Category تازہ ترین

لاہور: پنجاب حکومت نے وزیر اعلیٰ عثمان بزدار کے ہیلی کاپٹر کے مبینہ طور پر غلط استعمال پر ان کے ذاتی عملے کے افسر (پی ایس او) کے دوستوں کے خلاف تحقیقات کا آغاز کردیا۔

رپورٹ کے مطابق وزیراعلیٰ عثمان بزدار کے ہیلی کاپٹر کو ان کے پی ایس او حیدر علی کے دوستوں نے لاہور سے فیصل آباد جانے کے لیے مبینہ طور پر استعمال کیا، بعد ازاں سوشل میڈیا ان کی تصاویر اور ویڈیوز بھی وائرل ہوئیں۔

یہ خبر پھیلتے ہی وزیراعلیٰ کے ترجمان نے واقعے کی تردید کرتے ہوئے دعویٰ کیا کہ فیصل آباد کے لیے ہیلی کاپٹر کی کوئی پرواز نہیں ہوئی تھی اور اس خبر میں کوئی صداقت نہیں۔

ترجمان نے واضح کیا کہ پی ایس او کے دوستوں نے صرف ہیلی کاپٹر کے ساتھ تصاویر کھینچیں اور کہیں بھی سفر کرنے کے لیے استعمال نہیں کیا۔

پرنسپل سیکریٹری برائے وزیراعلیٰ طاہر خورشید سے رابطہ کیا گیا تو انہوں نے بتایا کہ ہیلی کاپٹر کے لاگ بک سے ڈیٹا چیک کیا جارہا ہے۔

علاوہ ازیں انہوں نے مزید کہا کہ ’یہ واقعہ شاید 2 برس پرانا ہے‘۔

حیدر علی نے کہا کہ وہ ہیلی کاپٹر کو وزیراعلیٰ کی اجازت کے بغیر اس کے ہینگر سے کبھی باہر نہیں لا سکتے اور پرواز کے لیے متعدد اجازتیں درکار ہوتی ہیں۔

انہوں نے اصرار کیا کہ ابتدائی تحقیقات کی رپورٹ سے یہ واضح ہو گیا ہے کہ ’ہیلی کاپٹر فیصل آباد نہیں گیا‘۔

حیدر علی نے انگریزی اخبار ڈان کو بتایا کہ 2 سال قبل اس کے قریبی رشتے دار کے دوستوں نے ہیلی کاپٹر کے اندر اور باہر سیلفیاں لی تھیں۔

ہیلی کاپٹر سے لاہور کے فضائی نظارے کو ظاہر کرنے والی ویڈیوز کے بارے میں حیدر علی نے کہا کہ یہ کچھ لوگوں کی پنجاب حکومت کو بدنام کرنے کی سازش ہے۔

حیدر علی نے مزید زور دیا کہ چیف سیکریٹری بھی وزیر اعلی کی اجازت کے بغیر ہیلی کاپٹر کا استعمال نہیں کرسکتے ہیں۔

انہوں نے کہا کہ ’میں ملازمت سے استعفیٰ دوں گا اگر یہ معلوم ہوجاتا ہے کہ میں نے اپنے رشتہ دار کے دوستوں کے لیے ہیلی کاپٹر کے فیصل آباد جانے کی اجازت دی ہے‘۔

دوسری جانب وزیر اعلیٰ کے ترجمان نے بعض ٹی وی چینلز پر نشر ہونے والی خبروں کو بھی بے بنیاد قرار دیتے ہوئے کہا کہ صرف وزیر اعلیٰ کو ہیلی کاپٹر استعمال کرنے کا اختیار حاصل ہے۔

انہوں نے مزید کہا کہ عملہ تکنیکی معائنے کے دوران ہیلی کاپٹر کی پرواز لے سکتا ہے۔

ان کا کہنا تھا کہ پی ایس او کے پاس ہیلی کاپٹر کو استعمال کرنے کا کوئی اختیار نہیں ہے اور ہیلی کاپٹر کی لاگ بک کا مکمل ریکارڈ برقرار رکھا گیا ہے۔

وزیراعلیٰ کے ترجمان نے زور دیا کہ خبر نشر یا شائع کرنے سے قبل صحافتی ضوابط اخلاق کا خیال نہیں رکھا گیا اور نجی ٹی وی چینلز اور نامہ نگاروں کے خلاف بے بنیاد اور گمراہ کن خبروں کی نشریات پر قانونی کارروائی کرنے کا حق استعمال کیا جاسکتا ہے۔

