Category تازہ ترین

وزیراعظم عمران خان کے بیان پر ردعمل کے بعد مسلم لیگ (ن) کی مرکزی نائب صدر مریم نواز اور جمائمہ گولڈ اسمتھ سوشل میڈیا پر آمنے سامنے آگئیں۔

گزشتہ دنوں آزاد کشمیر قانون ساز اسمبلی کی انتخابی مہم میں وزیر اعظم عمران خان نے مریم نواز کے بیٹے کے پولو میچ کھیلنے پر تنقید کی تو مریم نواز نے عمران خان کے بچوں پر یہودیوں کی گود میں بیٹھنے کی پھبتی کسی۔

اس تنقید کے بعد وزیراعظم عمران خان کی پہلی سابقہ اہلیہ جمائمہ گولڈ اسمتھ بھی میدان میں کود پڑیں اور مریم نواز کو ٹیگ کرتے ہوئے ٹوئٹ کردی۔

جمائمہ نے عمران خان اور مریم نواز کے بیانات ٹوئٹ کرتے ہوئے کہا کہ وہ پوری ایک دہائی، سیاستدانوں اور میڈیا کے مخالفانہ بیانات برداشت کرنے کے بعد 2004 میں پاکستان چھوڑ گئی تھیں۔

اس ٹوئٹ پر مریم نواز نے ردعمل میں کہا کہ مجھے آپ کی اور آ پ کے بیٹوں کی ذاتی زندگی میں کوئی دلچسپی نہیں، میرے پاس اور بہت کچھ کہنے اور کرنے کو ہے۔

انہوں نے مزید کہا کہ آپ کے سابقہ شوہر خاندان کو گھسیٹیں گے تو دوسروں کو بھی جواب دینا آتا ہے، آپ صرف اپنے سابق شوہر کو الزام دے سکتی ہیں۔

وزیر داخلہ شیخ رشید کا کہنا ہے کہ حکومت نے داسو میں ہونے والے واقعے کی تحقیقات مکمل کرلی ہیں اور چینی حکومت اس سے مطمئن ہے۔

راولپنڈی میں میڈیا سے گفتگو کرتے ہوئے انہوں نے افغان سفیر کی بیٹی کے مبینہ اغوا کے معاملے پر بھی بات کرتے ہوئے کہا کہ وزارت داخلہ 48 گھنٹے میں اس معاملے کی تحقیقات مکمل کرکے وزارت خارجہ اور وزیر اعظم آفس بھیج چکی ہے۔

ان کا کہنا تھا کہ ’ہم نے 700 گھنٹے اسلام آباد اور راولپنڈی کی فوٹیج کو دیکھا، 200 سے زیادہ ٹیکسیوں کی جانچ پڑتال کرنے کے بعد ان چار ٹیکسیوں اور ان کے مالکان تک پہنچے ہیں تاہم ہمیں افسوس ہے کہ ہماری اتنی کوشش کے باوجود وہ خود یہاں سے چلی گئی ہیں البتہ ہم نے مقدمہ کیا ہے اور ریاست پاکستان یہ مقدمہ لڑے گی‘۔

شیخ رشید نے کہا کہ یہاں افغان سفیر کی بیٹی کا ہونا بہت ضروری ہے، حکومت پاکستان اس کیس سے پیچھے نہیں ہٹے گی حالانکہ ان کی درخواست اور ہماری تفتیش میں زمین آسمان کا فرق ہے کسی ٹیکسی میں کوئی آدمی نہیں بیٹھا اور ہماری تفتیش کے مطابق یہ اغوا کا کیس نہیں ہے۔

ان کا کہنا تھا کہ ہمارے افغانی اور بھارتی اس کو نئی شکل دینے کی کوشش کر رہے ہیں، افغانستان کے حالات ان ہی کا معاملہ ہے، افغانستان کی قوم جو فیصلہ کرے گی وہ ہمیں قبول ہے کیونکہ پاکستان کا امن افغانستان سے وابستہ ہے۔

