Category تازہ ترین

ترجمان دفتر خارجہ نے بتایا ہے کہ داسو ہائیڈرو پاور پروجیکٹ پر کام کرنے والے پاکستانی کارکنوں کی ملازمت کے معاہدوں کی تنسیخ کے حوالے سے جاری نوٹیفکیشن منسوخ ہو چکا ہے۔

یہ بات ترجمان دفتر خارجہ زاہد حفیظ چوہدری نے داسو منصوبے پر کام کرنے والے پاکستانی ورکرز کی ملازمت کے معاہدوں کی منسوخی کے حوالے سے میڈیا نمائندوں کے سوالات کے جواب میں چین کی تعمیراتی کمپنی چائنہ گیزوبا گروپ کارپوریشن ( سی جی جی سی) کے حوالے سے بتائی۔

انہوں نے کہا کہ پاکستان اور چین کے متعلقہ حکام منصوبے کی سیکیورٹی اور ترقیاتی کام کو جاری رکھنے کے حوالہ سے باہمی مشاورت سے اقدامات کررہے ہیں، منصوبے پر تعمیراتی کام کا جلد دوبارہ آغاز کردیا جائے گا۔

انہوں نے مزید کہا کہ پاکستان اور چین داسو ہائیڈرو پاور پراجیکٹ سمیت چین کے اشتراک سے جاری دیگر ترقیاتی منصوبوں کی بروقت تکمیل کےلئے پرعزم ہیں۔

قبل ازیں چینی حکومت کی جانب سے اعلیٰ سطح کے سیکیورٹی وفد نے داسو ہائیڈرو پاور پروجیکٹ پر اسٹینڈرڈ آپریٹنگ پروسیجرز اور نئے سیکیورٹی منصوبے پر نظرِ ثانی کے لیے جائے وقوع کا دورہ کیا۔

رپورٹ کے مطابق چینی تفتیش کاروں کے بارے میں ایک سینئر عہدیدار نے ڈان کو بتایا کہ چینی وزارت خارجہ کے شعبے بیرونی سیکیورٹی امور کے ڈائریکٹر جنرل وو ویی، دیگر چینی عہدیداروں کے ہمراہ بالائی کوہستان کے ضلعی ہیڈ کوارٹر پہنچے اور وہاں سے بارسین گئے’۔

ذرائع نے کہا کہ چینی تفتیش کاروں نے بارسین کیمپ کے دورے کے موقع پر پاکستانی اور اپنے شہریوں سے پوچھ گچھ کی جبکہ مقامی پولیس چینی تحقیقاتی ٹیم کے نتائج سے لاعلم نظر آئی۔

ایک پولیس افسر نے شناخت پوشیدہ رکھنے کی شرط پر بتایا کہ فوج، پولیس، بم ڈسپوزل اسکواڈ وار محکمہ انسداد دہشت گردی کی جانب سے مشترکہ تحقیقات جاری ہیں لیکن ہمیں چینی تفتیش کے بارے میں کوئی معلومات نہیں ہیں۔

تفتیش سے متعلق ذرائع نے بتایا کہ بس دھماکے میں استعمال ہونے والا مواد ایک ‘گھریلو ساختہ ڈیوائس’ تھی جس میں بال بیرنگ یا تیز دھار اشیا موجود نہیں ہوئی تھیں جس کی وجہ سے اس سے صرف دھماکا ہوا اور بس کی سمت تبدیل ہوئی اور وہ دریا میں جاگری۔

خیال رہے کہ 14 جولائی کو زیر تعمیر 4 ہزار 300 میگاواٹ کے داسو ہائیڈرو پاور منصوبے پر تعمیراتی ٹیم کو لے کر جانے والی ایک کوچ بالائی کوہستان میں دھماکے کے بعد دریا میں جا گری تھی جس کے نتیجے میں 9 چینی، 4 مقامی افراد ہلاک اور 28 زخمی ہوئے تھے۔

دوسری جانب تحقیقات جاری ہونے کی وجہ سے داسو منصوبے پر کام کرنے والی چینی تعمیراتی کمپنی نے کچھ وقت کے لیے ڈیم منصوبے پر کام معطل کردیا۔

علاوہ ازیں کمپنی نے ایک بیان جاری کیا جس میں کہا گیا کہ کمپنی کی جانب سے ورکرز کو نکالنے کا 16 جولائی کا فیصلہ متعلقہ حکام سے منظور نہیں تھا۔

اس نوٹس کے ذریعے اس قیاس آرائی کا خاتمہ ہوا جو منصوبے سے وابستہ 1800 پاکستانی ورکرز کی قسمت کے بارے میں ایک سابقہ نوٹیفکیشن کے اجرا کے بعد سوشل میڈیا پر وائرل ہوئی تھیں۔

چائنا گیزوبا گروپ کارپوریشن (سی جی جی سی) نے ایک تازہ نوٹیفکیشن میں کہا کہ داسو ایچ پی پی کی انتظامیہ نے گزشتہ اعلامیے کو کالعدم قرار دیا ہے۔

