Category انٹرنیشنل

لندن: پرنسز آف ویلز شہزادی ڈیانا کی ساٹھویں سال گرہ کے موقع پر برطانوی شاہی محل کینسِنگٹن میں شہزادی کے مجسمے کی نقاب کشائی کی تقریب منعقد کی گئی جس میں دو ناراض بھائی شہزادہ ولیم اور شہزادہ ہیری اکھٹےآئے ۔

برطانوی کینسِنگٹن پیلس میں شہزادی ڈیانا کے مجسمے کی تقریب رونمائی شہزادہ ولیم اور ہیری نے کی جب کہ مجسمہ محل میں شہزادی ڈیانا کے پسندیدہ مقام سنکن گارڈن میں نصب کیاگیا۔

اس موقع پر دونوں شہزادوں کا کہنا تھا کہ ہر روز ہماری یہی خواہش ہوتی ہےکہ کاش والدہ اب بھی ہمارےساتھ ہوتیں، ہمیں والدہ کا پیار، طاقت اور کردار یاد ہے۔

ان کا مزید کہنا تھا کہ امید ہے مجسمہ والدہ کی زندگی ،میراث کی علامت کے طور پر دیکھا جائے گا۔

خیال رہے کہ شہزادہ ہیری شاہی ذمہ داریاں چھوڑ چکے ہیں اورا ہلیہ میگھن مارکل کے ساتھ امریکا کی ریاست کیلیفورنیا میں مقیم ہیں۔

یاد رہےکہ31 اگست 1997 میں لیڈی ڈیانا پیرس میں ایک کار حادثے میں انتقال کرگئیں تھیں۔

حماس کی جانب سے چھوڑے گئے آگ لگانے والے غباروں کے جواب میں اسرائیل کے لڑاکا طیاروں نے جمعے کی علی الصبح غزہ پر حملہ کردیا۔

غیر ملکی خبر رساں ادارے اے پی کی رپورٹ کے مطابق فضائی حملوں سے ہلاکتوں کی فوری اطلاعات اب تک موصول نہیں ہوئی ہیں۔

دوسری جانب اسرائیلی فوج کا کہنا ہے کہ انہوں نے حملے میں حماس کے اسلحہ بنانے اور اس کے بارے میں تحقیق کے لیے استعمال ہونے والی ایک سہولت کو نشانہ بنایا ہے۔

خیال رہے کہ رواں سال 10 سے 21 مئی تک اسرائیلی فضائی حملوں میں 66 بچوں سمیت 248 افراد جاں بحق اور ایک ہزار 948 زخمی ہو گئے تھے۔

بعدازاں 21 مئی کو اسرائیل اور حماس کے درمیان جنگ بندی کا معاہدہ کیا گیا تھا۔

اس کے بعد یہ تیسری مرتبہ ہے جب اسرائیل نے غزہ پر فضائی حملہ کیا۔

جنگ بندی کی خلاف ورزی کرتے ہوئے اسرائیل نے گزشتہ ماہ بھی غزہ پر بمباری کی تھی۔

واضح رہے کہ اسرائیل نے معمولی حملوں پر بھی بڑے حملے کرنے کا اعلان کر رکھا ہے۔

اسرائیل کا کہنا ہے کہ اس طرح کے اقدامات سرحدی علاقوں میں کشیدگی میں کمی کے لیے ضروری ہیں۔

بدترین انسانی بحران
10 مئی سے 21 مئی تک اسرائیل نے دعویٰ کیا تھا کہ حماس نے اسرائیل پر 3 ہزار 700 راکٹ داغے تھے جس کے نتیجے میں ایک بھارتی اور دو تھائی شہریوں سمیت 12 افراد ہلاک اور 333 زخمی ہوئے۔

اسرائیلی فوج کا کہنا تھا کہ راتوں رات مسلح گروہوں نے جنوبی اسرائیل کی جانب 50 راکٹ فائر کیے جن میں سے 10 دم توڑ گئے اور غزہ کے اندر ہی گر گئے۔

