Category تازہ ترین

کورونا کیسز میں اضافے کے بعد وزیراعلیٰ سندھ نے کراچی میں شام 6 بجے کے بعد مکمل پابندی عائد کرنے کے احکامات جاری کردیے۔

وزیراعلیٰ سندھ مراد علی شاہ نے آئی جی سندھ اور کمشنر کراچی کو ہدایت کی کہ کراچی میں شام 6 بجے کے بعد مکمل پابندی لگائی جائے۔

مراد علی شاہ کا کہنا تھا کہ کراچی میں شام میں کوئی غیر ضروری گھر سے باہر نہ نکلے، پتا چلا ہے کہ ٹیوشن سینٹرز چل رہے ہیں لہٰذا شہر میں تمام ٹیوشن سینٹرز کو فوری بند کرایا جائے۔

وزیراعلیٰ نے کہا کہ دوبارہ جمعہ کے دن کورونا صورتحال کا جائزہ لیں گے اگر صورتحال بہتر نہ ہوئی تو مزید اقدامات کریں گے۔

وزیراعلیٰ سندھ نے ناصر شاہ، مرتضیٰ وہاب اور اویس شاہ پر مشتمل کمیٹی قائم کردی جو تمام اسٹیک ہولڈرز سے ملاقات کرکے صورتحال سے آگاہ کرے گی جب کہ کمیٹی سیاسی جماعتوں سے بھی بات کرے گی۔

وزیراعلیٰ نے کہا کہ کووڈ کی صورتحال پر کوئی سیاست نہیں ہونی چاہیے۔

واضح رہےکہ کراچی سمیت سندھ بھر میں کورونا کیسز میں غیر معمولی اضافے کے بعد حکومت نے صبح 6 سے شام 6 تک کاروبار کے اوقات مقرر کیے ہیں جب کہ شادی بیاہ سمیت دیگر تقریبات پر بھی پابندی عائد کردی گئی ہے۔

اسلام آباد پولیس نے دعویٰ کیا ہے کہ نور مقدم قتل کیس کے ملزم ظاہر جعفر نے اپنے جرم کا اعتراف کرلیا۔

رپورٹ کے مطابق تفتیش کی معلومات رکھنے والے پولیس افسر نے نام ظاہر نہ کرنے کی شرط پر ڈان کو بتایا کہ ملزم نے دوران تفتیش اعترافِ جرم کرلیا۔

انہوں نے کہا کہ ’ظاہر جعفر کا بیان ریکارڈ کیا جارہا ہے اور انہیں ایک مجسٹریٹ کے سامنے پیش کیا جائے گا تاکہ وہ کرمنل پروسیجر کوڈ کی دفعہ 164 کے تحت اپنا بیان ریکارڈ کراسکیں‘۔

پولیس ذرائع نے یہ بھی انکشاف کیا کہ تفتیش کاروں کو پڑوس میں نصب سی سی ٹی وی کیمروں کی فوٹیج مل گئی ہے۔

ذرائع نے بتایا کہ ’فوٹیج میں لڑکی کو پہلی منزل سے چھلانگ لگا کر گھر سے فرار ہونے کے لیے گھر کے دروازے کی طرف بھاگتے ہوئے دیکھا جاسکتا ہے‘۔

ان کا مزید کہنا تھا کہ گیٹ کو تالا لگا ہونے کے بعد خاتون اپنے آپ کو ایک گارڈ کے کمرے میں چھپا لیتی ہے، بعد میں ملزم کو کمرے میں گھستے اور انہیں گھسیٹتے ہوئے جبکہ واپس گھر میں لے جاتے ہوئے دیکھا جاسکتا ہے۔

دریں اثنا پولیس عہدیداروں نے ڈان کو بتایا کہ پیر کو امریکی سفارت خانے کے عملے نے ظاہر جعفر سے ملاقات کی۔

سفارتخانے نے پولیس سے ملزم سے ملاقات کی درخواست کی تھی کیونکہ وہ امریکا اور پاکستان کی دوہری شہریت رکھتا تھا۔

افسران نے بتایا کہ پولیس کے اعلیٰ افسران نے اس معاملے پر تبادلہ خیال کیا اور ملاقات کے لیے سفارت خانے کے عملے کو اجازت دی جو ایک سینئر پولیس آفیسر کے دفتر میں ہوئی۔

ملاقات کے پہلے مرحلے کے دوران سفارتخانے کے عملے نے پولیس کے دو سینئر افسران کی موجودگی میں ملزم سے ملاقات کی۔

بعدازاں دوسرے مرحلے میں ملاقات پولیس افسران کی عدم موجودگی میں ہوئی۔

ایک پولیس افسر نے سفارت خانے کے عہدیداروں کو اس کیس میں اب تک ہونے والی پیشرفت سے آگاہ کیا، عہدیداروں نے بتایا کہ بعدازاں ملزم کو کوہسار تھانے کے لاک اپ میں منتقل کردیا گیا۔

امریکی سفارت خانے کی ترجمان ہیتھر ایٹن نے ملاقات کی تفصیلات سے متعلق رابطے پر بتایا کہ رازداری کے خدشات کی وجہ سے اس کیس پر تبصرہ نہیں کرسکتے۔

جب ان سے سوال کیا گیا کہ کیا سفارت خانہ اس معاملے کی پیروی کررہا ہے یا کسی اتھارٹی سے رابطے میں ہے تو یہ معلومات دینے سے بھی انکار کردیا گیا۔

