Category تازہ ترین

کراچی: حکومت سندھ نے صوبے بھر میں سکیورٹی کے سخت اقدامات کرنے کا فیصلہ کرلیا۔

تفصیلات کے مطابق وزیراعلیٰ سندھ مراد علی شاہ کی زیر صدارت 26 ویں ایپکس کمیٹی کا اجلاس ہوا، جس میں امن و امان سے متعلق بتایا گیا کہ صوبے میں کچھ قبائلی جرگے ہوئے ہیں جس میں کافی لوگ قتل ہوئے، سدوزئی، چاچڑ فساد میں 12 لوگ قتل ہوئے، طیغانی بجارانی فساد میں 28 لوگ قتل کیے جاچکے ہیں۔

آئی جی نے اجلاس کو کچے کے آپریشن کے حوالے سے بریفنگ دیتے ہوئے بتایا کہ 2021 میں گھوٹکی کے کچے کے علاقے میں 89 انکاونٹر، سکھر 75، کشمور 73 اور شکاپور میں 68 انکائونٹر کیے گئے، گھوٹکی میں 3 گینگس ، سکھر میں 6، کشمور میں 25 اور شکارپور میں 15 گینگز کا خاتمہ کیا گیا، سکھر میں 9 ڈاکو مارے گئے، گھوٹکی سے 2 مغوی بازیاب ، سکھر سے 2، کشمور سے 39 اور شکارپور سے 40 بازیاب کیے۔

وزیراعلیٰ سندھ نے پولیس کو ہدایت کی کہ اسلحے کی سپلائی لائن ختم کردی جائے، ڈاکو اور کالعدم تنظیموں کے درمیان بڑھتے رابطوں پر کھڑی نظر رکھیں اور ان کے خلاف کارروائی کریں۔ وزیراعلیٰ سندھ نے کچے کے علاقے میں روڈ نیٹ ورک قائم کرنےاور گھوٹکی ، کشمور برج سے نکلنے والی دیگرروڈز بھی بنانے کا اعلان کیا۔

اجلاس میں افغان صورتحال کے باعث صوبے بھر میں سیکیورٹی کے سخت اقدامات کرنے کا فیصلہ کیا گیا، اور وزیراعلیٰ سندھ نے اداروں کو تمام کالعدم تنظیموں پر کھڑی نظر رکھنے کی ہدایت دے دی، اجلاس میں کالعدم تنظیموں ، مذہبی اور دیگر شرپسند عناصر پر کھڑی نگرانی رکھنے کا اعلان کرتے ہوئے وزیراعلیٰ سندھ نے سوشل میڈیا سے نفرت آمیز مواد اور دیگر مشکوک ایکٹیویٹیز پر نظر رکھنے کی ہدایت جاری کی اور کہا کہ کچھ عناصر فرقہ ورانہ نفرتوں کو بڑھانے کی کوشش کریں گے، جن کو کسی صورت برداشت نہ کیا جائے، میں چند علماء کرام سے اجلاس کروں گا ہمیں اپنے صفوں میں محبت ، بھائی چارگی اور اتحاد قائم کرنا ہے، وزیراعلیٰ سندھ کا تمام قانون نافذ کرنے والے اداروں کو آپس میں کوآرڈینیشن کو مزید مستحکم کرنے کی بھی ہدایت کی۔

اجلاس میں نجی سیکوریٹی گارڈز کی رجسٹریشن کے حوالے سے بریفنگ دیتے ہوئے بتایا گیا کہ سیکورٹی گارڈ ز کی رجسٹریشن پر کام جاری ہے۔ وزیراعلیٰ سندھ کا کہنا تھا کہ غیر رجسٹریشن گاڑیوں پر مسلح گارڈ ز بیٹھے نظر آتے ہیں، اسلحے کی نمائش پر ہم نے پہلے سے پابندی عائد کی ہے، اس قسم کی گاڑیوں کو بند کیا جائے، اس قسم کی اسلحے کی نمائش ناقابل قبول ہیں، غیر رجسٹرڈ یا اے ایف آر والی گاڑیوں کے خلاف کارروائی کی جائے، وزیراعلیٰ نے موبائل فون کے چوری کے پارٹس خریدو فروخت کرنے والی مارکیٹس اور افراد کے خلاف کارروائی کی ہدایت کرتے ہوئے آئی جی کو کہا کہ مجھے ہر صورت اسٹریٹ کرائم پر کنٹرول چاہیے، پولیس کو سخت اقدامات کرنے ہوں گے۔

وفاقی وزیر منصوبہ بندی اور نیشنل کمانڈ اینڈ آپریشن سینٹر (این سی او سی) کے چیئرمین اسد عمر نے خبردار کیا ہے کہ تمام شعبہ ہائے زندگی سے تعلق رکھنے والے افراد 31 اگست سے قبل ویکسینیشن کرالیں بصورت دیگر انہیں کام کرنے کی اجازت نہیں ہوگی۔

اسلام آباد میں وزیراعظم کے معاون خصوصی برائے صحت ڈاکٹر فیصل سلطان کے ساتھ پریس کانفرنس میں اسد عمر نے کہا کہ قانون نافذ کرنے والے اداروں میں کام کرنے والے افراد اور 18 سال یا اس سے زائد عمر کے طلبہ کے لیے 31 اگست تک ویکسینیش کرانا لازمی ہے۔

علاوہ ازیں چیئرمین این سی او سی نے اسمارٹ لاک ڈاؤن کی اہمیت پر زور دیتے ہوئے افسوس کا اظہار کیا کہ ملک میں تاحال کورونا وبا سے متعلق غیر سنجیدہ رویہ پایا جاتا ہے، ایس او پیز پر عملدر آمد کی سب سے کم شرح سندھ، بلوچستان میں ریکارڈ کی گئی۔

‘پورے پورے شہر ہفتوں کے لیے بند نہیں کرسکتے’
اسد عمر کا کہنا تھا کہ ہم نے دنیا میں وبا سے رونما ہونے والے مسائل اور اس کے نتیجے میں جنم لینے والے حالات کے تناظر میں ڈیٹا پر مبنی نظام تشکیل دیا اور اب ہمیں دوبارہ اس نظام کو رائج کرنے کی ضرورت ہے۔

انہوں نے کہا کہ پورے پورے شہر ہفتوں کے لیے بند کریں یہ مسئلے کا علاج نہیں ہے اور علاج یہ ہے کہ متاثرہ علاقے یا محلے کا اسمارٹ لاک ڈاؤن اور ایس او پیز پر عمل کرکے کامیابی حاصل کرسکتے ہیں۔