ادھر واٹر اینڈ پاور ڈیولپمنٹ اتھارٹی (واپڈا) کے ایک سینئر عہدیدار نے بھی کام رک جانے کی تصدیق کی لیکن ان کا کہنا تھا کہ یہ عارضی اقدام ہے جو اس افسوسناک حادثے کے بعد آنا قدرتی بات ہے۔

کام کی معطلی کے حوالے سے عہدیدار کا کہنا تھا کہ عید کی تعطیلات نزدیک تھیں اور سیکیورٹی پروٹوکولز کا جائزہ لیے بغیر کام بحال نہیں کیا جاسکتا۔

تاہم عہدیدار نے بتایا کہ 14 جولائی کے بعد جائے وقوع کا دورہ کرنے والے چینی حکام نے لوگوں کو یقین دلایا کہ منصوبے پر ہر قیمت پر کام مکمل کیا جائے گا۔

اس ضمن میں جب حکومت خیبرپختونخوا کے ترجمان کامران خان بنگش سے رابطہ کیا گیا تو انہوں نے کہا کہ وزیراعظم کی ہدایت کے مطابق بین الاقوامی معاملہ ہونے کی وجہ سے اس سے متعلق امور پر صرف وفاقی حکومت ہی تبصرہ کرسکتی ہے۔

تاہم وزیر اطلاعات فواد چوہدری کا کہنا تھا کہ انہیں کام کی معطلی اور ورکرز کی برطرفی سے متعلق کوئی معلومات نہیں ہیں۔

سرکاری ذرائع کا کہنا تھا کہ سیکیورٹی سے متعلق نئے ایس او پیز کو حتمی شکل دینے اور ان پر عملدرآمد ہونے تک چینی انجینئرز کی کام کی بحالی میں کچھ وقت لگ سکتا ہے۔

ایک عہدیدار نے ڈان کو بتایا کہ ہمیں معلوم نہیں کہ چینی، تعمیراتی کام کب بحال کریں گے کیوں واقعہ بہت بڑا ہے اور اس میں 9 چینی انجینیئرز ہلاک جبکہ دیگر زخمی ہوئے ہیں، ان میں سے ایک انجینیئر کی حالت تشویشناک ہے جس کا علاج گلگت کے ہسپتال میں جاری ہے۔

سرکاری ذرائع نے بتایا کہ کمپنی بہتر انتظام کے لیے ملازمین کو ہائر کرنے کا ٹھیکا تیسری پارٹی کو دینے سمیت مختلف آپشنز پر غور کررہی ہے’۔

دوسری جانب ایک پریس کانفرنس سے خطاب کرتے ہوئے کوہستان کے عمائدین نے اس اُمید کا اظہار کیا کہ چینی حکومت اس میگا پروجیکٹ پر کام کی بحالی کو یقینی بنائے گی اور مقامی افراد نے ہمیشہ چینی منصوبوں کی بھرپور حمایت کی ہے۔

اسلام آباد: ملک بھر میں عیدالاضحیٰ کے قریب آتے ہی ایک بار پھر کورونا کیسز میں اضافہ ہونے لگا 24 گھنٹوں کے دوران کورونا کے 2607 مثبت کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 48 ہزار 816 ٹیسٹ کیے گئے جن میں سے 2607 افراد میں کورونا وائرس کی تصدیق ہوئی۔

ملک میں اب تک کورونا کے مصدقہ مثبت کیسز کی تعداد 989,275 ہوگئی ہے جن میں سے 919,163 مریض شفایاب ہو چکے ہیں۔ گزشتہ روز اس وبا نے مزید 21 افراد کی زندگیوں کو نگل لیا۔ اس طرح ملک میں اب تک اس وبا سے جاں بحق افراد کی مجموعی تعداد 22 ہزار 781 ہوگئی ہے۔ جب کہ مثبت کیسز کی شرح 5.34 فیصد ریکارڈ ہوئی ہے۔
کورونا وائرس اوراحتیاطی تدابیر:

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

کوہاٹ: لاچی کے قریب مسافر کوچ اور ٹرک کے درمیان تصادم سے 6 افراد جاں بحق جب کہ 12 شدید زخمی ہوگئے۔

تفصیلات کے مطابق کوہاٹ کی تحصیل لاچی کے قریب مسافر کوچ اور ٹرک کے درمیان تصادم ہوگیا جس کے نتیجے میں کوچ میں سوار 18 افراد زخمی ہوگئے، زخمیوں کو مقامی افراد نے زخمیوں کو قریبی اسپتال منتقل کیا، جہاں اسپتال انتظامیہ نے 6 افراد کی موت کی تصدیق کردی جب کہ 12 کو طبی امداد فراہم دی جارہی ہے۔

مقامی انتطامیہ کا کہنا ہے کہ جاں بحق ہونے والوں میں 4 خواتین اور 2 مرد شامل ہیں، زخمیوں میں سے کچھ کی حالت تشویشناک ہے۔

