Category تازہ ترین

سلم لیگ (ن) کی نائب صدر نے الزام عائد کیا ہے کہ سابق وزیراعظم میاں نواز شریف کو اقتدار سے ایک سازش کے تحت ہٹایا گیا تھا۔ اس مقصد کیلئے ان پر جھوٹے مقدمات درج کئے گئے۔

آزاد کشمیر کے علاقے بھمبر میں انتخابی جلسے سے خطاب میں مریم نواز کا کہنا تھا کہ نواز شریف لندن میں ہیں لیکن انھیں شکست دینے کیلئے الیکشن چوری کرنا پڑتا ہے۔ یہ لوگ ایک پیج پر رہ کر بھی ہار گئے۔

مریم نواز نے کہا کہ میں اس دھرتی کی بیٹی ہوں جو افواج پاکستان سے پیار کرتی ہے۔ ہمارے ساتھ چند افراد نے ظلم اور زیادتی کی۔ تاہم یہ معاملہ میں نے اللہ تعالیٰ پر چھوڑ دیا ہے۔

ان کا کہنا تھا کہ نواز شریف نے اس ملک سے لوڈشیڈنگ کے اندھیرے ختم کر دیے تھے لیکن آج بجلی نہیں آتی بلکہ بڑے بڑے بل آتے ہیں۔

انہوں نے کہا کہ عمران خان کی نالائقی، کرپشن اور نااہلی کی وجہ سے روزانہ قیمتیں بڑھ رہی ہیں۔ یوٹیلٹی سٹورز پر بھی چینی، گھی اور آٹا کی قیمتیں بڑھ گئی ہیں۔

پاکستان نے افغانستان کے حوالے سے اسلام آباد میں شیڈول امن کانفرنس کو ملتوی کرنے کا اعلان کردیا۔

ترجمان دفتر خارجہ زاہد حفیظ چوہدری کی جانب سے جاری بیان میں کہا گیا کہ ‘افغان امن کانفرنس اسلام آباد میں 17 جولائی سے 19 جولائی 2021 کے درمیان شیڈول تھی’۔

انہوں نے کہا کہ ‘افغان امن کانفرنس کو عیدالاضحیٰ کے بعد تک ملتوی کردیا گیا ہے’۔

دفتر خارجہ کے مطابق ‘مذکورہ کانفرنس کی نئی تاریخوں کا اعلان بعد میں کیا جائے گا’۔

قبل ازیں گزشتہ روز ترجمان دفتر خارجہ زاہد حفیظ چوہدری نے صحافیوں کو ہفتہ وار بریفنگ کے دوران بتایا تھا کہ پاکستان 17 سے 19 جولائی تک افغانستان پر ‘امن کانفرنس’ کی میزبانی کرے گا اور اس حوالے سے افغان قیادت نے شرکت کی یقین دہائی کرا دی ہے۔

ان کا کہنا تھا کہ افغان قیادت اور دیگر رہنماؤں کو کانفرنس میں شرکت کی دعوت دی گئی ہے اور افغان قیادت نے کانفرس میں شرکت کی یقین دہانی بھی کروائی ہے۔

ان کا کہنا تھا کہ پاکستان ہمیشہ سے افغانستان میں دیرپا قیام امن و استحکام کا خواہاں رہا ہے، افغانستان میں سیکیورٹی کے معمولی خلا کو دہشت گرد عناصر اور دیگر قوتیں پاکستان کے خلاف استعمال کر سکتی ہیں۔

ترجمان دفتر خارجہ نے خبردار کرتے ہوئے کہا کہ پاکستان مزید افغان مہاجرین کی میزبانی کا متحمل نہیں ہو سکتا، خطے کے ربط، ترقی اور خوشحالی کے لیے پرامن افغانستان کلیدی اہمیت کا حامل ہے۔

اس سے قبل وزیر اعظم عمران خان نے سابق افغان صدر حامد کرزئی سے ٹیلی فونک رابطہ کرتے ہوئے انہیں افغانستان کے حوالے سے اپنے دیگر رہنماؤں کے ہمراہ پاکستان کے زیر اہتمام ہونے والی ایک بین الاقوامی کانفرنس میں شرکت کی دعوت دی تھی۔

وزیر اطلاعات فواد چوہدری نے کہا کہ وزیر اعظم نے حامد کرزئی کو یقین دلایا کہ پاکستان، ہمسایہ ملک میں امن کی بحالی کے لیے تمام تر کوششیں کرے گا۔

