Category تازہ ترین

وفاقی وزیر منصوبہ بندی و نیشنل کمانڈ اینڈ آپریشن سینٹر (این سی او سی) کے سربراہ اسد عمر نے خبردار کیا ہے کہ اگر درست فیصلے نہ کیے گئے تو پاکستان کو کورونا کے حوالے سے بھارت جیسی صورتحال کا سامنا کرنا پڑ سکتا ہے۔

حکام کی جانب سے عالمی وبا کورونا وائرس کی چوتھی لہر کا خدشہ ظاہر کرنے کے ساتھ عوام پر وائرس سے بچاؤ کی احتیاطی تدابیر اپنانے اور ویکسین لگوانے کے لیے زور دیا گیا تھا۔

تاہم ملک میں وبا کے پھیلاؤ میں تیزی دیکھنے میں آئی ہے اور گزشتہ 24 گھنٹوں میں رپورٹ ہونے والے کیسز کی تعداد 2 ہزار 545 رہی۔

وائرس کی تشخیص کے لیے گزشتہ 24 گھنٹوں میں 48 ہزار 910 ٹیسٹ کیے گئے جس کے نتیجے میں 5.2 فیصد مثبت کیسز آئے اور مزید 47 افراد انتقال بھی کر گئے۔

ملک میں گزشتہ 24 گھنٹوں میں سب سے زیادہ کیس سندھ میں ریکارڈ کیے گئے جن کی تعداد ایک ہزار 420 رہی اور 26 مریض انتقال کر گئے، یومیہ کیسز کی یہ تعداد 23 مئی کے بعد سب سے زیادہ ہے۔

رپورٹ کے مطابق سندھ میں کورونا کے پھیلاؤ میں تیزی کے پیشِ نظر صوبائی حکومت نے اِن ڈور ڈائننگ، اول سے ششم جماعت تک کے طلبہ کے لیے اسکول، تفریحی مقامات بشمول سی ویو، ہاکس بے، کینجھر جھیل، سوئمنگ پولز اور اِن ڈور جمز پیر (19 جولائی) سے بند کرنے کا اعلان کیا ہے۔

تاہم جن اسکولوں میں امتحانات جاری ہیں وہ معمول کے مطابق اپنے افعال سرانجام دیں گے۔

ملک کے دیگر حصوں میں گزشتہ روز رپورٹ ہونے والے کیسز کی صورتحال درج ذیل ہے:

پنجاب: 286 کیسز، 13 اموات

خیبر پختونخوا: 250 کیسز، 6 اموات

بلوچستان: 154 کیسز

اسلام آباد: 127 کیسز، ایک موت

آزاد کشمیر: 89 کیسز، ایک موت

گلگت بلتستان: 119 کیسز

ویکسینیشن ریکارڈ سے متعلق مسائل کے حل کیلئے پورٹل کا اجرا
این سی او سی نے ایک پورٹل کا اجرا کیا ہے تاکہ ویکسین لگوانے والے وہ افراد جو رجسٹرڈ نہیں ہوسکے یا ویکسی نیشن سرٹیفکیٹس حاصل نہیں کر پارہے، ان کی شکایات کو حل کیا جاسکے۔

این سی او سی نے ایک ٹوئٹ میں بتایا کہ پورٹل، ویکسی نیشن ریکارڈ یا سرٹیفکیٹ سے متعلق مسائل کے حل کے لیے متعارف کروایا گیا ہے، اب شہری https://nims.nadra.gov.pk/nims/registerComplaint پر اپنی شکایات درج کروا سکتے ہیں۔

دوسری جانب اسد عمر نے ٹوئٹر پر ایک تصویر شیئر کر کے دعویٰ کیا کہ بھوک کے بحران نے بھارت کے متوسط طبقے کو بھی راشن لائنز میں کھڑا کردیا ہے اور لاکھوں افراد نے دیکھا کہ گزشتہ 12 ماہ میں ان کا معاشی استحکام ختم ہوگیا ہے۔

انہوں نے عوام پر زور دیا کہ سختی سے ایس او پیز پر عمل کیا جائے۔

اپنی ٹوئٹ میں اسد عمر کا کہنا تھا کہ ’اگر آپ صحیح وقت پر درست فیصلے نہیں کرتے ہیں تو یہ کووڈ تباہی کا سبب بن سکتا ہے، اس سے ظاہر ہوتا ہے کہ کروڑوں کمزور افراد پر بھارت کے شدید لاک ڈاؤن کے پڑنے والے اثرات اب بھی جاری ہیں‘۔

