Category تازہ ترین

ذرائع کے مطابق ایف آئی اے کی جانب سے سلیمان شہباز کو منی لانڈرنگ کیس سے متعلق سوال نامہ دیا گیا، سلیمان شہباز نے سوالات کا جواب دینے کے لیے وقت مانگ لیا۔

یاد رہے کہ سلیمان شہباز منی لانڈرنگ کیس میں اسلام آباد ہائیکورٹ سے حفاظتی ضمانت پر ہیں اور چند روز قبل ہی وہ وطن واپس پہنچے تھے۔

اسلام آباد ہائیکورٹ نے پولیس کو سلیمان شہباز کو گرفتار کرنے سے روکنے کے احکامات جاری کرتے ہوئے وزیراعظم کے صاحبزادے کو عدالت کے روبرو پیش ہونے کا حکم دیا تھا۔

کراچی:قومی کرکٹ ٹیم کے سابق کپتان اظہرعلی نے کرکٹ سے ریٹائرمنٹ کا اعلان کردیا۔

کراچی میں پریس کانفرنس کرتے ہوئے اظہر علی نے کہا کہ کل ہونے والا کراچی ٹیسٹ ان کے کیرئیر کا آخری ٹیسٹ ہو گا۔

اظہر علی کا کہنا تھا کہ ہر چیز کے ختم ہونے کا وقت ہے، میں چار پانچ سال انجری کا شکار رہا، میری فیملی نے میرے کیرئیر کے لیے بہت قربانیاں دیں، امید ہے اب انہیں کافی ٹائم دے سکوں گا۔
 

اسلام آباد: سابق ڈی جی آئی ایس آئی لیفٹیننٹ جنرل (ر) فیض حمید نے کہا ہے کہ وہ کبھی سیاست کا حصہ نہیں بنیں گے۔

جنرل (ر) فیض حمید نے کہا کہ سیاست میں ان کی شمولیت کے حوالے سے باتیں بالکل غلط ہیں، دو سال کی پابندی کے بعد میں سیاست کا حصہ بنوں گا اور نہ ہی اس کے بعد بھی کبھی۔

واضح رہے کہ گزشتہ روز ایک ویڈیو سوشل میڈیا پر وائرل ہوئی تھی جس میں فیض حمید نے اپنے آبائی گاؤں چکوال میں ایک عوامی اجتماع میں شرکت کی تھی۔

اجتماع میں ایک نامعلوم شخص نےعوامی اجتماع سے خطاب کرتے ہوئے ریٹائرڈ جرنیل کی فوج کیلئے اور اپنے علاقے کیلئے خدمات پر ان کی تعریف بھی کی۔

ویڈیو میں ہی دیکھا جا سکتا ہے کہ اس شخص نے ریٹائرڈ جرنیل کو سیاست میں شرکت کی دعوت دی اور کہا کہ وہ ملک کی ترقی کیلئے کردار ادا کریں۔
 

16 دسمبر 2014 کو آج ہی کے دن پشاور میں آرمی پبلک سکول پردہشت گردوں نے حملہ کرکے معصوم بچوں کونشانہ بنایا اور100 سے زیادہ طلباء کو بے دردی سے شہید کردیا۔

شہدا کے والدین آج بھی صدمے سے نڈھال ہیں، جن والدین کے بچے بچ گئے وہ بھی اس ہولناک دن کوفراموش نہیں کر سکے، دہشت گردوں نے سکول پر حملہ کر کے علم کی شمع بجھانا چاہی لیکن قوم کے حوصلے پست نہ ہوئے۔

اپنے پیاروں کو کھونے کے بعد قوم نے نئے عزم کے ساتھ دہشتگردوں کا مقابلہ کرنے کی ٹھانی جبکہ حکومت نے بھی انسداد دہشت گردی کے لئے قومی ایکشن پلان شروع کیا۔

