Category تازہ ترین

گورنر سندھ عمران اسماعیل کا کہنا ہے کہ کراچی میں سیاسی ایڈمنسٹریٹر لگانے کا حکومت سندھ کا فیصلہ کسی طور مناسب نہیں ہے۔

گورنرسندھ عمران اسماعیل نے میڈیا سے بات کرتے ہوئے کہا ہے کہ گورنر ہاؤس میں وزیراعظم عمران خان کی موجودگی میں ایک اجلاس ہوا جس میں طے ہوا تھا کہ کراچی کا ایڈمنسٹریٹر غیر سیاسی ہوگا جو حکومت وحزب اختلاف پر مشتمل سیاسی جماعتوں کی مشاورت سے تعینات ہوگا تاہم سندھ حکومت کا یکطرفہ فیصلہ کسی بھی طرح مناسب نہیں ہے۔

گورنر سندھ کا کہنا تھا کہ سندھ کی عوام کے مسائل بنیادی نوعیت کے ہیں اور ان کا حل ہونا انتہائی ضروری ہے، اس وقت سندھ میں لوگوں کی نظریں عمران خان کی طرف ہے، لوگ تبدیلی چاہتے ہیں۔ انہوں نے مزید کہا کہ صرف سندھ میں ہیلتھ کارڈ نہیں مل رہے، کسان کارڈ نہیں مل رہے جس کی وجہ سے عوام کی پریشانیوں میں اضافہ ہورہا ہے۔

میٹرک اور انٹر کے امتحانات ملتوی نہ کرنے پر اپوزیشن نے قومی اسمبلی سے واک آؤٹ کردیا اور ساتھ ہی کورم کی نشاندہی بھی کردی۔

قومی اسمبلی اجلاس اسپیکر اسد قیصر کی زیر صدارت ہوا جس میں بیرون ملک پھنسے پاکستانیوں سے متعلق نکتہ اعتراض پروفاقی وزیر ہوابازی غلام سرور خان نے کہا کہ این سی او سی سے فلائٹس 67 فیصدتک بڑھانے کی درخواست کررکھی ہے اور 20 جولائی تک تمام پھنسے افراد کو باعزت طریقے سے ملک واپس لایاجائےگا۔

ن لیگ کے خواجہ سعد رفیق نےکہاکہ وزیر تعلیم شفقت محمود سے رابطہ کرکے کہا گیا طلبہ کے امتحانات ملتوی کریں لیکن ابھی تک حکومت نے کوئی جواب نہیں دیا لہٰذا بتایا جائے کہ حکومت ایک امتحان لینے کے بعد طلبہ کو فیل کرکے 45 روزبعد پھر ضمنی امتحان کیوں لینا چاہتی ہے؟

پارلیمانی سیکرٹری تعلیم وجہیہ اکرم نے کہاکہ بلوچستان میں امتحانات مکمل ہوچکے، سندھ میں جاری ہیں اور جاری امتحانات کوکیسے مؤخرکیاجاسکتاہے؟

اس پر خواجہ سعد رفیق نے کہاکہ اس کامطلب یہ ہوا کہ حکومت امتحانات مؤخر کرنے کے معاملے پراپوزیشن سے بات نہیں کرنا چاہتی۔

اس کے بعد مسلم لیگ ن سمیت دیگراپوزیشن جماعتیں ایوان سے واک آؤٹ کرگئیں جبکہ اس دوران (ن) لیگ کے شیخ فیاض الدین نے کورم کی نشاندہی کردی اور کورم پورا نہ نکلنے پر اجلاس پیرتک ملتوی کردیاگیا۔

اسلام آباد: سابق معاون خصوصی زلفی بخاری نے رنگ روڈ کی رپورٹ بنانے والے کمشنر راولپنڈی کو ایک ارب روپے ہرجانے کا نوٹس بھیج دیا۔

