Category تازہ ترین

وفاقی وزیر اطلاعات فوادچوہدری نے افغانستان کے نائب صدر امراللہ صالح کے بیان پر سخت ردعمل کا اظہار کیا ہے۔

اپنی ٹوئٹ میں فواد چوہدری نے کہا کہ افغانستان آپ جیسے دغابازوں کا نہیں بلکہ بہادر افغانوں کا ہے۔

ان کا کہنا تھاکہ آپ جیسےمٹھی بھرلوگوں کی افغانستان اور خطےمیں دلچسپی کم ہی ہے، آپ صرف ایک مردار خور ہیں جو وقت آنے پر محفوظ مقام منتقل ہوجائیں گے۔

خیال رہے کہ افغانستان کے نائب صدر امراللہ صالح کی جانب سے مسلسل پاکستان کے خلاف ہرزہ سرائی کی جارہی ہے۔

پاکستان نے بھارتی حکام کی جانب سے عیدالاضحی ٰ کے موقع پر مقبوضہ کشمیر میں عیدالاضحیٰ کے اجتماعات اور جانوروں کی قربانی پر پابندیوں کی مذمت کرتے ہوئے کہا کہ یہ عمل مسلمانوں کے جذبات کی توہین اور تعصب کی عکاسی کرتا ہے۔

دفتر خارجہ کا یہ بیان ایک ایسے موقع پر سامنے آیا ہے جب یہ رپورٹس منظر پر آئیں کہ وادی میں فوجی محاصرے اور پابندیوں کی وجہ سے وہاں کے رہائشی نماز عید بھی ادا نہیں کر سکے۔

ترجمان دفتر خارجہ زاہد حفیظ چوہدری نے ایک بیان میں کہا کہ پاکستان مقبوضہ کشمیر میں بھارتی حکام کی جانب سے عیدالاضحی ٰ کے موقع پر اجتماعات اور جانوروں کی قربانی پر پابندیوں کی شدید مذمت کرتا ہے۔

ان کا کہنا تھا کہ اسلامی تاریخ کے اہم ترین دن کے موقع پر نماز عید اور مذہبی اجتماعات پر پابندی بھارتی حکومت کی مقبوضہ جموں و کشمیر کے مسلمانوں کے جذبات کی توہین اور تعصب کی عکاسی کرتی ہے اور یہ مذہبی آزادی کے بنیادی حق کی کھلی خلاف ورزی ہے۔

انہوں نے کہا کہ پاکستان نے عالمی برادری، اقوام متحدہ اور انسانی حقوق کے دیگر اداروں پر زور دیا ہے کہ وہ کشمیری عوام کے مذہبی اور آزادی کے حق کو غصب اور بین الاقوامی قوانین اور کنونشنز کی خلاف ورزیوں کا نوٹس لیں۔

دفتر خارجہ کے ترجمان نے کہا کہ بھارت کو اس حقیقت کا ادراک ہونا چاہیے کہ ایسے اقدامات کشمیریوں کی خواہش اور آزادی کے جذبات کو نہیں دبا سکتے۔

انہوں نے کہا کہ پاکستان کشمیریوں کے پیدائشی حق، حق خود ارادیت کی حمایت کے عزم کا اعادہ کرتا ہے جس کا اقوام متحدہ کی سلامتی کونسل کی قرارداوں میں وعدہ کیا گیا ہے۔

ادھر کشمیر میڈیا سروس کے مطابق مقبوضہ کشمیر میں قابض انتظامیہ کی طرف سے عائد کی گئی پابندی اور مسلسل فوجی محاصرے کے باعث نماز عید ادا نہیں کر سکے۔

اس حوالے سے بتایا گیا ہے کہ لوگوں کی نقل وحرکت پر پابندی عائد کردی گئی ہے اور انہیں تاریخی جامع مسجد سرینگر، درگاہ حضرت بل، عیدگاہوں اور دیگر بڑی مساجد میں نما ز عید ادا کرنے کی اجازت نہیں دی گئی۔

کشمیر میڈیا سروس نے بتایا کہ بھارت مخالف احتجاجی مظاہروں کو روکنے کے لیے لوگوں کو نماز عید، نماز جمعہ اور مسلمانوں کے دیگر تہواروں پر جمع ہونے کی اجازت نہیں دے رہے ہیں جبکہ کشمیری مسلمان آزادانہ طور پر گائے کی قربانی کرنے سے بھی قاصر ہیں۔