دوسری جانب این سی او سی نے بھی ٹوئٹ کے ذریعے عوام پر ایس او پیز پر عملدرآمد کے لیے زور دیا۔

این سی او سی کی ٹوئٹ میں کہا گیا کہ ’ایس او پیز پر عملدرآمد اور بروقت ویکسی نیشن ہی وہ واحد راستہ ہے جس سے اپنے آپ کو کورونا وائرس سے بچایا جاسکتا ہے، ماسک پہنیں، سماجی فاصلہ برقرار رکھیں اور اپنے آپ کو ویکسین لگوائیں۔

اسلام آباد: موٹروے پولیس نے ایمانداری کی روایت برقراررکھتے ہوئے ایک کروڑچالیس لاکھ روپے کی رقم مالک کے حوالے کردی۔

ترجمان موٹروے پولیس کے مطابق پرائیویٹ کار میں ابراہیم نامی شخص اسلام آباد سے براستہ موٹروے پشاور سفر کررہا تھا، کرنل شیر خان انٹرچینج کے قریب گاڑی کو حادثہ پیش آیا، حادثے کا شکار ہونے والی گاڑی کا ڈرائیور محفوظ رہا لیکن ذہنی طور پر شدید صدمے میں چلا گیا۔

امدادی کاروائیوں کے دوران ڈرائیور نے موٹروے پولیس کو بتایا کہ اس کے پاس ایک کروڑ 40 لاکھ روپے موجود ہیں، موٹروے پولیس نے رقم کو حفاظتی تحویل میں لیتے ہوئے ڈرائیور کو اسپتال منتقل کیا جہاں علاج معالجہ کے بعد ڈرائیور کو فارغ کردیا گیا، جس پر موٹروے پولیس نے گاڑی سے ملنے والی ایک کروڑ 40 لاکھ روپے کی رقم اس کے حوالے کردی، رقم کی واپسی پر شہری نے موٹروے پولیس کے کردار کی تعریف کی اور شکریہ ادا کیا۔

پاکستان مسلم لیگ (ن) کی نائب صدر مریم نواز کا کہنا ہے کہ ’عمران خان کی 22 سالہ جدوجہد کا اختتام ان کے ماتھے پر اسٹیبلشمنٹ کا گھوڑا ہونے کا دھبہ لگوانے کے ساتھ ہوا۔

آزاد کشمیر کے علاقے ہجیرہ میں عوامی جلسے سے خطاب کرتے ہوئے ان کا کہنا تھا کہ 22 سال کی جدوجہد کے بدلے بدنامی اور رسوائی کے یہ داغ، عمران خان یہ خسارے کا سودا ہے۔

ان کا کہنا تھا کہ ’عمران خان کو کہنا چاہتی ہوں کہ تم چاہے انتخابات چوری کرو، چاہے نواز شریف کے امیدوار بھگا کر لے جاؤ، چاہے ڈبوں میں بیٹھ جاؤ یا پورا الیکشن کمیشن اغوا کرلو، کشمیر اپنا فیصلہ سنا چکا ہے‘۔

انہوں نے کہا کہ ’کشمیر کا فیصلہ ہے نواز شریف، کان کھول کر سن لو یہاں آنے کی تکلف مت کرنا ورنہ یہ کشمیری جس طرح تمہارا استقبال کریں گے تم جانتے ہو‘۔

مریم نواز کا کہنا تھا کہ ’عمران اپنے لوگوں کو جھوٹی تسلی دے رہے تھے کہ میرے علاوہ سلیکٹرز کے پاس اور کوئی آپشن نہیں، شرم کی بات ہے آپ کو یہ اعتراف کرنا پڑ رہا ہے کہ تم عوام کی نہیں سلیکٹرز کی پسند ہو‘۔

ان کا کہنا تھا کہ ’عمران خان نے خود بتادیا کہ وہ عوام کے ووٹ سے نہیں، الیکشن چوری کرکے آئے ہیں، اس سے نواز شریف اور عمران خان میں فرق واضح ہوا‘۔

انہوں نے کہا کہ ’تم سلیکٹرز کے اشارے پر لٹو کی طرح گھومتے ہو اسی لیے ان کی پسند ہو اور نواز شریف وہ شیر ہے جس پر جب زیادتی ہوئی تو اس نے کہا جو مرضی کرلو نواز شریف جھکنے اور بکنے والا نہیں‘۔