ایک سوال کے جواب میں ان کا کہنا تھا کہ ’ہم نے افغان سفیر کی تحقیقات کی تمام فوٹیج وزارت خارجہ کو دے دی ہیں، افغان سفیر کی بیٹی نے ہمیں جو فون دیا اسے مکمل صاف کرکے دیا گیا‘۔

ان کا کہنا تھا کہ ’ہمارے ملک کو بدنام کرنے کی جو کوششیں ہورہی ہیں، یہ ساری کوششیں ناکام ہوں گی‘۔

انہوں نے کہا کہ کوشش کی جارہی ہے کہ پاکستان اور چین کے درمیان غلط فہمیاں پیدا ہوں، مخصوص بین الاقوامی قوتیں نہیں چاہتیں کہ پاکستان اور چین کی دوستی رہے اسی لیے انہوں نے داسو جیسے اقدامات کیے ہیں۔

وزیر داخلہ کا کہنا تھا کہ جوہر ٹاؤن کا واقعہ فنانشل ایکشن ٹاسک فورس (فیٹف) سے ایک روز قبل کیا گیا، داسو کا واقعہ جے سی سی اجلاس سے ایک روز قبل کیا گیا اور افغان سفیر کی بیٹی کا معاملہ بھی پاکستان کی جانب سے منعقد کیے جانے والے افغان کانفرنس سے چند روز قبل کیا گیا۔

ان کا کہنا تھا کہ ’دنیا کو یہ تاثر دینے کی کوشش کی جارہی ہے کہ پاکستان میں امن و امان کا مسئلہ ہے‘۔

انہوں نے کہا کہ وزیر اعظم نے تمام آئی جیز اور سیکیورٹی ایجنسیوں کو ہدایت دی ہے کہ پاکستان کی سیکیورٹی کے حالات پر پوری نظر رکھی جائے۔

آزاد کشمیر میں ہونے والے انتخابات کے حوالے سے بات کرتے ہوئے ان کا کہنا تھا کہ ’ہماری بدنصیبی ہے کہ کشمیر میں مریم نواز کشمیر کے لیے یا نواز شریف کو لانے کے لیے نہیں بلکہ عمران خان کے خلاف کر رہی ہے‘۔

انہوں نے دعویٰ کیا کہ تحریک انصاف آزاد کشمیر سے جیتے گی، ہم اس کی مہم چلا رہے ہیں۔

ان کا کہنا تھا کہ ’شکست پر مریم نواز نے دھرنا دینے کا اعلان کیا ہے، انہوں نے اپنی ہار پہلے ہی تسلیم کرلی ہے، خوشی سے دھرنا دیں‘۔

انہوں نے کہا کہ ’عمران خان کی قیادت میں یہ ملک آگے بڑھے گا، معاشی بحرانوں سے ملک نکل رہا ہے اور عوام 25 جولائی کو دیکھے گی کہ آزاد کشمیر میں تحریک انصاف کی حکومت ہوگی‘۔

ایک سوال کے جواب میں انہوں نے بتایا کہ حکومت ڈپلومیٹک انکلیو کو خاص سیکیورٹی زون بنانے لگی ہے اور عید کے بعد اس پر کام کیا جائے گا۔

افغان مہاجرین کی پاکستان آمد کے حوالے سے سوال کے جواب میں ان کا کہنا تھا کہ سیکیورٹی ادارے ہر طرح کے حالات کے لیے تیار ہیں۔

ان کا کہنا تھا کہ سرحد پر 90 فیصد باڑ لگانے کا کام مکمل کیا جاچکا ہے، افغانستان کا اندرونی مسئلہ افغانستان کے لوگ جانیں۔

انہوں نے کہا کہ ’پاکستان کی پالیسی واضح ہے کہ نہ ہم پاکستان کی سرزمین کسی کے لیے استعمال ہونے دیں گے اور توقع رکھتے ہیں کہ کوئی دوسرا بھی ہمارے خلاف زمین استعمال نہیں کرے گا‘۔

اسلام آباد: پاکستان نے فیصلہ کیا ہے بھارت کی جانب سے وزیر اعظم عمران خان کی ٹیلی فون کالز کی ہیکنگ کا معاملہ متعلقہ فورمز پر اٹھایا جائے گا۔

