Category جرم وانصاف

رحیم یار خان (میڈیا 92 نیوز آن لائن ) رحیم یار خان میں 13 سالہ لڑکی کو زیادتی کے بعد قتل کرنے کے الزام میں تین افراد کو گرفتار کر لیا گیا۔ ملزمان نے لڑکی کو اغواء کرکے 18 دن اپنے پاس رکھا،لڑکی کے والد کی مدعیت میں 7 افراد کےخلاف مقدمہ صدر پولیس اسٹیشن میں درج کیا گیا،

جس میں قتل 302، زیادتی 376 اور 365 بی شادی کیلئے خواتین کو اغواء اور مجبور کرنے کی دفعات شامل ہیں۔لڑکی کے والد کے مطابق بیٹی کم پختہ عقل تھی اور 13 سال کی عمر ہونے کے باوجود اسکی سمجھ بوجھ 8 سے 10 سال جیسی تھی۔

رپورٹس کے مطابق لڑکی اپنے باپ کےساتھ رحیم یار خان کے چک 72 میں رہتی تھی۔ والدین نے کچھ سال قبل علیحدگی اختیار کر لی تھی تاہم لڑکی کی والدہ اسی گلی میں رہائش پذیر تھی۔ 9 مارچ کو لڑکی اپنی ماں سے ملنے گھر سے نکلی لیکن راستہ بھول گئی۔ لڑکی ایک رکشہ ڈرائیور کے پاس پہنچی اور اسکو کہا کہ مجھے میری امی کے گھر چھوڑ دے،

بہرحال ایک گھنٹہ علاقے میں چکر لگانے کے بعد رکشہ ڈرائیور لڑکی کو اپنے گھر مڈ درباری لے گیا۔رکشہ ڈرائیور نے 18 دن لڑکی کو یرغمال بنائے رکھا اور اس دوران اپنے ساتھیوں سمیت اسکو زیادتی کا نشانہ بنایا۔

لڑکی کو نشہ آور شے بھی دی جاتی رہی۔ شیخ زاہد اسپتال کے میڈیکل سپرنٹنڈنٹ نے تصدیق بھی کی کہ لڑکی کو زیادتی کا نشانہ بنایا گیا اور نشہ آور شے دی گئی۔

ابتدا میں لڑکی کے والد نے پولیس میں مقدمہ درج کروانے کی کوشش کی لیکن کوئی سنوائی نہیں ہوئی۔ اسکے نتیجے میں ڈی پی او رحیم یار خان عمر سلامت نے ایس ایچ او اور تین اہلکاروں کو معطل کرکے محکمانہ کارروائی شروع کر دی

عارف والا (میڈیا 92 نیوز آن لائن ) دوستی کا جھانسہ دیکر خاتون نے نوجوان کا گردہ نکلوادیا۔

کامونکی کےرہائشی ہمایوں نےپولیس کو بتایا کہ وہ عارف والا کی رہائشی ایک خاتون سے دوستی کاڈسا ہوا ہے.

خاتون نے اس سے ساڑھے 3 لاکھ روپےکا تقاضا کیا تو ہمایوں نے بتایا کہ وہ تو کنگال ہے، جس پر خاتون نےکہا کہ اگر وہ سچا دوست ہے تو گردہ فروخت کرکے اسے رقم دے۔

اس پر ہمایوں نے گردہ فروخت کرکے ساڑھے 3 لاکھ روپے خاتون کےحوالے کر دیئے۔

ہمایوں کہتاہےکہ جب اس نے رقم کی واپسی کا تقاضا کیا تو خاتون نے اسے گھر بلا کر چوری کا الزام لگا دیا اور رشتے داروں سے پٹائی کرا دی۔

پولیس نے ہمایوں کو اسپتال میں داخل کر کے تفتیش شروع کر دی ہے۔

نوجوان نے گردہ نکلوا کر ساڑھے 3 لاکھ روپے میں فروخت کیا اور رقم خاتون کو دی تاہم رقم کی واپسی کا تقاضہ کیا توخاتون نے چوری کا الزام لگا کر رشتہ داروں سے پٹائی کرادی

اسلام آباد (میڈیا 92 نیوز آن لائن ) فرشتہ قتل کیس میں وزیر مملکت پارلیمانی امور علی محمد خان کا کہنا ہے کہ جب تک قاتل نہ ملے تو ذمہ دار حکومت ہے۔