ان کا کہنا تھا کہ کشمیریوں کی سیاسی قیادت سید علی گیلانی، میرواعظ عمر فاروق، محمدیاسین ملک، شبیر احمد شاہ، ڈاکٹر حمید فیاض، مسرت عالم بٹ، آسیہ اندرابی، نعیم احمد خان اور دیگر ہزاروں رہنما، کارکن، نوجوان اور طلبہ مسلسل جیلوں اور گھروں میں نظربند ہیں۔

گزشتہ ہفتے ہندوستانی حکومت نے مقبوضہ کشمیر میں عید الاضحی پر تمام جانوروں کے ذبیحہ پر پابندی عائد کردی تھی۔

جمعرات کو حکومت کی جانب سے جاری اعلامیے میں انتظامیہ کو جانوروں کی بہبود کے قوانین کا حوالہ دیتے ہوئے کہا گیا تھا کہ وہ گائے/ بچھڑوں، اونٹوں اور دیگر جانوروں کے غیرقانونی قتل کو روکیں۔

تاہم ایک دن بعد حکام نے بتایا کہ جانوروں کی قربانی پر کوئی پابندی نہیں ہے اور گزشتہ بات غلط فہمی پر مبنی تھی۔

ملک بھر میں عید الاضحیٰ کے موقع پر عوام کی جانب سے کورونا ایس او پیز کی خلاف ورزی جاری ہیں جس سے کیسز میں بھی اضافہ دیکھنے میں آیا ہے اور گزشتہ 24 گھنٹوں میں مثبت کیسز کی شرح 6.30 فیصد ریکارڈ کی گئی۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 34 ہزار 216 ٹیسٹ کیے گئے جن میں سے 2158 افراد میں وائرس کی تصدیق ہوئی جب کہ وائرس سے 40 افراد انتقال کر گئے۔

سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 6.30 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 22928 ہو گئی اور مجموعی کیسز 9 لاکھ 98 ہزار 609 تک جاپہنچے ہیں۔

اس کے علاوہ 24 گھنٹوں کے دوران ملک بھر میں 895 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 9 لاکھ 22 ہزار 929 ہوگئی ہے۔

گلگت بلتستان میں چار روز سے جاری شدید بارشوں کے باعث لینڈ سلائیڈنگ، سیلاب اور گلیشیائی جھیل پھٹنے سے ہزاروں افراد متاثر ،متعدد گاڑیاں تباہ اور شاہراہ قراقرم بند ہوگئی۔

دیامر پولیس کنٹرول روم کے مطابق تتہ پانی اور لال پڑی کے مقام پر بھاری لینڈ سلائیڈنگ سے شاہراہِ قراقرم آج دوسرے روز بھی ٹریفک کے لیے بند رہی جس کے باعث سیکڑوں مسافر اور سیاح مختلف مقامات پر پھنس گئے ہیں۔

علاوہ ازیں تتہ پانی کے مقال پر لینڈ سلائیڈنگ سے آئل ٹینکر اور مسافروں کی گاڑیاں تباہ ہو گئیں ہیں تاہم جانی نقصان نہیں ہوا۔

ادھر دیامر انتطامیہ کا کہنا ہے کہ شاہراہِ قراقرم بحال کرنے کی کوششیں جاری ہیں تاہم پہاڑ سے مسلسل پتھر گرنے کے باعث بحالی کا کام متاثر ہو رہا ہے، تاہم بابوسر روڈ کو ٹریفک کے لیے بحال کر دیا گیا ہے۔

ڈیزاسٹر منیجمنٹ گلگت بلتستان کے مطابق گوپس بدصوات کے مقام پر گلیشیائی جھیل پھٹنے سے 2 گاؤں کے باہمی رابطے منقطع ہو گئے اور سیلاب کے باعث میں متعدد افراد نقل مکانی کر چکے ہیں جبکہ وسیع اراضی، درخت اور گھر بھی متاثر ہوئے۔

ڈیزاسٹر منیجمنٹ کے مطابق ہنزہ وا خان پٹی سے متصل وادی شمشال جانے والی واحد سڑک بھی سیلابی ریلے میں بہہ گئی اور نگر ضلع میں متعدد گاؤں کو ملانے والی میاچھر روڈ بھی سیلاب کی نذر ہونے سے آمد و رفت بند ہے۔