انسپکٹر جنرل پولیس قاضی جمیل الرحمٰن، ڈپٹی انسپکٹر جنرل پولیس (آپریشن) افضال احمد کوثر اور سینئر سپرنٹنڈنٹ پولیس (انوسٹی گیشن) عطا الرحمٰن سے بھی اس ہی طرح کے سوالات پوچھے گئے تاہم انہوں نے اس ملاقات کے ہونے سے نہ انکار کیا اور نہ ہی اس کی تصدیق کی۔

دریں اثنا سلام آباد کی عدالت نے نور مقدم قتل کیس کے مرکزی ملزم ظاہر جعفر کے گرفتار والد ذاکر جعفر اور والدہ عصمت آدم جی سمیت 4 ملزمان کو جوڈیشل ریمانڈ پر جیل بھیج دیا۔

اسلام آباد کے جوڈیشل مجسٹریٹ شعیب اختر کی عدالت میں نور مقدم قتل پر سماعت ہوئی۔

پولیس نے مرکزی ملزم کے والد ذاکر جعفر اور والدہ عصمت آدم جی سمیت ملزمان کے 2 ملازمین افتخار اور جمیل کو دو روزہ جسمانی ریمانڈ ختم ہونے کے بعد عدالت میں پیش کیا۔

سماعت کے دوران پولیس نے چاروں ملزمان کو جوڈیشل ریمانڈ پر بھیجنے کی استدعا کی جسے عدالت نے منظور کرتے ہوئے چاروں ملزمان کو جوڈیشل ریمانڈ پر جیل بھیجنے کا حکم دیا۔

عدالت نے 10 اگست کو ملزمان کو عدالت میں دوبارہ پیش کرنے کا حکم بھی دیا۔

بعد ازاں ملزمان کے وکیل راجا رضوان عباسی تاخیر سے عدالت پہنچے۔

انہوں نے عدالت سے استدعا کی کہ آپ ملزمان کو مقدمے سے خارج کریں جس پر جج نے ریمارکس دیے کہ اب تو ہم ریمانڈ کا حکم دے چکے ہیں۔

ملزمان کے وکیل راجا رضوان عباسی نے کہا کہ ’آپ میری استدعا بھی حکم نامے پر لکھ دیں، میں ذاکر جعفر اور ان کی اہلیہ سے ملاقات کرنا چاہتا ہوں‘۔

عدالت نے ان کی استدعا منظور کرتے ہوئے دونوں ملزمان کو کمرہ عدالت میں پیش کرنے کا حکم دیا۔

ملزمان کے وکیل نے دونوں ملزمان سے کمرہ عدالت میں ملاقات کی جس کے بعد عدالت نے ملزمان کو 9 اگست کو پیش کرنے کی ہدایت دیتے ہوئے کیس کی سماعت ملتوی کردی۔

علاوہ ازیں کیس کے مرکزی ملزم کے والد اور والدہ نے ضمانت پر رہائی کے لیے سیشن کورٹ میں درخواست جمع کرا دی۔

عدالت نے درخواست ضمانت پر پولیس اور نور مقدم کے والد کو 30 جولائی کا نوٹس جاری کردیا اور کیس کا مکمل ریکارڈ بھی طلب کرلیا۔

ایڈیشنل سیشن جج محمد سہیل 30 جولائی کو ملزم ظاہر جعفر کے والد، والدہ کی ضمانت پر فیصلہ کریں گے۔

علاوہ ازیں نور مقدم قتل کیس میں انکشاف ہوا ہےکہ ملزم ظاہر جعفر کے گھر سے نور مقدم نے اپنے ڈرائیور کو فون کرکے والدین کو بتائے بغیر 7 لاکھ روپے کا فوری انتظام کرنے کا کہا تھا۔

نور مقدم 18 تاریخ کو اتوار کی رات سوا 9 بجے اپنے گھر سے نکلی اور لگ بھگ آدھے گھنٹے بعد پونے 10 بجے ظاہر کے گھر پہنچ گئی تھی جب کہ نور نے 19جولائی کو پیر کی صبح 9.50 پر اپنے ڈرائیور خلیل کو فون کیا جس کے بعد اس کا کئی بار ڈرائیور سے رابطہ ہوا۔

نور مقدم کے ڈرائیور خلیل نے انکشاف کیا کہ نور مقدم نے اسے فون کال کی اور کہا کہ اسے فوری طور پر 7 لاکھ روپے چاہئیں جن کا والدین کو پتا نا چلے۔

ڈرائیور کے مطابق اس نے نور مقدم سے کہا کہ وہ 7 لاکھ کا انتظام نہیں کر سکتا جس پر نور مقدم نے کہا کہ پیسے بہت ضروری چاہئیں، کسی دوست سے لے لو، اپنے جاننے والوں سے انتظام کردو۔

ڈرائیور کا کہنا ہےکہ اس نے 3 لاکھ روپے کا انتظام کیا اور 19 جولائی کو پیر کے روز دوپہر کے وقت نور مقدم کی جانب سے دیے جانے والے پتے پر وہ ظاہر جعفر کے گھر پہنچا، نور مقدم کو فون کیا تو انہوں نے کہا میں باہر نہیں آ سکتی، پیسے خانسامے کے حوالے کر دو جس کے بعد ڈرائیور نے 3 لاکھ روپے خانسامے کو پکڑا دیے۔

ڈرائیور خلیل کے مطابق اس نے پولیس کے سامنے ملزم ظاہر جعفر کے خانسامے کی شناخت کردی ہے جب کہ ڈرائیور نے یہ بھی انکشاف کیا کہ جب نور مقدم نے اسے پہلی بار فون کیا تو کہا کہ والدین کو بتا دو کہ میں لاہور جا رہی ہوں، ڈرائیور جب والدین کو لاہور سے متعلق بتانے گھر کے اندر گیا تو نور مقدم کی والدہ نور مقدم کے والد سے اسی معاملے پر بات کر رہی تھیں اور والد کہہ رہے تھے کہ کل عید کا دن ہے اورنور لاہور کیوں جارہی ہے۔