وزیر اعظم عمران خان نے چینی ہم منصب کو یقین دہانی کرائی ہے کہ داسو واقعے کی مکمل تحقیقات کی جائیں گی۔

وزیر اعظم آفس کے میڈیا ونگ سے جاری بیان کے مطابق وزیر اعظم عمران خان نے چینی وزیر اعظم لی کی چیانگ کے ساتھ ٹیلی فون پر گفتگو میں داسو میں پیش آنے والے واقعے میں چین کے شہریوں کے قیمتی جانی نقصان پر دلی تعزیت کا اظہار کیا۔

وزیر اعظم نے کہا کہ پاکستان کے عوام سوگوار خاندانوں کے غم اور پریشانی میں برابر کے شریک ہیں جبکہ حکومت زخمی چینی باشندوں کو بہترین طبی سہولیات فراہم کر رہی ہے۔

انہوں نے کہا کہ پاکستان میں مقیم چینی باشندوں اور مختلف منصوبوں اور اداروں میں کام کرنے والے کارکنوں کو تحفظ فراہم کرنا حکومت کی اولین ترجیح ہے اور یقین دلایا کہ داسو واقعے کی مکمل تحقیقات کی جائیں گی۔

عمران خان نے اس امر کا اعادہ کیا کہ پاکستان اور چین گہرے دوست ہیں اور ہماری دوستی وقت کی ہر آزمائش میں پورا اتری ہے۔

ان کا کہنا تھا کہ مخالف قوتوں کو پاکستان اور چین کے برادرانہ تعلقات کو نقصان پہنچانے کی اجازت نہیں دی جائے گی۔

واضح رہے کہ گزشتہ روز وفاقی وزیر اطلاعات و نشریات فواد چوہدری نے کہا تھا کہ داسو واقعے کی ابتدائی تفتیش میں بارودی مواد کے استعمال کی تصدیق ہوگئی ہے۔

سماجی رابطے کی ویب سائٹ ٹوئٹر پر بیان جاری کرتے ہوئے فواد چوہدری کا کہنا تھا کہ ’دہشت گردی سے انکار نہیں کیا جاسکتا، وزیر اعظم ذاتی طور پر اس حوالے سے تمام پیشرفت کی نگرانی کر رہے ہیں‘۔

ان کا کہنا تھا کہ ’اس سلسلے میں حکومت چینی سفارتخانے کے ساتھ قریبی رابطے میں ہے، ہم مل کر دہشت گردی کی لعنت سے لڑنے کے لیے پرعزم ہیں‘۔

قبل ازیں چین کی وزارت خارجہ کی ویب سائٹ پر ایک بیان کے مطابق وزیر خارجہ شاہ محمود قریشی نے اپنے چینی ہم منصب کو بتایا تھا کہ کوہستان میں داسو ہائیڈرو پاور پروجیکٹ کے قریب بس سانحے کی ابتدائی تفتیش کسی دہشت گردانہ حملے کا نتیجہ نہیں ہے۔

بیان کے مطابق چینی وزیر خارجہ نے سانحہ، دہشت گردی کا واقعہ ہونے کی صورت میں قصورواروں کو فوری طور پر گرفتار کرنے اور سخت سزا دینے پر زور دیا۔

خیال رہے کہ دو روز قبل خیبر پختونخوا کے ضلع اپر کوہستان میں داسو ہائیڈرو پاور پلانٹ کے قریب ’حملے‘ میں 9 انجینئرز، 2 فرنٹیئر کور (ایف سی) اہلکاروں سمیت 12 افراد ہلاک اور متعدد زخمی ہوگئے تھے۔

عہدیداروں کی ابتدائی اطلاعات میں تضاد نظر آیا تاہم وزیر اعظم کے مشیر برائے پارلیمانی امور بابر اعوان نے قومی اسمبلی میں خطاب کرتے ہوئے اسے ایک ‘بزدلانہ حملہ’ قرار دیا اور کہا تھا کہ اس سے ’پاکستان اور اس کے ہمسایہ ممالک کے درمیان خصوصی اقدامات سے توجہ نہیں ہٹ سکتی ہے‘۔

کئی گھنٹوں بعد دفتر خارجہ نے حملے کی خبروں کی تردید کرتے ہوئے کہا کہ بس ‘تکنیکی خرابیوں‘ کے باعث کھائی میں گر گئی، جس کے نتیجے میں گیس کا اخراج ہوا جس سے دھماکا ہوا‘۔