پاک فوج کے شعبہ تعلقات عامہ آئی ایس پی آر کے مطابق غذر بدصوات میں سیلاب میں پھنس جانے والے گاؤں میں آرمی ہیلی کاپٹر کے ذریعے امدادی اشیا تقسیم کی گئی اور فورس کمانڈر نے علاقے کا دوہ کر کے بحالی اور امدادی کاموں کا جائزہ لیا۔

خیال رہے کہ گلگت کے نواحی علاقے نلتر میں 2 ہفتے قبل گلیشیائی جھیل پھٹنے سے آنے والے سیلاب کے نتیجے میں 4 افراد لاپتا ہو گئے تھے جنہیں تاحال تلاش نہیں کیا جاسکا۔

وزیر اعلیٰ گلگت بلتستان نے تمام بند سڑکیں فوری کھولنے اور سیلاب سے متاثرہ خاندانوں کو امداد فراہم کرنے اور محکمہ داخلہ، برقیات اور ایف ڈبلیو او کو بحالی کا کام تیز کرنے کے احکامات جاری کیے ہیں۔

ادھر ڈپٹی ڈائریکٹر محکمہ اطلاعات فاروق احمد خان نے محکمہ داخلہ کے حوالے سے بتایا کہ شاہراہِ قراقرم لینڈ سلائیڈنگ سے 9 مقامات پر بند تھی جن میں 7 مقامات پر بحالی کا کام مکمل کرلیا گیا ہے اور دو جگہوں پر کام صبح سےجاری ہے، مسافروں اور سیاحوں کو چلاس سے باہر سفر نہ کرنے کی ہدایات دی گئی ہیں۔

شاہراہ قراقرم پر لینڈ سلائیڈنگ سے گلگت بلتستان اور راولپنڈی کے مابین زمینی رابطہ بھی منقطع ہو گیا ہے۔

کراچی کے سمندر میں کنٹینرز سے لدا جہاز موسم کی خرابی کے باعث لنگرانداز ہونے کے مقام سے دور سی ویو پہنچ گیا جہاں وہ دوسرے روز بھی موجود ہے جبکہ حکام کی جانب سے اسے واپس متعلقہ مقام تک پہنچانے کے لیے اقدام نہیں اٹھایا گیا ہے۔

کراچی پورٹ ٹرسٹ (کے پی ٹی) کے مطابق ایم وی ہینگ ٹونگ نامی جہاز چین کے شہر شنگھائی سے ترکی کے شہر استنبول جا رہا تھا اور کراچی کی بندرگاہ میں مکمل طور پر داخل نہیں ہوا تاہم وہ پاکستان کے سمندر میں رکا اور عملے کی تبدیلی کا انتظار کر رہا ہے۔

سمندر میں خرابی کے باعث جہاز اپنے لنگر انداز ہونے کے مقام سے کٹ گیا اور کم گہرے پانی کی طرف جانے لگا اور جب کے پی ٹی کو جہاز کے بارے میں آگاہ کیا گیا تو کارگو پہلے ہی کم گہرے پانی میں کھڑا تھا۔

کے پی ٹی نے پاکستان میری ٹائم سیکیورٹی ایجنسی (پی ایس ایم اے) کو الرٹ کردیا لیکن وہ بھی زیادہ مدد نہیں پہنچا سکی۔

کے پی ٹی کا کہنا تھا کہ بندرگاہ کے نیویگیشن چینل کو جہاز کے ساحل کی طرف جانے کا اشارہ نہیں ملا۔

ان کا کہنا تھا کہ ‘جہاز کے تحفظ کی ذمہ داری اس کے مالک کی ہے’ تاہم کے پی ٹی اور پی ایس ایم اے پاکستان کے پانیوں میں کسی قسم کے آپریشنل اور تیکنیکی مدد کے لیے بدستور دستیاب ہوں گے۔

کراچی کے ساحل پر کھڑا ہونے والا 98 میٹر لمبا اور 20 میٹر چوڑا جہاز ہانگ کانگ کی کمپنی کی ملکیت ہے، اس کو 2010 میں تیار کیا گیا اور اس میں سامان کی گنجائش 3 ہزار 600 ڈیڈ ویٹ ٹن کی ہے۔

خیال رہے کہ عام طور پر پاکستان کے پانیوں میں داخل ہونے والے جہاز پاکستانی پرچم لہراتے ہیں لیکن ایم وی ہینگ ٹونگ میں پاناما کا جھنڈا لہرا رہا ہے اور ہنگامی طور پر اس کی تبدیلی کا بھی نہیں سوچا گیا۔