اسلام آباد: ملک میں چین سے کورونا ویکسین کی ایک اور کھیپ آج (اتوار) کو اسلام آباد پہنچے گی تاہم بعض بین الاقوامی ایئرلائنز کی جانب سے اپنی پروازیں اچانک منسوخ کرنے کے بعد حکومت نے دوسرے ممالک میں پھنسے پاکستانی مسافروں کو نظرانداز نہیں کیا ہے۔

رپورٹ کے مطابق حکام کی جانب سے سفری پابندیوں میں آسانی پیدا کرتے ہوئے ایئر لائنز نے پاکستان کے لیے اضافی پروازیں طے کیں اور بکنگ بھی کی گئی لیکن نیشنل کمانڈ اینڈ آپریشن سینٹر (این سی او سی) نے بعض علاقوں میں کووڈ کے کیسز میں اضافے پر ٹریول ایڈوائزری جاری کی جس کے بعد پروازوں کو منسوخ کردیا گیا۔

سول ایوی ایشن اتھارٹی (سی اے اے) نے 5 بین الاقوامی ایئر لائنز کے ساتھ مذکورہ معاملہ اٹھاتے ہوئے انہیں ہدایت کی کہ وہ مسافروں کو کسی بھی دوسری ایئرلائن میں جگہ فراہم کریں ورنہ انہیں ہوٹل میں رہائش اور ہرجانے کی ادائیگی کی جائے۔

سی اے اے نے ان ایئر لائنز کو متنبہ کیا کہ ان کے خلاف باقاعدہ کارروائی شروع کی جا سکتی ہے جس میں مالی جرمانہ، ایک سے زیادہ مرتبہ پروازوں کی منسوخی اور شیڈول کی اجازت کو منسوخ کرنا شامل ہوسکتا ہے۔

قطر ایئر ویز، ترک ایئر لائن، امارات ایئر لائن، اتحاد ایئر ویز اور فلائی دبئی کے نام سی اے اے نے اپنے مراسلے میں اچانک پرواز منسوخی پر پاکستانی مسافروں کو ہونے والی پریشانی کا مسئلہ اٹھایا۔

مراسلے میں کہا گیا کہ ’یہ معاملہ انتہائی سنجیدگی سے آپ کے علم میں لایا جاتا ہے کہ حالیہ ہفتوں میں آپ کی پاکستان جانے والی ایئر لائن کی پرواز منسوخ ہونے سے بہت سارے مسافر متاثر ہوئے ہیں، 5 مئی 2021 کے بعد سے فلائٹ آپریشن پابندیوں (یعنی منظور شدہ ان باؤنڈ شیڈول فلائٹ آپریشنز کی 20 فیصد) سے متعلق اور ان پابندیوں کے بعد وقتاً فوقتاً توسیع پر متعلقہ حکام کو بروقت مطلع کیا، 5 مئی کے بعد آپ کی ایئر لائن نے بکنگ کی جو بلاجواز تھی‘۔

انہوں نے کہا کہ اس طرح کی بکنگ صرف پابندیوں کو ختم کرنے کی تصدیق کے بعد ہی ہونی چاہیے تھی، متاثرہ مسافروں کی تعداد کو بہت زیادہ تکلیف اور مالی نقصانات کا سامنا کرنا پڑا ہے کیونکہ انہوں نے اپنی مخصوص پرواز کے روانگی کی تاریخوں کے مطابق بیرون ممالک سے پاکستان روانگی کا منصوبہ بنایا تھا۔

ایئر لائنز کو آگاہ کیا گیا کہ ہدایت پر تعمیل سے متعلق تازہ رپورٹ 8 جولائی تک فراہم کی جانی چاہیے اور اس میں ناکامی کی صورت میں پاکستان سی اے اے باقاعدہ کارروائی شروع کرنے کی پابند ہوگی جس میں مالی جرمانہ، ایک یا زیادہ پروازوں کی منسوخی اور شیڈول اجازت کی منسوخی شامل ہوسکتی ہے۔

علاوہ ازیں این سی او سی کے مطابق کورونا وائرس کے مثبت کیسز کی شرح 2 فیصد سے بڑھ کر 2.91 فیصد ہوگئی ہے۔

اگر ویکسین کی بات کی جائے تو چین کی جانب سے سائنو فام کی تقریباً 20 لاکھ ویکسین اتوار (آج) اسلام آباد میں موصول کرے گا۔

دوسری جانب محکمہ صحت پنجاب اور محکمہ صحت نے کووڈ 19 ویکسینیشن مراکز میں جعلی اندراج کا نوٹس لیا ہے۔