دہشت گردوں نے مستقبل کے معماروں کونشانہ بنا کرملک اور سکیورٹی اداروں کا حوصلہ توڑنے کی کوشش کی لیکن ملک بھر میں جاری تعلیمی سرگرمیاں ملک دشمنوں کو پیغام دے رہی ہیں کہ قوم کےعزم میں کوئی تبدیلی نہیں آئی، شہداء کی قربانیاں رائیگاں نہیں جائیں گی۔

دہشت گردوں کے سفاکانہ حملے میں دسویں جماعت کا طالب علم اسفند خان بھی گولیوں کا نشانہ بن گیا تھا، اسفند ماں باپ کا سب سے بڑا بیٹا تھا، اس لئے والدین کی انسیت بھی اس سے زیادہ تھی، والدین نے جگر کے ٹکڑے کا سامان اب بھی اسی طرح سنبھال رکھا ہے۔

دہشت گردوں نے علم کی شمع روشن کرنے والی سکول ٹیچر فرحت عباس کو بھی شہید کردیا گیا تھا، فرحت عباس گولیوں کی آواز سن کر سکول میں موجود اپنے بچوں کی طرف دوڑیں اورانہیں سیڑھیوں میں گولیوں کا نشانہ بنادیا گیا، آج بھی شہید فرحت عباس کی یاد ان کے خاندان کو غمگین کر دیتی ہے۔

شہید حسن زیب کے والد نے ایک کمرے میں بیٹے کے استعمال کی تمام چیزیں رکھ دی ہیں، بچپن کی تصاویر بھی حسن زیب کے کمرے کی زینت بن گئی ہیں، جہاں اس کے استعمال کے پرفیوم کے ساتھ یونیفارم اور دیگر سامان بھی پڑا ہے لیکن گھر میں اب صرف حسن زیب کی یادیں ہی ہیں۔

آڈیٹوریم ہال میں دہشت گردوں کے سامنے سینہ سپر ہونے اور بچوں کی جان بچانے کے دوران قوم کی بہادر بیٹی بینش نے شہادت پائی، ہمت اور حوصلے کی نئی داستان رقم کرنے پربینش شہید کو تمغہ شجاعت سے نوازا گیا۔

15 سالہ اسامہ طاہراعوان بھی ان شہداء میں شامل ہے، اسامہ کے والدین کے زخم ابھی بھی تازہ ہیں، اسامہ کےاستعمال کی اشیاء آج بھی کمرے کی زینت ہیں، میڈل سے لے کر کتابیں اورکیمرہ اس کی یاد دلاتا ہے۔

واضح رہے کہ 16 دسمبر 2014 کو دہشت گردوں نے آرمی پبلک سکول ورسک روڈ پشاور کے اندر قتل عام کرتے ہوئے سکول کے طلبا اور پرنسپل طاہرہ قاضی شہید سمیت 150 افراد کو مار ڈالا تھا۔
 

تفصیلات کے مطابق وزیراعظم شہباز شریف کی زیر صدارت مسلم لیگ ن کا مشاورتی اجلاس ہوا جس میں مسلم لیگ ن کی قیادت نے حکومت کی جانب سے ریلیف پر توجہ مرکوز کرنے کا فیصلہ کیا۔

دوران اجلاس وزیراعظم شہباز شریف نے ہدایت کی کہ آئندہ سیاسی اجتماعات میں حکومتی معاشی اقدمات اور ریلیف کو اجاگر کیا جائے۔

وزیراعظم نے اجلاس سے خطاب کرتے ہوئے کہا کہ اتحادی حکومت نے تباہ حال معیشت کو آ کر سنبھالا، عمران خان کی پالیسیاں ملک کو سری لنکا کی سی صورتحال کی طرف لے جارہی تھیں، اتحادی حکومت عوام کو مزید ریلیف دینے کے اقدمات کررہی ہے۔

شہباز شریف نے مزید کہا کہ پی ٹی آئی حکومت اور موجودہ حکومت کے درمیان معاشی اقدامات کے فرق کو اجاگر کیا جائے، ورکرز کنونشن میں حکومتی پالیسیوں کو مثبت انداز میں اجاگر کیا جائے۔