لیگی رہنما کا کہنا تھا کہ ’7 دہائیوں میں عمران خان کی حکومت میں بھارت کو اتنی جرات ہوئی کہ ایک دستخط سے کشمیر کو پاکستان کی شہہ رگ سے کاٹ دیا، نواز شریف وزیر اعظم ہوتا تو بھارت کو کبھی اتنی جرات نہ ہوتی‘۔

ان کا کہنا تھا کہ ’تم چوائس اس لیے ہو کیونکہ تم ہر بات پر جھک جاتے ہو‘۔

انہوں نے کہا کہ ’نواز شریف کہا کرتے تھے اے طائر لاہوتی اس رزق سے موت اچھی جس رزق سے آتی ہو پرواز میں کوتاہی، اس کرسی سے موت اچھی جس پر عمران خان آج 22 سال کی جدو جہد کے بعد سر اٹھا کر چلنے کے قابل نہیں رہے‘۔

مریم نواز کا کہنا تھا کہ ’لوگ عمران خان کو 22 سال کی جدوجہد سے نہیں اسے کھٹپتلی وزیر اعظم کی حیثیت سے یاد رکھیں گے جو اشاروں پر ناچتا ہے‘۔

ان کا کہنا تھا کہ ’یہ سودا کرکے بھی تم یہ کہنے کے قابل نہیں کہ تمہارے ساتھ زیادتی ہو کیونکہ تمہارے راز ان کے پاس ہے اور ان کے راز تمہارے پاس ہیں، نواز شریف جیسی جرات رکھنا، استقامت رکھنا ہر کسی کے بس کی بات نہیں‘۔

انہوں نے کہا کہ ’جس کے خلاف گزشتہ 7 سے 8 سال سے تم سازش کرنے میں مصروف ہو، وہ نواز شریف مجبوری کے تحت لندن میں ہے لیکن ایک کے بعد ضمنی انتخابات میں اس نے تمہیں دن میں دکھادیے ہیں‘۔

مسلم لیگ (ن) کی نائب صدر کا کہنا تھا کہ ‘تمہارے ریاستی وسائل استعمال کرنے کے باوجود نواز شریف لندن سے ہی تمہارے گھر میں گھس کر تمہیں مارتا ہے‘۔

ان کا کہنا تھا کہ ’کشمیر کی ہر گلی میں نواز شریف کا نعرہ لگتا ہے، سازشوں سے حاصل کیا گیا اقتدار اقتدار نہیں شرمندگی، بدنامی ہوتی ہے‘۔

انہوں نے کہا کہ ’میں آپ کو خبردار کرنے آئی ہوں کہ عمران خان کشمیر میں اپنی حکومت اس لیے لانا چاہتا ہے کیونکہ وہ اسے صوبہ بنانا چاہتا ہے، میں آج یہ اعلان کرتی ہوں کہ بچہ بچہ کٹ مرے گا کشمیر صوبہ نہیں بنے گا‘۔

ان کا کہنا تھا کہ ’یہ سازش یہ کرچکے ہیں بس اس کا نفاذ باقی ہے، تم کون ہوتے ہو مقبوضہ کشمیر کو بھارت کی جھولی میں پھینکنے والے پھر آزاد کشمیر سے اس کی پہچان چھیننے والے‘۔

وزیر خارجہ شاہ محمود قریشی نے چین کے وزیر خارجہ اور اسٹیٹ کونسلر وانگ یی سے ملاقات کی اور داسو واقعے میں چینی انجینئروں کے جانی نقصان پر اظہار افسوس کیا۔

ترجمان دفترخارجہ کی جانب سےجاری بیان میں کہا گیا کہ وزیر خارجہ شاہ محمود قریشی نے دوشنبے میں شنگھائی تعاون تنظیم (ایس سی او) کے وزرائے خارجہ کونسل کے اجلاس کے موقع پر چین کے اسٹیٹ کونسلر اور وزیر خارجہ وانگ یی سے ملاقات کی۔

ان کا کہنا تھا کہ ملاقات میں پاکستان اور چین کے دوطرفہ تعلقات، سی پیک، باہمی دلچسپی کے علاقائی اور عالمی امور پر تبادلہ خیال کیا گیا۔

بیان میں کہا گیا کہ وزیر خارجہ شاہ محمود قریشی نے چینی وزیر خارجہ سے کوہستان کے علاقے داسو میں ڈیم منصوبے کے قریب پیش آنے والے بس حادثے اور چین کے شہریوں کے جانی نقصان پر اظہار تعزیت کیا۔

