Category تازہ ترین

سکیورٹی فورسز کے کرم ایجنسی میں آپریشن کے دوران تین دہشت گرد ہلاک جب کہ فائرنگ کے تبادلے میں دو جوان شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے کرم ایجنسی کے علاقے زیوا میں سرچ آپریشن کیا جہاں تین دہشت گردوں کو ہلاک کردیا گیا جب کہ فائرنگ کے تبادلے میں پاک فوج کے ایک افسر اور ایک جوان نے جام شہادت نوش کیا۔

آئی ایس پی آر کے مطابق سیکیورٹی فورسز کا علاقے میں سرچ آپریشن جاری ہے، علاقے کو دہشت گردوں سے پاک کرایا جا رہا ہے۔

فائرنگ کے تبادلے میں شہید ہونے والے جوانوں میں 25 سالہ کیپٹن باسط اور 22 سالہ سپاہی حضرت بلال شامل ہیں۔

آزاد کشمیر کے چیف الیکش کمشنر نے انتخابی مہم کے دوران وفاقی وزیر علی امین گنڈاپور کی جانب سے رقم کی تقسیم کےمعاملے پر آر او کی رپورٹ مسترد کردیا۔

ذرائع کے مطابق چیف الیکشن کمشنر آزاد کشمیر نے اس حوالے سے ریٹرننگ افسر کی رپورٹ کو مسترد کرتے ہوئے علی امین گنڈا پور کے خلاف مقدمہ درج کرنے کا حکم دیا ہے۔

واضح رہےکہ آزاد کشمیر کی انتخابی مہم میں جلسے کے دوران علی امین گنڈاپور کی ویڈیو سامنے آئی تھی جس میں وہ پیسے تقسیم کررہے تھے۔

وفاقی وزیر امور کشمیر امین گنڈا پور کی رقم تقسیم کرنے کی ویڈیو کے معاملے پر آزاد کشمیر کے چیف الیکشن کمشنر نے وزیراعظم عمران خان کو خط لکھا تھا۔

خط میں کہا گیا تھاکہ وفاقی وزرا کوالیکشن کوڈ آف کنڈکٹ 2021 کی خلاف ورزی سے روکا جائے اور صوبائی وزرا کو بھی الیکشن کوڈ آف کنڈکٹ پر پابندی کی ہدایت کریں۔

محکمہ صحت سندھ نے کراچی میں کورونا وائرس کی قسم ڈیلٹا (بھارتی ویرینٹ) کے 35 کیسز سامنے آنے کی تصدیق کر دی۔

محکمہ صحت سندھ نے بیان میں کہا کہ جون سے اب تک ڈیلٹا کے 35 کیسز سامنے آچکے ہیں اور اس قسم سے متاثرہ افراد میں وائرس کی شدید علامات سامنے آئی ہیں۔

بیان میں کہا گیا کہ لیاری میں ایک ہی خاندان کے 5 افراد ڈیلٹا وائرس سے متاثر پائے گئے، تمام متاثرہ افراد کا علاج جاری ہے۔

محکمہ صحت سندھ نے کہا کہ رواں ماہ ڈیلٹا وائرس کے 18 کیسز رپورٹ ہو چکے ہیں۔

دوسری جانب وزیر صحت سندھ ڈاکٹر عذرا پیچوہو نے عوام سے نقل و حرکت محدود کرنے اور احتیاطی تدابیر اپنانے کی اپیل کرتے ہوئے کہا کہ عوامی مقامات پر ماسک کا استعمال ضرور کریں۔

ان کا کہنا تھا کہ ڈیلٹا وائرس کے بھارت میں ہونے والے اثرات ہمارے سامنے ہیں، عوام کو ذمہ داری کا مظارہ کرنا ہوگا۔

واضح رہے کہ ملک میں وائرس کی ‘ڈیلٹا’ قسم کے اثرات سامنے آنا شروع ہوگئے ہیں اور حالیہ دنوں میں اس وائرس کے باعث کیسز میں اضافہ ہوا ہے۔

گزشتہ روز نیوز بریفنگ کے دوران وزیر اعظم کے معاون خصوصی برائے صحت ڈاکٹر فیصل سلطان نے کہا تھا کہ ڈیلٹا سمیت دیگر اقسام کے وائرس سے بچنے کے لیے ضروری ہے کہ ایس او پیز پر عمل کریں۔

انہوں نے کہا کہ ایس او پیز پر سختی سے عملدرآمد کے لیے فوج سمیت مقامی انتظامیہ کی مدد حاصل کی جائے گی، خصوصاً سیاحتی مقامات جانے والوں کو کورونا سے متعلق پابندی کا سامنا ہوگا۔

گزشتہ ہفتے پنجاب کے ضلع روالپنڈی میں بھی ڈیلٹا وائرس کے 15 کیسز کی تشخیص ہوئی تھی۔