تاشقند: ڈی جی انٹر سروسز انٹیلی جنس (آئی ایس آئی) لیفٹیننٹ جنرل فیض حمید نے افغانستان کی طرف سے پاکستان پر عائد کیے جانے والے الزامات کو مسترد کردیا۔

ایک نجی ٹی وی سے غیر رسمی گفتگو کرتے ہوئے ڈی جی آئی ایس آئی لیفٹیننٹ جنرل فیض حمید نے کہا کہ افغانستان کی طرف سے پاکستان پرلگائے جانے والے الزامات درست نہیں، پاکستان کی طرف سے افغانستان میں کوئی دراندازی نہیں ہورہی، حقیقت میں افغانستان کی طرف سے دراندازی ہورہی ہے۔

انہوں نے کہا کہ پاکستان افغانستان میں امن کا خواہش مند ہے ، پرامن اور مستحکم افغانستان ہی پاکستان اور دیگر ممالک کے مفاد میں ہے۔

ڈی جی آئی ایس آئی کا کہنا تھا کہ پاکستان افغانستان میں کسی دھڑے کی حمایت نہیں کررہا، پاکستان چاہتاہے کہ افغانستان میں تمام گروپوں میں مذاکرات کے نتیجے میں امن قائم ہو۔

اسلام آباد: ای سی سی اجلاس میں آٹے کا تھیلا 150 روپے، چینی 17 روپے اورگھی کی فی کلوقیمتوں میں 90 روپے اضافے کی منظوری دے دی۔

وزیرخزانہ شوکت ترین کی زیرصدارت ای سی سی اجلاس میں اشیائے خوردونوش مہنگی کرنے کی منظوری دی گئی۔ چینی کی فی کلوقیمت میں 17 روپے کا اضافہ کردیا گیا، یوٹیلٹی اسٹور پر چینی 68 روپے کے بجائے 85 روپے کلو دستیاب ہوگی، اسی طرح 20 کلو آٹے کا تھیلا مزید 150 روپے مہنگا کردیا گیا، 20 کلو آٹے کا تھیلا 800 روپے سے بڑھا کر950 روپے میں فروخت کیا جائے گا۔

ای سی سی اجلاس میں فی کلوگھی کی قیمت میں 90 روپے کا اضافہ کیا گیا۔ 170 روپے کلو ملنے والا گھی اب 260 روپے فی کلو دستیاب ہوگا۔

دوسری جانب شہریوں کا کہنا ہے حکومت نے غریب عوام کا خون چوس لیا، مہنگائی کے باعث دو وقت کی روٹی مشکل ہو گئی ہے۔

علاوہ ازیں اجلاس میں دو لاکھ کاٹن بیلز کی درآمد اور دو لاکھ ٹن چینی کی درآمد کی بھی منظوری دے دی گئی۔

اسلام آباد: سربراہ این سی اوسی اسد عمر کا کہنا ہے کہ بھارتی ویرینٹ پاکستان میں پھیلنے کا خدشہ ہے اور یہ قسم دنیا کی سب سے خطرناک قسم ہے۔

معاون خصوصی صحت فیصل سلطان کے ہمراہ پریس کانفرنس کرتے ہوئے سربراہ این سی اوسی اسد عمر کا کہنا تھا کہ ملک میں 18سال سے زائد عمر کے ساڑھے 12 کروڑ سے زائد لوگ ہیں، ابھی تک 2 کروڑ 21 لاکھ ویکسین کی خوراکیں لگ چکی ہیں، اور 4 دنوں سے یومیہ ویکسینیشن کی تعداد 5 لاکھ سے زیادہ ہے۔

وفاقی وزیر نے کہا کہ پاکستان میں ویکسینیشن کرانے والوں کی تعداد انتہائی قلیل ہے، پاکستان میں ، ویکسین نہ لگوانے والے 333 افراد میں ایک شخص کو کورونا ہوا، جب کہ ویکسین کی ایک ڈوز لگوانے والے1250 لوگوں میں ایک شخص کو کورونا ہوا، آپ نے ویکسین نہیں لگوائی تو آپ کو 4 گنا زیادہ خطرہ ہے، سائنسدان فلسفے کی بنیاد پر نہیں حقائق کی بنیاد پر خبردار کررہے ہیں۔