ٹی وی پر جیسے ہی کراچی کے ساحل پر جہاز کی آمد کی خبر چلی تو کئی شہریوں نے سی ویو کی طرف رخ کر لیا۔

سی ویو پر موجود متعدد افراد کنیٹروں سے لدا ہوا جہاز دیکھ کر حیران ہوئے اور خدشے میں پڑ گئے کہیں جہاز کو نقصان نہ پہنچے جبکہ دیگر نے حیرانی کا اظہار کیا کہ سمندر کی شدید لہریں جہاز کو توڑ نہ دے۔

دوسری جانب مون سون کی بارشوں کے باعث سی ویو پر شہریوں کے جانے پر پابندی عائد ہے اور دفعہ 144 نافذ ہے، جس کےباعث لوگوں کو ساحل کی طرف جانے سے روکنے کے لیے عبدالستار ایدھی ایونیو پر رکاؤٹیں کھڑی کی گئی ہیں۔

کوئٹہ: پاک افغان بارڈر دو دن بند رہنے کے بعد آج کھول دیا گیا ہے۔

14 جولائی کو چمن سے متصل افغانستان کے اہم ضلع اسپن بولدک پر طالبان نے کنٹرول حاصل کرلیا تھا اور باب دوستی پر اپنے جھنڈے بھی لگادیئے تھے، جس کے بعد پاکستان کی جانب سے باب دوستی کو عارضی طور پر سیل کرکے سیکیورٹی کی بھاری نفری تعینات کردی گئی تھی۔

لیویز حکام کے مطابق پاکستان میں پھنسے افغان شہریوں کی واپسی کے لیے باب دوستی کے چمن بارڈرکو 2 دن کے بعد عارضی طور پر پیدل آمدورفت کے لیے کھول دیا گیا ہے، باب دوستی گیٹ صبح 8 سے10 بجے جب کہ شام 4 سے 6 بجے تک کھلا رہے گا۔

لیویز حکام کا کہنا ہے کہ پاکستان میں داخل ہونے والے افراد کیلئے بارڈر پرکورونا ٹیسٹ لازمی ہے، اور صرف قانونی دستاویزا ت رکھنے والے افراد کو سرحد کے آر پار جانے کی اجازت ہوگی، پاکستان کی جانب سے اس اقدام کے بعد اب تک ہزاروں افغان شہری اس سہولت کا فائدہ اٹھاتے ہوئے اپنے آبائی ملک میں داخل ہوچکے ہیں، جب کہ سرحد پار سے بھی درجنوں پاکستانی اپنے ملک میں واپس آئے ہیں، اس موقع پر سیکیورٹی کے سخت اقدامات کئے گئے ہیں۔

اسلام آباد پولیس نے وفاقی دارالحکومت میں پاکستان کے سابق سفارت کار کی بیٹی کے قتل کی تفتیش کے حوالے سے واضح کرتے ہوئے کہا کہ ملزم گرفتاری کے وقت مکمل ہوش و حواس میں تھا جبکہ ان کے قبضے سے آلہ قتل کے ساتھ ایک پستول بھی برآمد ہوا۔

ایس ایس پی انوسٹی گیشن اسلام آباد عطاالرحمٰن نے سابق سفارت کار کی بیٹی کے قتل کی ابتدائی تفتیش سے میڈیا کو آگاہ کرتے ہوئے کہا کہ نور مقدم کی ظاہر کے ہاتھوں قتل کی اطلاع ملتے ہی پولیس موقع پر پہنچ گئی اور ملزم کو کو گرفتار کرلیا۔

ان کا کہنا تھا کہ جائے وقوع کو گھیرے میں لے کر ہماری نیشنل فارنزک سائنس ایجنسی نے وہاں سے فرانزک شواہد جمع کیا اور پوری کوشش کی ہے کہ کوئی معمولی شواہد بھی ضائع نہ ہوں تاکہ کسی کو بھی فائدہ نہ مل سکے۔

انہوں نے کہا کہ ملزم ہماری حراست میں ہے جبکہ آئی جی اسلام آباد نے متاثرہ خاندان سے ملاقات کی اور جائے وقوع کا بھی دورہ کیا، تمام افسران اس کیس میں لگے ہوئے۔