تفصیلات کے مطابق سابق معاون خصوصی زلفی بخاری نے راولپنڈی رنگ روڈ کی رپورٹ بنانے والے کمشنر راولپنڈی گلزار حسین شاہ کے خلاف قانونی کاروائی کا فیصلہ کیا ہے، اس حوالے سے زلفی بخاری نے کمشنر راولپنڈی کو ایک ارب روپے کا ہرجانے کا نوٹس بھجوا دیا ہے۔

نوٹس میں کہا گیا ہے کہ راولپنڈی رنگ روڈ کی رپورٹ میں زلفی بخاری سے متعلق من گھڑت بیان نے ان کی ساکھ کو نقصان پہنچایا، کمشنر راولپنڈی 14 روز میں نوٹس کا جواب جمع کرائیں، انکوائری رپورٹ میں زلفی بخاری کے حوالے سے دیا گیا بیان واپس لیں، اپنے بیان پر اعلانیہ طور پر زلفی بخاری سے معافی مانگیں، اور اپنے بیان کی تردید جاری کریں۔

واضح رہے کہ سابق معاون خصوصی زلفی بخاری نے رنگ روڈ اسکینڈل کی رپورٹ سامنے آنے کے بعد خود کو ہر قسم کی تحقیقات کے لیے پیش کرتے ہوئے کہا تھا کہ میرا رنگ روڈ منصوبے سمیت رئیل اسٹیٹ کے کسی بھی منصوبے سے کوئی تعلق نہیں، کسی بھی قسم کی تحقیقات کا سامنا کرنے کے لیے تیار ہوں، جب تک میرے خلاف انکوائری مکمل نہیں ہوجاتی میں اپنے عہدے سے مستعفی ہورہا ہوں۔

اسلام آباد: وفاقی وزیر اور نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کورونا کی چوتھی لہر شروع ہونے سے متعلق خبردار کرتے ہوئے ایس او پیز پر عمل نہ ہونے کی صورت میں شادی ہالز اور ریسٹورینٹس بند کرنے کا عندیہ دے دیا۔

ٹوئٹر پر جاری بیان میں اسد عمر نے کہا کہ 2 ہفتے پہلے بتایا تھا کہ آرٹیفیشل انٹیلی جنس کورونا کی چوتھی لہر کے امکانات ظاہر کررہی ہے، چوتھی لہر سے متعلق 2 ہفتے پہلے ہی خبردار کردیا تھا، اب کورونا کی چوتھی لہر شروع ہونے کی علامات ظاہر ہونا شروع ہوگئی ہیں۔

انہوں نے کہا کہ شادی ہالز اور ریسٹورینٹس میں ویکسی نیشن سرٹیفکیٹ سے متعلق ایس اوپی پر عمل نہیں ہورہا، ایس اوپیز پرعمل نا ہوا تو شادی ہالز اور انڈور ڈائیننگ بند کردیں گے۔

اسد عمر کا کہنا تھا کہ ہوٹل اور جم مالکان نے ذمہ داری نا دکھائی تویہ سہولت بند کرنے کے سوا کوئی راستہ نا ہوگا۔

واضح رہےکہ پاکستان میں کورونا کیسز میں مسلسل اضافہ دیکھنے میں آرہا ہےکہ اور گزشتہ 24 گھنٹوں کے دوران ملک بھر میں مثبت کیسز کی شرح 3.65 فیصد ریکارڈ کی گئی ہے۔

وفاقی وزیر تعلیم شفقت محمود نے کہا ہے کہ جو طلبہ مزید وقت مانگ رہے ہیں، وہ ضمنی امتحان میں شرکت کر سکتے ہیں۔

سماجی رابطوں کی ویب سائٹ ٹویٹر جاری اپنے بیان میں شفقت محمود کا کہنا تھا کہ امتحان کیوں ملتوی کیے جائیں؟ جو طلبہ پڑھ رہے ہیں ان کو کیوں سزا دی جائے؟