ایک پریس ریلیز کے مطابق محکمہ صحت نے معاملے کی چھان بین کے لیے ایک کمیٹی تشکیل دی ہے۔

بیان میں مزید کہا گیا کہ پنجاب میں کووڈ 19 میں بڑے پیمانے پر ویکسینیشن مہم کے دوران معلوم چلا کہ ویکسینیٹر اور ڈیٹا انٹری آپریٹر جعلی اندراج کر رہے ہیں۔

وفاقی وزیر اطلاعات و نشریات فواد چوہدری کا کہنا ہے کہ سابق صدر آصف علی زرداری کے جعلی اکاؤنٹس کیس میں قومی احتساب بیورو (نیب) اب تک 33 ارب روپے وصول کر چکا ہے۔

سماجی رابطے کی ویب سائٹ پر ٹوئٹ میں فواد چوہدری نے کہا کہ ‘جعلی اکاؤنٹس کیس میں نیب اب تک 33 ارب روپے وصول کر چکا ہے اور یہ تقریباً 20 کروڑ ڈالر بنتے ہیں، اصل مقدمہ 5000 ارب روپے کے لگ بھگ ہے’۔

انہوں نے حکومت سندھ پر درپردہ تنقید کرتے ہوئے کہا کہ ‘اس وصولی سے آپ اندازہ لگا لیں کے اس ملک میں کرپشن کی کیا سطح رہی ہے اور حکمرانوں نے سندھ اور پاکستان کو کیسے لوٹا ہے’۔

واضح رہے کہ یہ پہلا موقع نہیں ہے جب وفاقی وزیر نے مبینہ کرپشن کے باعث حکومت سندھ پر تنقید کی ہے۔

اپنے حالیہ دورہ کراچی میں فواد چوہدری نے سندھ کے حکمرانوں اور پیپلز پارٹی کی قیادت پر بیرون ملک منی لانڈرنگ کے لیے عوامی فنڈز کے غلط استعمال کا الزام لگایا تھا۔

انہوں نے ‘تھرڈ پارٹی’ کے ذریعے وفاقی حکومت کی جانب سے حکومت سندھ کو دیے جانے والے فنڈز کی نگرانی کی بھی وکالت کی تھی۔

فواد چوہدری نے دعویٰ کیا تھا کہ ‘حکومت سندھ کو ملنے والا پیسہ دبئی، کینیڈا اور یورپ سے برآمد ہو رہا ہے’۔

جعلی اکاؤنٹس کیس
خیال رہے کہ جعلی بینک اکاؤنٹس اسکینڈل میں لگ بھگ 172 افراد کو تحقیقات کا سامنا ہے جن میں سابق صدر آصف علی زرداری، ان کی بہن فرالن تالپور، پاکستان پیپلز پارٹی کے چیئرمین بلاول بھٹو زرداری، وزیر اعلیٰ سندھ مراد علی شاہ، سابق وزیر اعلی قائم علی شاہ، صوبائی وزیر انور سیال، پراپرٹی ٹائیکون ملک ریاض سمیت دیگر شامل ہیں۔

آصف زرداری، فریال تالپور اور متعدد دیگر کاروباری افراد کے خلاف سمٹ بینک، سندھ بینک اور یو بی ایل میں 29 ‘بے نامی’ اکاؤنٹس کے ذریعے 35 ارب روپے کی جعلی ٹرانزیکشنز سے متعلق 2015 کے کیس کے طور پر تحقیقات کی جارہی ہیں۔

اس سلسلے میں ایف آئی اے نے معروف بینکر حسین لوائی کو گرفتار کیا تھا، جس کے بعد اگست 2018 میں جعلی اکاؤنٹس کیس میں ہی اومنی گروپ کے چیئرمین انور مجید اور ان کے بیٹے عبدالغنی مجید کو بھی گرفتار کر لیا گیا تھا۔

7 ستمبر 2018 کو سپریم کورٹ نے سابق صدر مملکت اور ان کی بہن کی جانب سے مبینہ طور پر جعلی اکاؤنٹس کے ذریعے اربوں روپے کی منی لانڈرنگ کیے جانے کے مقدمے کی تحقیقات کے لیے جوائنٹ انویسٹی گیشن ٹیم (جے آئی ٹی) تشکیل دے دی تھی۔

اس جے آئی ٹی نے سابق صدر آصف علی زرداری، ان کی ہمشیرہ فریال تالپور سے پوچھ گچھ کی تھی جبکہ چیئرمین پی پی پی بلاول بھٹو سے بھی معلومات حاصل کرنے کا فیصلہ کیا تھا۔