رپورٹ کے مطابق وفاقی وزیر اطلاعات و نشریات فواد چوہدری نے بتایا کہ ‘ہم ہیکنگ کی تفصیلات کا انتظار کر رہے ہیں’۔

وزیر اطلاعات سے جب سوال کیا گیا کہ کیا یہ معاملہ بھارت کے ساتھ اٹھایا جائے گا جس پر انہوں نے جواب دیا کہ جب تفصیلات موصول ہوجائیں گی تو معاملہ متعلقہ فورمز پر اٹھایا جائے گا۔

قبل ازیں ایک ٹوئٹ میں وفاقی وزیر نے ان رپورٹس پر خدشات کا اظہار کیا تھا کہ بھارتی حکومت نے صحافیوں اور سیاسی مخالفین کی جاسوسی کے لیے اسرائیلی سافٹ ویئر کا استعمال کیا۔

فواد چوہدری نے کہا تھا کہ ‘اس رپورٹ پر انتہائی تشویش ہے، مودی حکومت کی غیر اخلاقی پالیسیوں سے بھارت اور پورا خطہ خطرناک حد تک پولرائز ہوگیا ہے’۔

غیر ملکی میڈیا رپورٹس میں کہا گیا کہ بھارت ان ممالک میں شامل ہے جو اسرائیل کی کمپنی کے جاسوسی کے سافٹ ویئر کا استعمال کر رہا تھا، جس کے ذریعے دنیا بھر میں صحافیوں، حکومتی عہدیداران اور انسانی حقوق کے کارکنوں کے اسمارٹ فونز کی کامیاب نگرانی کی جاتی رہی۔

17 میڈیا اداروں کی شائع کردہ تحقیقات میں انکشاف سامنے آیا تھا کہ وزیر اعظم عمران خان کا ایک نمبر بھارت کی فہرست میں شامل تھا۔

واشنگٹن پوسٹ، دی گارجین، لی مونڈے اور دیگر نیوز آؤٹ لیٹس نے ڈیٹا لیک پر تحقیقات میں اشتراک کیا اور اسپائی ویئر ‘پیگاسس’ کے استعمال کے حوالے سے رپورٹ شائع کی۔

واشنگٹن پوسٹ کے مطابق بھارت میں زیر نگرانی رہنے والے نمبروں کی تعداد ایک ہزار سے زیادہ ہے جبکہ وزیر اعظم عمران خان سمیت سیکڑوں نمبر پاکستان سے تھے۔

اخبار کی رپورٹ میں یہ واضح نہیں کیا گیا کہ آیا وزیر اعظم عمران خان کے نمبر کی نگرانی کی کوشش کامیاب رہی یا نہیں۔

بھارتی تفتیشی نیوز ویب سائٹ ‘وائر’ کی رپورٹ کے مطابق بھارت میں 300 موبائل نمبر استعمال کیے گئے اور اس فہرست میں حکومتی وزرا، حزب اختلاف کے سیاست دانوں، صحافیوں، سائنس دانوں اور انسانی حقوق کے کارکنوں کے نمبر شامل ہیں۔

دوسری جانب وفاقی وزیر انسانی حقوق شیریں مزاری نے اس پر ردِعمل دیتے ہوئے کہا کہ ‘دوسرے حصے میں مودی حکومت کی جانب سے اپنے وزرا کی نگرانی کا انکشاف ہوا ہے، این ایس او فروخت کے لیے بظاہر اسرائیلی حکومت سے منظوری لیتی ہے اور رابطے واضح ہیں’۔

قبل ازیں بھارتی حکومت نے 2019 میں اپنے شہریوں کی جاسوسی کے حوالے سے رپورٹس کو مسترد کردیا تھا جبکہ واٹس ایپ نے امریکا میں اسرائیلی کمپنی ‘این ایس او’ کے خلاف جاسوسی کے الزامات پر مقدمہ کردیا تھا اور الزام لگایا تھا کہ کمپنی سائبر جاسوسی کے لیے واٹس ایپ کا استعمال کر رہی ہے۔