ڈویژنل کمشنر سید گلزار حسین شاہ نے حکام صحت سے احتیاطی تدابیر اختیار کرنے کا مطالبہ کیا اور شہریوں پر زور دیا تھا کہ وہ اس وائرس کے مزید پھیلاؤ سے بچنے کے لیے جلد از جلد خود کو ویکسین لگوائیں۔

اسلام آباد کی ڈسٹرکٹ اور سیشن عدالت نے ایک جوڑے کو ہراساں کرنے کے کیس میں مرکزی ملزم عثمان مرزا سمیت 4 ملزمان کا مزید 4 روزہ جسمانی ریمانڈ منظور کرلیا۔

کیس کے مرکزی ملزم عثمان ابرار عرف عثمان مرزا، حافظ عطا الرحمن، فرحان اور ادارس قیوم بٹ عدالت کو جسمانی ریمانڈ مکمل ہونے پر جوڈیشل مجسٹریٹ وقار حسین گوندل کی عدالت میں پیش کیا گیا۔

عدالت میں جج نے استفسار کیا کہ ’یہ چار ملزمان ہیں ایک اور بھی ملزم تھا وہ کدھر ہے‘، اس پر استغاثہ نے عدالت کو بتایا کہ وہ شناختی پریڈ کے لیے جیل میں ہے۔

استغاثہ نے عدالت کو بتایا کہ ویڈیو جس موبائل سے بنی تھی وہ موبائل فون سمیت دو دیگر موبائل برآمد ہو چکے ہیں۔

ان کا کہنا تھا کہ ’اسلحہ بھی برآمد کیا جا چکا ہے اور لڑکے اور لڑکی کے بیانات بھی قلمبند کیے جا چکے ہیں‘۔

انہوں نے بتایا کہ ’دونوں لڑکا اور لڑکی نے مزید ملزمان کا انکشاف کیا ہے، ملزمان نے لڑکی کو برہنہ کر کے ڈھائی گھنٹے کی ویڈیو بنائی گئی ہے‘۔

انہوں نے کہا کہ ’375 اے سمیت دیگر نئی دفعات شامل کی گئیں ہیں اور بھتہ لینے کی دفعہ بھی شامل کی گئی ہے‘۔

سرکاری وکیل نے عدالت سے استدعا کی کہ ’برآمد شدہ پستول کا مقدمہ تھانہ آئی نائن میں درج ہے اس میں جوڈیشل کیا جائے‘۔

جج نے استفسار کیا کہ ’پستول کس سے برآمد ہوا ہے‘، اس پر سرکاری وکیل نے کہا کہ یہ عثمان مرزا سے برآمد کیا گیا ہے۔

عدالت نے سرکاری وکیل سے استفسار کیا کہ ویڈیو کس نے وائرل کی ہے، اس پر سرکاری وکیل نے بتایا کہ وائرل کرنے والے ملزم کو گرفتار کرنا باقی ہے۔

جج نے ہدایت کی ویڈیو کس طرح وائرل ہوئی اس کا بھی پتہ لگایا جائے۔

استغاثہ کا کہنا تھا کہ ’11 لاکھ 25 ہزار روپے انہوں نے بھتہ لیا، 6 ہزار واقعے کے وقت چھینا گیا، 11 لاکھ 25 ہزار روپے برآمد کرنا ابھی باقی ہے‘۔

ان کا کہنا تھا کہ ’3 موبائل فونز برآمد کرنے ہیں اور باقی ملزمان بھی گرفتار کرنے ہیں‘۔

عدالت میں ملزم حافظ عطا الرحمٰن کے وکیل نے کہا کہ ’حافظ عطا الرحمن حافظِ قرآن ہے‘، اس پر جج نے کہا کہ ’میں نے خود ملزم سے سورۃ یاسین سنی تھی‘۔

وکیل ملزم نے کہا کہ ’یہ کب کا واقعہ ہے اس کا پولیس کو بھی علم نہیں، ویڈیو کے معاملات کے لیے پولیس سائبر کرائم سیل کیوں نہیں جا رہی‘۔

وکیل ملزم نے عدالت سے استدعا کی کہ جس نے بھی ویڈیو وائرل کی اسکو بھی گرفتار کیا جائے۔

عدالت میں متاثرہ لڑکے اور لڑکی کی جانب سے وکیل حسن جاوید پیش ہوئے اور کہا کہ یہ معاملہ سائبر کرائم سیل کی طرف نہیں جائے گا۔

ان کا کہنا تھا کہ ’ابھی تو فلیٹ کے معاملہ کی بھی تفتیش کی جا رہی ہے‘۔

انہوں نے کہا کہ ’سیکورٹی خدشات کی وجہ سے متاثرہ لڑکا اور لڑکی پیش نہیں ہو رہے‘۔

وکیل کا کہنا تھا کہ ’اس کیس سے پورا معاشرہ متاثر ہوا ہے ہر شہری خوف میں مبتلا ہے، ویڈیو کی برآمدگی بہت بڑا کام ہے اس پر پولیس کام کر رہی ہے‘۔

