Category تازہ ترین

راولپنڈی: آزاد کشمیر میں الیکشن ڈیوٹی پر مامور فوج کی گاڑی کو حادثہ پیش آگیا جس کے باعث چار فوجی جوان شہید اور تین زخمی ہوگئے۔

آئی ایس پی آر کے مطابق آزاد جموں و کشمیر میں الیکشن ڈیوٹی پر مامور فوج کی ایک گاڑی گہری کھائی میں گرگئی جس کے نتیجے میں چار فوجی جوان شہید اور تین زخمی ہوگئے جنہیں قریبی اسپتال منتقل کردیا گیا۔

آئی ایس پی آر کے مطابق پاک فوج کی گاڑی کو حادثہ لسوا کے قریب موڑ کاٹتے ہوئے پیش آیا، گاڑی کا سویلین ڈرائیور بھی حادثے میں شدید زخمی ہوا ہے۔

وزیر داخلہ شیخ رشید احمد نے پاک فوج کے چار جوانوں کی شہادت پر دکھ کا اظہار کیا اور شہید ہونے والوں کے لیے بلند درجات اور زخمی سپاہیوں کے لیے جلد صحت یابی کی دعا کی۔

آزاد جموں و کشمیر (اے جے کے) میں 11ویں عام انتخابات کے لیے پولنگ کا وقت ختم ہوگیا اور ووٹوں کی گنتی کا عمل شروع ہوگیا جبکہ ووٹنگ کے دوران 2 سیاسی گروپوں میں تصادم کے دوران پاکستان تحریک انصاف (پی ٹی آئی) کے 2 کارکن جاں بحق ہوگئے۔

آزاد جموں و کشمیر کے انتخابات کے لیے ووٹنگ کا عمل 5 بجے مکمل ہوا تاہم پولنگ اسٹیشن کے احاطے میں موجودووٹرز کو 5 بجے کے بعد بھی اپنا حق رائے دہی استعمال کرنے کی اجازت دی گئی جبکہ جن پولنگ اسٹیشنز میں ووٹنگ کا عمل مکمل ہوا وہاں ووٹوں کی گنتی شروع کردی گئی ہے۔

پیپلز پارٹی کا پی ٹی آئی پر دھاندلی کا الزام
پیپلز پارٹی (پی پی پی) نے الزام عائد کیا کہ آزاد جموں و کشمیر کے انتخابی حلقے ایل اے 18 کے منڈہول بل بازار کے پولنگ اسٹیشن پر پی ٹی آئی کارکنان نے قبضہ کرکے بیلٹ پیپر پر مہر لگائے ہیں۔

الیکشن سیل کے سربراہ سینیٹر تاج حیدر کی جانب سے جاری اعلامیے میں کہا گیا کہ آزاد جموں و کشمیر کے سیکریٹری الیکشن کمیشن کو واقعے کی تحریری شکایت جمع کرادی۔

انہوں نے بتایا کہ انتخابی حلقے ایل اے 30 میں پیپلزپارٹی کے چیف پولنگ ایجنٹ ضرار خان کو پولیس نے گرفتار کیا جبکہ پی ٹی آئی کارکنان دو روز قبل پی پی پی کارکن ضرار خان کے گھر پر بھی فائرنگ کرچکے ہیں۔

سینیٹر تاج نے بتایا کہ چیف پولنگ ایجنٹ ضرار خان کی گرفتاری سے متعلق الیکشن کمیشن کو شکایت جمع کرادی ہے۔

علاوہ ازیں انہوں نے کہا کہ آزاد جموں و کشمیر کے انتخابی حلقے ایل اے 6 میں بوائز مڈل اسکول کٹیالہ میں واقع پولنگ اسٹیشن نمبر 84 میں پی ٹی آئی کارکنان نے پولنگ کا عمل رکوادیا ہے۔

پاکستان پیپلز پارٹی کے مرکزی الیکشن سیل کے سربراہ سینیٹر تاج حیدر نے آزاد جموں و کشمیر کے سیکریٹری الیکشن کمیشن کو معاملے کی تحریری شکایت جمع کرادی۔