آصف علی زرداری نے جے آئی ٹی کو بتایا تھا کہ 2008 سے وہ کسی کاروباری سرگرمیوں میں ملوث نہیں رہے اور صدر مملکت کا عہدہ سنبھالنے کے بعد انہوں نے خود کو تمام کاروبار اور تجارتی سرگرمیوں سے الگ کرلیا تھا۔

بعد ازاں اس کیس کی جے آئی ٹی نے عدالت عظمیٰ کو رپورٹ پیش کی تھی، جس میں 172 افراد کا نام سامنے آیا تھا، جس پر وفاقی حکومت نے ان تمام افراد کے نام ای سی ایل میں شامل کردیے تھے۔

اس کے بعد سپریم کورٹ نے یہ کیس نیب کے سپرد کرتے ہوئے 2 ماہ میں تحقیقات کا حکم دیا تھا اور نیب نے اس کے لیے مشترکہ انویسٹی گیشن ٹیم قائم کی تھی، جس کے سامنے آصف زرداری پیش ہوئے تھے۔

15 مارچ کو کراچی کی بینکنگ عدالت نے جعلی اکاؤنٹس کے ذریعے منی لانڈرنگ سے متعلق کیس کی کراچی سے اسلام آباد منتقلی کی نیب کی درخواست منظور کی تھی۔

جس کے بعد اسلام آباد کی احتساب عدالت کے جج محمد ارشد ملک نے اس کیس میں نامزد آٹھوں ملزمان کو طلب کرتے ہوئے سماعت 8 اپریل تک ملتوی کی تھی اور 9 اپریل کو احتساب عدالت نے باقاعدہ طور پر جعلی بینک اکاؤنٹس اور میگا منی لانڈرنگ کیس کی سماعت کا آغاز کیا تھا۔

وزیر اعلیٰ سندھ مراد علی شاہ کا کہنا ہے کہ وفاقی حکومت، سندھ سے اکٹھا کی گئی رقم میں سے بہت مختصر حصہ واپس کرتی ہے۔

کراچی میں ملیر اور کورنگی کے درمیان سڑک کی افتتاحی تقریب سے خطاب کرتے ہوئے وزیر اعلیٰ سندھ مراد علی شاہ کا کہنا تھا کہ ’10 ماہ میں سندھ حکومت کا کراچی کی ترقی کے لیے تیسرا منصوبہ ہے جس کا افتتاح آج کردیا گیا ہے‘۔

انہوں نے کہا کہ ’اس منصوبے کا افتتاح بلاول بھٹو زرداری نے کرنا تھا تاہم وہ مصروفیات کی وجہ سے نہیں آسکے‘۔

ان کا کہنا تھا کہ ’پاکستان پیپلز پارٹی (پی پی پی) خدمت میں سب سے آگے ہے اور ہم یہاں اس کا عملی مظاہرہ کرکے دکھا رہے ہیں‘۔

وزیر اعلیٰ سندھ کا کہنا تھا کہ ’یہ منصوبہ عالمی بینک کے ساتھ کراچی کی ضروریات کے حوالے سے کی گئی تحقیق کا ایک حصہ ہے‘۔

ان کا کہنا تھا کہ ’3.5 کلومیٹر کی یہ سڑک بنانا مقصد نہیں تھا، یہاں شجر کاری بھی کی گئی ہے لوگوں کے بیٹھنے کی جگہ بھی بنائی گئی ہے، اس میں پانی کی لائن اور سیوریج کی لائن بھی ڈالی ہے‘۔

انہوں نے کہا کہ ’اوپر سے کام کرنا بہت آسان ہوتا ہے وہ چند دنوں کے دکھاوے کے بعد ختم ہوجاتا ہے‘۔

مراد علی شاہ کا کہنا تھا کہ ’ہم چاہتے ہیں کہ جہاں بھی یہ منصوبے بنیں وہاں کی آبادی اس سے بھرپور فائدہ اٹھائے اور اپنے گھر کا حصہ سمجھیں اور اس کا خیال رکھیں‘۔

ان کا کہنا تھا کہ ’یہ عوام کی چیز ہے، حکومت اسے بنانے کا وسیلہ ہے، اس کا خیال رکھنا عوام کا کام ہے‘۔

انہوں نے کہا کہ ’سندھ حکومت تنقید سننے کی عادی ہوچکی ہے، کسی اور پر تنقید ہوتی ہے تو ہمیں پریشانی ہونے لگتی ہے‘۔