وزیر مملکت علی محمد اظہار تعزیت کے لیے فرشتہ کے گھر پہنچے، اس موقع پر میڈیا سے گفتگو میں علی محمد خان کا کہنا تھا کہ جب تک قاتل نہ ملے ذمہ دار حکومت ہے، قاتلوں کو گرفتار اور سزا نہ دی گئی تو اللہ ہم سے پوچھے گا، ملزمان کو لٹکانے سے واقعات رونما ہونا بند ہو جائیں گے، ایسے واقعے کو بنیاد بنا کر اداروں کے خلاف اشتعال نہیں پیدا کرنا چاہیے۔

وفاقی وزیر علی محمد خان کا کہنا تھا کہ پولیس میں اصلاحات کی ضرورت ہے، ایسے کیسز میں دن کی روشنی میں چوک پر لٹکانے کے قانون سے متعلق فروغ نسیم کو خط لکھوں گا، قصورکی زینب، مردان کی عاصمہ یا فرشتہ کا معاملہ ہو، فرشتہ کے کیس میں کچھ افراد کو گرفتار کیا گیا ہے جب کہ ڈی این اے کی رپورٹ کا انتظار ہے۔

اسلام آباد(میڈیا 92 نیوز آن لائن ) چیف جسٹس پاکستان جسٹس آصف سعید کھوسہ نے ایک کیس کی سماعت کے دوران ریمارکس دیئے ہیں کہ نیب آخر کرتا کیا ہے؟ نیب کے اسی رویے کی وجہ سے لوگ ذہنی دباؤ کا شکار ہیں۔

کرپشن کیس کے ملزم کی بریت کے خلاف سپریم کورٹ میں نیب اپیل کی سماعت کے دوران چیف جسٹس پاکستان جسٹس آصف سعید کھوسہ نے ریمارکس دیئے کہ ملزم جہان خان کے اثاثے تو آمدن سے زائد نہیں، 80 لاکھ کی آ مدن سے 46 لاکھ کے اثاثے بنانا تو سمجھ آ تاہے،

نیب کی جانب سے 2001 سے 2019 تک ملزم کو گھسیٹا گیا، نیب ان 19 سالوں کا ازالہ کیسے کرے گا، نیب کو تو اس کیس میں جرمانہ ہو نا چاہیے۔ نیب کا مقصد صرف پکڑ دھکڑ نہیں ہے، نیب کا مقصد کیس ثابت کرنا ملزم کو سزا دلوانا بھی ہے، نیب کو سوچنا چاہیے کہ صرف کیس بنانا مقصد نہیں ہے ،نیب کو چاہیے جس پر کیس بنائے شواہد بھی ساتھ لگائے۔

چیف جسٹس نے ریمارکس دیئے کہ 19 سال سے ملزم کو رگڑا لگایا جا رہا ہے، ملزم پر جس عہدے کی بنیاد پرکرپشن کا الزام ہے اس عہدے کا ثبوت تک نہیں۔ نیب آخر کرتا کیا ہے؟ نیب کے اسی رویے کی وجہ سے لوگ ذہنی دباؤ کا شکار ہیں۔ سپریم کورٹ نے ملزم عطا اللہ کی بریت کیخلاف نیب اپیل مسترد کردی۔

لاہور(میڈیا 92 نیوز آن لائن ) لاہور ہائی کورٹ نے مسلم لیگ (ن) کے رہنما حمزہ شہباز کے خلاف تین کرپشن کیسز میں ان کی عبوری صمانت میں توسیع کردی۔

جسٹس علی باقر نجفی اور جسٹس سردار احمد نعیم پر مشتمل دو رکنی بینچ نے مقدمے کی سماعت کی۔

قومی احتساب بیورو (نیب) کے پراسیکیورٹر نے عدالت کو بتایا کہ بیورو حمزہ شہباز کی گرفتاری کے لیے تمام انتظامات کرچکا تھا۔

حمزہ شہباز کے قونصل نے دلائل دیئے کہ نیب نے فنانشل مانیٹرنگ یونٹ (ایف ایم یو) کی رپورٹ فراہم نہیں کی اور عدالت پر زور دیا کہ بیورو دستاویزات حوالے کی جائیں۔