ڈرائیور کے مطابق وہ سمجھ گیا کہ نور مقدم نے اپنی والدہ کو فون کر دیا ہے، اس لیے وہ کچھ کہے بغیر وہاں سے واپس آ گیا۔

تحقیقات کرنے والے ذرائع کے مطابق نور کا اپنی والدہ سے رابطہ تھا اور نور نے اپنی زندگی کے آخری روز یعنی 20 جولائی کو منگل کے دن صبح 10 بجے اپنی ماں سے ٹیلی فون پر بات بھی کی۔

ذرائع کے مطابق دوران تفتیس قاتل ظاہر جعفر نے وجہ قتل بتاتے ہوئے کہا ہے کہ نور مقدم میرے ساتھ بے وفائی کر رہی تھی جس کا مجھے دکھ تھا، علم ہونے پر پر اسے روکا، مگر وہ نہیں مانی۔

ذرائع کے مطابق ملزم ظاہر جعفر نے قتل کا اعتراف کرتے ہوئے کہا ہے کہ بے وفائی میرے لئے ناقابل برداشت تھی، دھوکا دینے پر نور مقدم کو قتل کیا۔

وفاقی وزیر اطلاعات فواد چوہدری نے کہا ہے کہ آزاد کشمیر کے انتخابات میں بدترین شکست پر مسلم لیگ (ن) کو مریم نواز اور پیپلز پارٹی کو بلاول بھٹو زرداری سے استعفیٰ طلب کرنا چاہیے۔

فواد چوہدری نے اسلام آباد میں پریس کانفرنس کرتے ہوئے آزاد کشمیر کے انتخابات میں تاریخی کامیابی پر اپنے ہمراہ موجود علی امین گنڈاپور کو بہترین مہم چلانے پر مبارکباد دی اور کہا کہ اس کامیابی کے دور رس نتائج برآمد ہوں گے۔

ان کا کہنا تھا کہ جس قسم کی کامیابی ملی ہے اس سے دھاندلی وغیرہ کا بیانیہ تو اپنی موت آپ مر جاتا ہے کیونکہ اتنی بڑی کامیابی میں دھاندلی ممکن نہیں ہوتی، یہ کامیابی اسی وقت ممکن ہوتی ہے جب آپ حقیقی معنوں میں عوام میں مقبول ہوں۔

انہوں نے کہا کہ ووٹنگ ٹرن آؤٹ 56 فیصد سے زائد رہا اور جب اتنی بڑی تعداد میں لوگ ووٹ ڈال رہے ہوں تو اس کا مطلب یہ ہے کہ لوگوں کو انتخابی عمل کے ساتھ ساتھ جس کو وہ ووٹ دے رہے ہیں اس پر بھی اعتماد ہے۔

وزیر اطلاعات نے آزاد کشمیر کے لوگوں کو مبارکباد دیتے ہوئے، اس کامیابی سے آزاد کشمیر کے لوگوں نے مقبوضہ کشمیر کی تحریک کو جلا بخشی ہے۔

انہوں نے مزید کہا کہ ان نتائج کے بعد اگر پیپلز پارٹی اور مسلم لیگ (ن) میں پارٹی کی ہلکی سی رمق بھی باقی بچی ہے تو وہ بلاول سے بحیثیت چیئرمین اور مریم نواز سے بطور نائب صدر استعفیٰ لے لیں جبکہ اگر ان دونوں میں خود بھی سیاسی طور پر کوئی شرم ہے تو انہیں اپنے عہدوں سے استعفیٰ دے دینا چاہیے اور اتنی بڑی شکست کی ذمے داری قبول کرنی چاہیے۔

ان کا کہنا تھا کہ پیپلز پارٹی اور مسلم لیگ (ن) کے دونوں رہنما اپنی سیاست کو پرکھ کر گریبان میں جھانکیں اور نئی قیادت کو ابھرنے کا موقع دیں، یہ ملک اسی وقت آگے بڑھے گا جب اس ملک کی سیاسی جماعتیں اسے ادارے کے طور پر چلائیں گی۔

وفاقی وزیر نے کہا کہ انتخابی مہم کے دوران خصوصاً مسلم لیگ (ن) کے کیمپ سے ہندوستان کی مدد کے حوالے سے گفتگو ہوئی وہ باعث شرم ہے، مریم نواز نے فوج اور پاکستان کے بیانیے کے خلاف جس طرح سے مہم چلائی اس کا نتیجہ ہے کہ آج وہاں کی سابقہ حکمران جماعت مسلم لیگ (ن) کو بدترین شکست کا سامنا کرنا پڑا ہے اور کبھی کسی حکمران جماعت نے آزاد کشمیر میں اتنی بری شکست نہیں کھائی۔

انہوں نے کہا کہ کشمیر کے عوام نے مریم نواز کے بیانیے کو بری طرح مسترد کردیا ہے اور انہیں ان انتخابات میں پیپلز پارٹی سے بھی کم نشستیں ملنے کی ایک وجہ نواز شریف کی الیکشن سے ایک دن قبل حمداللہ محب سے ملاقات ہے، حمداللہ محب جیسے پاکستان دشمن اور ‘را’ کے ایجنٹس سے ملاقات کا جواب نواز شریف کو الیکشن میں شکست کی صورت میں ملا ہے۔