پولنگ اسٹیشن ایل اے 32 میں پولیس اہلکار زخمی
علاوہ ازیں ضلع جہلم میں پولنگ اسٹیشن ایل اے 32 میں ’سیاسی جماعت کے ڈنڈا بردار کارکنوں‘ کے حملے میں 5 پولیس اہلکار زخمی ہوگئے۔

اس حوالے سے ضلع جہلم کے ایس پی ریاض مغل نے دعویٰ کیا کہ ڈھل چکھیاں میں پولنگ اسٹیشن ایل اے 32 میں جماعت اسلامی (جے آئی) کے کارکنوں کے حملے میں 5 پولیس اہلکار زخمی ہوگئے ہیں۔

انتخابات میں ووٹرز ٹرن آؤٹ 56 فیصد سے زیادہ ہوگا، چیف الیکشن کمشنر
اس سے قبل مظفر آباد میں میڈیا سے بات کرتے ہوئے آزاد کشمیر کے چیف الیکشن کمشنر جسٹس (ر) عبدالرشید سلہریا نے اُمید ظاہر کی تھی کہ آزاد کشمیر کے انتخابات میں ووٹرز کا ٹرن آؤٹ 56 فیصد سے زیادہ ہوگا۔

انہوں نے کہا تھا کہ انتخابی مراحل احسن طریقے سے پورے کیے گئے اور حساس پولنگ اسٹیشنز پر سیکیورٹی کے مکمل انتظامات ہیں جبکہ الیکشن کی تیاری میں حکومت کی پوری معاونت حاصل رہی ہے۔

انہوں نے کہا کہ آزاد کشمیر کے انتخابات میں خواتین ووٹرز کی شرح پہلے کے مقابلے میں زیادہ رہے گی۔

وفاقی وزیر برائے امور کشمیر علی امین گنڈا پور سے متعلق سوال کے جواب میں انہوں نے کہا کہ میڈیا کی سوئی، علی امین پر ہی اٹک گئی ہے، آج کے دن کوئی اچھی بات کریں۔

علاوہ ازیں انہوں نے صحافیوں کی ان شکایات پر معذرت کی جس میں صحافیوں نے کہا تھا کہ انتخابی عملہ تعاون نہیں کررہا اور کوریج کے لیے درکار کارڈز کی بروقت فراہمی کو یقینی نہیں بنا رہا۔

آزاد کشمیر کے عام انتخابات
آزاد جموں و کشمیر (اے جے کے) میں 11ویں عام انتخابات کے لیے میدان سجا ہوا ہے، تین مرکزی سیاسی جماعتوں کی جانب سے انتخابی جلسوں میں ایک دوسرے پر الزامات کے پس منظر میں 32 لاکھ 20 ہزار کشمیری آج اپنا حق رائے دہی استعمال کررہے ہیں۔

رپورٹ کے مطابق اے جے کے قانون ساز اسمبلی کے 45 حلقوں میں مجموعی طور پر 32 لاکھ 20 ہزار 546 ووٹ رجسٹرڈ ہیں جبکہ ان میں سے آزاد جموں و کشمیر اسمبلی کے 33 حلقوں میں 28 لاکھ 17 ہزار ووٹرز رجسٹرڈ ہیں۔

باقی رائے دہندگان میں سے 3 لاکھ 73 ہزار 652 مقبوضہ جموں سے آنے والے مہاجرین کی نمائندگی کرنے والے 6 حلقوں میں رجسٹرڈ ہیں اور مقبوضہ کشمیر سے تعلق رکھنے والے مہاجرین کی نمائندگی کرنے والے 6 حلقوں میں 29 ہزار 804 ووٹرز رجسٹرڈ ہیں۔

مقبوضہ جموں و کشمیر کے مہاجرین کی نمائندگی کرنے والے ان 12 حلقوں میں مجموعی طور پر 4 لاکھ 3 ہزار 456 رجسٹرڈ ووٹرز ہیں۔

انتخابات کے لیے ایک ہزار 209 پولنگ اسٹیشنز حساس اور 826 حساس ترین قرار دیے گئے ہیں جبکہ پریذائیڈنگ افسران کو مجسٹریٹ کے اختیارات تفویض کیے جاچکے ہیں۔