وزیر اعلیٰ سندھ کا کہنا تھا کہ ’کراچی کے ترقی کے منصوبوں میں مزید بہتری آئے گی، اس منصوبے کا 60 سے 70 فیصد حصہ کورنگی میں بھی ہے اور وہ بھی ہمارا ہے جبکہ کورنگی میں ہمارا کوئی ایک کونسلر بھی نہیں‘۔

ان کا کہنا تھا کہ شیر پاؤ کالونی، لیاری، ضلع جنوبی، گزری اسپورٹس گراؤنڈ، بوٹ بیسن اور ابراہیم حیدری سمیت دیگر علاقوں میں کافی نئے منصوبے بنانے جارہے ہیں۔

انہوں نے کہا کہ ’سندھ حکومت نے صوبے میں جو کام شروع کیا ہے اس کا دائرہ کار بڑھا کر پورے پاکستان تک اسے لے کر جائیں گے‘۔

صوبائی اسمبلی میں بجٹ تقریر کے دوران اپوزیشن کے شور شرابے پر بات کرتے ہوئے ان کا کہنا تھا کہ ’مجھے اسمبلی میں بات کرنی تھی تاہم شور شرابا کرکے مجھے بات نہیں کرنے دی گئی‘۔

ان کا کہنا تھا کہ ’بجٹ پیش کرتے ہوئے 12واں سال ہے، ایک بجٹ تقریر نہیں کی تو کوئی فرق نہیں پڑتا‘۔

انہوں نے کہا کہ ’کہا گیا کہ سندھ حکومت نے بجٹ میں کراچی کے لیے بہت تھوڑے منصوبے دیے ہیں، کراچی کے اندر اس وقت 992 ارب روپے کے منصوبے زیر غور ہیں‘۔

وزیر اعلیٰ سندھ کا کہنا تھا کہ ’اس کے علاوہ ’ضلعی ترقی کے 10 ارب کے منصوبے بھی شامل ہیں‘۔

ان کا کہنا تھا کہ ’کہا جاتا ہے کہ ہم نے 1500، 1600 ارب دے دیے، کوئی احسان نہیں کیا سب یہاں سے ہی اکٹھے کیے گئے ہیں، وفاق ہمیں یہاں سے اکٹھے کیے گئے پیسوں میں سے بہت چھوٹا سا حصہ واپس کرتا ہے‘۔

انہوں نے کہا کہ ’عالمی بینک کا شکرگزار ہوں گزشتہ 6 سے 7 سال سے انہیں مشغول رکھا ہوا ہے، میں براہ راست 3 سے 4 مرتبہ ان کے دفتر جاچکا ہوں‘۔

انہوں نے مزید کہا کہ ’ہم جو قرض لیتے ہیں اس کو واپس بھی سندھ نے کرنا ہوتا ہے‘۔

وزیراعظم کے معاون خصوصی شہباز گل نے کہا ہےکہ بلاول بھٹو نوکری کی عرضی لے کر امریکا جارہے ہیں جہاں وہ پیپلزپارٹی کو حکومت میں لانے کا کہیں گے۔

اسلام آباد میں پریس کانفرنس کرتے ہوئے شہباز گل نے کہا کہ بلاول بھٹو سی وی لے کر واشنگٹن جا رہے ہیں اور وہ امریکا جا کر کہیں گے ہمیں حکومت میں لائیں ہم سب کرنے کو تیار ہیں مگر ہم ایسی ڈیل نہیں کرنے دیں گے۔

انہوں نے کہا کہ بلاول جو عرضیاں لے کر امریکا جا رہے ہیں ہم ایسا نہیں ہونے دیں گے۔

شہباز گل کا کہنا تھا کہ مشرف کے زمانے میں تیرہ ڈرون حملے ہوئے اور پیپلزپارٹی کے دور میں 340 ڈرون حملے ہوئے جب کہ کونڈولیزارائس نے ڈرون حملوں کے لیے مشرف اور محترمہ کی ڈیل کرائی۔

انہوں نے مزید کہا کہ پیپلزپارٹی والے امریکا کو اڈے دینے کا ملبہ پرویز مشرف کے دورپر ڈالتے ہیں۔

پشاور ہائی کورٹ کے ایبٹ آباد سرکٹ بینچ نے غداری کیس میں جمعیت علمائے اسلام (ف) کے رہنما مفتی کفایت اللہ کی ضمانت پر رہائی کا حکم دے دیا۔

جسٹس شکیل احمد نے مفتی کفایت اللہ کو ضمانت کے عوض 5 لاکھ مچلکے جمع کرانے کا حکم دیا۔

میڈیا سے گفتگو میں مفتی کفایت اللہ کے وکیل بلال خان نے بتایا کہ قانونی تقاضے مکمل ہونے کے بعد ان کے موکل کو پیر تک رہا کردیا جائے گا۔