جس پر نیب پراسیکیوٹر نے مؤقف اختیار کیا کہ ایف ایم یو رپورٹ خفیہ دستاویزات ہیں اور انہیں حمزہ شہباز کے حوالے نہیں کیے جاسکتا۔

خیال رہے کہ حمزہ شہباز پر آمدن سے زائد اثاثے رکھنے، رمضان شوگر ملز اور پنجاب صاف پانی کمپنی میں مبینہ کرپشن کرنے کا الزام ہے۔

بینچ نے نیب پراسیکیوٹر کو ہدایت کی کہ وہ حمزہ شہباز کے خلاف دائر مقدمات کے پس منظر کے بارے میں تفصیل سے آگاہ کرے۔

جس پر پراسیکیوٹر نے بینچ کو بتایا کہ حمزہ شہباز، ان کے بھائی سلمان اور والد شہباز شریف نے غیر واضح ذرائع سے آمدن سے زائد اثاثے جمع کیے۔

نیب نے بتایا کہ سلمان کے فرنٹ مین نے سلمان کے ہی ملازمین کے بینک اکاؤنٹ کے ذریعے منی لانڈرنگ کی۔

نیب کے پراسیکیوٹر نے عدالت کو مزید بتایا کہ محمد مشتاق عرف چینی، جو رمضان شوگرملز کا مینجر تھا اور انہیں گزشتہ ماہ پی آئی اے فلائٹ سے اتار کر گرفتار کیا گیا، نے انکشاف کیا کہ سلمان اپنے ملازمین کے نام پر بینک اکاؤنٹ کھولتا تھا۔

نیب نے کہا کہ حمزہ شہباز منی لانڈرنگ میں حصہ دار تھے۔

اس دوران حمزہ شہباز کے وکیل نے ایف ایم یو رپورٹ پیش کرنے پر زور دیا اور کہا کہ ’رپورٹ ہی مقدمے کی بنیاد‘ ہے۔

انہوں نے کہا کہ نیب کے پاس منی لانڈرنگ مقدمات کی تفتیش کرنے کا اختیار نہیں ہے۔ جس پر نیب کے پراسیکیوٹر نے جواب دیا کہ نیب اسی طرح کے مقدمات کی تحقیقات کررہا تھا۔

حمزہ شہباز کے وکیل نے کہا کہ رکن قومی اسمبلی مجسٹریٹ کی اجازت کے بغیر گرفتار نہیں کیے جا سکتے۔ بعد ازاں عدالت نے حمزہ شہباز کی ضمانت میں 28 مئی تک توسیع کرتے ہوئے سماعت ملتوی کردی۔

بدین (میڈیا 92 نیوز آن لائن ) سوشل میڈیا کے ذریعے ’بلیک میلنگ‘ کے بعد 12 ویں جماعت کی طالبہ کی خود کشی پر بچی کے والد کی مدعیت میں مبینہ ملزم سوم کمار اور اس کے دو ساتھیوں کے خلاف تھانہ ٹنڈوغلام علی میں مقدمہ درج کرلیا گیاہے۔

مقدمے میں دفعہ 322 ، دفعہ 506/2 اوردفعہ 385 لگائی گئی ہے۔ ملزمان پر طالبہ کو جان سے ماردینے کی دھمکی اور بھتہ خوری کے الزامات بھی عائد کیے گئے ہیں۔

کیس کے مرکزی ملزم سوم کمار نے حیدرآباد پولیس کو گرفتاری دیدی ہے ۔ حیدرآباد پولیس نے ملزم کو بدین پولیس کے حوالے کردیا ہے۔

بدین کے نواحی شہر ٹنڈو غلام علی کی رہائشی طالبہ سوشل میڈیا کے ذریعے محبت کے جھانسے میں آنے کے بعد کی جانے والی ’بلیک میلنگ‘ سے اس حد تک عاجز آئی کہ اس نے زہریلی دوا پی کر اپنی زندگی کا خاتمہ ہی کرلیا۔

متوفیہ کے ورثا کے مطابق ’سوم‘ نامی شخص نے متوفیہ کو سوشل میڈیا کے ذریعے پہلے اپنی جھوٹی محبت کا جھانسہ دیا اور اس کے بعد اس کی تصویر ’ایڈٹ‘ کرکے اسے بلیک میل کرنے لگا۔