اسرائیل کی کمپنی این ایس او اور اس کا جاسوسی کا نیٹ ورک پیگاسس 2016 سے خبروں میں ہے جب محققین نے انکشاف کیا تھا کہ کمپنی، متحدہ عرب امارات میں شہریوں کی جاسوسی میں مدد کر رہی ہے۔

اس انکشاف سے پرائیویسی اور حقوق سے متعلق خدشات پیدا ہوگئے تھے اور یہ بات سامنے آئی کہ نجی اسرائیلی کمپنی کے حد سے زیادہ رسائی رکھنے والے سافٹ ویئر کو شاید بین الاقوامی کلائنٹس نے غلط استعمال کیا۔

میڈیا کی رپورٹ کے مطابق لیک اسمارٹ فون نمبرز کی تعداد 50 ہزار سے زائد ہے اور خیال ظاہر کیا گیا ہے کہ 2016 سے این ایس او کے کلائنٹ کے لیے رسائی دی گئی۔

وزیر اعظم کا نوٹس
وزیر اعظم عمران خان نے معذور کم سن بچی کے ساتھ زیادتی کی مبینہ کوشش کے واقعے کا سخت نوٹس لیتے ہوئے پولیس کو واقعے کی فوری تحقیقات اور ملزمان کی گرفتاری کا حکم دیا۔

وزیر اعظم کے ڈلیوری یونٹ کے سٹیزن پورٹل پر بچی کی والدہ نے شکایت کی تھی کہ اوکاڑہ میں ان کی بیٹی سے بدسلوکی کی گئی اور مقدمے کے تفتیشی افسر نے ان سے رشوت کا مطالبہ کیا۔

وزیر اعظم نے ہدایت کی کہ معاملے کی شفاف تحقیقات کی جائیں، ملزمان کو گرفتار کیا جائے اور فوری قانونی کارروائی کی جائے۔

ان کی ہدایت پر وزیر اعظم ڈلیوری یونٹ نے ڈی پی او اوکاڑہ کو فوری کارروائی کی ہدایت کی جبکہ ڈی پی او نے متعلقہ تفتیشی افسر کو معطل کر دیا۔

وزیر اعظم کی نیپالی ہم منصب کو مبارکباد
وزیر اعظم نے نیپال کے نئے وزیر اعظم شیر بہادر دیوبا کو پارلیمنٹ سے اعتماد کا ووٹ حاصل کرنے پر مبارکباد دی۔

اپنے ٹوئٹر اکاؤنٹ پر پوسٹ میں وزیر اعظم نے لکھا کہ ایوانِ نمائندگان سے اعتماد کا ووٹ جیتنے پر میں نیپالی ہم منصب شیر بہادر دیوبا کو مبارکباد پیش کرتا ہوں’۔

وزیر اعظم نے مشترکہ مفادات کے معاملات میں نیپال کے ساتھ مل کر کام کرنے کی خواہش کا اظہار کیا۔

ان کا کہنا تھا کہ پاکستان نیپال کے ساتھ اپنے قریبی تعلقات میں مزید وسعت و گہرائی کے لیے تیار ہے اور باہمی دلچسپی کے امور پر نیپال کے ساتھ مل کر کام کرتا رہے گا۔

خیال رہے کہ نیپالی وزیر اعظم شیر بہادر دیوبا ایوانِ نمائندگان سے بآسانی اعتماد کا ووٹ حاصل کرنے میں کامیاب ہوگئے تھے۔

نیپالی کانگریس کے سربراہ 75 سالہ شیر بہادر دیوبا کو سپریم کورٹ کی مداخلت کے بعد 12 جولائی کو آئین کی دفعہ 76(5) کے تحت وزیراعظم مقرر کیا گیا تھا، انہیں 275 اراکین کے ایوان میں سے 165 ووٹس ملے۔

وزیراعظم عمران خان نے اگست سے سندھ میں سیاسی جلسے کرنے کا فیصلہ کیا ہے۔

ذرائع کے مطابق وزیراعظم عمران خان کے جلسے اندرون سندھ ہوں گے اور ان میں بڑی شخصیات تحریک انصاف میں شمولیت اختیار کریں گی۔