وزیراعظم نے پارٹی قیادت کو ہدایت کی کہ حکومتی معاشی اقدامات اور ریلیف کو اجاگر کیا جائے جبکہ ملک کے دیوالیہ ہونے کے حکومت مخالف بیانیے کی جتنا ہو سکے نفی کریں۔
 

اسلام آباد: وفاقی وزیر برائے اقتصادی امور ایاز صادق نے کہا ہے کہ ایشیائی ترقیاتی بینک سے معاہدے ثبوت ہیں کہ پاکستان ڈیفالٹ نہیں کررہا۔

اسلام آباد میں  میڈیا بریفنگ کے دوران ایاز صادق نے کہا  کہ ایشیائی ترقیاتی بینک کے ساتھ کچھ پراجیکٹس سائن کررہے ہیں، اے ڈی بی سے اچھی شرائط پر 2.7 ارب ڈالرکے قرض کا معاہدہ کیا ہے۔

وفاقی وزیر نے بتایا  کہ صرف اپریل سے اب تک 2.3 ارب ڈالرکےقرض کے معاہدے کیے ہیں، اگر پاکستان کے ڈیفالٹ کا خدشہ ہوتا تو یہ معاہدے نہیں ہوسکتے تھے ، معاہدے ثبوت ہیں کہ پاکستان ڈیفالٹ نہیں کررہا، صرف افواہیں پھیلائی جارہی ہیں۔

انہوں مزید کہا کہ جو تاثر پھیلایا جارہا ہے کہ پاکستان بینکرپٹ ہورہا ہے یا مالی مسائل میں ہے ایسی کوئی بات نہیں، اگر ایسی کوئی صورتحال ہوتی تو معاہدہ نہ ہوتا، اے ڈی بی کو اعتماد ہے اس لیے سائن کررہے ہیں۔

اسلام آباد: اسلام آباد کی مقامی عدالت نے سینیٹراعظم سواتی کے جوڈیشل ریمانڈ میں 14 روزہ کی توسیع کرتے ہوئے وکلا کو ملاقات کی اجازت دیدی۔

اسلام آباد کی مقامی عدالت میں اعظم سواتی کیس کی سماعت ہوئی، سینیٹر اعظم سواتی کو عدالت میں پیش نہیں کیا گیا، پی ٹی آئی سینیٹر کی ویڈیو لنک کے ذریعے حاضری لگوائی گئی۔

دوران سماعت تفتیش افسر نے کہا کہ ٹوئٹر سے ریکارڈ اور ٹیکنیکل رپورٹ آنا باقی ہے، عدالت نے تفتیشی افسر کو ہدایت کی کہ ضمنی چالان تو پیش کریں، نوٹس دے رہے ہیں آئندہ سماعت پر چالان نہ آیا تو آپ کی تنخواہ بند ہو گی۔

عدالت نے اعظم سواتی سے استفسارکیا کہ سواتی صاحب آپ کیسے ہیں؟ اعظم سواتی نے جواب دیا کہ میں ٹھیک ہوں ،قانون کی حکمرانی کیلئے جدوجہد جاری رکھیں، آزاد عدلیہ کیلئے جدوجہد جاری رکھیں ۔

وکیل بابراعوان کی جانب سے درخواست دائر کی گئی جس میں استدعا کی گئی کہ اعظم سواتی سے ملاقات کی اجازت دی جائے۔

مقامی عدالت کے جج محمد شبیر نے وکیل بابراعوان کی درخواست منظور کرتے ہوئے ملاقات کی اجازت دیدی۔

فاضل جج محمد شبیر نے کہا کہ ملاقات کا وقت طے کر لیں، جیل حکام کو حکم جاری کر دیتے ہیں۔ بعدازاں عدالت نے اعظم سواتی کے جوڈیشل ریمانڈ میں 14 روز کی توسیع کردی۔ 

اعظم سواتی پر سندھ میں درج مقدمات ختم، عدالت کا3 دن میں رپورٹ پیش کرنیکا حکم
قبل ازیں سندھ میں پی ٹی آئی رہنما اعظم سواتی کے خلاف درج مقدمات منسوخ کردئیے گئے۔