شفقت محمود نے سیاسی مخالفین کو تنقید کا نشانہ بناتے ہوئے کہا کہ مسلم لیگ (ن) سستی مقبولیت کے لئے طلبہ کے ساتھ سیاست کھیل رہی ہے۔ احسن اقبال اور سعد رفیق جیسے لوگ جانتے ہیں کہ بلوچستان اور سندھ میں امتحانات پہلے ہی ہو چکے ہیں۔

انہوں نے واضح کیا کہ پچھلے امتحانات کی بنیاد پر طلبہ کو ترقی نہیں دی جا سکتی کیونکہ پچھلے سال امتحانات نہیں ہوئے۔ سعد رفیق اور احسن اقبال کو معلوم ہونا چاہیے کہ امتحانات طلبہ کی اہلیت جاننے کا پیمانہ ہیں۔

وفاقی وزیر تعلیم نے اپنی ٹویٹس میں لکھا کہ بارہویں کلاس اہم ہے، کیوں کہ اس کے بعد طلبہ نے یونیورسٹیوں اور پروفیشنل کالجوں میں جانا ہوتا ہے۔

صوبہ پنجاب کے ضلع اوکاڑہ کے علاقے کوٹ باری میں پولیس مقابلہ کے دوران ڈاکوؤں کی فائرنگ سے ایک پولیس اہلکارشہید ہو گیا ہے جبکہ دو ڈاکو بھی ہلاک ہو گئے۔

ڈسٹرکٹ پولیس آفیسر (ڈی پی او) اوکاڑہ فیصل شہزاد کے مطابق ڈاکو راہ گیروں کو لوٹ رہے تھے کہ پولیس موقع پر پہنچی گئی جس پے ڈاکوؤں نے فائرنگ کر دی۔

ڈی پی او نے بتایا کہ ڈاکوؤں کی فائرنگ سے ایلیٹ فورس کا اہلکاراسد جمیل شہید ہو گیا جبکہ 2 ڈاکو بھی اپنے ساتھیوں کی فائرنگ سے مارے گئے۔

ڈی پی او کے مطابق شہید کانسٹیبل اورڈاکوؤں کی لاشیں اسپتال منتقل کردی گئی ہیں جبکہ فرار ڈاکوؤں کی گرفتاری کیلئے چھاپے مارے جا رہے ہیں۔

انسداد کورونا کے ادارے نیشنل کمانڈ اینڈ آپریشن سینٹر (این سی او سی) نے یکم اگست سے اندرون ملک ویکسینیشن سرٹیفکیٹ کے بغیر فضائی سفر پر پابندی عائد کردی۔

این سی او سی اعلامیے کے مطابق ڈیلٹا وائرس درحقیقت انڈین وائرس ہے جو انتہائی خطرناک ہے، ملک میں ڈیلٹا وائرس کے کیسز سامنےآنے لگے ہیں جو کوروناکی چوتھی لہربھی ہوسکتی ہے۔

این سی او سی کا کہنا ہے کہ ڈیلٹا وائرس اورپاکستان میں موجوددیگروائرس سےمتعلق حکمت عملی ترتیب دے دی۔

این سی او سی نے خبردار کیا کہ ڈیلٹا وائرس پرقابو پانےکیلئے احتیاطی تدابیراختیارنہ کیں توخطرناک نتائج کاسامناکرناپڑسکتاہے، ڈیلٹاوائرس کی وجہ سے بھارت نے لاکھوں اموات کا سامنا کیا اور بھارت میں اسپتالوں میں آکسیجن کی کمی سےعوام اذیتیں جھیلتے رہے۔

این سی او سی کے مطابق ایس اوپیزپرعمل درآمداورویکسین لگوانےکی رفتارکو تیز کرنے پر زور دیا گیا ہے جبکہ ایس او پیز کا شدت سے نفاذ 9 سے 18 جولائی تک یقینی بنایا جائے گا، اس کے علاوہ عید پرغیرضروری نقل وحرکت محدودرکھنے کیلئے مختلف تجاویز زیر غورہیں اور ان تجاویز پر عملدرآمد کا فیصلہ کورونا کاپھیلاؤ مدنظر رکھ کرکیا جائے گا۔