فواد چوہدری نے کہا کہ کشمیر کے عوام کی سیاست پاکستان کے عوام کی سیاست سے بہت میل کھاتی ہے، جس طرح یہاں ذاتی مفادات پر مبنی سیاسی جماعتوں کو مسترد کیا گیا، اسی طرح کشمیر کے عوام نے بھی انہیں مسترد کیا۔

ان کا کہنا تھا کہ کل آصف زرداری صاحب کی سالگرہ تھی اور بلاول نے انہیں یہ تحفہ دیا ہے کہ وہ پارٹی جو چاروں صوبوں میں موجود تھی، اب وہ اتنی سکڑ گئی ہے کہ اب باقی صوبوں کی طرح کشمیر میں بھی ان کا کوئی پرسان حال نہیں ہے اور 2023 کے الیکشن میں ان کا سندھ میں بھی یہی حال ہو گا، جس طرح سے یہ حکومت کررہے ہیں تو یہ ان کا سندھ میں بھی آخری دور حکومت ہے۔

انہوں نے کہا کہ عمران خان نے کشمیر میں انتخابی مہم کے دوران یاسین ملک جیسے مجاہدین کے بارے میں بات کی لیکن مریم اور بلاول کی تمام گفتگو تنقید، گالیوں اور عمران خان کو برا کہنے پر تھی۔

اس موقع پر علی امین گنڈاپور نے گفتگو کرتے ہوئے کہا کہ میں عمران خان پر اعتماد کا اظہار کرنے پر کشمیر کے غیرت مند عوام کا شکریہ ادا کرتا ہوں اور ہم 72 سال سے محرومی کا شکار آزاد کشمیر کے عوام کے مسائل کو دور کریں گے۔

ایک سوال کے جواب میں انہوں نے کہا کہ انتخابات میں پرتشدد واقعات کے نتیجے میں ہمارے دو جوان شہید ہوئے ہیں اور ایک کی حالت تشویشناک ہے، 57 افراد گولیوں اور پتھراؤ وغیرہ سے زخمی ہوئے۔

ان کا کہنا تھا کہ عمران خان نے پہلے ہی بتا دیا تھا کہ وزیر اعظم، اسپیکر اور وزرا کے ناموں کا اعلان آزاد کشمیر میں انتخابات کے بعد ہو گا، اس حوالے سے پارٹی کا اجلاس ہو گا جس کے بعد جلد ہی فیصلہ سامنے آ جائے گا۔

انہوں نے کہا کہ مجھے الیکشن کمیشن پر تحفظات ہیں لیکن اس کے باوجود میں ان کا بہت احترام کرتا ہوں، میرا بیانیہ بلاول یا مریم کے بیانیے سے زیادہ سخت نہیں تھا لیکن جب کوئی الیکشن میں میرے لیڈر پر بات کرے گا تو میں جواب دوں گا۔

ایک سوال کے جواب میں فواد چوہدری نے کہا کہ اگر نواز شریف نے حمداللہ محب سے ملاقات نہ کی ہوتی تو مسلم لیگ (ن) اور پیپلز پارٹی کی نشستیں برابر آ جاتیں لیکن نواز شریف اور مریم نواز نے کشمیر مخالف بیانیے کو آگے بڑھایا جس کی وجہ سے کشمیر کے لوگوں نے انہیں مسترد کیا ہے۔

مسلم لیگ (ن) نے آزاد کشمیر انتخابات کے لیے ایل اے 35 سے پارٹی اُمیدوار اسمٰعیل گجر کو بھارت سے مدد لینے کے بیان پر اظہار وجوہ کا نوٹس جاری کردیا۔

مسلم لیگ (ن) کے سیکریٹری جنرل احسن اقبال کی جانب سے اسمٰعیل گجر کو جاری اظہار وجوہ کے نوٹس میں کہا گیا ہے کہ ‘آپ نے انتخابات کے لیے بھارت سے مدد لینے کا غیر ذمہ دارانہ بیان دیا’۔

نوٹس میں اسمٰعیل گجر کو 7 دنوں میں بیان پر جواب جمع کرانے کی ہدایت دیتے ہوئے کہا گیا ہے کہ جواب جمع نہ کرانے پر ان کے خلاف سخت ڈسپلنری ایکشن لیا جائے گا۔

واضح رہے کہ اسمٰعیل گجر نے گزشتہ روز آزاد جموں و کشمیر کے انتخابات کے لیے پولنگ کے دوران میڈیا سے گفتگو میں پولیس پر مسلم لیگ (ن) کا پولنگ کیمپ اکھاڑنے کا الزام عائد کرتے ہوئے کہا تھا کہ ‘اگر پرامن پولنگ نہ چلنے دی گئی تو میں بھارت کو پکاروں گا’۔

وفاقی وزیر اطلاعات و نشریات فواد چوہدری نے سماجی رابطے کی ویب سائٹ پر ٹوئٹ میں کہا کہ ‘احسن اقبال نے بھارت سے مدد مانگنے کے بیان پر ایک سیاسی یتیم کو نوٹس دیا ہے جو اچھی بات ہے، لیکن کیا ہی اچھا ہو مسلم لیگ (ن) کی مجلس عاملہ نواز شریف کو حمداللہ محب جیسے پاکستان دشمن اور بھارت کے پروردہ شخص سے ملاقات پر نوٹس جاری کرے اور ان سے باز پرس کرے؟’

خیال رہے کہ چند روز قبل پاکستان مسلم لیگ (ن) کے قائد اور سابق وزیر اعظم نواز شریف سے افغانستان کے قومی سلامتی کے مشیر حمد اللہ محب نے لندن میں ملاقات کی تھی۔