الیکشن کمیشن کے مطابق آزاد کشمیر میں پولنگ، بغیر کسی وقفے کے شام 5 بجے تک جاری رہے گی۔

آزاد کشمیر میں 33 انتخابی حلقوں میں 587 اُمیدوار جبکہ مہاجرین کی 12 نشستوں پر 121 اُمیدوار مدمقابل ہیں۔

مجموعی طور پر 24 خواتین اُمیدوار انتخابات میں حصہ لے رہی ہیں، مسلم لیگ (ن) اور پی ٹی آئی نے 2، 2 خواتین اُمیدواروں کو ٹکٹ دیے گئے ہیں جبکہ مسلم کانفرنس نے ایک خاتون کو انتخابی میدان میں اتارا ہے۔

آزاد کشمیر کے انتخابات میں امن و امان کی صورتحال برقرار رکھنے کے لیے آزاد کشمیر پولیس، دیگر صوبوں سے سوِل آرمڈ فورسز اور فوج کے مجموعی طور پر تقریباً 43 ہزار 500 اہلکاروں کو تعینات کیا گیا ہے جبکہ فوج کی تعیناتی کوئیک ری ایکشن فورس کے تحت ہوگی۔

قبل ازیں آزاد کشمیر کے چیف سیکریٹری شکیل قادر خان نے بتایا تھا کہ امن و عامہ کی صورتحال برقرار رکھنے کے لیے آزاد کشمیر سے 5 ہزار 300 پولیس اہلکاروں، پنجاب پولیس سے 12 ہزار، خیبرپختونخوا سے 10 ہزار اور اسلام آباد پولیس سے ایک ہزار، فرنٹیئر کانسٹیبلری سے 400 جبکہ رینجرز کے 3 ہزار 200 اہکار طلب کیے گئے ہیں۔

اس حوالے سے بتایا گیا کہ کشمیر کے 33 حلقوں میں 12 بڑے مقابلے متوقع ہیں، حلقہ ایل اے 29 مظفر آباد کی نشست پر مسلم لیگ (ن) کے بیرسٹر افتخار گیلانی کا مقابلہ پاکستان تحریک انصاف (پی ٹی آئی) کے خواجہ فاروق سے ہوگا۔

اسی طرح حلقہ ایل اے 32 میں مسلم لیگ (ن) کے راجا فاروق حیدر کا مقابلہ پاکستان پیپلز پارٹی (پی پی پی) کے اشفاق ظفر سے ہوگا۔

حلقہ ایل اے 3 میں پی ٹی آئی کے صدر و سابق وزیر اعظم آزاد کشمیر بیرسٹر سلطان محمود چوہدری اور (ن) لیگی امیدوار چوہدری سعید آمنے سامنے ہوں گے۔

علاوہ ازیں حلقہ ایل اے 15 میں پی ٹی آئی کے امیدوار سردار تنور الیاس، مسلم لیگ (ن) کے مشتاق منہاس، راجا یاسین کے مابین انتخابی معرکہ ہوگا۔

اس سے قبل آزاد جموں و کشمیر میں عام انتخابات میں بنیادی طور پر مقابلہ کرنے والی جماعتوں کے مقامی رہنماؤں کے مابین مقابلہ تھا۔

2006 کے عام انتخابات میں جماعت آل جموں و کشمیر مسلم کانفرنس (اے جے کے ایم سی) نے مظفر آباد میں اقتدار کی کرسی برقرار رکھنے کے لیے پاکستان پیپلز پارٹی (پی پی پی) سے مقابلہ کیا تھا۔

پانچ سال بعد عام انتخابات میں ایک دوسرے کے مدمقابل پیپلز پارٹی اور مسلم لیگ (ن) تھیں، انتخابات سے 7 ماہ قبل مقابلے میں حصہ لیا جبکہ آزاد جموں پارٹی تیسرے نمبر پر تھی۔

پیپلز پارٹی کے رہنما اور اس وقت کے وزیر اعظم یوسف رضا گیلانی کی کابینہ کے اراکین اور مسلم لیگ (ن) کے رہنما اور اس وقت کے وزیر اعلیٰ پنجاب شہباز شریف اور ان کے بڑے بھائی نواز شریف نے مختلف علاقوں کا دورہ کیا تھا اور انتخابات سے قبل انتخابی جلسوں سے خطاب کیا تھا۔