پاک فوج کے ترجمان اور شعبہ تعلقات عامہ آئی ایس پی آر کے ڈائریکٹر جنرل (ڈی جی) میجر جنرل بابر افتخار نے کہا ہے کہ افغانستان میں بدامنی اور عدم استحکام کا سب سے برا اثر پاکستان پر ہی پڑے گا اور اس کے نتیجے میں پاکستان میں دہشت گرد تنظیموں کی باقیات اور خفیہ ٹھکانے کے دوبارہ فعال ہونے کا خدشہ ہے۔

ایک نجی ٹی وی سے گفتگو کرتے ہوئے میجر جنرل بابر افتخار نے کہا کہ خطے کی صورتحال پر بہت گہری نگاہ ہے، اگرچہ افغان عمل کی کامیابی میں ہم اپنا کردار انتہائی سنجیدگی سے ادا کررہے ہیں کیونکہ افغان امن عمل کے حوالے معاونت میں پاکستان نے کوئی کسر نہیں اٹھا رکھی مگر اس کے ساتھ ساتھ اس بات کو بھی سمجھنا ہو گا کہ ہم اس پورے عمل کے ضامن ہرگز نہیں ہیں اور بالآخر یہ فیصلہ افغان فریقوں نے ہی کرنا ہے کہ انہوں نے آگے کس طرح سے چلنا ہے۔

ان کا کہنا تھا کہ امریکی انخلا کے بعد صورتحال بگڑنے کی صورت میں متوقع اثرات سے نمٹنے کے لیے ہم نے بہت تیاری کی ہے اور ہم نے اپنے ملک کی سیکیورٹی اور حفاظت کے لیے تمام ضروری اقدامات کر رکھے ہیں۔

انہوں نے کہا کہ افغانستان میں اگر بدامنی اور عدم استحکام ہو گا تو سب سے برا اثر پاکستان پر ہی پڑے گا اور پرامن افغانستان میں بھی سب سے زیادہ اسٹیک پاکستان کا ہی ہے، ہم نے بارہا کہا ہے کہ پاکستان میں امن کا افغانستان میں امن و استحکام سے براہ راست تعلق ہے۔

ڈی جی آئی ایس پی آر نے سیکیورٹی چیلنجز کا ذکر کرتے ہوئے کہا کہ افغانستان میں لڑائی اور تشدد کے نتیجے میں پاکستان میں دہشت گرد تنظیموں کی باقیات اور خفیہ ٹھکانے کے دوبارہ فعال ہونے کا خدشہ ہے اور بلوچستان میں بھی کچھ عناصر کو تقویت مل سکتی ہے اور وہاں موجود مختلف دہشت گرد گروپس اور غیرملکی خفیہ ایجنسیاں کی مدد سے وہ آپس میں اتحاد کر سکتے ہیں اور حالیہ واقعات اسی طرف اشارہ کرتے ہیں۔

ان کا کہنا تھا کہ ان خطرات سے نمٹنے کے لیے ہم بہت عرصے سے اقدامات کررہے ہیں، ہم نے دہشت گردی کی طویل اور صبرآزما جنگ لڑی ہے اور ہمیں اس میں بے مثال کامیابی ملی جنہیں ہم کسی صورت میں رائیگاں نہیں جانے دیں گے۔

میجر جنرل بابر افتخار نے کہا کہ 2017 سے آرمی چیف جنرل قمر جاوید باجوہ کے وژن کے مطابق مغربی زون کی مینجمنٹ کے حوالے سے بہت مؤثر اقدامات اٹھائے گئے، مغربی سرحد پر حفاظتی باڑ کی تنصیب تقریباً مکمل ہے۔

انہوں نے کہا کہ پاک افغان سرحد پر 90 فیصد باڑ لگائی جا چکی ہے اور باقی بھی جد مکمل ہو جائے گی، پاک ایران سرحد پر بھی باڑ لگانے کا کام بہت تیزی سے جاری ہے، اس کے علاوہ سرحد پر سینکڑوں چوکیاں تعمیر کی گئیں، بارڈر کنٹرول سسٹم کو اپ گریڈ کیا ہے اور وہاں جدید بائیو میٹرک سسٹم کی تنصیب کی گئی ہے جبکہ پاک افغان سرحد پر تمام غیرقانونی کراسنگ پوائنٹس کو سیل کردیا گیا ہے۔

ان کا کہنا تھا کہ قبائلی اضلاع میں ایف سی کی تعداد میں اضافہ ہوا ہے اور پولیس کی ٹریننگ کی فوج نگرانی کررہی ہے جس کے تحت 40 ہزار پولیس اہلکاروں اور 7ہزار لیویز کے جوانوں کی ٹریننگ کی گئی، ایک جامع نظام نصب کیا گیا ہے۔

ڈی جی آئی ایس پی آر نے کہا کہ حال ہی میں ہونے والے دہشت گردی کے واقعات کا افغانستان میں پیدا ہونے والی صورتحال سے تعلق بنتا ہے لیکن ہمارے آپریشنز اور کارروائیوں کی بدولت اس وقت پاکستان میں دہشت گردوں کا کوئی منظم نیٹ ورک موجود نہیں ہے اور ان حملوں میں ملوث عناصر کی قیادت افغانستان میں بیٹھی ہوئی ہے اور انہیں را اور بھارت کی مکمل سپورٹ حاصل رہی ہے لیکن یہ حملے ان کی جھنجلاہٹ کو ظاہر کرتے ہیں۔