اسرائیلی فوج نے دعویٰ کیا تھا کہ انہوں نے رات میں جنوبی غزہ میں زیر زمین حماس کے 40 اہداف کو نشانہ بنایا۔

اسرائیل کی بمباری کے بعد غزہ کی 20 لاکھ آبادی، عالمی امداد کی منتظر تھی کیونکہ ہزاروں لوگ بے گھر ہو گئے تھے۔

اقوام متحدہ کا کہنا تھا کہ تقریبا 72 ہزار شہری اپنے گھروں سے نکل کر اقوام متحدہ کے زیر انتظام اسکولوں اور دیگر سرکاری عمارتوں میں پناہ لینے پر مجبور ہو گئے۔

جھڑپوں کا آغاز اس وقت ہوا جب مقبوضہ بیت المقدس میں واقع مسجد اقصیٰ میں انتہا پسند یہودیوں نے رمضان کے مہینے کے آخری عشرے میں مسلمانوں پر حملہ کر کے انہیں تشدد کا نشانہ بنایا تھا۔

اس کے بعد یروشلم کے ضلع شیخ جراح میں فلسطینی خاندانوں کو گھروں سے جبری طور پر بے دخل کرنے کا واقعہ پیش آیا تھا۔

فلسطین کے مرکزی اطلاعات کا کہنا تھا کہ ہیبرون کے قریب ایک فلسطینی خاتون کو گولی مار کر جاں کردیا گیا تھا جس کے بعد 10 مئی سے اب تک مغربی کنارے پر جاں ہونے والے فلسطینیوں کی تعداد 248 ہوگئی ہے۔

مقبوضہ کشمیر میں ظالم اور قابض بھارتی فوج نے ریاستی دہشتگردی کا تسلسل جاری رکھتے ہوئے مزید چار نوجوانوں کو شہید کردیا ہے۔

کشمیر میڈیا سروس کے مطابق مقبوضہ وادی میں قابض بھارتی فوج کی جارحیت جاری ہے، بزدل بھارتی فوج نے ضلع پلواما میں چار کشمیریوں کو شہید کردیا ہے۔ نوجوانوں کو نام نہاد سرچ آپریشن کے دوران نشانہ بنایا گیا، قابض فوج نے نام نہاد سرچ آپریشن کے دوران چادر اور چار دیواری کے تقدس کا پامال کیا۔

کشمیر میڈیا سروس کے مطابق سرچ آپریشن کی آڑ میں قابض فوج نے علاقے کی مکمل ناکہ بندی کررکھی ہے اور ہر قسم کی آمدورفت پر مکمل پابندی عائد کردی ہے۔

کے ایم ایس کے مطابق اس واقعے سے قبل نوجوانوں کو شہید کرنے سے قبل ایک واقعے میں دو بھارتی فوجیوں کو جہنم واصل کر دیا گیا۔

بھارتی فوج کی بربریت کے خلاف علاقے میں شدید احتجاجی مظاہروں کا سلسلہ شروع ہوگیا ہے، کٹھ پتلی انتظامیہ نے مظاہروں سے نمٹنے کے لیے سیکیورٹی فورسز کی بھاری نفری طلب کرلی ہے جب کہ موبائل اور انٹرنیٹ سروس کو بھی معطل کردیا ہے۔

کابل: امریکی افواج طالبان کے ساتھ ہوئے معاہدے کے تحت افغانستان میں اپنے مرکزی فوجی اڈے سے نکل چکی ہیں۔

امریکی محکمہ دفاع کے ایک عہدیدار نے اپنا نام ظاہر نہ کرنے کی شرط پر بتایا کہ تمام نیٹو اراکین اور امریکی سپاہی بگرام ائیر بیس چھوڑ چکے ہیں۔

امریکی فوج کابل کے شمال میں 60 کلومیٹر دور واقع بگرام ائیر بیس سےاپنی فضائی جنگ اور رسد جاری رکھی اور افواج کا یہ انخلا افغانستان میں امریکی فوج کی موجودگی ختم ہونے کی علامت ہے۔