‘ایس او پیز پر عملدر آمد کی سب سے کم شرح سندھ اور بلوچستان میں ریکارڈ’
اسد عمر نے اعداد و شمار کا حوالے دے کر بتایا کہ ایس او پیز پر عملدر آمد کی سب سے زیادہ شرح اسلام آباد میں 56.4 فیصد جس کے بعد بتدریج خیبرپختونخوا میں 46.6 فیصد، آزاد جموں و کشمیر 42.7 فیصد، گلگت بلتستان میں 37.4 فیصد اور پنجاب میں 38 فیصد ریکارڈ کی گئی۔

چیئرمین این سی او سی نے بتایا کہ ایس او پیز پر عملدر آمد کی سب سے کم شرح سندھ اور بلوچستان میں ریکارڈ کی گئی جو محض 33 فیصد تھی۔

انہوں نے کہا کہ خصوصاً کراچی میں ہدایات سے متعلق عملدرآمد کو یقینی بنانے کے لیے حکومت سندھ کے ساتھ تعاون کریں گے اور اس سلسلے فوج یا رینجرز کی معاونت بھی فراہم کی جاسکتی ہے۔

اسد عمر نے ویکسین سے متعلق کہا کہ جو لوگ اب بھی ویکسین کی اہمیت نہیں سمجھ رہے اور ان کی وجہ سے دوسروں کی زندگی کو خطرہ ہے تو ایسے حالات میں مخصوص نوعیت کی بندش کا وقت آگیا ہے۔

’31 اگست کے بعد مختلف بندش کا اطلاق ہوگا’
انہوں نے کہا کہ کم از کم ایک ویکسین لگوانے والے ہی یکم اگست سے فضائی سفر کرسکیں گے اور اسی طرح سے وہ اساتذہ جنہوں نے اب تک ویکسین نہیں کرائی وہ اسکول، کالج یا کسی بھی تدریسی مرکز میں جا کر نہیں پڑھا سکیں گے۔

اسد عمر نے واضح کیا کہ 31 اگست سے مزید کئی سیکٹرز ہیں جہاں بندش کا اطلاق ہوگا مثلاً بچوں کو اسکول لے جانی والی ویگن، بس یا دیگر گاڑیوں کے ڈرائیورز اور اس کے کنڈیکٹرز کے لیے ویکسینیشن کرانا لازمی ہوگا ورنہ انہیں یہ کام کرنے کی اجازت نہیں ہوگی۔

چیئرمین این سی او سی نے کہا کہ قانون نافذ کرنے والے اداروں میں کام کرنے والے افراد اور 18 سال یا اس سے زائد عمر کے طلبہ کے لیے 31 اگست تک ویکسینیش کرانا لازمی ہے۔

ان کا کہنا تھا کہ پبلک سیکٹر، بینک، نادرا، پراپرٹی آفس میں کام کرنے والے عملے کے لیے بھی 31 اگست آخری تاریخ ہے اگر وہ اپنی ویکسینیشن نہیں کراتے تو انہیں دفتر میں داخل ہونے کی اجازت نہیں ہوگی۔

انہوں نے کہا کہ شادی ہالز، شاپنگ مال، سپر اسٹورز، الیکٹرونک مارکٹیں وغیرہ میں کام کرنے والا عملہ بھی ویکسینیشن کرائے بصورت دیگر انہیں کام کرنے کی اجازت نہیں ہوگی۔

اسد عمر نے واضح کیا کہ کچھ وقت جائزہ لینے کے بعد ایک اور فہرست پیش کی جائے گی اور اس کے لیے ایک نئی تاریخ رکھی جائے گی۔

کراچی میں ملک کے دیگر حصوں کے مقابلے میں وبا تیزی سے پھیل رہی ہے، ڈاکٹر فیصل
اس سے قبل وزیراعظم کے معاون خصوصی برائے صحت ڈاکٹر فیصل سلطان نے کہا ہے کہ ملک میں کورونا وائرس کے کیسز میں غیرمعمولی اضافہ ہورہا ہے جبکہ کراچی میں ملک کے دیگر حصوں کے مقابلے میں وبا تیزی سے پھیل رہی ہے۔

انہوں نے کہا کہ گزشتہ 24 گھنٹے میں انتہائی نگہداشت یونٹ میں زیر علاج مریضوں کی تعداد 3 ہزار سے تجاوز کرچکی ہے۔

ڈاکٹر فیصل نے کہا کہ جب ہم بہتر صورتحال میں تھے تب جون میں ایسے مریضوں کی تعداد 2 ہزار سے نیچے تھی جو اب ایک واضح اضافہ ہے جس کی بنیادی بڑی وجہ ایس او پیز پر عملدرآمد کرنا نہیں ہے۔

انہوں نے کہا کہ کراچی میں کورونا کے کیسز میں تیزی دیکھنے میں آرہی ہے اور شہر میں قائم کورونا کے انتہائی متاثرہ افراد کے لیے مختص کُل بیڈز میں سے 50 فیصد زیر استعمال ہیں۔

ڈاکٹر فیصل نے واضح کیا کہ بڑے شہروں میں کورونا کے کیسز کے بڑھنے سے اس کا دباؤ ہسپتالوں پر پڑ رہا ہے، کراچی میں نجی ہسپتال پر دباؤ زیادہ ہے اور اگر صورتحال ایسے ہی برقرار رہی تھی نتائج سنگین ہوسکتے ہیں۔

وفاقی تحقیقاتی ایجنسی (ایف آئی اے) نے وزیر اعظم کے معاون خصوصی برائے احتساب شہزاد اکبر کی جانب سے درج کرائے گئے مقدمے میں پاکستان تحریک انصاف (پی ٹی آئی) کے رکن صوبائی اسمبلی نذیر چوہان کا دو روزہ جسمانی ریمانڈ حاصل کرلیا۔

ایف آئی اے نے گرفتار ایم پی اے کو ضلعی عدالت میں جوڈیشل مجسٹریٹ یوسف عبد الرحمٰن کے رو برو پیش کیا اور عدالت سے ان کے 14 روزہ جسمانی ریمانڈ کی استدعا کی تھی۔

ایف آئی کے وکیل نے عدالت سے استدعا کی تھی کہ ملزم سے تفتیش مکمل کرنی ہے جسمانی ریمانڈ دیا جائے۔

ان کا کہنا تھا کہ نذیر چوہان نے سوشل میڈیا کا استعمال کر کے مدعی کے خلاف مواد اپ لوڈ کیا، ایف آئی اے نذیر چوہان سے ان کے سوشل میڈیا اکاؤنٹس ریکور کرے گا۔

انہوں نے کہا کہ ‘ریمانڈ کے دوران ایم پی اے نذیر چوہان کے زیر استعمال ڈیجیٹل میڈیا کی ریکوری عمل میں لائی جائے گی’۔

تاہم عدالت نے ملزم کے دو روزہ جسمانی ریمانڈ کو منظور کرتے ہوئے ایف آئی اے کو 31 جولائی کو ملزم کو دوبارہ پیش کرنے کا حکم دیا۔