سندھ ہائیکورٹ میں پی ٹی آئی رہنما اعظم سواتی کےخلاف سندھ میں درج مقدمات کےخلاف درخواست کی سماعت ہوئی جس سلسلے میں آئی جی سندھ غلام نبی میمن اور پراسیکیوٹر جنرل سندھ فیض شاہ عدالت میں پیش ہوئے۔

پراسیکیوٹر جنرل سندھ نے عدالت کو بتایا کہ اعظم سواتی کے خلاف پرائیوٹ افراد نے مقدمات درج کرائے تھے، قانون کے مطابق ان افراد کا بیان قلم بند کرنے کے پابند تھے، ان معاملات کو قانون کے مطابق دیکھا جائے گا۔

پراسیکیوٹر جنرل نے کہا کہ اعظم سواتی کی کسٹڈی اسلام آباد منتقل کردی گئی ہے اور ان کے خلاف مقدمات سی کلاس کردئیے ہیں لہٰذا تمام درخواستیں اب غیر موثر ہوچکی ہیں۔

اس موقع پر وکیل درخواست گزار نے کہا کہ آئی جی سندھ نے اچھا کام کیا ہے۔

پراسیکیوٹر جنرل کے بیان پر جسٹس کے کے آغا نے کہا کہ سندھ حکومت اور آئی جی سندھ نے اس معاملے کو حل کیا ان کو کریڈٹ جاتا ہے، اعظم سواتی کے خلاف سندھ میں کوئی اور مقدمہ نہیں ہونا چاہیے اور مقدمات ختم کرنے کی حتمی رپورٹ 3 دن میں پیش کی جائے۔

دوسری جانب دورانِ سماعت آئی جی سندھ نے گزشتہ سماعت سے متعلق ایک مرتبہ پھر عدالت سےمعذرت کر لی اور کہا کہ گزشتہ سماعت پر جو ہوا اس پر معذرت چاہتا ہوں۔

علاوہ ازیں عدالت کے باہر میڈیا سے گفتگو میں پراسیکیوٹر جنرل سندھ نے کہا کہ اعظم سواتی کے خلاف درج 34 مقدمات سی کلاس کردئیے ہیں، آئی جی نے متعلقہ عدالتوں کو مقدمات سی کلاس کرنے کی سفارش کی، سندھ ہائیکورٹ کے 2 رکنی بینچ نے تینوں درخواستیں نمٹادی ہیں۔

اس موقع پر اعظم سواتی کے بیٹے عثمان سواتی کے وکیل انور منصور ایڈووکیٹ نے کہا کہ پراسیکیوٹر جنرل اور پولیس نے کہا کہ اعظم سواتی کے خلاف مقدمات سی کلاس کردئیے، سی کلاس کا مطلب ہے یہ کیسز نہیں بنتے، میں نے نکتہ اٹھایا کہ ان کیسز کو عدالتی طریقہ کار سے ختم کیا جائے اور عدالتی طریقہ کار کا مطلب ہے کہ وہ کیسز متعلقہ جوڈیشل مجسٹریٹ سے ہی ختم کیے جائیں گے جس کے تحت پولیس جوڈیشل مجسٹریٹ کی عدالت میں سی کلاس کی رپورٹ پیش کرے گی۔

سندھ پولیس نے پی ٹی آئی رہنما اعظم سواتی کو اسلام آباد منتقل کر دیا
دوسری جانب مقدمات ختم ہونے پر سندھ پولیس نے پی ٹی آئی رہنما اعظم سواتی کو اسلام آباد پولیس کے حوالے کر دیا۔

پراسیکیوٹر جنرل سندھ نے سندھ ہائیکورٹ کو بتایا کہ اعظم سواتی کے خلاف صوبے میں درج 34 مقدمات سی کلاس کردیئے گئے ہیں اور ان کی کسٹڈی اسلام آباد کو دے دی گئی ہے۔