سماجی رابطے کی ویب سائٹ ٹوئٹر پر بیان جاری کرتے ہوئے افغانستان کے قومی سلامتی کونسل کا کہنا تھا کہ سابق وزیر اعظم نواز شریف سے ملاقات میں باہمی دلچسپی کے امور پر تبادلہ خیال کیا گیا۔

اس ملاقات کے بارے میں وفاقی وزیر اطلاعات فواد چوہدری نے ردعمل دیتے ہوئے کہا ہے کہ ‘نواز شریف کو پاکستان سے باہر بھیجنا اس لیے خطرناک تھا کہ ایسے لوگ بین الاقوامی سازشوں میں مددگار بن جاتے ہیں’۔

ان کا کہنا تھا کہ ‘نواز شریف کی افغانستان میں بھارتی خفیہ ایجنسی ‘را’ کے سب سے بڑے حلیف حمداللہ محب سے ملاقات ایسی ہی کارروائی کی مثال ہے’۔

انہوں نے دعویٰ کیا کہ ‘نریندر مودی، محب یا امراللہ صالح، ہر پاکستان دشمن نواز شریف کا قریبی دوست ہے’۔

اسلام آباد: آزاد جموں و کشمیر (اے جے کے) کے وزیر اعظم کے منصب کے لیے پاکستان تحریک انصاف (پی ٹی آئی) کے سردار تنویر الیاس اور بیرسٹر سلطان محمود کے مابین فیصلہ ہوگا۔

رپورٹ کے مطابق انتخابات کے غیر سرکاری نتائج کے مطابق پی ٹی آئی نے 25، پیپلز پارٹی نے 10 اور پاکستان مسلم لیگ (ن) نے 6 حلقوں میں کامیابی حاصل کی ہے۔

آزاد جموں و کشمیر کی سیاست میں نئے آنے والے سردار تنویر الیاس کے بارے میں کہا جاتا ہے کہ وہ وزارت عظمیٰ کے لیے ’مضبوط‘ امیدوار ہیں۔

تحریک انصاف کے ذرائع نے بتایا کہ اے جے کے کے سابق وزیر اعظم بیرسٹر سلطان محمود نے عہدہ نہ دیے جانے کے امکان پر برہمی کا اظہار کیا ہے۔

اس حوالے سے وزیر اطلاعات فواد چوہدری سے رابطہ کیا گیا تو انہوں نے بتایا کہ دونوں امیدواروں پر اے جے کے وزیر اعظم کے عہدے کے لیے غور کیا جارہا ہے، لیکن ’حتمی فیصلہ وزیر اعظم عمران خان ہی کریں گے‘۔

انہوں نے تصدیق کی کہ سردار تنویر الیاس اور بیرسٹر سلطان محمود دونوں نام وزرات عظمیٰ کے لیے زیر غور ہیں۔

بیرسٹر سلطان محمود کی ناراضگی سے متعلق سوال کے جواب میں انہوں نے کہا کہ ابھی فیصلہ ہونا باقی ہے۔

اس وقت سردار تنویر الیاس وزیر اعلیٰ پنجاب کے معاون خصوصی برائے سرمایہ کاری کی حیثیت سے خدمات انجام دے رہے ہیں۔

مسلم لیگ (ن) نے ان پر الزام عائد کیا تھا کہ وہ حکمراں جماعت پاکستان تحریک انصاف (پی ٹی آئی) کو ’بھاری‘ فنڈز فراہم کرتے رہے ہیں، تاہم تنویر الیاس نے اس الزام کی تردید کی ہے۔

گزشتہ روز ایک نجی ٹی وی چینل سے گفتگو کرتے ہوئے سردار تنویر الیاس نے کہا کہ حتمی فیصلہ وزیر اعظم عمران خان ہی کریں گے۔

تاہم انہوں نے کہا کہ اگر انہیں آزاد جموں و کشمیر کے وزیر اعظم کا عہدہ دیا گیا تو وہ عمران خان کی توقعات پر پورا اتریں گے۔

اسلام آباد: وفاقی وزیر داخلہ شیخ رشید نے کہا ہےکہ نواز شریف فوجی نرسریوں سے نکلا ہے اور اسی فوج کے خلاف بدزبانی کرتا ہے جب کہ ساری زندگی بھی لگے رہیں تو یہ لوگ اقتدار کا منہ نہیں دیکھ سکیں گے۔

اسلام آباد میں پریس کانفرنس کرتے ہوئے شیخ رشید نے کہا کہ پی ٹی آئی کشمیر میں تنہا حکومت بنانے جا رہی ہے اور میں نے پہلے کہہ دیا تھا کہ یہ کشمیر الیکشن پر رونا پیٹنا ڈالیں گے، کشمیر الیکشن سے متعلق جو کہا وہی ہوا،2023 میں بھی عمران خان کی حکومت بنے گی اور اگلے انتخابات میں سندھ میں بھی تحریک انصاف حکومت بنائے گی، پیپلزپارٹی نے بڑا پیسہ خرچ کرکے دو تین سیٹوں کا اضافہ کیا ہے۔

انہوں نے کہا کہ نواز شریف فوجی نرسریوں سے نکلا ہے اور اسی فوج کے خلاف بدزبانی کرتا ہے جب کہ ساری زندگی بھی لگے رہیں تو یہ لوگ اقتدار کا منہ نہیں دیکھ سکیں گے، غیر ذمہ دارانہ زبان ختم کرنے تک ان کا کوئی مستقبل نہیں، نوازشریف کا ایک ہی ایجنڈا ہے، اینٹی آرمی، اینٹی اسٹیبلشمنٹ اور اینٹی عمران خان، ہم ان کی مدد کرنے کو تیار ہیں، چارٹرڈ جہاز دینے کو تیار ہیں، وہاں بیٹھ کر اینٹی اسٹیٹ اور اینٹی عمران خان تقریریں نا کریں، نوازشریف مودی کے ساتھ پگڑی بدل سکتے ہیں۔