نذیر چوہان کے خلاف ایک اور مقدمہ درج
لاہور کے تھانہ گرین ٹاؤن میں ایم پی اے نذیر چوہان اسٹیشن ہاؤس آفیسر (ایس ایچ او) تھانہ صغیر احمد کی مدعیت میں ایک اور مقدمہ بھی درج کرلیا گیا۔

درج کی گئی ایف آئی آر میں کارِ سرکار میں مداخلت، جان سے مارنے کی دھمکیوں سمیت دیگر دفعات شامل کی گئی ہیں۔

ایف آئی آر کے متن میں کہا گیا کہ آزاد کشمیر انتخابات کے روز ایم پی اے نذیر چوہان اپنے کوآرڈینیٹر اور 25 نا معلوم افراد کے ہمراہ پولنگ اسٹیشن آئے اور ایس ایچ او سے بد تمیزی کی۔

اس میں مزید کہا گیا کہ نذیر چوہان نے پولنگ اسٹیشن کے اندر زبردستی جانے کی کوشش کی تاہم روکنے پر انہوں نے پولیس کو جان سے مارنے کی دھمکیاں بھی دیں۔

واضح رہے کہ اس سے قبل وزیراعظم کے مشیر احتساب شہزاد اکبر نے رواں برس مئی کے اواخر میں اپنے خلاف متنازع بیان دینے پر جہانگیر ترین ہم خیال گروپ کے رکن صوبائی اسمبلی نذیر چوہان کے خلاف مقدمہ درج کرایا تھا۔

ایف آئی آر میں شہزاد اکبر کی جانب سے کہا گیا تھا کہ رکن اسمبلی اور پی ٹی آئی رکن نذیر چوہان نے نجی چینل ‘بول’ میں ایک پروگرام کے دوران ان کے عقیدے سے متعلق جھوٹ پر مبنی الزام لگایا۔

ایف آئی آر کے مطابق مشیر نے مؤقف اختیار کیا تھا کہ ’نذیر چوہان نے میرے مذہبی عقائد کو نقصان پہنچا کر میرے وقار، ملکیت اور جان کو خطرے میں ڈال دیا ہے‘۔

دوسری جانب سپیکر چوہدری پرویز الہٰی کی زیر صدارت پنجاب اسمبلی کا اجلاس ہوا تو پروڈکشن آرڈر جاری کیے جانے کے باوجود نذیر چوہان کو اسمبلی میں نہ لائے جانے پر انہوں نے شدید برہمی کا اظہار کرتے ہوئے کہا کہ ابھی تک نذیر چوہان کو پیش کیوں نہیں کیا گیا، کیا یہ پارلیمنٹ کے ساتھ لڑائی چاہتے ہیں، ہم نے ممبران کے استحقاق کا بل مشترکہ طور پر پاس کیا ہے، جس میں لکھا ہے کہ جو ممبران کا استحقاق مجروح کرے گا اسے سزا ملے گی۔

پرویز الہٰی نے کہا کہ ان بیوروکریٹس کی کیا حیثیت ہے، ہم یہ بل ختم نہیں ہونے دیں گے، یہ جنگل نہیں نہ کسی کو ٹارزن بننے دیں گے، جب تک نذیر چوہان کو پراڈکشن آرڈر پر نہیں لائیں گے، روز اجلاس ہوگا اور روز نذیر چوہان پر بات ہوگی، حکومت کو کوئی قانون نہیں بنانے دیں گے، حکومت کا رویہ قابل افسوس ہے، جمعے کو دوپہر دو بجے کے بعد اجلاس ہو گا اور صرف نذیر چوہان پر بات ہوگی، پنجاب اسمبلی اور اسکے ارکان کو مذاق نہ سمجھا جائے۔

یاد رہے کہ دو روز قبل تحریک انصاف کے رکن صوبائی اسمبلی کو وزیر اعظم کے معاون خصوصی شہزاد اکبر کی جانب سے درج ایک شکایت پر گرفتار کیا گیا تھا، رکن صوبائی اسمبلی کو ایف آئی اے کے سائبر کرائم ونگ کے ایک سیل میں منتقل کیا جانا تھا لیکن جوڈیشل مجسٹریٹ نے انہیں ضمانت دے دی تھی۔

تاہم گزشتہ روز رکن اسمبلی کو 8 جولائی کو الیکٹرانک جرائم کی روک تھام ایکٹ 2016 کی دفعہ 11 (نفرت انگیز تقریر) اور دفعہ 20 کے تحت درج مقدمہ میں گرفتار کیا گیا جبکہ اس کے ساتھ ساتھ پاکستان پینل کوڈ کی دفعہ 298، 500، 505(سی)، 506 اور ٹیلی گراف ایکٹ کی دفعہ 29 کو بھی مقدمے کا حصہ بنایا گیا۔

ایف آئی آر کے مطابق ملزم نے معاون خصوصی کے مذہبی اعتقاد کے حوالے سے سنگین الزامات سوشل میڈیا پر دی گئے بیانات میں بھی عائد کیے اور شکایت کنندہ اس منظم نفرت انگیز مہم پر سخت تشویش میں مبتلا ہیں جو نذیر چوہان اور دیگر نے ان کے خلاف سوشل میڈیا اور واٹس ایپ چیٹس پر شروع کی ہوئی ہیں۔

ایف آئی آر میں شہزاد اکبر نے مؤقف اپنایا کہ شرپسند عناصرانہیں سرکاری فرائض ی ادائیگی سے روکنے کے لیے بلیک میل کرنے کی کوشش کررہے ہیں۔

ایف آئی آر میں مزید کہا گیا کہ اس بدنیتی پر مبنی اور نفرت انگیز مہم کا مقصد شکایت گزار کو پاکستان میں بدعنوانی کے سدباب اور احتساب کو یقینی بنانے کے لیے کی جانے والی کوششوں سے روکنا ہے۔

اسلام آباد: ملک بھر میں کورونا وائرس میں تیزی آئی ہے 24 گھنٹوں کے دوران کورونا نے 76 افراد کو موت کے گھاٹ اتاردیا جب کہ مثبت کیسز کی شرح 7.5 فیصد سے بڑھ گئی ہے۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 59 ہزار 707 ٹیسٹ کیے گئے جن میں سے 4497 افراد میں کورونا وائرس کی تصدیق ہوئی۔

ملک میں اب تک کورونا کے مصدقہ مثبت کیسز کی تعداد 1,020,324 ہوگئی ہے جن میں سے 937,354 مریض شفایاب ہو چکے ہیں۔ گزشتہ روز اس وبا نے مزید 76 افراد کی زندگیوں کو نگل لیا۔ اس طرح ملک میں اب تک اس وبا سے جاں بحق افراد کی مجموعی تعداد 23 ہزار 209 ہوگئی ہے۔ جب کہ مثبت کیسز کی شرح7.53 فیصد ریکارڈ ہوئی ہے۔