سربراہ این سی او سی کا کہنا تھا کہ کورونا کی بھارتی قسم دنیا کی سب سے خطرناک قسم ہے، جو تیزی سے پھیلتی ہے، بھارتی قسم کے وائرس نے پورے خطے میں تباہی مچائی اور پاکستان میں بھارتی ویرینٹ پھیلنے کا خدشہ ہے، عوام سے ویکسین لگوانے کی درخواست ہے، عید کی چھٹیوں میں احتیاط کی ضرورت ہے، جن لوگوں نے ویکسین نہیں لگوائی وہ سیاحتی مقامات کی طرف نہ جائیں، ویکیسن لگوانے والوں کورونا سے محفوظ ہیں اور انہیں کورونا ہونے پر زیادہ خطرہ نہیں ہوتا۔

معاون خصوصی صحت فیصل سلطان کا کہنا تھا کہ ملک میں کورونا مثبت کیسز کی شرح میں اضافہ ہوا ہے اور روزانہ ڈھائی ہزار کے قریب نئے کیسز سامنے آرہے ہیں، قومی سطح پر کورونا پھیلنے کی شرح 6 فیصد سے بڑھ گئی ہے، گلگت میں 22 اور کراچی میں کورونا پھیلنے کی شرح 20 فیصد ہوگئی ہے، ملک بھر میں 1900 افراد کی حالت تشویشناک ہے۔

معاون خصوصی صحت نے کہا کہ بھارتی ڈیلٹا پھیلنے کی شرح تیزی سے بڑھ رہی ہے، بھارتی قسم کا پھیلاؤ زیادہ تیزی سے پھیلتا ہے، ہمسایہ ممالک میں وائرس کے پھیلاؤ سے اندازہ لگایا جاسکتا ہے، ویکسین نہ لگوانے والوں میں کورونا کے حملے کا خطرہ 7 گنا زیادہ ہے۔

اسلام آباد کے سیکٹر ایچ 13 میں پانی کیلئے کھدائی کے دوران مبینہ طور پر زمین سے تیل نکل آیا،درجن بھر رہائشیوں نے کھدائی کر کے پائپ لگائے اور تیل نکال کر پمپ لگا کر بیچنا شروع کر دیا ۔

میڈیا رپور ٹ کے مطابق خریدنے والوں کے مطابق وہ تیل جلتا ہے یعنی پکانے کے کام تو ضرور آتا ہے۔ڈپٹی کمشنر اسلام آباد حمزہ شفقات نے بتایا کہ گھروں میں قائم ایسے تمام عارضی پمپ سیل کر دئیے گئے ہیں اور تیل کے نمونے آئل اینڈ گیس ریگولیٹری اتھارٹی (اوگرا) کو بھیج دئیے گئے ہیں، سیکٹر ایچ تیرہ میں تھانہ شمس کالونی کی حدود میں چند شہریوں کی جانب سے پانی کے لئے بورنگ کے دوران 450 فٹ کی گہرائی پر تیل نکلا تو مقامی افراد نے 12سے 14 مقامات پر بورنگ کر لی، ان افراد نے تیل نکال کر ڈرموں میں بھر رکھا تھا اور اسے بیچ بھی رہے تھے ۔

اسسٹنٹ کمشنر پوٹھوہار عبداللہ خان کی سربراہی میں انتظامیہ کی ٹیم نے جمعرات کو کارروائی کر کے تمام ایسے کنویں سیل کر دئیے اور 2500 لٹرز کی کئی ٹینکیاں ضبط کر لیں،میڈیا سے گفتگو میں عبداللہ خان کا کہنا تھا کہ نکلنے والے تیل کی بو مٹی کے تیل یا ڈیزل سے ملتی جلتی ہے ۔ تاہم وزرات پٹرولیم اور اوگرا کو نمونے بھیج دئیے گئے ہیں،ان کا کہنا تھا کہ اس جگہ سے تیل نکلنے کی تین توجیہات ممکن ہیں، ایک تو قریب ہی کیرج فیکٹری ہے وہاں سے کوئی لیکیج زمین میں شامل ہو سکتی ہے ، دوسرا مقامی آبادی کے مطابق یہاں تقسیم سے قبل کوئی برطانوی آئل کمپنی کام کر رہی تھی اس کا ڈپو تھا شاید اس کا اثر زیر زمین ہو اور تیسرا وزرات پٹرولیم کے مطابق پورے پوٹھوہار کے علاقے میں تیل موجود ہے ہوسکتا ہے یہاں بھی تیل ہو تاہم وہ کمرشل استعمال کیلئے موزوں نہیں ہے ۔