ان کا کہنا تھا کہ ’یہ ایک بہت بڑا کیس ہے اس کو مثال بنانا چاہیے، ویڈیو برآمدگی، لیپ ٹاپ اور دیگر چیزیں برآمد کرنا ہیں ملزمان کا زیادہ سے زیادہ ریمانڈ دیا جائے‘۔

ملزم فرحان کے وکیل نے عدالت کو بتایا کہ ’پراسیکیوشن اس بات کی پابند ہے لمحہ بہ لمحہ عدالت کے سامنے حساب دینا ہے، مرکزی ملزم نے جو کیا اس کی ہم بھی مذمت کرتے ہیں‘۔

جج نے استفسار کیا کہ کیا تفتیشی افسر نے ملزم فرحان کی لوکیشن لی تھی، اس پر تفتیشی افسر نے کہا کہ ’جی لوکیشن لی ہے اس کی لوکیشن جائے وقوع کی آرہی ہے‘۔

وکیل ملزم نے کہا کہ ’متاثرہ لڑکے اور لڑکی کا بیان لیا جا چکا تھا، اس وقت مزید دفعات کیوں نہیں لگائی گئی، دفعات زیادہ لگا کر ریمانڈ مانگا جا رہا ہے‘۔

متاثرہ لڑکے اور لڑکی کے وکیل نے عدالت کو بتایا کہ ’یہ واقعہ کئی ماہ پرانا ہے اور جو واقعہ دو تین دن پرانا ہو اس کی تفتیش کے لیے بھی وقت درکار ہوتا ہے اس لیے زیادہ سے زیادہ ریمانڈ دیا جائے‘۔

بعد ازاں جوڈیشل مجسٹریٹ وقار حسین گوندل نے 4 روزہ جسمانی ریمانڈ منظور کرتے ہوئے تفتیشی افسر کو ہر ملزم کے الگ الگ کردار کو واضح کرنے کی ہدایت کی۔

کیس کا پس منظر
واضح رہے کہ رواں ہفتے اسلام آباد پولیس نے سوشل میڈیا پر ایک خاتون اور ایک مرد کو تشدد کا نشانہ بنانے اور برہنہ کرنے کی ویڈیو وائرل ہونے کے بعد 4 ملزمان کو گرفتار کرلیا۔

6 جولائی کو درج ہونے والی ایف آئی آر کے مطابق واقعہ گولڑہ پولیس تھانے کی حدود میں سیکٹر ای-11/2 کی ایک عمارت میں پیش آیا جس کا مقدمہ سب انسپکٹر کی شکایت پر درج کیا گیا۔

مذکورہ مقدمہ پاکستان پینل کوڈ کی دفعہ 354-اے (خاتون کی عصمت دری کی نیت سے حملہ یا مجرمانہ جبر کرنا)، دفعہ 506 (تخویف مجرمانہ سزا)، دفعہ 341 (مزاحمت بیجا کی سزا) اور دفعہ 509 (جنسی ہراسانی) کے تحت درج کیا گیا۔

عہدیداروں نے بتایا کہ ملزمان کے موبائل فون سے اسی طرح کی متعدد ویڈیوز برآمد ہوئیں اور ان لوگوں کی نشاندہی کرنے کے لیے ان سے جانچ کی جارہی ہے جو زیادتی کا نشانہ بنے ہیں۔

ابتدائی تفتیش اور اپنے موبائل فون سے حاصل کردہ ویڈیوز سے معلوم ہوا ہے کہ یہ اس علاقے کا پہلا واقعہ نہیں تھا۔

انہوں نے بتایا کہ ان واقعات میں سے چند پولیس کے علم میں آئے تھے تاہم کوئی کارروائی نہیں کی گئی۔

عہدیداروں نے بتایا کہ ملزمان کا طریقہ کار ظاہر کرتا ہے کہ یہ منظم جرم تھا، ملزمان پراپرٹی اور کار ڈیلر ہیں اور انہوں نے علاقے میں فلیٹ خرید رکھا تھا۔

وہ یہ فلیٹ ایک روز یا مختصر سے وقت کے لیے بھی کرایے پر دیتے تھے اور پھر فلیٹ کرایے پر لینے والے جوڑوں کو نشانہ بناتے اور ان کے ساتھ بدسلوکی کرنے کے ساتھ ان کی ویڈیو بھی بناتے تھے۔

قبل ازیں اسلام آباد کی ڈسٹرکٹ اور سیشن عدالت نے ملزمان کا 4 روزہ جسمانی ریمانڈ منظور کیا تھا جس کی مدت آج ختم ہونے پر ملزمان کو عدالت میں پیش کرکے دوبارہ ریمانڈ کی استدعا کی گئی تھی۔