وزیر داخلہ کا کہنا تھا کہ ہزاروں کی تعداد میں غیر ملکی غیرقانونی طور پر رہ رہے ہیں، پاکستان میں سالہاسال سے ویزہ تجدید کے بغیر رہنے والوں کو 14 اگست تک کا ٹائم دے رہا ہوں لہٰذا جو غیرملکی بغیر ویزا تجدید کے پاکستان میں ہیں وہ 14 اگست تک پاکستان چھوڑ دیں، اگر یہ ویزے کے لیے اپلائی کریں تو فیس معاف کرنے کے لیے تیار ہوں۔

انہوں نے کہا کہ جو انتخابات کے دوران 840 کارڈ ریلیز کروائے انہیں مسترد کرنے کا اعلان کرتا ہوں، 7 سال میں جتنے جعلی شناختی کارڈ بنے ہیں، 39 آدمی کراچی سے نکالے ہیں، جو پیسے لے کر شناختی کارڈ بناتے رہے ہیں انہیں نکالیں گے، نادرا کو متنازع کرنے کے لیے ایک سوشل میڈیا کمپنی استعمال کی جارہی ہے، نادرا کے ایم ڈی کو کہا ہے کہ 14 دن میں نیا تصدیق کا سسٹم لائیں۔

شیخ رشید نے بتایا کہ پاکستان کے خلاف انڈیا اور اسرائیل نے ہائبرڈ وار شروع کی ہوئی ہے جب کہ افغان پالیسی پر فیصلہ فارن آفس نے کرنا ہے، ہماری سول آرمڈ فورسز بارڈر پر لگی ہوئی ہیں، ایرانی بارڈر کی فینسنگ 50 فیصد ہوگئی ہے، افغان فوج کے 46 بشمول 5 آفیسر آئے ہیں، انہیں باعزت واپس کریں گے۔

انہوں نے کہا کہ نورمقدم قتل کیس کے ملزم کا نام ای سی ایل میں ڈالا جائے گا، ملزم کے والد اور ملازمین کو بھی گرفتار کیا ہے، ملزمان کو بلیک لسٹ کردیا ہے۔

گلگت بلتستان کے بعد آزاد کشمیر کے انتخابات میں بھی پاکستان تحریک انصاف نے میدان مار لیا ہے اور وہ کسی اتحاد کے بغیر ہی حکومت بنانے کی پوزیشن میں ہے۔

آزاد کشمیر قانون ساز اسمبلی کی 45 میں سے 44 نشستوں کے غیر حتمی اور غیر سرکاری نتائج موصول ہوگئے ہیں پاکستان تحریک انصاف نے 25 نشستیں حاصل کرکے میدان مارلیا جبکہ پیپلز پارٹی نے 11 اور مسلم لیگ ن نے 6 نشستیں حاصل کی ہیں۔ اس کے علاوہ جموں کشمیر پیپلز پارٹی اور مسلم کانفرنس نے بھی ایک ایک نشست پر کامیابی حاصل کی ہے۔

ایل اے 16 باغ کے 4 پولنگ اسٹیشن پر نتائج روک لئے گئے
الیکشن کمیشن نے ایل اے 6 باغ کے چار پولنگ اسٹیشن پر تنازعہ کے باعث نتائج روک لئے گئے، ان چار پولنگ اسٹیشنوں پر دوبارہ پولنگ کا فیصلہ آج ہو گا۔ اس حلقے کے 163 پولنگ اسٹیشنوں کے غیر حتمی اور غیر سرکاری نتائج میں پی ٹی آئی کے سردار میر اکبر کو پیپلز پارٹی کے سردار قمر الزمان پر 196 ووٹوں کی برتری حاصل ہے۔