آزاد جموں و کشمیر میں پاکستان تحریک انصاف (پی ٹی آئی) 2015 میں آئی اور علاقائی صدر بیرسٹر سلطان محمود نے اپنے اسمبلی سے استعفیٰ دینے کے بعد ضمنی انتخاب لڑا تھا اور کامیابی حاصل کی۔

جنوبی وزیر ستان: مولانا فضل الرحمان کا کہنا ہے کہ اگر عمران خان کشمیر کا الیکشن جیت گئے تو ہم دھاندلی زدہ نتائج قبول نہیں کریں گے۔

جنوبی وزیرستان میں جلسہ سے خطاب کرتے ہوئے جے یو آئی (ف) کے سربراہ مولانا فضل الرحمان کا کہنا تھا کہ وزیراعظم عمران خان نے آزاد کشمیر میں ریفرنڈم کی بات کرکے اقوام متحدہ کی قراردادوں، پاکستان اور کشمیریوں کے 70 سالہ موقف سے غداری کی ہے، ہم نے پہلے کہہ دیا تھا کہ عمران خان نے کشمیر پر سودا بازی کردی اور یہ بیان ہمارے موقف کا ثبوت ہے، اب دھاندلی سے آزاد کشمیر میں نتائج حاصل کرنے کی کوشش کی جارہی ہے تاہم اگر عمران خان کشمیر کا الیکشن جیت گئے تو ہم دھاندلی زدہ نتائج قبول نہیں کریں گے۔

مولانا فضل الرحمان کا کہنا تھا کہ قبائلیوں کا انضمام تو کردیا گیا لیکن اب اسلام آباد میں بیٹھے لوگوں کو سمجھ نہیں آرہی کہ کرنا کیا ہے، قبائل میں نہ پرانا قانون ہے اور نہ نئے قانون کو سمجھا جارہا ہے، مردم شماری میں قبائلیوں کے بھی ساتھ دھاندلی کی گئی، قبائلی ہجرت میں تھے اور مردم شماری کردی گئی ہمیں ایسی مردم شماری قبول نہیں، گلگت بلتستان کی آبادی 15 لاکھ ہے اسے صوبہ بنانے کی باتیں کی جارہی اور ڈیڑھ کروڑ والی آبادی قبائل کو صوبہ بنانے نہیں دیا جارہا ہمارا مطالبہ ہے کہ قبائل کو الگ صوبہ بنایا جائے۔

مولانا فضل الرحمان کا کہنا تھا کہ حکومت کی عوامی پذیرائی کا یہ عالم ہے کہ پچاس ضمنی الیکشن ہوئے اور 48 میں پی ٹی آئی کو شکست ہوئی، مہنگائی اس قدر بڑھ گئی ہے کہ خریداری کی قوت نہیں رہی جب کہ 90 دن کے اندر کرپشن کے خاتمے کی بات ہوئی، کرپشن ختم کرنا دور کی بات، کرپشن کے ریکارڈ توڑ دیے گئے، بجلی اور گیس مہنگی کردی گئی لیکن حکمران کہتے ہیں عوام ٹیکس نہیں دیتے، تمہارے جیسے آدمی کو عوام ٹیکس کیوں دے، عمران خان جعلی اور ڈمی وزیراعظم ہیں۔

پیپلز پارٹی کی سینیٹر شیری رحمان نے آزادکشمیر الیکشن میں منظم دھاندلی کا الزام عائد کر دیا۔

شیری رحمان نے اپنے ایک بیان میں کہا کہ وفاقی حکومت انتخابات چوری کرنے کی بھرپور کوشش کی ہے۔

ان کا کہنا تھا کہ کوٹلی میں پیپلز پارٹی کے امیدوار کی گاڑی پر تحریک انصاف کے کارکنوں نے فائرنگ کی اور فوارہ چوک پولنگ اسٹیشن پر پولیس نے پیپلز پارٹی کا کیمپ اکھاڑ دیا۔