کورونا وائرس اوراحتیاطی تدابیر:

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

وزیر اطلاعات و نشریات اور بلدیات ناصرحسین شاہ نے کراچی کو پانی کی فراہمی یقینی بنانا حکومت کی اولین ترجیح قرار دیتے ہوئے کراچی واٹر اینڈ سیوریج بورڈ کو شہر میں قائم غیر قانونی ہائیڈرینٹس اور کنکشنز کے خلاف کارروائی تیز کرنے کی ہدایت کردی۔

رپورٹ کے مطابق سندھ کے وزیر اطلاعات و نشریات اور بلدیات ناصر حسین شاہ نے حب میں واقع پمپنگ اسٹیشن اور واٹر ٹریٹمنٹ پلانٹ کا دورہ کیا، اس موقع پر رکن قومی اسمبلی ڈاکٹر شاہدہ رحمانی اور قادر خان مندوخیل، رکن صوبائی اسمبلی لیاقت عسکانی، اسداللہ خان اور کراچی واٹر اینڈ سیوریج بورڈ (کے ڈبلیو ایس بی) کے منیجنگ ڈائریکٹر بھی صوبائی وزیر کے ہمراہ موجود تھے۔

انہوں نے کہا کہ کراچی میں پانی کی فراہمی کو یقینی بنانا، حکومتِ سندھ کی اولین ترجیح ہے اور چیئرمین پاکستان پیپلز پارٹی (پی پی پی) بلاول بھٹو زرداری نے بھی مسائل حل کرنے کے احکامات جاری کر دیے ہیں۔

ناصر حسین شاہ نے کراچی واٹر اینڈ سیوریج بورڈ کو غیر قانونی ہائیڈرینٹس اور کنکشنز کے خلاف کارروائی تیز کرنے کی ہدایت کردی اور زور دیا کہ کراچی میں پانی کی طلب بڑھنے کے پیش نظر پانی کی منصفانہ فراہمی کو یقینی بنانا چاہیے۔

انہوں نے کہا کہ ضلع غربی کراچی کو ترجیحی بنیادوں پر پانی کی فراہمی کے لیے منتخب نمائندوں اور کے ڈبلیو ایس بی کے افسران پر مشتمل کمیٹی تشکیل دی جائے گی۔

صوبائی وزیر بلدیات کا مزید کہنا تھا کہ بلاول بھٹو زرداری کی ہدایت پر کراچی کے لیے نئے واٹر پروجیکٹس پر کام جاری ہے۔

ناصر حسین شاہ نے نادرن بائی پاس کے قریب اللہ بائی یونین کونسل کی حدود میں واقع پمپنگ اسٹیشن کا بھی دورہ کیا۔

اس موقع پر رکن قومی اسمبلی شاہدہ رحمانی نے صوبائی وزیر کو بتایا کہ اس پمپنگ اسٹیشن سے 30 گوٹھوں کو پانی فراہم کیا جارہا ہے لیکن یہاں طویل عرصے سے یہ سہولت متاثر ہوچکی ہے اور یہ اسکیم کراچی کے ضلعی کونسل کے زیر اہتمام شیر محمد بلوچ نے شروع کیا تھا۔

رکن قومی اسمبلی کا کہنا تھا کہ غیر قانونی کنیکشنز اور ٹینکرز کے ذریعے یہاں سے پانی چوری کیا جارہا ہے۔

ناصر حسین شاہ نے ایم ڈی کراچی واٹر اینڈ سیوریج بورڈ کو پمپنگ اسٹیشن پر اہلکار تعینات کرنے اور پولیس کی مدد سے پیٹرولنگ شروع کرنے کی ہدایت کی۔

وزیر بلدیات نے ایم ڈی کے ڈبلیو بی ایس کو ہدایت دی کہ یہاں آنے والے تمام ٹینکرز کو ضبط کر کے ملزمان کے خلاف مقدمہ درج کریں۔

انہوں نے ایم ڈی واٹر بورڈ اسد اللہ سے مزید کہا کہ پمپنگ اسٹیشنز کی بحالی کے لیے منصوبہ بھی تیار کریں۔

ترجمان دفترخارجہ زاہد حفیظ چوہدری نے کہا ہے کہ پاکستان نے سعودی عرب کے وزیر خارجہ کے دورے کے موقع پر سعودی سرمایہ کاروں کو پاک-چین اقتصادی راہداری (سی پیک) میں سرمایہ کاری کی دعوت دی ہے۔

اسلام آباد میں ترجمان دفتر خارجہ زاہد حفیظ چوہدری نے ہفتہ وار بریفنگ میں بتایا کہ سعودی وزیر خارجہ فیصل بن فرحان نے شاہ محمود قریشی کی دعوت پر پاکستان کا دورہ کیا اور اس دورے میں انہوں نےصدر مملکت عارف علوی، وزیر وزیراعظم عمران خان، وزیرخارجہ اور آرمی چیف جنرل قمر جاوید باجوہ سے ملاقاتیں کیں۔

انہوں نے کہا کہ وزیر خارجہ نے پاک-چین اقتصادی راہداری (سی پیک) اور خصوصی اقتصادی زونز کے حوالے سے سعودی ہم منصب کو آگاہ کیا، اس کے ساتھ ساتھ افغانستان اور مقبوضہ جموں و کشمیر کی صورت حال پر بھی بریفنگ دی۔

ترجمان دفترخارجہ نے کہا کہ پاک-سعودی عرب تعلقات کے تمام پہلوؤں پر بات کی گئی اور سی پیک میں سعودی سرمایہ کاروں کو دعوت دی گئی۔

انہوں نے بتایا کہ اعلی سطح کی مشاورتی کونسل کے ڈھانچے اور طریقہ کار پر بھی بات کی گئی۔

ان کا کہنا تھا کہ جو پاکستانی کام کے لیے سعودی عرب واپس نہیں جاسکے ہیں، اس کے ساتھ ساتھ سعودی عرب کے ساتھ پاکستانی ورکرز کے ویزے کے معاملے پر بھی بات کی گئی۔

ان کا کہنا تھا کہ وزیر خارجہ شاہ محمود قریشی بحرین کے دورے پر موجود ہیں جہاں دونوں ملکوں نے تجارت اور کاروبار سمیت مشترکہ سرمایہ کاری پر اتفاق کیا ہے۔

ترجمان دفترخارجہ نے بتایا کہ وزیر خارجہ نے بحرین کے نائب وزیر اعظم اور وزیر داخلہ سے بھی ملاقات کی۔

انہوں نے کہا کہ وزیر خارجہ شاہ محمود قریشی نے اسے قبل چین کا دورہ بھی کیا اور اس دورے میں کووڈ-19 سمیت باہمی تعاون کو فروغ دینے اور پاک-چین اقتصادی راہداری (سی پیک) کے منصوبوں پر کام مقررہ مدت میں مکمل کرنے پر اتفاق کیا گیا۔