انہوں نے کہا کہ عدالت کی جانب سے آئندہ سماعت کی تاریخ کا اعلان بعد میں کیا جائے گا۔

جمعیت علمائے اسلام (ف) کے رہنما کے وکلا محمد بلال خان، کامران مرتاز اور احمد علی شاہ عدالت میں پیش ہوئے جبکہ سرکاری وکیل ایڈیشنل ایڈووکیٹ جنرل راجا زبیر اور اسسٹنٹ جنرل سردار محمد آصف بھی پیش ہوئے۔

مانسہرہ پولیس نے مفتی کفایت اللہ کو 14 اپریل 2021 کو گرفتار کیا تھا، ان کے خلاف تعزیرات پاکستان کی دفعات 503، 505، 506، 21 اے ، 124 اے، 131 اے اور 153 اے کے تحت مقدمہ درج کیا گیا تھا۔

وکیل بلال خان نے کہا کہ ان کے موکل کفایت اللہ کو اس سے قبل ضمانت کے لیے مانسہرہ کے ایڈیشنل ڈسٹرکٹ اینڈ سیشنز جج کے پاس بھیجا گیا لیکن ضمانت نہیں ہوسکی کیونکہ سی ٹی ڈی نے مقدمے میں غداری کی دفعات شامل کی ہیں۔

واضح رہے کہ وزیر اعظم عمران خان کی زیر صدارت وفاقی کابینہ کے اجلاس میں فیصلہ کیا گیا تھا کہ مفتی کفایت اللہ کو نجی ٹیلی ویژن کے شو پر ریاستی اداروں کے خلاف نامناسب الفاظ استعمال کرنے پر غداری کے الزام میں گرفتار کیا جائے۔

مقدمہ درج ہونے کے بعد مفتی کفایت اللہ روپوش ہوگئے تھے لیکن منظر عام پر آنے کے بعد پولیس نے انہیں گرفتار کرلیا۔

جیل انتظامیہ کی جانب سے آنکھوں کے علاج کے لیے ہسپتال جانے کی اجازت نہ دینے پر جے یو آئی (ایف) کے رہنما نے گزشتہ ہفتے بھوک ہڑتال بھی کی تھی۔

ایف آئی اے نے پتوکی میں پاکستان تحریک انصاف کے رکن قومی اسمبلی طالب حسین نکئی کے بیٹے کی فیکٹری پر چھاپہ مار کر بجلی اور گیس کی چوری پکڑ لی۔

ایف آئی اے حکام کے مطابق فیکٹری کو غیر قانونی طریقے سے بجلی اور گیس فراہم کی جا رہی تھی جس سے سرکاری خزانے کو کروڑوں روپے کا نقصان ہو رہا تھا۔

وفاقی تحقیقاتی ایجنسی کے مطابق فیکٹری سے غیر قانونی طور پر ڈالی گئی 150 فٹ گیس لائن پکڑی گئی جسے گھریلو میٹر استعمال کر کے زیر زمین فیکٹری تک لے جایا گیا تھا۔

ایف آئی اے کے مطابق ڈائریکٹ تار لگا کر کئی سال سے بجلی بھی چوری کی جا رہی تھی، سردار احمد ایاز نکئی کے خلاف بجلی اور گیس چوری کے مقدمات درج کر لیے گئے ہیں۔

وفاقی تحقیقاتی ایجنسی (ایف آئی اے) نے مسلم لیگ ن کے رہنما اور پنجاب اسمبلی میں قائد حزب اختلاف حمزہ شہباز کو پراپرٹیز کی منی ٹریل کے ساتھ طلب کر لیا۔

ایف آئی اے نے منی لانڈرنگ کی تحقیقات کے لیے لیگی رہنما حمزہ شہباز کو 30 روز میں پراپرٹیز کی منی ٹریل دینے کا کہا ہے۔

نوٹس میں کہا گیا ہے کہ حمزہ شہباز رواں ماہ کے اختتام تک ایف آئی اے کے دفتر پیش ہوں، منی ٹریل نا دینے کی صورت میں پراپرٹی بحق سرکار ضبط کر لی جائے گی۔

ایف آئی اے کے نوٹس میں کہا گیا ہے کہ حمزہ شہباز گاڑیوں، بینک اکاؤنٹس، شیئرز، جیولری، کیش، پرائز بانڈز کی تفصیلات بھی ساتھ لائیں۔