قبل ازیں خیبر پختونخوا کے ضلع اپر کوہستان میں داسو ہائیڈرو پاور پلانٹ کے قریب ’حملے‘ میں 9 انجینئرز، دو فرنٹیئر کور (ایف سی) اہلکاروں سمیت کم از کم 12 افراد ہلاک اور متعدد زخمی ہوگئے۔

وزیر خارجہ نے کہا کہ پاکستان اور چین ‘آئرن برادرز’ ہیں، ‘سدا بہار اسٹرٹیجک کوآپریٹو شراکت داری’ کے عظیم بندھن میں جڑے ہوئے ہیں اور ملاقات میں دونوں ممالک نے ایک دوسرے کے مفادات کے معاملات پر ایک دوسرے کی حمایت کی۔

شاہ محمود قریشی نے کہا کہ اعلیٰ سطح کے رابطے اور ملاقاتیں دونوں ممالک کی ‘فولادی دوستی’ کا طرہ امتیاز ہے، کورونا وبا کے دوران بھی دونوں ممالک کے قریبی رابطے، دوطرفہ تعلقات اور باہمی دلچسپی کے امور پر ہم آہنگی برقرار رہی۔

انہوں نے کہا کہ چین اور پاکستان کے تعلقات خطے اور دنیا میں امن، استحکام اور خوش حالی کی بنیاد ہیں، پاک-چین اقتصادی راہداری (سی پیک) دونوں ممالک کے لیے تبدیلی کا مظہر منصوبہ ہے۔

ان کا کہنا تھا کہ کورونا وبا کی مشکلات کے باوجود سی پیک کے منصوبے مستحکم رفتار سے آگے بڑھ رہے ہیں۔

دفترخارجہ کے مطابق وزیر خارجہ اور چینی ہم منصب نے افغانستان میں تازہ ترین صورت حال پر بھی تبادلہ خیال کیا۔

افغانستان کے حوالے سے بات کرتے ہوئے وزیر خارجہ شاہ محمود قریشی نے کہا کہ افغان تنازع کا سیاسی حل ناگزیر ہے۔

انہوں نے کہا کہ افغان تنازع کا مذاکرات کے ذریعے سیاسی تصفیے کے لیے پاکستان کی کوششوں سے آگاہ کیا اور کہا کہ اجتماعیت کے حامل، وسیع البنیاد اور جامع سیاسی تصفیے کے لیے تمام افغان فریقین مل کر کام کریں۔

ان کا کہنا تھا کہ پاکستان پرامن و مستحکم افغانستان کی حمایت جاری رکھے گا۔

دفترخارجہ کا کہنا تھا کہ شاہ محمود قریشی نے مقبوضہ جموں وکشمیر میں انسانی حقوق کی خلاف ورزیوں سے متعلق چینی وزیر خارجہ کو آگاہ کیا۔

ان کا کہنا تھا کہ جنوبی ایشیا میں پائیدار امن کے لیے تنازع جموں و کشمیر کا اقوام متحدہ کی سلامتی کونسل کی قرار دادوں کے مطابق حل ناگزیر ہے۔

خیال رہے کہ وزیرخارجہ شاہ محمود قریشی نے گزشتہ روز افغان ہم منصب سے بھی ملاقات کی تھی اور افغانستان میں سیاسی اقدامات پر زور دیا تھا۔

وزیرخارجہ نے کہا تھا کہ افغان قیادت کو اس تاریخی موقعے کو جانے نہیں دینا چاہیے اور افغان مسئلے کے حل کے لیے بین الاقوامی اتفاق رائے سے فائدہ اٹھاتے ہوئے واضح سیاسی حل کے لیے مل کر کام کرنا چاہیے۔

انہوں نے افغانستان میں بدترین کشیدگی پر تشویش کااظہار کیا تھا جس کے نتیجے میں انسانی جانوں کا ضیاع ہو چکا ہے۔

شاہ محمود قریشی نے زور دیا تھا کہ کشیدگی کم کرنے کے لیے فوری اقدامات کرنے کی ضرورت ہے اور مؤثر جنگ بندی کی جائے۔

وزیر اعظم کے مشیر برائے پارلیمانی امور بابر اعوان نے کوہستان حملے کی مذمت کرتے ہوئے کہا ہے کہ بزدلانہ حملوں کو ترقی کی راہ میں رکاوٹ بننے نہیں دیں گے۔