ذرائع کا کہنا ہےکہ پیپلزپارٹی مخالف سیاسی قوتوں سے ملاقاتیں اور انہیں ساتھ ملانا بھی سندھ پلان کا حصہ ہوگا۔

ذرائع کے مطابق وزیراعظم عمران خان نے سندھ کے حوالے سے عید کے بعد ایک اور اجلاس بلایا ہے جس میں سندھ پلان کو حتمی شکل دی جائے گی جب کہ اسی اجلاس میں سندھ ایڈوائزری کمیٹی کے نام بھی فائنل ہوں گے۔

ذرائع کا کہنا ہےکہ وفاق کے منصوبوں کی تکمیل میں حائل رکاوٹوں پر اہم فیصلے بھی عید کے بعد ہوں گے جب کہ مبینہ کرپشن میں ملوث یا سیاسی آلہ کاربننے والے بیوروکریٹس کےخلاف کارروائی پر مشاورت ہوگی۔

لاہور: ملک کے مختلف علاقوں میں بارشوں کے نتیجے میں ہونے والے حادثات سے آٹھ افراد جاں بحق اور متعدد زخمی ہوگئے۔

ملک بھر میں مون سون بارشوں کا سلسلہ جاری ہے جب کہ حادثات کے نتیجے میں 8 افراد جاں بحق اور متعدد زخمی ہوگئے۔ پنجاب بھر میں موسلادھار بارشوں کے نتیجے میں نشیبی علاقے زیر آب آگئے جب کہ چائنہ اسکیم میں گھر کی چھت گرنے سے والدین اور 5 بچے زخمی ہوگئے۔ وزیر اعلیٰ پنجاب عثمان بزدار نے صوبہ بھر میں شہری انتظامیہ اور واسا کو الرٹ رہنے کا حکم دیدیا ہے۔

کراچی میں دوسرے روز بھی بادلوں کا راج ہے، ہلکی بارش اور ٹھنڈی ہواؤں سے موسم مزید خوشگوار ہوگیا ہے جب کہ شہر میں 30 سے 40 کلومیٹر فی گھنٹہ کی رفتار سے سمندری ہوائیں چل رہی ہیں۔

دوسری جانب دیر بالا کے ندی نالوں میں طغیانی کے باعث سیاحوں کی گاڑی برساتی نالے میں بہہ گئی اور 2 افراد جاں بحق ہوگئے جب کہ کوہاٹ کے قریب شکردرہ کے برساتی نالے میں 7 افراد بہہ گئے۔

گوجرانوالہ: تیسری شادی پر پہلی بیوی نے میرج ہال میں شوہر کی پٹائی کردی۔

تفصیلات کے مطابق گوجرانوالہ کے تھانہ سبزی منڈی کی حدود میں واقع ایک میرج ہال میں روایتی انداز میں شادی کی تقریب جاری تھی کہ ایک عورت کچھ دیگر لوگوں کے ساتھ وہاں پہنچی اور دلہے کی پہلی بیوی ہونے کا دعویٰ کردیا، اس کا کہنا تھاکہ دلہے کی یہ دوسری نہیں بلکہ تیسری شادی ہے۔ خاتون کا کہنا تھا کہ شوہر بتائے بغیر بغیر تیسری شادی کر رہا تھا اور ہمیں چھوڑ گیا تھا۔

پہلے ہی سے 2 بیویاں کا راز کھلنے پر شادی ہال میدان جنگ بن گیا، فریقین نے ایک دوسرے پر لاتوں ، مکوں اور گھونسوں کی بارش کردی، اس سے دل نہ بھرا تو بارات میں ایک دوسرے پر کرسیاں بھی چل گئیں، شادی ہال 2 گھنٹے تک میدان جنگ بنارہا، واقعے کی اطلاع ملنے پر پولیس دونوں فریقین تھانے لے آئی۔

اسلام آباد: نیو اسلام آباد انٹرنیشنل ائیرپورٹ پر سول ایوی ایشن اتھارٹی ویجلینس گارڈ نے ایمانداری و فرض شناسی کی اعلیٰ مثال قائم کرتے ہوئے 9 ہزار کینڈین ڈالر اور اہم دستاویزات مالک کو تلاش کرکے حوالے کردیں۔