اسلام آباد: ایف آئی اے نے تحریک انصاف کے ناراض رہنما جہانگیر ترین کے بیٹے علی ترین کو بھی شوکاز نوٹس جاری کردیا۔

تفصیلات کے مطابق ایف آئی اے نے حمزہ شہباز کے بعد تحریک انصاف کے ناراض رہنما جہانگیر ترین کے بیٹے علی ترین کو بھی شوکاز نوٹس جاری کر دیا ہے، جس میں متعلقہ ریکارڈ طلب کیا گیا ہے۔

ذرائع کے مطابق نوٹس میں علی ترین سے بھی بینک اکاؤنٹس اور سرمایہ کاری کا ریکارڈ طلب کیا گیا ہے، اور کاروبار کے لیے بینکوں یا فیملی ممبران سے جتنی رقم لی اس کا بھی ریکارڈ بھی مانگا گیا ہے، جب کہ ذرائع کا کہنا ہے کہ مقررہ وقت تک ریکارڈ فراہم نہ کرنے پرعلی ترین کے اکاؤنٹس اور پراپرٹی کو بھی منجمد کر دیا جائے گا۔

واضح رہے کہ ایف آئی اے کی پانچ رکنی ٹیم نے مسلم لیگ (ن) کے رہنما اور پنجاب اسمبلی میں اپوزیشن لیڈر حمزہ شہباز شریف سے بھی تحقیقات کی اور ان سے رمضان اور العریبیہ شوگر ملز سے متعلق سوالات کیے، حمزہ شہباز شریف پر ہنڈی کے ذریعے بیرون ملک رقم منتقل کرنے کا بھی الزام ہے۔ ایف آئی اے نے پیشی سے قبل حمزہ شہباز کو سوال نامہ بھجواتے ہوئے متعلقہ ریکارڈ بھی ساتھ لانے کی ہدایت کی تھی۔

وفاقی وزیر تعلیم شفقت محمود نے ملک بھر کے طلبہ کو امتحانات کی تیاری کا مشورہ دیتے ہوئے کہا ہے کہ اس سال امتحانات ملتوی یا منسوخ نہیں ہوں گے۔

لاہور میں ایک تقریب میں صحافیوں سے گفتگو کرتے ہوئے وفاقی وزیر تعلیم نے کہا کہ پچھلے سال ناصرف امتحانات منسوخ کیے گئے بلکہ تمام بچوں کو پاس بھی کیا گیا لیکن اس سال تمام وفاقی اکائیوں نے فیصلہ کیا ہے کہ امتحان کے بغیر گریڈ نہیں ہوں گے۔

ان کا کہنا تھا کہ اے اور او لیول کے امتحانات ہو چکے ہیں اور اگلے چند دنوں میں نویں سے بارہویں جماعت کے امتحانات ہونے والے ہیں اور طالبعلموں کو ہدایت کی کہ وہ تعلیم جاری رکھیں کیونکہ امتحان نہ ملتوی ہوں گے نہ ہی منسوخ ہوں گے۔

انہوں نے مزید کہا کہ بچےامتحانات کی تیاری کرتے رہیں اور چند بچے جو اس امید پر ہیں کہ شاید امتحانات منسوخ ہوں گے تو ایسا نہیں ہو گا کیونکہ یہ تمام صوبوں اور وفاقی اکائیوں نے متفقہ طور پر یہ فیصلہ کیا ہے اور بورڈ کی جانب سے اعلان کردہ شیڈول کے مطابق ہوں گے۔

شفقت محمود نے کہا کہ میں تمام بچوں کو یہ مشورہ دوں گا کہ اپنی تعلیم جاری رکھیں اور ادھر ادھر کی باتوں اور افواہوں پر کان نہ دھریں اور جو ڈیٹ شیٹ بورڈ نے دی ہے، اس کے مطابق امتحانات ہوں گے اور اس کا اطلاق پورے ملک میں ہو گا۔

انہوں نے کہا کہ ملک میں 29 بورڈ ہیں، انہوں نے اپنی اپنی ڈیٹ شیٹ جاری کی ہیں اور اسی کے مطابق امتحان ہو گا۔

گرمیوں کی چھٹیوں کے حوالے سے سوال پر وزیر تعلیم نے کہا کہ ہم نے صوبوں کو اس بات کا اختیار دے دیا ہے کہ وہ گرمیوں کی چھٹیاں کریں یا نہ کریں اور صورتحال کے مطابق فیصلہ کریں۔