واضح رہے کہ خیبر پختونخواہ کے ضلع اپر کوہستان میں داسو ہائیڈرو پاور پلانٹ کے قریب ایک ’حملے‘ میں چھ چینی انجینئرز، دو فرنٹیئر کور اہلکاروں سمیت کم از کم 10 افراد ہلاک اور متعدد زخمی ہوگئے ہیں۔

قومی اسمبلی میں ڈپٹی اسپیکر قاسم سوری کی زیر صدارت اجلاس کے دوران خطاب کرتے ہوئے ڈاکٹر بابر اعوان نے کہا کہ ’ایک تو یہ بات واضح ہوجائے کہ سی پیک کے تمام منصوبوں کے افراد کو سیکیورٹی دی جائے گی‘۔

ان کا کہنا تھا کہ ’سی پیک ہمارے لیے بہت اہم ہے، شخصیات کے پروٹوکول اور سیکیورٹی میں فرق ہوتا ہے‘۔

انہوں نے کہا کہ ’بعض بیوروکریٹس تو ایسے ہیں جن کا پروٹوکول وزیر اعظم اور چیف جسٹس سے بھی زیادہ ہے‘۔

انہوں نے بتایا کہ آئندہ ہفتے کابینہ میں اہم شخصیات کی سیکیورٹی کا پلان پیش کیا جائے گا، پروٹوکول پر قوم کے ٹیکس کے پیسے لگ رہے ہیں۔

بابر اعوان کا کہنا تھا کہ وزیر اعظم عمران خان نے ایوان سے خطاب اور انٹرویو میں صاف کہہ چکے ہیں کہ امریکا کو اڈے نہیں دیں گے۔

ان کا کہنا تھا کہ ’وزیر اعظم نے کہا تھا کہ ہم امن میں ساتھ ہیں جنگ میں ساتھ نہیں‘۔

اہم شخصیات کی سیکیورٹی واپس لینا نامناسب ہے، احسن اقبال
اس موقع پر مسلم لیگ (ن) کے رہنما احسن اقبال نے کہا کہ داسو ڈیم کے نزدیک کام کرنے والے افراد پر آج صبح حملہ ہوا ہے جس میں غیر ملکی بھی ہلاک ہوئے ہیں۔

انہوں نے دعویٰ کیا کہ ’ہمارے ہوتے ہوئے پاک چین اقتصادی راہداری (سی پیک) کے کسی منصوبے کے ورکرز پر حملہ نہیں ہوا‘۔

انہوں نے وفاقی وزیر داخلہ سے سیکیورٹی صورتحال پر ایوان کو بریفنگ دینے کا مطالبہ کیا۔

ان کا کہنا تھا کہ ’اہم شخصیات کی سیکیورٹی واپس لی جارہی ہے، عوامی نیشنل پارٹی (اے این پی) کی قیادت جس پر بار بار حملے ہوچکے اس سے بھی سیکیورٹی واپس لے لی گئی ہے، اہم شخصیات کی سیکیورٹی واپس لینا نامناسب ہے‘۔

احسن اقبال کا کہنا تھا کہ ’اگر بطور سابق وزیر داخلہ میرے پاس سیکیورٹی نہ ہوتی اور سیکیورٹی اہلکار حملہ آور کو نہ پکڑتے تو نہ جانے کیا ہوتا‘۔

ذوالفقار علی بھٹو کی خدمات سے انکار نہیں کرسکتے، نوید قمر
قومی اسمبلی کے اجلاس میں پیپلزپارٹی کے سید نوید قمر نے اظہار خیال کرتے ہوئے کہا کہ کچھ ایسی ہستیاں ہیں جن کو تاریخی پہلو میں دیکھتے ہیں، جن میں قائداعظم، علامہ اقبال، ذوالفقار علی بھٹو جیسی شخصیات بھی شامل ہیں جن کی خدمات سے انکار نہیں کر سکتے۔

ان کا کہنا تھا کہ ایسی شخصیات کے بارے میں بات کرکے پاکستان اور پاکستانی تاریخ کی بے حرمتی کی جارہی ہے۔

انہوں نے کہا کہ ’ہمیں ایسی شخصیات کے بارے میں بات کرنے سے اجتناب کرنا چاہیے‘۔

دوسری جانب حکومتی بینچز سے راجا ریاض نے قومی اسمبلی ایوان میں ذوالفقار بھٹو کے خلاف وفاقی وزیر کے بیان پر بات کرتے ہوئے وفاقی وزیر کے بیان کی مذمت کی۔