انہوں نے بتایا کہ مئی سے اب تک خیبر پختونخوا اور بلوچستان میں دہشت گردی کے تقریباً 150 سے زائد چھوٹے بڑے واقعات ہو چکے ہیں، اسی طرح قبائلی اضلاع اور بلوچستان میں سیکیورٹی فورسز نے ساڑھے 7ہزار سے زائد آپریشنز کیے ہیں جن میں 42 دہشت گرد مارے گئے اور ہمارے اپنے بھی کئی جوان اور افسران شہید اور زخمی ہوئے۔

انہوں نے کہا کہ ہماری پاک فوج ملک دشمن عناصر کی مکمل سرکوبی کے لیے ہر طرح تیار اور پرعزم ہیں اور امن اور ترقی کے دشمنوں کو ہم کسی صورت کامیاب نہیں ہونے دیں گے، ہم اس وقت انتہائی جارحانہ انداز میں آپریشنز کررہے ہیں اور یہ عناصر بھاگ رہے ہیں۔

میجر جنرل بابر افتخار نے کہا کہ پچھلے 20سال میں ہم نے دہشت گردی کے خلاف کامیاب جنگ لڑی اور اس دوران 86ہزار سے زائد جانوں کا نذرانہ پیش کرنے کے ساتھ ساتھ 152ارب ڈالر سے زائد کا نقصان برداشت کیا ہے، اس جنگ میں ہم نے ہزاروں آپریشنز کر کے 46ہزار مربع کلومیٹر کا علاقہ دہشت گردوں سے خالی کرایا، اس دوران 18ہزار سے زائد دہشت گرد مارے گئے اور میں آج پورے وثوق سے کہہ سکتا ہوں کہ پاکستان میں آج کوئی بھی منظلم دہشت گردی کا نیٹ ورک موجود نہیں ہے۔

ان کا کہنا تھا کہ جب ہم نے ردالفساد شروع کیا تو ہماری سوچ یہی تھی کہ طاقت کا استعمال صرف ریاست کا استحقاق ہے اور اسی وژن کے تحت جنر قمر جاوید نے پورے پاکستان کے طول و عرض میں ردالفساد آپریشن شروع کروایا تھا۔

مزید پڑھیں: ‘افغانستان کی موجودہ صورتحال کا الزام پاکستان پر دھرنا انتہائی ناانصافی ہے’

ان کا کہنا تھا کہ زمینی کارروائیوں کے ساتھ ساتھ پاکستان میں دہشت گردی کی معاونت اور سہولت کاری کے سدباب کے لیے قانون سازی ہوئی اور دہشت گردی کے خاتمے کے حوالے سے مختلف ممالک اور بین الاقوامی اداروں نے پاکستان کی معاونت اور خطے میں امن کے حوالے سے کلیدی اور تعمیری کردار کو تسلیم کیا ہے۔

انہوں نے کہا کہ مغربی سرحد پر لگائی گئی باڑ پاکستان کے ساتھ ساتھ افغانستان کے لیے بھی یکساں فائدہ مند ہے اور چیف آف آرمی اسٹاف نے اسے امن کی باڑ کہا ہے کیونکہ یہ کسی کو تقسیم نہیں کررہی بلکہ امن کو فروغ دے گی، پاکستان میں بدامنی پھیلانے والے عناصر افغانستان کی سرزمین سے کارروائیاں کرتے ہیں اور ہم اپنی سرزمین کسی کے خلاف استعمال ہونے دیں گے اور نہ کسی کی سرزمین اپنے خلاف استعمال ہونے دیں گے۔

ایک سوال کے جواب میں ڈی جی آئی ایس پی آر نے کہا کہ ہندوستان کا افغانستان میں اثرورسوخ بہت زیادہ ہے اور انہوں نے اس کا استعمال بھی کیا ہے، میں یہ سمجھتا ہوں کہ انہوں نے افغانستان میں جو اربوں کی سرمایہ کاری کی اس کا مقصد وہاں اپنے قدم جما کر پاکستان کو نقصان پہنچانا تھا۔

انہوں نے کہا کہ موجودہ صورتحال پر بھارت کے رویے اور ان کی جانب سے دیے جانے والے بیانات سے عیاں ہو چکا ہے کہ وہ موجودہ صورتحال سے انتہائی جھنجلاہٹ کا شکار ہیں اور سب کو یہ معلوم ہونا چاہیے کہ اس تمام تر صورتحال کو بھارت خراب کرنے کی ہر ممکن کوشش کرے گا۔

ان کا کہنا تھا کہ افغانستان میں چاہے کسی کی بھی حکومت ہو اس سے کوئی فرق نہیں پڑتا، اگر افغانستان مستحکم ہے تو بھارت کے لیے وہاں سے پاکستان کے خلاف کارروائیاں کرنا مشکل ہو گا اور وہ اس پورے امن عمل کو سبوتاژ کرنے کی پوری کوشش کررہے ہیں۔