نیشنل کمانڈ اینڈ آپریش سینٹر کے اعلامیے میں کہا گیا ہے کہ بڑھتی ہوئی وبا کے پیش نظر سیر و سیاحت پر پابندی کا بھی امکان ہے۔

این سی او سی نے ہدایت کی کہ پرائیویٹ،کارپوریٹ سیکٹر، چھوٹی، درمیانی اور بڑی انڈسٹری جبکہ زراعت، میڈیا، وکلا، فیکٹری مزدور، مارکیٹ میں کام کرنے والوں کو 31 جولائی سے قبل ویکسین لگوائی جائے۔

این سی اوسی کے مطابق یکم اگست سے ویکسینیشن سرٹیفکیٹ کے بغیر فضائی سفر پر پابندی عائد کردی گئی ہے جبکہ سیاحتی مقامات پرجانے والے 30 سال یا زائد عمر کے افراد پر بغیرویکسینیشن سرٹیفیکٹ کے پابندی لگادی گئی ہے۔

این سی او سی اعلامیے میں کہا گیا ہے کہ بغیرویکسینیشن سرٹیفیکٹ کےہوٹل بکنگ پر بھی پابندی ہوگی اور یکم اگست سے پابندی کا اطلاق18 سے 30 سال تک کے افراد پر بھی ہو گا جبکہ اس حوالے سے تمام متعلقہ اداروں کو ہدایات جاری کر دی گئی ہیں۔

اسلام آباد: عدالت نے لڑکا لڑکی تشدد کیس میں عثمان مرزا سمیت دیگر ملزمان کا مزید 4 روزہ جسمانی ریمانڈ منظور کرلیا۔

ڈسٹرکٹ اینڈ سیشن کورٹ اسلام آباد میں ای الیون کے علاقے میں لڑکے لڑکی کو برہنہ کرکے تشدد کرنے سے متعلق کیس کی سماعت ہوئی۔

مرکزی ملزم عثمان مرزا اور دیگر ملزمان کا دو روزہ جسمانی ریمانڈ مکمل ہونے پر پولیس نے انہیں جوڈیشل مجسٹریٹ وقار گوندل کی عدالت میں پیش کیا۔

پولیس نے ملزمان کے مزید جسمانی ریمانڈ کی استدعا کرتے ہوئے کہا کہ ملزمان کے قبضے سے واردات میں استعمال ہونے والے موبائل فونز برآمد کرنے ہیں۔ ادھر ملزمان کے وکیل نے جسمانی ریمانڈ کی مخالفت کرتے ہوئے عدالت سے جوڈیشل کرنے کی استدعا کی۔

عدالت نے عثمان مرزا سمیت تین ملزمان کا چار روزہ جسمانی ریمانڈ منظور کرتے ہوئے انہیں مزید چار روز کے لیے پولیس کے حوالے کردیا۔ جوڈیشل مجسٹریٹ نے ہدایت کی کہ چار روزہ جسمانی ریمانڈ کے دوران پولیس تفتیش مکمل کرے۔

واضح رہے کہ ملزمان کی تشدد کی ویڈیو وائرل ہوئی تھی جس پر پولیس نے انہیں گرفتار کیا تھا۔ واقعے میں اب تک چار ملزمان گرفتار ہو چکے ہیں۔ وزیراعظم عمران خان نے بھی گزشتہ روز واقعے کا نوٹس لیاتھا۔ تفتیشی آفیسر شفقت محمود ریکارڈ کے ساتھ عدالت کے سامنے پیش ہوئے۔ ملزمان کے وکیل نے کہا کہ اس کے موکل پراپرٹی ڈیلر ہیں اور وقوعہ چھ ماہ پرانا ہے۔