آزاد کشمیر کی وادی نیلم کے علاقے سالخلہ میں رات گئے کلاؤڈ برسٹ (مخصوص علاقے میں اچانک طوفانی بارشوں) کے بعد نالوں میں طغیانی سے تقریباً 30 مکانات تباہ اور ایک شخص اور اس کی اہلیہ لاپتا ہو گئے۔

آزاد کشمیر کے وزیر اعظم راجا فاروق حیدر نے رات گئے ٹوئٹر پر پیغام جاری کرتے ہوئے واقعے کی تصدیق کی۔

ان کا کہنا تھا کہ ’میں نے وادی نیلم کے ڈپٹی کمشنر سے بات کی ہے، انہوں نے 2 افراد کے لاپتا ہونے اور 2 کے ہسپتال میں داخل ہونے کی تصدیق کی، گرد و نواح میں رہنے والے لوگوں کو نکال لیا گیا ہے اور ریسکیو کا کام طلوع آفتاب تک کے لیے روک دیا گیا ہے‘۔

ضلعی ڈیزاسٹر مینیجمنٹ افسر اختر ایوب نے صبح سویرے ڈان ڈاٹ کام سے گفتگو کرتے ہوئے بتایا کہ گزشتہ رات 9 بجے سے ہی ضلعی ہیڈکوارٹرز اٹھمقام اور اس کے گرونواح میں شدید بارش ہورہی تھی۔

ان کا کہنا تھا کہ ’ہم نے دریا کے پار سالخلہ سے شور سنا اور جب ہم وہاں رضاکاروں کے ہمراہ پہنچے تو دیکھا کہ نالے کے ساتھ واقع مکانوں میں طغیانی سے تباہی مچ چکی تھی‘۔

ان کا کہنا تھا کہ ’سالخلہ نالہ وادی کے تمام ندی نالوں کی طرح وادی کے بیچ بہنے والے دریائے نیلم میں ہی ضم ہوتا ہے۔

سوشل میڈیا پر شیئر کی گئی تصاویر کے مطابق کئی مکانات زمین بوس ہو چکے ہیں اور ان کا ملبہ نظر آرہا ہے تاہم کئی مکانات مکمل طور پر پانی کے ساتھ بہہ گئے ہیں۔

اختر ایوب کے مطابق تقریباً 30 کے قریب رہائشی مکانات جن میں گھریلو سامان و مال مویشی بھی موجود تھا، ایک عدد لکڑی کی فیکٹری اور ایک موٹرسائیکل نالے میں بہہ گئے ہیں۔

دوسری جانب ایک عینی شاہد حیات اعوان کا کہنا تھا کہ 20 کے قریب مکانات، دو گاڑیاں ایک موٹر سائیکل مکمل بہہ گئے ہیں جبکہ پندرہ کے قریب مکانات ناقابل رہائش ہیں جنکی زیریں منزلیں مکمل تباہ ہو گئی ہیں۔

ان کا کہنا تھا کہ ’تقریباً 25 کے قریب مال مویشی جن میں گائے بکریاں شامل ہیں طغیانی میں بہہ گئے جبکہ علاقے کے انفرااسٹرکچ کو بھی شدید نقصان پہنچا ہے۔

اختر ایوب کے مطابق یہ بالکل وادی کے لیسوا نالے کی طرح کی طغیانی تھی جس نے دو سال قبل اسی جولائی کے مہینے میں نجی املاک کو نقصان پہنچانے کے علاوہ لگ بھگ 20 افراد کی جان لے لی تھی۔

تاہم سالخلہ میں جانی نقصان اس لیے کم ہوئے کیوں کہ لوگوں نے نالے کا غیر معمولی شور سن کر پہلے ہی گھر خالی کر دیے تھے۔

اختر ایوب نے بتایا کہ ایک گھر سے ایک میاں بیوی جن کی شناخت اکرم ضیا اور سلمیٰ بی بی کے نام سے ہوئی ہے، لاپتا ہیں اور ان کی تلاش جاری ہے۔

اکرم ضیا کی بیٹی عائشہ اور بیوہ بھابھی خیرالنساء کو رات کو ہی زخمی حالت میں بازیاب کر کے مقامی ہسپتال میں منتقل کر دیا گیا تھا۔

انہوں نے کہا کہ متاثرہ خاندان رات کو ہی علاقے کے محفوظ مقام پر منتقل کردیا گیا تھا۔

اسلام آباد: پی ٹی آئی حکومت نے اپنی یو ٹرن کی روایت کو برقرار رکھتے ہوئے اب اپنے ہی منظور کردہ انتخابی اصلاحات ترمیمی بل 2021 میں نئی ترامیم کا فیصلہ کیا ہے۔

تفصیلات کے مطابق قومی اسمبلی سے منظور کرائے گئے انتخابی اصلاحات ترمیمی بل 2021 پر وزارت قانون سے مشاورت ہی نہیں کی گئی تھی ، اس کے علاوہ انتخابی ترمیمی بل میں وفاقی وزیر قانون فروغ نسیم کو بھی مشاورت کا حصہ نہیں بنایا گیا تھا، جس کے بعد اب حکومت نے اپنے ہی منظور کردہ انتخابی اصلاحات ترمیمی بل 2021 میں نئی ترامیم لانے کا فیصلہ کیا ہے۔