بگرام ائیر بیس افغان حکومت کے حوالے کی گئی جس کی مسلح افواج اور طالبان کے مابین جنگ میں تیزی آئی ہے اور اس کے اثرات کے بارے میں سوالات گردش کررہے ہیں۔

اس ضمن میں ایک افغان عہدیدار نے کہا کہ ہفتے کے روز ہونے والی ایک تقریب میں یہ اڈہ باضابطہ طور پر افغان حکومت کے حوالے کردیا جائے گا۔

امریک دفاعی عہدیدار کے مطابق جنرل آسٹن ملر کا کہنا ہے کہ امریکا کے اعلیٰ کمانڈرز اب بھی افغانستان کے درالحکومت کابل میں موجود امریکی فورس کی حفاظت کی صلاحیتیں اور اختیار رکھتے ہیں۔

امریکی سیکیورٹی کے مزید دو افسران کا کہنا تھا کہ رواں ہفتے 4 جولائی تک زیادہ تر امریکی فوجی یہاں سے چلے جائیں گے اور صرف سفارتخانے کی حفاظت کے لیے فوجی افغانستان میں موجود رہیں گے۔

گزشتہ ماہ امریکی صدر جوبائیڈن نے اپنے ہم منصف افغان صدر اشرف غنی سے کہا تھاکہ افغان کو اپنے مستقبل کا فیصلہ کرنا ہوگا کہ وہ کیا چاہتے ہیں۔

اشرف غنی کا کہنا ہے کہ اب ان کی ذمہ داری امریکی فوج کے انخلا کے بعد اس کے ااثرات سے نمٹنا ہے۔

امریکا اور طالبان کے درمیان معاہدہ سابق امریکی صدر ڈونلڈ ٹرمپ کے دورِ حکومت میں ہوا تھا۔

افغانستان سے امریکی فوجی انخلا کے بدلے میں غیر ملکی افواج اور امریکی حمایت یافتہ حکومت کو نکالنے کے خواہشمند طالبان نے افغان سر زمین کو کسی بھی بین الاقوامی دہشت گردی میں استعمال ہونے سے روکنے کا عزم ظاہر کیا تھا۔

انہوں نے عزم کیا تھا کہ وہ اپنے افغانی حریفوں سے مزاکرات کریں گے، لیکن مذاکرات کے سلسلے میں خاطر خواہ پیشرفت سامنے نہیں آئی۔

انخلا مثبت قدم ہے، طالبان ترجمان
خبررساں ادارے سے بات کرتے ہوئے طالبان کے ترجمان ذبیح اللہ مجاہد کا کہنا تھا کہ انہیں خبر ملی ہے کہ امریکا کی افواج نے فوجی اڈہ خالی کردیا ہے جس کا طالبان خیر مقدم کرتے ہیں۔

ان کا کہنا تھا کہ ہم سمجھتے ہیں کہ فوجوں کا انخلا ایک مثبت قدم ہے، ٖغیر ملکی افواج کے انخلا کے بعد ہی افغان استحکام اور امن کے قریب ہوسکتے ہیں، یہ انخلا امریکی حکومت کیلئے بھی فائدہ مند ہے

خیال رہے کہ غیر ملکی افواج کے افغانستان سے حتمی انخلا جس کے لیے 11 ستمبر کی 20ویں سالگرہ مقرر کی گئی تھی تاہم اس سے عسکریت پسندؤں اور افغان حکومتی فورسز کے درمیان جھڑپوں میں کوئی کمی نہیں ہوئی۔

مکہ المکرمہ: سعودی عرب میں حج کی تیاریاں شروع ہوگئی ہیں اورغلاف کعبہ کوتین میٹراوپراٹھا دیا گیا ہے۔

سعودی عرب میں مسجد الحرام اورمسجد نبوی انتظامیہ کے سربراہ اعلی ڈاکٹرعبدالرحمن السدیس کی زیرنگرانی خانہ کعبہ کا غلاف نیچے سے تین میٹر تک اوپر اٹھا دیا ہے جوحج کی تیاریوں کا آغازمیں سے ایک عمل ہے۔