ورثا نے یہ افسوسناک انکشاف بھی کیا کہ سوم ایڈٹ شدہ تصویر انٹرنیٹ پر اپلوڈ کرنے کی دھمکی دے کر ہر ماہ 50 ہزار روپے بھی وصول کرتا رہا تھا۔

سوم نامی شخص کے متعلق ورثا کا کہنا ہے کہ جب متوفیہ کی منگنی اپنے عزیز سے ہوئی تو اسے بھی ایڈٹ شدہ تصویر واٹس اپ پر بھیج دی جس کی وجہ سے ہونے والا رشتہ ٹوٹ گیا۔

ورثا نے دعویٰ کیا ہے کہ زہریلی دوا پی کر اپنی زندگی کا خاتمہ کرنے سے قبل متوفیہ نے اپنی آپ بیتی کاغذ پر تحریر کی ہے۔

مقامی ذرائع ابلاغ کے مطابق متوفیہ کے ورثا نے سوم کی بلیک میلنگ سے متعلق باقاعدہ شکایت متعلقہ ایس ایس پی سے کی تھی لیکن پولیس نے روایتی غفلت، لاپرواہی اور سستی کا مظاہرہ کرے ہوئے کارروائی نہیں کی جب کہ بلیک میلنگ اور ذہنی دباؤ سے تنگ آکر طالبہ نے خود کشی کرلی۔

چشتیاں (میڈیا 92 نیوز آن لائن ) لاہور سے چشتیاں جانے والی 15 سالہ مسافر لڑکی کو بس کے عملے نے زیادتی کا نشانہ بنا ڈالا۔

ہم نیوز کے مطابق یہ واقعہ اتوار کو پیش آیا۔ ملزمان لڑکی کو اسپتال چھوڑ کر فرار ہو گئے۔ اسپتال میں زیرعلاج لڑکی نے ہوش آنے کے بعد پولیس کو اپنا بیان ریکارڈ کرا دیا۔

پولیس کے مطابق چشتیاں کی رہائشی لڑکی والدین کی ڈانٹ ڈپٹ کے بعد گھر سے نکلی اور لاہور جانے والی بس پر سوار ہو گئی۔

پولیس نے بتایا کہ کرایہ نہ ہونے پر بس کے گارڈ نے لڑکی کو ورغلایا اور اپنے ساتھ لے گیا اور زیادتی کا نشانہ بنا ڈالا۔

پولیس کے مطابق گرفتار ملزم نے اقرار جرم کر لیا ہے، لڑکی نے بھی ملزم کو پہچان لیا ہے۔

پولیس کا مزید کہنا تھا کہ لڑکی کا ڈی این اے ٹیسٹ کروایا جائے گا، رپورٹ کی روشنی میں ملزم کے خلاف کارروائی عمل میں لائی جائے گی۔

خیال رہے کہ 16 مئی کو راولپنڈی میں طالبہ اپنے دوست کے ہمراہ سحری کے لیے بحریہ ٹاؤن فیز 8 گئی جہاں ملزموں نے مبینہ طور پر اسے اجتماعی زیادتی نشانہ بنایا اور جان سے مارنے کی دھمکیاں بھی دیں۔

گزشتہ روز اجتماعی زیادتی کرنے والے تین پولیس اہل کاروں سمیت چار ملزموں کا جسمانی ریمانڈ منظور کیا گیا۔

ملزمان متاثرہ لڑکی کے والدین پر معاملہ ختم کرنے کے لیے دباؤ ڈال رہے تھے تاہم سی پی او راولپنڈی اور ترجمان پنجاب حکومت نے یقین دہانی کرائی ہے کہ ملزموں کو قانون کے مطابق سزا دی جائے گی۔

لڑکے ایڈٹ شدہ تصاویر سے لڑکی کو بلیک میل اور پچاس ہزار روپے بھی لے چکے تھے ،

بدین (میڈیا 92 نیوز آن لائن ویب ڈیسک) سوشل میڈیا پر بلیک میلنگ سے تنگ آکر لڑکی نے زہر پی کر اپنی زندگی کا خاتمہ کرلیا۔