افغانستان کے نائب صدر امر صالح کی جانب سے پاک فضائیہ کی جانب سے افغان ایئرفورس کو دھمکانے کے الزام کو پاک فوج کے ترجمان نے مسترد کرتے ہوئے کہا کہ یہ بیان انتہائی غیرذمے دارانہ ہے جس کو میں پورے وثوق کے ساتھ مسترد کرتا ہے، تمام ممالک اپنے اپنے دائرہ اختیار میں اپنے طریقے سے کارروائی کرنے کا حق رکھتے ہیں، افغانستان کو بھی یہ حق حاصل ہے اور پاک فضائی کے حوالے سے دیے گئے اس بیان میں کوئی صداقت نہیں۔

انہوں نے کہا کہ حالیہ پرتشدد واقعات میں کچھ افغان فوجی جان بچا کر پاکستان کی طرف آ گئے تھے، ہم نے انہیں مکمل احترام کے ساتھ کھانا اور تحائف دیے اور باجوڑ ایجنسی میں ہونے والے اس واقعے کے بعد انہیں سپاہی کے اعزاز کے ساتھ افغان حکام کو واپس کردیا اور ہم نے ہمیشہ عالمی اقدار کا احترام کیا ہے۔

ایک سوال کے جواب میں انہوں نے بتایا کہ 26 جون کو کرم ایجنسی میں ایک ٹیلی کام کمپنی کے 16 مزدوروں کو اغوا کیا گیا تھا، 10 کو انہوں نے اگلے دن چھوڑ دیا اور ایک کی لاش ملی تھی، پانچ مزدوروں کی بازیابی کے لیے وہاں آپریشن کیے گئے اور 11 جولائی کو ہم نے ان میں سے تین دہشت گردوں کو مار دیا جبکہ اس دوران ہمارے ایک کیپٹن اور سپاہی کی شہادت بھی ہوئی۔

ان کا کہنا تھا کہ ان شہادتوں کے باوجود ہم نے یہ آپریشن جاری رکھا اور بقیہ پانچ افراد کو بازیاب کرا لیا ہے اور اس میں ملوژث عناصر کے خلاف بھی کارروائیاں جاری ہیں۔

پاک افغان سرحد پر تمام غیر قانونی کراسنگ پوائنٹس سیل کردیے گئے۔

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) میجر جنرل بابر افتخار نے بتایا کہ پاک افغان سرحد پر پاک فوج کے ریگولر دستے تعینات کردیے گئے ہیں۔

افغانستان کی صورتحال کے باعث دہشتگردوں کے سلیپرسیل دوبارہ اٹھنےکا خدشہ ہے، ترجمان پاک فوج

ڈی جی آئی ایس پی آر کا کہنا ہے کہ پاک افغان سرحد پر تمام غیر قانونی کراسنگ پوائنٹس سیل کردیے گئے ہیں۔

انہوں نے کہا کہ ہر اس جگہ پر جہاں سے غیر قانونی نقل و حرکت ہوتی تھی، فوجی تعینات کردیے ہیں اور ان سرحدی مقامات پر بھی جہاں سے گزرنے کی اجازت ہے وہاں بھی باضابطہ فوجی اہلکار متعین ہیں۔

اسلام آباد میں افغان سفیر نجیب اللہ علی خیل کی بیٹی کے مبینہ اغوا اور تشدد پر پاکستان کا مؤقف سامنے آگیا۔

دفترخارجہ کی جانب سے جاری بیان کے مطابق گزشتہ روزافغان سفارتخانے نے اطلاع دی کہ افغان سفیرکی بیٹی پر کارمیں سوار ہوتے وقت حملہ کیا گیا، واقعے کی اطلاع پر فوری اسلام آباد پولیس نے تحقیقات کا آغاز کردیا ہے۔

ترجمان دفتر خارجہ نے بتایا کہ وزارت خارجہ اورسیکیورٹی حکام سفیر اور ان کے اہل خانہ سے رابطے میں ہیں، وزارت خارجہ اورسیکیورٹی حکام اس معاملے میں مکمل تعاون فراہم کررہے ہیں۔

ترجمان نے کہا کہ ملزمان کا سراغ لگانے اور انصاف کے کٹہرے میں لانے کی کوشش کررہے ہیں، افغان سفیر اور ان کے اہل خانہ کی سیکیورٹی بڑھادی گئی ہے۔

ترجمان کے مطابق اس طرح کے واقعات ناقابل برداشت ہیں، سفارت کاروں ان کے اہل خانہ کی سیکیورٹی کیلئے پرعزم ہیں۔

دوسری جانب سرکاری ذرائع نے بتایاکہ پاکستانی حکام 16جولائی کو افغان سفیر کی بیٹی کے ساتھ پیش آئے واقعے کی تحقیقات کررہے ہیں۔

سرکاری ذرائع کے مطابق افغان سفیر کی بیٹی کے ساتھ پیش آئے واقعے کی تحقیقات تیزی سے جاری ہیں اور واقعے کی تحقیقات سے متعلق افغان حکومت کو آگاہ رکھا جارہا ہے۔