ذرائع کا کہنا ہے کہ وزیراعظم آفس میں انتخابی اصلاحات ترمیمی بل 2021 پر الیکشن کمیشن اور اپوزیشن کے اعتراضات کا تفصیلی جائزہ لیا گیا، وزیراعظم نے وزارت پارلیمانی امور کو وزیر قانون و آئینی ماہرین سے مشاورت کی ہدایات جاری کردیں ہیں، انتخابی اصلاحات کے ترمیمی بل میں قانونی سقم دور کرنے کے لیے وزیر قانون کوخط ارسال کردیا گیا ہے، وزیراعظم کی ہدایات پر وزارت قانون نے کام بھی شروع کردیا ہے، انتخابی اصلاحات کے ترمیمی بل پرعید الاضحیٰ کے بعد بڑی پارلیمانی بیٹھک ہوگی۔

سپریم کورٹ نے پاکستان ریلوے کے مستقل ہونے والے 80 ملازمین سے متعلق سروس ٹربیونل کا فیصلہ کالعدم قرار دے دیا۔

چیف جسٹس گلزار احمد کی سربراہی میں عدالت عظمیٰ کے 3 رکنی بینچ نے ملازمین کے خلاف ریلوے کی درخواست پر سماعت کی۔

ریلوے کے وکیل نے عدالت میں مؤقف اختیار کیا کہ ملازمین 2013 میں بھرتی ہوئے جو ریلوے پالیسی 2012 کے قواعد و ضوابط پر پورا نہیں اترتے تھے۔

چیف جسٹس گلزار احمد نے ریمارکس دیے کہ عارضی بھرتیاں سیاسی بنیادوں پر کی جاتی ہیں اور عارضی بھرتی ہونے والے ملازمین گھروں میں بیٹھ کر تنخواہیں لیتے ہیں۔

انہوں نے کہا کہ ریلوے میں اسی وجہ سے اتنے حادثات ہوتے ہیں کہ ریلوے میں اب بھی ہر مہینے سیکڑوں کی تعداد میں عارضی بھرتیاں ہوتی ہیں۔

جسٹس گلزار احمد نے ریمارکس دیے کہ سیاسی بھرتیوں نے ریلوے کو تباہ کردیا۔

بینچ کے رکن جسٹس اعجازالاحسن نے ریمارکس دیے کہ ریلوے حکام سیاسی بھرتیاں کر کے انہیں مستقل کرنے کے لیے سیاسی بنیادوں پر پالیسی بناتے ہیں۔

انہوں نے استفسار کیا کہ ریلوے ایک سرکاری ادارہ ہے تو پھر بھرتیاں سیاسی بنیادوں پر کیوں کی جاتی ہیں؟ اور ریلوے کی 80 فیصد آمدن تنخواہوں اور پنشن میں چلی جاتی ہے۔

جسٹس اعجازالاحسن نے استفسار کیا کہ عارضی ملازمین مستقل کرنے کے لیے تو 2012 میں پالیسی بنائی گئی۔

جس پر وکیل ریلوے نے جواب دیا کہ اس پالیسی کا زیر غور ملازمین کے کیس پر اطلاق نہیں ہوتا کیونکہ پالیسی 2012 میں آئی جس کا اطلاق 31 دسمبر 2011 تک کے عارضی ملازمین پر تھا۔

بعد ازاں سپریم کورٹ نے پاکستان ریلوے کے مستقل ہونے والے 80 ملازمین سے متعلق سروس ٹربیونل کا فیصلہ کالعدم قرار دے دیا۔

ٰخیال رہے کہ جون 2020 میں چیف جسٹس آف پاکستان نے ایک کیس کی سماعت کے دوران ریمارکس دیے تھےکہ ریلوے کا حال بالکل پھٹیچر ہے، ریلوے افسران بڑی تنخواہیں لے رہے ہیں جبکہ اہم عہدوں پر عارضی تقرر ہو رہا ہے، سمجھ نہیں آرہا ریلوے کا کیا بنے گا۔

اسلام آباد میں جوڑے کو ہراساں کرنے کے معاملے پر پولیس نے تفتیش کے دوران مرکزی ملزم عثمان مرزا سمیت دیگر کے خلاف مقدمے میں تعزیرات پاکستان کے تحت ریپ اور بھتے کی دفعات بھی شامل کرلیں۔

اسلام آباد پولیس کے ڈپٹی انسپکٹر جنرل (ڈی آئی جی) آپریشنز افضل کوثر نے پریس کانفرنس میں کہا کہ ہمارے پاس 6 لوگ گرفتار ہیں، جن میں عثمان مرزا بھی شامل ہیں جبکہ لڑکا اور لڑکی کا بیان ریکارڈ کر لیا گیا ہے۔