ان کا کہنا تھا کہ آئی جی اسلام آباد نے خصوصی تحقیقاتی ٹیم تشکیل دی، جس کی سربراہی ایس ایس پی انوسٹی گیشنز، ایس پی سٹی، اے ایس پی کوہسار شامل ہے۔

ایس ایس پی انوسٹی گیشنز عطاالرحمٰن نے کہا کہ سوشل میڈیا پر اس حوالے سے کنفیوژن ہے لیکن میں واضح کرنا چاہتا ہوں کہ ملزم ہماری حراست میں ریمانڈ پر ہے اور ان کو موقع سے گرفتار کیا گیا ہے۔

ان کا کہنا تھا کہ ہم متاثرہ خاندان کے ساتھ کھڑے ہیں اور ان کو انصاف دلانا ہمارا فرض اور ذمہ داری ہے، ملزم سے اس وقت تفتیش ہو رہی ہے۔

صحافی کے سوال پر ان کا کہنا تھا کہ ہماری ابتدائی تفتیش کے مطابق نور مقدم دو دنوں سے گھر میں نہیں تھی لیکن جس رات کو وقوعہ ہوا ہے، اس حوالے سے ملازمین سے بھی تفتیش کر رہے ہیں کہ وہ کتنے دنوں سے یہاں موجود تھی۔

ایس ایس پی انوسٹی گیشنز نے کہا کہ 20 جولائی کی رات کو واقعہ ہوا اور ہمیں یہاں کے کسی رہائشی سے فون کرکے اطلاع دی، تھانے سے بمشکل 10 منٹ کا فاصلہ ہے تو جلد ہی پہنچی ہے۔

انہوں نے کہا کہ اس واقعہ کا کوئی عینی شاہد نہیں ہے، اس لیے مذکورہ گھر کے ملازمین سے تفتیش کر رہے ہیں۔

ملزم کے نشے کی حالت میں گرفتاری سےمتعلق سوال پر پولیس افسر نے بتایا کہ ملزم کے نشے سے متعلق تفتیش ہمارا کام نہیں ہے لیکن جب ان کو گرفتار کیا گیا تو وہ اس وقت مکمل ہوش و حواس میں تھا۔

ان کا کہنا تھا کہ شاید ملزم کا نشے کا ریکارڈ ہوگی لیکن اس وقت مکمل ہوش میں تھا اور اس وقت ملزم نے دوسروں پر بھی حملہ کیا جس پر انہوں نے باندھا اور پولیس بھی فوری موقعے پر پہنچ گئی، جب واقعہ ہوا تو وہ مکمل ہوش و حواس میں تھا۔

ایس ایس پی انوسٹی گیشنز عطاالرحمٰن کا کہنا تھا کہ اس کے گھر سے پستول بھی برآمد ہوا ہے لیکن ہماری تفتیش اور میڈیکل رپورٹ کے مطابق بھی گولی نہیں چلی اور اس حوالے سے کوئی زخم بھی نہیں ہے لیکن ان کے پاس پستول تھا اور برآمد بھی ہوا ہے۔

ان کا کہنا تھا کہ پستول جب برآمد ہوا تو گولی اس میں پھنس گئی تھی، نشے اور بحالی کے حوالے سے ہم پوچھ رہے ہیں لیکن ہماری زیادہ توجہ اس طرف نہیں ہے لیکن تفتیش کے حوالے سے اس نے بڑی زیادتی کی ہے اور وہ ہوش میں تھا۔

انہوں نے کہا کہ ہم نے واقعہ کے وقت ان کی ذہنی کیفیت پر توجہ مرکوز رکھی اور اس کے مطابق وہ مکمل ہوش و حواس میں تھا لیکن اگر نشے کا کوئی ریکارڈ ہے تو وہ تفتیش کا ڈومین نہیں ہے۔

صحافیوں کے سوالوں پر ان کا کہنا تھا کہ برطانیہ میں ان کے کریمنل ریکارڈ کے حوالے سے ہمارے پاس کوئی ریکارڈ نہیں ہے، اگر ملک کے اندر کوئی ایف آئی آر ہو تو ریکارڈ ہمارے پاس آجاتا ہے لیکن ہم تفتیش میں کسی دوسرے ملک میں جرائم میں ملوث رہنے کے حوالے سے پوچھ سکتےہیں۔