کون کہاں سے کامیاب

الیکشن کمیشن کی جانب سے جاری غیر حتمی نتائج کے مطابق

ایل اے 01 میر پور 1 سے تحریک انصاف کے چوہدری اظہر صادق کامیاب ہوئے

ایل اے 02 میر پور 2 سے پیپلز پارٹی کے قاسم مجید

ایل اے 03 میر پور 3 سے تحریک انصاف کے بیرسٹر سلطان محمود چوہدری

ایل اے 04 میر پور 4 سے تحریک انصاف کے چوہدری ارشد حسین

ایل اے 05 بھمبر 1 سے مسلم لیگ (ن) کے کرنل ریٹائرڈ وقار احمد نور

ایل اے 06 بھمبر 2 سے تحریک انصاف کے علی شان چوہدری

ایل اے 07 بھمبر 3 سے تحریک انصاف کے چوہدری انوارالحق

ایل اے 08 کوٹلی 1 سے تحریک انصاف کے ظفر اقبال ملک

ایل اے 09 کوٹلی 2 سے پیپلز پارٹی کے جاوید اقبال بڈھانوی

ایل اے 10 کوٹلی 3 سے پیپلز پارٹی کے چوہدری یاسین

ایل اے 11 کوٹلی 4 سے تحری کے چوہدری اخلاق

ایل اے 12 کوٹلی 5 سے پیپلز پارٹی کے چوہدری یاسین

ایل اے 13 کوٹلی 6 سے تحریک انصاف کے نثار انصر ابدالی

ایل اے 14 باغ 1 سے آزاد جمو کشمیر مسلم کانفرنس کے سردار عتیق احمد خان

ایل اے 15 باغ 3 سے تحریک انصاف کے سردار تنویر الیاس

ایل اے 17 باغ 4 سے پیپلز پارٹی کے فیصل ممتاز راٹھور

ایل اے 18 پونچھ سدنوٹی 1 سے تحریک انصاف کے سردار عبدالقیوم نیازی

ایل اے 19 پونچھ سدنوٹی 2 سے مسلم لیگ (ن) کے سردار عامر الطاف خان

ایل اے 20 سے پونچھ سدنوٹی 3 پیپلز پارٹی کے سردار محمد یعقوب

ایل اے 21 پونچھ سدنوٹی 4 سے جموں کشمیر پیپلز پارٹی کے سردار حسان ابراہیم

ایل اے 22 پونچھ سدنوٹی 5 سے تحریک انصاف کی شاہدہ صغیر چغتائی

ایل اے 23 پونچھ سدنوٹی 6 سے تحریک انصاف کے سردار محمد حسین

ایل اے 24 پونچھ سدنوٹی 7 سے تحریک انصاف کے سردار فہیم اختر ربانی

ایل اے 25 نیلم ویلی 1 سے مسلم لیگ (ن) کے شاہ غلام قادر

ایل اے 26 نیلم ویلی 2 سے پیپلز پارٹی کے میاں عبدالوحید

ایل اے 27 مظفر آباد 1 سے پیپلز پارٹی کے سردار جاوید ایوب

ایل اے 28 مظفر آباد 2 سے پیپلز پارٹی کے سید بازل نقوی

ایل اے 29 مظفر آباد 3 سے تحریک انصاف کے خواجہ فاروق احمد

ایل اے 30 مظفر آباد 4 سے تحریک انصاف کے چوہدری راشد

ایل اے 31 مظفر آباد 5 سے پیپلز پارٹی کے چوہدری لطیف اکبر

ایل اے 32 مظفر آباد 6 سے مسلم لیگ (ن) کے راجا فاروق حیدر

ایل اے 33 مظفر آباد 7 سے تحریک انصاف دیوان علی خان چغتائی

ایل اے 34 جموں 1 سے تحریک انصاف کے چوہدری ریاض احمد

ایل اے 35 جموں 2 سے تحریک انصاف کے چودہری مقبول گجر

ایل اے 36 جموں 3 سے تحریک انصاف کے حافظ حامد رضا

ایل اے 37 سے جموں 4 تحریک انصاف کے غلام محمد سرگالہ

ایل اے 38 جموں 5 سے تحریک انصاف کے چوہدری محمد اکبر ابراہیم

ایل اے 39 جموں 6 سے مسلم لیگ (ن) کےراجا محمد صدیق

ایل اے 40 سے کشمیر ویلی 1 سے پیپلز پارٹی کے عامر عبدالغفار لون

ایل اے 41 کشمیر ویلی 2 سے تحریک انصاف کے دیوان غلام محی الدین

ایل اے 42 کشمیر ویلی 3 سے تحریک انصاف کے محمد عاصم شریف

ایل اے 43 کشمیر ویلی 4 سے تحریک انصاف کے جاوید بٹ

ایل اے 44 کشمیر ویلی 5 سے مسلم لیگ (ن) کے احمد رضا قادری

اور ایل اے 45 کشمیر ویلی 6 سے تحریک انصاف کے عبدالماجد خان جیت گئے ہیں

پولنگ کی شرح گزشتہ انتخابات سے کم

الیکشن کمیشن کے ذرائع کے مطابق گزشتہ روز ہونے والے الیکشن میں پولنگ کا ٹرن آؤٹ 58 فیصد رہا جب کہ 2016 کے عام انتخابات میں یہ شرح 65 فیصد تھی۔

کس پارٹی نے کتنے ووٹ لئے

الیکشن کمیشن آزادکشمیر کے ذرائع کے مطابق آزادکشمیر قانون ساز اسمبلی کے انتخابات 2021 میں پاکستان تحریک انصاف نے سب سے زیادہ 6 لاکھ 13 ہزار 590 ووٹ حاصل کئے، جس کی شرح 32.5 فیصد بنتی ہے، پاکستان مسلم لیگ (ن) نے 4لاکھ 91ہزار 91 ووٹ لئے جس کی شرح 25.65 بنتی ہے، پاکستان پیپلز پارٹی 3لاکھ 49 ہزار895 ووٹ لئے جس کی شرح 18.28 فیصد بنتی ہے۔ آل جموں کشمیر مسلم کانفرنس نے ایک لاکھ 53 ہزار 861 ووٹ حاصل کئے جس کی شرح 8.4 فیصد بنتی ہے، آزاد امیدواروں نے ایک لاکھ 33 ہزار 136 ووٹ حاصل کئے اور ان کی شرح 6.95 بنتی ہے. تحریک لبیک آزاد کشمیر نے 94 ہزار 487 ووٹ حاصل کئے جس کی شرح 4.94 بنتی ہے۔

مریم نواز کا نتائج تسلیم نہ کرنے کا اعلان

مسلم لیگ (ن) کی نائب صدر مریم نواز نے انتخابی نتائج پر اپنی ٹویٹ کیا کہ میں نے نتائج تسلیم نہیں کیے ہیں اور نہ کروں گی۔ میں نے تو 2018 کے نتائج بھی تسلیم نہیں کیے اور نہ اس جعلی حکومت کو مانا ہے۔اس ’بے شرم دھاندلی‘ پر کیا لائحہ عمل ہو گا، جماعت جلد فیصلہ کرے گی‘۔