ڈی سی اسلام آباد کے مطابق یہ کہانی ڈیڑھ دو ماہ سے چل رہی ہے ، پہلے بھی تیل ہم نے ٹیسٹ کروایا تاہم متعلقہ حکام کا کہنا تھا کہ یہ ان کے کام کا نہیں ہے ،انہوں نے کہا کہ چھوٹی عید سے قبل بھی یہاں لوگوں نے ڈرم بھرنے شروع کر دئیے تھے مگر انتظامیہ نے اس جگہ پر ریت ڈلوا کر کمرہ بنوا دیا تھا،اے سی پوٹھوہار کے مطابق لوگوں نے یہاں موٹرز لگا کر باقاعدہ اپنے گھروں کو پٹرول پمپ کا درجہ دے رکھا تھا اور بجلی کے غیر قانونی کنکشنز بھی لگا رکھے تھے جنہیں گزشتہ روز کاٹ دیا گیا ہے ، موقع سے دو افراد کو حراست میں بھی لیا گیا ہے اور دفعہ 144 لگا دی گئی ہے ۔

سینیٹ اجلاس میں اپوزیشن کے احتجاج کے باوجود بجلی کی پیداوار، ترسیل اور تقسیم کی ریگولیشن میں ترمیم کا بل منظور کرلیا گیا۔

سینیٹ اجلاس کے دوران نیپرا بل پیش کیا گیا جس کو ایجنڈا میں شامل نہ کیے جانے پر اپوزیشن نے شدید احتجاج کیا۔

بل میں کہا گیا کہ صارفین کے مفاد میں نیپرا بجلی کی ترسیل سے وابسطہ پبلک سیکٹر لائسنس یافتہ کمپنی کے لیے یکساں ٹیرف مقرر کرے گی۔

یہ بھی بتایا گیا کہ منظور شدہ ٹیرف یا یکساں ٹیرف کے حوالے سے نوٹی فکشن 30 روز کے اندر جاری کیا جائے گا اور اگر وفاقی حکومت نیپرا کے مقرر کردہ ٹیرف کا نوٹی فکشن مقررہ وقت میں جاری نہیں کرتی یا نظر ثانی کا نہیں کہتی تو نیپرا اپنی سفارش کے فوری اطلاق کی تجویز دے سکتا ہے جس پر وفاقی حکومت 30 روز کے اندر نیپرا کو ٹیرف پر نظر ثانی کا کہہ سکتی ہے۔

علاوہ ازیں یہ بھی کہا گیا کہ نیپرا سہ ماہی بنیاد پر منظور شدہ ٹیرف میں ایڈجسمنٹ کر سکتی ہے جس پر وفاقی حکومت 15 روز کے اندر نظرثانی کی ہدایت دے سکتی ہے۔

یہ ایڈجسمنٹ ٹرانسمیشن چارجز، تقسیم کے نقصانات، مرمت کی مد میں کی جا سکتی ہے، نیپرا ماہانہ بنیاد پر فیول چارجز کی مد میں منظور شدہ ٹیرف میں ایڈجسمنٹ کر سکتی ہے۔

اس حوالے سے قائمہ کمیٹی کی رپورٹ میں کہا گیا کہ ملک بھر میں بجلی کے یکساں ٹیرف کا نفاذ ہو گا، ملک بھر میں مختلف ٹیرف وصول نہیں کیے جائیں گے۔

بل پر بات کرتے ہوئے پیپلز پارٹی کے سینیٹر رضا ربانی نے کہا کہ بل کے مطابق اتھارٹی خود سے نوٹی فکشن جاری کر دے گی، یہ بین الاقوامی مالیاتی اداروں کے ایما پر کیا جا رہا ہے۔

ان کا کہنا تھا کہ نوٹی فکشن کا حق صرف وفاقی حکومت کے پاس رہنا چاہیے۔

مجرمانہ معاملات پر باہمی قانونی تعاون کا ترمیمی بل منظور
علاوہ ازیں اجلاس کے دوران مجرمانہ معاملات پر باہمی قانونی تعاون کا ترمیمی بل اپوزیشن کی مخالفت کے باوجود کثرت رائے سے منظور کرلیا گیا۔