میڈیا رپورٹس کے مطابق متوفی لڑکی کے ورثاء کا کہنا ہے ان کی بیٹی کی ایک تحریر سے بلیک میلنگ کا انکشاف ہوا، لڑکی کو ایک نوجوان اور اس کے ساتھی ایڈٹ شدہ تصاویر سے بلیک میل کررہے تھے،

ورثا کا مزید کہنا ہے کہ ان کی بیٹی کو بلیک میل کرنے والوں نے 50 ہزار روپے بھی وصول کیے۔دوسری جانب پولیس کا کہنا ہے شکایت درج کرلی گئی ہے تاہم ملزمان فرار ہیں جن کی تلاش جاری ہے۔

رپورٹ کے مطابق سوشل میڈیا پر کسی کو بلیک میل کرنا قابل سزا جرم ہے جس کے لیے ملک میں سائبر کرائم کا قانون بھی لاگو ہے جس کے تحت ملزمان کو سزائیں بھی سنائی جاچکی ہیں۔

سائبر کرائم کی ایک عام تعریف یہ بیان کی جاتی ہے کہ ہر ایسی سرگرمی جس میں کمپیوٹرز یا نیٹ ورکس کو ایک ہتھیار کے طور پر استعمال کرتے ہوئے کسی کو ہدف یا مجرمانہ سرگرمیاں کی جائیں یا کمپیوٹر کی دنیا سے جڑی ایسی سرگرمیاں جو یا تو غیرقانونی ہو یا انہیں مخصوص فریقین کی جانب سے خلاف قانون سمجھا جائے اور ان میں عالمی الیکٹرونک نیٹ ورکس کو استعمال کیا جائے انہیں سائبر کرائم سمجھا جائے گا۔

لاہور ہائیکورٹ نے وزیراعظم عمران خان کی نا اہلی کے لیے دائر درخواست کی جلد سماعت کی استدعا منظور کرتے ہوئے اس کی سماعت آئندہ ہفتے کے لیے مقرر کردی۔

لاہور (میڈیا 92 نیوز آن لائن ) عدالت عالیہ کے جج جسٹس شاہد وحید نے لائیرز فاؤنڈیشن فار جسٹس کی وزیراعظم عمران خان کی نااہلی سے متعلق دائر درخواست پر جلد سماعت کے لیے مقرر کرنے کی درخواست پر سماعت کی۔

مذکورہ درخواست میں وفاقی حکومت اور وزیر اعظم عمران خان نیازی کو فریق بنایا گیا ہے۔

عدالت نے کیس کی جلد سماعت کی استدعا منظور کرتے ہوئے کیس کی سماعت آئندہ ہفتے مقرر کرنے کا حکم دے دیا۔

درخواست گزار نے عدالت میں موقف اختیار کیا کہ سابق وزیر اعظم نواز شریف کے دور حکومت میں عمران خان نے سول نافرمانی کے لیے لوگوں کو اکسایا، عمران خان نے لوگوں کو ٹیکس نہ دینے اور بیرون ممالک سے رقوم نہ بھیجوانے کی تجویز دی۔

انہوں نے مزید کہا کہ عمران خان نے حامیوں سمیت پارلیمنٹ کی عمارت پر دھاوا بولا اور گیٹ توڑے جبکہ عمران خان نے ملکی سالمیت کے خلاف بھی اقدامات کیے۔

درخواست گزار کا کہنا تھا کہ عمران خان نے ملکی سیاسی نظام کو تباہ کرنے کی کوشش کی اور ساتھ ہی عدالت سے استدعا کی کہ عدالت وزیراعظم عمران خان کو آرٹیکل 62 ون جی کے تحت نا اہل قرار دے۔

انہوں نے مزید استدعا کی کہ عدالت عمران خان کے خلاف 124 اے کے تحت کارروائی کا حکم دے اور معاملہ اہم نوعیت کا ہے، کیس کو جلد سماعت کے لیے مقرر کیا جائے۔

خیال رہے کہ 21 جنوری 2019 کو اسلام آباد ہائیکورٹ نے وزیراعظم عمران خان کی نا اہلی سے متعلق درخواست مسترد کرتے ہوئے ریمارکس دیئے تھے کہ آئندہ ایسی درخواست کی گئی تو جرمانہ کریں گے۔

