئے ہلال نصب کر دیے گئے۔

حرمین شریفین انتظامیہ کی ویب سائٹ کے مطابق ڈاکٹر عبدالرحمٰن السدیس نے بتایا کہ یہ کام وزارت خزانہ کے ماتحت ادارہ تعمیرات کے تعاون سے کیا گیا ہے۔

انہوں نے کہا کہ حرمین شریفین انتظامیہ کی ہمیشہ یہ کوشش رہتی ہے کہ اسلامی فن تعمیر خصوصاً مسجد الحرام کی تعمیراتی خصوصیات کو اجاگر کیا جائے۔

سیکریٹری سربراہ انتظامیہ انجینیئر محمد الوقدانی کا کہنا تھا کہ باب ملک عبد العزیز کے میناروں میں ہلال نصب کرنے کا کام مکمل ہوچکا ہے۔ دونوں میناروں میں نصب کیے جانے والے ہلال عموما اسلامی فن تعمیر اور خصوصاً مسجد الحرام کی قابل دید علامت ہیں۔

انہوں نے کہا کہ ہلال میناروں کے اوپر نصب ہیں، دونوں میناروں کی لمبائی 130 میٹر سے زیادہ ہے۔

میناروں کے دونوں ہلال کی اونچائی تقریباً 9 میٹر ہے، ہر ہلال سٹینڈ 2 میٹر کا ہے جو کاربن فائبر سے تیار کیا گیا ہے۔

اس میں جھٹکا برداشت کرنے کی صلاحیت بہت زیادہ ہوتی ہے، اسے سنہرے گلاس سے مزین کیا گیا ہے جبکہ اندرونی ڈھانچے میں فولاد استعمال ہوا ہے۔

سیکریٹری سربراہ انتظامیہ کا کہنا ہے کہ میناروں کے اوپر ہلال کی تنصیب کے پروگرام کی باقاعدہ منظوری لی گئی تھی۔

بھارت کی ریاست اتر پردیش میں نامعلوم ملزمان نے 4 سالہ بچے کو اغوا کر کے اس کی آنکھیں نکال لیں اور اسے زندہ جلا دیا۔

مقامی میڈیا کی رپورٹس کے مطابق اتوار کی شام 4 سالہ بچہ گھر باہر سے اغوا کیا گیا۔ والدین نے اسے ہر جگہ تلاش کیا لیکن کوئی سراغ نہ ملا۔ بلآخر پولیس میں شکایت درج کروائی گئی۔

پولیس نے پیر کی صبح کمسن بچے کی لاش گاؤں کے قریب نالے سے برآمد کرلی۔ اس کا جسم مکمل طور پر جلا ہوا تھا جبکہ آنکھیں غائب تھیں۔

بچے کے لرزہ خیز قتل سے علاقہ مکینوں میں خوف و ہراس پھیل گیا۔ والدین نے ملزمان کے خلاف سخت کارروائی کا مطالبہ کرتے ہوئے خدشہ ظاہر کیا کہ ان کے بیٹے کو توہم پرستی کے باعث قربان کیا گیا۔

پولیس نے مقدمہ درج کر کے واقعے کی تحقیقات شروع کر دیں۔ ایک پولیس آفیسر نے بتایا کہ لاش کو پوسٹ مارٹم کیلیے اسپتال منتقل کر دیا گیا۔

بھارت میں اس نوعیت کے واقعات پیش آنا معمول بن چکا ہے۔

دو روز قبل ریاست تلنگنہ میں نامعلوم ملزمان نے 19 سالہ نرسنگ کی طالبہ کو اغوا کرنے کے بعد اسے قتل کیا تھا۔ ملزمان نے شیریشا کے ہاتھ اور پاؤں کی رگوں کو کاٹا جبکہ اس کی آنکھیں بھی باہر نکال لی تھیں۔

بھارت میں بیوی نے سیلفی لینے کے بہانے شوہر کو مبینہ طور پر درخت سے باندھ کر جلا دیا۔