ڈی آئی جی آپریشنز افضل کوثر نے بتایا کہ ہم کیس میں نئی دفعات جن میں بھتے کی دفعہ 384، ڈکیتی کی دفعہ 395، 375ریپ کی دفعہ اے اور جنسی طور پر ہراساں کیے جانے پر سزا کی دفعہ 377 بی بھی شامل کرنے جا رہے ہیں۔

انہوں نے کہا کہ جوڑے کے بیان کے بعد یہ دفعات شامل کی جا رہی ہیں، پہلے جو دفعات لگائی گئی تھیں، وہ اس وقت کی تھیں لیکن اسلام آبادپولیس اب مزید نئی دفعات شامل کرنے جا رہی ہیں۔

پولیس افسر نے کہا کہ عثمان مرزا کے تمام موبائل فون برآمد کر لیے گئے ہیں، اس کیس کے تمام محرکات کو حل کر رہے ہیں۔

انہوں نے کہا کہ عثمان مرزا کے خلاف تھانہ سہالہ میں مقدمہ درج کیا گیا ہے، پولیس اپنی ذمہ داری سے کام کرنے کی کوشش کر رہی ہیں اور ملزمان سے تفتیش چل رہی ہے۔

کیس میں نئی دفعات شامل کرنے کے حوالے سے وضاحت کرتے ہوئے انہوں نے کہا کہ تفتیش میں کوئی بھی دفعہ کسی بھی وقت شامل کی جاکستی ہے۔

تفتیش سے آگاہ کرتے ہوئے انہوں نے کہا کہ ملزم کے موبائل فون فرانزک کے لیے بھیج دیے گئے ہیں اور ویڈیو کی مزید تفصیل پھر سامنے لائیں گے، اگر کسی اور کے ساتھ بھی زیادتی ہوِئی ہے تو وہ بھی سامنے آسکتا ہے۔

ڈی آئی جی آپریشنز نے کہا کہ عثمان مرزا کے بھائی کی گرفتاری کے لیے کوشش کر رہے ہیں، اس کیس میں عثمان مرزا کے بھائی سمیت دیگر لوگ مطلوب ہیں۔

انہوں نے کہا کہ بھتے کی دفعات عثمان مرزا کے خلاف ہیں، ان دفعات کے مطابق ہر کسی کو قواعد کے مطابق سزا ملے گی اور جو پولیس افسران عثمان مرزا سے تعاون کرتے ہیں، ان کے خلاف بھی کارروائی ہو گی۔

یاد رہے کہ 7 جولائی کو اسلام آباد پولیس نے سوشل میڈیا پر ایک خاتون اور ایک مرد کو تشدد کا نشانہ بنانے اور برہنہ کرنے کی ویڈیو وائرل ہونے کے بعد ملزمان کو گرفتار کرلیا تھا۔

پولیس کے سب انسپکٹر کی شکایت پر ملزمان کے خلاف ایف آئی آر 6 جولائی کو درج ہوئی تھی، جس میں کہا گیا تھا کہ واقعہ گولڑہ پولیس تھانے کی حدود میں سیکٹر ای-11/2 کی ایک عمارت میں پیش آیا۔

ایف آئی آر میں کہا گیا تھا کہ مذکورہ واقعے کی سوشل میڈیا پر وائرل ہونے والی ویڈیو میں دیکھا جاسکتا ہے کہ 5 سے 6 افراد نے مرد و خاتون کو ایک کمرے میں حبسِ بیجا میں رکھ کر بندوق کے زور پر برہنہ کررہے ہیں اور انہیں ڈرا دھمکا کر فحش حرکات بھی کررہے ہیں۔

مقدمہ تعزیرات پاکستان کی دفعات 354-اے (خاتون کی عصمت دری کی نیت سے حملہ یا مجرمانہ جبر کرنا)، دفعہ 506 (تخویف مجرمانہ سزا)، دفعہ 341 (مزاحمت بیجا کی سزا) اور دفعہ 509 (جنسی ہراسانی) کے تحت درج کیا گیا تھا۔

اسلام آباد پولیس نے ایک سوشل میڈیا پر ایک بیان میں کہا تھا کہ تمام تر وسائل بروئے کار لاتے ہوئے خاتون اور مرد پر تشدد کی وائرل ویڈیوز میں شامل ملزمان کو گرفتار کر لیا اور ان کے خلاف مقدمہ درج کر کے مزید قانونی کارروائی شروع کردی ہے’۔

پولیس نے 9 جولائی کو مرکزی ملزم عثمان مرزا، حافظ عطاالرحمٰن اور فرحان نامی ملزمان کو جوڈیشل مجسٹریٹ وقار حسین گوندل کی عدالت میں پیش کیا جہاں عدالت نے ملزمان کا 4 روزہ جسمانی ریمانڈ منظور کرلیا تھا۔