خیال رہے کہ افغان وزارت خارجہ نے بیان میں پاکستان سے سفارتی عملے کو تحفظ دینے کا مطالبہ کیا تھا اور بیان میں یہ بھی کہا تھا کہ افغان سفیر کی بیٹی کو اغوا اور تشدد کا نشانہ بنایا گیا۔

کوہستان میں چینی انجینئرز کی ہلاکت کے معاملے پر چینی کمپنی نے داسو ڈیم پر کام بند کر دیا۔

داسو ڈیم پر کام کرنے والی چینی کمپنی چائنا گیزوبا کی جانب سے حکومت پاکستان کو لکھے گئے خط میں کہا گیا ہے کہ 14 جولائی کو پیش آنے والے واقعے کے باعث کام نہیں کر سکتے۔

خط میں لکھا گیا ہے کہ تمام پاکستانی ملازمین کو فارغ کر دیا گیا ہے تاہم تمام ملازمین کو گریجویٹی اور تنخواہ ادا کی جائے گی۔

داسو ڈیم کے پراجیکٹ ڈائریکٹر انوارالحق نے بھی چینی کمپنی کی جانب سے لکھے گئے خط کی تصدیق کر دی ہے۔

پراجیکٹ ڈائریکٹر انوارالحق نے کہا کہ جوں ہی سکیورٹی کے معاملا ت درست ہوں گے تو ڈیم پر کام دوبارہ شروع ہو جائے گا۔

خیال رہے کہ 14 جولائی کو اپرکوہستان میں پیش آنے والے واقعے میں 9 چینی باشندوں سمیت 12 افراد جاں بحق ہوئے تھے، وفاقی وزیر اطلاعات فواد چوہدری نے واقعے میں دھماکا خیز مواد کی موجودگی کی تصدیق کی تھی۔

وفاقی وزیر داخلہ شیخ رشید نے بتایا ہے کہ داسو واقعے کی تحقیقات میں 15 چینی عہدیدار بھی شامل ہیں۔

اسلام آباد میں پریس کانفرنس کرتے ہوئے ان کا کہنا تھا کہ چین نے پاکستان میں موجود اپنے لوگوں کی سیکیورٹی کو یقینی بنانے کی استدعا کی، جس پر ہم نے انہیں یقین دہانی کرائی ہے۔

ان کا کہنا تھا کہ ’چین ہمارا سب سے قریبی دوست ہے، وزیر اعظم نے آئندہ روز وزیر خارجہ کو چین جانے کی ہدایت کی ہے، انہوں نے وزارت داخلہ کو بھی کہا ہے کہ چینی افراد کی سیکیورٹی کو مزید یقینی بنائیں‘۔

وفاقی وزیر نے بتایا کہ چین سے 15 رکنی ٹیم گزشتہ روز یہاں آئی ہے جس نے ایڈیشنل سیکریٹریز اور دیگر کے ہمراہ جائے حادثہ کا دورہ کیا۔

ان کا کہنا تھا کہ حکومت، چین کو یقین دلاتی ہے کہ ہم پاک۔چین دوستی کے دشمنوں کو کسی صورت معاف نہیں کریں گے۔

انہوں نے کہا کہ پاکستان اور چین کی دوستی لازوال ہے اور اس پر کسی قسم کا فرق نہیں پڑ سکتا۔

شیخ رشید کا کہنا تھا کہ چین کے وزیر داخلہ نے چینی صدر کی ہدایت پر مجھ سے رابطہ کیا اور میں نے وزیر اعظم کی ہدایت اور پاکستانی حکومت اور قوم کے جذبات کو ان تک پہنچایا ہے۔

ایک سوال کے جواب میں ان کا کہنا تھا کہ واقعے کی تحقیقات حتمی مراحل میں ہیں، پاکستان کے اعلیٰ ترین ادارے اس کی تحقیقات کر رہے ہیں اور چینی تفتیش کار بھی اس میں شامل ہوچکے ہیں۔

ان کا کہنا تھا کہ ’ہم نے چین اور چینی وزارت داخلہ کو اعتماد میں لیا ہوا ہے اور جیسے جیسے معلومات حاصل ہوتی ہیں ہم ان سے شیئر کرتے رہتے ہیں‘۔

شیخ رشید نے کہا کہ ’دہشت گردوں نے کوئٹہ میں بھی سازش کرنے کی کوشش کی تھی، داسو میں یہ سازش میں کامیاب ہوئے تاہم ان کی یہ کامیابی عارضی ہے کیونکہ پاکستان کے چین سے تعلقات ہمالیہ سے بھی بلند ہیں‘۔

ایک سوال کے جواب میں انہوں نے کہا کہ وزیر اعظم کے ساتھ افغان صدر اشرف غنی کی ملاقات کے حوالے سے وزارت خارجہ بہتر بریفنگ دے گا۔

ان کا کہنا تھا کہ پاکستان کا امن افغانستان کے امن سے وابستہ ہے، ہماری پوری کوشش ہے کہ افغانستان میں امن ہو۔