ذرائع کے مطابق مقدمات ختم ہونے کے بعد پولیس نے پی ٹی آئی رہنما کو اب سکھر سے اسلام آباد پہنچا دیا ہے۔

اعظم سواتی کو سکھرسے خصوصی طیارے کے ذریعے اسلام آباد لایا گیا جہاں اسلام آباد پولیس کے ایس پی رخسار مہدی اعظم سواتی کو اپنے ساتھ لے گئے۔

چیئرمین پاکستان تحریک انصاف ( پی ٹی آئی) عمران خان نے ایک بار پھر الزام عائد کیا ہے کہ پاک فوج کے سابق سربراہ جنرل ریٹائرڈ قمر جاوید باجوہ نے کرپٹ ٹولے کو این آر او ٹو دیا، آج سارے کرپٹ دھل کر پاک ہو رہے ہیں۔

ملک بھر کے طلبا سے ویڈیو لنک کے ذریعے خطاب میں عمران خان کا کہنا تھا ملک پر اصل ظلم جنرل ریٹائرڈ قمر جاوید باجوہ نے چوروں کو این آراو ٹو دے کر کیا، ایک سازش کے تحت اُس حکومت کو گرایا گیا جس پر کرپشن کا کوئی کیس نہیں تھا، چوروں کو ہمارے اوپر مسلط کیا گیا، اب سارے کرپٹ این آر او کی گنگا میں دھل کر پاک ہو رہے ہیں۔

عمران خان کا کہنا تھا مقصود چپڑاسی کیس میں مفرور سلیمان شہباز بھی واپس آگیا، ہمیں لیکچر دے رہا ہے جبکہ نواز شریف واپسی کے لیے پر تول رہے ہیں، زرداری پر کرپشن کیسز ختم ہوئے، ان کی بہن بھی پاک ہو گئیں۔

چیئرمین تحریک انصاف نے مزید کہا کہ انسان کے معاشرے میں انصاف ہوتا ہے جبکہ جانوروں کے معاشرے میں طاقت کی حکمرانی ہوتی ہے، جو معاشرے خوشحال ہیں سب سے زیادہ انصاف وہیں ہوتا ہے۔

کراچی:  قومی ٹیم کے بیٹنگ کوچ محمد یوسف نے کہا ہےکہ ہماری ٹیم دونوں ٹیسٹ ہار کر لڑی اور ہماری ٹیم کی بیٹنگ کو ناکام کہنا درست نہیں۔

جیونیوز سے خصوصی گفتگو کرتے ہوئے بیٹنگ کوچ محمد یوسف نے کہاکہ کراچی کی پچ ملتان سے ملتی جلتی لگ رہی ہے، یہ پچ ملتان کی نسبت زیادہ سفید نہیں ہے، ہماری پچ ایسی نہیں کہ پہلے گھنٹے میں بال ٹرن ہونا شروع ہوجائے یا ٹوٹ جائے، پچ سلو ضرور ہوسکتی ہے البتہ میں میں پچ ایکسپرٹ نہیں ہوں۔

انہوں نے کہا یہ تاثر غلط ہے کہ پاکستان ٹیم کی بیٹنگ نہیں چل رہی ہے، میں بیٹنگ کوچ ہوں اس وجہ سے ایسا نہیں بول رہا، ٹیم کی مجموعی بیٹنگ پرفارمنس پر تنقید سمجھ میں آتی ہے لیکن یہ کہنا ہے بیٹنگ ناکام ہورہی ہے درست بات نہیں۔

محمد یوسف کا کہنا تھا کہ بہتری کی گنجائش ہے جس کی کوشش کررہے ہیں، رضوان کی ٹیسٹ میں بیٹنگ تکنیک کا مسئلہ نہیں ہے، رضوان نے اتنی کرکٹ کھیلی ہے تھوڑی ٹیوننگ کرنا ہوتی ہے، ان کی بیٹنگ ٹیوننگ پر بات چل رہی ہے اور اس پر کام کیا جارہا ہے جب کہ جو بال رضوان یا بابر کو ہوئی وہ بہت اچھی پڑی۔