سپریم جوڈیشل کونسل کے اجلاس میں چیئرمین قومی احتساب بیورو(نیب) جسٹس ریٹائرڈ جاوید اقبال کے خلاف شکایت قابل سماعت ہونے سے متعلق اٹارنی جنرل نے جواب داخل کرنےکے لیے مہلت کی استدعا کردی۔

سپریم جوڈیشل کونسل کا اجلاس چیف جسٹس پاکستان کی سربراہی میں سپریم کورٹ بلڈنگ میں ہوا۔

اجلاس میں اٹارنی جنرل نے چیئرمین نیب جاوید اقبال کے خلاف سپریم جوڈیشل کونسل میں شکایت کےقابل سماعت ہونےسے متعلق ابتدائی دلائل دیے۔

اٹارنی جنرل نے وفاقی حکومت سے ہدایات لےکرجواب داخل کرنےکے لیے مہلت کی استدعا کی جس کے بعد سپریم جوڈیشل کونسل کا اجلاس غیر معینہ مدت کے لیے ملتوی کردیا گیا۔

ایوان بالا سینیٹ میں دوران حراست تشدد اور موت کے انسداد اور سزا کا بل 2021 منظور کر لیا گیا۔

بل پاکستان پیپلز پارٹی کی سینیٹر شیری رحمٰن نے پیش کیا اور وزیر انسانی حقوق شیریں مزاری نے اس کی حمایت کرتے ہوئے کہا کہ تشدد میں ملوث کسی بھی سرکاری ملازم کو 10 سال تک قید اور 20 لاکھ روپے تک جرمانے کی سزا کا سامنا کرنا پڑے گا۔

اگر کوئی سرکاری ملازم جس کا فرض تشدد کو روکنا ہے، اگر وہ جان بوجھ کر یا غفلت برتتے ہوئے اس کی روک تھام میں ناکام رہتا ہے تو اسے 5سال قید اور ایک لاکھ روپے تک جرمانے کا سامنا کرنا پڑے گا۔

اس حوالے سے مزید کہا گیا کہ جو بھی شخص دوران حراست موت یا جنسی تشدد کے جرم کا ارتکاب یا اس کی سازش کرے گا تو اسے عمر قید اور 30لاکھ روپے تک جرمانے کی سزا ہوسکتی ہے۔

مزید براں اگر کوئی سرکاری ملازم جس کا دوران حراست اموات یا جنسی تشدد کی روک تھام ہے، اگر وہ جان بوجھ کر یا غفلت کے نتیجے میں ایسا کرنے میں ناکام رہتے ہیں تو انہیں کم از کم 7سال قید اور 10لاکھ روپے تک جرمانے کی سزا کا سامنا کرنا پڑ سکتا ہے۔

بل کے مطابق جرمانہ مقتول یا ان کے قانونی ورثا کو ادا کیا جائے گا، اگر جرمانہ ادا نہیں کیا گیا تو جرم کا ارتکاب کرنے والے سرکاری ملازم کو بالترتیب تین اور پانچ سال تک اضافی قید کا سامنا کرنا پڑے گا۔

حراست کے بارے میں بل میں کہا گیا ہے کہ کسی کو بھی کسی بھی جرم میں “کسی ملزم کے ٹھکانے یا ثبوت کے بارے میں معلومات حاصل کرنے کے لیے کسی کو تحویل میں نہیں لیا جاسکتا جبکہ خواتین کو صرف ایک خاتون اہلکار کے ذریعے تحویل میں لیا جاسکتا ہے۔

بیان میں کہا گیا ہے کہ تشدد کے ذریعے اقبال جرم عدالت میں ناقابل قبول ہو گا۔

دوران حراست تشدد اور موت(روک تھام اور سزا) کے بل 2021 میں کہا گیا کہ اس ایکٹ کے تحت دی گئی سزا ناقابل معافی اور ناقابل ضمانت تصور کی جائے گی۔

اس بل میں دوران حراست تشدد کی صورت میں شکایت کے اندراج کا طریقہ کار بھی بتایا گیا ہے، عدالت موصولہ شکایت کے نتیجے میں درخواست گزار کا بیان ریکارڈ کرے گی اور ہدایت دے گی کہ طبی اور نفسیاتی معائنہ کیا جائے اور اس معائنے کے نتائج 24 گھنٹوں میں عدالت میں پیش کرنا ہوں گے۔

اگر شواہد مل گئے کہ ہوسکتا ہے کہ تشدد ہوا ہے تو متعلقہ عدالت اس معاملے کو مزید کارروائی کے لیے سیشن کورٹ کے پاس بھیجے گی، سیشن کورٹ تحقیقات کی ہدایت کرتے ہوئے 15 دن میں رپورٹ طلب کرے گی، بل میں کہا گیا کہ سیشن کورٹ روزانہ کی بنیاد پر شکایت کی سماعت کرے گی اور 60 دن میں فیصلہ سنائے گی۔