ان کا کہنا تھا کہ چین میں تعلیم حاصل کرنے والے طلبہ کو درپیش مسائل پر بھی چینی حکام سے بات کی گئی۔

انہوں نے کہا کہ بھارت کی طرف سے اسرائیلی جاسوس پیگاسس کو پاکستان کے خلاف استعمال کرنے کی مذمت کرتے ہیں، جس کے ذریعے پاکستانیوں اور کشمیریوں کے فون کی جاسوسی کی گئی۔

بھارت کی جانب سے پاکستانیوں کی جاسوسی کے حوالے سے بات کرتے ہوئے انہوں نے کہا کہ وزیر اعظم عمران خان سمیت سینکڑوں صحافیوں اور دیگر افراد کے فون کی بھی جاسوسی کی گئی، اقوام متحدہ اس حوالے سے بھارت کے ان اقدامات پر آزادانہ تحقیقات کرائے۔

ترجمان دفترخارجہ نے کہا کہ مقبوضہ جموں و کشمیر میں غیر قانونی طور پر آبادیاتی تناسب میں تبدیلی کی کوششوں کی مذمت کرتے ہیں اور مقبوضہ جموں و کشمیر میں اس وقت بھی بھارتی مظالم کا سلسلہ جاری ہے۔

انہوں نے کہا کہ مقبوضہ جموں و کشمیر میں بھارتی مظالم پر اقوام متحدہ، انسانی حقوق کونسل سمیت عالمی رپورٹس موجود ہیں۔

چین اور طالبان کے درمیان مذاکرات
ترجمان دفترخارجہ نے کہا کہ چین اور طالبان کے درمیان مذاکرات کی جہاں تک بات ہے تو چین کا خطے میں اہم کردار ہے جبکہ پاکستان نے ہمیشہ افغان مسئلے کے سیاسی حل کے لیے سہولت کار کا کردار ادا کیا ہے۔

انہوں نے کہا کہ چین اور پاکستان بین الافغان مذاکرات کے لیے کردار ادا کرتے رہے ہیں اور یہی وقت ہے کہ تمام توانائیاں افغان مسئلے کے سیاسی حل پر لگائی جائیں۔

ان کا کہنا تھا کہ جامع اور وسیع البنیاد سیاسی حل بہت ضروری ہے جبکہ خطے میں بھارت نے ہمیشہ اسپائلر کا کردار ادا کیا ہے۔

افغان سفیر کی بیٹی کے اغوا کے معاملے پر بات کرتے ہوئے انہوں نے کہا کہ افغان سفیر کی صاحبزادی کے معاملے میں مکمل تفتیش کا سلسلہ فوری شروع کیا گیا اور اس کے لیے سیکیورٹی کے 200 اہلکار استعمال کیے گئے۔

انہوں نے کہا کہ افغان سفیر اور ان کے خاندان کو تعاون کرنا ہوگا، پاکستان، افغانستان کے ساتھ جامع اور برادرانہ تعلقات پر یقین رکھتا ہے جبکہ بعض عناصر کے منفی بیانات کی کوئی حثیت نہیں ہے اور ان کو ہم سنجیدہ بھی نہیں لیتے۔

ترجمان دفترخارجہ نے کہا کہ پاکستان میں تقریباً 30 لاکھ افغان پناہ گزین ہیں اور ہم مزید افغان مہاجرین کی آمد کے متحمل نہیں ہوسکتے، ہم سمجھتے ہیں کہ افغان مہاجرین کو اب واپس جانا چاہیے۔

انہوں نے کہا کہ افغان مہاجرین پر پاک-افغان ورکنگ گروپ بھی موجود ہے۔

اسلام آباد ہائی کورٹ نے فلیگ شپ ریفرنس میں سابق وزیر اعظم نواز شریف کی بریت کے خلاف اور العزیزیہ ریفرنس میں ان کی سزا میں اضافے سے متعلق قومی احتساب بیورو (نیب) کی درخواستوں پر سماعت کا فیصلہ کر لیا۔

رپورٹ کے مطابق احتساب عدالت کے جج ارشد ملک نے 24 دسمبر 2018 کو فلیگ شپ ریفرنس میں نواز شریف کے حق میں فیصلہ دیتے ہوئے انہیں بری کردیا تھا جبکہ العزیزیہ ریفرنس میں 7 سال قید کی سزا سنائی تھی۔

سپریم کورٹ نے 28 جولائی 2017 کو نواز شریف کو کوئی بھی عوامی عہدہ رکھنے کے لیے نااہل قرار دیتے ہوئے نیب کو احتساب عدالت میں شریف خاندان کے خلاف تین ریفرنسز فائل کرنے کی ہدایت دی تھی۔

احتساب عدالت کے جج محمد بشیر نے نواز شریف، مریم نواز اور کیپٹن ریٹائرڈ صفدر کو عام انتخابات 2018 سے چند روز قبل 6 جولائی کو سزا سنائی تھی۔

بعد ازاں پاکستان مسلم لیگ (ن) کی جانب سے جولائی 2019 میں پریس کانفرنس میں ایک ویڈیو جاری کی گئی، جس میں جج ارشد ملک نے دباؤ میں آکر نواز شریف کو سزا دینے کا اعتراف کیا تھا۔

ویڈیو منظر عام پر آنے کے بعد جج ارشد ملک کو معطل کردیا گیا اور ان کا تبادلہ دوبارہ لاہور ہائی کورٹ میں کر دیا گیا، بعد ازاں انہیں ملازمت سے برخاست کردیا گیا تھا۔

بدھ کو نیب کے ڈپٹی پراسیکیوٹر جنرل سردار مظفر عباسی اور دیگر پراسیکیوٹرز اسلام آباد ہائی کورٹ میں جسٹس عامر فاروق اور جسٹس محسن اختر کیانی پر مشتمل دو رکنی بینچ کے سامنے پیش ہوئے۔

پراسیکیوٹرز نے دونوں ریفرنسز میں احتساب عدالت کے فیصلے کے خلاف درخواست کے علاوہ ایون فیلڈ ریفرنس میں نواز شریف کی ضمانت منسوخ کرنے سے متعلق بھی درخواست دائر کی۔

تاہم عدالت نے ضمانت منسوخی کی درخواست اس بنیاد پر خارج کرتے ہوئے کہا کہ نواز شریف کو اس کیس میں پہلے ہی اشتہاری قرار دیا جاچکا ہے۔

ڈپٹی پراسیکیوٹر جنرل نیب مظفر عباسی نے العزیزیہ ریفرنس میں نواز شریف کی سزا 14 سال تک بڑھانے کی درخواست کی، جج نے نرمی کی وجہ بتائے بغیر سابق وزیر اعظم کو 7 سال قید کی سزا سنائی تھی۔