ان کا کہنا تھا کہ ’وفاقی وزیر سے کہتا ہوں جو لوگ ذندہ ہیں ان کے بارے میں جو مرضی کہیں شہیدوں کو بیچ میں مت لائیں، ذوالفقار علی بھٹو شہید ہے اس نے عوام کا تحفظ کیا‘۔

پیپلز پارٹی کے مرتضیٰ جاوید عباسی نے اظہار خیال کرتے ہوئے کہا کہ ’جو ہماری لیڈر شپ کو چور کہے گا ہم اس کی لیڈر شپ کو بھی چور کہیں گے‘

ان کا کہنا تھا کہ ’ایبٹ آباد میں بارشوں سے قراقرم ہائی وے بند پڑی ہے، این ڈی ایم اے سے کہا جائے کہ وسائل کا استعمال کرتے ہوئے روڈ کی بحالی کو یقینی بنائے‘۔

گزشتہ روز کشمیر میں ایک جلسے سے خطاب رکتے ہوئے وفاقی وزیر کی جانب سے ذوالفقار علی بھٹو کے لیے غدار کا لفظ استعمال کرنے پر پیپلزپارٹی نے ایوان سے علامتی واک آؤٹ کیا۔

بعد ازاں پیپلزپارٹی کے یوسف تالپور نے ایوان میں کورم کی نشاندہی کی جس پر ڈپٹی اسپیکر قومی اسمبلی نے اراکین کی گنتی کی ہدایت جاری کی۔

کورم نامکمل نکلنے تک ڈپٹی اسپیکر نے کورم پورا ہونے تک اجلاس کی کاروائی معطل کر دی۔

اسلام آباد: رنگ روڈ اسکینڈل کی ابتدائی تحقیقاتی رپورٹ وزیراعظم کو پیش کردی گئی، ‏رپورٹ میں رنگ روڈ کی الا ئنمنٹ کی تبدیلی اور غیر قانونی پر دیا جانا ثابت ہو گیا ہے۔
تفصیلات کے مطابق ‏اینٹی کرپشن اسٹیبلشمنٹ پنجاب کی 6 رکنی مشترکہ تحقیقاتی ٹیم نے 21 ہزار صفحات کی چھان بین کی، جس کے بعد تحقیقاتی رپورٹ کو ڈی جی اینٹی کرپشن گوہر نفیس نے وزیراعظم عمران خان کو پیش کردیا ہے۔

ذرائع کے مطابق تحقیقاتی رپورٹ میں ‏ایک سو کےقریب افراد کے بیانات ریکارڈ کیے گئے، جب کہ رپورٹ ‏میں رنگ روڈ کی الائنمنٹ کی تبدیلی اور غیر قانونی ایوارڈ ہونا بھی ثابت ہوا، الائنمنٹ تبدیل کرنے کی منظوری صوبائی ڈیولپمنٹ بورڈ سے نہیں لی گئی۔

ابتدائی تحقیقاتی رپورٹ میں کابینہ کے کسی رکن کے ملوث ہونے کا ذکر نہیں ہے جب کہ اس اسکینڈل کی ابتدائی رپورٹ میں سیاسی شخصیات کو بھی کلیئر کردیا گیا ہے۔ رپورٹ کے مطابق رنگ روڈ منصوبے سے متعلقہ ہاؤسنگ سوسائیٹیز کی تحقیقات نیب کرے گا، جب کہ ‏اینٹی کرپشن پنجاب نے پراجیکٹ کے ڈپٹی پراجیکٹ ڈائریکٹر اور دیگر متعلقہ افراد کے خلاف مقدمہ درج کر لیا ہے۔

رپورٹ میں بتایا گیا ہے کہ ‏رنگ روڈ منصوبے میں وزیر اعظم کی ہدایات کی خلاف ورزی کی گئی اور پراجیکٹ ڈائریکٹر کا وزیراعلیٰ پنجاب سے ہدایات لینے کا دعوی بھی غلط ثابت ہوا، ‏پراجیکٹ ڈائریکٹر اور ڈپٹی پراجیکٹ ڈائریکٹر نے ہاوَسنگ سوسائیٹیز کو فائدہ پہنچانے کے لیے 5 نئے انٹر چینج تجویز کیے۔ جب کہ الائمنٹ تبدیل ہونے سے منصوبے کی لاگت میں 10 ارب روپے کا اضافہ ہوا۔

رپورٹ میں کہا گیا ہے کہ سابق ڈپٹی کمشنر راولپنڈی، سابق ڈپٹی کمشنر اٹک، اسسٹنٹ کمشنر صدر اوراسسٹنٹ کمشنر فتح جھنگ کے کردار کا تعین ہونا ابھی باقی ہے۔