پاکستان مسلم لیگ (ن) کی نائب صدر مریم نواز نے آزاد کشمیر میں الیکشن مہم کا آغاز کرتے ہوئے کہا ہے کہ مسلم لیگ (ن) اور اس کے اراکین قومی و صوبائی اسمبلی اور کارکن جان گئے ہیں کہ الیکشن چوری کیسے روکنا ہے .اگر کشمیر کا الیکشن چوری ہوا تو آخری دم تک لڑیں گے اور شاہراہ دستور اسلام آباد پر کیمپ لگاکر بیٹھ جائیں گے۔

آزاد کشمیر کے علاقے چھتر کلاس میں عوامی جلسے سے خطاب کرتے ہوئے مریم نواز نے کہا کہ میری رگوں میں کشمیری ماں باپ کا خون ہے اور اس لحاظ سے میں آج اپنے گھر آئی ہوں، میں 12 سے 13 دن کے لیے کشمیر آئی ہوں اور کشمیریوں کے دکھ درد بھی بانٹوں گی۔

ان کا کہنا تھا کہ کشمیری چاہے سرحد کے اس پار ہو یا اس پار کشمیری ایک ہیں اور پاکستان آپ کے ساتھ ہے اور انشااللہ ان دکھوں، تکلیفوں اور پریشانیوں کو ایک نہ ایک دن ختم ہونا ہے اور چاہے وہ مقبوضہ کشمیر کے کشمیری ہوں یا آزاد کشمیر کے کشمیری ہوں، کشمیریوں کے دکھوں کو نواز شریف کی قیادت میں ختم ہونا ہے اور کشمیر کا بیٹا نواز شریف آپ کی سب جنگیں لڑے گا، آپ کی آزادی کی جنگ لڑے گا اور جیت کر آپ کی جھولی میں ڈالے گا۔

انہوں نے کہا کہ نواز شریف، کشمیر کے حقوق اور اس کی آزادی کی جنگ لڑے گا، جانتی ہوں کشمیریوں کو نواز شریف بہت شدت سے یاد آرہا ہے، مجھے بھی وہ بہت شدت سے یاد آرہے ہیں۔

نائب صدر مسلم لیگ (ن) نے کہا کہ آج بھی ان کی تقریر نواز شریف سے شروع ہوتی ہے اور نواز شریف پر ختم ہوتی ہے۔

ان کا کہنا تھا کہ جب ایک کرتا دھرتا کی جانب سے مجھے ختم کرنے کی دھمکی آئی تو نواز شریف ایک باپ کی حیثیت سے دکھ میں تھے لیکن کل انہوں نے کہا کہ بے شک میرے دل میں وہ بات ہے، ایک باپ کے طور پر تمہاری صحت اور سلامتی کے لیے ڈرتا ہوں لیکن تم کشمیر ضرور جاؤ۔

انہوں نے کہا کہ راجا فاروق حیدر، آزاد کشمیر کی مسلم لیگ (ن) اور کارکنوں کو سلام پیش کرتی ہوں، تاریخ میں شاید پہلی مرتبہ دباؤ کے باوجود، کشمیریوں کا الیکشن چوری کرنے کی کوششوں کے باوجود مسلم لیگ (ن) آج چٹان بن کر کھڑی ہے۔

ان کا کہنا تھا کہ جو دو لوگ لوٹے ہوگئے ہیں تو انہوں نے کہا کہ مسلم لیگ (ن) کو اُمیدوار نہیں مل رہے ہیں تو بتانا چاہتی ہوں کہ جب مسلم لیگ (ن) کی درخواستیں طلب کی تو ایک، ایک حلقے سے 10،10 اور 20،20 تک درخواستیں موصول ہوئیں۔

وفاقی وزرا کے بیانات کا حوالہ دیتے ہوئے انہوں نے کہا کہ اگر آپ کے پاس اتنے ہی اُمیدوار ہیں تو پھر مسلم لیگ (ن) کے دو اُمیدواروں کو توڑنے کی ضرورت کیوں پیش آئی۔