بھارتی میڈیا رپورٹس کے مطابق ریاست بہار کے علاقے مظفر پور میں خاتون نے مبینہ طور پر سیلفی لینے کے بہانے شوہر کو درخت سے باندھ کر مٹی کا تیل چھڑک کر آگ لگادی۔

پولیس نے ملزمہ کو گرفتار کرکے واقعے کی تحقیقات شروع کردی ہیں۔

رپورٹ کے مطابق ملزمہ نے شوہر کو درخت سے باندھتے ہوئے کہا کہ وہ سیلفی لینا چاہتی ہے اور پھر اس پر مٹی کا تیل چھڑک کر آگ لگادی۔

علاقہ مکینوں نے درخت سے بلند شعلوں کو دیکھا اور متاثرہ شخص کی جان بچائی، گاؤں والوں نے خاتون کو پکڑ کر مقامی پولیس کو واقعے کی اطلاع دی۔

پولیس کا کہنا ہے کہ متاثرہ شخص کا بیان میں کہنا ہے کہ بیوی نے سیلفی لینے کے بہانے اسے باندھا اور مٹی کا تیل ڈال کر آگ لگائی جبکہ گاؤں والوں نے اس کی جان بچائی۔

پولیس کا بتانا ہے کہ متاثرہ شخص کو طبی امداد کے لیے اسپتال منتقل کردیا گیا ہے جہاں اس کی حالت خطرے سے باہر بتائی گئی ہے۔

روس کے سب سے طاقتور بینکار کا کہنا ہے کہ امریکی ڈالر کی اجارہ داری کا عنقریب خاتمہ ہونے والا ہے کیونکہ چینی کرنسی کی قیمت میں اضافہ ہورہا ہے اور یوکرین جنگ میں مغربی ممالک کی جانب سے روس کو پسپا کروانے کی ناکام کوشش بھی سب کے سامنے ہے۔

غیرملکی خبر رساں ادارے روئٹرز کی رپورٹ کے مطابق روس کے دوسرے سب سے بڑے بینک وی ٹی بی کے سی ای او آندرے کوسٹن نے کہا ہے کہ یہ بحران عالمی معیشت میں بڑی تبدیلیوں کا آغاز ہے اور چین ایک بڑی عالمی اقتصادی طاقت کے طور پر نمودار ہورہا ہے۔

آندرے کوسٹن ماسکو کے سب سے طاقتور اور تجربہ کار بینکروں میں سے ایک ہیں، ماضی میں انہوں نے سفارت کار کی حیثیت سے آسٹریلیا اور برطانیہ میں خدمات انجام دیں اور سوویت یونین کے ٹوٹنے کے فوری بعد شعبہ بینکنگ میں چلے گئے، وہ اس سے پہلے ونیشاکم بینک کے سربراہ بھی رہ چکے ہیں، جو اب وی ای بی کے نام سے جانا جاتا ہے۔

دنیا میں سرد جنگ کے حوالے سے کیے گئے ایک سوال کے جواب میں کوسٹن نے کہا کہ اب یہ ایک گرم جنگ ہے جو سرد جنگ سے زیادہ خطرناک ثابت ہوسکتی ہے۔

انہوں نے کہا کہ امریکہ اور یورپی یونین سینکڑوں بلین ڈالر کے روسی اثاثوں کو منجمد کرنے کے اقدام سے کافی نقصان اٹھائیں گے کیونکہ بہت سے ممالک امریکی کرنسی اور یورو کے بجائے دیگر کرنسیوں میں ادائیگیاں کرنے کو ترجیح دے رہے ہیں۔

وی ٹی بی کے 66سالہ سی ای او آندرے کوسٹن نے بینک کی فلک بوس عمارت کی 59ویں منزل پر اپنے دفتر سے ماسکو کا نظارہ کرتے ہوئے روئٹر کو بتایا کہ امریکی ڈالر کی اجارہ داری کا طویل اور تاریخی دور بہت جلد ختم ہو رہا ہے، میرے خیال میں وہ وقت آگیا ہے جب چین آہستہ آہستہ کرنسی کی پابندیوں کو ہٹا دے گا۔