اس عمل کے لیے 50 سے زائد ماہرین پرمبنی خصوصی ٹیمیں ہیں جب کہ ایک خصوصی سیڑھی بھی ہے جو صرف اس کام کے لے مختص ہے۔

برلن: افغان جنگ میں حصہ لینے والے مشن میں شامل زیادہ تر غیر ملکی افواج نامکمل ہونے والی جنگ کے خاتمے کے ساتھ ملک کو خانہ جنگی کی نہج پر چھوڑ کرباضابطہ طور پر انخلا سے کئی ماہ قبل ہی خاموشی سے نکل چکی ہیں۔

رپورٹ کے مطابق جرمنی اور اٹلی نے بدھ کے روز اپنا مشن ختم کرنے کا اعلان کیا اور پولینڈ کا بھی آخری فوجی اپنے وطن واپس پہنچ گیا اور 20 سال قبل جب پہلا غیر ملکی فوجی وہاں تعینات کیا گیا تھا اس کے بعد سے اب تعیناتیوں کی تعداد کم ترین سطح پر آگئی۔

11 متعدد ممالک کی جانب سے کیے گئے اعلانات کا تجزیہ ظاہر کرتا ہے کہ ستمبر 2001 کو ہونے والے حملوں کے بعد جب نیٹو اتحادی القاعدہ سے ملک کو چھڑانے کے لیے امریکی حملے کی حمایت کی خاطر صف آرا ہوا تو طاقت اور اتحاد کے ایک ڈرامائی اور عوامی مظاہرے کے بالکل برعکس زیادہ تر یورپی فوجی ایک چھوٹی سی تقریب کے بعد وہاں سے نکل چکے ہیں۔

آنے والی دہائیوں میں جنگ ایک مشن سے دوسرے مشن پر منتقل ہوتی رہی، سابق امریکی صدر جارج ڈبلیو بش کی حکومت قوم سازی سے دور رہی۔

تاہم گزرتے برسوں کے ساتھ نیٹو اور امریکی فوجیوں نے افغانستان کی قومی سلامتی اور دفاعی فورسز کی تیاری اور پولیس کی تربیت میں بہت بڑا کردار ادا کیا، جنگ کے عروج پر امریکی اور نیٹو کے فوجیوں کی تعداد ڈیڑھ لاکھ تک پہنچ گئی تھا۔

اپریل میں نیٹو نے اپنے تقریباً 7 ہزار غیر امریکی فوجی واپس بھیجنے پر رضامندی ظاہر کی تھی تاکہ امریکی صدر جو بائیڈن کی جانب سے افغانستان سے تمام امریکی فوجیوں کو نکالنے کے فیصلے کا ساتھ دیا جاسکے جس کا آغاز یکم مئی کو ہوا۔

جو بائیڈن نے امریکی افواج کے انخلا کے لیے 11 ستمبر کی حتمی تاریخ مقرر کی تھی لیکن حال ہی میں امریکی عہدیداروں نے کہا تھا کہ فوجیوں کا انخلا 4 جولائی تک مکمل ہونے کا امکان ہے اور متعدد اتحادی بھی اپنی موجودگی سمیٹنے لگے۔

نیٹو نے اس سلسلے میں کوئی تازہ معلومات دینے سے انکار کیا کہ ریزولوٹ سپورٹ مشن میں کتنی اقوام کے فوجی موجود ہیں لیکن 19 حکومتوں کے اعلانات کا تجزیہ ظاہر کرتا ہے کہ 4 ہزار 800 غیر امریکی فوجی جاچکے ہیں۔

ادھر امریکا نے بھی فوجیوں کے اعداد و شمار دینے سے انکار کردیا تاہم جب جو بائیڈن نے فوجیوں کے انخلا کا اعلان کیا تھا تو ڈھائی سے 3 ہزار فوجی تعینات تھے اس کے علاوہ امریکا نے بھی حتمی انخلا کی واضح تاریخ دینے سے انکار کیا ہے۔