‘محسنوں نے آر ٹی ایس بیٹھا کر 22 کروڑ عوام کے سروں پر انہیں بیٹھایا تھا’
انہوں نے کہا کہ جب ووٹ چور، روٹی چور، آٹا چور، چینی چور، بجلی چور، دوا چور اور کشمیر چور عمران خان کل آپ کی زمین پر آئے گا تو آپ نے کیا سوال کرنے ہیں وہ بھی بتاؤں گی۔

ان کا کہنا تھا کہ نواز شریف جیسے عوامی اور منتخب وزیراعظم، جن کی دہلیز پر بھارتی وزرائے اعظم آتے ہیں اور ایک ایسا سلیکٹڈ جو ووٹ چوری کرکے آتا ہے، اس کی دور میں بھارت کو اتنی ہمت ہوتی ہے کہ اس کی حیثیت بھی بدل دیتا ہے۔

انہوں نے کہا کہ کشمیر کی حیثیت بدل دی گئی تو وہ کہتا ہے میں کیا کروں، میں کیا کرسکتا ہوں، تو کیا 22 کروڑ عوام آپ سے یہ کچھ سننے کے لیے بیٹھے ہیں کہ تم کشمیر گنوا کر آجاؤ اور لوگوں سے کہو کہ میں کیا کرسکتا ہوں۔

وزیراعظم عمران خان پر تنقید کرتے ہوئے انہوں نے کہا کہ ‘میں یہ کہہ سکتا ہوں کہ میں کیا کروں، یہ کہہ سکتا ہوں کہ مودی میرا فون نہیں اٹھاتا، میں یہ رونا رو سکتا ہوں کہ امریکا کا صدر مجھے نہیں بلاتا اور میں قوم کو صرف یہ کہہ سکتا ہوں کہ کشمیر کے بدلے قوم دو منٹ کی خاموشی اختیار کرے’۔

انہوں نے کہا کہ کیا یہ سننے کے لیے تمہارے محسنوں نے آر ٹی ایس بند کرکے 22 کروڑ عوام کے سر پر بٹھایا تھا اور آپ نے کہا تھا کہ کشمیر کا بھارت کی جھولی میں جانے کا سوگ ہر ہفتے منایا کریں گے لیکن وہ بات کہاں گئی، دو منٹ خاموشی کا کہا تھا، وہ خاموشی آج بھی آپ نے اختیار کرلی ہے۔

‘مسلم لیگ (ن) کا جیتا ہوا الیکشن چوری ہوا تو آخر تک لڑیں گے’
مریم نواز نے کہا کہ جو لوگ کشمیر کا ووٹ چوری کرنے کے لیے نظریں لگائے بیٹھے ہیں، کان کھول کر سن لو! مسلم لیگ (ن) وہ مسلم لیگ (ن) نہیں رہی، مسلم لیگ (ن) کو آپ کے حلق سے چوری شدہ سیٹیں نکالنے کا ہنر آگیا ہے۔

ان کا کہنا تھا کہ مسلم لیگ (ن) کے جوان، یوتھ ونگ، کارکن، اراکین قومی اسمبلی، ایم ایل ایز اور ایم پی ایز سب جان گئے ہیں کہ ووٹ چوری کو کس طرح سے روکنا ہے۔

انہوں نے کہا کہ ڈسکہ کا الیکشن یاد ہے نا، جس نے 2018 میں آر ٹی ایس بیٹھا کر عوام کا الیکشن چوری کرلیا، آج تین سال بعد بھی اس کو الیکشن چوری کرنے کی ضرورت پیش آرہی ہے، نواز شریف کی آواز ٹی وی پر بند کرنے کی ضرورت پیش آرہی ہے۔

ان کا کہنا تھا کہ گلگت بلتستان کے الیکشن میں انہوں نے ہمارے 7 لوگ توڑے اور وہ لوٹے ہوگئے تو پہلی دفعہ دیکھا کہ سب الیکٹیبلز تھے لیکن وہ سب ہار گئے، ٹھیک ہے مسلم لیگ (ن) نہیں جیتی لیکن تمہارے لوٹے بھی ہار گئے، حافظ حفیظ الرحمٰن طبعاً صلح جو شخص ہے لیکن یہاں راجا فاروق حیدر ہیں۔