’اپوزیشن اپنی قیادت اور سیاست نظرثانی کرے‘

آزاد کشمیر کے انتخابی نتائج پر وفاقی وزیر اطلاعات و نشریات فواد چوہدری نے اپنی ٹوئٹ میں کہا کہ کشمیر انتخابات میں تحریک انصاف کی شاندارکامیابی عام آدمی کے وزیراعظم عمران خان پرغیرمتزلزل اعتماد کا اظہار ہے، اپوزیشن اپنی قیادت اور سیاست دونوں پر نظرثانی کرے، آصف زرداری اور نواز شریف کو لوگ قبول کرنے کو تیار نہیں،متبادل قیادت کا وقت ہے، محب سے ملاقاتیں کرنے والوں کا کوئی مستقبل نہیں۔

آزاد کشمیر میں 25 جولائی کو ہونے والے قانون ساز اسمبلی کے انتخابات میں سابق وزرائے اعظم سمیت بڑے بڑے نام جیتنے میں کامیاب رہے۔

وزیر اعظم آزاد کشمیر راجا فاروق حیدر ایل اے 32 مظفر آباد سے جیت گئے لیکن انہیں ایل اے 33 مظفر آباد سے شکست کا سامنا کرنا پڑا۔

ایل اے 3 میرپور سے پی ٹی آئی آزاد کشمیر کے صدر اور سابق وزیراعظم بیرسٹر سلطان محمود چوہدری بھی کامیاب ہو گئے، اس حلقے میں پاکستان مسلم لیگ ن کے چوہدری محمد سعید کو شکست ہوئی۔

تحریک انصاف کے سردار تنویر الیاس ایل اے 15 باغ سے جیت گئے اور پاکستان پیپلز پارٹی کے ضیا قمر کا دوسر نمبر رہا۔

آزاد کشمیر انتخابات میں پی ٹی آئی نے سب سے زیادہ نشستیں لے کر میدان مار لیا
ایل اے 29 مظفر آباد سے مسلسل دو بار منتخب ہونے والے ن لیگی امیدوار بیرسٹر افتخار علی گیلانی ہار گئے جبکہ پی ٹی آئی کے خواجہ فاروق احمد جیت گئے۔

مظفرآباد سے پیپلز پارٹی کے چوہدری لطیف اکبر اور پونچھ سے سردار محمد یعقوب خان جیت گئے۔ اس کے علاوہ باغ سے آل جموں و کشمیر مسلم کانفرنس کے سردار عتیق احمد خان بھی کامیاب رہے۔

خیال رہے کہ گزشتہ روز آزاد کشمیر کی قانون ساز اسمبلی کے انتخابات میں پاکستان تحریک انصاف 25 نشستوں کے ساتھ سادہ اکثریت حاصل کرنے میں کامیاب رہی جبکہ پیپلز پارٹی 11 نشستوں کے ساتھ دوسرے اور مسلم لیگ ن 6 نشستوں کے ساتھ تیسرے نمبر پر رہی۔

الیکشن کمیشن کے ذرائع کے مطابق آزادکشمیر انتخابات میں ووٹنگ کا ٹرن آؤٹ 58 فیصد رہا۔

ذرائع نے بتایا کہ انتخابات میں پاکستان تحریک انصاف نے سب سے زیادہ 6 لاکھ 13 ہزار 590 ووٹ حاصل کیے اور پی ٹی آئی کے حاصل کردہ ووٹوں کی شرح 32.5 ہے۔

ذرائع کے مطابق مسلم لیگ (ن) نے 4 لاکھ 91 ہزار 91 ووٹ حاصل کیے جس کی شرح 25.65 ہے جب کہ پیپلزپارٹی نے 3لاکھ 49 ہزار 895 ووٹ لیے جس کی شرح 18.28 ہے۔

اس کے علاوہ آل جموں کشمیرمسلم کانفرنس نے ایک لاکھ 53ہزار 861 ووٹ حاصل کیے۔

لاہور: مسلم لیگ (ن) کی نائب صدر مریم نواز نے آزاد کشمیر انتخابات کے حوالے سے کہا ہے میں نے نتائج تسلیم نہیں کیے ہیں اور نا کروں گی۔

سماجی رابطے کی ویب سائٹ پر مریم نواز نے اپنے ٹوئٹ میں لکھا کہ میں نے تو 2018 کے نتائج بھی تسلیم نہیں کیے نا اس جعلی حکومت کو مانا ہے، ورکر اور ووٹرز کو شاباش دی ہے جب کہ اس بے شرم دھاندلی پر کیا لائحہ عمل ہو گا، انشاءاللہ جماعت جلد فیصلہ کرے گی۔

اس سے قبل مریم نواز نے ٹویٹ میں کہا کہ (ن) لیگ نے بہت اچھا الیکشن لڑا ہے، سخت مقابلہ کیا ہے۔ ریاست اور طاقت کے تمام سینٹرز اور دھاندلی کا یوں مقابلہ کرنا آسان نہیں ہے، میں (ن) لیگ کے تمام ووٹرز اور ورکروں کو ان کی جرت اور بہادری پر شاباش دینا چاہتی ہوں، مجھے ان پر دل سے فخر ہو رہا ہے۔

ایک اور ٹویٹ میں انہوں نے لکھا کہ میں بالکل مایوس نہیں ہوں، مسلم لیگ (ن) نے ایک دھاندلی زدہ الیکشن میں بھی بہترین مقابلہ کیا ہے اورشیم پیج کو بہت ٹف ٹائم دیا ہے، کسی بھی منصفانہ الیکشن میں یہ (ن) کے سامنے کھڑے بھی نہیں ہو سکتے، انشاءاللہ خوشی کی بات یہ ہے کہ (ن) کشمیر میں ایک عوامی طاقت کے طور پر ابھری ہے اور جاگ رہی ہے۔