رہنما پیپلز پارٹی نے کہا کہ کئی پولنگ اسٹیشنز کی ووٹر فہرستوں میں واضح فرق ہے، پیپلز پارٹی نے الیکشن کمیشن کو تحریری شکایت جمع کروا دی ہے۔

وفاقی وزیر امور کشمیر و گلگت بلتستان علی امین خان گنڈاپور نے کہا ہے کہ مسلم لیگ ن اور پیپلز پارٹی پولنگ شروع ہونے سے پہلے ہی دھاندلی کا واویلا مچانا شروع ہو گئی ہیں۔

انہوں نے کہا کہ مسلم لیگ ن اور پیپلز پارٹی کی پی ٹی آئی کے کارکنوں کے خلاف غنڈہ گردی جاری ہے۔ اب تک پی ٹی آئی کے دو کارکن اپنی جانوں کا نذرانہ پیش کر چکے ہیں۔

آزاد کشمیر کے انتخابات سے متعلق بیان میں انہوں نے کہا کہ ہم نے پہلے ہی اس خدشے کا اظہار کیا تھا کہ یہ انتخابات میں دھاندلی کا رونا روئیں گے ،گلگت بلتستان میں بھی انہوں نے شکست کو دیکھتے ہوئے دھاندلی کا رونا رونا شروع کر دیا تھا۔

انہوں نے کہاکہ مسلم لیگ ن انتخابی مہم کے آغاز سے ہی یہ بھارت کا بیانیہ پیش کر رہی ہے ، مسلم لیگ ن کے ٹکٹ ہولڈر اسماعیل گجر کے بیان کی شدید مذمت کرتے ہیں، اسماعیل گجر کا بیان ظاہر کرتا ہے کہ ان کے بھارت کے ساتھ گہرے مراسم ہیں۔

علی امین گنڈاپور نے کہا کہ مسلم لیگ ن اور پیپلز پارٹی کی پی ٹی آئی کے کارکنوں کے خلاف غنڈاگردی جاری ہے ،اب تک پی ٹی آئی کے دو کارکن اپنی جانوں کا نذرانہ پیش کر چکے ہیں، اس وقت تک مختلف واقعات میں پی ٹی آئی کے سات کارکن زخمی بھی ہوچکے ہیں۔

انہوں نے کہا کہ پی ٹی آئی کے ایک کارکن کو چوہدری یاسین کے بیٹے نے خود فائرنگ کرکے شہید کیا، چوہدری یاسین کے بیٹے نے اپنی فائرنگ سے متعدد پی ٹی آئی کے کارکنوں کو زخمی بھی کیا ہے۔

ان کا کہنا تھا کہ آزاد کشمیر کے عوام تحریک انصاف کی بھرپور سپورٹ کر رہے ہیں،ہم صاف شفاف اور پرامن انتخابات کے حامی ہیں۔ انہوں نے کہا کہ شکست کو دیکھتے ہوئے مسلم لیگ ن اور پیپلز پارٹی اپنی غنڈہ گردی سے بدامنی پھیلانا چاہتی ہے۔

چیف الیکشن کمشنر آزاد کشمیر عبدالرشید سلہریا کا کہنا ہے کہ پاکستان تحریک انصاف کے رہنما اور وفاقی وزیر برائے کشمیر امور علی امین گنڈاپور کے خلاف ضابطہ اخلاق کی خلاف ورزی پر کارروائی ہو رہی ہے۔

مظفرآباد میں میڈیا سے گفتگو کرتے ہوئے جسٹس ریٹائرڈ عبدالرشید سلہریا کا کہنا تھا کہ آزاد کشمیر میں الیکشن کے لیے بہترین انتظامات کیے گئے ہیں، الیکشن کی تیاری میں حکومت کی پوری معاونت حاصل رہی ہے۔

عبدالرشید سلہریا کا کہنا تھا کہ آزاد کشمیر کی قانون ساز اسمبلی کے انتخابات میں ووٹنگ کا ٹرن آؤٹ 56 فیصد سے زائد رہنے کا امکان ہے۔

ایک سوال کے جواب میں چیف الیکشن کمشنر آزاد کشمیر کا کہنا تھا کہ پریزائیڈنگ افسران سے کہا ہے کہ نتائج کا موقع پر اعلان کریں اور پولنگ ایجنٹس کو نتائج کی کاپی فراہم کریں۔