فروری تک مجموعی طور پر 8 لاکھ 32 ہزار امریکی فوجی افغانستان میں اپنی خدمات انجام دے چکے تھے جبکہ محکمہ دفاع کے 25 ہزار 100 سویلینز نے بھی یہاں کام کیا۔

جرمنی نے ایک بیان اور وزیر دفاع کی سلسلہ وار ٹوئٹس کے ذریعے 20 برس بعد افغانستان میں اپنی تعیناتی کے خاتمے کا اعلان کیا۔ ‘

برٹش کولمبیا: کینیڈا میں ایک اور اسکول کے باہر سے مزید 182 بچوں کی اجتماعی قبریں دریافت ہوئی ہیں۔

غیر ملکی خبر رساں ادارے کے مطابق کینیڈا کی ریاست برٹش کولمبیا میں سابقہ بورڈنگ اسکول سے مزید 182 بچوں کی قبریں دریافت ہوئی ہیں، بچوں کی عمر 7 سے 15 سال کے درمیان ہے جنہیں 1890 سے لیکر 1970 کے درمیان کیتھولک چرچ کے زیر انتظام چلنے والے اسکول میں زبردستی کینیڈین معاشرے میں ہم آہنگی کے لیے تعلیم دی جاتی تھی۔

19 ویں صدی میں تقریباً ڈیڑھ لاکھ کے قریب بچوں کو زبردستی مسیحی بورڈنگ اسکولوں میں تعلیم دی جاتی تھی تاہم اس دوران ہزاروں بچے بیماری اور دیگر وجوہات کی بنا پر ہلاک ہوگئے تھے۔

واضح رہے کہ اس سے قبل بھی کینیڈا کی ریاست سسکیچوان میں سابق بورڈنگ اسکول سے 751 اجتماعی قبریں دریافت کی گئی تھیں جب کہ چند روز قبل بھی ایک اسکول سے 215 بچوں کی اجتماعی قبر برآمد ہوئی ہیں۔

اسرائیل سے شائع ہونے والے اخبار نے خیال ظاہر کیا ہے کہ پاکستان آہستہ آہستہ اسرائیل کے ساتھ تعلقات کی طرف بڑھ رہا ہے مگر پاکستان کے اسرائیل کو تسلیم کرنے یا نا کرنے کا فیصلہ طالبان کریں گے۔

اسرائیلی اخبار ہاریٹز میں کنور خلدون شاہد کے شائع مضمون نے ایک اور اسرائیلی اخبار کی اُس خبر کا حوالہ دیا جس کے مطابق وزیراعظم عمران خان کے سابق معاون خصوصی ذلفی بخاری نے نومبر 2020 میں اسرائیلی دارالحکومت تل ابیب کا خفیہ دورہ کیا۔

ہاریٹز نے لکھا کہ ذلفی بخاری نے اس دورے کی تردید کی ہے جبکہ چیئرمین پیپلز پارٹی بلاول بھٹو زرداری نے حکومت پاکستان سے رات کے اندھیرے میں اسرائیل سے رابطوں کی تحقیقات کا مطالبہ کیا ہے۔

اسرائیلی اخبار نے لکھا کہ بعض لوگ اس بات کی تصدیق کرتے ہیں کہ پاکستان اور اسرائیل کے درمیان سفارتی رابطے رواں سال 2021 کے آغاز میں بھی موجود تھے۔

مضمون نگار کا کہنا ہے کہ پاکستان آہستہ آہستہ اسرائیل کے ساتھ تعلقات کی طرف بڑھ رہا ہے، اس بار یہ معاملہ کسی دباؤ کے تحت نہیں بلکہ سعودی عرب اور متحدہ عرب امارات کی وجہ سے ہے۔

اسرائیلی اخبار نے لکھا کہ اسرائیل کے ساتھ تعلقات کے بارے میں سب سے زیادہ مزاحمت مذہبی جماعتوں کی طرف سے آسکتی ہے۔