جعلی پاسپورٹ اور شناختی کارڈ کے اجرا کے معاملے پر بات کرتے ہوئے ان کا کہنا تھا کہ جعلی پاس پورٹ جاری کرنے میں ملوث 8 افراد کو گرفتار کیا جاچکا ہے اور 19 کو شوکاز نوٹس جاری کیے گئے ہیں۔

انہوں نے کہا کہ پورے ملک میں ہدایت جاری کردی گئی ہیں اور جعلی شناختی کارڈ رکھنے والوں کو نکالنے کے لیے خصوصی وقت دیا جائے گا، تاکہ انہیں بغیر کسی جرمانے کے واپس جانے کا موقع مل سکے۔

انہوں نے بتایا کہ ’پریس کانفرنس کے بعد وزیر اعظم کے ہمراہ آزاد کشمیر جاؤں گا اور امید ہے کہ آزاد کشمیر میں تحریک انصاف کی حکومت قائم ہوگی‘۔

ان کا کہنا تھا کہ ’آزاد کشمیر کے انتخابات کے دوران ہم سے جتنی سیکیورٹی مانگی گئی ہے ہم نے فراہم کی ہے اور اگر وہ مزید مطالبہ کریں گے تو ہم وہ بھی بھیجیں گے‘۔

پاک ۔ افغان سرحد پر سیکیورٹی کے حوالے سے ایک سوال کے جواب میں ان کا کہنا تھا کہ سرحد کے تمام امور پر وزارت داخلہ کی نظر ہے، ادارے سرحد پر ہر قسم کے حالات کے لیے تیار ہیں تاہم اب تک کسی قسم کا کوئی ایسا واقعہ نہیں ہوا جس کا نوٹس لیا جائے۔

ان کا کہنا تھا کہ بھارت، پاکستان میں مداخلت کا کوئی موقع ہاتھ سے جانے نہیں دیتا تاہم وہ بھول چکے ہیں کہ یہ 1979 والا پاکستان نہیں۔

وفاقی وزیر نے کہا کہ عمران خان نے ‘ڈو مور’ کے جواب میں ‘نو مور’ کہہ دیا ہے، پاکستان کا واضح موقف ہے کہ اپنی سرزمین کو کسی بھی دوسرے ملک کے خلاف استعمال ہونے کی اجازت نہیں دیں گے۔

انہوں نے مزید کہا کہ پاکستان کی جغرافیائی اہمیت ایسی ہے کہ اسے کوئی نظر انداز نہیں کر سکتا۔

مسلم لیگ (ن) کی نائب صدر مریم نواز کا کہنا ہے کہ عمران خان کی آزاد کشمیر آمد پر عوام انہیں کشمیر فروش کا تاج پہنائے۔

آزاد کشمیر کے علاقے اسلام گڑھ میں عوامی جلسے سے خطاب کرتے ہوئے ان کا کہنا تھا کہ ’میاں نواز شریف کی آوازیں پورے کشمیر میں گونج رہی ہیں، مسلم لیگ (ن) کے مخالف بھی مان رہے ہیں کہ یہ واحد پارٹی ہے جس نے باقی تمام جماعتوں کی دوڑیں لگوادی ہیں‘۔

ان کا کہنا تھا کہ ’نواز شریف یہ الیکشن جیت چکا ہے، یاد رکھو ووٹ چوروں اگر تم نے شیر کا جیتا ہوا الیکشن چوری کیا تو کشمیری تمہیں چھوڑیں گے نہیں‘۔

انہوں نے کہا کہ ’یہ 2018 نہیں ہے جس میں تم آر ٹی ایس کا بٹن دبا کر الیکشن چوری کرلیا تھا اور مسلم لیگ (ن) نے چپ کرکے یہ فیصلہ مان لیا تھا‘۔

مریم نواز کا کہنا تھا کہ ’اب یہ وہ مسلم لیگ (ن) بھی نہیں، اس بار ووٹ چوروں کا واستہ آزاد کشمیر کے شیروں سے ہے‘۔

لیگی رہنما کا کہنا تھا کہ ’جہاں تحریک انصاف کا استقبال جوتوں، انڈوں اور ٹماٹروں سے ہوتا ہے ایسے ماحول میں آج عمران خان کشمیر تشریف لارہے ہیں‘۔

انہوں نے بتایا کہ ’عمران خان نے اپنی انتخابی مہم کا آغاز باغ سے اس لیے کیا کیونکہ انہوں نے وہاں ایک اے ٹی ایم ڈھونڈ لیا ہے، جیسے شہد پر مکھیاں جاتی ہیں ویسے ہی جس کی جیب میں پیسا ہو عمران خان وہاں جاتے ہیں‘۔

ان کا کہنا تھا کہ ’عوام سے گزارش ہے کہ عمران خان کا استقبال انڈوں ٹماٹروں سے نہیں کرنا بلکہ ایک پھولوں کا ہار پہنانا جس پر لکھا ہو ویلکم ٹو آزاد کشمیر آٹا چوری میں نمبر ون، دوسرا ہار پہنانا جس پر لکھا ہو چینی چوری میں نمبر ون، تیسرے پر گیس، بجلی چوری میں نمبر ون، پانچویں پر لکھا ہو مہنگائی میں نمبر ون‘۔