ان کا کہنا تھا کہ صوبہ پنجاب نے گرمیوں کی چھٹیوں کے حوالے سے اپنا فیصلہ کیا ہے، اسلام آباد میں ہم 18 جولائی سے اسکول بند کرنے جا رہے ہیں، تو اس مرتبہ غیرمعمولی حالات ہیں اور اس میں صوبے جو بھی فیصلہ کریں گے وہ ٹھیک ہو گا۔

انہوں نے کہا کہ اسکول بند ہونے سے تعلیم کا بہت نقصان ہوا ہے لہٰذا موسم، حالات کو مدنظر رکھتے ہوئے بچوں کی صحت کو خطرے میں ڈالے بغیر جتنا زیادہ ممکن ہو اسکولوں کو کھلنا چاہیے۔

یاد رہے کہ وفاقی وزیر تعلیم شفقت محمود نے گزشتہ ماہ جون کے آغاز میں اعلان کیا تھا کہ نویں سے بارہویں جماعت کے طلبہ صرف اختیاری مضامین کے امتحان دیں گے اور یہ امتحانات 10 جولائی سے ہوں گے۔

ملک کے مختلف شہروں میں انٹر اور میٹرک کے امتحانات 10 جولائی سے شروع ہورہے ہیں جو 31 جولائی تک جاری رہیں گے جبکہ سندھ میں میٹرک اور بارہویں کے امتحانات بالترتیب 5 جولائی اور 26 جولائی سے ہوں گے۔

امتحانات کے اعلان کے بعد سے طلبہ کی جانب سے کورونا وائرس کی وجہ سے تعلیمی سلسلے کا دورانیہ انتہائی کم ہونے کی وجہ سے انہیں منسوخ کرنے کا مطالبہ بارہا کیا جاچکا ہے اور طلبہ مختلف شہروں میں احتجاج بھی کررہے ہیں۔

جیسے جیسے بورڈ امتحانات کے دن نزدیک آرہے ہیں سماجی روابط کی مختلف سائٹس پر بھی مختلف ٹرینڈز کی صورت میں یہ مطالبہ زور پکڑتا جارہا ہے اور آج 3 جولائی کو ٹوئٹر پر ‘ImranKhanStudentsKiSunLo’ کے ہیش ٹیگ کے ذریعے وزیراعظم سے امتحانات منسوخ کروانے کی درخواست کی جار ہی ہے۔

حیران کن طور پر اس ٹاپ ٹرینڈ میں اب تک 14 لاکھ سے زائد ٹوئٹس کی جاچکی ہیں جو پاکستان میں چلنے والے ٹاپ ٹرینڈز کی ٹوئٹس کی تعداد سے کہیں زیادہ ہے۔

علاوہ ازیں آج ‘Shafqat mehmood’ کا ہیش ٹیگ بھی ٹرینڈ کرتا رہا اور طلبہ کی جانب سے ان سے مستعفی ہو نے کا مطالبہ اور ٹوئٹر پر وفاقی وزیر تعلیم کو اَن فالو کرنے کا اعلان کیا جاتا رہا۔

بورڈ کے امتحانات کے حوالے سے طلبہ کے مؤقف کے اہمیت دینے کے لیے شوبز سمیت دیگر معروف شخصیات کی جانب سے پوسٹس شیئر کی گئی ہیں۔

خیال رہے کہ کورونا وائرس کی وجہ سے گزشتہ برس تعلیمی اداروں کی بندش کے بعد پہلی سے بارہویں جماعت کے طلبہ کو امتحانات کے بغیر اگلی جماعت میں پروموٹ کیا گیا تھا۔

یاد رہے کہ گزشتہ برس 15 مارچ سے تمام تعلیمی ادارے بند کر دیے گئے تھے جبکہ سندھ میں 26 فروری کو پہلا کیس سامنے آنے کے بعد سے ہی تعلیمی ادارے بند تھے جو 6 ماہ کی طویل بندش کے بعد 15 ستمبر کو دوبارہ کھولے گئے تھے تاہم وبا کی دوسری لہر کے باعث انہیں 26 نومبر کو بند کردیا گیا تھا۔

گزشتہ سال 10 سے 11 ماہ کے دورانیے کے دوران اسکولز کے اکثر بچوں کا تعلیمی سلسلہ یا تو معطل رہا یا طلبہ آن لائن تعلیم حاصل کرتے رہے، بعدازاں جنوری میں تعلیمی اداروں کو کھولنے کا اعلان کیا گیا تھا جس کے بعد کورونا وائرس کیسز میں اضافے کی وجہ سے 15 مارچ سے ہی بتدریج اسکولوں کی بندش کا سلسلہ شروع کیا گیا تھا جنہیں مئی میں امتحانات کے لیے کھولا گیا تھا۔