اسلام آباد ہائی کورٹ کے بینچ نے سزا میں اضافے سے متعلق نیب کی درخواست پر 12 ستمبر کو دلائل سننے کا فیصلہ کیا، جبکہ فلیگ شپ ریفرنس میں نواز شریف کی بریت کے خلاف درخواست کی سماعت 28 ستمبر تک ملتوی کردی۔

اسلام آباد ہائی کورٹ کے اسی بینچ نے رواں سال اپریل میں شوکت ترین کی بریت کے خلاف نیب کی درخواست سننے سے انکار کردیا تھا۔

رینٹل پاور پروجیکٹ کیس میں کہا گیا کہ عدالت بریت کے بجائے صرف سزا کے خلاف اپیلوں کی سماعت کرے گی۔

اسلام آباد میں سابق سفیر کی بیٹی نور مقدم کے قتل میں ملوث ظاہر جعفر کی پینٹنگ بنانے والے آرٹسٹ کو خوفناک انداز میں تصویر پر تنقید کا نشانہ بنایا جا رہا ہے۔

نوجوان آرٹسٹ عبدالمفتی نے حال ہی میں ظاہر جعفر کی پینٹنگ بنائی تھی، جس میں انہوں نے ملزم کو سفاکانہ انداز میں دکھایا تھا۔

آرٹسٹ کی جانب سے بنائی گئی تصویر میں ایک شخص کو سفید رنگ کی شلوار اور بنیان میں دکھایا گیا تھا، جس کے کپڑوں اور جسم پر خون کے نشانات تھے اور وہ بستر پر بیٹھ کر مسکرارہا تھا۔

پینٹنگ میں فرش پر بھی خون بکھرا ہوا تھا جب کہ دیوار پر خون سے جملہ لکھا ہوا تھا کہ وہ پاکستانی نہیں امریکی شہری ہیں۔

مذکورہ پینٹنگ کو شیئرنگ کرتے وقت آرٹسٹ نے لکھا تھا کہ عین ممکن ہے کہ مذکورہ تصویر لوگوں کو خوفناک محسوس ہو اور وہ بعض افراد کو متاثر بھی کرے، تاہم ان کی جانب سے تیار کی گئی پینٹنگ کا مقصد قاتل کی سفاکیت کو دکھانا تھا۔

انہوں نے لکھا وہ پینٹنگ میں قاتل کو عام کپڑوں میں دکھانا نہیں چاہتے تھے بلکہ وہ انہیں ایسے انداز میں دکھانا چاہتے تھے، جس سے محسوس ہو کہ وہ بہیمانہ کارروائی کے وقت ہوش و حواس میں تھے اور انہیں وہ رحم کے قابل نہیں۔

آرٹسٹ نے لکھا کہ ان کی جانب سے قاتل کی پینٹنگ کو خون کے ساتھ بنانے کا ایک مقصد یہ بھی تھا کہ خدا نخواستہ اگر ہمارا نظام مقتول کو انصاف فراہم نہ کر سکے تو سفاکانہ ظلم کو یاد رکھا جائے۔

انہوں نے طویل پوسٹ میں لکھا کہ انہوں نے مذکورہ پینٹنگ کو مذکورہ طرز پر اس لیے بنایا تاکہ دکھایا جا سکے کہ سماج میں کیسا ظلم اور ایسی کارروائیوں میں ملوث ملزمان کس طرح پر سکون رہتے ہیں اور خواتین کو کس طرح پے در پے قتل کیا جاتا ہے۔

تاہم ان کی مذکورہ پینٹنگ پر کئی لوگ ناخوش دکھائی دیے اور آرٹسٹ سے مطالبہ کیا کہ وہ اسے ڈیلیٹ کردیں، کیوں کہ وہ بہت ہی بھیانک ہے۔

متعدد افراد نے ٹوئٹر پر مذکورہ پینٹنگ کو خطرناک قرار دیتے ہوئے لکھا کہ اسے دیکھ کر متاثرین یا ان کے اہل خانہ مزید صدمے سے دوچار ہو سکتے ہیں، اس لیے اسے ہٹایا اور ڈیلیٹ کردیا جائے۔

بعض افراد نے لکھا کہ کسی بھی متاثر شخص کے صدمے اور ان پر ڈھائے گئے مظالم کو آرٹ میں نہیں ڈھالا جا سکتا، مذکورہ پینٹنگ کو دیکھ کر مظالم کا نشانہ بننے والے افراد اور ان کے اہل خانہ پر سکتہ طاری ہو سکتا ہے۔

خیال رہے کہ سابق سفیر کی بیٹی 27 سالہ نور مقدم کو ان کے دوست ظاہر جعفر نے 20 جولائی کو قتل کردیا تھا، جس کے بعد مقتولہ کے اہل خانہ کی فریاد پر مقدمہ دائر کرکے ملزم کو گرفتار کرلیا گیا تھا۔

ظاہر جعفر اس وقت پولیس کی تحویل میں ہے اور میڈیا رپوٹس کے مطابق انہوں نے دوران تفتیش نور مقدم کو قتل کرنے کا اعتراف کیا ہے۔

مذکورہ واقعے پر ملک بھر میں غم و غصے کی لہر ہے، یہ واقعہ ایک ایسے وقت میں پیش آیا جب کہ صوبہ سندھ کے شہر حیدرآباد میں بھی قرۃ العین اور صائمہ نامی خواتین کو ان کے شوہروں نے سفاکانہ انداز میں قتل کردیا تھا۔

خواتین کے پے در پے قتل کے واقعات پر جہاں اہم شخصیات سوشل میڈیا پر غم و غصے کا اظہار کر رہی ہیں، وہیں ملک کے مختلف شہروں میں قاتلوں کو سخت سزائیں دینے کے لیے مظاہرے بھی کیے جا رہے ہیں۔

اسلام آباد: قومی احتساب بیورو (نیب) نے وزیر اعظم عمران خان کے پرنسپل سیکریٹری اعظم خان، خیبر پختونخوا کے وزیر اعلیٰ محمود خان اور وفاقی وزیر دفاع پرویز خٹک کو 275 ایکڑ پر مشتمل مالم جبہ اسکیئنگ چیئرلفٹ ریزورٹ کیس میں رواں سال مارچ میں پشاور ہائی کورٹ کی ہدایت پر تشکیل دی گئی خصوصی کمیٹی کی سفارشات کی روشنی میں کلین چٹ دے دی۔

دوسری جانب احتساب ادارے نے پاکستان مسلم لیگ (ن) کے سابق وزیر خزانہ مفتاح اسمٰعیل کے خلاف نئی تحقیقات کی منظوری دی ہے۔

رپورٹ کے مطابق یہ فیصلے نیب کے چیئرمین جاوید اقبال کی زیر صدارت بیورو کے ایگزیکٹو بورڈ اجلاس (ای بی ایم) میں ہوئے۔