اسرائیلی اخبار کے مطابق افغانستان میں طالبان کے حوالے سے پیدا ہونے والی تازہ صورت حال سے اس بات کا اندازہ لگایا جاسکتا ہے کہ پاکستان کے اسرائیل سے تعلقات کا فیصلہ طالبان کریں گے۔

چین کے صدر شی جن پنگ نے غیر ملکی افواج کو خبردار کیا ہے کہ چینی قوم کے ساتھ بدمعاشی کرنے کی کوشش کے نتیجے میں ان کا اپنا نقصان ہوگا، ساتھ ہی انہوں نے اپنے عوام کی تخلیق کردہ ‘نئی دنیا’ کو بھی سراہا۔

چینی کمیونسٹ پارٹی کی صدر سالہ تقریبات کے موقع پر تیاننمین اسکوائر پر ایک گھنٹے طویل خطاب کرتے ہوئے شی جنگ پنگ نے چینی فوج کی تعمیر، تائیوان کو دوبارہ شامل کرنے کا ظاہر کیا اور کہا کہ چین کی سلامتی اور خودمختاری کی حفاظت کرتے ہوئے ہانگ کانگ می استحکام یقینی بنایا جائے گا۔

انہوں نے کہا کہ چین کو ڈرانے دھمکانے کا دور اب ختم ہوگیا ہے اور جس کسی نے بھی پارٹی اور چینی عوام کو علیحدہ کرنے کی کوشش کی اسے بدترین ناکامی کا سامنا کرنا پڑا۔

غیر ملکی خبررساں اداروں کی رپورٹس کے مطابق انہوں نے کہا کہ ‘چین کے عوام نہ صرف پرانی دنیا کو تباہ کرنے میں اچھے ہیں بلکہ انہوں نے ایک نئی دنیا بھی بنائی ہے’۔

چینی رہنما ماؤزے تنگ کے بعد سب سے طاقتور سمجھے جانے والی چینی صدر کا کہنا تھا کہ ‘صرف سوشل ازم ہی چین کو محفوظ بناسکتا ہے’۔

ایسے میں جب چین کووِڈ 19 کے پھیلاؤ سے تیزی کے ساتھ صحتیاب ہورہا ہے چینی صدر اور ان کی جماعت اونچا اڑ رہے ہیں اور عالمی سطح پر مزید ٹھوس مؤقف اپنا رہے ہیں۔

تاہم بیجنگ کو ہانک کانگ میں پابندیوں اور نسلی اقلیت کے ساتھ اختیار کردہ سلوک پر پر بیرونی تنقید کا سامنا کرنا پڑ رہا ہے۔

چنانچہ اپنے خطاب میں چینی صدر نے کہا کہ چینی عوام کسی غیر ملکی فوج کو اپنے آپ کو دبانے، سبوتاژ کرنے یا بدمعاشی نہیں کرنے دیں گے۔

انہوں نے کہا کہ ‘جس نے بھی یہ کرنے کی کوشش کی وہ ایک ارب 40 کروڑ سے زائد کی چینی عوام سے اپنا سر ٹکرائے گا’۔

یہ بات انہوں نے وسطی بیجنگ کے بڑے چوک پر جمع ہوئے 70 ہزار افراد کے مجمع سے کہی، ان کا یہ جملہ چین کی ٹوئٹر جیسی ویب سائٹ پر سب سے زیادہ ٹرینڈنگ کرنے والا عنوان بن گیا۔

فوجی طاقت اور خود مختاری
چینی صدر نے کہا کہ چین اپنی خودمختاری، سلامتی کے تحفظ اور ترقی کے لیے اپنی مسلح افواج تیار کرے گا اور اسے دنیا کے اعلیٰ معیار تک بلند کرے گا۔