سینیٹ میں پیش کیے گئے اس ترمیمی بل پر جماعت اسلامی سے تعلق رکھنے والے سینیٹر مشتاق احمد نے ترامیم پیش کرتے ہوئے کہا کہ ‘ہم بھی چاہتے ہیں ملک ایف اے ٹی ایف کی گرے لسٹ سے نکال جائے لیکن غلامانہ قانون سازی نہیں ہونی چاہیے’۔

ان کا کہنا تھا کہ ‘آئین اور بنیادی حقوق کے خلاف قانون سازی نہیں ہونی چاہیے، حکومتی ترمیم کے تحت آپ نوٹس دیے بغیر کسی کو اٹھا لیں گے’۔

انہوں نے کہا کہ ‘ریاست کو اغوا کار، ڈاکو بنایا جارہا ہے اور اس کے ذریعے شکیل آفریدی، کلبھوشن یادیو کے لیے راہ ہموار کی جارہی ہے’۔

ان کا کہنا تھا کہ ‘میں ترمیم پیش کرتا ہوں کہ کسی پاکستانی کو بغیر نوٹس گرفتار نہ کیا جائے اور نہ ہی کسی کے حوالے کیا جائے’۔

تاہم ان کی ترمیم کثرت رائے سے مسترد کردی گئی۔

بعد ازاں سینیٹر مشتاق احمد بل کی منظوری کے بعد ایوان سے واک آوٹ کر گئے۔

مجرمانہ معاملات پر باہمی قانونی تعاون کے ترمیمی بل میں کہا گیا کہ ‘جرم سے مراد وہ جرم ہے جو تعزیرات پاکستان یا کسی اور قانون کے تحت قابل سزا ہو یا اُس ملک کے قانون کے تحت قابل سزا ہو جس سے باہمی قانونی تعاون کیا جا رہا ہے’۔

اس کے ساتھ ہی کہا گیا کہ ‘باہمی قانونی تعاون کی تمام درخواستوں پر مرکزی اتھارٹی تیزی سے عملدرآمد اور فیصلہ کرے گی اور قانون سے وہ دفعات حذف کر دیئے جائیں گے جس کے مطابق وفاق صوبے یا مقامی اتھارٹی سے وسائل پر اضافی بوجھ کے باعث قانونی معاونت سے انکار کر سکتے ہیں’۔

جعلی شناختی کارڈز کے اجرا پر توجہ دلاؤ نوٹس
اجلاس کے دوران کالعدم تنظیموں اور غیر ملکیوں کو نادرا کی جانب سے جعلی شناختی کارڈز کے اجرا پر متحدہ قومی موومنٹ (ایم کیو ایم) کے سینیٹر فیصل سبزواری نے توجہ دلاؤ نوٹس دیتے ہوئے کہ وفاقی تحقیقاتی ایجنسی (ایف آئی اے) کے ڈائریکٹر جنرل (ڈی جی) سندھ نے انکشاف کیا ہے کہ سندھ میں 50 فیصد نادرا اہلکاروں اور افسران نے جعلی شناختی کارڈز بنائے ہیں۔

ان کا کہنا تھا کہ ‘این ڈی ایس، دشمنی ایجنسی، کالعدم تنظیموں کے جعلی شناختی کارڈز بنائے گئے ہیں اور 30 سے 40 لاکھ غیر ملکیوں کے شناختی کارڈز بنائے گئے ہیں’۔

انہوں نے حکومت سے مطالبہ کیا کہ نادرا کے ان افراد کو بے نقاب کیا جائے اور برطرف کیا جائے جن لوگوں نے یہ کارڈ بنائے ہیں اور جعلی شناختی کارڈز بلاک کیے جائیں۔

اس پر حکومتی بینچز سے علی محمد خان نے جواب دیتے ہوئے کہا کہ ڈی جی کا بیان ان کی زبان پھسلنا بھی ہو سکتا ہے، معلوم نہیں ایک ذمہ دار شخص ایسا بیان کیسے دے سکتا ہے۔

ان کا کہنا تھا کہ ‘سندھ میں 40 لاکھ جعلی شناختی کارڈز کی بات کی گئی، ہمارے ریکارڈ کے مطابق 2018 سے اب تک کراچی میں 5 لاکھ اور سندھ میں 23 لاکھ سے زائد شناختی کارڈز جاری کیے گئے ہیں’۔

انہوں نے کہا کہ ‘کیسے ممکن ہے کہ 40 لاکھ جعلی شناختی کارڈ جاری ہوں جب کہ مجموعی 29 لاکھ شناختی کارڈز جاری کئے گئے ہیں تاہم پھر بھی غلط کام ہوئے ہیں’۔