وفاقی وزیر علی امین گنڈاپور سے متعلق سوال پر جسٹس ریٹائرڈ عبدالرشید سلہریا کا کہنا تھا گنڈا پور کو چھوڑ دیں، آج اچھی اچھی باتیں کریں، علی امین گنڈاپور کے خلاف کارروائی ہو رہی ہے۔

خیال رہے کہ آزاد کشمیر انتخابات میں چیف الیکشن کمشنر کے احکامات کی مبینہ خلاف ورزی پر الیکشن کمیشن آزاد کشمیر نے وفاقی وزیر برائے کشمیر امور علی امین گنڈاپور کو 27 جولائی کو طلب کر لیا ہے۔

آزاد جموں وکشمیر قانون ساز اسمبلی کے الیکشن میں حلقہ ایل اے 35 جموں 2 (گوجرانوالہ) سے مسلم لیگ ن کے امیدوار اسماعیل گجرکی جانب سے بھارت کو مدد کے لیے پکارنے کے بیان کی وضاحت سامنے آگئی۔

ن لیگی امیدوار اسماعیل گجر نے اپنے وضاحتی بیان میں کہا ہے کہ ان کے بیان کو توڑ مروڑ کر پیش کیا گیا جس کی وہ مذمت کرتے ہیں۔

اسماعیل گجر کا کہنا تھا کہ انہوں نے پاکستان کے حوالے سے کچھ نہیں کہا بلکہ حکومت کے کردار پر تنقید کی، وہ انتظامیہ سے مخاطب تھے کہ وہ کس کو پکاریں ، کیا کریں ۔

خیال رہےکہ گوجرانوالہ میں گورنمنٹ ہائی اسکول نمبر2 میں قائم پولنگ اسٹیشن میں ڈپٹی کمشنر کی جانب سے اپنے پولنگ ایجنٹوں کو باہر نکال دیے جانے کے بعد میڈیا سے گفتگو میں اسماعیل گجر کا کہنا تھا کہ ڈپٹی کمشنر نے میرے پولنگ ایجنٹ باہر نکالے اور انہیں دھمکیاں بھی دیں، اگرپرامن پولنگ چلنے دینا ہے تو ٹھیک، ورنہ ہم بھی گڑ بڑ کریں گے۔

ان کا کہنا تھا کہ انتظامیہ نے بات نہ سُنی تو مدد کے لیے بھارت کو پکاریں گے، پولیس بھی موجود تھی لیکن کسی نے کیمپ اُکھاڑنے والوں کو نہیں روکا، اُدھر کشمیریوں کو بھارت والے مارتے ہيں ، اِدھر یہ ہمارے کیمپ اکھاڑ کر پھینک دیتے ہیں ۔

سیہون: وزیراعلیٰ سندھ مراد علی شاہ کا کہنا ہے کہ سندھ میں بلدیاتی انتخابات سیاسی جماعتوں کی بنیاد پر عام انتخابات سے قبل ہوں گے۔

سیہون میں میڈیا سے گفتگو میں وزیراعلی سندھ مراد علی شاہ کا کہنا تھا کہ سندھ میں بلدیاتی انتخابات سیاسی جماعتوں کی بنیادوں پر عام انتخابات سے قبل ہوں گے جب کہ انتخابات ایسے کرائیں گے جس پر کسی کو اعتراض نہ ہو۔ انہوں نے کہا کہ مردم شماری پر اعتراضات ہیں جس کے ثبوت مشترکہ مفادات کونسل میں پیش کیے ہیں جب کہ آئینی حق استعمال کرتے ہوئے پارلیمنٹ کا مشترکہ اجلاس طلب کرکے بحث کرانے کے لیے خط بھی تحریر کیا ہے۔