اسلام آباد: وزیراعظم عمران خان نے کہا کہ ایسا الیکشن کرائیں گے کہ اپوزیشن بھی شکست قبول کرے گی۔

اسلام آباد میں تقریب سے خطاب کے دوران وزیر اعظم نے کہا کہ اسلام آباد کی آبادی تیزی سے بڑھ رہی ہے، آبادی بڑھنے کے باعث سبزہ ختم ہو رہا ہے، تعمیرات پھیلتی جا رہی ہیں۔ اسلام آباد کا نیا ماسٹر پلان لانے کی ضرورت ہے۔ زمینوں کی قیمتیں بڑھ رہی ہیں اور قبضہ مافیا بھی سرگرم ہے۔ قبضہ گروپ کے خلاف کارروائی ہوتی ہے تو ضمانت کر کے باہر آ جاتے ہیں۔ اسلام آباد میں درخت آسانی سے اگتے ہیں اس لیے ہمیں اسلام آباد میں جنگلات بڑھانے ہیں اور مثال قائم کرنی ہے۔

اس سے قبل نادرا وراثتی سرٹیفیکیٹ کے اجرا کی تقریب سے خطاب کے دوران وزیر اعظم نے کہا کہ حکومت کا کام عوام کے لئے آسانیاں پیدا کرنا ہے، ہمیں ٹیکنالوجی کے استعمال سے عوام کے لئے آسانیاں پیدا کرنی چاہئیں، پہلے بیرون ملک مقیم پاکستانیوں کو وراثتی سرٹیفکیٹ کے لیے پاکستان آنا پڑتا تھا، اب اوورسیز پاکستانی بیرون ملک ہی بائیو میٹرک تصدیق سے سند لے سکتا ہے۔

وزیراعظم نے کہا کہ ہمیں ٹیکنالوجی کے استعمال سےعوام کے لئے آسانیاں پیدا کرنی چاہئیں، چیئرمین نادرا سے امید ہے کہ وہ عوام کے لیے ہر ممکن آسانی پیدا کریں گے۔ آن لائن نظام سے زمینوں کا ریکارڈ محفوظ رکھا جاسکتا ہے، لینڈ رجسٹری اور دیگر ریکارڈ کی فائلیں گُم یا پھر جلادی جاتی تھیں، پیپرلیس نظام آنے سے فراڈ ختم ہوجاتا ہے۔

وزیراعظم نے کہا کہ اس وقت 90 لاکھ پاکستانی بیرون ممالک مقیم ہیں، اوورسیز پاکستانیوں کے تعاون سے ملک چلتا ہے، کوشش ہے اوورسیز پاکستانی ای ووٹنگ سے ووٹ کاسٹ کر سکیں، پولنگ ختم ہونے اور نتائج کے دوران دھاندلی ہوتی ہے، ای وی ایم مشین دھاندلی کو ختم کر دے گی، ایسا الیکشن کرائیں گے کہ اپوزیشن شکست قبول کرے گی۔

کراچی : عدالت نے لیاری گینگ وارکے سرغنہ عذیر بلوچ کو مزید دو مقدمات میں بری کردیا۔

کراچی کے جوڈیشل کمپلیکس میں ایڈیشنل ڈسٹرکٹ اینڈ سیشن جج جنوبی نے لیاری گینگ وار کے سرغنہ عذیر بلوچ کو عدم شواہد کی وجہ سے دو مقدمات میں بری کیا۔

کراچی پولیس کے مطابق لیاری گینگ وار کے سرغنہ عذیر بلوچ پر پولیس مقابلے اور غیر قانونی اسلحہ رکھنے کا الزام ہے۔

پولیس نے بتایا کہ عذیر بلوچ کے خلاف کلاکوٹ اور بغدادی تھانوں میں 2012 میں مقدمات درج کیے گئے تھے، ان مقدمات میں 3 ملزمان پہلے ہی بری ہو چکے ہیں جب کہ عذیر بلوچ 68 مقدمات میں سے 17 میں بری ہوچکا ہے۔

کراچی: ایم کیو ایم پاکستان کے رہنماؤں کا کہنا ہے کہ سندھ حکومت سیکیورٹی رسک ہے لہذا صوبے میں گورنر راج نافذ کیا جائے۔