نیو اسلام آباد انٹرنیشنل ائیرپورٹ پر کراچی سے آنے والی پرواز نمبر پی کے 308 کے زاہد محمد نامی مسافر ائیرپورٹ پہنچے تو اپنا پاوچ جس میں 9 ہزار کینڈین ڈالر، شناختی کارڈ اور اہم دستاویزات وغیرہ تھیں ائیرپورٹ پر بھول گئے۔

سول ایوی ایشن اتھارٹی ویجلینس گارڈ رضوان نے پاوچ لاوارث پڑا دیکھ کر اپنی حفاظتی تحویل میں لیا اور فوری طور پر ڈیوٹی ٹرمینل مینجر کو اطلاع کرکے ڈالرز سمیت تمام اشیاء ان کے حوالے کیں، بعدازاں مسافر کو تلاش کرکے ضروری قانونی کاروائی کےبعد تمام اشیاء مسافر زاہد محمد کے حوالے کردی گئی۔

اسلام آباد: ملک میں کورونا کیسز کی تعداد میں ایک بار پھر اضافہ ہونے لگا 24 گھنٹوں کے دوران کورونا کے 2145 مثبت کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 40 ہزار 805 ٹیسٹ کیے گئے جن میں سے 2145 افراد میں کورونا وائرس کی تصدیق ہوئی۔

گزشتہ روز اس وبا نے مزید 37 افراد کی زندگیوں کو نگل لیا۔ جب کہ مثبت کیسز کی شرح 5.25 فیصد ریکارڈ ہوئی ہے۔

کورونا وائرس اوراحتیاطی تدابیر:

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

وفاقی وزیر برائے منصوبہ بندی و این سی او سی کے سربراہ اسد عمر نے کہا ہے کہ جب تک آبادی کا بڑا حصہ کورونا ویکسین نہیں لگواتا، پابندیاں لازمی ہیں۔

اسد عمر نے ٹویٹ کرتے ہوئے کہا کہ ‏کل پہلی دفعہ پاکستان میں ایک دن میں 6 لاکھ سے زیادہ ویکسینیشن کی گئی۔ ویکسینیشن کی بڑھتی ہوئی تعداد حوصلہ افزا ہے لیکن اس میں اور تیزی لانی کی ضرورت ہے تاکہ تمام سماجی اور معاشی پابندیاں ختم کی جا سکیں. جب تک آبادی کا بڑا حصہ ویکسین نہیں لگواتا، پابندیاں ناگزیر ہیں۔

آرمی چیف جنرل قمر جاوید باجوہ سے پاکستان میں تعینات چین کے سفیر نونگ رونگ کی ملاقات، آرمی چیف نے داسو بس واقعےپر چینی حکومت اور عوام بالخصوص سوگوار خاندانوں سے دلی ہمدردی کااظہار کیا۔

آئی ایس پی آر کے مطابق آرمی چیف جنرل قمر جاوید باجوہ نے چینی سفیر نونگ رونگ سے ملاقات میں داسو میں ہونے والے واقعے پراظہار ہمدردی کرتے ہوئے کہا کہ پاک فوج چین کے ساتھ اپنےدیرینہ برادرانہ تعلقات کی بہت قدر کرتی ہے۔ آرمی چیف نے پاکستان میں کام کرنے والے چینی شہریوں کی مکمل سپورٹ، تعاون اور سیکیورٹی کی یقین دہانی کرائی۔

اس موقع پر ان کا کہنا تھا کہ ہم امن کے لیے کام کر رہے ہیں، ہمیں اپنے عزم کو چیلنج کرنے والی تمام دشمن قوتوں کے ناپاک عزائم کو ناکام بنانے اور خصوصاً پاک چین اسٹریٹیجک اشتراک کو لاحق خطرات سے نمٹنے کے لیے مستحکم رہنے کی ضرورت ہے۔ چینی سفیر نونگ رونگ اور سربراہ پاک فوج جنرل قمر جاوید باجوہ نے خطے میں امن و استحکام کے لیے مل کر کام کرنے پر بھی اتفاق کیا۔