چینہ صدر جو کہ ملک کی مسلح افواج کو قابو کرنے والے سینٹرل ملٹری کمیشن کے چیئرمین بھی ہیں ان کا کہنا تھا کہ ہمیں قومی دفاع اور مسلح قوت جدید بنانے کے عمل کو تیز کرنا چاہیے۔

تائیوان کا سوال حل کرنا اور چین کو دوبارہ متحد کرنا پارٹی کا ایک ایسا تاریخی کام ہے جس کا جواب نہیں مل سکا۔

شی جن پنگ کا کہنا تھا کہ چین کے تمام بیٹوں اور بیٹوں بشمول تائیوان کے دونوں اطراف رہنے والے ہم وطنوں کو ایک ساتھ مل کر کام کرنا اور یکجہتی سے آگے بڑھنا ہوگا۔

عظیم، شاندار اور بہادر
جمعرات کے جشن کا آغاز جنگی طیاروں اور ہیلی کاپٹرز کے فلائی بائی سے شروع ہوا جس کا مشاہدہ قوم کے رہنما نے کیا۔

چینی کمیونسٹ پارٹی پہلے دیہاتیوں اور ورکرز کو بھرتی کرتی تھی لیکن اب چینی خصوصیات کے حامل سوشل ازم کے تحت مارکیٹ اور کاروباری سرگرمیوں کو قبول کرنے کے لیے تیار ہے۔

سال 2020 میں پارٹی کے عہدیداروں کی تعداد 24 لاکھ 30 ہزار کا اضافہ جو سال 2013 میں چینی صدر کے منصب سنبھالنے سے لے کر سب سے بڑا اضافہ ہے اور پارٹی کے اراکین کی تعداد 9 کروڑ 51 لاکھ 50 ہزار تک پہنچ گئی ہے۔

شی جن پنگ نے کہا کہ چینی عوام کی منزل اور دلچسپی پارٹی کی قیادت سے منسلک ہے اور عوام کو پارٹی کے خلاف کرنے کی ہر کوشش ناکام ہوگی۔

ان کا کہنا تھا کہ ایک ارب 40 کروڑ سے زائد چینی عوام ایسی صورتحال کو آنے ہی نہیں دیں گے۔

اسرائیل نے متحدہ عرب امارات کی ریاست ابوظہبی میں پہلے سفارتخانے کے ساتھ ساتھ دبئی میں قونصل خانے کا افتتاح بھی کردیا ہے۔

خبر رساں ایجنسی اے ایف پی کے مطابق نئے اسرائیلی وزیر خارجہ یائر لپیڈ دو روزہ دورے پر متحدہ امارات میں موجود ہیں جہاں انہوں نے منگل کو ابوظہبی میں اسرائیلی سفارتخانے کا افتتاح کیا اور آج دبئی میں بھی ایک قونصل خانے کا افتتاح کیا۔

وزیر خارجہ نے سماجی رابطوں کی ویب سائٹ ٹوئٹر پر اپنے پیغام میں کہا کہ ابوظبی میں امارات کے وزیر ثقافت و نوجوانان کے ہمراہ اسرائیلی سفارتخانے کا افتتاح۔

گزشتہ سال متعدد عرب ریاستوں نے اسرائیل سے تعلقات کی بحالی کا اعلان کیا تھا اور اس کے بعد سے یہ اسرائیلی کابینہ کے کسی وزیر کا خلیجی ریاست کا پہلا باضابطہ سرکاری سطح کا دورہ ہے۔

یہ دورہ دو ہفتے قبل تشکیل دی گئی نفتالی بینیٹ کی نئی اسرائیلی حکومت کے لیے خلیجی و عرب ممالک سے سفارتی تعلقات استوار کرنے کا بھی اہم موقع ہے۔

ابوظبی میں سفارتخانے کے افتتاح کے موقع پر وزیر خارجہ نے کہا کہ اسرائیل اپنے پڑوسی ممالک کے ساتھ امن چاہتا ہے، ہم کہیں نہیں جا رہے اور مشرق وسطیٰ ہمارا گھر ہے۔