ای بی ایم کو بتایا گیا کہ سمن گروپ کی رٹ پٹیشن پر مالم جبہ کیس میں پشاور ہائی کورٹ نے ایک کمیٹی تشکیل دینے کا حکم دیا جس کی سربراہی خیبر پختونخوا کے ایڈیشنل چیف سیکریٹری نے کی۔

ای بی ایم کمیٹی نے ٹینڈرنگ کے عمل میں کچھ بے ضابطگیوں کی نشاندہی کی۔

اجلاس کے بعد نیب ہیڈکوارٹرز کی طرف سے جاری بیان میں کہا گیا کہ ای بی ایم نے متعلقہ عہدیداروں کو سماعت کے بعد قانون کے مطابق محکمہ جاتی کارروائی کرنے کے لیے خیبر پختونخوا کے چیف سیکریٹری کو بے ضابطگیوں کا ریفرنس بھیجنے کا فیصلہ کیا ہے لیکن عدالت کی جانب سے کسی بھی قسم کا حکم امتناع جاری ہو تو کیس کو مجازی اتھارٹی کی منظوری کے بعد اٹھایا جاسکتا ہے۔

تاہم نیب کے ایک سینئر عہدیدار نے اپنا نام ظاہر نہ کرنے کی شرط پر ڈان کو بتایا کہ بیورو نے خصوصی کمیٹی کی سفارشات کی روشنی میں اس کیس کو بند کردیا ہے کیونکہ اس معاملے میں کوئی بے ضابطگی نہیں پائی گئی تھی۔

انہوں نے کہا کہ ملزم کے خلاف الزامات میں سے ایک الزام یہ ہے کہ قیمتی اراضی کے لیز کی مدت 15 سے بڑھا کر 30 سال کردی گئی، تاہم کمیٹی کی سفارشات میں بتایا گیا کہ اس توسیع کو خیبر پختونخوا کی کابینہ نے منظور کیا تھا۔

عہدیدار نے بتایا کہ کمیٹی کو ٹینڈرنگ کے عمل میں چند بے ضابطگیاں ملیں لیکن یہ معاملہ نیب کے دائرہ کار میں نہیں آتا اور اسی وجہ سے اسے صوبائی حکومت کے حوالے کیا گیا ہے۔

انہوں نے کہا کہ ایک اور الزام یہ ہے کہ سمن گروپ، جس فرم نے لیز حاصل کی تھی، کے پاس ریزورٹ چلانے کی صلاحیت نہیں تھی تاہم کمیٹی نے مشاہدہ کیا کہ اس ادارے نے نہ صرف ہوٹل کی تعمیر اور ریزورٹ کی ترقی کو بروقت مکمل کیا بلکہ وہ اسے چلا بھی رہا تھا اور خیبر پختونخوا حکومت کو باقاعدگی سے کرایہ ادا کر رہا تھا۔

انہوں نے مزید کہا کہ ‘لہٰذا نیب کو معلوم ہوا ہے کہ اس معاملے میں قومی خزانے کو کوئی نقصان نہیں ہوا اور اس وجہ سے اسے بند کردیا گیا ہے، تاہم اگر عدالت کی طرف سے کوئی حکم امتناع آیا تو نیب دوبارہ کیس اٹھائے گا۔

خیال رہے کہ 2018 میں جب کے پی کے وزیر اعلیٰ نے یہ دعویٰ کیا تھا کہ نیب نے انہیں ‘کلین چٹ’ دے دی تھی تو احتساب ادارے نے فوری طور پر ردعمل دیا تھا اور کہا تھا کہ یہ دعویٰ سچ نہیں ہے۔

بتایا گیا ہے کہ مالم جبہ اراضی کو والیِ سوات نے تحفے میں دیا تھا اور اراضی کو لیز پر دینے کا اقدام 2014 میں گیا تھا لیکن اس معاہدے میں کسی قسم کی کوتاہیوں کا معلوم ہونے پر محکمہ جنگلات نے بعد میں اس لیز کو منسوخ کردیا تھا۔

وزیر اعظم کے پرنسپل سیکریٹری اعظم خان نے ایک خط میں دعویٰ کیا تھا کہ لیز کی مدت 33 سال اور اس کی توسیع کے لیے مزید 20 سال اس اشتہار میں اور منصوبے کے ٹرمز آف ریفرنس (ٹی او آر) میں بھی ذکر کیے گئے ہیں۔

ان ٹی او آر کو اس وقت کے وزیر اعلیٰ پرویز خٹک نے 27 فروری 2014 کو منظور کیا تھا۔

اس کی بنیاد پر نجی پارٹیوں نے اس منصوبے کے حصول کے لیے اپنی بولی / تجاویز چیف سیکریٹری کے ذریعے نوٹیفائی کردہ کمیٹی کو پیش کیں۔

خط میں کہا گیا کہ یہ سمجھا جانا چاہیے کہ کمیٹی اور وزیر اعلیٰ نے لیز سے متعلق حکومت کی پالیسی کے باوجود موجودہ لیز کی مدت کو ایک خاص کیس کے طور پر طے کیا ہے۔

خط میں کہا گیا کہ ‘یہ بات بھی قابل ذکر ہے کہ سب سے زیادہ بولی لگانے والے نے 33 سال کے ابتدائی لیز کی مدت کے دوران سالانہ 10 فیصد اضافے کے ساتھ ایک کروڑ 20 لاکھ روپے کی پیش کش کی، جس میں مزید توسیع کے لیے زیادہ سے زیادہ 25 فیصد اضافہ کیا جائے گا’۔

دیگر اہم امور اٹھاتے ہوئے نیب کے اجلاس میں سید تجم الحسین کے خلاف بدعنوانی کا ریفرنس دائر کرنے کی منظوری دی گئی جن پر الزام ہے کہ وہ غیر قانونی ٹیسٹنگ کمپنی کے ذریعے جعلی بھرتیوں کے اشتہارات محکموں میں آسامیاں نہ ہونے کے باوجود شائع کرتے ہیں۔

نیب کے بیان میں کہا گیا کہ ملازمتوں کے جعلی اشتہاروں کے بہانے لوگوں کو بڑے پیمانے پر لوٹا جاتا ہے اور اُمیدواروں سے بھاری رقم وصول کی جاتی ہے۔

ای بی ایم نے مختلف شخصیات کے خلاف چار انکوائریز کی منظوری بھی دی جن میں سابق وزیر خزانہ مفتاح اسمٰعیل اور دیگر شامل ہیں جبکہ نیشنل ہائی وے اتھارٹی (این ایچ اے) کے افسران و اہلکاروں اور دیگر، محکمہ آبپاشی اور ریونیو پشاور کے عہدیداروں اور دیگر کے خلاف دو انکوائریز کی بھی منظوری دی گئی۔