ایس ایس پی انوسٹی گیشنز نے کہا کہ ہمارے پاس تفتیش دو نکات پر چل رہی ہے، ایک ملزم اور دوسرے گھر کے ملازمین سے تفتیش ہو رہی ہے اور اس میں ان کے جھگڑے کا ذکر ہے۔

انہوں نے وضاحت کرتے ہوئے کہا کہ اب یہ بات کہ اس وقت کیا ہوا اور کس وجہ سے انہوں نے قتل کیا تو یہ تھوڑا سا وضاحت طلب ہے لیکن میں پھر یہی کہوں گا کہ چاہے جتنی بھی بڑی وجہ ہو کسی کو یہ حق نہیں پہنچتا کہ دوسرے کو اس طرح وحشیانہ طریقے سے قتل کرے۔

ایک سوال پر ان کا کہنا تھا کہ قتل جس کمرے میں ہوا وہ گھر کے اوپر والے حصے میں تھا اور ملازمین کو شور کی آواز آئی لیکن یہ تعین کرنا ہے کہ آیا ان کو معلوم تھا کہ اس کا اختتام قتل پر ہوگا یا نہیں، اگر انہیں معلوم تھا کہ اس کا نتیجہ قتل ہے تو پھر وہ بھی غفلت کے ارتکاب میں آتے ہیں لیکن اگر انہیں انجام کا معلوم نہ ہو تو پھر اس کو اسی حد تک ذمہ دار ٹھہرائیں گے۔

انہوں نے کہا کہ ایک قتل ہوا ہے، ملزم موقع سے گرفتار ہوا ہے اور اس برآمدگی ہوئی ہے، اس لیے ان کو کوئی فائدہ حاصل ہوگا، اگر یہاں تک کہ وہ انکار بھی کرے کیونکہ اس طرح ملزم کبھی اعتراف نہیں کرتا اور پولیس کے سامنے اعتراف کی بھی محدود قانونی حیثیت ہوتی ہے۔

پولیس افسر نے بتایا کہ ہمیں اپنی تفتیش کا پورا اختیار حاصل ہے، ہمارے رپورٹ ٹھوس شواہد کی بنیاد پر ہوگی چاہے اور اپنا بیان دے یا نہ دے، ہم اس کو پوری سزا دلوا کر رہیں گے۔

انہوں نے کہا کہ پولیس کی تفتیش میں ملزم کے ذہنی مریض ہونے سے کوئی لینا دینا نہیں ہے، ہماری توجہ اس واقعے پر ہے، جس وقت وہ ذہنی طور پر ٹھیک تھا۔

ایس ایس پی انوسٹی گیشنز نے بتایا کہ آلہ قتل برآمد ہوا ہے جو آری نہیں تھی، چاقو تھا اور پستول بھی برآمد ہوا لیکن ہماری ابتدائی تفتیش کے مطابق پستول استعمال نہیں ہوا ہے۔

یاد رہے کہ 20 جولائی کو اسلام آباد کے سیکٹر ایف سیون،فور میں ایک گھر میں سابق پاکستانی سفارت کار کی بیٹی کو قتل کردیا گیا تھا۔

مقتولہ کی شناخت نور مقدم کے نام سے ہوئی تھی جو سابق سفارت کار شوکت مقدم کی بیٹی تھیں اور ان کی عمر 27 برس تھی۔

پولیس نے ابتدائی طور پر بتایا تھا کہ لڑکی پر فائرنگ کے بعد تیز دھار آلے سے بھی وار کیا گیا جبکہ واقعے میں ایک اور شخص زخمی ہوا اور واقعے میں مبینہ طور پر ملوث ہونے پر لڑکی کے ایک دوست ظاہر ذاکر کو گرفتار کر لیا گیا ہے جو ملک کے معروف تاجر کا بیٹا ہے۔

بعدازاں پولیس نے ان کےخلاف مقتولہ کے والد کی شکایت پر ظاہر کے خلاف تعزیرات پاکستان کی دفعہ 302 کے تحت ایف آئی آر درج کی گئی۔

خاتون کے بہیمانہ قتل نے وفاقی دارالحکومت میں خواتین کی حفاظت کے حوالے سے نئی بحث کو جنم دیا ہے اور سماجی رابطوں کی ویب سائٹ ٹوئٹر پر ‘جسسٹس فار نور’ کے ہیش ٹیگ سے ہزاروں ٹوئٹس کی گئیں۔

اطلاعات کے مطابق یہ گزشتہ چند دنوں کے دوران ملک میں کسی خاتون پر تیسرا سفاکانہ حملہ ہے۔