مذکورہ درخواست حافظ احتشام کی جانب سے عمران خان کی نااہلی کے لیے جولائی 2018 کے انتخابات سے پہلے اسلام آباد ہائیکورٹ میں درخواست دائر کی گئی تھی۔

اسلام آباد (میڈیا 92 نیوز آن لائن ) پاکستان مسلم لیگ ن کے تاحیات سرپرست اعلی اور سابق وزیراعظم نواز شریف نےطبی بنیاد پر ضمانت کی درخواست دوبارہ دائر کر دی ہے۔ نوازشریف نے اپنے وکیل خواجہ حارث کے ذریعےاسلام آباد ہائیکورٹ ہی میں درخواست دائر کی ۔

سابق وزیراعظم نواز شریف نے اپنی درخواست میں چیرمین نیب،سپرنٹنڈنٹ جیل کوٹ لکھپت جیل لاہور اور احتساب عدالت کو فریق بنایاہے۔

درخواست میں برطانیہ، امریکہ اور سوئٹزرلینڈ کے سپیشلسٹ ڈاکٹروں کی رائے کو بھی شامل کیا گیاہے۔

درخواست کے ساتھ لف کی گئی طبی رپورٹس میں ماہر ڈاکٹرز کی طرف سے کہا گیاہے کہ نواز شریف کی جان کو خطرہ ہے،ڈاکٹرز نے لکھا ہے کہ تناؤ کی کیفیت نواز شریف کی جان کے لیے خطرہ ثابت ہو سکتی ہے۔

درخواست میں موقف اختیار کیا گیاہے کہ چھ ہفتے کی ضمانت کے دوران کرائے گئے ٹیسٹس بھی نواز شریف کے جان لیوا مرض کو ظاہر کررہے ہیں۔

درخواست میں ماہرین طب کی رائے کو بنیاد بناکر کہا گیاہے کہ نواز شریف دل کی شریانوں کے عارضے میں مبتلا ہیں،اسی لیے نواز شریف کا علاج بیرون ملک انہی ڈاکٹرز سےکرایا جائے جو پہلےانکا علاج کر چکے ہیں۔

درخواست میں کہا گیاہے کہ نواز شریف کی شریانوں کا عارضہ ہارٹ اٹیک کا سبب بن سکتا ہے جو جان لیوا ہو سکتا ہے۔ بلڈپریشر اور شوگر بھی ابھی تک معمول کے مطابق نہیں ہوپایا۔

درخواست میں کہا گیاہے کہ نواز شریف چاہتے ہیں انکا علاج بیرون ملک انہی ڈاکٹرز سے کرایا جائے جن سے وہ مطمئن ہیں۔

نواز شریف نے اپنی درخواست میں یہ بھی کہا ہے کہ سیاسی مخالفین پروپیگنڈہ کر رہے ہیں کہ بیرون ملک علاج این آر او لینے کی کوشش ہے۔ انہوں نے موقف اختیار کیا کہ اس طرح کا پروپیگنڈہ کرکے مخالفین نہ صرف توہین عدالت کے مرتکب ہورہے ہیں بلکہ صریحا غلط بیانی بھی کررہے ہیں۔

نواز شریف نے اپنی درخواست میں کہا ہے کہ وہ بیمار بیوی کو لندن چھوڑ کر آئے تھے اور جیل میں ہی انہیں انکی اہلیہ کے انتقال کی خبر ملی تھی۔

سابق وزیراعظم نواز شریف نے عدالت سے استدعا کی ہے کہ انہیں بیرون ملک علاج کے لیے طبی بنیادوں پر ضمانت پر رہاکرنے کا حکم دیا جائے ۔

یاد رہی 3مئی کو سپریم کورٹ نے سابق وزیراعظم نواز شریف کی علاج کے لیے بیرون ملک جانے اور ضمانت میں توسیع کی درخواست مسترد کردی تھی ۔

چیف جسٹس آصف سعید کھوسہ کی سربراہی میں جسٹس سجاد علی شاہ اور جسٹس یحیی آفریدی پر مشتمل تین رکنی بینچ نے العزیزیہ ریفرنس میں نواز شریف کی ضمانت میں توسیع اور بیرون ملک علاج کے لئے جانےسے متعلق کیس کی سماعت کی تھی ۔