مریم نواز نے کہا کہ اگر تم نے راجا فاروق حیدر کا جیتا ہوا الیکشن، کشمیریوں کا جیتا ہوا الیکشن، مسلم لیگ (ن) اور نواز شریف کا جیتا ہوا الیکشن، چوری کیا تو یاد رکھیں، راجا فاروق حیدر، مسلم لیگ (ن) آزاد کشمیر اور مریم نواز شریف آخری حد تک لڑیں گے۔

انہوں نے کہا کہ راجا فاروق حیدر سے جیتنا کوئی آسان کام نہیں ہے، انہوں نے پہلے کہہ دیا تھا کہ اگر میرا الیکشن چوری کرنے کی کوشش کی تو پوری طرح مزاحمت کروں گا اور اگر چوری ہوا تو شاہراہ دستور پر کیمپ لگا کر بیٹھ جاؤں گا۔

راجا فاروق حیدر کو مخاطب کرکے انہوں نے کہا کہ اگر آپ شاہراہ دستور پر بیٹھ گئے تو میں بھی آپ کے ساتھ وہاں احتجاج میں بیٹھوں گی۔

پاکستان پیپلز پارٹی (پی پی پی) کے چیئرمین بلاول بھٹو زرداری نے وزیر اعظم عمران خان پر تنقید کرتے ہوئے کہا ہے کہ عمران خان جیسے پرویز مشرف کا پولنگ ایجنٹ تھا ویسے ہی یہ نریندر مودی کا بھی پولنگ ایجنٹ تھا۔

آزاد کشمیر کے علاقے حویلی میں جلسے سے خطاب کرتے ہوئے ان کا کہنا تھا کہ ’میں اسی زمین میں آپ سے مخاطب ہوں جہاں 1974 میں شہید ذوالفقار علی بھٹو نے آپ سے خطاب کیا تھا‘۔

ان کا کہنا تھا کہ ’پاکستان پیپلز پارٹی کے ختم ہونے کا دعویٰ کرنے والوں کا دھیان اس جلسے میں موجود عوام کے سمندر کی جانب دلانا چاہتا ہوں‘۔

انہوں نے کہا کہ جب تک ہمارے کشمیری بھائی بہن میرے ساتھ کھڑے ہیں تب تک کوئی پاکستان پیپلز پارٹی کو ختم نہیں کرسکتا۔

چیئرمین پیپلز پارٹی کا کہنا تھا کہ ’اس خطے کی عوام نے 3 نسلوں سے ہمارے خاندان اور اس جماعت کا ساتھ دیا ہے اور اس جماعت نے بھی 3 نسلوں سے اس خطے کی عوام کا ساتھ دیا ہے‘۔

ان کا کہنا تھا کہ شہید ذوالفقار علی بھٹو نے اقوام متحدہ، پاکستان اور بھارت میں کشمیری عوام کی آواز اٹھائی، انہوں نے ہمیں سکھایا تھا کہ اگر ہمیں ہزار سال جنگ لڑنا پڑے تو ہم کشمیری عوام کے لیے لڑیں گے۔

انہوں نے کہا کہ بینظیر بھٹو نے ہمیں سکھایا تھا کہ جہاں کشمیری بہن بھائیوں کا پسینہ گرے گا وہاں پیپلز پارٹی کے جیالے کا خون گرے گا۔

بلاول بھٹو کا کہنا تھا کہ ’شہید بینظیر بھٹو ہر پاکستانی کے لیے ماں کی حیثیت رکھتی تھیں مگر اب ہماری بدقسمتی ہے کہ پاکستان کا وزیر اعظم کٹھ پتلی ہے‘۔

انہوں نے کہا کہ ’یہ ناجائز وزیر اعظم ہے، یہ کشمیر کے لیے بات بھی نہیں کرسکتا، کشمیر پر تاریخی حملہ ہو تو وزیر اعظم کہتا ہے کہ میں کیا کروں‘۔