ان کا مزید کہنا تھا کہ نادرا سندھ کے 39 ملازمین کو معطل کیا گیا، علاقائی ڈی جی کو او ایس ڈی بنایا گیا اور 10 افراد کے خلاف ایف آئی آر درج کی گئی ہیں۔

بعد ازاں ڈپٹی چیئرمین سینیٹ مرزا آفریدی نے معاملے کو متعلقہ قائمہ کمیٹی کے سپرد کر دیا۔

اراکین پارلیمان کی تنخواہ اور الاؤنسز ترمیمی ایکٹ منظور
سینیٹ اجلاس کے دوران اراکین پارلیمان کی تنخواہ اور الاؤنسز کے حوالے سے ترمیمی ایکٹ منظور بھی کر لیا گیا۔

اس ایکٹ میں کہا گیا کہ اجلاس میں شرکت کے لیے سفر کرنے والے سینیٹر سفری الاؤنس کے مستحق ہیں جنہیں ریل کے سفر کی صورت میں ائیر کشنڈ کلاس کے کرا ئے کے برابر رقم ملے گی اور جہاز سے سفر پر بزنس کلاس کا سفری الاؤنس دیا جائے گا چاہے وہ جس روٹ پر سفر کر رہے ہوں اس پر بزنس کلاس کی سہولت میسر ہو یا نہیں۔

اس کے علاوہ اراکین سینیٹ کے سڑک پر سفر کی صورت میں 25 روپے فی کلومیٹر الاونس دیا جائے گا، ہر رکن بزنس کلاس کے 25 رٹرن ٹکٹ یا اس کے برابر مالیت کے سفری واؤچرز کا مستحق ہوگا اور جس روٹ پر پی آئی اے کی پروازیں نہ ہوں تو رکن پندرہ لاکھ روپے کے واؤچرز یا برابر مالیت کی نقد کا مستحق ہو گا۔

اس حوالے سے سینیٹ میں اظہار خیال کرتے ہوئے سینیٹر سرفراز بگٹی کا کہنا تھا کہ اس بل میں تنخواہوں میں اضافہ کی تجویز نہیں۔

ان کا کہنا تھا کہ موجودہ حالات میں تنخواہوں میں اضافہ مناسب نہیں، اس بل کا مقصد محض طریقہ کار کو آسان کو بہتر بنانا ہے۔

پاکستان نے افغان نائب صدر امر اللہ صالح کے ان الزامات کی تردید کردی کہ پاک فضائیہ نے اسپن بولدک کی سرحدی گزرگاہ سے طالبان کو پیچھے دھکیلنے کی کسی بھی کارروائی پر افغان سیکیورٹی فورسز کو باضابطہ وارننگ دی ہے۔

ایک بیان جاری کرتے ہوئے ترجمان دفتر خارجہ زاہد حفیظ چوہدری نے کہا کہ اس طرح کے الزامات جنگ زدہ افغانستان میں افغان سربراہی اور افغانوں پر مشتمل حل میں کردار ادا کرنے کی پاکستان کی مخلصانہ کوششوں کو مجروح کررہے ہیں۔

واضح رہے کہ امر اللہ صالح نے ایک ٹوئٹ میں الزامات لگاتے ہوئے دعویٰ کیا تھا کہ پاک فضائیہ کچھ علاقوں میں طالبان کو فضائی مدد فراہم کررہی ہے۔

انہوں نے اپنے ٹوئٹر پیغام میں لکھا تھا کہ ‘بریکنگ: پاک فضائیہ نے افغان فوج اور فضائیہ کو باضابطہ انتباہ جاری کیا ہے طالبان کو اسپن بولدک کے علاقے سے نکالنے کی کسی بھی کوشش کا سامنا پاک فضائیہ کرے گی اور اسے پسپا کردے گی۔

انہوں نے الزام عائد کیا کہ پاک فضائیہ کچھ علاقوں میں طالبان کو قریبی فضائی امداد فراہم کررہی ہے۔

ایک علیحدہ ٹوئٹ میں انہوں نے کہا کہ ‘اگر کسی کو پاک فضائیہ اور پاک فوج کی جانب سے افغان فوج کو اسپن بولدک دوبارہ حاصل کرنے کے حوالے سے دی گئی وارننگ پر شک ہے تو میں ڈائریکٹ میسج کے ذریعے شواہد فراہم کرنے کو بھی تیار ہوں۔