انہوں نے کہا کہ امریکی ڈالر 20ویں صدی کے آغاز سے ہی دنیا پر غالب رہا جب اس نے عالمی ریزرو کرنسی کے طور پر پاؤنڈ اسٹرلنگ کو پیچھے چھوڑ دیا تھا حالانکہ جے پی مورگن نے اس ماہ کہا تھا کہ عالمی معیشت میں ڈالر کی کمی کے آثار سامنے آرہے ہیں۔ گزشتہ 40 سال کے دوران چین کی شاندار معاشی ترقی اور یوکرین جنگ کے اثرات نے امریکی ڈالر کی حیثیت کو مزید پیچیدگیوں میں مبتلا کردیا ہے۔

گزشتہ سال فروری 2022میں صدر ولادیمیر پیوٹن کی جانب سے یوکرین میں فوج بھیجنے کے بعد مغربی ممالک نے روسی معیشت کو کمزور کرنے اور پیوٹن کو جنگ کی سزا دینے کی کوشش میں لگائی جانے والی سخت ترین پابندیاں عائد کیں۔

انہوں نے کہا کہ پابندیاں غیر منصفانہ ہیں اور ایک سیاسی فیصلہ ہے جو مغرب الٹا اسے ہی نقصان پہنچائے گا، انہوں نے طنزیہ انداز میں بتایا کہ انہوں نے بڑے مغربی بینکوں کے ذریعے منشیات کی رقم کی لانڈرنگ کے بارے میں دلچسپ مضامین پڑھے ہیں۔

کوسٹن نے واضح الفاظ میں کہا کہ وی ٹی بی کو سال کے پہلے پانچ ماہ کے بمپر اور پچھلے سال ریکارڈ نقصان کے بعد 2023 میں 400 بلین روبل ($4.9 بلین) کا منافع حاصل ہوگا۔

انہوں نے کہا کہ روس کی معیشت مغرب سے نہیں ٹوٹے گی کیونکہ بین الاقوامی مالیاتی فنڈ (آئی ایم ایف) نے اپریل میں اپنی 2023 روسی جی ڈی پی کی پیشگوئی کو 0.3 فیصد سے بڑھا کر 0.7 فیصد کردیا۔ اپنی 2024کی پیشگوئی کو 2.1 فیصد سے کم کرکے 1.3 فیصد کر دیا۔

اس سوال پر کہ کیا روس کی معیشت آزاد معیشت رہے گی؟ جواب میں کوسٹن نے کہا کہ مجھے اس کی قوی امید ہے۔

ریاض: سعودی عرب میں موسمیات کے ماہر کا کہنا ہے کہ بحیرہ عرب میں بننے والے طوفان بپر جوائے سے سعودی عرب کے ساحلی علاقوں کو کوئی خطرہ نہیں، سعودی عرب میں موسمی صورتحال مستحکم ہے۔

سعودی عرب میں قومی مرکز برائے موسمیات کے ماہرعقیل العقیل کا کہنا ہے کہ بحیرہ عرب میں بننے والے طوفان بپر جوائے سے سعودی عرب کے ساحلی علاقوں کو کوئی خطرہ نہیں۔

سعودی ٹی وی الاخباریہ سے گفتگو کرتے ہوئے انہوں نے کہا کہ سعودی عرب میں موسمی صورتحال مستحکم ہے۔

اگر سمندری طوفان بپر جوائے خشکی کی سمت بڑھتا ہے تو اس صورت میں ہوا کا دباؤ جو بلندی پر ہوتا ہے وہ اس کا زور ختم کر دے گا۔

قومی مرکز برائے موسمیات کے ماہر کا کہنا تھا کہ طوفان کا رخ خشکی کی سمت ہونے کی صورت میں بارش کا امکان بڑھ سکتا ہے۔