کراچی میں پریس کانفرنس کرتے ہوئے ایم کیو ایم پاکستان کے سینئر ڈپٹی کنوینر عامر خان نے کہا کہ ہمارا یہ موقف رہا ہے کہ پیپلز پارٹی کی حکومت جعلی اکثریت کی بنیاد پر قائم ہے اور ہمارا یہ دعویٰ آج سچ ثابت ہوگیا جب ایف آئی اے نے پریس کانفرنس کے ذریعے انکشاف کیا کہ سندھ میں 30سے 40لاکھ جعلی ڈومیسائل اور شناختی کارڈ بنائے گئے ہیں۔

عامر خان نے کہا کہ سب کا ماننا ہے کہ کراچی کی آبادی 3کروڑ سے زائد ہے لیکن مردم شماری میں کراچی کی عوام کو 1کروڑ 60 لاکھ بتایا گیا اور اگر اس میں سے 40 لاکھ جعلی شناختی کارڈ کے حامل افراد کو نکال دیا جائے تو کراچی کی آبادی محض 1کروڑ 20لاکھ تک گنی گئی ہے، 40لاکھ جعلی شناختی کارڈ سے سندھ کے 40قومی اسمبلی کے حلقے کم وبیش متاثر ہوئے ہیں، دہشت گردوں کی پشت پناہی کرکے اور جعلی شناختی کارڈ کے ذریعے اقتدار حاصل کرکے پیپلز پارٹی نے ملک کی سلامتی کو داؤ پر لگا دیا ہے۔

رہنما ایم کیو ایم کا کہنا تھا کہ پیپلز پارٹی ہی وہ جماعت ہے جس نے 1971ء میں اقتدار کی خاطر ملک تقسیم کرنے کے لئے ادھر تم ادھر ہم کا نعرہ لگایا اور آج بھی اسی پالیسی پر عمل پیرا ہے، حکومت سندھ پاکستان کے لئے سیکورٹی رسک ہے اور ہمیشہ رہی ہے۔

عامر خان نے وفاق سے مطالبہ کیا کہ پیپلز پارٹی کی ملک دشمنی ثابت ہوچکی ہے لہٰذا فوری طور پر صوبے میں گورنر راج نافذ کیا جائے اور ایک منظم منصوبہ بندی کے ذریعے جعلی اکثریت کے حصول کے لئے جعلی شناختی کارد بنوانے اور ووٹر لسٹوں میں اندراج کروانے کی تحقیقات کروائی جائیں اور اس میں ملوث تمام افراد کو انصاف کے کٹھرے میں لا کر قرار واقعی سزا دی جائے جب کہ ان تمام جعلی شناختی کارڈوں کو فوری بلاک کیا جائے اور ووٹر لسٹوں سے نام حذف کیا جائے

راولپنڈی: آرمی چیف سے تاجک وزیر دفاع نے ملاقات کی جس میں افغان صورتحال پر گفتگو کی گئی۔

پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمرجاوید باجوہ سے تاجکستان کے وزیردفاع کرنل جنرل شیرالی مرزو نے ملاقات کی۔ ملاقات کے دوران باہمی دلچسپی کے امور ، مجموعی طور پر علاقائی صورتحال پر گفتگو کی گئی۔

آرمی چیف اور تاجکستان کے وزیردفاع نے افغانستان کی حالیہ پیشرفت خصوصاً تاجک افغان سرحد پر صورتحال اور دوطرفہ دفاعی تعاون کو مزید فروغ دینے کے اقدامات پر بھی تبادلہ خیال کیا۔

جنرل قمرجاوید باجوہ نے علاقائی رابطے کے فروغ کے لئے تاجکستان کی کاوشوں کو سراہتے ہوئے کہا کہ پاکستان تاجکستان کے ساتھ تعلقات کو بڑی اہمیت دیتا ہے اور اپنے برادرانہ تعلقات کی قدر کرتا ہے، دونوں ممالک کے مابین برادرانہ تعلقات امن ، سلامتی ، ثقافت اور ہم آہنگی پر مبنی ہیں۔

آرمی چیف نے علاقائی رابطے کے فروغ کے لئے تاجکستان کی کاوشوں کو سراہتے ہوئے کہا کہ اسلام آباد علاقائی امن اور استحکام کے حوالے سے دونوں ممالک کا یکساں موقف ہے۔

تاجک وزیردفاع نے دونوں برادر ممالک کے مابین بہتر تعلقات کے لئے کام جاری رکھنے کے عزم کااعادہ کرتے ہوئے علاقائی امن و استحکام باالخصوص افغان امن عمل کے لئے پاکستان کے مثبت کردار کو سراہا۔