انہوں نےمزید کہا کہ کراچی ٹیسٹ جیتنے کے لیے جائیں گے، یہ ٹیسٹ نہ انگلینڈ اور نہ ہی ہم ڈرا کرنا چاہیں گے، ہماری ٹیم جیت کے لیے میدان میں اترے گی، سیریز کا اختتام جیت پر ہو تو آنے والی سیریز پر اس کا اچھا اثر پڑتا ہے۔

بیٹنگ کوچ کا  کہنا تھا کہ پنڈی اور ملتان ٹیسٹ پاکستان ٹیم لڑ کر ہاری ہے، ہماری ٹیم انگلینڈ کی نسبت ٹیسٹ کرکٹ میں ناتجربہ کار ہے، ٹیسٹ میں سیشن بائی سیشن پلاننگ کرنا ہوتی ہے، قومی کھلاڑیوں کے پاس ٹیسٹ کرکٹ کا زیادہ تجربہ نہیں، کم تجربے کے باوجود پاکستان کھلاڑیوں نے اچھا پرفارم کیا

پاک افغان بارڈر پر پاکستانی اور افغان فورسز کے درمیان جھڑپیں ہوئی ہیں جس میں خواتین سمیت 15افراد زخمی ہوگئے۔

سکیورٹی حکام کے مطابق پاک افغان بارڈرکلی شیخ لعل محمد میں پاکستانی اورافغان بارڈرفورسز کےدرمیان جھڑپیں ہوئی ہیں جس میں افغان فورسز کی جانب سے شہری آبادی کو دوبارہ نشانہ بنایا گیا ہے۔

لیویز حکام نے بتایا کہ بوغرا اورکسٹم ہاؤس کے علاقے میں آرٹلری کے متعدد گولےگرے جس کے بعد شہریوں کو مال روڈ، بوغرا روڈ، بائی پاس اوربارڈر روڈ خالی کرنےکی ہدایت کی گئی ہے جب کہ ڈی ایچ کیو اسپتال چمن میں ہنگامی حالت نافذ کردی گئی ہے۔

سیکرٹری صحت بلوچستان صالح محمد ناصر کا کہنا ہے کہ کوئٹہ کے اسپتالوں میں بھی ایمرجنسی نافذ کر دی گئی ہے، سول، بی ایم سی اسپتال اور ٹراما سینٹر میں ایمرجنسی نافذ کر دی گئی ہے۔

سیکرٹری صحت کے مطابق جنرل سرجنز، آرتھوپیڈک سرجنز، انستھیزیا اسپیشلسٹ دیگرعملہ چمن روانہ کر دیا گیا ہے، کنسلٹنٹس، ڈاکٹرز، فارماسسٹس، اسٹاف نرسز اورپیرا میڈیکل اسٹاف کو بھی اسپتالوں میں طلب کر لیا گیا ہے۔

حکام کا کہناہےکہ افغان فورسز  کی جارحیت پر پاکستانی فورسز نے بھی بھرپور جوابی کارروائی کی اور بھاری توپ خانےکا استعمال کیا۔

حکام کے مطابق شیخ لعل محمد سیکٹرمیں باڑکی مرمت پر افغان فورسز کی مداخلت پر تصادم شروع ہوا جس دوران بارڈر شاہراہ کے قریب گولا گرنے سے ایک موٹرسائیکل سوار زخمی ہوا ہے جب کہ گھروں میں متعدد گولے گرنے سے خواتین اور  بچوں سمیت 15 افراد زخمی ہوئے۔

پولیس کے مطابق علاقے میں کشیدگی کے باعث بارڈر روڈ، مال روڈ اور  بوغرا روڈ پرشدید ٹریفک جام ہے جب  کہ کسٹم ہاؤس اور کراچی کوچ ٹرمینل خالی کرالیا گیا ہے۔

واضح رہے کہ چند روز قبل بھی افغان فورسز نے چمن میں بارڈر کے قریب واقع شہری آبادی پر فائرنگ کی تھی جس کے نتیجے میں 6  پاکستانی شہری شہید ہوئے۔