بھارتی ریاست منی پور میں عیسائیوں کے خلاف جھڑپیں شدت اختیار کر گئی ہیں۔

تفصیلات کے مطابق منی پور میں عیسائی مخالف پرتشدد واقعات میں مبینہ طور پر 92 افراد ہلاک، 302 زخمی اور تقریباً 30,000 افراد بے گھر ہوچکے ہیں، بھارتی ریاست کی صورت حال بدستور کشیدہ اور غیر مستحکم ہے۔

مسیحی قبیلے کوکی (Kuki ) کا کہنا ہے کہ میٹی (Meitei) برادری کو ’شیڈیولڈ ٹرائب‘ کا درجہ دینا (آئین کے ذریعے اقلیتی قبیلہ قرار دیا جانا) ان کے حقوق کی خلاف ورزی ہے، ان کا کہنا ہے کہ یہ آئینی درجہ اقلیتوں کو دیا جاتا ہے جب کہ میٹی کمیونٹی اکثریت میں ہے۔

مودی انتظامیہ کے اس اقدام کے بعد بدامنی نے میٹیوں کے ساتھ جھڑپوں کو جنم دے دیا ہے، جس کے نتیجے میں گاڑیوں اور املاک کو بڑے پیمانے پر نقصان پہنچ رہا ہے، مودی سرکار نے پرتشدد جھڑپوں کے لیے قانون نافذ کرنے والے اداروں کے لیے خصوصی اختیارات طلب کیے اور فوج تعینات کر دی ہے۔

قانون نافذ کرنے والے ادارے صورت حال اور میٹی کے زیر اثر علاقے امپھال میں جھڑپوں پر قابو پانے میں ناکام رہے ہیں، اور اس علاقے میں کوکیوں کو ختم کیا جا رہا ہے، کوکی برادری کے لوگوں کا کہنا ہے کہ ریاستی پولیس کے ساتھ مل کر پرتشدد ہجوم نے ان کے خلاف ٹارگٹڈ حملے کیے۔

رپورٹس کے مطابق ریاست میں وزیر اعلیٰ کی موجودگی میں بھی غریب عیسائیوں پر تشدد کا سلسلہ جاری ہے، جہاں خوراک کی کمی ہے، فوج اور نیم فوجی دستوں کی طرف سے کرفیو کا نفاذ اب بھی جاری ہے، انٹرنیٹ معطل، دکانیں، اسکول اور دفاتر بند ہیں، ہزاروں لوگ پرہجوم اور غیر محفوظ پناہ گزین کیمپوں میں پھنسے ہوئے ہیں۔

کوکی محسوس کر رہے ہیں کہ ’’علیحدگی ہی واحد حل ہے‘‘ اور وہ مسیحی لوگوں کی ریاستی سرپرستی میں خاتمے سے خوف زدہ ہیں، جب کہ مودی سرکار کا عیسائیوں کے خلاف جاری مہم کو قبائلی تصادم سے تعبیر کیا جا رہا ہے۔

منی پور سے عیسائیوں کو ختم کرنا ایک عیسائی مخالف اقدام ہے، جس کی وجہ سے مودی سرکار کی ان پرتشدد کارروائیوں سے یہ جھڑپیں بڑے پیمانے پر بغاوت میں تبدیل ہو رہی ہیں۔

تیونس: شمالی افریقی ملک تیونس کے قریب سمندر میں تارکین وطن کی 3 کشتیاں ڈوب گئیں جس کے نتیجے میں پانچ افراد ہلاک جبکہ متعدد لاپتہ ہوگئے۔

تیونس کے ایک کوسٹ گارڈ کا کہنا ہے کہ امدادی ٹیم کو جن 5 افراد کی لاشیں ملی ہیں ان میں ایک بچہ بھی شامل ہے، لاپتہ ہوجانے والوں کو ڈھونڈنے کی کوشش کی جا رہی ہے۔