مریم نواز کا کہنا تھا کہ ’اس کے بعد انہیں عزت سے ایک میڈل پہنانا جس میں لکھا ہو ووٹ چوری میں نمبر ون، پھر عزت سے انہیں تاج پہنانا جس پر لکھا ہو کشمیر فروش‘۔

ان کا کہنا تھا کہ ’مقبوضہ کشمیر میں سنا تھا کہ بھارتی ظالم فوج وہاں کے نہتے عوام پر گولیاں چلاتے ہیں، پاکستان میں پہلی مرتبہ عوام نے دیکھا کہ امور کشمیر کے وزیر نے نہتے کشمیریوں پر سامنے کھڑے ہوکر گولیاں چلائیں‘۔

انہوں نے کہا کہ ’الیکشن کمیشن نے اس پر اپنا فیصلہ سنا دیا کہ وہ اب کشمیر میں داخل نہیں ہوسکتا، یہ کس قسم کے گھٹیا لوگ ہیں کہ الیکشن کمیشن کو فیصلہ دینا پڑا کہ امور کشمیر کا وزیر ہی کشمیر میں داخل نہیں ہوسکتا‘۔

مریم نواز کا کہنا تھا کہ نواز شریف صاحب جب وزیر اعظم تھے تو پاک چین اقتصادی راہداری میں انہوں نے ایک منصوبہ رکھوایا تھا جو میرپور سے مظفر آباد موٹر وے کا تھا، یہاں کے لوگوں کو مظفر آباد جانے کے لیے پہلے اسلام آباد جانا پڑتا ہے تاہم نواز شریف چاہتے تھے کہ یہاں کے لوگوں کے لیے آسانیاں پیدا ہوں۔

ان کا کہنا تھا کہ ’دیکھ لو نواز شریف اور عمران خان کا فرق، شرم کا مقام ہے کہ پہلے چینی سرمایہ کاری کے لیے یہاں آتے تھے اب یہاں تحقیقات کے لیے آرہے ہیں‘۔

انہوں نے کہا کہ ’جب تم آصف سلیم باجوہ کو این آر او دو گے اور 30 سے 40 لاکھ روپے کی تنخواہ پر اسے سی پیک کا انچارج بناؤگے اور اپنی توجہ ساری نواز شریف دشمنی پر رکھو گے تو پاکستان میں دہشت گردی کے واقعات نہیں ہوں گے تو کیا ہوگا‘۔

مسلم لیگ (ن) کی نائب صدر کا کہنا تھا کہ ’سی پیک میں آج ترقی نہیں ہورہی وہاں ہلاکتیں ہورہی ہیں‘۔

ان کا کہنا تھا کہ ’مان لو کہ نواز شریف تمہارا سب سے بڑا استاد ہے، تم 3 سال سے اقتدار میں بیٹھے ہو لیکن نواز شریف کے خوف کی وجہ سے تمہاری دوڑیں لگی ہوئی ہیں، ایک دن بھی تمہیں نہ چین کا ملا نہ عزت کا ملا‘۔

انہوں نے کہاکہ ’نواز شریف تمہیں ایسا سبق سکھارہا ہے کہ دل میں تو مانتے ہوگے کہ نواز شریف نام ہی کافی ہے‘۔

انہوں نے مزید کہا کہ ’میں ووٹ چوروں کو تنبیہ کرتی ہوں کہ اگر تم نے مسلم لیگ (ن) کو روکنے کی کوشش کی اور نتائج تبدیل کرنے کی کوشش کی تو تمہارے ساتھ بہت برا ہونے والا ہے‘۔

کوہالہ: پیپلز پارٹی کی رہنما آصفہ بھٹو زرداری کا کہنا ہے کہ کشمیر کے جمہوری حقوق کے لئے ہماری جان بھی حاضرہے۔

کوہالہ میں انتخابی جلسے سے خطاب کے دوران آصفہ بھٹو زرداری نے کہا کہ ہم نے جمہوریت کے لیے قربانیاں دی ہیں، کشمیر جنت نظیر ہے ،کشمیر بے نظیر ہے، کشمیر سے ہمارارشتہ 3 نسلوں سے ہے، پیپلزپارٹی ہمیشہ کشمیر کے ساتھ کھڑی ہے، پیپلز پارٹی پہلے بھی کشمیر کے ساتھ تھی، آج بھی ہے۔

آصفہ بھٹو زرداری نے کہا کہ کشمیر سے محبت وراثت میں ملی ہے، کشمیر کے جمہوری حقوق کے لئے ہماری جان بھی حاضر ہے، ہم نے ہمیشہ کشمیر کی ترقی کے لیے کام کیا ہے، 25 جولائی کو ہر شخص تیر پر ٹھپہ لگائے کیونکہ تیر ترقی اور کشمیر کا نشان ہے۔