اس موقع پر نیب کے چیئرمین جاوید اقبال نے کہا کہ بیورو کی ترجیح میگا کرپشن کے کیسز، خاص طور پر شوگر، آٹا، منی لانڈرنگ، جعلی اکاؤنٹس کیس، اختیارات کے ناجائز استعمال اور غیر قانونی ہاؤسنگ سوسائٹی ہے۔

انہوں نے کہا کہ نیب نے ان کی سربراہی میں اب تک بدعنوان عناصر سے براہ راست یا بالواسطہ 533 ارب روپے کی وصولی کی اور ملک کی ترقی اور خوشحالی میں تاجر برادری کی شراکت کو مناسب احترام دیا۔

بیوروکریسی کے بارے میں انہوں نے کہا کہ یہ ملک کی ریڑھ کی ہڈی ہے اور نیب نہ صرف بیوروکریٹس کا احترام کرتی ہے بلکہ ان کی خدمات کو بھی سراہتی ہے۔

انہوں نے بتایا کہ مختلف احتساب عدالتوں میں 1300 ارب روپے کے 1273 ریفرنسز زیر سماعت ہیں۔

اسلام آباد: عارضی قانون سازی پر عوامی تنقید کے بعد حکومت نے اسلام آباد ہائی کورٹ کو یقین دہانی کروائی ہے کہ تسلسل کے ساتھ آرڈیننس نافذ کرنے کا سلسلہ ختم ہونے والا ہے۔

رپورٹ کے مطابق ہائی کورٹ میں ایک درخواست کی سماعت کے دوران اٹارنی جنرل خالد جاوید خان نے عدالت کو آگاہ کیا کہ وزیر اعظم ملک پر پارلیمانی جمہوریت کے ذریعے حکمرانی کرنے کے لیے پرعزم ہیں۔

مذکورہ درخواست دانشوروں، حقوق کے رضاکاروں کی جانب سے ہائر ایجوکیشن کمیشن (ایچ ای سی) آرڈیننس کے نفاذ کے خلاف دائر کی گئی تھی جس میں چیئرمین کی خودمختاری ’ختم‘ کرنے کے لیے ان کے عہدے کی مدت 4 سال سے کم کر کے 2 سال کردی گئی تھی۔

اٹارنی جنرل نے عدالت کو وزیر اعظم کے ساتھ ہونے والی حالیہ ملاقات سے آگاہ کیا جس میں صدارتی آرڈیننسز پر تفصیل سے بات چیت کی گئی تھی۔

ان کا کہنا تھا کہ وزیر اعظم نے ماضی کے طریقہ کار کے بارے میں پوچھا اور آئینی شق کو انصاف کے ساتھ استعمال کرنے کا فیصلہ کیا۔

خیال رہے کہ جولائی 2018 میں پاکستان تحریک انصاف (پی ٹی آئی) کے حکومت بنانے کے بعد سے وفاقی حکومت کے معمول کے امور کے لیے اب تک 54 صدارتی آرڈیننسز نافذ کیے جاچکے ہیں۔

قومی اسمبلی کی ویب سائٹ کے مطابق پہلے پارلیمانی سال کے دوران 7، دوسرے میں 30 جبکہ تیسرے اور موجودہ پارلیمانی سال میں اب تک 16 سے زائد آرڈیننسز نافذ کیے جاچکے ہیں۔

وزارت قانون کے اعداد و شمار کے مطابق پاکستان پیپلز پارٹی (پی پی پی) اور مسلم لیگ (ن) کی 2008 سے 2018 تک کی حکومتوں میں 156 آرڈیننس نافذ کیے گئے۔

سال 1947 میں پاکستان کی آزادی کے بعد سے اب تک آنے والی حکومتیں قانون سازی کے متبادل کے طور پر ڈھائی ہزار سے زائد آرڈیننسز نافذ کرچکی ہیں۔

سماعت کے دوران جب مسلم لیگ (ن) کے احسن اقبال نے بحیثیت قانون ساز اس معاملے پر بات کرنے کی اجازت چاہی تو چیف جسٹس اطہر من اللہ اور جسٹس عامر فاروق پر مشتمل بینچ نے ان سے دریافت کیا کہ جب مسلم لیگ (ن) اقتدار میں تھی تو کتنے آرڈیننس نافذ کیے گئے؟

جس پر احسن اقبال نے کہا کہ ’دو غلط مل کر ایک صحیح نہیں بنا سکتے‘، ساتھ ہی انہوں نے اپنی حکومت کی غلطی کا اعتراف اور اس پر افسوس کا اظہار کیا۔

دوسری جانب کمرہ عدالت میں موجود سینئر وکیل فاروق ایچ نائیک نے کہا کہ تقریباً ہر حکومت نے آرڈیننس نافذ کرنے کا اختیار استعمال کیا ہے۔

انہوں نے مزید کہا کہ ہر صدر کی جانب سے آرڈیننس نافذ کرنے کی ایک ہی وجہ فراہم کی گئی اور وہ پارلیمنٹ کا اجلاس نہ ہونا تھی۔

جسٹس اطہر من اللہ نے انہیں یاد دلایا کہ پارلیمان یا قائمہ کمیٹی میں آئین کی دفعہ 89 میں دیے گئے اختیار کا جائزہ لینا ان کی ذمہ داری ہے۔

سینیٹر فاروق ایچ نائیک نے عدالت کو آگاہ کیا کہ پارلیمانی کمیٹی الیکٹرانک ووٹنگ مشین سے متعلق آرڈیننس کا جائزہ لے رہی ہے اور مذکورہ آرٹیکل کا بھی جائزہ لے سکتی ہے۔

ایڈووکیٹ فیصل صدیقی نے عدالت کی توجہ ایچ ای سی آرڈیننس کی جانب مبذول کرواتے ہوئے کہا کہ یہ عام آدمی سے متعلق معاملہ ہے۔

یاد رہے کہ موجودہ حکومت نے ایک آرڈیننس نافذ کرتے ہوئے ایچ ای سی چیئرمین طارق بنوری کو ڈی نوٹیفائی کردیا تھا۔

ایڈووکیٹ فیصل صدیقی نے دلائل دیتے ہوئے کہا کہ صدارتی آرڈیننس کی پیروی میں جاری ہونے والا نوٹی فکیشن ناقص تھا اور طارق بنوری کے عہدے کی مدت پر اس کا اطلاق نہیں ہوتا۔

انہوں نے کہا کہ وفاقی کابینہ نے پارلیمان کا اجلاس ہونے کے باوجود اس معاملے پر غور کیا۔

جس کا دفاع کرتے ہوئے اٹارنی جنرل نے کہا کہ حکومت نے اعلیٰ تعلیمی کمیشن کے معاملات کو مرکزی دھارے میں شامل کرلیا ہے اور یہ اس کے اصلاحی پروگرام کا حصہ ہے۔