ترجمان دفتر خارجہ نے ان الزامات کو مسترد کرتے ہوئے کہا کہ افغانستان کی جانب سے پاکستان کو چمن سرحد سے متصل افغان علاقے میں فضائی آپریشن کرنے کے ارادے کے بارے میں بتایا گیا تھا۔

بیان میں کہا گیا کہ ‘پاکستان نے افغان حکومت کے ان کے اپنے علاقے میں کارروائی کے حق پر مثبت ردِ عمل دیا تھا تاہم سرحد کے انتہائی قریب کارروائی کی عموماً عالمی سطح پر تسلیم شدہ اقدار اور قواعد و ضوابط کے تحت اجازت نہیں دی جاتی البتہ پاکستان نے اپنے فوجیوں اور آبادی کے تحفظ کے لیے سرحدی حدود کے اندر ضروری اقدامات کئے ہیں’۔

ترجمان کا کہنا تھا کہ پاکستان، افغان حکومت کے اس کے خودمختار علاقے میں کارروائی کے حق کو تسلیم کرتا ہے۔

بیان میں ترجمان دفتر خارجہ نے یاد دہانی کروائی کہ پاکستان نے حال ہی میں 40 افغان نیشنل ڈیفنس فورسز کے اہلکاروں کو ریسکیو کیا جو ملک میں بھاگ کر آگئے تھے۔

بیان میں کہا گیا کہ ان اہلکاروں کو ‘عزت و احترام’ اور درخواست کے مطابق اے این ایس ایف کو تمام لاجسٹک سپورٹ فراہم کرنے کے لیے ایک پیش کش کے ساتھ افغان حکومت کے حوالے کیا گیا۔

بیان میں کہا گیا کہ پاکستان، ‘افغانستان میں امن کے لیے پر عزم ہے اور رکاوٹوں کے باجود اس مقصد کی جانب کوششیں جاری رکھے گا’۔

بیان میں مزید کہا گیا کہ ‘تاہم یہ ضروری ہے کہ اس اہم موقع پر تمام تر توانائیاں افغانستان میں شراکتی، وسیع بنیاد اور جامع سیاسی حل کے لیے صرف کی جائیں’۔

خیال ہے کہ یہ پیش رفت ایسے وقت میں سامنے آئی ہے کہ جب 2 روز قبل طالبان کی جانب سے پاک افغان سرحدی گزرگاہ پر قبضے کی رپورٹس کے پیش نظر اسپن بولدک میں باب دوستی بند کردیا گیا تھا۔

تاہم جمعرات کے روز سرحدی گزرگاہ 3 گھنٹے کے لیے کھولی گئی تھی اور حکام کے مطابق سرحد انسانی ہمدردی کی بنیاد پر دونوں اطراف پھنسے شہریوں کی وطن واپسی کے پیش نظر کھولی گئی تھی۔

افغان نائب صدر کے الزامات اور پاکستان کی جانب سے اس کی تردید اسلام آباد کی میزبانی میں 3 روزہ افغان امن کانفرنس سے ایک روز قبل سامنے آئی ہے۔

اس ضمن میں وزیراعظم عمران خان نے سابق افغان صدر حامد کرزئی اور دیگر رہنماؤں کو مدعو کیا تھا تاہم طالبان کو اس میں شرکت کی دعوت نہیں دی گئی۔

ترجمان دفتر خارجہ نے ایک بیان میں واضح کیا تھا کہ مدعو کیے گئے افراد میں طالبان شامل نہیں ہیں کیونکہ وہ متعدد مرتبہ پاکستان آچکے ہیں اور امن عمل پر بات کرچکے ہیں۔

گوجرانوالہ: قومی کرکٹ ٹیم کے فاسٹ بالر حسن علی کے بھائی خرم شہزاد کو پولیس نے گرفتار کرلیا ہے۔

پولیس کے مطابق ملزم خرم شہزاد کو سول جج رانا آصف مصطفی کی عدالت میں پیش کر کے پولیس نے ملزم کا ایک روزہ جسمانی ریمانڈ حاصل کرلیا ہے، ملزم خرم شہزاد تھانہ لدھے والا وڑائچ پولیس کو مقدمہ نمبر 719/20 میں مطلوب تھا۔

خیال رہے کہ حسن علی کے بھائی خرم شہزاد اور صنم لڑائی جھگڑے اور دیگر دفعات میں گزشتہ ایک سال سے اشتہاری تھے۔