آرمی چیف جنرل قمر جاوید باجوہ نے کہا ہے کہ مادر وطن کے دفاع کیلئے کسی بھی خطرے کے خلاف ہم ہمہ وقت تیار ہیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ عید الاضحٰی کے موقع پر جوانوں کا حوصلہ بڑھانے کے لئے خیبر پختون خوا کے ضلع کرم میں پاک افغان سرحد پہنچے اور مورچوں پر موجود فوجیوں کے ساتھ عید گزاری۔

جنرل قمر جاوید باجوہ نے فارمیشن کی آپریشنل تیاری اور بارڈرسیکیورٹی انتظامات کوسراہا۔ آرمی چیف نے پاک افغان بارڈرپرباڑلگانے کے عمل کی تعریف بھی کی۔ انہوں نے سرحدوں کی سیکیورٹی یقینی بنانے کیلئے پاک فوج کے عزم کا اعادہ بھی کیا۔

ترجمان پاک فوج کے مطابق آرمی چیف نے جوانوں کے بلند حوصلے اورمادر وطن کے دفاع کے عزم کو سراہتے ہوئے کہا کہ مادر وطن کے دفاع کیلئے کسی بھی خطرے کے خلاف ہم ہمہ وقت تیار ہیں۔

آرمی چیف نے فارمیشن کی سماجی، اقتصادی جاری منصوبوں میں سول انتظامیہ سے تعاون کی تعریف بھی کی اور کہا کہ انتظامیہ کے ساتھ ملکر انفراسٹرکچر کی تعمیر نو کیلئے پرعزم ہیں۔

لندن کے ایک ریسٹورنٹ میں مسلم لیگ ن کے رہنما عابد شیر علی اور ایک پاکستانی خاندان میں تکرار ہوگئی۔

اس حوالے سے ایک ویڈیو بھی سوشل میڈیا پر وائرل ہورہی ہے جس میں عابد شیر علی اور ایک شخص کو ایک دوسرے کے خلاف سخت اور نازیبا الفاظ ادا کرتے دیکھا جاسکتا ہے، اس دوران ریسٹورنٹ کا عملہ دونوں میں بیچ بچاؤ کراتا رہا۔

عابد شیر علی کا کہنا تھا کہ ہم ہوٹل میں کھانا کھا رہے تھے، یہ فیملی آئی اوربرا بھلا کہنے لگی، اس فیملی نےکہا آپ لوٹی دولت سے کھانا کھا رہے ہیں،اس پر تکرارہوئی۔

دوسری جانب مخالف پارٹی نے عابد شیر علی پر قطار توڑ کر میز پر آنےکا الزام عائدکیا ہے تاہم ریسٹورنٹ انتظامیہ نے وضاحت کی ہےکہ عابد شیرعلی نے پہلے سے بکنگ کروائی تھی اور انہوں نےکوئی قطار نہیں توڑی۔

وزیر خارجہ شاہ محمود قریشی کا کہنا ہے کہ افغان سفیر کی بیٹی کے مبینہ اغوا کیس میں نتیجے کے قریب پہنچ چکے ہیں، تاہم تحقیقات کو منطقی انجام تک پہنچانے کے لیے افغان سفیر اور ان کی صاحبزادی کا تعاون درکار ہے۔

ملتان میں نماز عید کے بعد میڈیا سے گفتگو کرتے ہوئے شاہ محمود قریشی نے کہا کہ ‘افغان سفیر کی بیٹی کی تسلی کے مطابق ایف آئی آر درج کی گئی، افغان سفیر کی بیٹی جن ٹیکسیوں میں بیٹھی ان کے ڈرائیورز کے بیانات ریکارڈ کیے، 700 گھنٹوں کی فوٹیج کا جائزہ لیا گیا اور 250 کے قریب افراد سے پوچھ گچھ کی گئی’۔

انہوں نے کہا کہ ‘تاہم اب ہم نتیجے کے قریب پہنچ چکے ہیں اور تحقیقات کو منطقی انجام تک پہنچانے کے لیے افغان سفیر اور ان کی صاحبزادی کا تعاون درکار ہے اور ہم نے فون ڈیٹا کی جو رسائی مانگی ہے وہ ہمیں فراہم کی جائے’۔