انہوں نے دوٹوک الفاظ میں کہا کہ ہم یہاں قیام کرنے کے لیے آئے ہیں اور چاہتے ہیں کہ خطے کے تمام ممالک اس بات کو تسلیم کریں اور ہم سے مذاکرات کے لیے آگے آئیں۔

سابق صدر ڈونلڈ ٹرمپ کی انتظامیہ نے خصوصی طور پر اسرائیل اور عرب ممالک کے درمیان تعلقات استوار کرنے کے حوالے سے مرکزی کردار ادا کیا تھا جس کے نتیجے میں گزشتہ سال متحدہ عرب امارات اور بحرین نے اسرائیل کو تسلیم کرتے ہوئے تعلقات بحال کر لیے تھے۔

ان دونوں ممالک کے نقش قدم پر چلتے ہوئے مراکش اور سوڈان نے بھی اسرائیل کر تسلیم کر کے ان سے تعلقات کی بحالی کا اعلان کیا تھا۔

یائر لپیڈ نے اپنے اماراتی ہم منصب شیخ عبداللہ بن زائد النہیان سے خطے میں پائیدار امن اور استحکام کے لیے معاہدوں کو بہتر بنانے پر تبادلہ خیال کیا۔

انہوں نے معاشی اور تجارتی تعاون کے معاہدے پر بھی دستخط کیے جو گزشتہ سال دونوں ملکوں میں تعلقات کی بحالی کے بعد 12واں اہم معاہدہ ہے۔

امریکی سیکریٹری آف اسٹیٹ انٹونی بلنکن نے اسرائیلی وزیر خارجہ کے دورے کا خیرمقدم کرتے ہوئے کہا کہ ہم اسرائیل اور متحدہ عرب امارات کے ساتھ کام جاری رکھیں گے تاکہ اپنی شراکت داریوں کو مضبوط بنا سکیں اور مشرق وسطیٰ کے تمام عوام کے لیے پرامن، محفوظ اور خوشحال مستقبل تشکیل دے سکیں۔

اس علاقائی پیشرفت کو فلسطینیوں نے مسترد کردیا ہے اور پہلے اسرائیل کے تسلط سے پاک آزاد ریاست کا مطالبہ کیا ہے۔

فلسطینی صدر محمود عباس نے ان معاہدوں کو آنکھوں میں دھول جھونکنے کے متراد قرار دیتے ہوئے کہا ہے کہ نوآبادیاتی طاقتوں نے اسرائیل کو اس خطے میں ایک غیرملکی طاقت کی حیثیت دے دی ہے تاکہ اس علاقے کے چھوٹے چھوٹے ٹکڑے کر کے اسے تقسیم کر سکیں۔

اسرائیلی وزیر خارجہ سعودی عرب کے شہر ریاض میں ٹرانزٹ فلائٹ کے ذریعے پہنچنے کے بعد پرواز کرتے ہوئے متحدہ عرب امارات آئے اور اسرائیل سے تعلقات بحال نہ ہونے کے باوجود سعودی عرب نے ان کے طیارے کو اپنی سرحدی حدود میں داخل ہونے سے نہیں روکا۔

انہوں نے آج ایکسپو 2020 کے مقام کا دورہ بھی کیا جو رواں سال دبئی میں ماہ اکتوبر میں منعقد ہو گا اور اس میں اسرائیل کا پویلین بھی ہو گا۔

رواں ماہ متحدہ عرب امارات میں باضابطہ طور پر اپنا سفارتخانہ کھول لیا تھا اور عبوری طور پر تل ابیب کی اسٹاک ایکسچینج میں اپنا سفارتخانہ بنایا ہے۔

اسرائیل کی ابوظبی سفارتخانے میں ابھی صرف تین رکنی عملہ ہے اور مشن کے سربراہ ایتن نائے کی بطور مستقل سفیر تصدیق ہونا باقی ہے۔

ابوظبی میں سفارتخانے کے ساتھ ساتھ دبئی میں قونصل خانہ کسی عبوری جگہ پر قائم کیا جائے گا۔