بل کی منظوری پر اظہار خیال کرتے ہوئے سینیٹر شیری رحمٰن نے کہا کہ پاکستان آخر کار تشدد کو جرم قرار دینے کے راستے پر گامزن ہے۔

انہوں نے کہا کہ وہ بل کی منظوری پر بہت خوش ہیں اور اس بل کے لیے تعاون کرنے پر تمام سینیٹرز، وفاقی وزیر انسانی حقوق اور سینیٹ کمیٹی برائے انسانی حقوق کے سابق چیئرمین مصطفیٰ نواز کھوکھر کا بھی شکریہ ادا کیا۔

سی پیک اتھارٹی
اس سے قبل پاکستان پیپلز پارٹی کے کے سینیٹر میاں رضا ربانی نے پاک چین اقتصادی راہداری(سی پیک) بل 2021 پیش کیا جسے سینیٹ کے چیئرمین صادق سنجرانی نے پارلیمنٹ کے ایوان بالا کی ذیلی کمیٹی کے پاس بھیج دیا۔

اس بل میں متعدد ترامیم کی تجویز پیش کی گئی ہے جس میں سی پیک اتھارٹی کی انتظامیہ کو بورڈ آف ڈائریکٹرز کے کنٹرول میں دینا بھی شامل ہے، ترمیمی بل کے مطابق وفاقی حکومت اتھارٹی کو پالیسی ہدایت جاری کرے گی جس پر عمل کرنا ہوگا۔

رضا ربانی نے بل کی تفصیلات بتاتے ہوئے کہا کہ اس سے قبل سی پیک اتھارٹی پر تمام کنٹرول چیف ایگزیکٹو آفیسر کا ہوتا تھا لیکن اگر اس بل کو منظوری مل جاتی ہے تو کنٹرول چیف ایگزیکٹو آفیسر کے بجائے بورڈ آف ڈائریکٹرز کے پاس ہو گا جس میں صوبوں کے نمائندے بھی شامل ہوں گے۔

تاہم اس بل کی حکومت کی جانب سے مخالفت کی گئی وزیر مملکت برائے پارلیمانی امور علی محمد خان نے کہا کہ رضا ربانی جتنی ترامیم لیکر آ رہے ہیں، ایسا نہ ہو کہ سی پیک کو پیک کر دیا جائے۔

آرڈیننس
سینیٹر ربانی نے آرڈیننس کے اجرا سے متعلق آئینی (ترمیمی) بل 2021 بھی پیش کیا۔

اس بل کی مخالفت کرتے ہوئے علی محمد خان نے کہا کہ ملک کے صدر کے پاس آرڈیننس جاری کرنے کا اختیار ہے، ہمیں صدر پر اعتماد کرنا چاہیے، اگر صدر کو لگتا ہے کہ اس کی ضرورت ہے تو وہ ایک آرڈیننس جاری کر سکتے ہیں۔

انہوں نے نوٹ کیا کہ آرڈیننس کو پارلیمان منظور نہ کرے تو وہ ختم ہوجاتا ہے، اس طرح آئین پر قدغن کو سپورٹ نہیں کر سکتے۔

رضا ربانی نے کہا کہ صدر سے متعلق اگر پنڈورا باکس نہ کھولتے تو بہتر ہوتا، صدر مملکت پارلیمان سے بالادست نہیں، وجہ بتائیں کہ صدر مملکت قانون سازی کے لیے پارلیمان کے اختیار کیوں استعمال کر رہے ہیں۔

انہوں نے اپنی گفتگو جاری رکھتے ہوئے کہا کہ یہ وہی صدر ہیں جنہوں نے قاضی فائز عیسیٰ کے خلاف ریفرنس بھیجا، یہ وہی صدر ہیں جنہوں نے سینیٹ انتخابات خفیہ یا اوپن بیلٹ پیپر سے متعلق ریفرنس بھیجا، شکر کریں کہ صدر مملکت کے خلاف مواخذے کی قرارداد نہیں لائے صرف وجہ پوچھی جا رہی ہے۔

رضا ربانی کی جانب سے بل پیش کرنے کی اجازت طلب کرنے پر ایوان میں ووٹنگ ہوئی جس میں بل پیش کرنے کے حق میں 37 جبکہ مخالفت میں 33 ووٹ آئے۔

رضا ربانی نے آرڈیننس سے متعلق بل ایوان میں پیش کردیا جسے چیئرمین سینیٹ نے متعلقہ کمیٹی کے سپرد کردیا۔

سلیم مانڈوی والا نے سول ایوی ایشن (ترمیمی) بل 2021 کو پیش کیا جس کے تحت پائلٹوں کو پروازوں کے دوران روزہ نہ رکھنے کی ہدایت کی جائے گی، چیئرمین نے مانڈوی والا کو ہدایت کی کہ وہ بل میں ترمیم کے بعد اسے دوبارہ پارلیمنٹ میں پیش کریں۔