چیئرمین پی پی پی کا کہنا تھا کہ ’وزیر اعظم ہمارے کشمیری بہن بھائیوں کی اُمیدوں کو پورا نہیں کرسکتے، ہر پاکستانی کا ایک ہی نعرہ ہے کہ کشمیر کا سودا نامنظور‘۔

انہوں نے کہا کہ ’ہم کشمیر کی عوام کے رائے پر چلنے والے ہیں، اگر فیصلہ ہونا ہے تو یہاں کی عوام نے فیصلہ کرنا ہے، ہم کسی کی ڈکٹیشن پر نہیں چلیں گے‘۔

ان کا کہنا تھا کہ ’کشمیر کی عوام حکم کرے کہ کل امن ہو تو ہم امن کروائیں گے، اگر آپ حکم دیں کہ کل جنگ کرو تو ہم سب جنگ کے لیے تیار ہیں‘۔

انہوں نے کہا کہ ’ہم نہ دہلی، نہ اسلام آباد کسی کا حکم نہیں مانتے صرف عوام کا حکم مانتے ہیں‘۔

بلاول بھٹو زرداری کا کہنا تھا کہ ’ہم سمجھتے ہیں کہ جیسے یہ وزیر اعظم، پرویز مشرف کا پولنگ ایجنٹ تھا ویسے ہی یہ نریندر مودی کا پولنگ ایجنٹ تھا‘۔

ان کا کہنا تھا کہ ’ہم نریندر مودی کو دعوت دے کر اپنی شادیوں پر بلانے والا وزیر اعظم بھی نہیں چاہتے، جو کشمیر کی عوام کا دشمن ہے وہ میرا مخالف، میرا دشمن ہے‘۔

انہوں نے کہا کہ ’پیپلز پارٹی ملک کی واحد جماعت ہے جو کشمیر کا کبھی سودا نہیں کرسکتی اور مودی کی آنکھوں میں آنکھیں دے کر جواب دے سکتی ہے‘۔

چیئرمین پیپلز پارٹی کا کہنا تھا کہ ’ہمیں آزاد کشمیر میں رہنے والوں کے حقوق کا سودا بھی روکنا ہے، یہاں کی عوام کو تبدیلی کی تباہی سے بچانا ہوگا‘۔

ان کا کہنا تھا کہ پورا پاکستان پہچان گیا ہے تبدیلی کا اصل چہرہ، مہنگائی، غربت اور بیروزگاری ہے۔

انہوں نے کہا کہ سرکاری ملازمین سے پوچھیں کہ کس کے دور میں ان کی تنخواہوں میں سب سے زیادہ اضافہ ہوا۔

انہوں نے بتایا کہ ’ہم نے سپاہیوں کی تنخواہ میں 175 فیصد اضافہ کیا، آج بھی مہنگائی اور معاشی بحران ہے تب بھی مہنگائی اور معاشی بحران تھا‘۔

انہوں نے دعویٰ کیا کہ ’مجھے بھاری اکثریت ملی تو یہاں کا جیالا وزیر اعظم منتخب کروں گا اور سب سے پہلے تنخواہ میں اضافہ کریں گے، پینشن میں اضافہ کریں گے اور نوجوانوں کو روزگار دلائیں گے‘۔

بلاول بھٹو کا کہنا تھا کہ ’یہ جو آج کل احساس احساس کرتے ہیں، انہیں کوئی احساس نہیں، میں نے بجٹ بک کو پڑھا ہے اس میں کہیں احساس ذکر ہی نہیں، اگر ذکر ہے تو بینظیر انکم سپورٹ پروگرام کا ذکر ہے‘۔

ان کا کہنا تھا کہ ’آپ نام جو بھی رکھیں، ملک کی غریب عوام جانتی ہے کہ یہ شہید بی بی کا منصوبہ ہے‘۔