ان کا کہنا تھا کہ کشتیاں ڈوبنے کے واقعات ایسفیکس شہر کے قریب پیش آئے۔

ایسفیکس کے پراسیکیوٹر فازی مسودی کا کہنا ہے کہ افریقہ سے اٹلی کی طرف جانے والی تینوں کشتیوں میں گنجائش سے زیادہ لوگ سوار تھے۔

انہوں نے کہا کہ ڈوبنے والی کشتیوں کے ٹکڑے بھی امدادی ٹیموں کو ملے ہیں، امدادی کارکنوں نے 73 افراد کو بچا لیا ہے جبکہ 47 کے قریب افراد ابھی تک لاپتہ ہیں۔

پراسیکیوٹر نے مزید کہا کہ لاپتہ ہونے والے افراد میں 6 بچے بھی شامل ہیں، انہوں نے کہا کہ کشتیاں زیادہ تر لوہے کی بنی ہوئی تھیں۔

ریاض: سعودی حکام نے ملک بھر میں سی سی ٹی وی کیمروں کی تنصیب کے حوالے سے ہدایات جاری کی ہیں، کیمروں کی تنصیب کے وقت ان ہدایات پر عملدر آمد لازمی ہوگا۔

سعودی وزارت داخلہ نے سیکیورٹی سی سی ٹی وی کیمروں کے استعمال کے قانون کا لائحہ عمل جاری کر دیا۔

وزارت داخلہ کا کہنا تھا کہ ویب سائٹ پر سی سی ٹی وی کیمروں کے سیکیورٹی ضوابط اور شرائط دیکھی جا سکتی ہیں، سرکاری گزٹ نے سی سی ٹی وی کیمروں کے قانون کے لائحہ عمل کی تفصیلات جاری کی ہیں۔

یہ 20 دفعات پر مشتمل ہیں اور ان پر عمل درآمد قانون کے نفاذ کی تاریخ سے ہوگا۔

سی سی ٹی وی کیمرے کسی بھی ادارے میں داخلے کے مقامات پر نصب کیے جائیں گے تاکہ آنے جانے والوں کی شناخت کی جا سکے۔

گوداموں میں بھی کیمرے نصب کیے جا سکتے ہیں، ادارے کی تمام منزلوں کی راہداریوں اور بڑے ہالز میں بھی سی سی کیمرے نصب ہوں گے۔ دفاتر کے استقبالیہ حصے میں بھی تنصیب ہوگی۔

اے ٹی ایمز کے علاوہ اہم مقامات اور آتشزدگی پر قابو پانے والے آلات کے مقامات پر بھی یہ کیمرے نصب ہوں گے۔

پارکنگ لائٹس میں آنے جانے والے دروازوں پر بھی کیمرے نصب ہوں گے، الیکٹرک رومز، انٹرنل نیٹ ورک اور کمیونیکیشن رومز کے دروازوں پر بھی کیمروں کی تنصیب ہوگی۔

ملاقاتیوں کے آنے جانے والے اس حصے میں بھی کیمرے نصب کیے جائیں گے جہاں ملاقاتی گاڑیوں سے اترتے ہیں، سامان اتارنے اور لادنے والے مقامات اور مختلف سروسز والے مقامات پر بھی کیمرے نصب ہوں گے۔

گیس سیلنڈرز روم یا کمپلیکس اور قریب کے علاقے میں بھی کیمرے نصب کیے جائیں گے۔

سینٹرل ایئر کنڈیشن روم، قریب کے علاقے، پیٹرول اسٹیشن اور اس کے اطراف کے علاقے، الیکٹرک زینوں اور سیڑھیوں پر بھی اس کا اہتمام کیا جائے گا۔

ایسے تجارتی اور اقتصادی ادارے سی سی ٹی وی کیمروں کی تنصیب سے مستثنیٰ ہوں گے جو بند شاپنگ سینٹرز کے اندر واقع ہوں گے، محکمہ امن عامہ کے ڈائریکٹر کسی بھی جگہ سی سی ٹی وی کیمروں کی تنصیب کی منظوری دے سکتا ہے۔