وزیراعلیٰ سندھ نے کہا کہ ہماری خارجہ پالیسی ناکام جارہی ہے، ایران، افغانستان اور چین سے ہمارے رابطے متاثر ہورہے ہیں تاہم ہم چین سے اچھے رابطوں کی کوشش میں ہیں۔
مراد علی شاہ کا کہنا تھا کہ پی ڈی ایم میں شامل جماعتوں کو چاہیے کہ اپوزیشن کو متحد کریں، بلاول بھٹو زرداری نے اے پی سی بلائی جس کے بعد پی ڈی ایم کی تشکیل ہوئی، پی ڈی ایم بنانے کا مقصد عمران حکومت سے نجات تھا مگر کچھ لوگوں نے بلاول بھٹو سے استعفی مانگ لیا، وفاقی حکومت نے مہنگائی کا طوفان برپا کیاہے تاہم اپوزیشن جماعتوں کو ایک مرتبہ پھر سے متحد ہونے کی ضرورت ہے۔

وزیراعلیٰ مراد علی شاہ کا کہنا تھا کہ آغا سراج درانی کے میڈیا ٹرائل کی مذمت کرتا ہوں، آغا سراج درانی کو نیب کے ذریعے بدنام کرنے کی کوشش کی گئی مگر کوئی ثبوت نہیں مل سکا، منچھر جھیل کی بحالی کے لیے 2017 میں وفاقی حکومت سے منصوبہ منظور کرایا تاہم 2018میں پی ٹی آئی حکومت نے منچھر جھیل کی بحالی کا کام روک دیا۔

اسلام آباد: الیکشن کمیشن آف پاکستان کے 2 ممبر اپنی پانچ سالہ آئینی مدت پوری کرنے کے بعد ریٹائر ہوگئے۔

تفصیلات کے مطابق الیکشن کمیشن آف پاکستان میں ممبر خیبر پختونخوا ارشاد قیصر اور ممبر پنجاب الطاف ابراہیم قریشی آج ریٹائر ہوگئے ہیں۔

الیکشن کمیشن نے وفاقی حکومت کو ان ممبران کی ریٹائرمنٹ کے حوالے سے آگاہ کیا تھا ، الیکشن کمیشن 2 ریٹائرڈ ممبران کے عہدے پُر کرنے کے لیے وزارت پارلیمانی امور کو 2 خطوط بھی لکھ چکا ہے لیکن حکومت اور اپوزیشن کے مابین سردمہری کے باعث اس حوالے سے مشاورت کا آغاز ہی نہیں ہوسکا۔

ذرائع کا کہنا ہے کہ وزیراعظم کو الیکشن کمیشن کے ممبران کی ریٹائرمنٹ سے متعلق متعدد بار بریفنگ دی گئی ہے۔ وزیراعظم عمران خان نے سینیئر وفاقی وزرا کو موزوں نام تلاش کرنے کا ٹاسک سونپ رکھا ہے۔

ممبر الیکشن کی تقرری کا طریقہ کار

آئین کے تحت الیکشن کمیشن اپنے 3 ارکان کے ساتھ فعال رہ سکتا ہے تاہم حکومت کو اپوزیشن کی مشاورت سے 45 روز میں نئے ممبران کی تعیناتی کرنی ہوتی ہے۔ الیکشن کمیشن ممبران کی تعیناتی کے لیے وزیراعظم اور قائد حزب اختلاف تین تین نام پارلیمانی کمیٹی کو بھجواتے ہیں، وزیراعظم اور اپوزیشن لیڈر میں اتفاق رائے نہ ہونے کی صورت میں معاملہ 12 رکنی پارلیمانی کمیٹی کو بھیجا جائے گا۔

واضح رہے کہ موجودہ حکومت میں اس سے قبل بھی الیکشن کمیشن کے دو ممبران کی تعیناتی کا معاملہ ایک سال تک لٹکا رہا تھا۔

اسلام آباد: ملک بھر میں کورونا کے وار جاری ہیں 24 گھنٹوں کے دوران کورونا کے 2819 مثبت کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 44 ہزار 579 ٹیسٹ کیے گئے جن میں سے 2819 افراد میں کورونا وائرس کی تصدیق ہوئی۔

گزشتہ روز اس وبا نے مزید 45 افراد کی زندگیوں کو نگل لیا۔ جب کہ مثبت کیسز کی شرح 6.32 فیصد ریکارڈ ہوئی ہے۔

کورونا وائرس اوراحتیاطی تدابیر:

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