ان کا کہنا تھا کہ ‘ہم کچھ پوشیدہ نہیں رکھنا چاہتے اور نہیں چاہتے کہ پاکستان کے مخالفین اس معاملے کو پاکستان کے خلاف پروپیگنڈا کے طور پر استعمال کریں اور افغانستان اور پاکستان کے تاثر کو متاثر کریں’۔

شاہ محمود قریشی نے کہا کہ ‘میں نے افغان ہم منصب حنیف اتمر سے ٹیلی فونک گفتگو میں انہیں مکمل تعاون کا یقین دلایا اور گزارش کی کہ سفیر واپس بلانے کے معاملے پر نظرثانی کریں، اس وقت افغانستان نازک صورتحال سے گزر رہا ہے ایسے میں افغان سفیر کی واپسی مناسب نہیں’۔

آزاد کشمیر کے انتخابات سے متعلق شاہ محمود قریشی نے کہا کہ ‘اپوزیشن کے تحفظات کا اظہار سمجھ سے بالا تر ہے، آزاد کشمیر کی انتظامیہ مسلم لیگ (ن) کے وزیر اعظم کو جوابدہ ہے، آزاد کشمیر میں (ن) لیگ حکومت کے سیٹ اَپ میں ہی انتخابات ہو رہے ہیں، دھاندلی کے خدشات کا اظہار مسلم لیگ (ن) کا آزاد کشمیر حکومت پر عدم اعتماد ہے۔

ایک سوال کے جواب میں انہوں نے کہا کہ داسو ڈیم کے حوالے سے افواہیں پھیلائی جارہی ہیں، یہ افواہیں پاکستان کے دشمن پھیلاتے ہیں، ان کی خواہش ہے کہ پاک ۔ چین اقتصادی راہداری (سی پیک) کو متاثر کیا جائے لیکن ایسا نہیں ہوگا۔

ان کا کہنا تھا کہ ہم واقعے کی تہہ تک پہنچ چکے ہیں اور ان قوتوں کو بے نقاب کریں گے جو چین اور پاکستان کے تعلقات متاثر کرنا چاہتی ہیں، میں کل چین روانہ ہو رہا ہوں جہاں ایک، دو روز میں اہم رہنماؤں سے ملاقاتیں ہوں گی۔

سعودی عرب سے پاکستانی قیدیوں کی رہائی کے حوالے سے وزیر خارجہ نے کہا کہ ‘ہم سعودی حکومت کے شکر گزار ہیں، انہوں نے تعاون کیا اور دوستی نبھائی اور وزیر اعظم کی درخواست پر انہیں رہا کیا ہے، افواہ تھی کہ پاک ۔ سعودیہ تعلقات خراب ہوئے جبکہ ایسا نہیں’۔

افغان امن کانفرنس ملتوی کرنے کے متعلق انہوں نے کہا کہ ‘کانفرنس ملتوی کرنے کی پہلی وجہ افغان صدر اشرف غنی کی مصروفیات تھیں، جبکہ دوحہ میں مذاکرات کا دور چل رہا ہے جس میں شریک کئی مہمانوں کی امن کانفرنس میں شرکت ممکن نہیں تھی’۔

ایک سوال پر ان کا کہنا تھا کہ ‘افغان امن عمل میں بھارت کا کردار رخنہ ڈالنے کا ہے، وہ امن کے عالمی ایجنڈے میں رکاوٹ ہے اور افغانستان کی زمین استعمال کرنا چاہتا تھا، افغانستان کے مسئلے پر بھارت کا منفی رویہ خطے کے استحکام کے لیے مناسب نہیں ہے’۔

شاہ محمود قریشی نے کہا کہ ‘بھارتی وزیر خارجہ جے شنکر کے بیان نے بلی تھیلے سے باہر نکال دی ہے، اب وہ خود تسلیم کر رہے ہیں کہ پاکستان کو فنانشل ایکشن ٹاسک فورس (ایف اے ٹی ایف) کی گرے لسٹ میں رکھوانے میں بھارت کا ہاتھ ہے’۔

انہوں نے کہا کہ ‘بھارت دہشت گردی میں ملوث ہے اور ریاستی دہشت گردی کو فروغ دے رہا ہے، بھارت کو عالمی سطح پرمسلسل ناکامی کا سامنا ہے، وہ مقبوضہ جموں و کشمیر میں انسانی حقوق کی سنگین خلاف ورزیوں میں ملوث ہے جس کا عالمی برادری کو نوٹس لینا چاہیے’۔